batbold

Ангилал: мэдээ

  • ОЮУТОЛГОЙН ОРДЫГ ТҮШИГЛЭН 3000 АЙЛЫН ОРОН СУУЦ БАРИХААР ШИЙДВЭРЛЭЛЭЭ

     

    ~ Засгийн газрын ээлжит хуралдаан 2012 оны 01 дүгээр сарын 18-ны өдөр болов. Оюутолгойн ордыг түшиглэн 3000 айлын орон сууц барих, Даланзадгад хотын дулааны цахилгаан станцыг хэвийн ажиллуулах, Сайн малчин, Улсын тэргүүний тариаланч, тэргүүний тариаланч хамт олон шалгаруулах зэрэг асуудлыг хэлэлцэн шийдвэрлэсэн нь онцлох асуудал байлаа ~

    Өнөөдрийн Засгийн газрын хуралдаанаас нэгэн чухал шийдвэр гаргалаа. Оюутолгой ордыг түшиглэн цогцолбор хотхон байгуулах газрын байршлыг сонгох тухай асуудлыг хэлэлцэв. Үүнтэй холбогдуулан ордыг түшиглэн 3000 айлын орон сууц бүхий цогцолбор хотхон байгуулахыг дэмжиж, бүтээн байгуулалтын ажлын явцыг тухай бүр нь танилцуулж байхыг холбогдох сайд нарт даалгав. Засгийн газраас баримталж байгаа бодлогын дагуу “Оюутолгой” төслийг хэрэгжүүлэгчид болох “Айвенхоу Майнз” ХХК, “Рио Тинто групп”, “Эрдэнэс Оюутолгой” ХХК хамтран хотхон байгуулах төслийг хэрэгжүүлэх бөгөөд урьдчилсан байдлаар 100 орчим тэрбум төгрөгөөр санхүүжүүлнэ.

    Хотхон  ашиглалтад орсноор 12000 хүн шинээр амьдран суурьших боломж бүрдэх юм байна. Түүнчлэн уурхайтай холбогдох зам, сургууль, цэцэрлэг, эмнэлэг, зочид буудал, соёл урлаг болон амралтын цогцолбор хүрээлэн, худалдааны төвийг ч барихаар төлөвлөжээ. Оюутолгой төсөлд ажиллаж байгаа иргэд цэргийн алба хааж байгаа мэт амьдрах биш, бүх орчин  нөхцөлөөр хангагдсан орчинд амьдарч, ажиллах бололцоо ийн тавигдаж, орчин үеийн хоёр дахь “Эрдэнэт“-ийн шанг өмнийн говьд  тавих  нөхцөлийг Засгийн газар бүрдүүллээ. Оюутолгой ордыг нэн даруй эдийн засгийн эргэлтэд оруулах, орон нутгийн ард иргэд болон төсөлд ажиллаж байгаа нийт ажиллагсдын хувьд таатай нөхцөлд ажиллаж, амьдрах бололцоог хангасан маш чухал шийдвэр боллоо хэмээн Засгийн газрын гишүүд үзэж байна.

    ДАЛАНЗАДГАДЫН ДУЛААНЫ ЦАХИЛГААН СТАНЦЫГ ХЭВИЙН АЖИЛЛУУЛНА

    Засгийн газрын хуралдаанаар Өмнөговь аймгийн Даланзадгад хотын дулааны цахилгаан станцын найдвартай ажиллагааг хангах талаар авах арга хэмжээний тухай хэлэлцэн шийдвэр гаргалаа. Станцын үндсэн тоноглолд үүссэн доголдлыг арилган хэвийн ажиллуулах, өвлийн их ачааллын үед хэрэглэгчдийн цахилгаан эрчим хүчээр тасралтгүй, найдвартай хангах үүргийг Эрдэс баялаг, эрчим хүчний сайд Д.Зоригтод өгөв. Энэ дагуу станцын турбогенераторт шинээр суурилуулах турбин, генераторын тоноглолыг яаралтай худалдан авч, гуравдугаар сарын 15-ны дотор угсарч дуусгах юм. Импортоор худалдан авах турбин, генераторын тоноглолын Гаалийн болон Нэмэгдсэн өртгийн албан татварт шаардагдах хөрөнгийг Засгийн газрын нөөц сангаас гаргах асуудлыг судалж, шийдвэрлэхийг холбогдох сайд нарт даалгалаа.

    Мөн станцын үндсэн тоноглолын ажиллагааг тогтворжуулахад мэргэжил, арга зүйн туслалцаа үзүүлэх зорилгоор төвийн бүсийн эрчим хүчний үйлдвэр, компаниудаас нарийн мэргэжлийн, чадварлаг инженер, техникийн ажилтныг станцад түр хугацаагаар ажиллуулах болов. Хэдийгээр Даланзадгадын дулааны цахилгаан станц “0” зогсолт хийгээгүй ч тоноглолын хүчин чадлаас хамаарч оройн их ачааллын үед эрчим хүчийг 2-2,5 цаг хязгаарлаж байна. Үүний зэрэгцээ Тавантолгой-Даланзадгадын чиглэлийн 110 кВ-ын цахилгаан дамжуулах агаарын шугамын барилга угсралтын ажлыг түргэтгэх зорилгоор гүйцэтгэгч компанийн барилга угсралтын ажлын графикийг шинэчлэн тогтоож, шугамыг тавдугаар сарын 15-ны дотор ашиглалтад оруулахыг  салбарын сайдад үүрэг болгов хэмээн Засгийн газрын Хэвлэл, мэдээллийн албанаас мэдээллээ.  

    НӨӨЦИЙН ӨВС, ТЭЖЭЭЛИЙГ ХУДАЛДАНА

    2011-2012 оны мал өвөлжилт, хаваржилтын нөхцөл байдал хүндэрч болзошгүй учир улсын нөөцийн цэг, салбаруудад хадгалж байгаа өвс, тэжээлийг худалдан борлуулж, борлуулалтын орлогоор энэ оны дөрөвдүгээр улиралд багтаан нөхөн бүрдүүлэхийг Монгол Улсын Шадар сайд, Улсын Онцгой комиссын дарга М.Энхболдод даалгалаа. Улсын нөөцийн бараа, материалыг сэлгэн шинэчлэх зорилгоор холбогдох хууль, журмын дагуу улирал тутам 20 хүртэл хувийг худалдан борлуулж, борлуулалтын орлогоор нь тоо хэмжээг нь бууруулалгүй буцаан нөхөн бүрдүүлдэг юм. Өвс, тэжээлийн хувьд хэрэгцээний шаардлагаас хамаарч 1-5 дугаар сард худалдан борлуулж, сэлгэн шинэчлэх нөхцөл бүрддэг байна.

    Цаг агаарын урьдчилан сэргийлэх мэдээнээс үзвэл энэ сард Алтай, Хангай, Хэнтий, Хөвсгөлийн уулархаг нутгаар 30-39 градус, шөнөдөө уулархаг нутаг болон томоохон голын хөндий, ялангуяа Идэр, Тэсийн голын хөндийгөөр 40-43 хэм хүртэл хүйтэрч байна. Нийт нутгийн 80 орчим хувьд цасан бүрхүүл тогтож, 10 см-ээс дээш зузаан цастай байгаа нутгуудад цас улам нягтарсан нь мал бэлчихэд хүндрэл учруулж эхэлжээ. Энэ нь 2011-2012 оны мал өвөлжилтөд  бэрхшээлтэй байдал үүсгэж болзошгүй учир нөөцийн өвс, тэжээлийг худалдах нь зүйтэй гэж үзэв хэмээн Засгийн газрын Хэвлэл, мэдээллийн албанаас мэдээллээ.

    СУРГАЛТТАЙ ХОЛБООТОЙ ЖУРМУУДЫГ БАТАЛЛАА

    Засгийн газрын хуралдаанаар “Сургалтын төрийн сангийн хөрөнгийг захиран зарцуулах журам болон Удирдах зөвлөлийн бүрэлдэхүүнийг баталлаа. Мөн “Монгол Улсын болон гадаад орны дээд боловсролын сургалтын байгууллагад суралцагчдад тэтгэлэг олгох журам”, “Монгол Улсын болон гадаад орны дээд боловсролын сургалтын байгууллагад суралцагчид сургалтын төлбөрийн болон амьжиргааны зардлын зээл олгох, эргэн төлүүлэх журам”, Монгол Улсын эрэлт ихтэй мэргэжлийн жагсаалтыг тус тус баталлаа. Их, дээд сургууль, коллежийн аттестатчиллыг ирэх оны нэгдүгээр сарын нэгний дотор дуусгах, аттестатчилалд хамрагдаагүй сургуулийн суралцагчдад магадлан итгэмжлэлийн үр дүнгээр суралцагчийн тэтгэлэг, зээл олгох болсон байна.

    Түүнчлэн Сургалтын төрийн санд шаардагдах хөрөнгийг жил бүрийн улсын төсөвт тусгаж, тогтоолын хэрэгжилтэд хяналт тавьж ажиллахыг холбогдох сайд нарт даалгав. Монгол Улсын Ерөнхий сайд С.Батболдын өгсөн үүргийн дагуу Төрийн сангийн санхүүжилтээр суралцагчдыг жилд гурван удаа ил тод, нээлттэй уралдаант шалгаруулалт явуулан сонгож байгаа тухай салбарын сайд хуралдааны үеэр танилцуулж байлаа. Цаашид үндэсний, урамшууллын, сургалтын төлбөрийн болон амьжиргааны зардлын гэсэн тэтгэлэг олгохоор боллоо.

    Үндэсний тэтгэлгийг аттестатчилагдсан их, дээд сургууль, коллежид зохих журмын дагуу элсэж, суралцах чадвар, идэвх санаачилга, төлөвшлөө илтгэн харуулсан өдрийн ангийн суралцагчдад суралцах хугацаанд олгох юм. Урамшууллын тэтгэлгийг Засгийн газраас тодорхойлсон эрэлт ихтэй мэргэжлээр элсэлтийн шалгалтын дундаж нь 720 ба түүнээс дээш оноотой шинэ элсэгчид, 3,2 ба түүнээс дээш голч дүнтэй суралцаж байгаа бакалавр, магистр, докторын зэргийн суралцагчид, мөн улсын хэмжээний олон улсын зэрэглэлийн олимпиадад эхний гурван байранд шалгарсан суралцагчид үндэсний тэтгэлгээс 50,70,100 хувиар тооцож олгох юм.

    Түүнчлэн амьжиргааны зардлын тэтгэлгийг Засгийн газар хоорондын гэрээ, хэлэлцээрийн дагуу манай улсын дээд боловсролын сургалтын байгууллагад суралцаж байгаа гадаадын иргэнд, Засгийн газар хоорондын гэрээ, хэлэлцээрийн дагуу гадаадад амьжиргааны тэтгэлэггүй суралцаж байгаа Монгол Улсын иргэнд олгохоор болов. Дотоодын дээд боловсролын сургалтын байгууллагад суралцаж байгаа бүтэн өнчин, хөгжлийн бэрхшээлтэй суралцагчид буюу эцэг эх нь хоёулаа хөгжлийн бэрхшээлтэй, хөдөлмөрийн чадвараа бүрэн алдсан гишүүнтэй өрхийн нэг суралцагчид сургалтын төлбөрийн тэтгэлэг олгохоор болсон байна.

    Элсэлтийн ерөнхий шалгалтыг 600 буюу түүнээс дээш оноо авсан шинэ элсэгч сургалтын төлбөрийн зээл авах эрхтэй боллоо. Мөн хагас өнчин, хөгжлийн бэрхшээлтэй суралцагчид, малчин, бага орлоготой өрхийн суралцагчид, гэрээт цэргийн албыг 2 жилээс доошгүй хугацаагаар хаасан суралцагчид сургалтын төлбөрийн зээл олгоно. Гадаад улсад суралцаж байгаа суралцагчид олгох сургалтын төлбөрийн болон амьжиргааны зардлын зээлийг нэг удаа, бакалавр, магистрт хоёр жил, докторантад гурван жил, докторын дараах сургалтад хамрагдагчид нэг жил хүртэл хугацаатайгаар үл хөдлөх хөрөнгийг барьцаалан олгоно.
     
    САЙН МАЛЧИН, ТЭРГҮҮНИЙ ТАРИАЛАНЧ, АЖ АХУЙН НЭГЖ, БАЙГУУЛЛАГЫГ ШАЛГАРУУЛНА

    Энэ онд 50 хүртэл малчныг “Сайн малчин”, 20 хүртэл иргэнийг “Улсын тэргүүний тариаланч”, 12 хүртэл аж ахуйн нэгж, байгууллагыг “Улсын тэргүүний тариаланч хамт олон”-оор шалгаруулахаар Засгийн газрын хуралдаанаас шийдвэрлэлээ. Энэ жил 21 аймгаас 72 малчин, 16 тариаланч хамт олон, 26 тариаланч, ногоочныг шалгаруулахаар материал нь хүнс, хөдөө аж ахуй, хөнгөн үйлдвэрийн яаманд иржээ. Мал сүргийн тоо өмнөх оноос 10 хувиар нэмэгдэн, 36 сая болж өссөн, мал аж ахуйн салбар болон газар тариалангийн салбарын үйлдвэрлэлийн хэмжээ тогтвортой нэмэгдэж байгаа зэргийг харгалзан сайн малчин, тэргүүний тариаланч, тариаланч хамт олны тоог нэмэх нь зүйтэй гэж салбарын яам үзсэн байна. 

    Үүнийг Засгийн газрын хуралдаанаар хэлэлцэн энэ онд 50 хүртэлх малчныг “Сайн малчин”, 20 хүртэлх иргэнийг “Улсын тэргүүний тариаланч”, 12 хүртэлх аж ахуйн нэгж, байгууллагыг “Улсын тэргүүний тариаланч хамт олон”-оор шалгаруулахаар Засгийн газрын хуралдаанаас шийдвэрлэв.
    Үүнтэй холбогдуулан Засгийн газрын тогтоолын дагуу тухайн жилд 15 хүртэлх малчин, 8 хүртэлх аж ахуйн нэгж, байгууллага, 15 хүртэлх иргэнийг шалгаруулдаг байсан журамд өөрчлөлт орууллаа. Жилийн дөрвөн улиралд, халуун хүйтний ямар ч цагт мал сүргээ маллаж өсгөх, үүлдэр угсаа, бүтээгдэхүүний чанарыг нь сайжруулах гэж зүтгэж яваа малчдаа Засгийн газар урамшуулж, урам зориг өгсөн шиг өгөх хэрэгтэй гэж гишүүд хэлж байлаа.

    ЦӨМИЙН ЭНЕРГИЙН ГАЗРЫН ДАРГЫГ АЖЛААС НЬ ЧӨЛӨӨЛӨВ

    Цөмийн энергийн газрын дарга С.Энхбатыг үүрэгт ажлаас нь чөлөөлөхөөр Засгийн газрын хуралдаанаас шийдвэрлэлээ. Эрхэлсэн ажилдаа хайнга хандаж байсны улмаас Цөмийн энергийн газрын ажил удаан хугацаагаар цалгардаж, өгсөн үүрэг, даалгавар хэрэгжихгүй байгааг Засгийн газрын гишүүд шүүмжиллээ. Засгийн газрын 2011 оны 8 дугаар сарын 24-ний өдрийн хуралдаанаас ажлаа танилцуулах үүргийг Цөмийн энергийн газрын дарга С.Энхбатад өгсөн боловч өнөөг хүртэл биелүүлээгүй, эрхэлсэн сайдын зөвшөөрөлгүйгээр удаа дараа гадаадад явж байсан тухай ч Засгийн газрын хуралдааны үеэр яригдсан байна.

    ТОВЧ МЭДЭЭ

    • Улсын төсвийн алдагдал, төсвийн цаг зуурын хүндрэлийг даван туулахад зориулан 300 хүртэл тэрбум төгрөгийн Засгийн газрын үнэт цаасыг энэ оны төсвийн жилд гаргаж, арилжаалах тухай асуудлыг Улсын Их Хуралд өргөн мэдүүлэхээр болов. Төсөл батлагдсанаар хөрөнгө оруулалт нэмэгдэх, үнэт цаасны зах зээлийг идэвхжүүлэх зэргээр эдийн засгийн өсөлтөд эерэгээр нөлөөлнө. Мөн төсвийн зардал, санхүүжилтийг цаг хугацаанд нь саадгүй гүйцэтгэх, санхүүгийн зах зээлд дэх суурь хүү тогтоох, санхүүгийн захын хэрэгслийг нэмэгдүүлэх боломж бүрдэх юм. Улсын төсвийн 2012 оны нийт орлого 4,630.7 тэрбум төгрөгт хүрч нийт зарлага 4,865.9 тэрбум төгрөг болж төсвийн нийт тэнцэл 235.2 тэрбум төгрөгийн алдагдалтай гарахаар байна.
    • “Төсөв, санхүүгийн ил тод байдлыг хангахад дагаж мөрдөх журам”-ыг батлахаар болов. Энэ нь төсөвт байгууллагууд, төр, орон нутгийн өмчит болон өмчийн оролцоотой аж ахуйн нэгжүүдэд хамаатай. Журмын дагуу дээрх байгууллагууд төсөв, санхүүгийн мэдээллээ ил тод болгон, төсвийн талаарх мэдээллийг иргэд, олон нийтэд танилцуулж, танилцах боломжоор хангах боломжийг бүрдүүлэх юм байна. Нийтэд хамааралтай үйл ажиллагаа явуулдаг сангууд, тухайлбал “Хөдөлмөр эрхлэлтийг дэмжих сан”, “Сургалтын төрийн сан”, “Жижиг, дунд үйлдвэрлэлийг дэмжих сан” зэрэг байгууллагын мэдээллийг цахим хэлбэрээр иргэд, олон нийтэд хүргэж байх нь зүйтэй гэж Ерөнхий сайд үзэж байлаа. Энэ асуудлыг ойрын үед Засгийн газрын хуралдаанд танилцуулахыг холбогдох албан тушаалтнуудад тэмдэглэлээр үүрэг болгов.   
    • Монгол Улсын Ерөнхий сайд С.Батболдын 2011 оны 12 дугаар сарын 8-9-ний өдөр Бүгд Найрамдах Индонези Улсын Балид болсон Ардчиллын төлөөх Балийн дөрөвдүгээр чуулга уулзалтад оролцсон дүнтэй танилцан Үндэсний аюулгүй байдлын зөвлөлд оруулахаар боллоо.
    • “Газар хөдлөлтийн гамшгаас урьдчилан сэргийлэх, эрсдлийг бууруулах, бэлэн байдлыг дээшлүүлэх, холбогдох байгууллагуудыг нэгдсэн удирдлага, зохицуулалтаар хангах үүрэг бүхий Байнгын ажиллагаатай зөвлөл” болон  Засгийн газраас хийж гүйцэтгэсэн ажлын явцын талаар Монгол Улсын Шадар сайд М.Энхболд танилцуулав. Үүнтэй холбогдуулан уг асуудлыг Үндэсний аюулгүй байдлын зөвлөлд танилцуулах болжээ. Нийт төлөвлөсөн 27 ажлын 15 нь бүрэн хэрэгжиж, 12 нь хэрэгжих шатандаа байгаа бөгөөд 87.8 хувийн биелэлттэй байна гэсэн тоо гарчээ.
    • Засгийн газар өнгөрсөн онд иргэдээс 1458 санал, өргөдөл, гомдол хүлээн авч 1252-ыг нь холбогдох байгууллагуудаар шийдвэрлүүлэхээр хүргүүлж, 206-г нь судалж байна. Иргэдээс ирүүлсэн санал 2010 онтой харьцуулахад 48.7 хувиар, хүсэлт 12.7 хувиар буурч, гомдол 6.2 хувиар өсчээ. Мал аж ахуй, газар тариалангийн салбартай холбоотой санал, хүсэлт өмнөх оноос долоо дахин буурсан нь 2011 онд энэ салбарт оруулсан хөрөнгө оруулалтын хэмжээ ихээхэн нэмэгдсэн, иргэн, аж ахуйн нэгжүүд тоног төхөөрөмжөө шинэчлэн, хөнгөлөлттэй зээл авч үйлдвэрлэлээ явуулсантай холбоотой байна. Түүнчлэн хишиг, хувиа бөөнөөр авах хүсэлтэй иргэдийн тоо өмнөх онтой харьцуулахад  хоёр дахин өсчээ. Энэ нь иргэд орон сууцны зээл, сургалтын төлбөр төлөх, малчид хоршиж аж ахуй эрхлэх, жижиг, дунд үйлдвэрлэл, өрхийн үйлдвэрлэл эрхлэх гэсэнтэй холбоотой байжээ.
    • Хүүхдийн эрхийг хамгаалах хууль тогтоомжийн биелэлтийг хянах зорилгоор хүүхдийн эрхийн нийтлэг шалгуур үзүүлэлтийг хавсралтаар баталлаа. Шалгуур үзүүлэлтийн мэдээллийг жил бүрийн нэгдүгээр улиралд багтаан мэдээллийн санд төвлөрүүлж, харьцуулсан дүн шинжилгээ хийж байхыг Засгийн газрын гишүүд, аймаг, нийслэлийн Засаг дарга нарт үүрэг болголоо. 38 шалгуур үзүүлэлтээр сум, дүүрэг, аймаг, нийслэлийн мэдээллийг жилд нэг удаа нэгдсэн санд төвлөрүүлэх юм байна.

  • С.Батболд: Хамтарсан Засгийн газрын хөтөлбөрийг 100 хувь биелүүлэхийн төлөө ажиллана

    Монгол Улсын Ерөнхий сайд С.Батболд сэтгүүлчдэд дэлгэрэнгүй мэдээлэл хийв. Засгийн газрын тэргүүн мэдээллийн эхэнд, Монгол Улсын Засгийн газрыг бүрдүүлэх ажил ид явж байгааг хэллээ. Өнгөрсөн долоо хоногийн пүрэв гаригт АН-ын дарга, Засгийн газрын Тэргүүн шадар сайд Н.Алтанхуяг Ерөнхий сайдтай уулзаж, ҮЗХ-ны хурлын шийдвэрээр хамтарсан Засийн газрын бүрэлдэхүүнд АН-аас орж ажиллаж байгаа зургаан сайд чөлөөлөгдөх өргөдлөө өгснийг албан ёсоор мэдэгдэж, гарын үсэгтэй өргөдлөө гардуулсныг эхлээд дурдав.

    Төр, засгийн ажил завсаргүй, цалгардахгүй явах ёстой. Энэ зарчмын үүднээс Ерөнхий сайдын хувьд, УИХ-д олонхийг бүрдүүлж байгаа  МАН-ын даргын хувьд асуудлыг МАН-ын Удирдах зөвлөлд шуурхай танилцуулсан байна. Засгийн газрыг шуурхай, бүрэн бүрэлдэхүүнээр нь ажиллуулах нөхцөл боломжоор хангах ёстой. Тодорхой зарчмаар хангах ёстой гэдгийг Удирдах зөвлөлд танилцуулснаа Ерөнхий сайд хэллээ. Засгийн газрыг цаг хугацаа алдахгүйгээр, төр, засгийн ажил цалгардахгүйгээр, завсар гаргахгүйгээр бүрдүүлэх ёстой гэсэн зарчмыг Удирдах зөвлөл дэмжсэн байна.

    Засгийн газар одоогийн бүтэц бүрэлдэхүүнээрээ ажиллах ёстой гэж үзжээ. Хамтарсан Засгийн газрыг 2008 онд байгуулахдаа мөрийн хөтөлбөр боловсруулж тавьсан. Хөтөлбөрийн агуулга, цар хүрээ Монгол Улсын хөгжил дэвшлийг нэлээд томоор урагш ахиулах чиглэлтэй. Энэ ажил дунджаар 82 хувьтай явж байгаа. “Ажил хийвэл дуустал, давс хийвэл уустал” гэдэг Монгол ардын зүйр үгээр Засгийн газар тавьсан зорилтуудаа бүрэн дүүрэн 100 хувь хэрэгжүүлэхийн төлөө цаашид ажиллах ёстой гэдэг зарчмыг гол болгосноо Ерөнхий сайд мэдээлэлдээ дурдсан юм. АН Засгийн газраас гарсан ч МАН үүрэг хариуцлагаа бүрэн ухамсарлаж ард түмнийхээ итгэл дэмжлэгээр өмнөө тавьсан зорилтуудаа өөрчлөхгүйгээр бүрэн хэрэгжүүлэхийн төлөө ажиллана гэдгээ мөн илэрхийллээ.

    Хөтөлбөрт дэвшүүлсэн зорилтуудыг хэрэгжүүлэхэд тохирсон бүтэц, бүрэлдэхүүнийг УИХ анхнаасаа баталсан. Нэгэнт зорилтууд хэвээрээ байгаа учир МАН дангаараа тэдгээрийг хэрэгжүүлэхийн төлөө эрч хүчтэй итгэлтэй ажиллаж чадна гэдгийг Ерөнхий сайд энэ үеэр илэрхийлсэн юм. МАН түүхэн хариуцлагыг үүрсээр ирсэн, өнөөдөр ч хүлээж аваад хэрэгжүүлэх чадвартай, бололцоотой улс төрийн хүчин. Цаашдаа ч хийж чадна гэдэгт ард түмэн итгэдэг  гэдгийг Гүйцэтгэх засаглалыг тэргүүн сэтгүүлчдэд хэлээд зургаан сайдаа шуурхай томилж, Засгийн газрын өнөөгийн бүтцийг хэвээр үлдээн ажиллуулна гэдгээ мэдэгдсэн юм. Тавьсан зорилтуудаа хэрэгжүүлэх хамгийн хариуцлагатай сүүлийн жилдээ орсон тул бүтцийг өөрчлөх шаардлагагүй гэж үзжээ.

    Зарим орон тоог цөөлөх санал гарч байгаа ч өнөөгийн хэрэгжүүлж буй зорилтод үл хамаарах тул цаашид шинэ сонгуулийн дараа шинэ зорилтууд хэрэгжүүлэхдээ түүнд тохирсон бүтэц, бүрэлдэхүүн бүрдүүлэх үедээ гарцаагүй бодолцох ёстой гэдгийг ч хэлж байв. Шинээр сайдад нэр дэвшүүлээд буй хүмүүсийн гурвыг УИХ-аас, гурвыг гадна талаас төрийн мэргэшсэн, өндөр чадвартай, туршлагатай гишүүдээсээ сонгожээ. МАН боловсон хүчин сайтай тул Ерөнхий сайдын саналаар зарим салбарт өрсөлдөөний зарчим дээр нэр дэвшигчдийг тодруулсан гэлээ. Ингээд гаргасан шийдвэрээ Монгол Улсын Ерөнхийлөгчид зөвшилцөхөөр өнөөдөр хүргүүлжээ. Өмнө нь өнгөрсөн долоо хоногийн баасан гаригт Монгол Улсын Ерөнхийлөгчтэй уулзаж санал бодлоо солилцсон гэдгээ дурдлаа.

    Засгийн газрын гишүүнд нэр дэвшигчдийн хувьд МАН-ын туршлагатай, шилдэг  боловсон хүчнүүд гэдгийг онцлов. Төр, засгийн үйл ажиллагаа бол гол зорилт, бүх эрч хүчээ түүнд зориулах ёстой тул МАН-ын ерөнхий нарийн бичгийн даргыг Тэргүүн шадар сайдад санал болгосон байна. МАН-ын гол боловсон хүчнүүдийг намын үйл ажиллагаанд чиглүүлэх бус төр, засгийн үйл ажиллагаанд чиглүүлэх ёстой хэмээн үзэж ийм сонголтод хүрсэн аж. “Намынхаа шилдэг боловсон хүчнүүд, тэр дотроо МАН-ын ерөнхий нарийн бичгийн даргыг Засгийн газрын бүрэлдэхүүнд оруулж байгаа нь өндөр ач холбогдол өгч буйн илэрхийлэл юм.

    Сайдад нэр дэвшигчид 12-25 жил төр, захиргааны ажил алба хашсан, төр, захиргаа, улс төр, мэргэжил, салбарын  шалгуурыг бүрэн дүүрэн хангах хүмүүс байгаа. Тэргүүн шадар сайдад МАН-ын ерөнхий нарийн бичгийн дарга У.Хүрэлсүх, Сангийн сайдад УИХ-ын Төсвийн байнгын хорооны дарга Д.Хаянхирваа, ЗТБХБ-ын сайдад энэ салбарт дэд сайд байсан УИХ-ын гишүүн Ц.Дашдорж, Батлан хамгаалахын сайдад энэ салбарын мэдлэгтэй, энэ салбарын төлөө сэтгэлтэй залуу боловсон хүчин Ж.Энхбаярыг дэвшүүллээ. Эрүүл мэндийн сайдад салбартаа танигдсан, мэргэжлийн, салбартаа төрийн захиргааны хамгийн өндөр албан тушаалыг хашиж байгаа ЭМЯ-ны Төрийн нарийн бичгийн дарга Н.Хүрэлбаатар, Байгаль орчны сайдад ГХЯ-ны Төрийн нарийн бичгийн даргаар ажиллаж байсан Д.Цогтбаатарыг дэвшүүллээ. Байгаль орчны асуудал бол дотоодын ч, олон улсын харилцааны ч, бүс нутгийн ч, дэлхий нийтийн ч, аялал, жуулчлалын ч асуудал юм” гэлээ. Чадвартай, шилдэг улстөрчдийг сайдын суудалд нэр дэвшүүлснээ Ерөнхий сайд дахин илэрхийлсэн юм гэж Засгийн газрын Хэвлэл мэдээллийн албанаас мэдээллээ.

  • Хэчнээн өрхийн амьжиргааг дээшлүүлэв гэдгээр нь Засаг дарга нарын жилийн ажлыг дүгнэнэ

    Монгол Улсын Засгийн газар өнгөрсөн онд хөдөлмөр эрхлэлтийг дэмжиж, ажлын байр бий болгон иргэдээ байнгын ажилтай, орлоготой байлгахад түлхүү анхаарсан. Зорилтод жилийн ажлын дүнд 72 мянган иргэн байнгын ажлын байртай болсон. Аливаа өрх гэр ажилтай, орлоготой гэмээ нь амьдарсан шиг амьдарна. Тиймээс ч Ерөнхий сайд С.Батболд шинэ гарч буй 2012 оныг өрх, гэр бүлийг дэмжих жил болгож энэ зорилтын хүрээнд бага орлоготой өрх, жижиг бизнес эрхлэгчдийг дэмжихэд онцгой анхаарна гэж хэлсэн. Тэрбээр шинэ оны ажлын анхны өдрөө хөдөө орон нутагт очиж, жижиг дунд үйлдвэрлэл эрхлэгчид, мэргэжлийн сургалт үйлдвэрлэлийн төвийн суралцагчид, иргэдийн санаа бодлыг дунд нь орж сонссоноор эхэлсэн. 

    Засгийн газрын тэргүүн С.Батболд өнгөрсөн мягмар гаригт буюу нэгдүгээр сарын 10-ны өдөр Ерөнхий сайд болон МАН-ын даргын хувиар “Хархорин”, “Нарантуул” зэрэг худалдааны төвд лангуу түрээслэн ажиллуулдаг худалдаа эрхлэгчдийн төлөөлөлтэй уулзалт хийхдээ ч мөн зорилтод жилийн талаар танилцуулж, тэдний байр суурийг сонссон. Энэ бүхний баталгаа болж нэгдүгээр сарын 11-ний өдрийн Засгийн газрын хуралдаанаар 2012 оныг Өрхийн хөгжлийг дэмжих жилээр зарлаж ”Өрхийн хөгжлийг дэмжих үндэсний хөтөлбөр”-ийг хэлэлцэн баталсан юм.

    Мөн Засгийн газрын шинэ оны анхны тогтоолоор “Өрхийн хөгжлийг дэмжих жилийн ажлыг улсын хэмжээнд удирдан зохион байгуулах, хэрэгжүүлэх үйл ажиллагаанд хяналт тавих үүрэг бүхий Үндэсний хороог төрийн болон төрийн бус байгууллагуудын  төлөөлөлтэйгээр байгуулан ажиллаж эхлээд байгаа. Үндэсний хороог Монгол Улсын Ерөнхий сайд С.Батболд даргалж байгаа бөгөөд тэрбээр өнөөдөр анхны хуралдаанаа Төрийн ордонд хийлгэлээ.

    Өрхийг өөрсдийнх нь оролцоо, санаачилгад тулгуурлан боловсрол, эрүүл мэнд, сэтгэл зүй, нийгмийн халамж, хөдөлмөр эрхлэлт, үйлдвэрлэл, үйлчилгээний зэрэг багц үйлчилгээгээр дэмжиж өрхийн амьжиргааг дээшлүүлэхэд анхаарч ажиллахад үйл ажиллагаагаа чиглүүлэх учиртай. Энэ хүрээнд өрхийг дэмжих, ялангуяа бага орлоготой иргэдийнхээ амьжиргааг дундаж хэмжээнд хүргэх, амьжиргаагаа дээшлүүлэх талаар санаачилгатай ажиллаж байгаа өрхийг урамшуулах бодлого хэрэгжүүлнэ гэдгээ Үндэсний хорооны дарга С.Батболд хуралдааны үеэр хэллээ.

    Ингэхдээ дан ганц санхүүгийн дэмжлэг үзүүлэх бус хөдөлмөрийн  чадвартай гишүүдийг нь байнгын ажлын байраар хангаж, амьжиргааны эх үүсвэртэй болгох нь чухал. Зорилтод жилийн үйл ажиллагааны гол цөм нь иргэдийн идэвх санаачилгатай ажиллах, амьжиргаагаа өөд нь татах амьдралын арга хэлбэрийг илүүтэй урамшуулахад түлхүү анхаарах зарчим байх болно гээд эзэн хичээвэл заяа хичээнэ хэмээн Ерөнхий сайд С.Батболд хэллээ. Эндээс залхуурлыг арилгах, амьдрах арга ухаанаа олоход ашиг тустай олон арга хэлбэрийг олж харна гэдгийг ч тэрбээр тодотгоод өрх, иргэдийн аж амьдралд бодитой, нааштай үр дүн, ахиц гаргахыг шат шатандаа зорьж, хүн хүч, төсөв хөрөнгийг дайчлан ажиллахыг чухалчиллаа.

    Өрхийн хөгжлийг дэмжих жилийн ажлыг зохион байгуулахтай холбогдуулан Монгол Улсын Ерөнхий сайд С.Батболд Засгийн  газрын гишүүд болон аймаг нийслэлийн Засагт дарга нарт албан даалгавар хүргүүлж, тодорхой үүрэг даалгавар өглөө. Өнгөрсөн жил орон нутгийн удирдлагуудын ажлыг дүгнэх гол үзүүлэлт нь хөдөлмөр эрхлэлтийг хэрхэн дэмжив, хэчнээн хүн ажлын байртай болов гэдгээр хэмжигдэж байсан бол энэ жил өрх, иргэдийн амьжиргааг дэмжихэд чиглэгдсэн арга хэмжээ, үр дүнгээр үнэлэх болно. Манай улсын 742 мянган өрх, түүний дотор нийгмийн дэмжлэг, туслалцаа шаардлагатай байгаа өрхүүдийн амьдрал ахуйд бодитой өөрчлөлт, ахиц гаргахад Үндэсний хорооны нийт гишүүдийн хүчин чармайлт, хамтын ажиллагаа чиглэгдэх учиртай гэдгийг Засгийн газрын тэргүүн С.Батболд үндэсний хорооныхоо гишүүдэд онцлон хэллээгэж Засгийн газрын Хэвлэл мэдээллийн албанаас мэдээллээ.

  • ИМПОРТЛОГЧ АЖ АХУЙН НЭГЖҮҮД ХЭЛЭЛЦЭН ТОХИРОЛЦОЖ ҮНЭ НЭМСЭН НЬ ТОГТООГДЛОО

    ~ Засгийн газрын ээлжит бус хуралдаан 2012 оны 01 дүгээр сарын 13-ны өдөр болов.  Бензин, шатахууны үнийн өсөлт юунаас болж үүдсэнийг шалгасан дүн, гаргасан дүгнэлтийг хэлэлцэн, буруутай албан тушаалтнуудыг үүрэгт ажлаас нь чөлөөллөө ~

    Өнгөрсөн амралтын өдрүүдэд үүссэн үнийн хөөрөгдлийн учир шалтгааныг бодитоор тогтоож, үнэ үндэслэлгүй нэмсэн газрууд, ажилдаа хариуцлага алдсан албан тушаалтнуудад зохих шийтгэлийг нь оногдуулж, Засгийн газраас шуурхай арга хэмжээ авлаа. Монгол Улсын Ерөнхий сайд С.Батболд өнгөрсөн даваа гарагаас эхлэн өөрийн шууд удирдлага дор Ажлын хэсгүүд гарган газар дээр нь шалгалт хийлгэн, бодит байдлыг тогтоосны үр дүнд үнийн хөөрөгдлийг зогсоож чадлаа. Шударга өрсөлдөөн, хэрэглэгчийн төлөө газраас газрын тосны бүтээгдэхүүн импортлон борлуулдаг нэр бүхий аж ахуйн нэгжүүдэд шалгалт хийсний дараа тэднийг хэлэлцэн тохиролцсоны дагуу үнэ нэмсэн гэж дүгнэсэн байна.     

    Хяналт, шалгалтын дүнг Засгийн газрын өнөөдрийн ээлжит бус хуралдаанаар хэлэлцэв. Газрын тосны бүтээгдэхүүний импорт, борлуулалт эрхэлдэг “НИК”, “Петростар”, ”Магнай трейд”, ”Содмонгол групп”, “Шунхлай групп”, ”Жаст ойл”, “Ойн бирж”, “М-Ойл”, “Петрожамп” компани энэ оны 01 дүгээр сарын 6-ны өдөр Эрдэс баялаг, эрчим хүчний яаманд хуралдан нэг литр АИ-92 автобензинийг 1850, дизелийн түлшийг 1885, А-80 бензинийг 1550 төгрөг хүртэл нэмэгдүүлэхээр тохиролцжээ. Улмаар аж ахуйн нэгжүүд тэр даруй үнээ нэмсэн бол “НИК”, “Петростар”, “Петрожамп”, “Содмонгол групп” хэд хоногийн дараа үнээ нэмж, бусдаасаа 30-35 төгрөгийн хямд үнээр бүтээгдэхүүнээ борлуулж эхэлсэн байна. 

    Үүссэн нөхцөл байдлын хүрээнд Шалгалтын хэсэг валютын ханшны нөлөөллийг Монголбанкны 11 дүгээр сарын дундаж албан ханштай зэрэгцүүлэн авч үзсэн байна. 2012 оны 01 дүгээр сарын 7-ны өдрийн ам.долларын албан ханш 1429 төгрөг болсон бөгөөд ханшийн зөрүүгээр нэг литр А-80 бензин 93, АИ-92 бензин 113, дизелийн түлш 118 төгрөгөөр нэмэгдэхээр байжээ. Мөн өдөр “Найман шарга” валютын захад ам.доллар 1475 төгрөг байсан бөгөөд ханшийн зөрүүгээр нэг литр А-80 бензин 133, АИ-92 бензин 163, дизелийн түлш 170 төгрөгөөр өсөхөөр байсан гэсэн тооцоо гарсан байна.

    Газрын тосны бүтээгдэхүүн импортлогч аж ахуйн нэгжүүд автобензин, дизелийн түлшний үнийг литр тутамд 235-260 төгрөгөөр нэмсэн нь ханшийн зөрүүгийн нөлөөллөөс нэлээд өндөр байгаа нь шалгалтаар тодорхой болжээ. Дээрх аж ахуйн нэгжүүд бүтээгдэхүүнийхээ үнийг нэмэх үед болон түүнээс хойш гаднаас авсан, өмнө нь валютын ханшны үнийн өсөлт ороогүй үнээр бүтээгдэхүүнээ борлуулж байгаа нь бэлтгэн нийлүүлэгч компаниас ирүүлсэн баримт, газрын тосны бүтээгдэхүүний нөөц хэвийн хэмжээнд байгаагаар нотлогдож байна гэж Шалгалтын хэсэг дүгнэжээ. Импортлогч аж ахуйн нэгжүүд нь бэлтгэн нийлүүлэгчтэй байгуулсан гэрээний нөхцлийн дагуу хугацаандаа төлбөрөө төлөөгүй байна. Өөрөөр хэлбэл нийт 7,5 сая ам.доллар буюу нийт төлбөрийнхөө 11,7 хувийг нь л төлжээ.

    “Импортлогч аж ахуйн нэгжүүд бүтээгдэхүүнийхээ үнийг харилцан тохиролцож нэмэгдүүлсэн нь Өрсөлдөөний тухай хуулийн 11.11-д “бараа бүтээгдэхүүний үнийг хэлцэн тогтоох”-ыг хориглоно гэж заасныг зөрчсөн үйлдэл болсон гэж үзэх үндэслэлтэй” гэж Шалгалтын хэсэг үзсэн байна. Түүнчлэн Эрдэс баялаг, эрчим хүчний сайдын 2009 оны 144 тоот тушаалаар байгуулагдсан Ажлын хэсэг нь газрын тосны бүтээгдэхүүний үнийг өсгөх талаар хэлэлцэн тохиролцож, шийдвэр гаргах эрх, үүрэггүй гэдгийг ч тогтоожээ. Холбогдох хууль тогтоомжид ч энэ талаархи зохицуулалт байхгүй учир Ажлын хэсгээс гаргаж байгаа газрын тосны бүтээгдэхүүний үнийг өсгөх шийдвэрийг хууль зүйн үндэслэлгүй гэж үзэх боломжтойг шалгалтын дүн нотолжээ. 

    Иймд Өрсөлдөөний тухай хуулийн холбогдох заалтыг зөрчиж, бүтээгдэхүүнийхээ үнийг харилцан тохиролцож нэмсэн дээрх нэр бүхий аж ахуйн нэгжүүдэд хуульд зааны дагуу өмнөх жилийн борлуулалтын орлогын тодорхой хувьтай тэнцэх хэмжээний төгрөгөөр торгох тухай асуудал яригдаж байна.

    АГЕНТЛАГИЙН ДАРГА НАРТ ХАРИУЦЛАГА ТООЦОЖ ҮҮРЭГТ АЖЛААС НЬ ЧӨЛӨӨЛЛӨӨ

    Засгийн газрын ээлжит бус хуралдаанаар Шударга өрсөлдөөн, хэрэглэгчийн төлөө газраас хийсэн шалгалтын дүнтэй танилцсаны дараа гишүүдийн дийлэнх нь холбогдох газрууд үнийн өсөлтөөс урьдчилан сэргийлэх арга хэмжээг цаг тухайд нь авч чадаагүй гэсэн дүгнэлтэд хүрлээ. Тухайлбал Эрдэс баялаг, эрчим хүчний дэд сайд Б.Ариунсанаар ахлуулсан Ажлын хэсгийн хуралдааны үеэр илт хууль зөрчсөн, үнэ нэмэх асуудал яригдаж байхад таслан зогсоох, буруу шийдвэр гаргаж болохгүй гэдгийг ойлгуулахын оронд хурал хаяж гарсан нь Шударга өрсөлдөөн, хэрэглэгчийн төлөө газрын орлогч дарга болон мэргэжилтнүүдийн буруу гэж үзлээ.

    Иймээс үүрэгт ажилдаа хариуцлагагүй хандсан гэсэн үндэслэлээр Газрын тосны газрын дарга Д.Амарсайхан, Шударга өрсөлдөөн, хэрэглэгчийн төлөө газрын дарга Д.Мандах нарыг үүрэгт ажлаас нь чөлөөлөх шийдвэрийг  хуралдаанаас гаргалаа. Мөн Газрын тосны газрын орлогч дарга Ц.Амараа, Шударга өрсөлдөөн, хэрэглэгчийн төлөө газрын орлогч дарга Ц.Доржпалам нарыг үүрэгт ажлаас нь чөлөөлөх, дээрх хүмүүсийг ажлаас нь чөлөөлсөнтэй холбогдуулан ажил цалгардуулахгүй байх үүднээс зохион байгуулалтын шуурхай арга хэмжээ авахыг Тэргүүн шадар сайд болон салбарын сайдад үүрэг болгов гэж Засгийн газрын Хэвлэл, мэдээллийн албанаас мэдээллээ.

  • Шинэ Үндсэн хуулиа хүндэтгэн цэцэг өргөлөө

    Монгол Улсын шинэ Үндсэн хууль батлагдаж, мөрдөгдөж эхэлсний 20 жилийн ой энэ өдрүүдэд тохиож байна. Энэхүү түүхэн үйл явдлыг хүндэтгэж Монгол Улсын Ерөнхийлөгч Ц.Элбэгдорж, УИХ-ын дарга Д.Дэмбэрэл, Монгол Улсын Ерөнхий сайд С.Батболд нар Д.Сүхбаатарын хөшөөнд цэцэг өргөж, эзэн Чингис хааны `хөшөөнд хүндэтгэл үзүүллээ. Төр засгийн удирдлагуудаас гадна 20 жилийн өмнө шинэ Үндсэн хуулиа батлалцан түүхэн бөгөөд хариуцлагатай үүргийг ард түмнээ төлөөлөн гүйцэтгэсэн АИХ-ын депутатууд ч энэхүү хүндэтгэлийн арга хэмжээнд оролцлоо.   

  • Хамтарсан Засгийн газраас гарах хүсэлтээ өглөө

    Монгол Улсын Ерөнхий сайд С.Батболдод хамтарсан Засгийн газарт ажиллаж байсан АН-ын гишүүн сайд нар албан тушаалаасаа чөлөөлөгдөх хүсэлтээ өнөөдөр өглөө. Тус бичгийг Монгол улсын Тэргүүн шадар сайд Н.Алтанхуяг өөрийн биеэр гардуулан өгсөн байна. Тэд Засгийн газрын тэргүүнд өгсөн  бичигтээ “ 2012 оны нэгдүгээр сарын 11-ний өдрийн Ардчилсан намын Үндэсний зөвлөлдөх хорооны 35 дугаар хуралдааны тогтоолоор Ардчилсан нам хамтарсан Засгийн газраас гарах нь зүйтэй гэж санал нэгтэйгээр шийдвэрлэснийг үндэслэн Монгол улсын Засгийн газрын тухай хуулийн 22 дугаар зүйлийн 1 дэх заалтын дагуу хамтарсан Засгийн газрын гишүүд бид албан тушаалаасаа чөлөөлөгдөх хүсэлтээ хүргүүлж байна “ гээд гарын үсгээ зурцгаажээ.
     

  • ЗОХИХ АЛБАН ТУШААЛТНУУДАД ХАРИУЦЛАГА ТООЦОХООР БОЛЛОО

    ~ Засгийн газрын хуралдаан 2012 оны 01 дүгээр сарын 11-ний өдөр болж дараах асуудлыг хэлэлцэв. Хуралдаанаас “Бензин шатахуун, хүнсний зарим бараа, нийтийн тээврийн үнийн өөрчлөлтийг тогтворжуулах хөтөлбөрийн хэрэгжилтийг зохион байгуулах, хяналт тавих үүрэг бүхий Зөвлөл”-ийг Сангийн сайдаар ахлуулан байгуулав. Мөн “Өрхийн хөгжлийг дэмжих үндэсний хөтөлбөр”-ийг хэлэлцэн баталлаа ~

    Газрын тосны бүтээгдэхүүний хангамжийн өнөөгийн байдал, цаашид авах арга хэмжээний талаар Эрдэс баялаг, эрчим хүчний сайд Д.Зоригт Засгийн газрын өнөөдрийн хуралдаанд мэдээлэл хийлээ. Үүнтэй холбогдуулан валютын ханш огцом өссөний улмаас автобензин, дизелийн түлш, өргөн хэрэглээний болон хүнсний зарим бараа, үйлчилгээний үнэ зохиомлоор өсч байгааг хязгаарлах зорилгоор ам.долларын ханшийг тогтвортой хэмжээнд буулган валютын зах дээрх ам.долларын хомсдлыг арилгах арга хэмжээ авч, гадаад орнуудаас газрын тосны бүтээгдэхүүн худалдан авах ам.долларыг Монголбанкны албан ханшаар тооцож импортлогч компаниудад эхний ээлжинд худалдах талаар зохицуулалт хийж байхыг Монголбанкны ерөнхийлөгч Л.Пүрэвдоржид зөвлөлөө.

    Газрын тосны улсын нөөцийн бүтээгдэхүүн хадгалах агуулах, савны хангамжийг сайжруулах зорилгоор Улаанбаатар, Дархан, Чойрт баригдах, зураг төсөл нь хийгдсэн агуулах, сав барихад шаардагдах хөрөнгийг Монгол Улсын энэ оны Төсвийн тухай хуульд нэмэлт, өөрчлөлт оруулах тухай хуулийн төсөлд бүрэн хэмжээгээр тусгаж, барих ажил эхлүүлэхийг Сангийн сайд болон Эрдэс баялаг, эрчим хүчний сайд нарт даалгав. Газрын тосны бүтээгдэхүүний хангамж, үнийг тогтвортой байлган импортын эх үүсвэрийг нэмэгдүүлэх чиглэлээр гадаад орнуудтай яриа хэлцэл хийж, гэрээ байгуулах талаар холбогдох арга хэмжээ авч ажиллахыг Эрдэс баялаг, эрчим хүчний сайд Д.Зоригтод даалгалаа.

    Хуралдааны төгсгөлд Ерөнхий сайд хариуцлагын асуудлыг хөндлөө. Үнийн хөөрөгдөл нийгэмд бухимдал төрүүлсэн энэ асуудал хариуцлага дагуулах үндэслэл хангалттай байна, мэргэжлийн байгууллагын хийсэн тооцоогоор шатахууны үнэ нэмэгдлээ гэхэд 170 төгрөгөөр л өсгөх тооцоо байтал аж ахуйн нэгжүүдийн аманд орж, удирдах дээд байгууллагадаа танилцуулалгүй, амралтын өдрүүдэд 260 төгрөгөөр өсгөсөн Ажлын хэсгийн ахлагч, дэд сайд Б.Ариунсан болон Газрын тосны газрын удирдлагуудад хариуцлага тооцохыг салбарын сайд Д.Зоригтод даалгалаа.

    Мөн Шударга өрсөлдөөн хэрэглэгчийн төлөө газар, Хэрэглэгчдийн эрх ашгийн хамгаалах нийгэмлэг  ажлаа маш хангалтгүй хийж байгаа тул хариуцлага тооцох нь зүйтэй гэж үзэж байгаагаа ч Ерөнхий сайд хэллээ. Инйхүү хуралдаанаас хаана, хэн хариуцлага алдсаныг шат шатанд нь тогтоон ирэх баасан гаригт  танилцуулахыг Монгол Улсын сайд, ЗГХЭГ-ын дарга Ч.Хүрэлбаатарт үүрэг болголоо. Мөн иргэдийг хохироож, хүнсний гол нэрийн бараа бүтээгдэхүүний үнэ ханш хөөрөгдөхөд хүргэсэн шатахуун импортлогч аж ахуйн нэгжүүдэд хуулийн дагуу зохих арга хэмжээ авахыг Шударга өрсөлдөөн, хэрэглэгчийн төлөө газарт хуралдаанаас үүрэг болголоо.

    НЕФТИЙН БҮТЭЭГДЭХҮҮН, ХҮНСНИЙ ЗАРИМ БАРАА, НИЙТИЙН ТЭЭВРИЙН ҮНИЙН ӨӨРЧЛӨЛТИЙГ ТОГТВОРЖУУЛАХ ЗӨВЛӨЛ БАЙГУУЛЛАА

    Бензин шатахуун, хүнсний зарим бараа, нийтийн тээврийн үнийг тогтворжуулах хөтөлбөрийн төслийг Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар Засгийн газрын хуралдаанд танилцууллаа. Дотоодын зах зээлд давамгай байдлаа хууль бусаар ашиглан үндэслэлгүй хэт өндөр үнэ тогтоох, түүнд Засгийн газрын болон хэрэглэгчийн зүгээс тавих хяналт, зохицуулалт дутагдаж байгаа. Энэ нь төгрөг, валютын ханш, бензин шатахууны үнэ өсөх, улмаар өргөн хэрэглээний болон хүнсний зарим бараа, үйлчилгээний үнэ өсөх шалтгаан болж байгаа учир хөтөлбөрийг боловсруулжээ.

    Төслийг гишүүд зарчмын хувьд дэмжсэн бөгөөд гаргасан саналыг нь тусган Сангийн сайдаар ахлуулсан Зөвлөл байгуулж, хөтөлбөрийг батлав. Энэ зөвлөл бензин шатахуун, хүнсний зарим бараа, нийтийн тээврийн үнийн өөрчлөлтийг тогтворжуулах хөтөлбөрийн хэрэгжилтийг зохион байгуулах, хяналт тавих үүрэг хүлээж байна. Зөвлөл нь хөтөлбөрийн хэрэгжилтэд байнгын хяналт тавьж, үр дүнг сар бүр Засгийн газарт танилцуулж байх юм. Эрхэлсэн асуудлын хүрээнд бараа, бүтээгдэхүүний үйлдвэрлэл, хангамжийг нэмэгдүүлэх, ажил, үйлчилгээний хүртээмж, чанарыг сайжруулах, үнийг тогтворжуулах, төсвийн хөрөнгийг үр ашигтай зориулалтын дагуу зарцуулах, тэвчиж болох зардлыг хэмнэх арга хэмжээний төлөвлөгөө гарган ажиллаж, явц, үр дүнг Засгийн газарт танилцуулж байхыг Засгийн газрын гишүүд, аймаг, нийслэлийн Засаг дарга нарт үүрэг болголоо.  

    Хөтөлбөрийн хүрээнд эхний ээлжинд үнийн өсөлтөөс иргэдийн амьжиргааг хамгаалах зорилгоор төгрөг, валютын ханшийг тогтворжуулж, хууль тогтоомжийн хэрэгжилтийг ханган, боловсронгуй болгох юм. Энэ хүрээнд Засгийн газраас үнийн өсөлтөд илүүтэй өртөж байгаа бага орлоготой өрх, нийгмийн эмзэг хэсэгт дэмжлэг үзүүлэх чиглэлээр тодорхой төсөл, хөтөлбөр хэрэгжүүлж, бараа бүтээгдэхүүн, ажил, үйлчилгээний үнэ бүрдэлт, түүнийг зохицуулах чиглэлээр хууль тогтоомж, шийдвэрийг судалж, нэмэлт, өөрчлөлт оруулах санал боловсруулах юм байна.

    Мөн инфляцыг онилсон бодлого болон валютын ханшны тогтвортой байдлыг хангах арга хэмжээ авах, валют болон төгрөгийн ханшны гэнэтийн өөрчлөлт үүсгэхгүй байх зорилгоор гадаад валютын томоохон гүйлгээнд зохицуулалт хийх, төлбөр тооцоонд гадаад валют ашиглахыг хориглох зэрэг арга хэмжээ авахаар боллоо. Сангийн яам ойрын хугацаанд төсвийн хөрөнгийн үр ашигтай зарцуулах, хөрөнгө оруулалтыг өрхийн орлого, ажлын байр нэмэгдүүлэх, ажилгүйдлийг бууруулахад чиглүүлэх үүрэг хүлээсэн байна.

    Шударга өрсөлдөөн, хэрэглэгчийн төлөө газар нь үнийн өсөлтийн шалтгааныг судлан, үнийг хэт өсгөсөн буруутай этгээдэд холбогдох хууль тогтоомжийн дагуу арга хэмжээ авч нийтэд мэдээлэх, бараа, бүтээгдэхүүний үнийн судалгааг тогтмол хийж байх боллоо. Газрын тосны бүтээгдэхүүн импортлогч аж ахуйн нэгжийн бүтээгдэхүүний дотоодын жижиглэнгийн үнэ тогтоож байгаа аргачлалыг Шударга өрсөлдөөн, хэрэглэгчийн төлөө газар, Үйлдвэрчний эвлэл, мэргэжлийн холбоод хамтран хянаж, бодит байдалд нийцүүлэхийн төлөө ажиллана. Үүний зэрэгцээ газрын тосны салбарын хууль эрх зүйн орчинг боловсронгуй болгох, энэ төрлийн бүтээгдэхүүний үйлдвэрлэлийг татварын бодлогоор дэмжих асуудлыг судлаж, санал боловсруулах юм.

    Түүнчлэн нефтийн бүтээгдэхүүний дотоодын жижиглэнгийн үнийн өсөлтийг бууруулахын тулд НӨАТ-ыг тэглэх саналыг судлан, хангамжид доголдол үүсэхээс урьдчилан сэргийлэх зорилгоор улсын нөөцийн шатахуун бүрдүүлэхээр болжээ. Хүнсний өргөн хэрэглээний бараа, тухайлбал хэрэглэгчийн гарт очиж байгаа нэг кг мах, нэг ширхэг талх, зарим бүтээгдэхүүн, үйлчилгээний үнэ, өөрийн өртгийн тооцоог  Үйлдвэрчний эвлэл, хэрэглэгчдийн оролцоотойгоор аж ахуйн нэгжүүдэд хийх, бараа, бүтээгдэхүүний борлуулалтын шат дамжлага бүрт гарч байгаа үнийн өсөлтийг сар бүр судлан нийтэд мэдээлж байх юм гэж Засгийн газрын Хэвлэл, мэдээллийн албанаас мэдээллээ.  

    НӨӨЦИЙН МАХЫГ ЭНЭ САРЫН 15-НААС ХУДАЛДАЖ ЭХЭЛНЭ
     
    Хүнсний гол нэрийн бүтээгдэхүүний хангамж, нийлүүлэлт, зах  зээл дэх үнийн талаар Хүнс, хөдөө аж ахуйн, хөнгөн үйлдвэрийн сайд Т.Бадамжунай Засгийн газрын хуралдаанд мэдээлэл хийлээ. Махны үнийн өсөлтийг сар бүр иргэдэд 21 000 төгрөг, оюутнуудад 70 000 төгрөгийн тэтгэлэг олгож байгаатай холбоотойгоор малчид малын махныхаа   борлуулалтыг багасгасан.

    Мөн 2011 оны хавраас эхэлсэн шатахууны үнийн өсөлттэй холбогдон орон нутгийн ачаа тээврийн зардал өссөн, гадаад валютын ханшийн өсөлт, үйлдвэрийн аргаар боловсруулаагүй махыг хууль бусаар зарим хилийн боомтоор экспортлох болсон зэргээс шалтгаалан махны үнэ өссөн байна.
    Үүнтэй холбогдуулан дотоод зах зээл дэх махны хангамжийг нэмэх зорилгоор дотоодын зах зээлд борлуулсан махыг НӨАТ-аас чөлөөлсөн хуулийг УИХ-аар батлуулан хэрэгжүүлж байна. Мөн махны 22 үйлдвэр нөөцийн махыг 1 дүгээр сарын 15-наас худалдаанд гаргаж, зах зээлийн жижиглэнгийн үнээс 1000 төгрөгийн хямдаар борлуулах гэж байна. Үүний зэрэгцээ Засгийн газрын тогтоолын дагуу сар бүр махны өргөтгөсөн худалдаа зохион байгуулж эхэлжээ.

    2011-2012 онд нөөцийн махны урамшуулалд 8 тэрбум төгрөгийг тухайн орон нутгийн төсөвт суулгаж, улсын хэмжээнд 16 мянган тонн мах нөөцөлсөн байна. Үүнээс Улаанбаатар хот 12 мянга, Дархан, Эрдэнэт тус бүр 1000, бусад аймаг тус бүр 100 тонн мах нөөцөлжээ. Хүнсний өргөн хэрэглээний барааны нэг болох гурилын үнэ сүүлийн жилүүдэд тогтмол буурч ирсэн тухай сайд Т.Бадамжунай танилцууллаа. Нэг кг цагаан будаа 2008 оны 4-5 дугаар сард 800-1350 төгрөг болж огцом өсч байсан бол өнөөдрийн байдлаар 1600-1645 төгрөг байгаа, гэхдээ энэ нь сүүлийн хоёр жилд харьцангуй тогтвортой байна гэсэн үг юм байна.   

    Японы Засгийн газрын буцалтгүй тусламжаар авсан 9,7 мянган тонн цагаан будааг аж ахуйн нэгжүүдэд гэрээ байгуулан олгосны дүнд нэг кг цагаан будааны бөөний үнийг 1100 төгрөг, жижиглэнгийн үнийг 1300-1500 төгрөгт барьж чаджээ. Мөн ирэх 7 дугаар сард Японы Засгийн газрын буцалтгүй тусламжаар будаа авахаар тохиролцсон бол БНХАУ-аас цагаан будааны квот авах, Бүгд Найрамдах Лаос Ард Улсад газар түрээслэж цагаан будаа тариалах ажлыг эрчимжүүлэхээр ажиллаж байна. Ургамлын тос, элсэн чихрийн хангамж, нийлүүлэлт хэвийн, үнэ тогтвортой байна гэж Засгийн газрын Хэвлэл, мэдээллийн албанаас мэдээллээ.
         
    ӨРХИЙН ХӨГЖЛИЙГ ДЭМЖИХ ҮНДЭСНИЙ ХӨТӨЛБӨРИЙГ БАТАЛЛАА

    2012 оныг “Өрхийн хөгжлийг дэмжих жил” болгон зарласантай холбогдуулан Засгийн газрын хуралдаанаас “Өрхийн хөгжлийг дэмжих үндэсний хөтөлбөр”-ийг хэлэлцэн баталлаа. Хөтөлбөрийг улсын хэмжээнд хэрэгжүүлэх ажлыг зохион байгуулж, мэргэжил, арга зүйн удирдлагаар хангаж ажиллах, нутаг дэвсгэрийн хэмжээнд зохион байгуулах, хөтөлбөрт тусгагдсан үйл ажиллагаа, арга хэмжээг төсвийн багцаасаа санхүүжүүлэн хэрэгжүүлэхийг Засгийн газрын гишүүд, аймаг, нийслэлийн Засаг дарга нарт даалгав. Мөн өрхийн хөгжлийг дэмжих чиглэлээр зарцуулах нэмэлт хөрөнгийг төсөвтөө тусгаж байхыг аймаг, нийслэлийн Иргэдийн Төлөөлөгчдийн Хуралд чиглэл болгожээ. 

    Хөтөлбөрийг хэрэгжүүлэх арга хэмжээг жил бүрийн эдийн засаг, нийгмийг хөгжүүлэх үндсэн чиглэл, төсвийн хүрээний мэдэгдэлд тусгах үүргийг Үндэсний хөгжил, шинэтгэлийн хороо хүлээсэн байна. Хөтөлбөрийг хэрэгжүүлэхэд шаардагдах хөрөнгийг жил бүрийн төсөвт тусгах, одоо хэрэгжүүлж байгаа төсөл, арга хэмжээтэй уялдуулан зохион байгуулахыг холбогдох төсвийн ерөнхийлөн захирагчдад, хөтөлбөрийн удирдлага, зохион байгуулалттай холбоотой зардлыг Хүн амын хөгжлийн асуудлаархи Үндэсний хорооны төсөвт жил бүр тусган санхүүжүүлж байх болжээ.

    “Өрхийн хөгжлийг дэмжих үндэсний хөтөлбөр”-ийг 2012-2015 онд хэрэгжүүлнэ. Хөтөлбөр хэрэгжиж эхэлснээс хойш 18 сарын дараа дунд хугацааны хяналт-шинжилгээ, хэрэгжиж дууссаны дараа үнэлгээ хийх юм байна. Хөтөлбөрт манай улсын нийт өрхийн 15-аас доошгүй хувь буюу хамгийн бага хэрэглээтэй 130 мянган өрхийг эхний ээлжинд хамруулах юм. дээрх өрхийн  20-иос доошгүй хувь нь ядуурлаас гарсан байна гэж төлөвлөжээ. Хөтөлбөрт хамруулах өрхийг сонгохдоо өрхийн амьжиргааны түвшин тодорхойлох судалгаанд хамрагдаж, мэдээллийн баазын бага хэрэглээтэй бүлэгт орсон, ийм судалгаа хийгдээгүй бол сум, хорооны түвшинд нийгмийн халамжийн дэмжлэг, туслалцаа зайлшгүй шаардлагатайг нь тогтоож, Амьжиргааг дэмжих зөвлөлийн хурлаар баталгаажуулсан байх ёстой.

    Түүнчлэн өрхийн нөхцөл байдлын үнэлгээгээр заавал хөгжих өрхийн бүлэгт хамрагдсан байх, өрхийн хөгжлийн төлөвлөгөө боловсруулж, хөтөлбөрт хамрагдах хүсэлтээ албан ёсоор гаргасан байх шаардлага тавих юм байна. Хөтөлбөрийн хүрээнд өрхийн гишүүдийн хөдөлмөр эрхлэлт, амьжиргааг дэмжих, нийгмийн хамгааллыг сайжруулах, боловсрол, эрүүл мэнд, сэтгэл зүйн болон бусад дэмжлэг үзүүлэх зэрэг чиглэлээр цогц арга хэмжээ хэрэгжүүлэхээр боллоо гэж Засгийн газрын Хэвлэл, мэдээллийн албанаас мэдээллээ.     

    ТОВЧ МЭДЭЭ

    • Гаргасан хүсэлтийг нь харгалзан Д.Сугарыг Төрийн өмчийн хорооны даргын үүрэгт ажлаас нь чөлөөлөхөөр Засгийн газрын хуралдаанаас шийдвэрлэлээ.
    • Монгол Улсын Ерөнхийлөгчийн боловсруулсан “Үндсэн хуулийн хичээл заах тухай” зарлигийн төслийг дэмжив. Гэхдээ төслийг “Их, дээд сургууль, коллеж, мэргэжлийн боловсролын сургуулийн оюутнууд, ерөнхий боловсролын сургуулийн ахлах ангийн сурагчдад жил бүрийн нэгдүгээр сарын 13-ны өдөр Үндсэн хуулийн тухай нэг цагийн хичээл заах зохион байгуулалтын арга хэмжээ авахыг Монгол Улсын Засгийн газарт чиглэл болгосугай” гэж өөрчлөн найруулах саналыг Монгол Улсын Ерөнхийлөгчид уламжлахаар болов. Хэрэв энэ өдөр бүх нийтийн амралтын өдөр байвал түүний өмнөх ажлын өдөр Үндсэн хуулийн хичээлийн заахаар төсөлд тусгажээ.
    • УИХ-ын дарга Д.Дэмбэрэлийн 2011 оны 12 дугаар сарын 9-14-ний өдрүүдэд Япон Улсад хийсэн албан ёсны айлчлалын дүнг хэлэлцээд Үндэсний аюулгүй байдлын зөвлөлд оруулах болов.
    • Монгол Улсын Засгийн газар, Олон улсын хөгжлийн ассоциаци хооронд байгуулсан “Тогтвортой амьжиргаа-2 төслийн нэмэлт санхүүжилт-ийн Санхүүжилтийн хэлэлцээрийг зарчмын хувьд зөвшөөрч, хэлэлцээрийг УИХ-ын Аюулгүй байдал, гадаад бодлогын  байнгын хороотой зөвшилцөн, хэлэлцээр соёрхон батлах тухай хуулийн төслийг өргөн мэдүүлэх нь зүйтэй гэж үзэв. Нэмэлт санхүүжилт болох 11 сая ам.долларын ихэнх хэсгийг төслийн Олон нийтийн санаачилга, Бэлчээрийн мал аж ахуйн эрсдлийн удирдлага бүрэлдэхүүн хэсгүүдэд хуваарих бөгөөд орон нутагт дэд төслүүд хэрэгжүүлэхэд зарцуулах юм байна.  
    • Хуулиар тогтоосон хугацаанд төлөөгүй болон татварын алба, татварын улсын байцаагчийн буруугаар татвар төлөгчөөс үндэслэлгүй, илүү хураасан татварт тооцох алдангийн хэмжээг хоног тутамд 0.047 хувь байхаар тогтоож, энэ оны нэгдүгээр сарын 01-ний өдрөөс эхлэн дагаж мөрдөхөөр боллоо.
    • Монгол Улсын Мянганы хөгжлийн зорилтуудын хэрэгжилтийн Үндэсний дөрөвдэх илтгэлийн төслийг хэлэлцээд зарчмын хувьд дэмжиж, гишүүдээс гаргасан саналыг тусган Улсын Их Хуралд танилцуулахаар боллоо.
    • Монгол Улсын Ерөнхий сайд С.Батболдын урилгаар ирэх БНХАУ-ын Хөлөнбуйр аймгийн үндэсний бага сургуулийн 60 хүүхдийг хүлээн авч амраах ажлыг зохион байгуулахыг Монгол Улсын Шадар сайд М.Энхболд, Гадаад харилцааны сайд Г.Занданшатар нарт даалгав.
    • “Монгол Улсын иргэнд “Эрдэнэс Тавантолгой” компанийн хувьцааг эзэмшүүлэх тухай “Засгийн газрын 2011 оны 03 дугаар сарын 31-ний өдрийн 98 дугаар тогтоолын хоёрдугаар зүйлийн “гэрээний үндсэн дээр” гэсний дараа “Монголын хөрөнгийн бирж” ХК гэж, мөн тогтоолын наймдугаар зүйлийн “Үнэт” гэсний өмнө “Монголын хөрөнгийн бирж” ХК гэж нэмэхээр болов. Тогтоол гарсантай холбогдуулан “Төрийн тусгай хамгаалалтын талаар авах зарим арга хэмжээний тухай” Засгийн газрын 1995 оны 127 дугаар тогтоолын гуравдугаар хавсралтын “Нэг”-ийн 15 дахь заалтын дараа “16. Үнэт цаасны төлбөр тооцоо, төвлөрсөн хадгаламжийн төв” ХХК гэж, “17. Монголын хөрөнгийн бирж” ХК гэж нэмэхээр шийдвэрлэлээ.

  • Хүний хөгжил санд ихээхэн орлого төвлөрүүлсэн аж ахуйн нэгжүүдэд өргөмжлөл гардууллаа

    Монгол Улсын Засгийн газар байгалийн баялгаас орох орлогыг иргэн бүрт ижил, тэгш нөхцөлөөр хишиг, хувь хүртээх зорилгоор 2010 оноос эхлэн “Хүний хөгжил сан” байгуулан ажиллаж байгаа билээ. Засгийн газрын энэхүү зорилтыг хэрэгжүүлэхэд идэвхи гарган ажиллаж, тус санд ихээхэн орлого, эх үүсвэр төвлөрүүлсэн зарим аж ахуйн нэгжид  өнөөдөр Монгол Улсын Ерөнхий сайд С.Батболд, Сангийн сайд С.Баярцогт нар хүндэт өргөмжлөл гардууллаа.

    Байгалийн баялгаа иргэддээ тэгш хувиарлах энэхүү зорилтыг хэрэгжүүлэхэд уул уурхайн чиглэлээр үйл ажиллагаа явуулж буй компаниуд чухал хувь нэмэр оруулж байгааг  Ерөнхий сайд С.Батболд энэ үеэр тэмдэглээд Засгийн газрын нэрийн өмнөөс баяр хүргэж, талархал илэрхийллээ. “Хүний хөгжил сан”, Тогтворжуулах санд “Эрдэнэт үйлдвэр”-ийн хамт олон нийт 365,3 тэрбум төгрөг төвлөрүүлж манлайлсан бол  “Эрдэнэс МГЛ”,“Эрдэнэс Тавантолгой” компанийн хамт олон тус бүр 338,2 тэрмбум төгрөг төвлөрүүлж удаалжээ.

    Түүнчлэн “Оюутолгой” 338,0, тэрбум, “Тавантолгой”  56,8, “Монголын алт” компанийн хамт олон 47,8 тэрбум төгрөгийг төвлөрүүлсэн байна. Ийнхүү Монгол Улсын Засгийн газар нийгмийн хариуцлага, ард түмнийхээ өмнө хүлээсэн үүргээ ухамсарлаж, “Хүний хөгжил сан”-д ихээхэн хэмжээний мөнгө хуримтлуулахад томоохон хувь нэмэр оруулсан аж ахуйн нэгжүүдэд хүндэтгэл үзүүллээ.

  • Дипломат харилцаа тогтоосны 40 жилийн ойн эхний зочдоо хүлээн авч уулзлаа

    Монгол, Япон хоёр улсын хооронд дипломат харилцаа тогтоосны 40 жилийн ой энэ онд тохиож байгаа. Энэ хүрээнд хоёр орны Засгийн газрын тэргүүн нарын харилцан айлчлалыг зохион байгуулахаар талууд бэлтгэж байгаа төдийгүй яам, салбар хооронд албаны олон айлчлал төлөвлөгджээ. Эдгээрийн анхны айлчлалууд энэ өдрүүдэд манай улсад болж байна. Тухайлбал, Монгол Улсын Ерөнхий сайд С.Батболдод өчигдөр Японы Засгийн газрын Хэрэг эрхлэх газрын дэд дарга бараалхсан бол Ерөнхий сайд өнөөдөр тус улсын Батлан хамгаалахын сайд Яасүо Ичикаваг хүлээн авч уулзлаа.

    Монгол Улсын Ерөнхий сайд С.Батболд уулзалтын эхэнд эрхэм сайдыг 40 жилийн ойн хүрээнд Засгийн газрын түвшний анхны зочин болж айлчилж байгаад баяр хүргээд хоёр орны батлан хамгаалах салбарын хамтын ажиллагаа идэвхтэй хөгжиж буйг тэмдэглэлээ. Мөн Батлан хамгаалах яам хооронд хамтын ажиллагааны санамж бичигт гарын үсэг зурсан нь тус салбарын цаашдын хамтын ажиллагааг шинэ шатанд гаргахад чухал түлхэц болно гэж үзэж байгаагаа Монгол Улсын Засгийн газрын тэргүүн онцоллоо.

    Японы Батлан хамгаалах академид Монголын мэргэжилтнүүд, оюутнуудыг суралцуулах зэргээр Монгол Улсын цэргийн боловсон хүчний чадавхийг бэхжүүлэх болон өөрийн оронд зохион байгуулдаг Ази, Номхон далайн бүс нутгийн аюулгүй байдлын семинарт Монголын төлөөлөгчдийг оролцуулах зэргээр идэвхтэй хамтран ажиллаж байгаад Ерөнхий сайд С.Батболд талархлаа. Манай улсад жил бүр зохион байгуулдаг “Хааны эрэлд” цэргийн хээрийн сургуульд Япон улс өөрийн цэргийн ажиглагчдаа идэвхтэй оролцуулж байгаад сэтгэл ханамжтай явдгаа ч илэрхийллээ.

    Монгол Улсын Ерөнхий сайд цаг зав гарган хүлээн авч уулзаж байгаад Японы Батлан хамагаалахын сайд Яасүо Ичикава баяртай байгаагаа илэрхийлээд яамд хооронд хамтран ажиллах санамж бичигт гарын үсэг зурснаар салбарын харилцаа стратегийн түншлэлийн хүрээнд шинэ шатанд гарч байгаа гэдгийг тэмдэглээд Монгол Улс олон улсын энхийг сахиулах үйл хэрэгт идэвхтэй оролцож байгаад талархаж байдгаа хэллээ. Монгол Улсын Ерөнхий сайд С.Батболд уулзалтын үеэр Ази Номхон далайн бүс нутгийн аюулгүй, тогтвортой байдлыг хангахад Япон улстай идэвхтэй хамтран ажиллах сонирхолтой байгаагаа илэрхийллээ гэж Засгийн газрын Хэвлэл мэдээллийн албанаас мэдээллээ.

  • Шаардлагатай бол шатахуун импортлох эрх, зөвшөөрлийг цуцлах хүртэл арга хэмжээ авна

    МАН-ы бүлэг өнөөдрийн хуралдаанаараа үнэ ханшийн өсөлт, түүнээс үүдэн гарсан асуудлууд цаашид эдгээрийг хэрхэн зохицуулах арга хэмжээ авах гэж байгаа талаар Засгийн газрын байр суурийг сонссон байна. Энэ талаар бүлгийн хурлын дараа сэтгүүлчдэд мэдээлэл хийсэн юм. Хэвлэлийн хуралд Монгол улсын Ерөнхий сайд С.Батболд оролцож тодорхой мэдээллийг хийлээ.

    УИХ дахь МАН-ы бүлгийн хурал дээр Засгийн газраас ойрын өдрүүдэд авч хэрэгжүүлж байгаа ажлын талаар мөн цаашид арга хэмжээний талаар мэдээлэл хийж санал солилцлоо. Ард иргэддээ хандаж хэлэхэд төр засгийн ажил ажиллах зарчмаараа  явагдаж байна. Үнийн гэнэтийн өсөлттэй холбоотой  асуудал гарч ирж байгааг бид цаг алдалгүйгээр шийдвэрлэхээр ажиллаж байна. Ингэхдээ хариуцлагатайгаар, үндэслэл тооцоотойгоор авч хэлэлцэн, үүнээс үндэслэн ямар арга хэмжээ авах вэ гэдгийг нягт нямбай тооцоолж байна.   

    Махны хувьд нөөц нийлүүлэлт, үнэ ханшид өөрчлөлт гарахгүй байх боломж байна. Төрөөс зохицуулах бодлого, зах зээлийн механизмтайгаа уялдуулаад ард иргэдийнхээ эрх ашгийг хамгаалсан зөв зохицуулалтыг  хийх болно. Энэ нь ч бас МАН-ы байр суурь гэдгийг зориуд тэмдэглэн хэлье. Иргэдийн амьдрал, хөгжлийг хамгийн түрүүнд тавьж, үүний төлөө үндсэн асуудлуудыг зохицуулах үүргийг төр хүлээдэг. Энэ үүргийнхээ дагуу ч , бодлогынхоо хүрээнд ч бид тодорхой арга хэмжээ авч байна.

    Мөн дотоодын гол нэрийн бүтээгдэхүүнээс гадна гаднаас хамааралтай шатахууны үнэ  ханшийн асуудал, валюутын ханштай уялдсан үнийн  өөрчлөлтийн асуудал гарч ирлээ. Харин эдгээр өөрчлөлт бодитой байсан эсэх, энэ дунд ард иргэд хохиров  гэдгийг бид авч үзэхийг зорилоо. Ерөнхий сайдын захирамжийн дагуу  энэ асуудлаар өчигдөр хоёр ажлын хэсэг байгуулагдаж, ажилдаа орсон. Махны нөөц бүрдүүлэлт  болон шатахууны үнийн  өсөлтийг судалж, нэмэгдэх болсон үндэслэлийг гаргаж ирж, цаашид авах арга хэмжээг тодорхой болгох үүднээс эдгээр ажлын хэсгүүд байгуулагдаж ажилдаа шуурхай орсон. Дүгнэлтээ ч гаргаад байна.

    Маргааш ( 2012-1-11) Засгийн газрын хуралдаанаар  энэ асуудлыг хэлэлцэж, энэ удаа авч  хэрэгжүүлэх арга хэмжээгээ маш тодорхой болгож гаргаж тавина. Бид эдийн засаг болон улс төрийн гээд хоёр асуудлыг ярьж байна. Эдийн засагт ханш, үнийн өсөлт, нийлүүлэлт , гадаад нөхцөл байдал гээд бодит асуудлууд бий. Гэхдээ энэ удаагийн шатахууны огцом өсөлтөд эдийн засгийн гэхээсээ илүү улс төрийн нөлөө давамгайлсан байхыг үгүйсгэхгүй. Тиймээс ажлын хэсэг бүх талаас нь шалгаж, дүгнэлт гаргаж байна. Энэ асуудал бодит байна уу үгүй юу,  гажуудал хаана гарсан байна гэдгийг олж , хариуцлага  тооцох болно.

    Төрийн албан хаагчдын түвшинд ч , магадгүй аж ахуйн нэгжүүдийн хувьд ч  энэ асуудал сөхөгдөж мэднэ. Өөрсдөдөө ашигтайгаар алхам хийсэн  байхыг үгүйсгэхгүй. Засгийн газрын ажил явдгаараа явна гэдгийг би оны өмнө ч хэлж байсан. Одоо ч үүнийг давтан хэлье. Улс орны ажил улс төрөөс хамаарах ёсгүй. Жингийн цуваа явдгаараа явж, улс орны Засаг төрийн ажил явдгаараа явж л таарна. Харин үүн дээр улс төр хийж болохгүй шүү.
    Тиймээс би өмнө ч улс төрийн хүчнүүдэд хандан энэ тухай уриалж байсан. Аливаа нэгэн улс төрийн хүчин ард түмний нуруун дээр дарамт болох  асуудлаар хожоо хийхгүй байх, эдийн засаг бизнесээр, улс төрийн тоглолт хийхгүй байхыг уриалсан.

    Одоо ч энэ байр сууриа хатуу илэрхийлж байна. Мөн үүнээс гадна хариуцлагын асуудал бас хөндөгдөж байна. Шатахууны үнийн өсөлттэй холбоотойгоор тухайн албан тушаалтан хийх ёстой ажлаа хангалтгүй хийсэн нь тогтоогдвол бид зохих хариуцлага тооцно. Мөн албан тушаалтнаас гадна буруутай нь тогтоогдвол аж ахуйн нэгжүүдэд ч арга хэмжээ авна. Шаардлагатай бол аж ахуй эрхлэх үйл ажиллагаа, түүн дотор шатахуун импортлох эрх, зөвшөөрлийг цуцлах хүртэл арга хэмжээ авна гэдгийг хатуу хэлье. Энэ асуудлыг бодитой бөгөөд  нухацтай авч үзэн  шуурхай  шийдвэрлэнэ. Ингэхдээ эдийн засгийн, татварын, татаасын, хариуцлагын үүднээс хандах  болно гэдгийг  Ерөнхий сайд мэдээлэл хийхдээ дурьдлаа гэж Засгийн газрын Хэвлэл мэдээллийн албанаас мэдээллээ.