Ангилал: мэдээ

Зах зээлийн хөгжил эдийн засгийн орлогоос хамаарна. Тиймээс ч Монгол Улсын Засгийн газар эдийн засгийн хурдцыг нэмэгдүүлэх бодлого барьж ажиллаж байгаа гэдгийг Монгол Улсын Ерөнхий сайд С.Батболд Дипломат төлөөлөгчийн газрын тэргүүнүүдэд хандаж хэллээ. Тиймээс эдийн засгийн энэ хөгжилд гадаад харилцааны салбар ямар үүрэг гүйцэтгэж, ямар нөлөө үзүүлж болохыг дор бүрнээ бодож ажиллах хэрэгтэй гэж Ерөнхий сайд тэмдэглээд эдийн засгийн хөгжлийг хурдасгагч фактор нь гадаад харилцаа, ялангуяа, гадаад оронд улсаа төлөөлөн ажиллаж байгаа Элчин сайд, консолууд та нар юм гэлээ.

Энэ үгээрээ Ерөнхий сайд манай улсын хөгжлийн суурь болсон баялгийн нөөцийг эргэлтэд оруулахад гадаадын хөрөнгө оруулагчдыг татах гол сурталчилгааг Дипломат төлөөлчийн газрууд хийх учиртай гэдгийг хэлсэн юм. Тиймээс ч улс орны хөгжлийн санал санаачилга, сайн туршлага, зөв жишээг тухайн орныхоо өнцгөөс харж ирэх дөрөвдүгээр сарын 15-ны дотор бичиж ирүүлэхийг Ерөнхий сайд С.Батболд гадаад оронд улс орны нүүр царай болж ажилладаг дипломатуудад үүрэг болголоо. Мөн энэ ажлыг цаг тухайд нь шаардаж авахыг Гадаад харилцааны сайд Г.Занданшатарт даалгалаа.

Илүү өндөр бүтээмжтэй, байгаль орчинд ээлтэй, хүнд өгөөжтэй, тогтвортой өсөлтийг хангаж, эцсийн дүндээ монгол хүнээ хөгжүүлэх нь манай Хамтарсан Засгийн газрын хөгжлийн бодлогын эрхэм зорилго. Эдийн засаг нь өрсөлдөх чадвартай байхын тулд хүн нь өрсөлдөх чадвартай болох хэрэгтэй. Орчин үеийн эдийн засаг бол мэдлэгт суурилсан эдийн засаг. Иймд бид боловсролын системд Кембрижийн стандарт, ард иргэдээ орон сууцжуулахад Сингапурын загвар, уул уурхай, төрийн албаны тогтолцоонд Канадын туршлага, бизнес үйлчилгээнд Европын холбооны стандартыг богино хугацаанд хэрэгжүүлэх зорилт тавьсан.

Бусад улсын хөгжлийн бодлого, загварын сайн туршлагыг судалж, улс орондоо нэвтрүүлэх,  боломжтой зүйлийг шууд нутагшуулах талаар санал дүгнэлт гаргах, түншүүдтэйгээ идэвхтэй  ажиллах нь гадаад харилцааны салбарынхан та бүгдийн өнөөгийн үйл ажиллагааны томоохон зорилт байх ёстой гэдгийг Ерөнхий сайд С.Батболд онцлон тэмдэглэлээ. 2011-2013 онд Ардчилсан орнуудын хамтын нийгэмлэгийг даргалах хариуцлагатай үүргийг манай улс хүлээсэн. Энэ бол манай улсын нэр хүндийг өндөрт өргөсөн арга хэмжээ. Нэг талаар хариуцлага, нөгөө талаар том шалгуур. Засгийн газар бүх талаар нь дэмжинэ. Дипломат төлөөлөгчийн газрууд үүнд ач холбогдол өгч яамтайгаа хамтран сайн зохион байгуулах учиртайг Ерөнхий сайд С.Батболд анхаарууллаа.

Монгол Улсад орчин цагийн дипломат алба үүсэн байгуулагдсаны 100, Монголын тулгар төрийн 2220, Үндэсний эрх чөлөөний хувьсгалын 100, Ардын хувьсгалын 90 жилийн ой энэ 2011 онд тохиож байгаа. Мөн Монгол Улс НҮБ-д элссэний 50 жилийн ой ч давхцаж байна. Эдгээр ойг баяр ёслолын байдалтай тэмдэглэхийн зэрэгцээ Монгол Улсаа гадаад ертөнцөд сурталчлах том боломж хэмээн харах учиртайг Засгийн газрын тэргүүн хэлсэн үгэндээ онцолж байлаа

Монголын эдийн засгийн чуулган 2011 оны 3 дугаар сарын сарын 2-4-нд Төрийн ордонд болж өндөрлөв. “Хөгжилд хамтдаа” уриан дор болсон энэ чуулганаар хүний хөгжил, засаглал, хөгжлийн бодлого, дэд бүтэц гэсэн тэргүүлэх ач холбогдолтой 4 асуудлын хүрээнд 15 салбар хуралдаан болж хэлэлцүүлэг өрнөлөө. Чуулган амжилттай болж өндөрлөснийг Монгол Улсын Ерөнхий сайд С.Батболд чуулганыг хааж хэлсэн үгэндээ онцлон тэмдэглэлээ.

Төр, засаг, хувийн хэвшил, иргэний нийгэм, эрдэмтэн, судлаачид, гадаадын төлөөлөгчид гээд бүх давхаргынхан нэг дор цуглан улс орныхоо өмнө тулгамдаж байгаа асуудлуудыг шийдвэрлэх гарцын талаар ил тод хэлэлцэн, бүтээлч байдлаар хандсан нь хамгийн чухал зүйл байлаа. Энэ нь бид ардчилал, зах зээл, харилцан ярилцах соёлд суралцаж байгаагийн илрэл төдийгүй бодитой хамтын ажиллагаа юм. Чуулганаас гаргасан зөв шийдлийг Засгийн газар шийдвэр болгон ажиллахын зэрэгцээ хамгийн идэвхтэй оролцогч нь байх болно гэж тэрээр хэлэв.

Бид болохгүй байгаа зүйлийн талаар хангалттай ярьдаг ч үүнээс гарах шийдэл нь тодорхой бус байх тохиолдол цөөнгүй. Тэгвэл энэ удаагийн чуулганаар болж бүтэж байгаа зүйлээ цаашид яаж улам боловсронгуй болгох, үүний тулд юуг анхаарах ёстойг гэдгээ харилцан ярилцсан нь бас нэг ололт. Салбар хуралдаануудаас гарсан санал, санаачилга дотор Засгийн газрын хийж байгаа ажил байгаагийн зэрэгцээ ажилдаа тусгах зүйл ч хөндөгдлөө гэж Ерөнхий сайд С.Батболд тэмдэглэв. 

Тэрээр чуулганыг нээж хэлэхдээ “Илүү өндөр бүтээмжтэй, хүнд өгөөжтэй, тогтвортой өсөлтийг хэрхэн хангах вэ” гэсэн бодлого, хөгжлийн шинэ загварын тухай ярих нь энэ удаагийн чуулга уулзалтын гол зорилго” хэмээн онцолж, хөгжлийн зөв зам, гарцыг тодорхойлон иргэн бүрт хөгжлийн тэгш боломж бий болгохыг уриалсан. Монголын эдийн засгийн хоёрдахь удаагийн чуулганаар иргэний оролцоо, мэргэжлийн холбоодын чадавхи, засаглал, компанийн засаглал, тєр, хувийн хэвшлийн тvншлэл, санхvvжилт, тєрийн албаны шинэчлэл, бизнесийн таатай орчин, хот, орон нутгийн хєгжил, єрсєлдєх чадвар ба кластер, инноваци, санхvvгийн зах зээл, хєдєлмєр эрхлэлт, ажлын байр, мэргэжлийн боловсролын чанар, санхvvжилт, нийгмийн хамгааллын шинэчлэлт, тєсєв, тєлєвлєлтийн талаар ярилцсан юм.  

Энэ бүхэн нь эцсийн дүндээ монгол хүнээ хөгжүүлэх, хүний хөгжлийг хэрхэн хангаж, чинээлэг дундаж давхаргыг яаж бий болгох гэсэн эцсийн зорилго агуулж байсныг Ерөнхий сайд онцоллоо. Уул уурхайн салбарын талаар их яригдаж байгаа ч Засгийн газар хүнээ хөгжүүлэхийг гол зорилтоо болгож, энэ салбараас олох орлогыг зарцуулна. Өрсөлдөх чадвартай байх, эдийн засгийн хөгжилд хүрэх, уул уурхайг тойрсон бизнесийг хөгжүүлэх, хүнээ бэлтгэх, үндэсний үйлдвэрлэлээ дэмжих, ажлын байр бий болгох зэрэг асуудал салбар хуралдаануудын үеэр хөндөгдөж байсныг тэрээр тэмдэглэлээ.

Чуулганы зохион байгуулалт, хүмүүсийн оролцоо, идэвх сайн, салбар хуралдаануудыг сэтгүүлчид хөтлөн явуулж, иргэдэд мэдээллийг сайн хүргэж байсны зэрэгцээ яригдсан зүйлийг бүтэн жилийн турш бидэнд сануулж, хийж байгаа ажлыг үнэн зөв, ил тод мэдээлж байх санаачлага гаргасанд сэтгэл хангалуун байгаагаа илэрхийлээд анхаарах зүйл ч багагүй байсныг сануулав. Тухайлбал чуулганаас гарах шийдлийг ажилдаа тусган хэрэгжүүлэх ёстой төр, орон нутгийн байгууллагын төлөөллийн оролцоо хангалтгүй байсныг Ерөнхий сайд шүүмжилж, чуулганаар хэлэлцсэн асуудлын хүрээнд хийх шаардлагатай ажлын төлөвлөгөөгөө Засгийн газарт танилцуулахыг тэдэнд үүрэг болголоо.  

Мөн жилдээ нэг удаа цуглаж ярилцаад өнгөрөх бус, давхарга бүрийн төлөөлөл багтсан байнгын ажиллагаатай олон нийтийн зөвлөл байгуулах, иргэд, олон нийтийн байгууллагууд энэ зөвлөлтэй байнга холбоотой байж, санал хүсэлтээ хүргүүлдэг амьд холбоо үүсгэх, чуулганаас гарсан санал, санаачилгыг хэрхэн хэрэгжүүлэх талаар судалгаа хийх баг ажиллуулах, мэдээллээ ил тод байлгах шаардлагатайг Ерөнхий сайд тэмдэглээд чуулганыг зохион байгуулсан, оролцсон, ивээн тэтгэсэн бүх хүн, байгууллагад талархлаа илэрхийлэв. 

Өнгөрсөн жил болсон эдийн засгийн анхдугаар чуулганаар хөрөнгийн зах зээл, өрсөлдөх чадвар, улсын бүртгэлийн шинэчлэл, төсвийн шинэтгэл, уул уурхай, ногоон эдийнзасгийн талаар хэлэлцэн зөвлөмж гаргасныг Засгийн газар үйл ажиллагаандаа тусган хэрэгжүүлж байна. Тухайлбал “Бизнесийн орчны шинэтгэлийн жил”-ийн хүрээнд хүнд суртал, чирэгдэл үүсгэдэг 101 зөвшөөрлийг хүчингүй болгож, 10-ыг нь төрийн бус байгууллагад шилжүүлж, Төрийн хяналт, шалгалтын тухай хуульд өөрчлөлт оруулсан нь бизнес эрхлэгчдэд олон талын эерэг боломж авчирсан. Мөн Төсвийн шинэчлэлийн хүрээнд Төсвийн тогтвортой байдлын тухай хуулийг УИХ баталсан бол Иргэний шинэчилсэн бүртгэл явуулж, онлайн хэлбэрт шилжүүлж эхлээд байна.

Үүний зэрэгцээ ногоон эдийн засгийн өсөлтийг хангахын тулд Засгийн газар анх удаа говьд хуралдан цөлжилтийн эсрэг тусгай хөтөлбөр батлан, “Говийн уриалга” гарган хэрэгжүүлж байгаа. Өнгөрсөн нэг жилийн хугацаанд манай улс өрсөлдөх чадвараараа дэлхийд 117 дугаар байрнаас 99 дүгээрт, хүний хөгжлийн индексийн үзүүлэлтээр169 улс орноос эхний 100-д орж, “Хүний хөгжлийн дунд зэргийн үзүүлэлт”-тэй улсын эгнээнд багтсан зэргийг жишээ болгож болох юм

Монголын Эдийн засгийн форум гурав дахь өдрөө Монголын хөрөнгө оруулалтын чуулга уулзалтаар Төрийн ордонд үргэлжилж байна. Уул уурхай, дэд бүтцийн томоохон төслүүдийг эдийн засгийн эргэлтэд оруулах гэж буй Монгол Улсыг гадаад дотоодын хөрөнгө оруулагчид ихээхэн сонирхох болсон энэ үед болж байгаа Монголын хөрөнгө оруулалтын чуулганд ялангуяа, гаднын бизнесмэн, хөрөнгө оруулагчид ихээхэн ач холбогдол өгч байна.

Монголын эдийн засгийн форумыг санаачлагч бөгөөд форумын тэргүүн, Монгол Улсын Ерөнхий сайд С.Батболд хөрөнгө оруулалтын чуулганыг нээж үг хэлэхдээ Монгол Улс хөгжлийн чухал, хариуцлагатай үед ирээд байгааг онцлоод гадаадын хөрөнгө оруулагчид манай улсыг сонирхож, хөрөнгө оруулалт ч нэмэгдэж, энэ хэрээр ач холбогдолтой олон чуулга уулзалт энэ өдрүүдэд давхцаж байгааг хэллээ.

Сүүлийн үед бид уул уурхайн талаар их ярих болсон. Монгол Улсын Засгийн газрын гол бодлого бол уур уурхай биш хүнээ хөгжүүлэх юм. Уул уурхайгаас олсон орлогыг хүнээ хөгжүүлэхэд зарцуулахын тулд хариуцлагатай уул уурхайг хөгжүүлэх бодлого барьж байна гэсэн Монгол Улсын Ерөнхий сайдын үгийг Дэлхийн банкны Монгол Хятад болон Хойд Солонгос хариуцсан захирал Клаус Роландихэд дэмжиж байгаагаа хэлээд хүнээ хөгжүүлэх нь Монгол Улсын Засгийн газрын бодлого гэж Ерөнхий сайд их зөв томъёоллоо. Дэлхийн банк ч хүн, иргэдээ хөгжүүлэх бодлогыг дэмжиж ажилахад бэлэн байна гэдгээ илэрхийлж байлаа. 

Монгол Улсын Ерөнхий сайд С.Батболд чуулганы индрээс төлөөлөгчдөд хандаж, та бүхэн тухайн салбарын мэргэжлийн холбоодоор дамжуулан хамтарч ажиллах оновчтой, үндэслэлтэй, чанартай шийдвэр, бодлогоо тодорхой болгоод өгвөл та бүхний хамтарч ажиллах, нөгөө талаар Засгийн газрыг шахаж ажиллах чиглэл болно. Энэ нь мэргэжлийн холбоодоо дэмжих, хамтарч ажиллах санал санаачилгын эхлэл болно гэж үзэж байна гэлээ. Мөн тэрбээр төрийн эрх мэдлийн зарим төвлөрлийг төрийн бус байгууллага, мэргэжлийн холбоод болон орон нутагт шилжүүлэх бодлого барьж буйгаа чуулганы төлөөлөгчдөд тэмдэглэн хэллээ.

Өнгөрсөн сард гурил, мах, махан бүтээгдэхүүн үйлдвэрлэгч, ноос ноолуур, арьс шир боловсруулах зэрэг хөнгөн үйлдвэрийн салбарын удирдлагуудтай уулзаж төрийн байгууллагын хийж гүйцэтгэж байсан 10 гаруй ажлыг тус холбоодод шилжүүлж өгсөн. Тиймээс та бүхэн тухайн салбарын мэргэжлийн холбоодоор дамжуулан Монголын бизнесийн орчныг илүү ойлгомжтой, таатай болгох санал санаачилгаа өгөөрэй гэдгийг тодотгож байлаа.

Монголд бизнес эрхлэх таатай боломж бий болгохын төлөө Засгийн газар анхааран ажиллаж өнгөрсөн 2010 оныг Бизнесийн орчныг дэмжих жилээр зарлаж олон ажил зохион байгуулж чамлахааргүй үр дүнд хүрсэн. Гэсэн ч төр засгаас авч хэрэгжүүлэхээр эхлүүлсэн ажлууд эхлэлийн түвшинд байна.Тиймээс бизнесийн орчныг таатай болгох ажлыг энэ жил ч үргэлжлүүлэн хийж байна. Цаашид нэмж ямар ажил хийвэл зохилтой талаар та бүхний саналыг сонсоход таатай байх болно гэж Монгол Улсын Ерөнхий сайд хэлсэн үгэндээ онцоллоо.

Монгол Улс далайд гарцгүй цөөхөн орны нэг учраас транзит тээврийн өртөг өндөр. Тиймээс нэмүү өртөг бий болгох үйлдвэрлэлийг дэмжих, мэдлэгт суурилсан эдийн засгийг хөгжүүлэх бодлого барьж байгаа. Засгийн газраас хөрөнгө оруулагчидтай хамтран ажиллах дараагийн шатандаа орох цаг нь ирсэн гэдгийг дурдаад Монголын хөрөнгө оруулалтын энэхүү чуулганаас гарах үр дүн, дүгнэлтийг хүлээж байна. Хамтран ажиллах бодитой гэрээ хэлэлцээ энэ чуулганы үеэр байгуулагдаж, үр өгөөжтэй арга хэмжээ болно гэдэгт итгэж байгаагаа илэрхийллээ. Монголын хөрөнгө оруулалтын чуулганы үеэр хөрөнгө оруулалт хайж байгаа төслүүдийн танилцуулга Төрийн ордны А танхимд болж байна

“Өмнө нь хийж бүтээснээ бататгаж, цаашид илүү ихийг хийх бодлогыг хамтдаа хэрэгжүүлэх ёстой. Бодитой хамтын ажиллагаа зөвхөн газар тариалан гэлтгүй бусад бүх салбараар дамжин улс орны хөгжилд хамгийн их өгөөжөө өгнө. Бодлого, зохион байгуулалт нь зөв, талуудын хамтын ажиллагаа, оролцоо сайн байвал ямар ч ажлыг хийж болдог гэдгийг бид “Атрын IIIаян”-аар харуулсан” гэж Монгол Улсын Ерөнхий сайд С.Батболд хэлэв.

Тэрээр Тариаланчдын III чуулганд оролцож байгаа төлөөлөгчдөд хандан үг хэлэхдээ ингэж онцолсон байна. Төр, засгаас авч хэрэгжүүлж байгаа бодлого, тариалан эрхлэгчдийн хамтын хичээл, зүтгэлийн дүнд “Атрын III аян”-ыг амжилттай хэрэгжүүлж тавьсан зорилгоо биелүүлж чадсан. Цаашид үндэсний үйлдвэрлэл, газар тариалангийн салбараа улам хөгжүүлэхийн тулд НӨАТ болон импортын татварт анхаарах, өгч байгаа урамшууллын нэр төрлийг нэмэгдүүлэх, техник, технологоо шинэчлэх, эргэлтийн хөрөнгөөр дэмжих зэрэг шаардлагатай арга хэмжээ авахад анхаарна гэж Засгийн газрын тэргүүн тариаланчдад амаллаа. 

Гэхдээ нөгөө талдаа тариалан эрхлэгчид өөрсдөө хариуцлага хүлээж, аюулгүй, эрүүл хүнсээр иргэдээ хангах, өрсөлдөх чадвартай байх ёстойг тэрээр онцгойлон анхааруулж зарим улсын ололт, амжилтаас дурдав. Тухайлбал Канадын хамгийн хүйтэн гэгддэг нэг муж гэхэд л төмсний үйлдвэрлэлээр улсдаа тэргүүлдэг бөгөөд төмснийх нь чанар дэлхийд хамгийн сайнд тооцогддог, Арабын Нэгдсэн Эмират Улсад өрх бүр үйлдвэрлэгч байдаг зэргийг Ерөнхий сайд жишээ болгоод гадны улс орнуудын туршлагыг судлаж, боломжтойг нь өөрийн орны онцлог, нөхцөлтэйгээ уялдуулан нутагшуулахад анхаарахыг зөвлөв.

Засгийн газраас зарим чиг үүргийг мэргэжлийн холбоод, төрийн бус байгууллагад шилжүүлж байгаа энэ үед үүнд бэлэн байгаа эсэх, чадавхи,  хариуцлагаа сайжруулах гээд олон асуудлыг чуулганаараа хэлэлцэн тодорхой шийдэлд хүрнэ гэдэгт итгэлтэй байгаагаа Ерөнхий сайд хэллээ. Тэрээр тариаланчдад хандаж үг хэлснийхээ дараа “Атрын IIIаян”-ыг амжилттай хэрэгжүүлэхэд үнэтэй хувь нэмэр оруулсан ХХААХҮЯ, Монголын Тариаланчдын холбоо, Сэлэнгэ, Төв, Булган аймгийн Хүнс, хөдөө аж ахуй, жижиг, дунд үйлдвэрийн газарт Засгийн газрын өргөмжлөл гардуулж баяр хүргэв.

Монгол Улсын Ерөнхий сайд С.Батболд өнөөдөр Дэлхийн банкны Монгол Хятад болон Хойд Солонгос хариуцсан захирал Клаус Роланд болон Олон Улсын санхүүгийн корпорацийн Зүүн Ази болон номхон далайн бүсийн захирал Финклстон  нарыг хүлээн авч уулзаа. Уулзалтын эхэнд Ерөнхий сайд Дэлхийн банк, Олон улсын санхүүгийн корпорацитай Монгол Улс олон жилийн турш хамтран ажиллаж, хэрэгжүүлж байгаа төсөл хөтөлбөрүүд үр дүнгээ өгч, амжилттай хэрэгжиж байгаад Засгийн газрын нэрийн өмнөөс талархал илэрхийлээ.

Сүүлийн жилүүдэд уул уурхайн асуудал олны анхаарлыг татах болсон. Иргэний нийгэм ч анхаарлаа хандуулж байна. Гэсэн хэдий ч Засгийн газрын баримталж байгаа хөгжлийн тэргүүлэх чиглэл бол уул уурхай бус боловсруулах үйлдвэрлэлийг хөгжүүлэх, эдийн засгийн тогтвортой, урт хугацааны өсөлтийг хангах, ажлын байр олноор бий болох явдал юм. Энэ удаагийн Эдийн засгийн форумын үеэр ч энэ асуудлаар ярилцаж, төр хувийн хэвшил, иргэний нийгмийн хамтын ажиллагааны талаар нухацтай ярилцаж байгааг Ерөнхий сайд С.Батболд дуулгалаа.

Түүнчлэн дэд бүтцийн чиглэлээр томоохон бүтээн байгуулалт өрнүүлэх, төсөл хөтөлбөрүүдийг хэрэгжүүлж эхлэхэд Монгол Улсын Засгийн газар Олон Улсын санхүүгийн корпорацитай хамтран ажиллах сонирхолтой байгаагаа Засгийн газрын тэргүүн хэллээ. Дэлхийн банк, Олон Улсын санхүүгийн корпорацийн төлөөлөгчид манай улсын ноолуурын салбарыг төр засгаас хэрхэн дэмжиж байгааг уулзалтын үеэр сонирхож байлаа.

Ерөнхий сайд С.Батболд хэлэхдээ саяхан ноос, ноолуурын салбарынхныг хүлээн авч уулзан тэдний өмнө тулгамдсан асуудлаар санаа бодлоо солилцсон. Засгийн газрын хувьд санхүүгийн талаар хэрхэн дэмжих боломж байгаа талаар байр сууриа тодорхойлсон. УИХ-ын хаврын чуулганаар энэ асуудал хөндөгдөнө гэж найдаж байгаагаа хэллээ. Дэлхийн банк, Олон улсын санхүүгийн корпорацийн хувьд манай улсын ноолуурын салбарыг дэмжих чиглэлээр Засгийн газартай хамтран ажиллахад бэлэн байна гэдгээ илэрхийлээ.

Mонголын эдийн засгийн чуулганд оролцож байгаа Дэлхийн эдийн засгийн форумын Дэлхийн залуу удирдагчдын төлөөллийг Монгол Улсын Ерөнхий сайд С.Батболд 2011 оны 3 дугаар сарын 03-ны өдөр Төрийн ордонд хүлээн авч уулзав. Залуу удирдагчид эдийн засгийн тогтвортой хөгжил, хөдөө аж ахуй, түүхий эдийн бирж, байгалийн баялаг, тэр дундаа үндэсний баялгийн менежмент, урт хугацааны хөрөнгө оруулалтын болон тэтгэврийн сан, санхүүжилтдутагдаж байгаа салбарууд дахь асуудлыг шийдэх гарцын талаар өөрсдийн сүлжээгээрээ дамжуулан хамтран ажиллахад бэлэн гэдгээ Ерөнхий сайдад илэрхийллээ.

Дэлхийн эдийн засгийн форум хөгжиж байгаа улс орнуудад хүрч байгаа тусламж, дэмжлэгийгбодитой, үр дүнтэй байлгахын тулд залуу удирдагчдыг  ажиллуулж эхлэх болсон юм. Манай улсыг эхний ээлжинд сонгож авсны дагуу Монголын эдийн засгийн чуулганд залуу удирдагчид оролцон нөхцөл байдалтай танилцаж байна. Тухайн улс орондоо нэр хүндтэй, нийгэмд байр сууриа эзэлсэн, мэдлэг боловсролтой залуустай уулзаж байгаадаа Ерөнхий сайд баяртай байна гээд залуу хүнээс зоримог, ухаалаг, эрч хүчтэй санаа гардаг учир Монгол Улсад тулгамдаж байгаа асуудлуудыг шийдвэрлэх чиглэлээр хамтран ажиллах болно гэв.

Дэлхийн эдийн засгийн форумаас тодорхой шалгуур үзүүлэлтээр Дэлхийн залуу удирдагчдыг тодруулдаг бөгөөд манай улсаас УИХ-ын гишүүн С.Оюун, УИХ-ын гишүүн, Эрдэс баялаг, эрчим хүчний сайд Д.Зоригт, Сангийн дэд сайд Ч.Ганхуяг нар шалгарсан юм

Монгол Улсын Засгийн газар стратегийн болон томоохон орд газруудыг эдийн засгийн эргэлтэд оруулж, хуримтлал бий болгох, түүнээс иргэн бүрт хишиг хувь хүртээхийн зэрэгцээ эдийн засгаа улам хөгжүүлэх тулгуур салбар болгох зорилт дэвшүүлэн ажиллаж байгаа. Энэ зорилтын хүрээнд эрдэс баялгийн салбарын үйл ажиллагааг ил тод байлгах нь нэн чухал гэж Монгол Улсын Ерөнхий сайд С.Батболд Иргэний танхимд өнөөдөр эхэлсэн “Олборлох үйлдвэрлэлийн ил тод байдал” сэдэвт тусгай хуралдааныг нээхдээ хэллээ.

Тэрбээр энэ салбарын ил тод байдлыг хангах үүднээс төрийн өмчийн оролцоотой болон төрийн өмчит уул уурхайн томоохон компаниуд, тухайлбал “Эрдэнэс Тавантолгой” ХК, “Оюутолгой” ХХК-ийн Төлөөлөн Удирдах Зөвлөлийн бүрэлдэхүүнд хараат бус гишүүдийг томилон ажиллуулах бодлого барьж байгаа. Эдгээр хараат бус гишүүд нь тухайн аж ахуйн нэгжүүдийн үйл ажиллагаанд тавих хяналтыг сайжруулах, ил тод байдлыг хангахад чухал хувь нэмэр болно гэж үзэж байгаагаа онцлоод энэчлэн анхаарч ажиллаж байгаа зүйлүүд бий.

Цаашид улам сайжруулахын төлөө ажиллана. Мөн хариуцлагатай уул уурхайг хөгжүүлэхэд Монгол Улсын Засгийн газар илүүтэй анхаарч ажиллаж байна. Эрдэс баялгийн салбарын талаарх бүхий л мэдээллийг  ард иргэд, аж ахуйн нэгж байгууллагууд гэхчлэн оролцогч талуудад илүү нээлттэй, ил тод болгох талаар олон сайхан санал, санаачилга энэ хуралдаанаас гарна гэдэгт итгэж байгаагаа Ерөнхий сайд С.Батболд илэрхийллээ.

Олборлох үйлдвэрлэлийн ил тод байдлын санаачилгын шаардлагыг хангахад нэгдсэн 33 орон байдаг. Манай улс өнгөрсөн оны аравдугаар сард уг шаардлагыг хангасан дөрөв дэх орон болсон гэсэн мэдээллийг тэрбээр хуралдаанд оролцогчдод өгөөд ил тод байдлыг хэрэгжүүлснээр бид эрдэс баялгийн салбарт, цаашлаад улс орны эдийн засагт гарч болзошгүй сөрөг үр дагавраас урьдчилан сэргийлж, хөрөнгө оруулагчид болон олон улсын санхүүгийн байгууллагуудыг хариуцлагатай уул уурхайг хөгжүүлэх чиглэлд анхаарлыг нь хандуулах боломжтой болно гэж Засгийн газрын тэргүүн хэлсэн үгэндээ онцлолоо.

“Олборлох үйлдвэрлэлийн ил тод байдал” сэдэвт тусгай хуралдааныг Монгол Улсын Ерөнхийлөгчийн Тамгын газар, Монгол Улсын Засгийн газар, Дэлхийн эдийн засгийн форумтай хамтран зохион байгуулж байна. Хуралдаанд олборлох үйлдвэрлэлийн салбарт идэвхитэй үйл ажиллагаа явуулж байгаа олон улсын болон дотоодын компани, төрийн бус байгууллага болон хөгжлийн агентлагуудын төлөөлөл оролцож байна. Оролцогчид олборлох үйлдвэрлэлийн салбарын нээлттэй байдал ба засаглалыг бэхжүүлэх талаар хүрсэн амжилтуудад тулгуурлан цаашид улам сайжруулахад туслах арга зам судлан хоёр өдөр хэлэлцэх юм

Монгол улсын Ерөнхий сайдын ивээл дор Монголын эдийн засгийн чуулган өнөөдөр эхэллээ. Монгол улсын хөгжлийн асуудлаар санал бодлоо солилцох тус чуулган эхэлсэнтэй холбогдуулан чуулганыг зохион байгуулагчид хэвлэлийн бага хурал зохион байгуулав. Өөрөөр хэлбэл Эдийн засгийн форумын удирдах зөвлөлийн дарга, Монгол улсын Ерөнхий сайд С.Батболд зохион байгуулагчдын хамт сэтгүүлчдэд мэдээлэл хийсэн юм. Манай улсад хоёр дахь жилдээ болж байгаа эдийн засгийн форум энэ жил хөгжлийн төлөө хамтдаа уриан дор 4 гол чиглэлээр зохион байгуулагдаж, 15 салбар хуралдаанаар нээлттэй хэлэлцүүлэгүүд өрнөж байна.

Нийгмийн бүх давхаргыг хамарсан төлөөлөл хамтран ,улс орныхоо ирээдүйн зорилтоо тодорхойлж хөгжлийн асуудалд тодорхой шийдэлд хүрэх уулзалт болж байна гэдгийг Монгол улсын Ерөнхий сайд С.Батболд тэмдэглэж байна. Энэ шийдэл нь төр засгийн түвшинд зөвлөмж болох учиртай, бүр цаашлаад улс орны стратегийн зах зээлийн төлөвлөлтийг бий болгох чиг хандлага болно гэдгийг тэрбээр онцоллоо. Өнгөрсөн онд анхны чуулганаараа хөрөнгийн зах зээл, өрсөлдөх чадвар, улсын бүртгэлийн шинэчлэл, төсвийн шинэчлэл,уул уурхай, ногоон эдийн засаг зэрэг улс орны амьдралд чухал нөлөө бүхий асуудлаар төр, хувийн хэвшил, эрдэмтэн, судлаачид, гадаадын хөрөнгө оруулагчид болон хандивлагчид хамтран хэлэлцүүлэг өрнүүлж тодорхой шийдэл, сэжүүр гаргасан нь амжилт байсан.

Өргөс авсан мэт үр дүн нь хурдан гарахгүй ч амьдралд хэрэгжих эхлэл тавьсан гэдгийг Монгол улсын Ерөнхий сайд тэмдэглээд, энэ жил энэ хурлыг дахин үргэлжлүүлж тодорхой асуудлаар буюу хөгжлийн асуудлаар чуулна гэдгийг дурьдлаа. Нийгмийн диалог хэмээн тодорхойлсон тус чуулга уулзалтын бас нэг онцлог нь засаглал, төр болон компанийн засаглалын талаар ярилцахад оршиж байна

Монголын улс төрийн ууган хүчин-Монгол Ардын Нам үүсч байгуулагдсаны 90 жилийн ойг тохиолдуулан өнөөдөр МАН-ын удирдлага Монголын улс төрийн намуудын дарга нарыг хүлээн авч уулзлаа. Энэ үеэр Монгол Ардын намын дарга, Монгол Улсын Ерөнхий сайд С.Батболд МОНГОЛ УЛСЫНХАА ХӨГЖИЛ ДЭВШЛИЙН ТӨЛӨӨ ГЭСЭН ЭРХЭМ ЗОРИЛГЫН ДОР ХАМТРАН АЖИЛЛАХЫГ УРИАЛЛАА.

Тэрээр Монголын улс төрийн хүчнүүд Монгол Улсынхаа тусгаар тогтнол бүрэн эрх байдлыг улам баталгаажуулах, нийгэм, эдийн засгаа хөгжүүлэх, хүний хөгжлийг дээшлүүлэх чиглэлээр ухаан санаа, үзэл бодлоо уралдуулж байдаг билээ. Энэ утгаараа бид нэгдмэл нэг зорилготой юм. Харин түүнд хүрэх улс төрийн хүчний үзэл баримтлал, бодлого, байр суурь өөр байдаг нь ардчилалын үнэт зүйл юм. Тэгэхээр бид өнөөдөр энэхүү үнэт зүйлээ хөгжүүлж, хамтран ажиллах хэрэгтэй байна. Тиймээс өнөөдөр бид Монгол улсынхаа хөгжил дэвшлийн төлөө гэсэн энэхүү эрхэм зорилгын дор нэгдэх хэрэгтэй байна гэлээ.

Мөн Монгол Ардын намын дарга С.Батболд Улс төрийн хэлмэгдүүлэлтэд өртөн амь насаа алдсан, эд хөрөнгө, сэтгэл санаагаар хохирсон иргэд, албан хаагчид, цэргийн дарга нар, лам хувраг, намынхаа гишүүдийн ах дүү, төрөл төрөгсөд, үр ач нарт гүн эмгэнэл илэрхийлж, хэлмэгдэлтийг таслан зогсоох, газар авахуулахгүй байх талаар хүчин мөхөсдсөндөө ард түмнээсээ Монгол Ардын Нам уучлал хүссэнээ улс төрийн намын удирдлагуудад дуулгалаа.

Уулзалтын үеэр улс төрийн намуудын удирдлагуудад МАН-ын ойн хүндэтгэлийн одон гардуулсан юм. ҮШН-ын дарга Ц.Цолмон намуудын дарга  нарыг төлөөлөн хэлсэн үгэндээ МАН-ын удирдлагууд энэхүү уулзалтыг зохион байгуулж байгаа нь улс төрийн намуудын харилцаанд шинэ хуудас нээлээ. 90 жилийн түүхэнд намуудын удирдлагууд суугаад санаа бодлоо солилцож зөвлөлдөж байсан түүх ховор юм. Үүний эхлэлийг тавьж байгаад Монгол Ардын намын дарга С.Батболдод талархал илэрхийлж байна гэлээ. Монгол Улсын Ерөнхий сайд “шилжилтийн үед дуусч эдийн засгийн хөгжлийн үед орж байна” гэснийг яах аргагүй хүлээн зөвшөөрч байна. Мөн “Бид улс төрөө Монгол ухаанаар удирдаж, эдийн засгаа дэлхийн жишэгт хүргэн хөгжүүлэх ёстой” гэсэн Ерөнхий сайд С.Батболдын байр суурийг дэмжиж, өөрөөр хэлбэл Европ стандартыг эдийн засаг нийгмийн амьдралд авч хэрэгжүүлж байгаа Монгол Ардын намын дарга, Монгол Улсын Ерөнхий сайд С.Батболд болон хамтарсан Засгийн газрын бодлогыг дэмжиж байгаагаа улс төрийн хүчнүүд илэрхийллээ.

Монгол Улсын Ерөнхий сайд С.Батболд 2009 оны 12 дугаар сард эрүүл мэндийн салбарын ажилтнуудтай уулзахдаа эрүүл мэндийн салбарт цогц шинэчлэл хийх шаардлагатайг онцлон тэмдэглэж, ажил хэрэг болгох үүрэг даалгавар өгч байсан юм. Үүний үр дүнд Монгол Улсын Засгийн газраас тус салбарт хийх цогц шинэчлэлийн төлөвлөгөөг баталж, тодорхой арга хэмжээ авч хэрэгжүүлснээр нааштай ахиц гарч эхэлжээ.

Ерөнхий сайд С.Батболд өнөөдөр буюу 2011 оны хоёрдугаар сарын 25-ны энэ өдөр Эрүүл мэндийн яаманд эхэлсэн “Нийтийн эрүүл мэнд, нийтийн биеийн тамирыг дэмжих жил” сэдэвт эрүүл мэндийн салбарын удирдах ажилтны зөвлөлгөөнд оролцож үг хэллээ. Ингэхдээ тэрбээр өнгөрсөн нэгдүгээр сард Кувейт улсад айлчлах явцдаа 16 хүртлэх насны хүүхдүүдэд эмнэлгийн тусламж үйлчилгээг олон улсын түвшинд үзүүлэх 35 сая ам.долларын өртөг бүхий эмнэлгийг Монгол Улсад барих талаар Кувейтийн талтай яриа хэлэлцээр хийж нааштай шийдвэрлүүлэхээр болсон гэдгийг онцлон хэллээ. Иймд эрүүл мэндийн салбарын удирдлагуудад уг асуудлыг ажил хэрэг болгох тал дээр анхаарч ажиллах үүрэг өглөө.

Засгийн газрын тэргүүн  монгол хүн эрүүл, боловсролтой, ажилтай, орон сууцтай байх учиртай. Энэ зорилтын төлөө анхаарч ажиллаж байна. Монгол хүн бүр эрүүл байх нь хамгийн чухал. Иймд манай Засгийн газар эрүүл мэндийн салбараа дэмжиж ажиллаж байгаа, цаашид ч дэмжих болно гэдгээ тус салбарын удирдлагуудад илэрхийллээ.

Өнгөрсөн 2010 онд тус салбарт эрх зүйн шинэчлэлийн эхлэл тавигдаж, мянганы хөгжлийн зорилтын гол үзүүлэлт эхийн болон нэг хүртлэх насны хүүхдийн эндэгдэл буурч, эрүүл мэндийн салбарын санхүүжилт, хөрөнгө оруулалт нэмэгдсэн. Олон улсын стандартад нийцсэн оношлогоо, эмчилгээний төвүүдийг байгуулж, гадаад дотоодын хөрөнгө оруулалт, орчин үеийн тоног төхөөрөмжөөр хангах ажлыг хийж эхлээд байгаа гэдгийг Ерөнхий сайд тэмдэглээд томоохон барилга байгууламжуудийг барьж байгуулах шийдвэрүүдийг Засгийн газраас дэмжсэн, тодорхой үр дүнгүүд гарч байгаа талаарх мэдээллийг өглөө. Энэ талаар олон арга хэмжээ авч, төсөл хөтөлбөр хэрэгжүүлж байгаа ч эмчилгээ, оношлогоо хийлгэхээр гадаад орныг зорих иргэдийн тоо буурахгүй байгаад Ерөнхий сайд шүүмжлэлтэй хандаж байлаа.

Монгол Улс, БНХАУ-ын Засгийн газар хооронд байгуулсан гэрээ хэлэлцээрийн дагуу 5054 хүний суудалтай спортын ордныг байгуулан ашиглалтад оруулсан. Түүнчлэн Өвөрхангай, Төв, Баян-Өлгий аймгийн 600 суудалтай спорт цогцолборын суурийг тавьж, нийслэлийн зургаан дүүрэг, хэд хэдэн аймагт усан бассейн бүхий спортын ордны зураг төсөл хийх, барьж эхлэх хөрөнгийн эх үүсвэрийг 2011 оны төсөвт тусгасан. Энэ дагуу аймаг, дүүрэг бүрт спорт цогцолбор барьж байгуулах ажлыг цаашид үргэлжлүүлэн хийхийг Ерөнхий сайд С.Батболд орон нутгийн удирдлагуудад үүрэг болголоо.   

Тэрбээр хэлсэн үгийнхээ төгсгөлд Засгийн газрын мөрийн хөтөлбөрт тусгагдсан хийгдэж амжаагүй, хэрэгжилт удааширсан зорилтыг хурдасгах талдаа чармайлттай ажиллах, эрүүл мэндийн тусламж үйлчилгээний соёл, чанар, хүртээмжийг нэмэгдүүлэхэд анхаарч ажиллах шаардлагатай. Эрүүл мэндийн даатгалын хууль эрх зүйн орчныг боловсронгуй болгох шаардлага ч байгаа гэдгийг онцлоод эрүүл мэндийн салбарынхныг Засгийн газрын зүгээс бүхий л талаар дэмжиж ажиллах болно гэдгээ илэрхийллээ