Ангилал: мэдээ

Амжилт алдрын хөлс, ард түмний сэтгэл хөдлөлөөр дүүрэн байх  5 мянга гаруй хүний суудалтай их спортын ордон яармагийн дэнжид  сүндэрлэлээ.
Монгол Улсын Ерөнхий сайд С.Батболд цогцолборыг нээж хэлсэн үгэндээ Олимпийн их наадам, тив дэлхийгээс алт, мөнгөн медальтан олноор төрөн гарч, Монгол хүний эрч хүч, эр зориг, авахаалж самбааг дэлхийн дэвжээнд дуурсгасан энэ он жилүүдэд спортын шинэ ордон баригдаж эдүгээ ашиглалтанд орж байгаа нь ирээдүйн их амжилт, ялалтын нэгэн бэлгэдэл болж байна гээд энэхүү их спортын өргөөнд Монгол хүний эр зориг, тэсвэр хатуужил, ур ухаан, мөрөөдөл тэмүүлэл цэцэглэж, Монгол хүний бахдал, хийморь, уухайн түрлэгээр дүүрэн байхыг хүсэн ерөөлөө.

Түүнчлэн энэ оны 9 дүгээр сараас хойш тив, дэлхийн аварга болсон тамирчид, тэднийг бэлтгэсэн дасгалжуулагч нарт 297 сая төгрөгийг олгохоор өчигдрийн Засгийн газрын хуралдаанаар шийдвэрлэснийг Засгийн газрын тэрүүн энэ үеэр дуулгалаа.Нээлтийн ажиллагааны үеэр спортын шинэ ордныг Монголын талд хүлээлгэн өгөх гэрээнд БНХАУ-ын Засгийн газрыг төлөөлж БНХАУ-аас Монгол Улсад суугаа Элчин сайд Юй Хун Яао, Монголын Засгийн газрыг төлөөлж Сангийн сайд С.Баярцогт нар гарын үсэг зурлаа.  

Мөн ёслолын ажиллагааны үеэр тив дэлхийн хэмжээний томоохон тэмцээнд амьжилт гаргаж эх орныхоо нэрийг цуурайтуулсан тамирчдад мөнгөн шагнал гардуулсан юм.БНХАУ-ын 115 сая юанийн буцалтгүй тусламжийн хөрөнгөөр баригдсан тус ордон 5 мянга гаруй хүний суудал, бэлтгэлийн хоёр жижиг заал болон  100 гаруй өрөө тасалгаатай. Шинэ Спортын ордныг зөвхөн спортын уралдаан, тэмцээн зохион байгуулаад зогсохгүй соёл, урлагийн арга хэмжээ зохион байгуулахад зориулж, гэрэлтүүлэг болон акустикийг орчин үеийн шаардлагад нийцүүлэн тохижуулсан байна.

Засгийн газар цаашид эх орондоо Зүүн Азийн спортын наадмыг зохион байгуулахад шаардлагатай 30,0 мянган хүний суудал бүхий спортын цогцолбор байгуулах ажлыг үе шаттайгаар хэрэгжүүлэхээр төлөвлөөд байна.

Монгол Улсын Ерөнхий сайд С.Батболд “Биеийн тамир спортын ордон”-ыг хүлээж авах ёслолд баяр хүргэж элсэн үг –

Эрхэм хүндэт зочид оо,

Монгол хүний алдар сууг олимп, тив дэлхийн дэвжээнд мөнхөлсөних спортын салбарынхан, багш, дасгалжуулагч, тамирчид аа!  

Та бүхэнд энэ өдрийн мэндийг хүргэж баяр бахархал, амжилт омогшлоор дүүрэн байх их спортын ордны нээлтэнд хүрэлцэн ирсэнд талархал илэрхийлье.

Олимпийн их наадам, тив дэлхийгээс алт, мөнгөн медальтан олноор төрөн гарч, монгол хүний эрч хүч, эр зориг, авахаалж самбааг дэлхийн дэвжээнд дуурсгасан энэ он жилүүдэд спортын шинэ ордон баригдаж эдүгээ ашиглалтанд орж байгаа нь ирээдүйн их амжилт, ялалтын нэгэн бэлгэдэл болж байна.

Биеийн тамир, спортыг хөгжүүлэх талаар манай Засгийн газраас баримтлах бодлогын нэгэн чухал зорилт бол нийтийн биеийн тамир, идэвхтэй хөдөлгөөнийг эрүүл аж төрөх ёсны хэв маяг болгох явдал юм. Энэхүү зорилтыг хангах орчин нөхцлийг бүрдүүлэхэд Монгол Улсын Засгийн газраас авч хэрэгжүүлж буй ажлуудын нэгэн хэсэг нь өнөөдөр нээлтээ хийж байгаа спортын шинэ ордны бүтээн байгуулалтын ажил  мөн юм.

Энэхүү шинэ ордонг БНХАУ-ын Засгийн газрын буцалтгүй тусламжаар барьж, Эдийн засаг, техникийн хамтын ажиллагааны хэлэлцээрийн дагуу манай талд хүлээлгэн өгч байна.  

Манай хоёр орны найрамдалт харилцаа биеийн тамир, спортын салбарт үр бүтээлтэй өрнөж ирсний тод жишээ нь үе үеийн спортынхны бэлтгэл сургуулилалтаа хийн, амжилт ялалтаа дуурсгаж ирсэн тамирчдын маань хоёр дахь гэр болсон Спортын төв ордон болон Төв цэнгэлдэх хүрээлэн 1958 онд БНХАУ-ын тусламжаар баригдан ашиглалтанд орж байсан явдал билээ.

Энэ бүхний үргэлжлэл болж Монгол Улс, БНХАУ-ын Засгийн газрын хооронд 2006 онд хийгдсэн Эдийн засаг, техникийн хамтын ажиллагааны хэлэлцээрийн гэрээний дагуу 115 сая юаны буцалтгүй тусламжаар орчин үеийн спортын ордон барихаар шийдвэрлэсэн. Манай Засгийн газар уг гэрээгээр хүлээсэн үүргийн дагуу улсын төсвөөс 4,9 тэрбум төгрөгийн хөрөнгө оруулалтыг энэхүү спортын ордонд зарцуулсан.  

Ирээдүйн аваргуудын хичээл зүтгэл, амжилт алдрын хөлс, ард түмний минь баяр хөөрөөр дүүрэн байхэнэхүү шинэ спортын ордныг барихад хамтран ажилласан БНХАУ-ын Засгийн газар, бүтээн байгуулалтын ажилд гар бие оролцож, дэмжиж ажилласан бүх хүмүүст, барилгын ажлыг өндөр түвшинд гүйцэтгэн ашиглалтад өгч байгаа  “Шанхай констракшн” группын хамт олонд Засгийн газрын нэрийн өмнөөс  гүн талархал илэрхийлье.

Энэ оны 9 дүгээр сараас хойш тив, дэлхийн аварга болсон тамирчид, тэднийг бэлтгэсэн дасгалжуулагч нарт 297 сая төгрөгийг олгохоор өчигдрийн Засгийн газрын хуралдаанаар шийдвэрлэснийг дуулгахад таатай байна.

Цаашид спортын ордон, биеийн тамирын танхим, цэнгэлдэх хүрээлэнг төрөлжүүлэн барихынзэрэгцээ эх орондоо Зүүн Азийн спортын наадмыг зохион байгуулахад шаардлагатай 30,0 мянган хүний суудалтай цэнгэлдэх хүрээлэн бүхий спортын цогцолбор байгуулах ажлыгүе шаттайгаар хэрэгжүүлэхийн төлөө байна

Ийнхүү биеийн тамир, спортын салбарт томоохон бүтээн байгуулалтуудыг өрнүүлж, нийтийн биеийн тамир спортыг түгээн дэлгэрүүлэх аливаа санал санаачилгыг дэмжиж, эрүүл чийрэг өсвөр залуу үеийг төлөвшүүлэх, иргэдийн эрүүл мэндэд ээлтэй зөв тогтолцоо, биеийн тамир, спортоор хичээллэх таатай орчныг бүрдүүлэхийн төлөө Засгийн газар анхаарч ажиллана.

Дасгалжуулагч, тамирчид та бүхэн идэвх чармайлт гарган бэлтгэл сургуулилалтаа сайн хийж, “Лондон 2012” Олимпийн наадамд Монгол түмний омогшил, бахархлыг төрүүлсэн бахдам амжилтуудыг гаргах учиртайг энэ баярт мөчид сануулъя.

Энэхүү их спортын өргөөнд Монгол хүний эр зориг, тэсвэр хатуужил, ур ухаан, мөрөөдөл тэмүүлэл цэцэглэж, Монгол хүний бахдал, хийморь, уухайн түрлэгээр дүүрэн байхыг хүсэн ерөөе.

Анхаарал тавьсанд баярлалаа.

86 жилийн тэртээ Улсын анхдугаар их хурал Монгол Улсын Анхдугаар Үндсэн хуулийг баталж, Тусгаар тогтносон, Бүрэн эрхт, Бүгд Найрамдах Улс гэдгээ дэлхий дахинаа зарлан тунхагласан билээ. Түүхэн энэ өдөр 16 нас хүрсэн хүүхдүүд Монгол Улсын иргэний үнэмлэхээ гардаж, иргэний андгай өргөлөө.

Монгол Улсын Ерөнхий сайд С.Батболд Төрийн ордны Их танхимд болсон Иргэний андгай өргөх энэхүү ёслолын үеэр, Та бүхний амьдралд мартагдашгүй дурсамж болон үлдэх энэ баярт мөчөөс эхлэн залуус та нарын амьдралын шинэ хуудас, нэгэн шинэ үе эхэлнэ. Иргэний үнэмлэхээ гардан авснаар Та нарын эрхэм нэр, эцэг эхийн нэр, эх орны тань ариун нэртэй хамт дурсагдах болно. Иймд “Хүн нэрээ” гэдэг эцэг дээдсийн сургаалийг захиас болгон сануулъя. Эрдэм мэдлэг, эрхэмсэг ёс зүй хоёр бол хүний нэр төрийн хүчирхэг хоёр жигүүр шүү гэлээ.

Мөн дэлхийд өрсөлдөх өндөр мэдлэг боловсрол, дээдсээс өвлөсөн ариун ёс суртахуунтай байх нь залуус Та бүхний нэн эрхэм зорилго мөн. Эрүүл чийрэг, эрдэм боловсролтой, эрхэм ёс суртахуун, эх оронч сэтгэлгээтэй, өв тэгш хүмүүжил бүхий Залуу хүн Та Монгол үндэстэн өнө мөнхөд оршихуйн үндэс, Монгол төр улсын тусгаар тогтнолын баталгаа, эх орны хөгжил дэвшлийн эх ундарга, бүтээлч их хүч нь байх болно гэж Ерөнхий сайд С.Батболд хүүхэд залуучуудад хандаж хэллээ.

“Хүний төлөө хөгжил, хөгжлийн төлөө хүн” гэсэн бодлого зорилготой манай хамтарсан Засгийн газар ийм өв тэгш залуу хүний төлөө байна. Залуус Та бүхэн зүрх сэтгэлээ эх орондоо зориулж, цуцаж шантрахгүйгээр сурч хөдөлмөрлөхийн төлөө шамд. Зүтгэл сэтгэлийн үр дүнд бодит биелэл болох сайхан ирээдүй, тэр бүр олдохгүй боломж хүлээж байгаа гэдгийг Засгийн газрын тэргүүн тэмдэглэлээ.

Мөн тэрбээр эцэг дээдсийнхээ аугаа их үйлсийг дурсан санаж, эрхт төрийнхөө туг сүлдэнд мэхийн ёсолж, ахмад үеийнхээ өвлүүлсэн ариун нандин бүхнийг эрхэмлэж, үйл хэргийг нь үргэлжлүүлж, эх орноо цэцэглүүлэн хөгжүүлэхээ андгайлан тангарагласан энэ залуучуудын дундаас Монгол Улсынхаа нэрийг дэлхий дахинаа дуурсгах олон олон алдар гавъяатан төрөн гарна гэдэгт итгэл дүүрэн байгаагаа илэрхийллээ.

Эх орон, ард түмэн, эцэг эх, элгэн садныхаа өмнө Монгол Улсын иргэний андгай өргөдөг, Монгол Улсын Ерөнхий сайдын ивээл дор зохион байгуулдаг уламжлалт энэхүү арга хэмжээнд Монгол Улсын Тэргүүн Шадар сайд Н.Алтанхуяг, УИХ-ын гишүүн, УИХ дахь Ардчилсан намын бүлгийн дарга Ч.Сайханбилэг, БСШУ-ны сайд Ё.Отгонбаяр болон урлаг соёлын алдартнууд оролцлоо

Монгол Улс дахь хүний эрхийн төлөв байдлын талаархи Үндэсний илтгэлийг НҮБ-ын Хүний эрхийн Зөвлөл 2010 оны 11 дүгээр сарын 2-4-ний өдрүүдэд хэлэлцэн сайшааж дэмжсэн байна. Монгол Улсын Үндэсний илтгэл нь шаардлагатай мэдээллийг агуулсан, хүний эрхийг хамгаалах чиглэлээр тулгарч байгаа бэрхшээлийг дурдсан, илтгэлийг бэлтгэхдээ иргэний нийгмийн болон төрийн бус байгууллагуудтай нягт хамтран ажилласан, цаазаар авах ялыг түдгэлзүүлсэн зэргийг онцолжээ.

Монгол Улсын Ерөнхий сайд С.Батболд 2010 оны 11 дүгээр сарын 22-ны өдөр Ажлын хэсгийн ахлагч, ХЗДХЯ-ны Төрийн нарийн нарийн бичгийн дарга Г.Баясгалан, НҮБ-ын суурин төлөөлөгчийн үүрэг гүйцэтгэгч Рана Флауэрс тэргүүтэй хүмүүсийг хүлээн авч уулзан мэдээллийг нь сонслоо. НҮБ-ын Хүний эрхийн Зөвлөлийн хуралдаанаас манай улсад ойрын 4 жилд хүний эрхийг хангах чиглэлээр анхаарч ажиллах 129 зөвлөмж өгсөн байна. Үүнээс 118-ыг нь хүлээн авч хэрэгжүүлэх боломжтой, үлдсэн 11-ийг нь хүлээн авах эсэх тухай хариугаа ирэх оны 3 дугаар сард болох НҮБ-ын Хүний эрхийн Зөвлөлийн нэгдсэн чуулганы үеэр өгөхөөр төлөвлөжээ.

Хүний эрхийг хамгаалахад чиглэсэн олон улсын гэрээ, конвенцид нэгдэн орох, Эрүүдэн шүүхийн эсрэг Конвенцийн заалтад хууль тогтоомжоо чанд нийцүүлэн хэрэгжүүлэх механизмаа оновчтой тодорхойлох, хүүхэд, эмэгтэйчүүд, бэлгийн цөөнх, хөгжлийн бэрхшээлтэй иргэдийн эрхийг хамгаалах, хүн худалдаалах гэмт хэрэгтэй тэмцэх, урьдчилан сэргийлэх эрх зүйн орчин бүрдүүлэх, аливаа хэлбэрээр ялгаварлан гадуурхахаас зайлсхийхийг НҮБ-ын Хүний эрхийн Зөвлөлөөс зөвлөмж болгосон байна.

Үндэсний илтгэл сайн болсон. Манай улсад өгсөн зөвлөмжийг нухацтай судалж, тусгагдсан асуудлыг засч сайжруулах чиглэлээр хийх ажил багагүй байгааг Ерөнхий сайд С.Батболд Ажлын хэсгийнхэнд хэлэв

Үндэсний Худалдаа аж үйлдвэрийн танхимын дарга С.Дэмбэрэл 2010 оны 11 дүгээр сар 15-ны өдөр Монгол улсын Ерөнхий сайд С.Батболдод бараалхан “Бизнесний орчны шинэтгэлийн жил”-ийн хүрээнд боловсруулсан төсөл хөтөлбөр, бодлогын баримт бичгүүдийг хүлээлгэн өглөө. Үндэсний Худалдаа аж үйлдвэрийн танхим хувийн хэвшлийнхэнтэй хамтран “Экспортыг хөгжүүлэх үндэсний стратеги”, ”Хилийн худалдааг хөнгөвчлөх, хөгжүүлэх тухай”, “Аялал жуулчлалын салбарын хөгжлийн стратеги”,“Төр болон орон нутгийн өмчийн хөрөнгөөр бараа, ажил үйлчилгээ худалдан авах тухай хуульд нэмэлт өөрчлөлт оруулах  тухай хуулийн төсөл”, “Эрчим хүчний үр ашгийг 20 хувиар нэмэгдүүлэх, Хүлэмжийн хийн ялгарлыг 20 хувиар бууруулах, Байгальд оруулах хөрөнгө оруулалтыг 20 хувиар нэмэгдүүлэх зэрэг  “Таван 20-ийн зарчим”, “Төрийн зарим чиг үүргийг төрийн бус байгууллагад шилжүүлэх тухай” 12  төсөл хөтөлбөр, бодлогын баримт бичиг боловсруулсан байна.

Ерөнхий сайд С.Батболд эдгээр баримт бичгүүдтэй танилцаад  Ихээхэн ач холбогдолтой энэ төсөл хөтөлбөрийг бодит ажил болгох ёстой.12 дугаар сард Засгийн газрын хуралдаанд оруулж шийдвэрлүүлэхийн тулд  энэ сард багтаан төслүүдийг нягталж, эцэслэн танилцуулахыг холбогдох албан тушаалтнуудад үүрэг өгөөд  Засгийн газар зорилтоосоо ухраагүй, дэвшүүлсэн зорилтынхоо хэрэгжилтийг улам эрчимжүүлэх болно. Галт тэрэг хөдлөж байна. Одоо хурдаа авах ёстой гэж тэрээр хэллээ

Монгол Улсын Ерөнхий сайд С.Батболд Монголын Улаан загалмайн нийгэмлэгийн удирдлагуудыг өнөөдөр хүлээн авч уулзлаа. Цаг үеийн хүндрэл, бэрхшээл тохиолдсон үед нийгмийг хамарсан хүмүүнлэгийн ажлууд зохион байгуулдаг тус нийгэмлэгийнхэнд талархаж байдгаа Монгол Улсын Ерөнхий сайд уулзалтын эхэнд тэмдэглээд Монголын Улаан загалмайн нийгэмлэг бол манай улс дахь хамгийн ахмад гэж болохоор олон жилийн түүхтэй, үндэсний хэмжээний сүлжээ бүхий анхны байгууллага.

Тиймээс ч Засгийн газар Улаан загалмайн нийгэмлэгтэй түншилж, хамтарч ажиллах учиртай гэдгийг онцоллоо.Засгийн газар иргэний нийгмийн болон төрийн бус байгууллагуудыг дэмжиж, тэдний оролцоог нийгэмд улам нэмэгдүүлэхээр зорьж байгаа. Чадварлаг, төлөвшсөн ийм байгууллагуудад төрийн зарим ажил үүргийг шилжүүлэхээр төлөвлөж байгаагаа тэдэнд дуулгаад  хамтран ажиллах гэрээ байгуулах боломжтой байгууллагуудын нэг нь Улаан загалмайн нийгэмлэг мөн гэж Засгийн газрын тэргүүн хэллээ. Мөн тэрбээр 71 жилийн түүхтэй тус нийгэмлэгийг дэмжиж, хамтарч ажиллахаа илэрхийлсэн юм.

Монголын Улаан загалмайн нийгэмлэгийн ерөнхийлөгч Л.Одончимэд энэ уулзалтын үеэр гаднын тусламж, гишүүдийн татвараар манай нийгэмлэг үйл ажиллагаагаа явуулж байгаа. Гаднын тусламж зогсоход хүрвэл үйл ажиллагаагаа үргэлжлүүлэхэд хүндрэлтэй болно. Тиймээс төр улаан загалмайн нийгэмлэг хоорондын хамтын ажиллагааг шинэ түвшинд гаргая. Бидэнд төрийн туслалцаа хэрэгтэй байна. Тиймээс энэ асуудлыг их хурлаараа хөндөх гэж байгаа гэж тайлбарлалаа. 500 гаруй мянган гишүүнтэй Монголын Улаан загалмайн нийгэмлэгийн 12 дугаар их хурал энэ сарын 21-нд Монголын Хүүхдийн ордонд болох юм байна

Монгол Улсын Ерөнхий сайд С.Батболд 2010 оны 11 дүгээр сарын 12-ны өдөр ОХУ-ын Тээврийн сайд Игорь Евгеньевич Левитинийг хүлээн авч уулзав.  
Уулзалтын үеэр төмөр замын дэд бүтцийг хөгжүүлэх, Монгол-Оросын Засгийн газар хоорондын комиссын хуралдаанаар тохиролцсон худалдаа, эдийн засгийн зарим асуудлын биелэлтийн талаар ярилцав

Монгол улсын Засгийн газар   Европын холбоотой  ойрын жилүүдэд хамтран ажиллах тухай  санамж бичигт өнөөдөр гарын үсэг зурлаа. Өөрөөр хэлбэл  Европын холбооны 2011-2013 оны олон жилийн баримжаалсан хөтөлбөрийг баталгаажууллаа.  Уг арга хэмжээ нь Европын холбооны элчин сайдууд  Монгол улсын Ерөнхий сайд С.Батболдтой уулзах уулзалтын хүрээнд болсон бөгөөд  Европын холбооны Монголыг хариуцсан төлөөлөгчийн газрын дэд тэргүүн Михаел Пульш, Монгол улсын Засгийн газрыг төлөөлж Сангийн сайд С.Баярцогт нар гарын үсэг зурлаа. Европын холбоо Монгол улсыг хамтын ажиллагааны чухал түншээ гэж үзэх болсны нотолгоо гэж албаны хүмүүс дүгнэж байв.

2011-2013 оны олон жилийн баримжаалсан хөтөлбөрийн хүрээнд  хоёр талын хамтын ажиллагааны төсөл хөтөлбөрт зориулж жилд таван сая евро зарцуулахаар төлөвлөсөн ба ингэснээр Монгол улсад хэрэгжүүлэх хөтөлбөрийн санхүүжилтын хэмжээ 2007-2011 оны үеийнхээс 40 хувиар нэмэгдэж байгаа юм байна. Арга хэмжээний үеэр Монгол улсын Ерөнхий сайд  С.Батболд хэлсэн үгэндээ “ Монгол улс гуравдагч хөршийн үзэл баримтлалын хүрээнд Европын холбоотой хамтын ажиллагаагаа өргөжүүлэн хөгжүүлэхийн  төлөө эрмэлзэн ажилладаг.

Монгол улсад өрнөсөн ардчилал, зах зээлийн өөрчлөлтийг  Европын холбоо болон гишүүн улсууд эхнээс нь тууштай дэмжиж ирсэнд Монгол улсын  Засгийн газар болон монголын ард түмэн гүн талархаж байдаг.  Европын холбоотой  түншлэл хамтын ажиллагааны хэлэлцээрийг энэ оны эцсээр байгуулахаар бэлтгэл ажил хангагдаад байна.  Монгол улс Европын холбоотой бүх талаар хамтран  ажиллах нэг хэсэг ажил нь өнөөдөр гарын үсэг зурсан санамж бичиг байлаа. Ингэснээр Европын норм стандартыг Монголд нутагшуулах ажил бодитоор хийгдэж эхэллээ.   

Европын холбооноос үзүүлэх техникийн тусламж, мөн мэргэжлийн сургалт үйлдвэрлэлийн төвүүдээр биднийг дэмжиж  хамтран ажиллах чиглэл тусгагдаж байгаа нь Монгол улсын Засгийн газрын дэвшүүлж байгаа хүсэл эрмэлзлэлийг дэмжиж байгаагийн нэг том илэрхийлэл юм” хэмээн тэмдэглэн хэллээ.

Уг хөтөлбөр нь хүний нөөцийн хөгжилд чиглэсэн үндсэн хоёр хөтөлбөрт зарцуулагдах юм.  Засаглал, ардчилал хүний эрх, институцын шинэчлэлд стандарт, хэм хэмжээг сайжруулах чиглэлээр төв болон орон нутгийн төрийн байгууллагуудын чадавхийг дээшлүүлэхэд дэмжлэг үзүүлэхээр 8 сая еврогийн хөтөлбөр хэрэгжих бол, тогтвортой амьжиргааны хөгжил орон нутагт байгаль хамгаалах чиглэлээр мөн техник мэргэжлийн боловсрол сургалтыг дэмжихэд 7 саяыг зарцуулах ажээ.

Европын холбооны монголыг хариуцсан төлөөлөгчийн газрын дэд тэргүүн Михаел Пульш уулзалтын төгсгөлд тэмдэглэн хэлэхдээ Монгол улс бий болж  буй  эдийн засгийн шинэ боломжуудаа  ашиглахад нь  дэмжлэг үзүүлэхийг Европын холбоо чухалчилж байгаа.  Энэ хүрээнд өнөөдөр нэн эрэлт хэрэгцээтэй байгаа мэргэжлээр   боловсон хүчин  бэлтгэхэд зориулж  хөтөлбөрийг  зориулах гэж байгаадаа баяртай байна гэлээ 

Монгол Улсын Ерөнхий сайд С.Батболдынх өнөөдөр зочин олонтой байлаа. Тооллогын улсын комиссын гишүүд, Нийслэлийн Хан-Уул дүүргийн Тооллогын комиссын тоологч нар, хэвлэл мэдээллийн 40 гаруй төлөөлөгч Их тэнгэр дэх гэрт нь өглөө эрт зочиллоо. Хүн ам орон сууцны тооллого “Хүмүүнд төр эрхэм, Төрд хүмүүн эрдэнэ” гэсэн  уриатайгаар өнөөдөр Монгол орон даяар нэгэн зэрэг эхэлж, ийм олон хүн Ерөнхий сайдындаа зочилсон хэрэг.

Монгол Улс ХХ зууны туршид хүн амаа 9 удаа тоолжээ. Үүний анхных нь болох 1918 оны тооллогоор 647.5 мянган хүн амтай байсан бол 2000 оны Хүн ам, орон сууцны тооллогоор манай улсын хүн ам 2373.5 мянга болсон байлаа. Хорьдугаар зууны эхэнд 125,2 мянган өрхтэй байсан Монгол Улс 2000 онд 541,1 мянган өрхтэй болж 4,3 дахин өссөн байжээ. Тэгвэл 2010 онд бид хэдүүлээ болсон бэ.

Түүхийн үнэт лавлагаа болох  хүн ам зүй, эдийн засаг нийгмийн байдалд гарсан өөрчлөлт, шалтгаан нөхцөлийг судлах, улс орны хөгжлийн бодлогыг боловсруулахад гол эх сурвалж болох энэхүү тооллогод Монгол Улсын Ерөнхий сайд С.Батболд гэр бүлийн хамт 2010 оны 11 дүгээр сарын 11-ний өглөө хамрагдлаа.

Монгол Улсын Ерөнхий сайд, Тооллогын улсын комиссын дарга С.Батболд НҮБ-ын зөвлөмжийн дагуу 10 жилд тутамд нэг удаа явагддаг энэхүү арга хэмжээний цар хүрээг Засгийн газраас цаашид хэрэгжүүлэх бодлого, хөтөлбөрийн суурь судалгаа болно гэж үнэлж байгаагаа тэмдэглээд улс орны төдийгүй дэлхийн хэмжээний ач холбогдолтой Хүн ам, орон сууцны тооллогод иргэн бүр нийгмийн өмнө хуулиар хүлээсэн үүргийнхээ дагуу идэвхтэй оролцохыг уриаллаа.

Тооллогын үр дүнд улс орны цаашдын хөгжлийн төлөвлөлт, бодлогыг боловсруулахад нэн чухал шаардлагатай мэдээллийн эх сурвалж бүрдэнэ. Тухайлбал, цаашид шинээр барьж байгуулах нийгэм соёлын газрууд, сургууль, эмнэлгийг хаана ямар багтаамжтай, хүчин чадалтайгаар баривал оновчтой болох, хүн ам зүй, нийгмийн мөн шилжилт хөдөлгөөний, эдийн засгийн болон хүн амын орон сууцны нөхцөл, хангамжийн талаарх мэдээллүүдийг цуглуулан бодлого үйл ажиллагаандаа ашиглана гэдгийг Засгийн газрын тэргүүн онцолж байлаа.

Мөн тооллого энэ сарын 11-17-нд, долоохон хоногт улс орон даяар болно. Хүн хүч, зохион байгуулалт, идэвхи зүтгэл шаардсан том ажил. Бүх шатны Засаг дарга нар энэ ажилд онцгой анхаарч, тооллогын комиссоо удирдлагаар хангаж, биечлэн оролцож, зохион байгуулах учиртай гэж үүрэг болголоо.

Гадаадад олон монголчууд амьдарч байгаа. Улсын маань хэчнээн иргэн гадаад оронд амьдарч, ажиллаж сурч байна вэ гэсэн нарийн судалгаа, тоо баримт өнөөдөр алга. Энэ тооллогоор бодит байдалд ойртсон мэдээлэлтэй болно гэдэгт итгэлтэй байгаагаа Ерөнхий сайд энэ үеэр илэрхийллээ. Гадаадад байгаа монголчуудынхаа эрх ашгийг хамгаалах, үндсэн хуулиар олгогдсон эрхийг нь хэрэгжүүлэх, эх орныхоо хөгжилд хувь нэмэр оруулах боломж нөхцөлийг нь бүрдүүлэх, эх орондоо эргэж ирэх бодлогыг боловсруулахад энэ тооллого ихээхэн ач холбогдолтой. Тиймээс гадаад улс орон дахь дипломат төлөөлөгчийн газрын удирдлагууд идэвхтэй оролцох учиртайг тэмдэглэлээ 

Монгол Улсын Ерөнхий сайд С.Батболд 2010 оны 11 дүгээр сарын 10-ны өдөр Бүгд найрамдах Турк улсын Батлан хамгаалахын сайд Вежди Гөнүл тэргүүтэй төлөөлөгчдийг хүлээн авч уулзлаа. Ерөнхий сайд Батболд уулзалтын эхэнд хэлэхдээ: Хоёр орны харилцаа хамтын ажиллагаа улс төр нийгэм эдийн засгийн салбарт  өргөжин хөгжиж байгааг тэмдэглээд Батлах хамгаалах салбарын харилцаа хамтын ажиллагааг шинэ шатанд гаргахад ноён Вежди Гөнүлийн айлчлал ихээхэн хувь нэмэр оруулна гэдэгт итгэлтэй байна гээд цэргийн сургалт, боловсон хүчин бэлтгэхэд Туркын талаас дэмжлэг үзүүлж байгаад талархал илэрхийллээ.

Манай улс Олон улсын энхийг сахуилах үйл ажиллагаанд идэвхитэй ороцож байна. Цаашид хоёр орны энхийг сахиулах хамтын ажиллагааг хөгжүүлхийн чухлыг тэмдэглээд Туркын улсын ерөнхий сайдад халуун дотно мэндчилгээ дамжуулахыг хүслээ. Турк улсын Батлан хамгаалахын сайд Вежди Гөнүл: Цаг гарган хүлээн авч уулзсанд Монгол улсын Ерөнхий сайдад талархал   илэрхийлээд хоёр улсын цэргийн хамтын ажиллагаа, Батлан хамгаалах салбарын харилцаа амжилттай хөгжиж байгааг тэмдэглэлээ.

Өнөөдөр Турк улсын Засгийн газрын тэтгэлгээр 60 оюутан тус улсад сурд¬гаас цэргийн салбарт 12 сонсогч сурч байгаа тухай дуулгаад цаашид тэтгэлгээр суралцах сонсогчийн тоог нэмэгдүүлэхээ мэдэгдлээ. Түүчнлэн ноён Вежди Гөнүл Туркын  хоёр орны цэргүүд Афганистан Улсад мөр зэрэгцэн энхийг сахиулах ажиллагаанд оролцож байгаад баяртай байна гэлээ.

Бүгд найрамдах Турк улсын Батлан хамгаалахын сайд Вежди Гөнүлийн айлчлалын үеэр “Монгол Улсын Засгийн газар, БНТУ-ын Засгийн газар хоорондын цэргийн буцалтгүй тусламжийн тухай хэлэлцээр”-т гарын үсэг зурж манай батлан хамгаалах салбарт нийт 800 гаруй мянган ам.долларын тусламж үзүүлэх болсон байна