Ангилал: мэдээ

Монгол Улсын Ерөнхий сайд С.Батболд Оросын Холбооны Улсын Засгийн газрын Дарга В.В.Путины урилгаар 2010 оны 12 дугаар сарын 13-16-нд Оросын Холбооны Улсад албан ёсны айлчлал хийв. Айлчлалын явцад 12 дугаар сарын 14-нд Монгол, Оросын Засгийн газрын тэргүүн нарын хэлэлцээ болов. Монгол Улсын Ерөнхий сайд С.Батболд Оросын Холбооны Улсын Холбооны Хурлын Холбооны Зөвлөлийн Дарга С.М.Миронов, Холбооны Хурлын Төрийн Думын Дарга Б.В.Грызлов, Оросын зарим яам, байгууллагуудын удирдлагатай уулзав.
Монгол Улсын Ерөнхий сайд С.Батболд Санкт-Петербург хотод зочлов.

 Засгийн газрын Тэргүүн нар 2009 оны наймдугаар сард Монгол Улсын Ерөнхийлөгч Ц.Элбэгдорж, Оросын Холбооны Улсын Ерөнхийлөгч Д.А.Медведев нар гарын үсэг зурсан Стратегийн түншлэлийг хөгжүүлэх тухай Улаанбаатарын Тунхаглалын зарчим, үзэл санааны дагуу тогтвортой, эрчимтэй хөгжиж  байгаа Монгол-Оросын харилцааны байдал, төлөвийг өндөр үнэлэв. Өнөөгийн олон улсын нөхцөл байдалд Монгол-Оросын стратегийн түншлэлийг өрнүүлэх нь улс төрийн чухал ач холбогдолтой гэж Талууд үзэж байна.

Хоёр улсын удирдагчдын тохиролцоог тууштай хэрэгжүүлэх, хоёр болон олон талын хүрээнд харилцан сонирхсон салбаруудад харилцан ашигтай хамтын ажиллагааг бэхжүүлэх сонирхлоо Талууд нотоллоо. Засгийн газрын тэргүүн нар хоёр талын улс төрийн яриа хэлэлцээ, түүний дотор өндөр, дээд түвшинд ч эрчимтэй явагдаж байгаад сэтгэл хангалуун байгаагаа илэрхийлэв.

Талууд 2011 онд Монгол Улс болон Оросын Холбооны Улсын хооронд дипломат харилцаа тогтоосны 90 жил, сансрын хамтарсан нислэгийн 30 жилийн ойг хамтран тэмдэглэхээр тохиролцлоо.Монголын тал 2009-2010 оны хатуу өвлийн хохирлыг даван туулахад буцалтгүй тусламж үзүүлсэнд Оросын Холбооны Улсад талархал илэрхийлэв.

Засгийн газрын тэргүүн нар худалдаа-эдийн засаг, эрчим хүч, хүмүүнлэгийн болон хоёр талын харилцааны бусад салбарт сүүлийн жилүүдэд гарсан ахиц дэвшлийг сэтгэл ханамжтай тэмдэглэн, Худалдаа-эдийн засаг, шинжлэх ухаан-техникийн хамтын ажиллагааны Монгол-Оросын Засгийн газар хоорондын комиссын үйл ажиллагааг сайшаан үнэлж, үйл ажиллагааг нь цаашид идэвхжүүлэхээр тохиролцлоо.

Монгол Улс, Оросын Холбооны Улсын Засгийн газрын тэргүүн нарын уулзалтын хүрээнд дараах баримт бичгүүдэд гарын үсэг зурав
• Монгол – Оросын худалдаа, эдийн засгийн хамтын ажиллагааг 2011-2015 онд хөгжүүлэх Хөтөлбөр
• Бүс нутаг болон хил орчмын нутгийн хамтын ажиллагааг 2011-2012 онд эрчимжүүлэх нэн тааламжтай эрх зүй, худалдаа-эдийн засгийн болон бусад нөхцлүүдийг бүрдүүлэх арга хэмжээний  төлөвлөгөө
• Насанд хүрээгүй иргэдийн цэргийн бэлтгэл хангах нэмэлт хөтөлбөр бүхий боловсролын байгууллагад насанд хүрээгүй иргэдийг бэлтгэх тухай Монгол Улсын Засгийн газар, Оросын Холбооны Улсын Засгийн газар хоорондын Хэлэлцээр
• Оросын Холбооны Улсын өмнө Монгол Улсын хүлээх санхүүгийн үүргийг зохицуулах тухай Монгол Улсын Засгийн газар, Оросын Холбооны Улсын Засгийн газар хоорондын Хэлэлцээр
• Монгол Улсын ачааг ОХУ-ын нутаг дэвсгэрээр дамжуулан тээвэрлэх тухай Монгол Улсын Зам, тээвэр, барилга, хот байгуулалтын яам,  ОХУ-ын Зам тээврийн яамны хоорондын Санамж бичиг
• Эрчим хүчний салбарт хамтран ажиллах тухай Монгол Улсын Эрдэс баялаг, эрчим хүчний яам, ОХУ-ын Эрчим хүчний яам хоорондын Санамж бичиг
• Газрын хэвлийн геологийн судалгаа болон ашиглалтын тухай Монгол Улсын Эрдэс баялаг, эрчим хүчний яам, Оросын Холбооны Улсын Байгалийн баялаг, байгаль орчны яамны хооронд хамтран ажиллах тухай Санамж бичиг
• «Дорнод уран» хязгаарлагдмал хариуцлагатай хамтарсан компани байгуулах зарчмын нөхцлүүдийн тухай Хэлэлцээр
• Монгол Улсын бүртгэлийн ерөнхий газар болон Оросын Холбооны Улсын Хууль зїйн яамны Улсын бүртгэлийн танхим хоорондын хамтын ажиллагааны Хэлэлцээр
• Орос Улстай хамтран ажиллах ажил хэргийн зөвлөл (Монгол Улс), Монгол Улстай хамтран ажиллах ажил хэргийн зөвлөл (Оросын Холбооны Улс)хоорондын харилцан ойлголцлын санамж бичиг
• Монгол Улсын Иргэний Нисэхийн Ерөнхий газар,  “Ильюшн Финанс Ко” нээлттэй хувьцаат компанийн хоорондын Харилцан ойлголцлын Санамж бичиг

Дэлхий нийтийг хамарсан хямралын үр дагавраас улбаалан олон улсын зах зээл тогтворгүй байгаа хэдий ч Монгол Улс, Оросын Холбооны Улсын хоорондын худалдаа-эдийн засгийн хамтын ажиллагаа хамтын хүчин чармайлтын дүнд нааштай хандлагатай байгааг Талууд тэмдэглэв. Хоёр талын худалдаа сэргэж өсөх шатанд явагдаж, үзүүлэлтүүд нь хямралын өмнөх түвшинд дөхөж ойртов. Оросын Холбооны Улс Дэлхийн худалдааны байгууллагад даруйхан элсэхийг Монгол Улс дэмжиж байна. Хоёр талын худалдааг либералчилж, өргөжүүлэх зорилгоор Чөлөөт худалдааны хэлэлцээр байгуулах нөхцөл боломжийг судалж үзэхээр Талууд тохиролцов.

Хоёр улсын нийгэм-эдийн засгийн хөгжил, тэдгээрийн үндэсний эдийн засгийг шинэчлэх зорилгод нийцсэн худалдаа-эдийн засгийн хамтын ажиллагааны өндөр эрч хүчийг хангахад чиглэсэн хамтын хүчин чармайлтаа цаашид ч гаргахыг Талууд зорьж байна. Энэ үүднээс Талууд дараахыг тохиролцов:
-Монгол-оросын худалдаа-эдийн засгийн хамтын ажиллагааг 2011-2015 онд хөгжүүлэх Хөтөлбөрийг хэрэгжүүлж эхлэх,
-Монгол Улс, Оросын Холбооны Улсын хил орчмын болон бүс нутгийн хамтын ажиллагааг цаашид эрчимжүүлэх үүднээс  нэн тааламжтай эрх зүй, худалдаа-эдийн засгийн болон бусад нөхцөлийг бий болгох 2011-2012 оны арга хэмжээний Хамтарсан төлөвлөгөөг хэрэгжүүлж эхлэх,
-Монгол Улсын эдийн засагт мэдэгдэхүйц үүрэг гүйцэтгэж байгаа Монгол-Оросын хамтарсан үйлдвэрүүд “Эрдэнэт үйлдвэр” ХХК, “Монголросцветмет” ХХК-ийн үр ашгийг дээшлүүлэх нэмэлт арга хэмжээ боловсруулах,
-Монгол Улсын Зам, тээвэр, барилга, хот байгуулалтын яам болон Оросын Холбооны Улсын Тээврийн яамны хооронд Монгол Улсаас Оросын Холбооны Улсын нутгаар дамжуулан ачаа тээвэрлэх тухай харилцан ойлголцлын Санамж бичгийн үндсэн дээр  Засгийн газар хоорондын хэлэлцээрт ойрын үед гарын үсэг зурах,
-Монгол-оросын “Улаанбаатар төмөр зам” ХНН-ийн дүрмийн санг тэнцүү хэмжээгээр 250 сая ам.доллараар нэмэгдүүлэх асуудлыг зохицуулах. Энэ нь тус газрыг ихээхэн хэмжээгээр шинэчлэх боломж олгож, Монгол Улсын төмөр замын дэд бүтцийн хөгжлийн хөтөлбөрийг хэрэгжүүлэхэд тус дөхөм үзүүлнэ.
-2011 оны хавар-зуны улиралд үйл ажиллагаа явуулах боломжийг харгалзан Монголын нөөц баялгийг олборлож ашиглах хүрээнд Монгол-Оросын “Дэд бүтцийн хөгжил” ХХК болон түүний түншүүд “УБТЗ”-тай холбогдох шинэ төмөр зам байгуулах ажилд оролцох нөхцөл, мөн Монгол Улсаас уул уурхайн бүтээгдэхүүнийг Оросын Холбооны Улсын алс дорнодын боомтуудад дамжин тээвэрлэх, түүний дотор төмөр замын урт хугацааны хөнгөлөлттэй тариф тогтоохтой холбогдсон асуудлыг тохиролцох,
-Тохиролцсон зарчмуудын үндсэн дээр хамтарсан “Дорнод уран” ХХК-ийг үүсгэн байгуулах тухай баримт бичгүүдэд гарын үсэг зурах,
-Хөдөө аж ахуйн салбар дахь хил орчмын болон бүс нутгийн харилцан ажиллагааны боломж  болон Оросын Холбооны Улсад нийлүүлэх Монголын мах, махан бүтээгдэхүүнийг нэмэгдүүлэх зорилгоор монгол малыг эрүүлжүүлэх хүч чармайлтад онцгой анхаарал хандуулан хоёр улсын харилцааны уламжлалт чиглэлүүдийн нэг болох энэхүү салбарт хамтын ажиллагаа хөгжүүлэх,
-Монгол Улсын Засгийн газрын “100000 айлын орон сууц” Хөтөлбөрийг хэрэгжүүлэхэд Оросын барилгын компаниудыг үргэлжлүүлэн оролцуулах тухай Монголын талын саналыг шуурхай авч үзэх,
-Монгол Улсын Оросын Холбооны Улс дахь, Оросын Холбооны Улсын Монгол Улс дахь үл хөдлөх хөрөнгийн асуудлууд болон газар ашиглах нөхцлийн талаар харилцан хүлээн авч болохуйц шийдвэрийн хувилбаруудыг олох ажлыг үргэлжлүүлэх; хоёр улсын үндэсний хууль тогтоомжтой нийцүүлэн Улаанбаатар, Дархан хотод байгаа орон сууцны 8 байрыг Оросын талаас Монголд үнэ төлбөргүй шилжүүлэн хүлээж авах баримт бичгүүдийг бэлтгэх;

Хоёр улсын хооронд цэргийн болон цэрэг-техникийн хамтын ажиллагаа амжилттай хөгжиж байгааг Засгийн газрын Тэргүүн нар сэтгэл ханамжтай тэмдэглэв. Монголын тал Оросын Холбооны Улсад Монголын зэвсэгт хүчний зэвсэглэл, цэргийн техникийг шинэчлэх, боловсон хүчнийг бэлтгэхэд дэс дараатай тусламж үзүүлж байгаад талархал илэрхийлэв. Хоёр тал Монгол-Оросын  «Дархан»  цэргийн хамтарсан сургуулийн  дүнг өндрөөр үнэлээд ийм төрлийн цэргийн хамтарсан сургууль, тухайлбал Монгол болон Оросын нутаг дэвсгэрт терроризмын эсрэг ажиллагаа явуулах үед хоёр улсын цэргийн анги салбарууд хамтран ажиллах арга замыг боловсруулах сургуулилтыг  тогтмол зохион байгуулах ажлыг үргэлжлүүлэхийн төлөө байгаагаа Талууд илэрхийлэв.

Хүмүүнлэгийн салбарт, түүний дотор Монголын иргэдийг Оросын их дээд сургуулиудад суралцуулах тоо хэмжээг  нэмэгдүүлэх, Монгол дахь Оросын их дээд сургуулиудын салбаруудад мэргэжилтэн бэлтгэх, давтан бэлтгэх, сургалтын хөтөлбөр солилцох, шинжлэх ухаан, соёл, боловсролын  зүтгэлтнүүдийн хооронд харилцаа холбоог өргөжүүлэх салбарт Монгол Улс, Оросын Холбооны Улс  хамтын ажиллагаагаа үргэлжлүүлнэ.

Монгол Улс болон Орос Улс  олон улс, бүс нутгийн тулгамдсан асуудлуудаар ойролцоо буюу  ижил байр суурьтай байгааг хоёр улсын Засгийн газрын Тэргүүн нар тэмдэглэлээ. Талууд олон улсын аюулгүй байдлыг хангах, үй олноор хөнөөх зэвсгийг үл дэлгэрүүлэх, дэлхий нийтэд заналхийлсэн олон улсын терроризмын бүхий л хэлбэр илрэл, үндэстэн дамнасан зохион байгуулалттай гэмт хэрэг, хар тамхины наймаа, хууль бус зэвсгийн болон хүний худалдаатай тэмцэх салбарт хамтын ажиллагаагаа өргөжүүлэхийн төлөө байгаагаа илэрхийлэв.

Оросын тал Монгол Улсаас олон улсын болон бүс нутгийн талбарт хийж буй ихээхэн  санаачилгатай алхмууд болон олон улсын харилцааны системд гүйцэтгэж байгаа үүрэг, тухайлбал далайд гарцгүй  орнуудын дунд өсч байгаад баяр хүргэв. Ази-Номхон далайн бүс нутгийн интеграцийн үйл явцад Монгол Улс, Оросын Холбооны Улс оролцохын чухлыг Талууд онцлон тэмдэглэлээ. Үүнтэй холбогдуулан шинээр гишүүн элсүүлэх хориг цуцлагдсаны дараа “Ази,Номхон далайн эдийн засгийн хамтын ажиллагаа”-ны чуулга уулзалтад нэгдэж оролцох Монгол Улсын төлөвлөгөөг дэмжинэ гэдгээ Оросын тал дахин илэрхийллээ.

Засгийн газрын тэргүүн нар Солонгос хоорондын харилцаанд хурцадмал байдал газар авсанд сэтгэл түгшиж байгаагаа илэрхийлэв. Өөр хоорондын бүхий л асуудлыг тус тусын хууль ёсны эрх ашгийг харгалзан яриа хэлэлцээний замаар улс төр-дипломатын аргаар шийдвэрлэхийг БНСУ, БНАСАУ-д уриаллаа. Талууд Зүүн хойд Азийн бүс нутагт энх тайван, тогтвортой, аюулгүй байдлыг хангахад чухал ач холбогдолтой, Солонгосын хойгийн цөмийн зэвсгийн асуудлаарх зургаан талт хэлэлцээг сэргээх нэн  шаардлагатай байгаад анхаарлаа онцлон хандууллаа. Чингэхдээ БНАСАУ НҮБ-ын Аюулгүйн Зөвлөлийн 1718 болон 1874 дугаар тогтоолуудын шаардлагуудыг бүрэн дүүрэн биелүүлэх ёстой гэж Талууд үзэв.

Талууд бүс нутгийн аюулгүй байдлыг хангах чухал хүчин зүйл болсон Шанхайн хамтын ажиллагааны байгууллагын хүрээнд хамтын ажиллагаагаа гүнзгийрүүлнэ.  Ажиглагч улсын хувьд ШХАБ-д улам бүр жинтэй үүрэг гүйцэтгэхэд чиглэсэн Монгол Улсын  эрмэлзлэлийг Оросын Холбооны Улс сайшаан хүлээж авав.

Монголын тал олон улсын эрх зүйн зарчим, эвсэлд үл нэгдэх үндсэн дээр, бүс нутгийн улс орнуудын хууль ёсны эрх ашгийг харгалзсан аюулгүй байдал, хамтын ажиллагааны нээлттэй, ил тод, эрх тэгш тогтолцоог Ази, Номхон далайн бүс нутагт бий болгох тухай орос-хятадын санаачлага чухал ач холбогдолтойг Монголын тал тэмдэглэв.

Оросын тал цөмийн зэвсэгтэй бусад улс орнуудтай хамтран Монголын цөмийн зэвсэггүй статусын баталгаатай холбоотой асуудлаар Монголын талтай яриа хэлэлцээ үргэлжлүүлэхэд бэлэн байгаагаа илэрхийллээ.Талууд дэлхийн уур амьсгалын өөрчлөлтийн асуудалд ач холбогдол өгч байгаагаа нотоллоо. Тэд уур амьсгалын өөрчлөлтийн тухай НҮБ-ын конвенци, Киотогийн протоколоор баталсан зарчмууд, тэр дундаа “нийтээр боловч ялгаатай хариуцлага хүлээх” зарчмыг цаашид тууштай мөрдөх болно.

Талууд НҮБ-ын уур амьсгалын өөрчлөлтийн талаарх Бага хурлын (Канкун, 2010 оны 12 дугаар сар) үр дүнг харгалзан уг салбарт хамтын ажиллагаагаа гүнзгийрүүлэхэд бэлэн байна. Монгол Улсын Ерөнхий сайд С.Батболд халуун дотноор хүлээн авсанд ОХУ-ын Засгийн газрын Дарга В.В.Путинд талархал илэрхийлээд түүнийг тааламжтай цагтаа Монгол Улсад айлчлахыг урилаа. Урилгыг талархан хүлээн авлаа. Айлчлалын хугацааг  дипломат шугамаар товлоно.

Москва хот   2010 оны 12 дугаар сарын  14-ний өдөр

Монгол Улсын Ерөнхий сайд С.Батболд ОХУ-д энэ сарын 13-16-нд албан ёсны айлчлал хийх үеэрээ Оросын Холбооны Улсын Засгийн газрын Дарга В.В.Путин, тус улсын Холбооны Хурлын Холбооны Зөвлөлийн Дарга С.М.Миронов, Холбооны Хурлын Төрийн Думын Дарга Б.В.Грызлов нартай уулзаж өргөтгөсөн хэлэлцээнд хоёр талын ажиллагаатай холбоотой тодорхойгүй байсан олон чухал  асуудлуудад шийдэл өгсөн юм. Мөн Санкт-Петербург хотод зочилсон билээ. Хоёр улсын улс төр, эдийн засаг хамтын ажиллагааны талаар томоохон шийдвэрүүд гарсан эдгээр албан уулзалтын үеэр нийгэм, түүх, соёлын дурсгалт зүйлсийн талаарх яриа ч мөн өрнөж байлаа.

ОХУ-ын түүх, соёлын өвийн төв хэмээн тодотгодог Санкт-Петербург хотноо айлчлах үеэрээ Монгол Улсын Ерөнхий сайд С.Батболд, түүний гэргий Х.Отгонтуяа нар Эрмитажийн музей үзэж сонирхсон юм. Дэлхийд алдар нь түгсэн, жилийн жилд сая сая жуулчны хөлд дарагддаг Эрмитажийн музейд манай улсын эртний түүх, соёлыг илэрхийлэх үзмэрүүд байдаг.

Засгийн газрын тэргүүн энэ үеэр Монголын эртний түүхийн үнэт ховор үзмэрүүдийг эх оронд нь авчрах, хуулбарлаж авах тухай хүсэлтээ тавьж, Монголд үзэсгэлэн гаргаж ард иргэддээ үзүүлэх боломжийг эрэлхийлэн албаны хүмүүстэй санал солилцлоо. ОХУ-ын Холбооны Хурлын Холбооны Зөвлөлийн дарга С.М.Миронов, Санкт-Петербург хотын Захирагч хатагтай В.И.Матвиенко нартай уулзахдаа энэ талаар ярилцаж, асуудал хөндсөн бөгөөд тэд ч дэмжиж хамтран ажиллахаа илэрхийллээ

Монгол улсын Ерөнхий сайд С.Батболдын ОХУ-д хийж буй айлчлал Санкт Петербург хотод очсоноор үргэлжиллээ. Пискаревскийн хүндэтгэлийн цогцолборт хүрэлцэн очиж, эх орон хөшөөнд цэцэг өргөсний дараа Санкт Петербург хотын захирагч хатагтай В.И.Матвиенкотой уулзалт хийсэн юм.

Хоёр орны хамтын ажиллагаа, түүний дотор Улаанбаатар, Санкт Петербург хотуудын хоорондын харилцааг идэвхжүүлэх талаар гол яриа өрнөж, тус хотод сурч буй оюутны тоог нэмэх, харилцан үзэсгэлэн гаргах, мэргэжилтэн солилцох, хот төлөвлөлт, урлаг соёлыг хамгаалах чиглэлээр хамтарч ажиллахаар тохиролцлоо.

Санкт Петербург нь холбооны хотын статустай бөгөөд хаант Оросын нийслэл, түүх соёл урлагийн төв гэдгээрээ онцлогтой юм байна. Эрмитаж, Мариинский  гэх мэт музей театраараа дэлхийд  алдартай тус хотод хүн амын бодит орлого  нь  огцом өсч байгаа гэх үзүүлэлт гарчээ. 2010 оны эхний хагас жилд аж үйлдвэрийн салбарын нийт үйлдвэрлэл нь өнгөрсөн оны мөн үеийнхээсээ 8.3 , боловсруулах салбар нь 10.1 хувь өссөн бөгөөд агаарын болон төмөр замын тээврийн чухал зангилаа хот болж чаджээ. СанктПетербургаас ОХУ-ын  хоёр дахь Ерөнхийлөгч В.В.Путин төрсөн гэдгээрээ тус хотынхон бахархдаг юм байна. Энэ хотод монголын олон залуус боловсрол эзэмшсэн бөгөөд одоо ч их дээд сургуульд нь манай улсын 200 гаруй оюутан суралцаж  байна.

ОХУ-д нийтдээ монгол улсын 1500 гаруй оюутан суралцдаг ажээ. Уулзалтын дараа Ерөнхий сайд С.Батболд гэргийн хамт алдарт Эрмитажийн музей үзэж, “Мариинский”-ийн эрдмийн театрт “Хунт нуур “ бүжгийн жүжиг үзлээ. Монгол улсын ерөнхий сайд С.Батболдын ОХУ-д хийж буй албан ёсны айлчлал ийнхүү өндөрлөлөө

В.Путин монголоор “ Тохирлоо” гэж хэлсэн нь дуулгах сонины нэг яах аргагүй мөн биз ээ –

ОХУ-д албан ёсны айлчлал хийж байгаа Монгол Улсын Ерөнхий сайд С.Батболдын айлчлалыг Монгол Оросын харилцааг шинэ шатанд гаргалаа гэж хоёр тал дүгнэжээ. Ерөнхий сайд С.Батболдын хувьд  Засгийн газрын тэргүүн болсноосоо хойш  хойд хөршдөө хийж байгаа анхны айлчлал  бөгөөд гадаад харилцааг эдийн засагжууллаа гэдэг  дүгнэлтээр айлчлалын ач холбогдлыг цэгнэж байна. Монгол Оросын харилцаанд байсан тодорхойгүй асуудлуудад энэ айлчлал цэг тавьж, цаашид олон зүйл яаж хөгжих нь тодорхой боллоо гэдгийг  хоёр тал онцлон тэмдэглэсэн байна. Тэр ч байтугай  ОХУ-ын Засгийн газрын тэргүүн  В.В.Путин  манай ерөнхий сайд С.Батболдтой  хэлэлцээ хийх үеэрээ   монголоор “ Тохирлоо ” гэдэг үгийг   хэлсэн нь энэ айлчлалын дуулгах сонины нэг яах аргагүй мөн биз ээ.

Монгол-Оросын худалдаа эдийн засгийн хамтын ажиллагааг 2011-2015 онд хөгжүүлэх хөтөлбөрийг хэрэгжүүлж эхлэх, Монгол Улсын эдийн засагт мэдэгдэхүйц үүрэг гүйцэтгэж байгаа монгол-оросын хамтарсан үйлдвэрүүд болох “Эрдэнэт үйлдвэр” ХХК, “Монголросцветмет” ХХК-ийн үр ашгийг дээшлүүлэх нэмэлт арга хэмжээ боловсруулахаар  талууд тохиролцож чадсан байна. Мөн монгол-оросын “Улаанбаатар төмөр зам” хувь нийлүүлсэн нийгэмлэгийн дүрмийн санг тэнцүү хэмжээгээр хуваарилж, эхний ээлжинд ОХУ дүрмийн сандаа 125 сая ам.доллар  оруулах манай саналыг  таатай хүлээн авчээ. Энэ нь тус газрыг ихээхэн хэмжээгээр шинэчлэх боломж олгож, Монгол Улсын төмөр замын дэд бүтцийн хөгжлийн хөтөлбөрийг хэрэгжүүлэхэд тус дөхөм  болох нь гарцаагүй юм.

2011 оны хавар зуны улиралд үйл ажиллагаа явуулах боломжийг харгалзан Монголын нөөц баялгийг олборлож ашиглах хүрээнд монгол оросын “Дэд бүтцийн хөгжил” ХХК болон түүний түншүүд “УБТЗ”-тай холбогдох шинэ төмөр зам байгуулах ажилд оролцох нөхцөл, мөн Монгол Улсаас уул уурхайн бүтээгдэхүүнийг Оросын Холбооны Улсын алс дорнодын боомтуудад дамжин тээвэрлэх, түүний дотор төмөр замын урт хугацааны хөнгөлөлттэй тариф тогтоохтой холбогдсон асуудлуудыг ч  тохиролцож чаджээ. Тохиролцсон зарчмуудын үндсэн дээр хамтарсан “Дорнод уран” ХХК-ыг үүсгэн байгуулах тухай баримт бичгүүдэд гарын үсэг зурсан байна.

Хөдөө аж ахуйн салбар дахь хил орчмын болон бүс нутгийн харилцан ажиллагааны боломж  болон Оросын Холбооны Улсад нийлүүлэх монгол мах, махан бүтээгдэхүүнийг нэмэгдүүлэх зорилгоор монгол малыг эрүүлжүүлэх хүч чармайлтад онцгой анхаарал хандуулан хоёр улсын харилцааны уламжлалт чиглэлүүдийн нэг болох энэхүү салбарт хамтын ажиллагаа хөгжүүлэх, Монгол Улсын Засгийн газрын “100000 айлын орон сууц” хөтөлбөрийг хэрэгжүүлэхэд оросын барилгын компаниудыг үргэлжлүүлэн оролцуулах тухай монголын талын саналыг шуурхай авч үзэх, Монгол Улсын Оросын Холбооны Улс дахь, Оросын Холбооны Улсын Монгол Улс дахь үл хөдлөх хөрөнгийн асуудлууд болон газар ашиглах нөхцлийн талаар харилцан хүлээн авч болохуйц шийдвэрийн хувилбаруудыг олох ажлыг үргэлжлүүлэх; хоёр улсын үндэсний хууль тогтоомжтой нийцүүлэн Улаанбаатар, Дархан хотод байгаа орон сууцны найман байрыг Оросоос Монголд үнэ төлбөргүй шилжүүлэн хүлээж авах баримт бичгүүдийг ч энэ хэлэлцээрийн үеэр хөндөж, шийдвэрлэж чадсан байна

ОХУ-д албан ёсны айлчлал хийж байгаа Монгол Улсын Ерөнхий сайд С.Батболд тус улсын  Засгийн газрын дарга В.В.Путинтэй ганцаарчилсан уулзалт болон өргөтгөсөн хэлэлцээ хийлээ. Уулзалтаар Монгол, Оросын харилцааны тулгамдсан асуудлууд, хоёр орны хоорондын харилцааг хөгжүүлэх цаашдын төлөвийг хэлэлцэж, бүс нутгийн болон олон улсын харилцан сонирхсон зарим асуудлаар санал солилцлоо.

Ерөнхий сайд С.Батболд ОХУ-ын Засгийн газрын дарга В.В.Путин нар хоёр орны түүхийн явцад бүрэлдсэн  уламжлалт найрамдалт, сайн хөршийн харилцаанд үнэнч гэдгээ дахин нотолж цаашид бүх талын хамтын ажиллагаа, стратегийн түншлэлийг тууштай хөгжүүлж, хамтын ажиллагааны үр өгөөжийг дээшлүүлэхээр тохиролцлоо.

Энэ хүрээнд хоёр орны хоорондын стратегийн түншлэлийн харилцааг хөгжүүлэх, худалдааг либеральчлах, балансын алдагдлыг бууруулах, Монголын экспортыг нэмэгдүүлэх, Монголд хөрөнгө оруулалт хийх, хөрөнгө оруулалтын томоохон төслүүдийг хамтран хэрэгжүүлэхээр тохиролцлоо.

Тухайлбал, Монгол Улсын байгалийн нөөц баялаг, эрчим хүчийг олборлох ашиглах, ураны орд газруудыг ашиглах зорилгоор “Дорнод уран” хамтарсан үйлдвэр байгуулах, “УБТЗ” ХНН, “Эрдэнэт үйлдвэр”, “Монголросцветмет” ХХК-ийг далайцтай шинэчлэх, ОХУ-д мах, махан бүтээгдэхүүний экспортыг нэмэгдүүлэх, Монголын мал сүргийг эрүүлжүүлэх, гоц халдварт өвчнөөс сэргийлэхэд шаардлагатай 370 сая рублийн хөрөнгийн асуудлыг шийдвэрлэхээр тохиролцлоо.

Мөн Соёл, боловсрол, шинжлэх ухаан, техникийн хамтын ажиллагааны асуудлуудыг авч хэлэлцэж цаашид улам өргөжүүлэх чиглэлээр хамтран ажиллахаар тохиролцож, ОХУ-ын Засгийн газрын тэтгэлгээр суралцдаг Монгол оюутнуудын тоог нэмэгдүүлэхээр боллоо. Хоёр улсын ерөнхий сайд нар түүчлэн 2011 онд болох Монгол, Оросын хооронд дипломат харилцаа тогтоосны 90 жилийн ойг хамтран тэмдэглэхээр тохиролцлоо. Түүнчлэн харилцан сонирхсон бүс нутгийн болон олон улсын харилцааны өргөн хүрээний асуудлаар санал солилцож, үүний дунд Ази, түүний дотор Зүүн Ази, Зүүн хойд Ази, Төв Азийн аюулгүй байдал, хамтын ажиллагаа, ШХАБ-ын хүрээнд хэрэгжүүлж буй хамтын ажиллагаагаа цаашид ч үргэлжлүүлэхээр тохиролцов. Ерөнхий сайдын айлчлалын хүрээнд болсон яриа хэлэлцээний дүнгээр Монгол Улс, ОХУ-ын Хамтарсан мэдэгдлийг байгуулж, гарын үсэг зурав.  Мөн Монгол, Оросын хооронд нийтдээ 10 гаруй гэрээ, хэлэлцээр, санамж бичгүүдэд  гарын үсэг зурлаа

Монгол Ардын Намын дарга, Монгол Улсын Ерөнхий сайд С.Батболд ОХУ-ын Нэгдсэн Орос намын Дээд Зөвлөлийн дарга, ОХУ-ын Төрийн Думын дарга Б.Н.Грызловтой уулзлаа. Ноён Грызлов Монгол Улсын Ерөнхий сайд С.Батболдыг ордныхоо гадна хүндэтгэн угтаж ОХУ-д хийж буй албан ёсны айлчлал нь амжилттай болж байгаад баяртай байгаагаа илэрхийллээ.

Уулзалтын эхэнд МАН-ын дарга, Монгол Улсын Ерөнхий сайд С.Батболд хэлэхдээ Монгол Ардын Намын гадаад харилцааны үндсэн тэргүүлэх чиглэлд хөрш орны эрх баригч улс төрийн намуудтай харилцаа, хамтын ажиллагаагаа хөгжүүлэх эн тэргүүний зорилт байдгийг дурьдав.

Түүнчлэн хоёр намын хооронд хамтын ажиллагааны хэлэлцээр байгуулах болсонд баяртай байгаагаа тэмдэглээд энэхүү хэлэлцээр байгуулагдсанаар хоёр намын харилцаа, хамтын ажиллагаа улам өргөн агуулгаар баяжиж, шинэ шатанд гарна гэдэгт итгэлтэй байгаагаа илэрхийлэв.

ОХУ-ын Нэгдсэн Орос намын Дээд Зөвлөлийн дарга, ОХУ-ын Төрийн Думын дарга Б.Н.Грызлов МАН-ын дарга, Монгол Улсын Ерөнхий сайд С.Батболдтой санал нэг байгаагаа хэлээд улс орныхоо хөгжлийн бодлого тодорхойлоход чухал үүрэг гүйцэтгэж байгаа улс төрийн хүчин уугуул нэрээ сэргээсэнд нь баяр хүргэв. Уулзалтаар Ерөнхий сайд Төрийн Думын дарга нар хоёр улсын улс төр, нийгэм эдийн засгийн асуудлаар харилцан мэдээлэл сонсож, парламентийн гишүүдийг харилцан туршлага судлуулах, мэргэжилтэн солилцох зэрэг асуудлаар тохиролцов.

Мөн өдөр Монгол Улсын Ерөнхий сайд С.Батболд Оросын Холбооны Улсын Гадаад хэргийн сайд С.В.Лавровтой уулзав. Ерөнхий сайд С.Батболд Оросын Холбооны Улсын Гадаад хэргийн сайд С.В.Лавров нар өөрсдийн төгссөн сургууль болох Москвагийн Олон улсын харилцааны дээд сургуулийн тухай, оюутан насныхаа дурсамжаа ярилцаж нөхөрсөг уур амьсгалаар уулзалт яриаг эхлүүллээ.

Ноён С.В.Лавров эрхэм зочиндоо өөрийн төгссөн Москвагийн Олон улсын харилцааны дээд сургуулийн “Хүндэт доктор” цол хүртсэнд баяр хүргээд Монгол Улсын Ерөнхий сайдын энэхүү албан ёсны айлчлал Монгол Оросын харилцааг шинэ шатанд гарган хөгжүүлэхэд түүхэн үүрэг гүйцэтгэх ач холбогдолтой болно гэдэгт итгэж байгаагаа хэлэв.

Талууд хоёр орны харилцааны тулгамдсан асуудлууд, цаашдын  хамтын ажиллагааны төлөвийг хэлэлцэж, бүс нутгийн болон олон улсын харилцан сонирхсон зарим асуудлаар санал солилцов. ОХУ-тай чөлөөт худалдааны хэлэлцээр ойрын үед байгуулах, төмөр замын гэрээг шинэчлэх, хамтарсан үйлдвэрүүдийн үр ашгийг нэмэгдүүлэхэд хоёр талаасаа идэвх санаачлагатай ажиллах хэрэгтэй байгааг уулзалтын үер Монгол Улсын Ерөнхий сайд хөндлөө. ОХУ-ын Гадаад хэргийн сайд ч Ерөнхий сайдын байр суурийг дэмжиж байгаагаа илэрхийлэв. 

Энэ өдөр мөн Ерөнхий сайд С.Батболд Монгол Оросын бизнес эрхлэгчдийн уулзалтанд оролцож үг хэллээ. Уулзалтын үеэр Монгол Оросын худалдаа, бизнесийг өргөжүүлэн хөгжүүлэх зорилгоор аж ахуйн нэгжүүдийн хамтын ажиллагааны хүрээнд хэд хэдэн баримт бичигт гарын үсэг зурав.

Монгол Улсын Ерөнхий сайд С.Батболд Москва хотын Олон Улсын харилцааны дээд сургуульд зочилж эрдэмтэн, багш оюутнуудад “Монгол Улс ба Зүүн Хойд Ази” сэдэвт лекц уншив. Ерөнхий сайд С.Батболд 1986 онд тус сургуулийг төгссөн бөгөөд 24 жилийн дараа дахин сургуульдаа зочлон ирсэндээ сэтгэл их хөдөлж байгаагаа хэлээд сургуулийнхаа хамт олонд ажлын амжилт, хамгийн сайн сайхан бүхнийг хүсэн ерөөлөө.

Ерөнхий сайд С.Батболд “Монгол Улс ба Зүүн Хойд Ази” сэдэвт лекцэндээ өөрийн орны түүх соёл, туулсан замнал өнөөгийн хөгжлийн байдал цаашдын төлөв, олон улсын болоод бүс нутгийн хэмжээнд гүйцэтгэж буй үүрэг Монгол хүний хөгжил, Монгол төрийн гадаад бодлогын талаар мэдээллээ.

Ерөнхий сайдын уншсан лекц танхимд цугларсан багш оюутнуудын сонирхлыг ихэд татаж ар араасаа цуварсан олон асуултыг дагуулж байлаа. Энэ өдөр болсон нэгэн онцлох арга хэмжээ бол  Монгол Улсын Ерөнхий сайд С.Батболдод Москвагийн Олон Улсын Харилцааны дээд сургуулийн ректор А.В.Торкунов “Хүндэт доктор” цол олгох ёслол байв.

Энэ цолыг олон улсын харилцаа, гадаад бодлогын салбарт амжилт гарган ажиллаж буй гадаадын улс төрч, нийгмийн зүтгэлтэн, эрдэмтэн, дипломатуудад олгодог бөгөөд Израиль Улсын Ерөнхийлөгч Ш.Перес, НҮБ-ийн Ерөнхий нарийн бичгийн дарга Бан Гин Мун, Эквадор Улсын Ерөнхийлөгч Р.Коррей, Казахстан Улсын Ерөнхийлөгч Н.А.Назарбаев, Франц Улсын Ерөнхийлөгч асан Ж.Ширак зэрэг  улс төрч хүртсэн юм байна. Монгол Улсаас энэ цолыг 1952 онд тус сургуулийг төгссөн Монгол Улсын ШУ-ны Академич Ш.Бира хүртэж байжээ.

Монгол Улсын Ерөнхий сайд С.Батболд ОХУ-д ажиллаж, суралцаж буй Монгол Улсын иргэдтэйгээ уулзаж ярилцлаа. Ерөнхий сайд С.Батболд ярианыхаа эхэнд Монгол орны нийгэм, эдийн засгийн өнөөгийн байдал, мөн ОХУ-д хийж буй албан ёсны айлчлалынхаа талаар товч  мэдээлэл хийлээ.

Ерөнхий сайд С.Батболд Монгол орны эдийн засгийн өнөөгийн байдлын талаар мэдээлэхдээ Засгийн газраас уул уурхай, эрдэс баялгийн салбарт авч хэрэгжүүлж байгаа томоохон төслүүдийн талаар мэдээлж, эдгээр төслүүдийг хэрэгжүүлэхэд ОХУ-д энэ чиглэлээр мэргэжил эзэмшсэн иргэд маань үнэтэй хувь нэмэр оруулж буйг дурдлаа. Мөн түүнчлэн Монголын уул уурхайн салбарыг хөгжүүлэхэд нарийн мэргэжлийн боловсон хүчин дутмаг байгааг онцлон тэмдэглэв.

Ерөнхий сайд С.Батболд Засгийн газрын үйл ажиллагааны 2008-2012 оны мөрийн хөтөлбөрт гадаад оронд удаан хугацаагаар ажиллаж, сурч, амьдарч байгаа Монгол иргэдийн эрх ашгийг хамгаалах, тэдэнд тусламж дэмжлэг үзүүлэх талаар тодорхой асуудлууд тусган хэрэгжүүлж байгаа талаар  мэдээлэл хийлээ.

Түүнчлэн ОХУ-тай иргэд харилцан визгүй зорчих асуудлаар яриа хэлэлцээ үргэлжилж байгаа мөн сүүлийн үед Монголчууд хар тамхитай холбогдсон гэмт хэрэгт оролцолдож байгаа талаар мэдээлж энэ төрлийн гэмт хэргээс холуур  анхаарал сэрэмжтэй байхыг санууллаа. Уулзалтын төгсгөлд Ерөнхий сайд С.Батболд Монгол иргэддээ эрүүл энх, аз жаргал, ажлын өндөр амжилтыг хүсэн ерөөлөө.