Ангилал: мэдээ

Монгол Улсын Ерөнхий сайд С.Батболд хүн ам шигүү суурьшсан Сүхбаатар дүүргийн 14 дүгээр хорооны нутаг дэвсгэрт байрладаг Ерөнхий боловсролын 35 дугаар дунд сургуулийн хамт олонтой 2010-2011 оны хичээлийн шинэ жилийн өглөөг угтлаа.

Гэр хорооллын дунд байрладаг тус  сургуульд энэ жил 1520 хүүхэд хамрагдаж байгаа бөгөөд тэдний 120 нь зургаан настай нэгдүгээр ангид суралцаж буй хүүхдүүд юм.   Засгийн газрын тэргүүн тус сургуулийн нээлтэд оролцож сурагч,  хүүхдүүд, эрдэмтэн багш нар, эцэг эхчүүдэд хандан үг хэлэхдээ  “Манай улс хүүхэд залуучуудынхаа боловсролын асуудлыг шийдвэрлэхэд тэргүүлэх ач  холбогдол өгч, байнга анхаарч байгаа. Энэ оны байдлаар төсвийн нийт орлогынхоо дөрвөн төгрөг тутмын нэг төгрөгийг боловсролд зарцуулж байна. Цаашид ч хүүхэд бүрийн сурч боловсрох, хөгжих эрхийг хангах, боловсролын үйлчилгээний хүртээмж, чанарыг дээшлүүлэх, өрсөлдөх чадвартай боловсролыг хөгжүүлэхэд онцгой анхаарал хандуулж, шат дараатай арга хэмжээг хэрэгжүүлэх болно” гэлээ.

Ерөнхий сайд мөн хэлсэн үгэндээ ‘Өнгөрсөн жилийн зудын сөрөг үр дагаврын улмаас Хөдөө орон нутгаас Улаанбаатар хот, Орхон, Дархан-Уул аймаг болон бусад аймгийн төвүүдэд иргэд олноор шилжин ирж байгаа. Үүний улмаас механик өсөлт бий болж, сургуулийн байр, хичээлийн танхим, сурагчдын ширээ сандлын хүрэлцээ хүндхэн байгааг Засгийн газар анхааралдаа авч зохих арга хэмжээ авахыг холбогдох газруудад үүрэг болгосон. Зарим сургуулиудад өргөтгөл хийгдэж байгаа. Гэлээ ч гэр хорооллын зарим нэг сургуулиуд гурван ээлжээр, нэг ширээнд гурван хүүхэд хичээллэж байгаа тохиолдол гарч байна. 2011 болон 2012 оны улсын төсөвт хүн амынхаа төвлөрийг дагуулан цэцэрлэг, бага сургуулиуд барих хөрөнгийн асуудлыг суулгах шаардлага байгаа. Гэхдээ үүнийг хүлээвэл хугацаа алдана. Үүнийг хүлээлгүй, хүүхдүүдийг хохироохгүйгээр зохицуулах үүргийг Монгол Улсын Ерөнхий сайд С.Батболд БСШУЯ-ны удирдлагууд болон Нийслэлийн Засаг дарга бөгөөд Улаанбаатар хотын захирагч Г.Мөнхбаярт нарт Сүхбаатар дүүргийн 35 дугаар сургуулийн хичээлийн шинэ жилийн нээлтэд оролцохдоо өглөө. 

Мөн Засгийн газраас багш нар та бүхнийг бүтээлчээр ажиллаж,  сайн сайхан амьдрахад шаардлагатай орчин нөхцөлийг бүрдүүлж, дэмжиж ажиллах болно гэж эх орноороо бахархдаг, иргэншин төлөвшсөн, хариуцлагатай шинэ үеийн  иргэдийг төлөвшүүлэх нэн хариуцлагатай бөгөөд эрхэм үүрэг хүлээсэн багш нарт хандаж хэллээ.

Тус сургуульд Японы “ЖАЙКА” олон улсын хамтын ажиллагааны агентлагийн төслийн хүрээнд  360 хүүхдийн багтаамж бүхий бага сургуулийн өргөтгөлийн барилга барьж байна.  Бага сургуулийн барилга энэ оны сүүлчээр ашиглалтад орж, бага ангийнхан нэг ээлжээр, дунд ангийнхан хоёр ээлжээр хичээллэх боломжтой болох юм байна.

Монгол Улсын Ерөнхий сайд С.Батболд хичээлийн шинэ жилийн нээлтийн энэ өдөр Ерөнхий боловсролын 35 дугаар дунд сургуулийн нээлтээс гадна ШУТИС болон Монгол Солонгосын технологийн коллежийн нээлтэд оролцож, багш оюутнуудад мэндчилгээ дэвшүүллээ

Говийн аймгуудад томилолтоор ажиллаж, Засгийн газрын өргөтгөсөн хуралдаанаа элсэн цөлд зохион байгуулаад ирсэн Монгол Улсын Ерөнхий сайд С.Батболдын  шинэ долоо хоногийн ажил Япон улсын Гадаад хэргийн сайд Окада Кацуяатай уулзсанаар эхэллээ.

Манай улсад айлчилж буй ноён Окада Кацуяа Япон улсын Гадаад хэргийн сайдаар ажилласан өнгөрсөн нэг жилийн хугацаанд  Австрали, Хятад, Солонгос, Сингапур, БНСВУ зэрэг Ази Номхон далайн таван оронд албан ёсны айлчлал хийжээ. Япон улс Ази Номхон далайн 31 улсад өөрийн Элчин сайдын яамтай бөгөөд гадаад айлчлалын зургаа дахь орноороо Монгол Улсыг сонгосон нь Японы Засгийн газар Монгол Улстай харилцах харилцаагаа ихээхэн чухалчилж буйн илрэл гэж Монгол Улс дахь Японы Элчин сайдын яам мэдэгдэж байгаа юм.

Монгол Улсын Ерөнхий сайд С.Батболд уулзалтын эхэнд Монгол Японы харилцаа, хамтын ажиллагаа, цаашдын төлөвт сэтгэл ханамжтай байдгаа хэлээд манай улсыг ардчилал, зах зээлийн нийгэмд шилжсэн тэр үеэс Япон улс бүх талаар дэмжиж тусалж ирсэнд талархаж явдгаа илэрхийллээ.  Мөн эдийн засгийн хөгжлийн харилцаагаа цаашид улам идэвхжүүлэх нь чухал болохыг дурдаад Эдийн засгийн иж бүрэн түншлэлийн хэлэлцээрийг ойрын үед байгуулах сонирхолтой байгаа. Монгол Улс төмөр зам, эрчим хүч, орон сууц зэрэг дэд бүтцийн томоохон төсөл хөтөлбөрүүд хэрэгжүүлж байна. Эдгээрт Японы хөрөнгө оруулагчид оролцох боломж байгаа гэдгийг Ерөнхий сайд С.Батболд уулзалтын үеэр онцоллоо.

“Танай Засгийн газрын үйл ажиллагаа монгол орны эдийн засгийн хөгжлийг хурдасгах томоохон ажлууд руу чиглэж эрчимтэй сайн ажиллаж байгаа гэж сонссон” гэсэн найрсаг үгээр яриагаа эхэлсэн Японы Гадаад хэргийн сайд Окада Кацуяа Монгол Японы харилцаа иж бүрэн түншлэлийн  хэмжээд байгаа. Үүнийг цаашид агуулга, үйл ажиллагааны хувьд улам хөгжүүлэх учиртай гээд Монгол Улсын Ерөнхий сайдын тэмдэглэсэн хоёр орны эдийн засгийн түншлэлийн хэлэлцээрийг байгуулахад идэвхтэй ажиллах болно гэдгээ илэрхийллээ.  Ноён Окада Кацуяа манай хоёр орны иж бүрэн түншлэлийн харилцаа нь бусад оронд үлгэр жишээ болох хэмжээнд байх ёстой гэж үздэгээ хэллээ. Мөн тэрбээр Монгол Улсын эрдэс баялаг, дэд бүтэц, уул уурхай тухайлбал, Тавантолгой, ураны салбарт Монгол Улсын гурав дахь хөршийн хувьд Японы хөрөнгө оруулагчид хамтран ажиллах сонирхолтой байгааг дурдлаа.

Нэмүү өртөг шингэсэн эцсийн бүтээгдэхүүний үйлдвэрлэлийг хөгжүүлэх зарчмыг мөрдлөг болгож буй Ерөнхий сайд С.Батболд уулзалтын үеэр энэ зарчмаа мөн тайлбарлалаа. Тэрбээр “Манай улс боловсруулалт хийхгүйгээр түүхий эдээ экспортлож буй. Энэ байдалд өөрчлөлт хийхийг манай Засгийн газар зорьж байгаа бөгөөд өөрчлөх нэг арга нь бусад улс орнуудтай худалдааны хэлэлцээр байгуулах явдал юм. АНУ дэмжиж, тодорхой хөнгөлөлттэй нөхцөлөөр хэлэлцээр байгуулж байна. Японтой эдийн засгийн түншлэлийн хэлэлцээрийг ойрын үед байгуулахыг зорьж буй нь ч ийм учиртай юм. Европын зарим улсад Монголын нэр бүхий бараа бүтээгдэхүүнийг татваргүйгээр оруулахыг дэмжсэн. Энэ мэтчилэн гурав дахь хөршийн үзэл баримтлалыг амьдралд хэрэгжүүлж, эдийн засгийн ашигтай хэлэлцээр байгуулахыг зорьж ажиллаж байгаа гэдгээ Ерөнхий сайд С.Батболд тэмдэглэлээ. Мөн Япон улс өндөр хөгжсөн технологи, менежмент, хөрөнгө оруулалтын хувьд манай улсын чухал түнш. Тухайлбал, улам өргөжин тэлж байгаа Улаанбаатар хотод эрчим хүчний шинэ эх үүсвэр байгуулахад Японы технологи чухал хэрэг болно гэж Монгол Улсын Ерөнхий сайд С.Батболд онцлоод Японы гадаад хэргийн сайд Ноён Окада Кацуяаг дараа ирэхдээ монголчуудын уламжлалт зан заншил, байгалийн сайхантай танилцаарай гэлээ

Монгол улсын ерөнхий сайд С.Батболд говийн аймгуудаар ажиллах явцынхаа хүрээнд   наймдугаар сарын 25-ны өдөр Оюутолгой төслийн  ажлын явцтай танилцлаа.

Хөрөнгө оруулалтын гэрээнд гарын үсэг зурснаас хойших дөрвөн сарын хугацаанд  энэ хөндийд бүтээн байгуулалтын томоохон ажлууд  өрнөжээ.

Тухайлбал уул уурхайн барилгын үе эхэлсэн байна. Баяжуулах үйлдвэрийн суурь, зуурмагийн үйлдвэр,өндөр хүчдэлийн 35 квт-ын сууриуд, баяжуулах үйлдвэрт ажиллах 4000 ажилчдын  байр, босоо хоёрдугаар амын үйл ажиллагаа эхэлжээ. Эдүгээ Оюутолгойд 3600 монгол ажилтан, ажиллагсад ажиллаж байгаа бөгөөд ханган нийлүүлэгч монгол компаний тоо 2000 орчимд хүрсэнийг тус компанийхан Ерөнхий сайд С.Батболдод танилцуулж байлаа. Харин БСШУ-ны сайд Ё.Отгонбаярын хэлснээр өнгөрсөн сард тус компанитай  мэргэжлийн ажилчид бэлтгэх санамж бичигт гарын үсэг  зурснаар 57 сая  ам.долларын хөрөнгө оруулалт мэргэжлийн сургалт үйлдвэрлэлийн төвүүдийн сургалтын ажилд зарцуулахаар болжээ.  Түүнчлэн 200 оюутныг төслөөс санхүүжүүлэх болсныг дуулгаж байв.  Оюутолгойд ажиллах 3300 ажилчдын тухайд эхний 1000 ажилчдын элсэлтийг аваад дууссан бөгөөд тэдний сургалт ирэх аравдугаар сарын 1-нээс эхлэх аж. Үлдсэн 2300 ажилтныг бэлтгэх журмыг НХХХЯ-тай хамтран боловсруулж байгаа юм байна. Нэгдүгээр сарын 1-нээс тэднийг бүртгэх ажлыг эхлүүлнэ хэмээн төслийн явцтай танилцаж байгаа Ерөнхий сайдад  боловсролын сайд мэдээллээ.  Аймаг, нийслэл, дүүргийн хүн амынх нь тоотой харьцуулсан квотыг удахгүй гаргах бөгөөд иргэдэд нээлттэй , ил тод хүртээмжтэйгээр зохион байгуулах тухай Ерөнхий сайдын үүргийг анхаарч байгаагаа мөн дурьдаж байлаа.

Оюутолгой төслийн үйл ажиллагаатай газар дээр нь танилцсан Ерөнхий сайд С.Батболд хэлэхдээ “Энэ томоохон бүтээн байгуулалтад монголчуудын оролцоо буюу монгол инженер техникийн ажилтнуудыг бүрэн оролцуулах , улам илүү дадлагажуулах тал дээр Монгол улсын Засгийн газар үүрэг хүлээж байгаа. Цаашид үйлдвэр бүрэн ашиглалтад ороод эхлэхээр монголчуудын, монгол ажилчдын ажиллах энэ боломж 90- ээс доошгүй хувьд  хүрэх юм. Энэ чиглэлээр нэлээд ажил зохион байгуулах шаардлага Засгийн газрын , мэргэжлийн яам талаас байна гэдгийг харж байна. Бидэнд маш их боломж байна. Үйл ажиллагаагаа идэвхжүүлж, бодитой ажлыг явуулах ёстой гэж бодож байна. Болохгүй  байгаа зүйлийг шүүн, ярилцаж болно. Анхаарах ёстой зүйлүүдийг Засгийн газар анхаарч, дэмжих ёстойг нь дэмжин шахаж ажиллах болно. Оюутолгой төслийн явцыг бид газар дээр нь харлаа. Томоохон бүтээн байгуулалтын ажил өрнөж, амаргүй ажлыг тэд нугалж байна. Цаг хугацаандаа үйлдвэрээ нээх зорилт нь биелэх боломжтой юм гэж харлаа”   хэмээн дүгнэж хэллээ.

Харин Оюутолгой ХХК-ийн ерөнхийлөгч бөгөөд гүйцэтгэх ерөнхий захирал Кийт Маршалын хэлснээр барилгын ажил, бичиг цаасны хүндрэл бага зэрэг гарч байгаа ч үүнийг бид даван туулж чадна. Баяжуулах үйлдвэрийг хоёр жилийн хугацаанд барьж дуусгана. Энэ үйлдвэрийг барьж дууссаны дараа ил уурхайгаа ажилд оруулна. Үүнд бэлтгэх, хөрс хуулалтыг хийхэд зургаан сарын хугацаа шаардагдах болно гэдгийг дуулгаж байлаа. Цаашдаа шаардлага өндөр мэргэжлийн монгол ажилчдыг хурдан сургаж дадлагажуулах, мөн Оюутолгой төслийн ханган нийлүүлэх компаниудыг тендэрээр шалгаруулж ил тод байдлыг хангах, үндэсний аж ахуйн нэгжүүдийг түлхүү оруулах тал дээр анхаарч ажиллахыг Оюутолгой төслийн удирдлагуудад Ерөнхий сайд зөвлөлөө.

Оюутолгой төслийн ажилчид  дунджаар   300 мянгаас  нэг сая хүртэлх төгрөг авдаг юм байна  Үүрийнцолмон гэх монгол залуу 1.3 сая  ам.долларын үнэтэй машин дээр ганцаараа ажиллаж сурсан нь том амжилт хэмээн ажилчид нь ярьж байв.

“Эрдэнэс Тавантолгой”-н бүх ажил ирэх аравдугаар сард жигдэрнэ

Мөн өдрөө Ерөнхий сайд С.Батболд 100 хувийн төрийн өмчит “ Эрдэнэс Тавантолгой” ХХК-ийн  ажлын явцтай танилцлаа.  Тус компани нүүрснийхээ  анхны хөрс хуулалтаа хийж байхтай нь Засгийн газрын тэргүүн ийн таарав.

Тус ордыг ашиглах тухай УИХ-ын шийдвэр гарснаас хойш  “ Эрдэнэс Тавантолгой” компани  хээрийн ангиа байгуулж, ам нээх баталгаажуулах өрөмдлөгийг хийж ,  шинэ хөрсөө хуулаад эхэлжээ. Оператар компанийг аравдугаар сарын 5 гэхэд шалгаруулж, анхны борлуулалтаа арваннэгдүгээр сарын 1-нд эхлүүлэхээр тооцож байгаа юм байна. Эрчим хүчний зориулалтаар ашиглах зургаан тэрбум тонн нүүрсний нөөцтэй уг уурхай анхны хөрс хуулалтаар 12-16 метрийн дороос “хар алт”-ны нөөцөд хүрэх бөгөөд хоёрхон сарын дараа баялаг маань үүцээ нээнэ хэмээн “Эрдэнэс МGL” компанийн ерөнхий захирал Б.Энэбиш танилцуулж байв. Эхний жилдээ нэг сая тонн нүүрс олборлох зорилт тавьж байгаа бөгөөд зах зээл нь тодорхойгүй байгаад санаа зовж буйгаа ч дурдаж байсан.

 Ерөнхий сайд мэдээллийг  сонссоны дараа “  УИХ-аас Тавантолгойн ордыг эргэлтэд оруулах тухай шийдвэр гарч, үйл ажиллагааг Засгийн газар эхлүүлж байна. Иргэд Таван толгойгоос их юм хүлээж байгаа. Бид энэ ордоос  олох орлогоос иргэддээ хувь хишиг хүртээж, эрүүл мэнд  боловсролын салбарт хөрөнгө оруулна. 2011 он гэхэд энэ бүх үйл ажиллагааг ажил болгоод, тавьсан зорилтоо биелүүлэх ёстой. Хүний хөгжил сангийн хуулийн дагуу ямар хугацаанд хэдий хэмжээний, ямар үнийн дүнтэй хувьцаа эзэмшүүлэх ёстой  вэ гэдгийг ойрын хугацаанд тодорхой болгож танилцуулна.

Энэ орд нь олон улсын жишигт нийцсэн байх ёстой. Өмнийн говьд үйл ажиллагаа явуулж буй компаниуд бодлогоороо зангилагдаж, дэд бүтэц нь нэг нэгнээ нөхсөн хамтарсан уялдаа холбоотой байх хэрэгтэй.  Энэ бүгдийг нухацтай авч үзэн, цаашдын ирээдүйг нь харгалзсан орчин үеийн аж үйлдвэрийн, хот байгуулалтын төлөвлөгөө гаргаж Засгийн газарт танилцуулах үүргийг холбогдох албан тушаалтануудад өгч байна” гэлээ.

“Эрдэнэс Тавантолгой”   компанийн гүйцэтгэх захирлыг олон улсын нээлттэй тендэрээр сонгон шалгаруулах   юм байна.  Тендэрийн хуулийн дагуу хэвлэлүүдээр зарлал  яваад эхэлжээ. Эцсийн шийдвэр аравдугаар сарын 5-нд гарч, оператор компани ажилдаа орж, “Эрдэнэс Тавантолгой” жинхэнэ утгаараа ажилдаа орох юм байна.

Говь сэржээ

Говийн аймгуудад хийсэн томилолтоо дүгнэхдээ  Ерөнхий сайд С.Батболд сэтгүүлчдэд  “Говь сэрж байна” хэмээн   хэллээ.  Тэрбээр хэлсэн үгэндээ “Бидэнд хөгжлийн асар их боломж байгааг энэ хоёр өдрийн үзэж харсан зүйл хэлж өглөө. Нааштай олон зүйл байгаа ч төр засгийн зүгээс бодлогын хувьд дэмжих зүйл байгааг газар дээр нь танилцсаны хувьд анзаарагдаж байна.  Бүтээн байгуулалтын олон ажил Сайншандад, Өмнөговьд эхэлжээ. Төрийн зүгээс эрх зүнй болоод бусад талын дэмжлэг үзүүлэхийн  зэрэгцээ нэгдсэн зохицуулалт хийх,  хот суурин газрыг бий болгохтой холбогдсон жигд төлөвлөлтийг бий болгож  өгөх хэрэгтэй байна.  Түүхий эд боловсруулах биш нэмүү өртөг бий болгосон боловсруулах үйлдвэрийг бий болгох, ийм бааз суурийг улам бэхжүүлж дэмжлэг үзүүлэх шаардлагатай байна. Энэ чиглэлээр цаашид тодорхой төлөвлөгөө гаргаж, арга хэмжээ авах болно. Иргэдээ МСҮТ-өөр дамжуулан нарийн мэргэжлээр сургах, зах зээлд илүүдээд биш шаардлагатай байгаа мэргэжлээр сургах энэ бодлого зайлшгүй хэрэгтэй байгаа нь энэ хугацаанд ажиглагдлаа. Говь нутаг сэрж байна гэдэг монгол хүний амьдрал улам  хөгжин дэвжих, олон мянган ажлын байр шинээр бий болох, сайхан орчин бүрдэх, өндөр ур чадвартай боловсон хүчнүүд бэлтгэгдэж, гол нь тэндээ таарсан цалин авч амьдрал нь дээшилж байна. Монголчууд говьд Солонгосыг бий болгож болно. Солонгос явж буй залуусаа говь нутагтаа ирж, ажил хөдөлмөр эрхлэх сайхан боломж бий болж байгааг бид өнөөдөр харлаа. Хоёр том төслийг дагаад хувийн хэшлийнхний хийж байгаа ажлыг, гадны хөрөнгө оруулалттай компаниуд үлгэр дуурайл үзүүлэн ажиллаж байгааг харлаа. Энд байгаа компаниуд  одоо харин нэг жишгээр, нэг стандартаар нэгдсэн хот байгуулалтыг хийх хэрэгтэй байна. Энэ бүх ажлыг эрчимжүүлэхийн төлөө төр засаг нь ард түмэнтэйгээ хамтарч хичээвэл түүхэн хөгжлийн боломж бидний урд байна” гэлээ

Монгол Улсын Ерөнхий сайд С.Батболд  говийн аймгуудаар хийж байгаа албан томилолтынхоо үеэр ингэж мэдэгдлээ. Тэрбээр 8 дугаар сарын 25 ны  өдөр Зүүнбаян, Цагаан элсний бүтээгдэхүүн хуваах гэрээт талбайд газрын тосны хайгуул, олборлолт явуулж буй  “Доншен” компанийн үйл ажиллагаатай танилцлаа. БНХАУ-ын хөрөнгө оруулалттай тус компани нь одоогийн байдлаар туршилтын олборлолт явуулж байгаа  бөгөөд  хамгийн сүүлийн үеийн мэдээгээр  жилийн эхнээс хойш 328739 баррель нефть олборлоод байгаа аж.  Гэрээнд заасан нөхцөлийн дагуу энэ оны хоёрдугаар хагасаас эхлэн олборлолтын горимд шилжих ажээ.  Бүтээгдэхүүн хуваах гэрээний нөхцөл ёсоор эрэл хайгуулын үе шат нь 2010 онд дуусах бөгөөд цааш 20-30 жил олборлолтын үйл ажиллагаа эрхлэх боломжтой юм байна. Нийт 177 сая баррель түүхий тосны нөөцөөс ашиглалтын баталгаат нөөц нь 40 сая хэмээн Ерөнхий сайдад танилцуулж байлаа.

Сайншандын аж үйлдвэрийн цогцолборт газрын тосны боловсруулах үйлдвэр барихад доод тал нь нэг сая тоннын хүчин чадалтай технологи бүхий үйлдвэр барих шаардлагатай юм байна. Одоогийн байдлаар ийм үйлдвэр байгуулах хүсэлтэй арав гаруй компани мэргэжлийн байгууллагуудад хүсэлтээ хүргүүлээд байгаа ажээ. Байгаа энэ боломж нөөц дээрээ түшиглээд  Монгол Улс  өөрсдөө газрын тосны бүтээгдэхүүнтэй болох эх үндэс  бүрдэж байгаа бөгөөд 2014 онд боловсруулах үйлдвэр байгуулна гэдгээ Ерөнхий сайд С.Батболд мэдэгдлээ.

Монгол Улс нефтийн бүтээгдэхүүний хувьд 100 хувь хараат байдаг байсан бол одоо үүнийг өөрсдөө үйлдвэрлэдэг болох цаг тун ойртжээ. Улс төрийн түвшинд олон жил яригдаж байгаа  газрын тосны  боловсруулах үйлдвэр барих том ажлыг Сайншандын аж үйлдвэрийн паркийг түшиглэн босгохоор Засгийн газар зорьж байна.

Ураны талаарх мэдээллийг Монголын ард түмэнд нээлттэй байлгахыг Ерөнхий сайд хүслээ

Ерөнхий сайд  С.Батболд мөн өдөр Франц улсын “Арева” группын ураны хайгуулын явцтай танилцлаа. Дэлхий дахинд эрчим хүчний салбарт  тэргүүлэх үйл ажиллагаа явуулдаг “Арева” групп нь Франц улсын төрийн өмчит компани юм. Тус групп өнгөрсөн онд 8.630 тонн уран үйлдвэрлэсэн бөгөөд Канад, Казахстан,Нигер зэрэг улсад олборлолт хийдэг аж. Тус  компанийн салбар болох “Кожеговь” компани нь 1997 оноос манай улсад үйл ажиллагаа явуулж эхэлжээ. Өнөөдрийн байдлаар тэд  ураны бүтээгдэхүүн болох “шар нунтаг” үйлдвэрлэх зорилготойгоор Дорноговь, Сүхбаатар аймгуудын нутагт ураны хайгуулын ажлыг хийж эхлээд байгаа юм байна.

Шар нунтагийн эхний үйлдвэрлэлийг 2015 онд гаргана хэмээн төлөвлөжээ. Харин  2010-2011 онд тус компани газар дор уусган олборлох туршилт явуулах гэж  буйгаа Ерөнхий сайдад танилцуулж байв. Одоогийн байдлаар манай улсад 10000 тонн орчим ураны нөөц илрээд байгаа бөгөөд цаашид ч нэмэгдэх магадлал тун өндөр байгааг  францын мэргэжилтнүүд тайлбарлаж байсан. Мэдээллийг сонссоны дараа Ерөнхий сайд тэднээс хоёр зүйлийг лавлав. Ураны хайгуул хийж  байгаа “Арева” компанийн үйл ажиллагаа  Монголын ард түмэнд нээлттэй байх ёстой. Энэ талаар юу хийж байгаа болон орон нутгийн  иргэдтэй хэрхэн хамтарч ажилладгийг нь сонирхлоо. Тэдний хэлснээр монголчуудын хувьд шинэхэн танил төдийхөн байгаа ураны талаар Дорноговь болон Зүүнбаянд хоёр ч удаа нээлттэй мэдээлэл хийсэн тухайгаа дурдаад эндээс иргэд анхан шатны мэдээлэл авсан гэдэгт итгэлтэй байгаагаа хэлж байв.

Ажил өргөжихийн хэрээр ажлын байр бий болгож, энэ чиглэлийн боловсон хүчин бэлтгэх бодолтой байгаагаа ч мэдээлсэн. Тухайлбал, Казахстан болон Францад энэ чиглэлээр монголчуудыг сургах ажил эхлээд байгаа юм байна. Компанийн нийгмийн хариуцлагын чиглэлээр эрүүл мэнд, боловсролын салбарт  багагүй дэмжлэг үзүүлж буйгаа ч дурдлаа. Монголд нэмүү өртөг шингэсэн бүтээгдэхүүн гаргахад анхаарч энэ тал дээр Цөмийн энергийн газартай холбоотой ажиллахыг Ерөнхий сайд С.Батболд зөвлөлөө

Засгийн газрын хуралдааныг  Өмнөговь аймагт зохион байгуулах, түүнчлэн говийн гурван аймгаар ажиллах Eрөнхий  сайдын томилолт наймдугаар сарын 24-ний өдөр Дорнын говиос эхэлсэн. Засгийн газрын олонх гишүүн Ерөнхий сайдтай хамт ажиллаж байгаа нь энэ  томилолтын онцлог гэж хэлж болно. Тэрбээр замдаа сүү, ногооны “Өнөрбаяр” фермерийн үйл  ажиллагаатай танилцлаа. Сайншанд хотоос зургаан км-т байрлах тус фермер нь жижиг, дунд зээлийн хөрөнгөөр байгуулагдсан бөгөөд  тус аймгийн хамгийн том аж ахуй юм байна. 50 сая төгрөгийн зээлийн хөрөнгөөр боссон уг фермер нь эдүгээ үхэр, тахиа, гахайн аж ахуйтай болсон төдийгүй тарвас, өргөст хэмх  зэрэг нарийн ногоо ч тариалдаг юм байна.

Ийм хэмжээний фермер байгуулахад говьд байтугай хангай нутагт ч багагүй бэрхшээл туулдаг. Ийм их ажлын ард гарч чадсан “Өнөрбаяр” фермерийнхэнд Ерөнхий сайд баяр хүргээд, жижиг дунд зээл жинхэнэ эзэндээ хүрэхийн ач холбогдлыг сайшааж байсан. Говьд усны асуудал шийдэгдчихвэл фермерээ улам өргөжүүлэх боломж бий гэдгээ фермерийн  эзэн Б.Өнөрбаяр ярьж байлаа. Орон нутагт ажлын байр бий болгож үйлдвэрлэл амжилттай эрхэлж, хийж бүтээж байгаа хүмүүсийг засаг дэмжиж ажиллана гэж тус фермерийн үйл ажиллагаатай танилцахдаа Ерөнхий сайд С.Батболд хэллээ.

Аливаа улс орон хөгжин дэвших нь өөрсдөөс л шалтгаална

Монгол Улсын Ерөнхий сайд С.Батболд Сайншанд хотын иргэдтэй уулзах үеэрээ ийн онцолж байв. Аж үйлдвэрийн томоохон төвийг тус хотод байгуулахаар болж, ийм том хүсэл эрмэлзэлээр   сайншандчууд жигүүрлэсэн    энэ мөчид Засгийн газрын тэргүүн тус аймагт ажиллаж байгааг олзуурхах иргэд олон байлаа. Тийм ч болохоор олон иргэд энэ чиглэлээр нэлээд асуулт тавьж, хариулт авч байв. Бүтээн байгуулалтын томоохон ажлууд эхэлж байгаатай холбогдуулан мэргэжлийн боловсон хүчин бэлтгэх нь Засгийн газрын томоохон зорилтын нэг болж байгааг Ерөнхий сайд тэмдэглээд, ажлын байрыг хангахад  энэ зорилт нь хамтдаа явах ёстойг дурдаж байсан. Газрын асар их баялагтай мөртлөө тэр нь хараал болдог, нефтийн баялагтай орнууд  иргэддээ бэлэн мөнгө тарааж бэлэнчлэх сэтгэлгээнд бараг дасгачихдаг гэх мэт улс орнуудын хөгжлийн чиг хандлагууд байдаг аж. Харин хөгжлийн өндөр түвшинд хүрсэн, бүтээлч ард түмэн гэх хандлага байдаг бөгөөд монголчууд бид энэ замыг сонгож хөгжлийн төлөө хамтдаа хүчээ нэгтгээд явбал бидэнд түүхэн боломж байна гэдгийг Ерөнхий сайд С.Батболд Дорноговьчуудад санууллаа. 2010-2011 оны  хичээлийн жилд их, дээд сургууль коллежид суралцагчдын сургалтын төлбөрийн 2010 оны 9-12 дугаар сард ногдох хэсгийг суралцагч өөрөө хариуцан, үлдэгдэл төлбөрийг 2011 оны нэгдүгээр сараас эхлэн Хүний хөгжил сангийн хишиг, хувиас тооцуулж төлүүлэх зохицуулалт хийхээр Засгийн газрын өнгөрсөн долоо хоногийн хуралдаанаас шийдвэрлэсэн. Энэхүү шийдвэрийн  талаар сайншандчууд ихээхэн сонирхож, сайшааж байгаагаа уулзалтын үеэр илэрхийлж байлаа. 

Аймгийн төв Сайншандаас Хамрын хийд хүртэлх 45 км замын хөрөнгийн асуудлыг 2012 оны төсөвт оруулах саналыг иргэд баяртайгаар хүлээн авсан.  Дорноговь аймгийн зарим сумдад одоо болтол ИТХ-ын сонгуулийн маргаан байдаг бөгөөд энэ асуудлаа яаралтай цэгцлэхийг Ерөнхий сайд хатуу анхаарууллаа. Эдийн засгийн шинэчлэлийн чиглэлээр Засгийн газраас явуулж байгаа бодлого үйл ажиллагаанд  орон нутгийн иргэд ам сайтай байна. Энэ эрч хүчээ алдахгүй ажиллахыг тэд Ерөнхий сайдад зөвлөж байв.

Иргэдэд түргэн шуурхай үйлчлэхийг анхаарууллаа

Иргэдтэй хийсэн уулзалтын дараагаар Ерөнхий сайд тус аймгийн төрийн албан хаагчидтай уулзлаа. Иргэдийн санал хүсэлтийг үйл ажиллагаандаа тусгахад хатуу анхаарч ажиллахыг төрийн байгууллагуудын удирдлагууд болон ажилтнуудад Ерөнхий сайд  анхаарууллаа. Хувийн хэвшлийн үйл ажиллагаанд төр хутгалдах ёсгүй, харин бизнесийн орчныг таатай болгох нөхцөлийг бүрдүүлэхэд ажлаа чиглүүлэх учиртай.  Бизнесийн орчны шинэтгэлийн жилийн хүрээнд олон төрлийн тушаал шийдвэрийг цэгцэлж, юуг нь хүчингүй болгох вэ гэдгийг ирэх аравдугар сарын 1-ний дотор шийдэх, мөн иргэний шинэчилсэн бүртгэл, Хүний хөгжил сангаас олгох хувь, хишиг хүртээх зэрэг ажлыг иргэдэд ямар ч чирэгдэлгүй түргэн шуурхай хийж үйлчлэхийг төрийн байгууллагынханд үүрэгдлээ.

Орон нутагт хууль дүрэм хэрэгжихэд төрийн байгууллагууд голлон анхаарах ёстой, ингэхдээ өөрсдөөсөө эхэлж үлгэр жишээ үзүүлэхийг гүйцэтгэх засаглалын тэргүүн төрийн албан хаагчдад анхаарууллаа. Энэ уулзалтын үеэр хөндөгдсөн өөр нэг асуудал нь өвөлжилтийн бэлтгэл ажлын талаар байв. Өнгөрсөн өвлийн сургамжийг мартах ёсгүй, тиймээс өвөлжилтийн бэлтгэл хангах ажилд шат шатандаа анхаарахыг Ерөнхий сайд үүрэг болгоод, эдгээр ажлын гүйцэтгэлийг үр дүнгээр нь шалгана гэлээ

Монгол Улсын Засгийн газрын хуралдаан 2010 оны 8 дугаар сарын 27-ны баасан гаригт Өмнөговь аймгийн Баяндалай сумын нутагт болно. Хуралдаанаар дэлхийн цаг уурын дулаарал, цөлжилтийн талаар хэлэлцэх юм. Монгол Улсын Ерөнхий сайд С.Батболд тэргүүтэй Засгийн газрын гишүүд Дорноговь, Өмнөговь, Дундговь аймагт албан томилолтоор ажиллахаар 8 дугаар сарын 24-ний өдөр Улаанбаатар хотоос хөдөллөө. Ерөнхий сайд говийн аймгуудад ажиллах үеэрээ Дулааны цахилгаан станц, Мэргэжлийн сургалт, үйлдвэрлэлийн төв, нэгдсэн эмнэлэг зэрэг байгууллагын ажилтай танилцан, аймаг, сумдын иргэд, хөдөлмөрчид, төрийн захиргааны албан хаагчидтай уулзаж төр, засгаас хэрэгжүүлж байгаа бодлого, шийдвэр, цаашдын зорилтын талаар танилцуулж үүрэг, чиглэл өгөх юм.

Мөн Оюутолгой төслийн бүтээн байгуулалтын үйлдвэрлэлийн бэлтгэл ажлын явц, төрийн өмчит “Эрдэнэс МГЛ” болон орон нутгийн өмчит “Тавантолгой” уурхай, Гашуун сухайтын хилийн боомтын ажилтай танилцахаар төлөвлөсөн байна. Монгол Улсын Ерөнхий сайд С.Батболд тэргүүтэй Засгийн газрын гишүүд 8 дугаар сарын 28-ны өдөр Улаанбаатар хотноо ирнэ

Монгол Улсын Ерөнхий сайд С.Батболд ХБНГУ-ын Бундестагийн Батлан Хамгаалахын Байнгын хорооны орлогч дарга, доктор Карл А.Ламерсыг 2010 оны наймдугаар сарын 23-ны өдөр хүлээн авч уулзлаа. Монгол Улс нь олон тулгуурт гадаад бодлого баримталдаг бөгөөд ХБНГУ-ыг өөрийн гуравдахь хөршөө гэж үздэг. Иж бүрэн түншлэлийн хүрээнд боловсрол, батлан хамгаалах салбарт, ялангуяа энхийг сахиулах үйлсэд хоёр талын хамтын ажиллагаа амжилттай хөгжиж байгааг Ерөнхий сайд уулзалтын эхэнд тэмдэглэлээ.

Өнөөдөр хоёр талын хамтын ажиллагааг, ялангуяа эдийн засаг, хөрөнгө оруулалтын салбарт хамтын ажиллагааг хөгжүүлэх шинэ түүхэн боломж бидэнд ирээд байгаа бөгөөд манай орны герман хэлтэй олон мянган иргэд хоёр улсын харилцааны гүүр болж өгөх нь дамжиггүй юм гэдгийг Ерөнхий сайд онцолоо. Германы техник технологи, стандартыг Монгол Улсад нэвтрүүлэх ач холбогдлыг Ерөнхий сайд мөн дурдаад, Монгол Улс Европын Холбоотой Түншлэл, Хамтын ажиллагааны гэрээг байгуулахаар ажиллаж байгаа энэ үед Германы талаас дэмжлэг үзүүлэхийг хүслээ. Доктор К.Ламерс хоёр улс нийтлэг, ижил үнэт зүйлсийг хуваалцдаг гээд, Монгол Улс нь энхийг сахиулах олон улсын хамтын нийгэмлэгийн үйл хэрэгт үнэтэй хувь нэмэр оруулж байгааг онцоллоо. Мөн тэрээр хоёр талын худалдаа, хөрөнгө оруулалтын хамтын ажиллагааг хөгжүүлэхэд парламентын зүгээс идэвхтэй анхаарч ажиллахын төлөө бүхий л хүчин чармайлтыг гаргана гэдгээ Ерөнхий сайдад илэрхийллээ

Монгол Улсын Ерөнхий сайд С.Батболд АНУ-ын Батлан Хамгаалах Яамны Ази, Номхон далайн бүсийн аюулгүй байдлыг хариуцсан газрын дарга, дэслэгч генерал Уоллес Грегсоныг 2010 оны наймдугаар сарын 20-ны өдөр хүлээн авч уулзлаа. Уулзалтын эхэнд Ерөнхий сайд манай орны гуравдахь хөрш болох АНУ-тай хоёр талын иж бүрэн түншлэлийн хүрээнд ардчиллыг бэхжүүлэн хөгжүүлэхэд болон худалдаа, эдийн засаг, боловсрол, хүмүүнлэг, батлан хамгаалах салбарт харилцаа идэвхтэй хөгжиж байгааг тэмдэглэлээ.

Түүнчлэн олон улсын тавцан дахь хоёр талын хамтын ажиллагаа хөгжиж байгааг мөн онцоллоо. Өнөөдөр дэлхийн халуун цэгүүдэд монгол цэргүүд энхийг сахиулах үүргээ нэр төртэйгээр биелүүлж байна. Монгол Улс олон улс болон бүс нутгийн аюулгүй байдлыг бэхжүүлэхэд АНУ-тай хамтран ажиллаж байгаа бөгөөд тэр дундаа Ази, Номхон далайн бүсийн аюулгүй байдлыг сахин хамгаалах, бэхжүүлэхэд хамтын ажиллагаагаа улам өргөжүүлэх боломжтой юм гэж Ерөнхий сайд хэллээ. Хоёр талын батлан хамгаалах салбарын хамтын ажиллагааны чухал илрэл нь 2004 оноос зохиогдож эхэлсэн “Хааны Эрэлд” хамтарсан цэргийн сургууль билээ.

Тус дадлага, сургууль нь монгол дайчдын ур чадварыг нэмэгдүүлэх, олон улсын зэвсэгт хүчний хамтран ажиллах чадварыг дээшлүүлэх ач холбогдолтойгоос гадна бүс нутгийн орнуудын цэргийн итгэлцэл, ойлголцлыг бэхжүүлэх үүрэгтэй юм гэдгийг Ерөнхий сайд мөн тэмдэглэлээ. Дэслэгч генерал У.Грегсон Монгол-Америкийн харилцаа, тэр дундаа хоёр талын батлан хамгаалах салбарын хамтын ажиллагааны түвшинг өндрөөр үнэлж байгаагаа илэрхийлээд, энхийг сахиулах үйл хэрэгт Монголын үүрэг нөлөө дэлхийн хэмжээнд хүрснийг энэ дашрамд онцоллоо. Цаашид хоёр орны цэргийн салбарын харилцааг бэхжүүлэн хөгжүүлэх, энхийг сахиулах, олон улс, бүс нутгийн аюулүй байдлыг сахин хамгаалах, бэхжүүлэхэд хамтран ажиллах болно гэж У.Грегсон хэллээ

Засгийн газрын тэргүүний  орон нутагт ажиллах үеэр иргэдийн хамгийн их асууж, санаа зовоож байсан асуудал нь их дээд сургуулиудын сургалтын төлбөр асуудал байсан билээ. Түүний  томилолтын үр дүнгээр авч хэрэгжүүлэх арга хэмжээний төлөвлөгөөг өчигдрийн Засгийн газрын хуралдаанаар авч хэлэлцэж, үүний дотор уг  асуудлын талаар тодорхой шийдвэр гаргасныг өнөөдөр  Ерөнхий сайд  мэдээлэв. Тухайлбал, 2010-2011 оны хичээлийн жилийн бүтэн жилийн сургалтын төлбөрийг эхний хагас жилийн төлбөрөөр авах, өөрөөр хэлбэл есдүгээр сарын нэгнээс 12 дугаар сарын 31 хүртэлх хугацаагаар шийдвэрлэх нь зүйтэй гэж үзсэн аж. Үүнтэй уялдуулан сургалтын төрийн сангийн зээл төлбөрийг энэ хугацаагаар тооцож үзэх юм байна. Энэ арга хэмжээг цаг алдалгүй авч хэрэгжүүлэх үүрэг даалгаврыг  БСШУ-ны сайдад өглөө.  Харин үүнээс хойших хугацааны төлбөрийн тодорхой хэсгийг Хүний хөгжил сангаас олох боломжийг ирэх оны төсөвт суулгаж өгөх ажлыг зохих хууль дүрмийн дагуу шийдвэрлэхийг   БСШУ-ны  сайд Ё.Отгонбаяр  болон Сангийн сайд С.Баярцогт нарт тус тус даалгалаа.  Сургалтын төлбөртэй холбоотой бас нэг зүйл нь хичээлийн хэрэгслийн үнэ нэмэгдсэн асуудал байгаа аж. Валютын ханш доогуур байгаа хэдий ч гэсэн энэ богинохон цаг хугацааг ашиглан, бизнес эрхлэгчид хичээлийн хэрэгслийн үнийг үндэслэлгүй  нэмж байгаа нь зохисгүй гэдгийг Ерөнхий сайд тэмдэглээд, энэ асуудалд БСШУ-ны сайдыг анхаарч ажиллахыг  үүрэг болгов.

Мөн түүнчлэн их дээд сургуулиудын сургалтын төлбөрийг  инфляцын дундаж төвшингөөс  дээш гаргахгүй байх, ялангуяа энэ зарчим төрийн өмчит их дээд сургуулиудад илүү үйлчлэх ёстойг Ерөнхий сайд сануулж байв. Иргэдэд хамгийн гол нь дарамт учруулахгүйгээр  зохион байгуулахыг үүрэг болгож байлаа. Ерөнхий сайдыг орон нутагт ажиллах үеэр яригдсан бас нэг том асуудал нь ажлын байрны хүсэлт байсан. Тэднийг ажлын байраар хангах боломжийн талаар  Засгийн газрын тэргүүн мөн  хөндлөө. Эхний ээлжинд Оюутолгой төсөлд 3200 хүнийг мэргэжлийн сургалт үйлдвэрлэлийн төвөөр дамжуулан, нарийн мэргэжлийн боловсон хүчин бэлтгэхэд монгол ажилчдаа бэлдэх боломжийг цаг алдалгүй зохион байгуулах үүрэг ч энэ үеэр өгөгдлөө. 

Харин БСШУ-ны сайдын хэлснээр  их дээд сургуулиудын сургалтын төлбөрийг есдүгээр сарын 1-нээс 12 дугаар сарын 31 хүртэлх хугацаагаар бодох тухай Засгийн газрын тогтоол гарсантай холбогдуулж их дээд сургуулиудад мэдэгдлээ хүргүүлээд байгаа юм байна. Зарим их дээд сургууль төлбөрөө авчихсан байгаа учир буцаан олголт хийх үүргийг өгчээ. Төлбөрийнхөө талаар   их дээд сургуулиуд мэдээгээ бүрэн гүйцэт ирүүлээгүй байгааг Ё.Отгонбаяр сайд хэлж байв.  Инфляцын дундаж түвшнээс нэмэхгүй байх, нэмсэн тохиолдолд үндэслэлтэй тайлбар авахаа БСШУ-ны сайд мэдэгдэж байсан. Үндэслэлгүй нэмсэн тохиолдолд  Ерөнхий сайдын өгсөн үүргийн дагуу хариуцлага тооцох болно гэдгээ ч дурдлаа. Харин хичээлийн хэрэгслийн хувьд эцэг, эхчүүдэд хүрэх сурах бичиг өнгөрсөн оны үнээр хүрэх юм байна.

Оюутолгой төсөлд ажиллуулах  мэргэжлийн сургалт үйлдвэрлэлийн төвд бэлтгэх 3200 ажилтны  тухайд энэ компанитай ярилцан, эргэж мэдээлэх тухайгаа дурдаад тухайн хүний чадварыг илүү харж үзэх учраас иргэд бүгд орчихно гэж бодож болохгүйг анхааруулж байв. Өөрөөр хэлбэл тэднээс шалгалт авах аж. Мэргэжлийн сургалт үйлдвэрлэлийн үндэсний зөвлөлийн уул уурхайн салбар зөвлөлийн шугамаар бэлтгэгдэж буй иргэдийг бусад компанид ажилд оруулах асуудлыг ч зохион байгуулж байгаа юм байна. Ажилчдыг бэлтгэхдээ аймаг орон нутаг, нийслэл дүүргээс тодорхой квотоор авах ажээ. Эцэст нь Ерөнхий сайд С.Батболд энэ бүх ажил иргэдэд нээлттэй,  ил тод, мэдээлэл нь зөв хүрсэн байх ёстойг анхаарууллаа

Ашигт малтмалаа түүхийгээр нь гадагш гаргах бус, нэмүү өртөг шингэсэн бүтээгдэхүүн үйлдвэрлэж, баялгаа зөв зүйтэй ашиглах нь бидний зорилго. Хариуцлагатай уул уурхайг хөгжүүлж, чадавхийг бий болгоход ХБНГУ-ын туслалцаа, дэмжлэг чухал. Улс орноо хөгжүүлэхийн тулд засаглалаа сайжруулж, ил тод, нээлттэй, шударга, хариуцлагатай, тогтвортой орчин бий болгоно. Иймээс Европын Холбооны стандартыг бүх шатанд нэвтрүүлэхийг зорьж байна гэж Ерөнхий сайд С.Батболд хэлэв.

Тэрээр 2010 оны 8 дугаар сарын 19-ний өдөр ХБНГУ-ын Эдийн засгийн хамтын ажиллагаа, хөгжлийн сайд Дирк Нийбел тэргүүтэй төлөөлөгчдийг хүлээн авч уулзахдаа ингэж хэллээ. ХБНГУ нь манай улсад өрнөсөн өөрчлөлт, шинэчлэлтийг эхнээс нь тууштай дэмжин, тусламж дэмжлэг үзүүлж ирсэн орны нэг бөгөөд өдгөө харилцаа, хамтын ажиллагаа иж бүрэн түншлэлийн хэмжээнд хүрээд байгааг Ерөнхий сайд тэмдэглэв.

Ашигт малтмалын ордуудаа эдийн засгийн эргэлтэд оруулж, байгаа энэ үед эдийн засаг, санхүү, техник, технологийн салбарт хамтрах, ялангуяа өндөр технологи, тоног төхөөрөмж авах, боловсон хүчин бэлтгэх зэрэгт ХБНГУ-ын  дэмжлэг, туслалцаа хэрэгтэй. Үүнд тус улсын Эдийн засгийн хамтын ажиллагаа, хөгжлийн яам чухал үүрэг гүйцэтгэнэ гэдэгт найдаж байгаагаа Ерөнхий сайд хэлэв.

Мөн ХБНГУ-д сурч, мэргэжил, боловсрол эзэмшсэн болон герман хэлээр ярьдаг 35 мянга гаруй монгол иргэнээр дамжуулж хүмүүнлэг, соёл, аялал жуулчлалын салбар, иргэд хоорондын харилцааг хөгжүүлэх боломж ч бий гэж тэрээр үзэж байна. 

Монгол Улс олборлох салбар дахь ил тод байдлыг амжилттай хэрэгжүүлж байгаад ХБНГУ-ын Эдийн засгийн хамтын ажиллагаа, хөгжлийн сайд Дирк Нийбел талархлаа илэрхийлээд манайд үзүүлэх 24,1 сая еврогийн тусламжаа 3 сая еврогоор нэмэгдүүлснээ мэдэгдлээ.

Энэ мөнгийг Ерөнхий сайдын хэлсэнчлэн уул уурхайн компаниудын засаглалыг сайжруулах, боловсон хүчин бэлтгэх, нэмүү өртөг шингэсэн бүтээгдэхүүн үйлдвэрлэх, бичил уурхай, жижиг, дунд үйлдвэрлэлийг хөгжүүлэх зэрэгт зарцуулах нь зүйтэй гэж ХБНГУ-ын тал үзэж байна.Монгол Улс хөгжлийн шинэ, шилдэг бодлого боловсруулж хэрэгжүүлэн амжилтад хүрнэ гэдэгт итгэлтэй байгаагаа сайд Д.Нийбел илэрхийллээ.  
ХБНГУ-ын Эдийн засгийн хамтын ажиллагаа, хөгжлийн сайд анх 1991 онд манай улсад айлчилж байсан юм