Ангилал: мэдээ

Улс орныхоо өнцөг булан бүрт болон хилийн чанадад ажиллаж амьдарч байгаа эх орон нэгт омог бардам, эрхэмсэг монгол ахан дүүсээ!
Улирлын сайхан зунтай зэрэгцэж улсын наадам ирлээ. 2200 гаруй жилийн түүхтэй Монгол төрийн их баяр, Их Монгол улс байгуулсны 804, Ардын хувьсгалын 89 жилийн ойн баярын мэндийг та бүхэндээ хүргэе!
<<Эрүүл явбал улсын наадам үзнэ>> гэсэн их найрагчийн үг бий. Энэ нь улсын наадам бол зөвхөн баяр цэнгэл биш, улсынхаа тусгаар тогтнол, бүрэн эрхт байдал, үндэсний бахархал, монгол омогшлоо дэлхийн нийтэд зарлан тунхаглаж байгаа төрийн ёслол болохыг илтгэсэн гүн утгатай билээ. Энэхүү утга, агуулгыг бүрэн илэрхийлж чадахуйц олон чухал шийдвэрийг Засгийн газар УИХ-тайгаа хамтран гаргасныг энэ баярт өдөр ард түмэндээ дуулгахад таатай байна.

Бид эдийн засгийн ардчиллын суурийг тавьж, Монгол улс төмөр замын бодлогоо өөрсдөө тодорхойлж, Тавантолгойн ордыг ашиглах эрх зүйн орчин бүрдлээ. Энэ бол улсынхаа хөгжлийн төлөө монголчууд бидний хамтдаа гаргасан түүхэн шийдвэр, цаашид хамтдаа бүтээх их хөгжлийн эхлэл гэж ойлгож байна. Тийм ээ, монголчууд бид хамтдаа чадна. “Газрын доорхи баялаг ард түмний өмч байна” гэсэн Үндсэн хуулийн заалт амьдралд хэрэгжиж монголчууд бид Тавантолгойн ордоосоо хувьцаа эзэмших боллоо.

Хүний хөгжил сангаас иргэн бүртээ сар бүр хишиг хувь олгохоор Засгийн газар зорьж байна. Мөн бүртгэлийн төгөлдөршлийг бодитоор хэрэгжүүлэх иргэний шинэчилсэн бүртгэл орон даяар эхэллээ. Бид бахархах зүйл ихтэй ард түмэн билээ. Элэг нэгт, монгол ахан дүүсээ! Нар хур тэгширсэн наадмын сайхан өдрүүдэд идэр чийрэг бөхчүүд маань хүчтэй, эргэмэг шандаст хүлгүүд нь хурдан, цэц магнай  харваачид нь мэргэн байж хотол түмнээрээ сайхан наадаарай. Төрт ёсны их баяр цэнгэл-монгол наадам миний Монголын дөрвөн зүг, найман зовхист ёслол төгөлдөр, сүр жавхлантай болж, айл өрх, хүн бүрт баяр баясгалан бэлэглэх болтугай!

Монгол Улсын Ерөнхий сайд С.Батболд

Монгол Улсын Ерөнхий сайд С.Батболд АНУ-ын нэрт улс төр судлаач, доктор Збигниев Бжезинскиг 2010 оны 7 дугаар сарын 8-ны өдөр хүлээн авч уулзан, хамт үдийн зоог барилаа. Уулзалт, зоогийн үеэр Ерөнхий сайд, З.Бжезински нар олон улсын харилцаа, гадаад бодлого, дэлхийн болон бүс нутгийн аюулгүй байдал, хамтын ажиллагааны талаар харилцан санал бодлоо хуваалцлаа.

Доктор З.Бжезински Ерөнхий сайд С.Батболдын урилгаар Монгол Улсад анх удаа ирээд байгаа бөгөөд Гадаад харилцааны яаманд “Евроази дахь АНУ-ын гадаад бодлого” сэдвээр лекц унших юм. З.Бжезински нь 1976-1981 онд АНУ-ын Ерөнхийлөгч Ж.Картерын Үндэсний аюулгүй байдлын зөвлөхийн албан тушаалыг хашиж байсан билээ. Тэрээр АНУ-БНХАУ-ын харилцаа, хамтын ажиллагааг сэргээхэд чухал хувь нэмэр оруулсан бөгөөд энэхүү зүтгэлийг нь үнэлж 1981 онд АНУ-ын Ерөнхийлөгчийн Эрх чөлөөний одонгоор түүнийг шагнажээ.

Ардын хувьсгалын 89 жилийн ойг тохиолдуулан :
1. Э.Цасчихэр – /Увс аймгийн Засаг дарга/
2. С.Энхбаатар – /Улсын бүртгэлийн ерөнхий газрын орлогч дарга/
3. Г.Ганболд – /Гадаад харилцааны яамны Европын газрын зөвлөх/
4. Б.Батжаргал – /Сангийн яамны Төсвийн бодлогын газрын дарга/
5. Д.Баярмагнай – /ОБЕГ-ын Аврах тусгай ангийн аврагч/
6. С.Одончимэг – /Шүүхийн шинжилгээний үндэсний хүрээлэнгийн шинжээч эмч/
7. Д.Батболд – /БОАЖЯ-ны Гадаад хамтын ажиллагааны хэлтсийн дарга/
8. С.Болдбаатар –  /Зэвсэгт хүчний 256 дугаар ангийн хошууч/
9. А.Цолмон – /БСШУЯ-ны ахлах мэргэжилтэн/ 10. Ж.Бямбадорж  – /Орхон аймгийн “Орхон-Азза” ХК-ийн автогрейдерчин/
11. Ю.Отгонбилэг –  /НХХЯ-ны мэргэжилтэн/
12. П.Ганхуяг – /ХХААХҮЯ-ны Мал аж ахуйн бодлогын хэрэгжилтийг зохицуулах газрын дарга/
13. С.Мөнх-Очир – /“ДЦС IY” ТӨХК-ийн уурын цехийн инженер/
14. Ш.Энхтөр – /ЭНЭШТ-ийн клиникийн захирал/
15. Н.Намжилсүрэн – /Говь-Алтай аймгийн Чандмань сумын малчин/ 
нарыг  Монгол Улсын Засгийн газрын Хүндэт өргөмжлөлөөр шагнасныг Монгол Улсын Ерөнхий сайд С.Батболд 2010 оны 7 дугаар сарын 8-ны өдөр гардуулав. 
Хариуцсан салбар, эрхэлсэн ажилдаа амжилт гаргасан албан хаагчид, иргэдэд Ерөнхий сайд баяр хүргэж ажлын амжилт хүсэв.

Монгол Улсын иргэн, Ерөнхий сайд С.Батболд, Тэргүүн шадар сайд Н.Алтанхуяг нар өнөөдөр иргэний шинэчилсэн бүртгэлд хамрагдлаа. 2010 оны 7 дугаар сарын 5-ны энэ өдөр орон даяар иргэний шинэчилсэн бүртгэл эхэлж байгаа бөгөөд  21 аймгийн 331 сум, 9 дүүргийн 132 хороо буюу нийт 463 нэгжээр дамжуулан бүртгэлд хамруулах юм. Монгол Улсын иргэний шинэчилсэн бүртгэлийн нээлт Төрийн ордонд болж Монгол Улсын Ерөнхий сайд С.Батболд, Тэргүүн шадар сайд Н.Алтанхуяг болон  иргэдийн төлөөлөл оролцлоо.

“Хүний хөгжил сан”-гийн тухай хуулийг хэрэгжүүлж иргэддээ хишиг, хувь болон байгалийн баялгаас олох ашгаа тэгш хүртээх асуудлыг Иргэний шинэчилсэн бүртгэлтэй уялдуулан зохион байгуулахаар Засгийн газраас шийдвэр гаргасан. Одоо Улсын Их Хурлаар хэлэлцэж байгаа Тавантолгойн хувьцааны 10 хувийг ард түмэндээ тараахад иргэний шинэчилсэн бүртгэл гол тулгуур болох учиртай гэж Ерөнхий сайд хэлсэн үгэндээ онцоллоо. Төр, иргэнийг холбосон бүртгэлийн төгөлдөршил бол хөгжлийн нэг гол түлхүүр.

Иргэний шинэчилсэн бүртгэл “Бүртгэлийн нэгдсэн тогтолцоо” бий болгох үндэс суурь нь болно. Төрөөс иргэд, байгууллагад үзүүлэх үйлчилгээг хүртээмжтэй, шуурхай, үр ашигтай, бодитой, тэгш, шударга хүргэх нөхцлийг бүрдүүлэх, байгууллага хоорондын уялдаа холбоог сайжруулах, иргэний эрхийг хамгаалах, үндэсний аюулгүй байдлыг хангах, “Хөгжилтэй улс орон, Бүтээгч ард түмэн” болох үзэл баримтлалын үндэс суурийг бэхжүүлэхэд “Иргэний шинэчилсэн бүртгэл” чухал ач холбогдолтой гэж тэрээр хэлэв.

Төрийн бодлогын нэгдмэл чанарыг хангах, үндэсний аюулгүй байдлыг бэхжүүлэх, улс орны эдийн засгийн өсөлтөд дэмжлэг үзүүлэх, төрийн ой санамжийг бүрдүүлж, нийгмийн бүх салбарыг хамарсан үйлчилгээг хүртээмжтэй, шуурхай хүргэхэд “Иргэний шинэчилсэн бүртгэл”-ийн ажил томоохон түүхэн үүрэг гүйцэтгэх болно гэж Тэргүүн шадар сайд Н.Алтанхуяг хэллээ. Монгол Улсын иргэний бүртгэлийн давхардал, зөрчлийг арилгах зорилгоор Улсын Их Хурлаас  иргэний шинэчилсэн бүртгэл явуулах, үүнтэй холбогдуулан иргэний ухаалаг үнэмлэх олгох суурь дэд бүтэц, иргэний биеийн өгөгдөлд суурилсан мэдээллийн нэгдсэн сан бий болгохыг Засгийн газарт даалгасан юм.

Энэ хүрээнд иргэдийн төрсний, иргэний үнэмлэхний болон байнга оршин суугаа газрын бүртгэлийг баталгаажуулж, мэдээллийн нэгдсэн сантай болсноор төрийн байгууллагууд ч хоорондоо мэдээллээ шуурхай солилцох боломж бүрдэх юм. Иргэний шинэчилсэн бүртгэлд хамрагдах 16-аас дээш насны иргэн иргэний үнэмлэх, төрсний гэрчилгээтэйгээ харъяа сум, хороондоо очин, зургаа даруулж хурууны хээгээ өгөх ёстой. Харин 16 нас хүрээгүй хүүхдийг эцэг эх, асран хамгаалагч нь хариуцан бүртгэлд хамруулна гэж Засгийн газрын Хэвлэл, мэдээллийн албанаас мэдээллээ.

Монгол Улсын Ерөнхий сайд С.Батболд 2010 оны 7 дугаар сарын 2-ны өдөр УИХ-ын Нийгмийн бодлого, боловсрол, соёл, шинжлэх ухааны Байнгын хорооны дарга Д.Арвин, Эрүүл мэндийн сайд С.Ламбаа, Нийслэлийн Засаг дарга бөгөөд Улаанбаатар хотын захирагч Г.Мөнхбаяр нарыг хүлээн авч уулзав. Ерөнхий сайд амаржих газруудын үйл ажиллагаа, тулгарч байгаа хүндрэлтэй танилцан цаашид авах арга хэмжээний талаар санал солилцсон байна.

2010 оны 1 дүгээр сард Нэгдүгээр амаржих газарт нярайн халдвар гарсны улмаас үйл ажиллагааг нь зогсоон эхчүүдийг Эх нялхсын эрдэм шинжилгээний төв, Хоёрдугаар амаржих газар, “Хатагтай”, “Таны төлөө бид” эмнэлэгт шилжүүлсэн. Ерөнхий сайд С.Батболд тухайн үед газар дээр нь байдалтай танилцан их засварт шаардлагатай 2,1 тэрбум төгрөгийг Засгийн газрын хуралдаанаар хэлэлцэн шийдсэн юм. Ингэснээр Нэгдүгээр амаржих газар 6 дугаар сарын 18-наас эхчүүдээ хүлээн авч ажиллаж байна.

Цаашид нэг, хоёр, гуравдугаар амаржих газрын барилгыг өргөтгөж 4 дүгээр төрөх газрыг шинээр барихаар төлөвлөж байна. Үүнд нийт 19 тэрбум төгрөг шаардлагатай бөгөөд төсөвт тусгагдсан хөрөнгөөс гадна бусад эх үүсвэр ашиглан ажлаа эрчимжүүлэхийг Ерөнхий сайд С.Батболд салбарын яам, хотын удирдлагад үүрэг болголоо. 4 дүгээр амаржих газрыг хаана барих зэрэг асуудлыг одоогоор эцэслэн шийдээгүй байна гэж Засгийн газрын Хэвлэл, мэдээллийн албанаас мэдээллээ.

Монголын худалдаа аж үйлдвэрийн танхимын 50 жилийн ойн баярын хурал, хүндэтгэлийн ажиллагаанд оролцсон Монгол улсын Ерөнхий сайд ингэж онцоллоо. Ачааны хүндийг үүрч яваа эрхэм бизнесмэнүүдэд Засгийн газар ээлтэй орчин бүрдүүлэхээр чармайж, энэ жилийг “ Бизнесийн орчны шинэтгэлийн жил” болгон зарлаад зургаан сар өнгөрч байна. Бизнесийн орчны хүнд суртлыг арилгаж, цогцоор нь шинэчлэхээр Засгийн газар зорин ажиллаж байгаа.  Гэхдээ энэ ажлыг санасанчлан хурдтай явуулах хэрэгтэй байгааг Ерөнхий сайд тэмдэглээд, төр засгийн зүгээс гадна эрхэм бизнесмэнүүдийн хүчин чармайлт маш чухал шүү гэдгийг сануулж байсан юм. Өөрөөр хэлбэл бизнесийн байгууллага төрийн аппаратыг шахаж ажиллах ёстой гэдгийг зөвлөж байлаа.

Засгийн газраас юуны өмнө бизнес эрхлэхэд тохиолддог бичиг цаасны хүнд суртлыг арилгахаар цөөнгүй  алхам хийж байгаагийн нэг нь өчигдөр зохион байгуулсан “ Аж ахуйн үйл ажиллагаа эрхлэх зөвшөөрлийн тогтлолцооны шинэтгэл” сэдэвт хэлэлцүүлэг байсан гэдгийг гүйцэтгэх засаглалын тэргүүн тэмдэглэж байсан. Чөлөөт зах зээлд шилжээд даруй 20-иод жил өнгөрч байгаа ч түүнээс олон жилийн өмнө баталсан дүрэм журам өдий болтол мөрдөгдөж байсныг  Үйлдвэр худалдааны сайд байхдаа “ илрүүлж”,  200 орчим тушаал шийдвэрийг урж байсан аж. Гэтэл  үүнээс хойш  эдгээр тушаал хорогдох биш, эргээд хэд дахин нэмэгдсэнд Ерөнхий сайд сэтгэл дундуур байгаагаа нуусангүй.

Тиймээс  үүнд илүү анхаарлаа хандуулж, хэлэлцүүлэг зохион байгуулж бичиг цаасыг багасгах  үүрэг бүхий ажлын хэсэг байгуулснаа  энэ үеэр мэдээлж байлаа. Дэлхийн улс  орнуудад Гилльотиний  буюу тас цавчих зарчим өргөн хэрэглэгддэг аж.  Араас хөөж тас цавчих ийм аргыг БНСУ  хэрэгжүүлснээр хэрэггүй тушаал шийдвэрийнхээ 48 хувийг халж чадсан байхад Австрали улсад бизнесийг шинээр эхлэхэд ердөө л нэг хонодог гэх жишээг Ерөнхий сайд дурьдаж байв. Ийм зарчмаар ажиллах Ерөнхий сайдын байгуулсан ажлын хэсэг  хичнээн тушаал, шийдвэр “ цавчсанаа” ирэх 12 дугаар сард тайлагнана. Энэ бол бодит ажил болно гэдэгт Засгийн газрын тэргүүн итгэлтэй байгаагаа тэмдэглэж байсан.

Бизнесийн орчны шинэтгэлийн жил маань зарласан он жил биш, бодит үр дүнтэй жил байх ёстой гэдгийг тэрбээр сануулаад, нэг хоёр компаний эрх ашигт биш нийт бизнес эрхлэгчдэд ээлтэй, төр болоод хувийн хэвшлийнхний харилцаа  нээлттэй ил тод  болоход эрхэм бизнес эрхлэгчдийн санаачилга тун чухал. “Тийм болохоор та бүхэн  идэвхтэй ажиллаарай “ хэмээн хүндэтгэлийн арга хэмжээнд оролцсон бизнесмэнүүдэд  уриаллаа гэж Засгийн газрын хэвлэл мэдээллийн албанаас мэдээллээ.

Монгол улсын Засгийн газраас энэ оныг бизнесийн орчны  шинэтгэлийн жил болгон зарласан билээ. Энэ ажлын хүрээнд Засгийн газраас тодорхой ажлууд хийж эхэлсний нэг нь өнөөдөр төрийн ордонд болсон “ Аж ахуйн үйл ажиллагаа эрхлэх зөвшөөрлийн тогтлолцооны шинэтгэл” сэдэвт хэлэлцүүлэг байв. Тус хэлэлцүүлэгийг Засгийн газар олон улсын санхүүгийн корпорацитай хамтран зохион байгуулж байгаа юм.

Хэлэлцүүлгийг нээж  Монгол  улсын Ерөнхий сайд С.Батболд үг хэлсэн. Тэрбээр Үйлдвэр худалдааны сайдаар ажиллаж байхдаа төрийн хүнд суртлыг багасгах, аж ахуй эрхлэх үйл ажиллагааны эрх зүйн орчныг сайжруулах, хуучирсан олон дүрэм, журмыг хүчингүй болгох цөөлөх, хувийн хэвшлийн бүтээлч үйл ажиллагааг төрөөс бодитойгоор эхлүүлэх үйл ажиллагааг эхлүүлж байсан юм. Ерөнхий сайд ийнхүү өмнөх туршлага дээрээ үндэслэн  2010 оныг бизнесийн орчны шинэтгэлийн жил болгон зарлаж энэ хүрээндээ бүхий салбаруудад аж ахуйн үйл ажиллагаанд зөвшөөрөл олгох, түүнийг зохицуулж байгаа хууль тогтоомж, эрх зүйн бусад актыг хянан үзэж боловсронгуй болгох үүрэг бүхий ажлын хэсгийг Монгол улсын шадар сайдаар ахлуулан байгуулж байгаагаа энэ үеэрээ тэмдэглэн хэллээ.

Мөн тэрбээр Засгийн газар Цахим гарын үсгийн тухай хуулийн төслийг шинээр боловсруулж байгаа тухай, Нотариатын тухай хуульд өөрчлөлт оруулж байгаа тухай мэдээллээ. Барилгын салбарт тусгай зөвшөөрөл олгох үйл ажиллагааг нэг цэгийн горимд шилжүүлэх, зөвшөөрлийн тоог бууруулах тал дээр ажиллаж байгаа, эд хөрөнгийн бүртгэлийг онлайн болгох, үйлчилгээний хөлсний хэмжээг бууруулж 128 нэр төрлийн үйлчилгээнд хураамж авч байгааг багцалж 53 болгож байгаа аж. Тухайлбал 20 нэр төрлийн хураамж байсныг нэгтгэн найм болгон багасгах, үл хөдлөх эд хөрөнгийн бүртгэлийн үйлчилгээний хөлсийг 50 хувь бууруулж 0.05 хувь болгох зарим үйлчилгээг хураамжгүй болгож байгаа гэх мэт сонирхолтой баримтуудыг дурдаж байсан.

Ерөнхий сайд С.Батболд энэ оны наймдугаар сард багтан яам агентлаг болон төрөөс зөвшөөрөл олгох зайлшгүй шаардлагатай үйл ажиллагааны жагсаалт гаргаж ажлын хэсэгт ирүүлэх, эдгээр зөвшөөрлийн мэдэээллийг яамдын төрийн нарийн бичгийн дарга нар Засгийн газарт ирэх аравдугаар сард багтаан танилцуулахыг энэ үеэр үүрэг болгож байгаагаа хэлсэн. Хэрэв заасан хугацаанд мэдээлэл ирэхгүй бол зөвшөөрлийг хүчингүйд тооцох тухай ч сануулаад авсан юм. Мөн жагсаалтад орсон эдгээр зөвшөөрлүүд шаардлагатай эсэхийг дахин нягтлах үүргийг Хууль зүй дотоод хэргийн яаманд бас өгсөн.

Хэлэлцүүлгийн үеэр БНСУ-ын Хон-Ик их сургуулийн профессор Жон Сок Ким, Олон улсын санхүүгийн корпорацийн менежэр Тарик Сахович нар Солонгос болон  Зүүн европын улс орнуудын  туршлагыг жишээн дээр тулгуурлан ярьж байлаа. Мөн Шинэтгэлийг хэрэгжүүлэх ажлын зохион байгуулалтын талаар Засгийн газрын хэрэг эрхлэх газрын дарга  Ч.Хүрэлбаатар  мэдээлэл хийв. Хэлэлцүүлгийн дараа тэд сэтгүүлчдийн сонирхсон асуултад хариуллаа.

Хатагтай ноёдоо,
Зочид төлөөлөгчидөө,

Энд хуран цугласан та бүхний энэ өглөөний амрыг эрэн мэндчилье. Энэхүү уулзалт, хэлэлцүүлгийг Монгол Улсын засгийн газартай хамтран зохион байгуулж байгаа Олон улсын санхүүгийн корпорацид талархлаа илэрхийлье.

Төрийн зохицуулалтыг оновчтой болгох үйл ажиллагаа тасралтгүй явагдах ёстой процесс юм. Шинэ төрлийн аж ахуйн үйл ажиллагаа, салбарууд байнга үүсч хөгжин техник, технологи үсрэнгүй шинэчлэгдэж, бизнесийн цар хүрээ улам өргөжиж байхад хуучин хууль, дүрэм, стандарт, төрийн зохицуулалтын арга хэрэгсэлүүд амьдралаас хоцорч, хөгжлийн саад бэрхшээл болж хувирдаг тохиолдол олон байна. Хэдийгээр бид нийгэм, эдийн засгийг шинэчлэж, чөлөөт зах зээлд шилжих шилжилтийг эхлүүлээд 20 жил болж байгаа ч түүнээс олон жилийн өмнө баталсан, төлөвлөгөөт эдийн засгийн үед ч хэрэглэж байсан зарим дүрэм, журам, заавар одоо болтол хүчингүй болоогүй л байна.

Гэтэл энэ хугацаанд амьдрал хэрхэн өөрчлөгдсөнийг бид бүхэн сайн мэдэж байгаа учир бизнесийн орчныг зоригтой шинэчлэх, амьдралд нийцүүлэх, хөгжилтэй орнуудын түвшинд ойртуулж боловсронгүй болгох шаардлагатай байгаа юм. Өнөөгийн даяаршсан дэлхийд бизнес эрхлэх орчин боловсронгүй байх нь аливаа улс орны өрсөлдөх чадвар, цаашилбал түүний хөгжил, амьжиргааны түвшинг тодорхойлдог амин чухал үзүүлэлт, шалгуур болоод байна.  Иргэдийн амьжиргааг хангалуун байлгах, ажлын байрыг нэмэгдүүлэх, цалин орлого, бүтээмжийг нь өндөр байлгахын тулд хувийн хэвшлийн үйл ажиллагааны зохицуулалт, шинэчлэлтийг уян хатан, алсыг харсан бодлоготой, зоригтой хийх шаардлагатай юм.

Дэлхийн олон улс оронд бидэнтэй адил саад бэрхшээл тулгардаг бөгөөд түүнийг шийдвэрлэсэн сайн туршлага, ололт амжилт, үлгэр жишээ авах зүйл их байна. Тухайлбал, Австрали улсад бизнесийг шинээр эхлэхэд ердөө 1 хоногийн дотор 2 алхамаар л компанийг байгуулж байна. Зах зээлийн эдийн засагт эргэлт буцалтгүй орсон манай улс хууль, эрх зүйн орчин, бизнесийн дүрэм, журмаа боловсронгүй болгож, хувийн хэвшлийн бүтээлч үйл ажиллагааг дэмжиж хөгжих зайлшгүй шаардлагатй тулгараад байна.  Монгол Улсын өрсөлдөх чадварыг сайжруулах, бизнес эрхлэх зардлыг бууруулахын тулд бид төрийн зохицуулалтын дэлхийн тэргүүний стандартыг нэвтрүүлж байж бид Монгол Улсаа хөгжүүлнэ.

Иймээс хөгжлийн хөдөлгүүр болсон хувийн хэвшлийн үйл ажиллагааг хурдасгаж идэвхижүүлэхийн тулд миний бие Үйлдвэр Худалдааны сайдаар ажиллаж байхдаа 2005 оноос төрийн хүнд суртлыг багасгах, аж ахуй эрхлэх үйл ажиллагааны эрх зүйн орчинг сайжруулах, хуучирсан олон дүрэм, журмыг хүчингүй болгох, цөөлөх, хувийн хэвшлийн бүтээлч үйл ажиллагааг төрөөс бодитойгоор дэмжих үйл ажиллагааг эхлүүлж байсан. Зах зээл байнга хөгжиж байдаг тул төрийн зохицуулалтыг боловсронгүй болгох үйл ажиллагаа мөн тасралтгүй явагдаж байх естой.

Ийнхүү тусгай зөвшөөрлийг цөөрүүлэх, төрийн байгууллагуудын хүнд суртлыг багасгах, хуучирч хоцрогдсон хууль, тогтоомж, дүрэм, журмуудыг хүчингүй болгох өмнөх туршлагтаа үндэслэн Монгол Улсын Засгийн газар 2010 оныг “Бизнесийн орчны шинэтгэлийн жил” болгон зарласан бөгөөд энэ жилийн хугацаанд бүхий салбаруудад аж ахуйн үйл ажиллагаанд зөвшөөрөл олгох, түүнийг зохицуулж байгаа хууль, тогтоомж, эрх зүйн бусад актыг хянан үзэж боловсронгуй болгох үүрэг бүхий ажлын хэсгийг Монгол Улсын Шадар сайдаар ахлуулан байгуулж, удирдамжийг нь батлан ажиллаж байна.

Манай Засгийн газраас санаачилан Цахим гарын үсгийн тухай хуулийн төслийг шинээр боловсруулж, Нотариатын тухай хуулийн шинэчилсэн найруулгын төсөлд хуулийн этгээдийг үүсгэн байгуулж улсын бүртгэлд бүртгүүлэх өргөдлийн маягтыг нотариатаар сайн дураараа батлуулдаг байхаар нэмэлт, өөрчлөлт оруулахаар, Компанийн тухай хуульд “Хуульд өөрөөр заагаагүй бол хязгаарлагдмал хариуцлагатай компанийг бүртгэх өдөр түүний өөрийн хөрөнгө нь эрх бүхий байгууллагаас гаргасан компани байгуулах шийдвэр, компанийн дүрэмд заасан хэмжээнд байхаар” өөрчлөлт оруулахаар, улсын бүртгэлд бүртгүүлэхэд шаардагдах баримт бичгүүдийг онлайн хэлбэрт шилжүүлж, нэг цэгийн үйлчилгээгээр болгохоор ажиллаж байна.

Мөн барилгын салбарт тусгай зөвшөөрөл олгох үйл ажиллагааг нэг цэгийн горимд шилжүүлэн, зөвшөөрлийн тоог бууруулах талаар ажиллаж байна. Эд, хөрөнгийн эрхийн бүртгэлийн мэдүүлгийг онлайн болгох, үйлчилгээний хөлсний хэмжээг бууруулж 128 нэр төрлийн үйлчилгээнд хураамж авч байгааг багцалж, нэгтгэн 53 үйлчилгээ болгон багасгасан. Тухайлбал, 20 нэр төрлийн хураамж байсныг нэгтгэн 8 болгон багасгах, үл хөдлөх эд хөрөнгийн бүртгэлийн үйлчилгээний хөлсийг 50 хувь бууруулж 0,05 хувь болгох, зарим үйлчилгээг хураамжгүй болголоо. Хэдийгээр бизнесийн орчинг сайжруулах ажил явагдаж байгаа ч үүнийг эрчимжүүлэх талаар төрийн байгууллагууд, яам, агентлагуудын идэвхи, санаачилга хангалттай биш байна. Хууль, эрх зүйн орчинг боловсронгүй болгох, дүрэм журмыг цэгцлэх, хүнд суртлыг бууруулах тал дээр хэсэгчилсэн бус, бүх байгууллагуудад цогц ахиц, дэвшлийг гаргах хэрэгтэй байна.

Иймээс нэгдүгээрт, 2010 оны 8-р сард багтаан яам, агентлаг болгон төрөөс зөвшөөрөл олгох зайлшгүй шаардлагатай үйл ажиллагааны жагсаалтыг гаргаж холбогдох ажлын хэсэгт ирүүлэхийг;

Хоёрдугаарт, зайлшгүй шаардлагатай гэж үзэж байгаа зөвшөөрлийн мэдээллийг холбогдох яамдын төрийн нарийн бичгийн дарга нарт Засгийн газарт 2010 оны 10-р сард багтаан танилцуулах; мэдээллийг заасан хугацаанд ирүүлээгүй тохиолдолд зөвшөөрлийг хүчингүйд тооцохыг;
  
Гуравдугаарт, жагсаалтанд орсон зөвшөөрлүүд шаардлагатай эсэхийг 2010 оны 12-р сард багтаан нягтлахыг ХЗДХЯ-нд даалгаж зөвхөн шаардлагатай зөвшөөрлийн жагсаалтыг батлаж, бусдыг нь хүчингүй болгох шийдвэрийн төслийг Засгийн газарт танилцуулах, тухайн үйл ажиллагаа нь Үндсэн хууль болон бусад хууль тогтоомжид заасанчлан нийтийн ашиг сонирхол, хүний эрүүл мэнд, хүрээлэн байгаа орчин, улс орны аюулгүй байдалд хохирол учруулж болзошгүй, тодорхой нөхцөл, нарийн мэргэжил шаардахгүй тохиолдолд төрөөс зөвшөөрөл олгох шаардлагагүй гэсэн чиглэл баримтлах үүрэг өгч байна.
  
Засгийн газрын тэргүүний хувьд бизнесийн орчны шинэтгэлийн жилийн төлөвлөгөөний зорилтуудыг, түүний дотор төрөөс олгох зөвшөөрлийн жагсаалтыг тоог цөөрүүлж батлуулах ажлыг, холбогдох яам, байгууллагуудын удирдлагууд даалгавар болгосон цаг хугацаанд биелүүлэхийг өөрийн албан тушаалаар шууд хариуцахыг мэдэгдье.

Хэлэлцүүлгийн үйл ажиллагаанд амжилт хүсье.
Анхаарал тавьсанд баярлалаа.