Ангилал: мэдээ-мэдээлэл

Монгол Улсын Ерөнхий сайд С.Батболд 2012 оны 5 дугаар сарын 3-ний өдөр манай улсад анх удаагаа айлчилж байгаа Дэлхийн мал амьтны эрүүл мэндийн байгууллагын ерөнхий захирал Бернард Валлаг хүлээн авч уулзлаа. Мал аж ахуй салбар нь манай улсын эдийн засгийн гол тулгуурын  нэг төдийгүй дотоодын нийт бүтээгдэхүүн, хөдөлмөр эрхлэлт, экспортын орлогод голлох  байр суурь эзэлдэг. Тийм ч учраас Монгол Улсын Засгийн газар хүнс, хөдөө аж ахуй, хөнгөн үйлдвэрийн салбарыг дэмжсэн бодлогыг тууштай хэрэгжүүлж байгааг Ерөнхий сайд С.Батболд уулзалтын эхэнд тэмдэглэлээ. Энэ хүрээнд малчдыг мэргэшүүлэх, мал сүргийн эрүүл мэндийг хамгаалах, вакцинжуулах бодлогыг тэргүүн зорилтоо болгож, “Төрөөс малчдын талаар баримтлах бодлого”, “Монгол мал” үндэсний хөтөлбөр, “Таван эрдэнэ”  зэрэг томоохон арга хэмжээг орон даяар  авч хэрэгжүүлж байгаагаа дуулгаад цаашид энэ чиглэлээр дэлхийн олон улсын байгууллагуудтай  хамтран ажиллахын чухлыг онцоллоо.

Үүний дотор мал сүргийг өвчин, эмгэгээс эрүүлжүүлэх бодлогыг нэн тэргүүний зорилт болгон дэвшүүлж, баруун бүсийг эрүүл бүс нутгийн статуст хамруулан, олон улсын түвшинд зарлах ажлыг Дэлхийн мал, амьтны эрүүл мэндийн байгууллага ойрын хугацаанд судлаж, шийдвэрлэнэ гэдэгт илтгэлтэй байгаагаа Засгийн газрын тэргүүн энэ үеэр  илэрхийллээ. Ноён Бернард Валла энэ үеэр  “Өнөөдөр дэлхийн нийт байгалийн гаралтай цэвэр бүтээгдэхүүн хэрэглэхийг эрмэлзэх болсон. Энэ ч утгаараа ориганик бүтээгдэхүүн үнэд орж байгаа энэ үед махыг эрүүлжүүлэх, эрүүл, цэвэр бүтээгдэхүүнийг дэлхийн зах зээл дээр гаргах асуудлаар манай байгууллага Монгол Улстай хамтран ажиллах сонирхолтой байна гэлээ.

Мөн тэрээр энэ оны 08 дугаар сард Дэлхийн мал, амьтны эрүүл мэндийн байгууллага өөрсдийн шинжээчдээ илгээж, баруун бүсийг эрүүл бүс болгон зарлах асуудлыг эцэслэнэ гэдгээ дуулгалаа. Түүнчлэн мал эмнэлгийн албаны бүтэц тогтолцоог боловсронгуй болгох, нийгмийн эрүүл мэндийг хамгаалах, хүнсний аюулгүй байдлыг хангахад Монгол Улсын Засгийн газар өндөр ач холбогдол өгч ажиллаж байгаад баяртай байна гэлээ.

Аливаа үе өөрийн сорилт боломжийг даван туулдаг, бидний үе шилжилтийн 20 жилийн гол ачааг нуруундаа үүрэн явж байгаа бол та  бүхний өмнө ардчилал зах зээлийн хоёр дах үе болох хөгжлийн тодорхой үеийг үүрэх хариуцлагатай цаг иржээ. Өөрөөр хэлбэл Монгол улсын эдийн засгийн хөгжил 17 хувийг даван яваа хамгийн хурдтай, хамгийн өндөр боломж руу чиглэж яваа энэ үед та бүхний өмнө энэ боломжийг бодит болгох ийм хариуцлагатай үе ирж байна гэдгийг Монгол улсын Ерөнхий сайд С.Батболд Монголын оюутны холбооноос зохион байгууулсан оюутнуудын чуулга уулзалтад оролцохдоо онцлон тэмдэглэлээ. Амралтын өдөр  буюу 2012 оны тавдугаар сарын 5-ны өдөр төрийн их танхимдаа  ирээдүйн боловсон хүчнүүд  ийн чуулсан бөгөөд өндөр хөгжлийн энэ торгон  агшинд залуучуудынхаа үгийг сонсч, Засгийн газартаа зөвлөмж өгч байгааг гүйцэтгэх засаглалын тэргүүн талархаж байлаа.

Монгол улсын хөгжил дэвшлийн олон боломж нөхцөлүүдийг ажил хэрэг болгох зүйл нь  өрсөлдөх чадвартай  Монгол толгой өөрөө юм гэдгийг тэрбээр онцлоод, оюутнуудын өмнө тулгарч байгаа нийгмийн олон асуудлыг Засгийн газар шийдэж байгааг ч энэ үеэр дурьдлаа. Түүнчлэн төрийн оролцооны зарим чиг үүргийг Монголын оюутны холбоонд шилжүүлэх боломжтойг, мөн тэдний байрны асуудлыг  шийдэхээр болсон нь оюутнууддаа барьсан бэлэг байв. Мөн энэ чуулга уулзалтын үеэр Ерөнхий сайд С. Батболд 2011-2012 оны хичээлийн жилд сурлага, урлаг спортоор үеийнхнийгээ манлайлсан 46 оюутанд өөрийн нэрэмжит тэтгэлгээ гардуулсан нь тэдэнд барьсан дараагийн  баярт мэдээ байлаа. МУИС-ийн оюутан Л.Лхагва-очир, ЭМШУИС-ийн оюутан Г.Мөнхтуул, “Ач” дээд сургуулийн оюутан Ц.Булган, СЭЗДС-ийн оюутан Э.Буянхишиг, Ховд Их сургуулийн оюутан Ц.Жаргалмаа, “Мандах бүртгэл” дээд сургуулийн оюутан Г.Хандсүрэн нарын  улсын болон хувийн их сургуулийн хот хөдөөгийн салбарын оюутнууд Засгийн газрын тэргүүнийхээ нэрэмжит тэтгэлгийг  ийн хүртэж, тус бүр 800 мянган төгрөгийг гардан авлаа.

1000 оюутныг хамарсан тус чуулга уулзалт “ Манлайлал-Оролцоо- хөгжил” сэдвээр болж, Монгол улсын Ерөнхий сайдын ивээл дор   зохион байгуулагдсан юм. Дөрвөн үндсэн сэдвээр салбар хуралдаанаа хийж, гарсан санал санаачилгыг нэгтгэн Монголын нийт оюутан суралцагчдад  илгээлт болон танилцуулахаас гадна  Засгийн газарт зөвлөмж болгон  хамтран ажиллах ажээ. Оюутан суралцагчдын нөөц бололцоонд тулгуурлах байгаль хамгаалах үндэсний Эко аян өрнүүлэх, сургалтын төлбөр сургалтын чанар шууд хамааралтайгаар өсдөг байх тогтолцоог бүрдүүлэх, эзэмшиж буй мэргэжлийн чиглэлийн дагуу  цалинтай дадлага, цагийн ажил хийх боломж бүрдүүлэх, оюутан суралцагчдын нийгэм дэх нэр хүндийг өсгөх зорилгоор сар бүрийн нэг өдрийг “Оюутны хөдөлмөрийн өдөр” болгон зарлаж, нийгэмд тустай бүтээлч ажлыг хийх, төрийн алба эрхлэх хүсэл эрмэлзэлтэй залуучуудыг цэргийн жинхэнэ албанд бэлтгэх, уул уурхайн орлогын хуваарилалтыг боловсронгуй болгож халамжийн тогтолцоог хязгаарлан номын сан, эрдэм шинжилгээний лаборатори зэрэг оюунлаг бодит хөрөнгө оруулалт руу чиглүүлэх, оюутан суралцагчдыг  хүү багатай зээлд хамруулж бизнес хийх боломжоор хангах зэрэг санал санаачилгууд уг чуулга уулзалтаас гарсан байна гэж Засгийн газрын Хэвлэл, мэдээллийн албанаас мэдээллээ.

Дэлхийн хэвлэлийн эрх чөлөөний өдрийг тохиолдуулан Монголын нийт сэтгүүлч, хэвлэл мэдээллийн байгууллагын ажилтан, ажиллагсад Та бүхэнд Монгол Улсын Засгийн газрын нэрийн өмнөөс болон хувиасаа чин сэтгэлийн мэндчилгээ дэвшүүлье. 

ЮНЕСКО-гийн Ерөнхий Ассемблейн 1991 онд ху­ралдсан чуулганаас гаргасан зөвлөмжийн дагуу 1993 онд НҮБ-ын Ерөнхий Ассемблейгаас жил бүрийн 5 дугаар сарын 3-ныг “Дэлхийн хэвлэлийн эрх чөлөөний өдөр” хэмээн тунхагласнаас хойш дэлхийн өнцөг булан бүрт ажиллаж буй сэтгүүлчид энэ өдрийг өргөн тэмдэглэж заншжээ. Хэвлэлийн эрх чөлөөний мөн чанарыг ухамсарлах, мэргэжлийн ёс зүйгээ дээдлэх ёстойг сануулах зорилго бүхий энэ өдрөөр Монголын сэтгүүлчид ч мэргэжил нэгт дэлхийн андуудтайгаа дуу хоолойгоо хүчтэй нэгтгэж ирлээ. Дэлхийн хэвлэлийн эрх чөлөөний өдрийг энэ жил “ШИНЭ ДУУ ХООЛОЙ: Хэвлэлийн эрх чөлөө нийгмийн өөрчлөлтөд хувь нэмэр оруулах нь” сэдвийн дор тэмдэглэж орон орны ган үзэгтнүүд нэгдэж байна.

Монгол Улсын Засгийн газар хэвлэлийн эрх чөлөөг хангах, хараат бус сэтгүүл зүйг жинхэнэ утгаар нь хөгжүүлэхийн төлөө хэвлэл мэдээллийн салбарын бүхий л байгууллагуудтай нээлттэй, ил тод  хамтран ажиллаж байна. Монгол Улсын Засгийн газраас Мэдээллийн ил тод байдал ба мэдээлэл авах эрхийн тухай хуулийг санаачлан УИХ-аар 2011 онд батлууллаа. Мөн Хэвлэл мэдээллийн эрх чөлөөний тухай хуулийн шинэчилсэн найруулгын төслийг УИХ-д өргөн барьсан бөгөөд чуулганаар хэлэлцэх асуудлын жагсаалтад багтаад байна. Энэхүү хуулийн төслийг ойрын хугацаанд батлан гаргах нь хэвлэл мэдээллийн салбарын үйл ажиллагаа, цаашдын хөгжилд ихээхэн хувь нэмэртэй юм. Энэчлэн ард түмний дуу хоолой, чөлөөт индэр болсон дөрөвдэх засаглалаа улам хөгжүүлэх, эрх зүйн орчныг нь боловсронгуй болгохын төлөө төр, засгийн зүгээс анхааран ажиллаж байна.

Монгол оронд чөлөөт хэвлэл хөгжиж, хэвлэлийн салбар өргөжиж, дөрөвдэх засаглалынхаа үүргийг нэр төртэйгээр биелүүлж ирсэн. Гэсэн ч олон улсын байгууллагын дүгнэлтээр манай улс хэвлэлийн хагас эрх чөлөөтэй орны тоонд багтсан хэвээр байна. Ардчилал, эрх чөлөөний хэмжүүр болсон чөлөөт хэвлэлийн дархлааг бэхжүүлж, хэвлэл мэдээллийн “Бүрэн эрх чөлөөтэй” улс хэмээн бардам хэлэх өдрийг бэлгэдэн Дэлхийн хэвлэлийн эрх чөлөөний өдрийн мэндийг хүргэе.   

Ёс зүйтэй чөлөөт хэвлэл улам хөгжиж, сэтгүүлч Та бүхний үг үнэн, үзэг хурц байх болтугай.

         Монгол Улсын Ерөнхий сайд Сүхбаатарын Батболд

2012-05-03

~ Засгийн газрын ээлжит хуралдаан 2012 оны 05 дугаар сарын 02-ны өдөр боллоо. Энэ өдөр “Эрдэнэс Тавантолгой” компанийн хувьцааг худалдах, төмөр зам барих, говийн бүс дэх бүтээн байгуулалтын ажлыг эрчимжүүлэх зэргийн талаар хэлэлцэн шийдвэр гаргасан байна ~

“Эрдэнэс Тавантолгой”ХК-ийн хувьцааг иргэдэд эзэмшүүлэх, аж ахуйн нэгжид худалдахтай холбогдуулан авах зарим арга хэмжээний талаар Нийгмийн хамгаалал, хөдөлмөрийн сайд Т.Ганди танилцууллаа. Энэ дагуу хувьцаагаа Засгийн газарт нэрлэсэн үнээр худалдах иргэдийн хүсэлтийг 05 дугаар сарын 20-ны өдрөөр тасалбар болгон хүлээн авах болсон байна. Энэ хугацаанд хувьцаагаа худалдах хүсэлт гаргаагүй иргэд болон бэлэн мөнгө хэлбэрээр 1 сая төгрөгийн хишиг, хувиа хүртэх хүсэлт гаргаагүй ахмад настан, хөгжлийн бэрхшээлтэй хүүхэд, иргэдийг хувьцаа авах хүсэлтэй гэж тооцох боллоо. Хувьцаагаа худалдах иргэдийн судалгааг 06 дугаар сарын 01-ний дотор гаргахыг сайд Т.Гандид даалгалаа. Хувьцаа худалдахтай холбоотой мэдээллийг хэвлэл, мэдээллийн бүх хэрэгслээр олон нийтэд зарлан таниулах юм байна.

ТӨМӨР ЗАМЫН СУУРЬ БҮТЭЦ БАРИХ ГЭРЭЭНД ӨӨРЧЛӨЛТ ОРУУЛЛАА

“Сайншанд-Тавантолгой-Ухаахудаг” чиглэлийн төмөр замын суурь бүтцийг барих, ашиглах, төрийн өмчид шилжүүлэх концессын гэрээ болон  “Ухаахудаг-Гашуунсухайт” чиглэлийн төмөр замын суурь бүтэц барих тусгай зөвшөөрөл эзэмшигчтэй байгуулсан гэрээнд нэмэлт өөрчлөлт оруулахтай холбоотой асуудлыг хэлэлцээд зарчмын хувьд дэмжлээ. Энэ дагуу холбогдох сайд, агентлагын дарга нар холбогдох хууль, тогтоомжид нийцүүлэн гэрээ байгуулах үүрэг хүлээсэн байна. Мөн төмөр замын суурь бүтэц барих, ашиглах хугацаанд төрийн мэдлийн 51 хувийг төлбөртэй болон гэрээний хугацаа дууссаны дараа төлбөргүйгээр төрийн өмчид шилжүүлэх, үндэсний хөрөнгө оруулагчид хөрөнгө оруулж хамтран ажиллах боломжоор хангах, хувьцааны тодорхой хувийг Хөрөнгийн биржээр дамжуулан иргэдэд нээлттэй арилжаалах асуудлыг дээрх гэрээнүүдэд тусгахаар боллоо.

ЗАСГИЙН ГАЗАР ГОВИЙН БҮСИЙН БҮТЭЭН БАЙГУУЛАЛТЫН АЖЛЫГ ЭРЧИМЖҮҮЛНЭ

Тавантолгой, Оюутолгой орчмын газарт байгаль орчны үнэлгээ хийх ажлыг эрчимжүүлж, тухайн бүс нутгийн малчдын өвөлжөө, хаваржаа нь уул уурхайн эдэлбэр газарт орсон тохиолдолд нөхөн олговор олгох асуудлыг судлан, эрх зүйн орчин бүрдүүлэхийг холбогдох сайд нарт Засгийн газрын хуралдаанаас даалгалаа. Мөн түүхий нүүрс, төмрийн хүдэрт экспортын татвар ногдуулах санал боловсруулж шийдвэрлүүлэх, “Замын-Үүд” боомтын ачааны автомашины шалган нэвтрүүлэх цогцолбор, зам талбайн өргөтгөл болон цогцолбороос гаалийн рентген хяналтын талбай хүртэлх 2.3 км хатуу хучилттай замыг энэ оны эхний хагас жилд багтаан ашиглалтад оруулахыг үүрэг болгожээ.

“Замын-Үүд” боомтод авто тээврийн хөдөлгөөн нэлээд түгжирдэг байна. Иймээс хяналт шалгалт явуулах талбайг өргөтгөх, ачааны машины шалган нэвтрүүлэх цогцолбороос БНХАУ-ын Эрээний боомт хүртэл 1 км, цогцолбороос төмөр замын шилжүүлэн ачих 3 дугаар терминал хүртэлх 8 км зам барих хөрөнгийг эхний хагас жилд багтаан зээл, тусламж, бусад эх үүсвэрээр санхүүжүүлэхийг зорьж байна. Түүнчлэн “Сайншанд” аж үйлдвэрийн цогцолборын үйл ажиллагааг төлөвлөн хэрэгжүүлэх ажлыг удирдан зохион байгуулах бүтцийг ирэх сард багтаан Засгийн газрын хуралдаанаар хэлэлцэхээр боллоо.

Иргэдийг сургах, ажлын байраар хангах тухай хуралдаанаар яригдсан байна. Энэ дагуу уул уурхай, аж үйлдвэрийн салбарт шаардлагатай мэргэжлээр ажилгүй иргэдийг бүртгэн мэргэжил олгох, мэргэшүүлэх, Мэргэжлийн сургалт, үйлдвэрлэлийн төвүүдэд сургах, уул уурхай, бусад үйлдвэрт монгол иргэдийг ажилд оруулах зэрэг цогц арга хэмжээ авахаар шийдвэрлэлээ.

ТЭТГЭВЭР БОДОХ ЦАЛИНГИЙН ИТГЭЛЦҮҮРИЙГ БАТАЛЛАА

Энэ онд Засгийн газар тэтгэврийг 2 үе шаттайгаар нэмэгдүүлэхээр шаардагдах хөрөнгийн эх үүсвэрийг төсөвт тусгуулсан билээ. Эхний ээлжинд тэтгэврийг 02 дугаар сарын 01-ний өдрөөс тооцон 35 мянган төгрөгөөр нэмсэн. Тэтгэвэр нэмэгдүүлэх хоёрдах шатны арга хэмжээг тэтгэврийн зөрүүг арилгах зорилгоор хэрэглэх цалингийн итгэлцүүрийг шинэчлэн тогтоох арга хэмжээтэй хамт хэрэгжүүлэхээр шийдвэрлэлээ. Итгэлцүүрийг шинэчлэн батласнаар Нийгмийн даатгалын сангаас олгох бүрэн тэтгэврийн доод хэмжээ 180 мянга 300 төгрөг, хувь тэнцүүлэн тогтоосон тэтгэврийн доод хэмжээ 145 мянга 200 төгрөг болж байна.

Хүн амын амьжиргааны баталгаажих доод түвшний хэмжээ нэмэгдсэнтэй холбогдуулан Засгийн газраас гаргасан энэ шийдвэрийг 05 дугаар сарын 01-ний өдрөөс эхлэн мөрдөх юм. Ингэснээр одоогийн 165 мянган төгрөгийн дундаж тэтгэвэр 222,9мянган төгрөгт хүрч байна. Энэ нь өнгөрсөн оны эцэстэй харьцуулахад 75 хувь, энэ оны 04 дүгээр сарын 01-ний байдалтай харьцуулахад 35 хувь, 2008 оныхтой харьцуулахад 2,3 дахин нэмэгдэж байгаа юм.  Нийт тэтгэвэр авагчдын 64 хувь нь буюу 193,4 мянган иргэн 1995 оноос өмнө авч байсан цалин хөлсөндөө үндэслэн тэтгэврээ тогтоолгосон. Эдгээр иргэдийн тэтгэвэр дунджаар 40 орчим хувиар буюу 63 мянган төгрөгөөр нэмэгдэж байна. Харин 1995 оноос хойш тэтгэврээ тогтоолгосон иргэдийн тэтгэвэр дунджаар 28 орчим хувиар буюу 48,9 мянган төгрөгөөр нэмэгдлээ. 

ЭРҮҮЛ МЭНДИЙН АЖИЛТАНД НЭМЭГДЭЛ, МӨНГӨН УРАМШИЛ ОЛГОНО

Эрүүл мэндийн ажилтанд нэмэгдэл, мөнгөн урамшил, нэмэгдэл хөлс олгох асуудлыг Засгийн газрын хуралдаанаар хэлэлцэн баталлаа. Дээрх нэмэгдэл, мөнгөн урамшил, нэмэгдэл хөлс олгох асуудлыг ирэх оны 01 дүгээр сарын 01-ний өдрөөс мөрдөж эхлэхээр тогтсон байна. “Тэтгэврийг хөнгөлөлттэй тогтоох газрын дор болон хөдөлмөрийн хортой, халуун, хүнд нөхцөлд хамаарах ажил, мэргэжлийн жагсаалт”-д орсон эрүүл мэндийн ажилтан, ажиллагсдад тухайн ажил, албан тушаалыг хаших хугацаанд нь үндсэн цалингийн 10 хувьтай тэнцэх нэмэгдэл, мөнгөн урамшлыг  сар бүр олгоно.  

Улирлын ажлын үр дүнгийн мөнгөн урамшлыг эрүүл мэндийн ажилтны ажлын үр дүн, гүйцэтгэлийг харгалзан, үндсэн цалингийн 10-15 хувиар сар бүр тооцож, улирал тутам олгох юм. Алсын болон төрөлжсөн мэргэжлийн дуудлагад явж эмнэлгийн тусламж, үйлчилгээ үзүүлсэн, төрийн өмчийн эрүүл мэндийн байгууллагад ажиллаж байгаа ажилтанд тухайн үед мөрдөгдөж байгаа хөдөлмөрийн хөлсний доод хэмжээний 15 хувиар тооцсон нэмэгдэл хөлсийг дуудлагаар явсан тохиолдол бүрт олгож байх боллоо. Энэ шийдвэр нь эрүүл мэндийн  салбарынхны ажлын үр дүн дээшилж, тогтвор суурьшилтай, идэвх санаачлагатай, хариуцлагатай байх зэрэг олон хөшүүрэг бий болгоно гэж Засгийн газар үзэж байна. Түүнчлэн ажиллагсдын үндсэн цалин сард 10-15 хүртэл хувиар нэмэгдэн, нэмэгдлийн дундаж хэмжээ нь үндсэн цалингийн 38 хувь болж, ирэх оноос дундаж цалин нь 600 мянган төгрөгт хүрэх юм байна.

Г.АЛТАНСҮХИЙГ АШИГТ МАЛТМАЛЫН ГАЗРЫН ДАРГААР ТОМИЛОВ

Засгийн газрын хэрэгжүүлэгч агентлаг-Ашигт малтмалын газрын даргаар Галсангийн Алтансүхийг томиллоо. Г.Алтансүх нь ЗХУ-ын Улсыг аюулаас хамгаалах хорооны дээд сургууль, Удирдлагын академи төгссөн. Эрх зүйч, төрийн удирдлагын менежер мэргэжилтэй. Олон улсын харилцааны магистр. Улсын аюулгүй байдлыг хангах ерөнхий газарт судлаач багш, Тагнуулын төв газарт ахлах ажилтан, Тагнуулын ерөнхий газарт газрын орлогч дарга, хэлтсийн дарга, АНУ-д суугаа Элчин сайдын яаманд III нарийн бичгийн дарга, Тагнуулын ерөнхий газрын дэд даргаар ажиллаж байсан.

Г.Алтансүх төрийн албанд 26 жил ажиллаж байгаа бөгөөд тухайн ажлыг хариуцах чадвар, ажлын туршлагыг нь харгалзан Ашигт малтмалын газрын даргаар томилжээ.  Ашигт малтмалын салбарын асуудал өнөөдөр эдийн засгийнх гэхээсээ илүүтэй үндэсний аюулгүй байдалтай холбоотой асуудал болж байгаа учир Улсыг аюулаас хамгаалах сургууль төгсөн энэ салбарт ажиллаж олон жил ажилласан хүнийг томилж байгаа нь учиртай гэдгийг Засгийн газрын тэргүүн хуралдааны үеэр хэлж байлаа.

ТОВЧ МЭДЭЭ

• Засгийн газрын үйл ажиллагааг олон нийтэд нээлттэй, ил тод болгох, төрийн зохицуулалтын үр нөлөөг дээшлүүлэх чиглэлээр байнга эрчимтэй ажиллаж байхыг бүх сайд, Засаг дарга, агентлагийн дарга нарт даалгалаа. Мөн “Захиргааны хэм хэмжээ тогтоосон шийдвэр гаргах журам”-ыг мөрдөж хэвшүүлэх, нийтээр дагаж мөрдүүлэх хэм хэмжээ тогтоосон шийдвэрийн төсөл боловсруулахдаа сонирхлын бүлгийн саналыг тусгах, нөлөөллийн шинжилгээ хийх, шийдвэртээ жил бүр хяналт, шинжилгээ хийж, шинээр батлагдсан хууль, тогтоомжид нийцүүлэн тухай бүрт нь нэмэлт, өөрчлөлт оруулж байх, хуулиар тусгайлан эрх олгоогүй асуудлаар журам, дүрэм гаргах, эрх хэмжээгээ хэтрүүлэхгүй байхыг даалгажээ. Мөн нэр бүхий сайд нарын гаргасан зарим шийдвэр хууль, тогтоомжтой зөрчилдөж байгаа тул хүчингүй болголоо.
• Өнгөрсөн онд аймаг, нийслэлийн ИТХ, Тэргүүлэгчдийн ажилд гарсан үр дүн, дэвшилттэй арга барил, цаашид анхаарах асуудлын талаар өгсөн чиглэлийг хэрэгжүүлж ажиллахыг ИТХ-ын дарга нарт зөвлөмж болголоо. Мөн ажлаа шуурхай, ил тод явуулах, шийдвэр гаргах түвшинд иргэд, иргэний нийгмийн байгууллагын оролцоог өргөжүүлэх, орон нутгийн Хурлын сонгуулийг хуулийн хүрээнд зохион байгуулж, сонгогчдыг идэвхтэй оролцох нөхцөл, бололцоогоор хангаж, дэмжлэг үзүүлэхийг зөвлөв.
• Иргэний шинэчилсэн үнэмлэхний ажлын явц болон УИХ-ын сонгуульд шинэчилсэн үнэмлэх ашиглах боломжгүй болсон талаар Хууль зүй, дотоод хэргийн яам, Улсын бүртгэлийн ерөнхий газрын удирдлага танилцуулав.
• Энэ оны хаврын тариалалтад зориулж улсын нөөцөөс 4600 тонн үрийн улаанбуудайг газар тариалан эрхлэгч аж ахуйн нэгж, иргэдэд худалдахаар боллоо. Буудайн борлуулалтын орлогоор энэ оны 12 дугаар сард багтаан үрийн улаанбуудайн нөөцийг нөхөн бүрдүүлэхийг Шадар сайд М.Энхболдод зөвшөөрөв. Нэг тонн үрийн улаанбуудайг 680 мянган төгрөгөөр тооцож, 40 хувийн урьдчилгаатай олгох болсон байна. Энэ жил улсын хэмжээнд 318 мянган га-д улаанбуудай тарихаар төлөвлөжээ.
• УИХ-ын гишүүн Ц.Цэнгэл нарын санаачлан боловсруулсан Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуульд өөрчлөлт оруулах тухай болон бусад холбогдох хуулийн төслийг дэмжих боломжгүй гэж үзлээ.
• УИХ-ын гишүүн Я.Батсуурь Орон сууцны тухай, Газрын тухай хуульд нэмэлт оруулах, гишүүн П.Алтангэрэл Нэмэгдсэн өртгийн албан татварын тухай хуульд өөрчлөлт оруулах хуулийн төсөл санаачлан боловсруулсан байна. Төслүүдийг хуралдаанаар хэлэлцэн хэд хэдэн саналыг уламжлахаар тогтлоо.
• Гишүүн Р.Раш Төмөр замын тээврийн тухай хуульд нэмэлт, өөрчлөлт оруулах, Э.Бат-Үүл, Батж.Батбаяр, Х.Тэмүжин нар Архидан согтуурахтай тэмцэх тухай хуульд нэмэлт оруулах тухай хуулийн төсөл санаачилсныг хэлэлцэн, зарчмын хувьд дэмжиж тодорхой саналуудыг уламжлахаар болов.
• Шүүхийн шийдвэр гүйцэтгэх ерөнхий газрын эзэмшилд байгаа 59 айлын 60-I, 60-II байрны орон сууцыг одоо эзэмшиж байгаа оршин суугчдад нь хувьчлахаар боллоо. 118 өрхийн 373 иргэн оршин суудаг дээрх хоёр байр Баянзүрх дүүргийн 25 дугаар хорооны нутаг дэвсгэрт байдаг юм.
• Замын хөдөлгөөний аюулгүй байдлыг 2012-2020 онд хангах стратеги, стратегийг хэрэгжүүлэх үйл ажиллагааны төлөвлөгөөний төслийг хэлэлцээд Засгийн газрын тогтоол гаргахаар шийдвэрлэлээ. Төслийг хэлэлцэх явцад Засгийн газрын гишүүд санал хэлэхдээ согтуугаар автомашин барьж байгаа хүмүүстэй хатуу хариуцлага тооцдог байх нь зүйтэй гэдгийг тэмдэглэж байлаа.
• Түшээт хошой Чин ван, Түр Засгийн газрын тэргүүн, Сангийн анхны сайд Г.Чагдаржавын хөшөө дурсгалын цогцолборыг “Чагдаржав сан” өөрийн хүч, хөрөнгөөр Дундговь аймгийн төвд босгосон байна. Иймээс энэ санд Засгийн газрын нөөц сангаас тодорхой хэмжээний мөнгөн дэмжлэг үзүүлэх боллоо.
• “Авлигын эсрэг олон улсын академийг олон улсын байгууллага болгон үүсгэн байгуулах тухай хэлэлцээр”-т нэгдэн орох нь зүйтэй гэж үзэн УИХ-ын холбогдох Байнгын хороотой зөвшилцөхөөр боллоо. Олон улсын академи нь авлигын эсрэг сургалт, судалгаа явуулах, мэргэшсэн шинжээчдийн бүлэг бий болгох зэрэг үндсэн 5 чиглэлээр ажиллах юм байна.

Монгол улсын Ерөнхий сайд С.Батболд манай улсад айлчилж байгаа БНХАУ-ын Эрүүл мэндийн сайд Чэнь Жу тэргүүтэй төлөөлөгчдийг 2012 оны 5 дугаар сарын 2-ны өдөр хүлээн авч уулзлаа.  Хоёр орны харилцаа стратегийн түншлэлийн хүрээнд бүх салбарт амжилттай өргөжин тэлж байгаа энэ үед эрхэм зочны айлчлал болж байгаа нь ач холбогдолтой гэдгийг Монгол улсын Ерөнхий сайд уулзалтын эхэнд тэмдэглэлээ. Дөнгөж сая хоёр улсын эрүүл мэндийн сайд нар эрүүл мэндийн яамд хоорондын дөрвөн жил хамтран ажиллах төлөвлөгөөнд гарын үсэг зурсан нь  чухал арга хэмжээ боллоо гэдгийг Засгийн газрын тэргүүн онцлоод, БНХАУ-ын Засгийн газраас биеийн тамир, спортын цогцолбор барихад гүн туслалцаа үзүүлсэнд талархал илэрхийллээ.

 

Цаашид ч Монгол улс ийм цогцолборууд барих төлөвлөгөө бий бөгөөд энэ тал дээр хамтран ажиллах хүсэлтэй байгаагаа уулзалтын үеэр хөндөн ярилцав. Түүнчлэн хоёр улсын эмнэлэгийн салбарын хамтын ажиллагаа, түүний дотор боловсон хүчин, сургалтын асуудал дээр нягт хамтран ажиллахаас гадна уламжлалт эмнэлэгийн салбарыг ч орхиж болохгүйг тэмдэглэж байсан юм. Харин эрхэм зочны хувьд анх удаагаа монгол улсад  албан ёсны  айлчлал хийж байгаадаа баяртай байна гэлээ.  Монгол улсын  ЭМЯ-н дээр хамтран ажиллах төлөвлөгөөнд гарын үсэг зурсан нь манай хоёр улсын хамтын ажиллагаа улам хөгжин тэлж байгаагийн том жишээ гэдгийг тэмдэглэлээ. Мөн түүний айлчлалын бүрэлдэхүүнд ӨМӨЗО-ны эрүүл мэндийн газрын төлөөлөгчид ч явж байгааг дуулгасан юм.

Хоёр улсын эрүүл мэндийн  яамд нь  хамтран ажиллах төлөвлөгөөнд гарын үсэг зурснаар халдварт өвчний тандалт судалгаа, уламжлалт анагаах ухаан, анхан шатны эрүүл мэндийн тусламж үйлчилгээ, эх, хүүхдийн эрүүл мэндийн тусламж үйлчилгээ болон сувилахуйн тусламж үйлчилгээний чиглэлүүдээр хамтран ажиллах юм байна. Мөн хоёр улсын хилийн шугамын дагуух нутаг дэвсгэрт шинээр болон сэргэж буй халдвар, бэлгийн замаар дамжих халдвар болон бусад халдварт өвчний хамтарсан тандалт судалгаа хийх, судалгааны үр дүнг харилцан хуваалцаж ажиллахаар болж байна гэж Засгийн газрын Хэвлэл мэдээллийн албанаас мэдээллээ.

Засгийн газар 2008-2012 оны үйл ажиллагааны мөрийн хөтөлбөртөө цалин, тэтгэврийг нэмэх зорилт тавьсан. Энэ дагуу энэ оны 2 дугаар сарын 1-нээс цалинг эхний ээлжинд 80 мянган төгрөгөөр нэмсэн бол дараагийн шатанд буюу 5 дугаар сарын 1-нээс 23 хувиар нэмж байна. Ингэсээр цалин нийтдээ 53 хувиар нэмэгдэж байгаа бөгөөд дундаж цалин 630 мянган төгрөгт хүрлээ. Дундаж цалин 300 мянган төгрөг байсан 2008 онд Засгийн газар цалинг 20 хувь, 2010 онд 30 хувиар нэмж 2011 оны байдлаар 410 мянган төгрөгт хүргээд байсан юм.

ЗАСГИЙН ГАЗАР ДУНДАЖ ТЭТГЭВРИЙН ХЭМЖЭЭГ 222 МЯНГАН ТӨГРӨГ БОЛГОЛОО

Засгийн газар 2012 оны 5 дугаар сарын 1-нээс тэтгэвэр нэмэгдүүлэх цогц арга хэмжээг хэрэгжүүлснээр одоо байгаа 165,0 мянган төгрөгийн дундаж тэтгэврийн хэмжээ 222,9мянган төгрөгтхүрлээ. Энэ нь өнгөрсөн оны эцэстэй харьцуулахад 75 хувь, энэ оны 4 дүгээр сарын 1-ний байдалтай харьцуулахад 35 хувь, 2008 оныхтой харьцуулахад 2,3 дахин нэмэгдэж байгаа юм. Нийт тэтгэвэр авагчдын 64 хувь нь буюу 193,4 мянган иргэн 1995 оноос өмнө авч байсан цалин хөлсөндөө үндэслэн тэтгэврээ тогтоолгосон. Эдгээр иргэдийн тэтгэвэр дунджаар 40 орчим хувиар буюу 63,0 мянган төгрөгөөр нэмэгдэж байна. Харин 1995 оноос хойш тэтгэврээ тогтоолгосон иргэдийн тэтгэвэр дунджаар 28 орчим хувиар буюу 48,9 мянган төгрөгөөр нэмэгдлээ.

Хүн амын амьжиргааны доод түвшний хэмжээ нэмэгдсэнтэй холбогдуулан Засгийн газар бүрэн тэтгэврийн доод хэмжээг 180,300 төгрөгөөр, хувь тэнцүүлсэн тэтгэврийн доод хэмжээг 145,200 төгрөгөөр тус тус шинэчлэн тогтоохоор төлөвлөж байна. Нийгмийн даатгалын сангаас олгох тэтгэвэр бодох цалингийнитгэлцүүр батлах, тэтгэврийн доод хэмжээг шинэчлэн тогтоох тухай асуудлыг Засгийн газар энэ долоо хоногийн хурлаараа хэлэлцэх юм. Ийнхүү С.Батболдын Засгийн газар цалин, тэтгэвэр,зарим тэтгэмжийг нэмэх  амлалтаа биелүүллээ.

Монгол Улсын хөгжлийн гол хөдөлгөгч хүч болсон хувийн хэвшлийнхэн, бизнес эрхлэгчдийн улс орныхоо эдийн засаг, бизнесийн хөгжилд оруулж буй хувь нэмрийг үнэлж дүгнэдэг ТОП-150 аж ахуйн нэгжийг шалгаруулдаг уламжлалт арга хэмжээнд Монгол Улсын Ерөнхий сайд оролцож шилдгүүдэд шагнал гардууллаа. Монгол Улсын Дотоодын нийт бүтээгдэхүүний 80 гаруй хувийг үйлдвэрлэн бүтээж байгаа та бүхний  хичээл  зүтгэлийн үрээр  өнгөрсөн онд манай улсын эдийн засаг 17,3 хувьтай гарсан нь түүхэн явдал боллоо гэдгийг Ерөнхий сайд үгийнхээ эхэнд тэмдэглээд энэ бол монголчууд бидний тэр дундаа бизнес эрхлэгчид та бүхний амжилт, хамтын бүтээл юм гэлээ.

 

Монгол Улсын эдийн засаг энэ эрчээрээ өсөх хандлага, төсөөлөл байна. Энэ бол Монгол Улс, монголчууд бидний бол том боломж. Энэ боломжийг бодитой болгох гол хүч нь бизнес эрхлэгч, баялгийг бүтээгч та бүхэн юм. Гэхдээ энэ боломжийг бодит зүйл болгох хамгийн том хариуцлагыг Засгийн газар үүрэх учиртай. Эдийн засгийн хөгжлийн боломжоо урт хугацаанд тогтвортой, бизнесийн орчныг таатай, өрсөлдөх чадвартай байлгах, бизнес эрхлэгчид, үндэсний үйлдвэрлэгчдийнхээ оролцоог нэмэгдүүлэх, идэвх санаачилгыг өрнүүлэх бодлого гаргах нь Засгийн газрын үүрэг гэдгийг Засгийн газрын тэргүүн онцлоод энэ бодлогынхоо суурийг тавьж хэрэгжүүлж байна. Улам эрчимжүүлэх шаардлага байгаа гэдгийг дурдлаа.

Төр, хувийн хэвшлийн түншлэлийг эрчимжүүлж бизнесийн таатай орчин бүрдүүлэхийн төлөө хамтран ажиллахыг Монгол Улсын Ерөнхий сайд С.Батболд уриаллаа. Монгол Улсын ТОП аж ахуйн нэгжүүдийг шалгаруулдаг энэхүү арга хэмжээг Монголын Үндэсний худалдаа, аж үйлдвэрийн танхим, Монгол Улсын Засгийн газар хамтран жил бүр зохион байгуулдаг бөгөөд энэ жил 11 дэх удаагаа боллоо. ТОП аж ахуйн нэгжүүдийг амжилт бүтээл, тогтвортой үйл ажиллагаа, эдийн засаг, нийгмийн хөгжилд оруулж буй хувь нэмрээр нь шалгаруулдаг байна гэж Засгийн газрын Хэвлэл мэдээллийн албанаас мэдээллээ.

Засгийн газар 2008-2012 оны үйл ажиллагааны мөрийн хөтөлбөртөө цалин, тэтгэврийг нэмэх зорилт тавьсан. Энэ дагуу энэ оны 2 дугаар сарын 1-нээс цалинг эхний ээлжинд 80 мянган төгрөгөөр нэмсэн бол дараагийн шатанд буюу 5 дугаар сарын 1-нээс 23 хувиар нэмж байна. Ингэсээр цалин нийтдээ 53 хувиар нэмэгдэж байгаа бөгөөд дундаж цалин 630 мянган төгрөгт хүрлээ. Дундаж цалин 300 мянган төгрөг байсан 2008 онд Засгийн газар цалинг 20 хувь, 2010 онд 30 хувиар нэмж 2011 оны байдлаар 410 мянган төгрөгт хүргээд байсан юм.

ЗАСГИЙН ГАЗАР ДУНДАЖ ТЭТГЭВРИЙН ХЭМЖЭЭГ 222 МЯНГАН ТӨГРӨГ БОЛГОЛОО

Засгийн газар 2012 оны 5 дугаар сарын 1-нээс тэтгэвэр нэмэгдүүлэх цогц арга хэмжээг хэрэгжүүлснээр одоо байгаа 165,0 мянган төгрөгийн дундаж тэтгэврийн хэмжээ 222,9мянган төгрөгтхүрлээ. Энэ нь өнгөрсөн оны эцэстэй харьцуулахад 75 хувь, энэ оны 4 дүгээр сарын 1-ний байдалтай харьцуулахад 35 хувь, 2008 оныхтой харьцуулахад 2,3 дахин нэмэгдэж байгаа юм. Нийт тэтгэвэр авагчдын 64 хувь нь буюу 193,4 мянган иргэн 1995 оноос өмнө авч байсан цалин хөлсөндөө үндэслэн тэтгэврээ тогтоолгосон. Эдгээр иргэдийн тэтгэвэр дунджаар 40 орчим хувиар буюу 63,0 мянган төгрөгөөр нэмэгдэж байна. Харин 1995 оноос хойш тэтгэврээ тогтоолгосон иргэдийн тэтгэвэр дунджаар 28 орчим хувиар буюу 48,9 мянган төгрөгөөр нэмэгдлээ.

Хүн амын амьжиргааны доод түвшний хэмжээ нэмэгдсэнтэй холбогдуулан Засгийн газар бүрэн тэтгэврийн доод хэмжээг 180,300 төгрөгөөр, хувь тэнцүүлсэн тэтгэврийн доод хэмжээг 145,200 төгрөгөөр тус тус шинэчлэн тогтоохоор төлөвлөж байна. Нийгмийн даатгалын сангаас олгох тэтгэвэр бодох цалингийнитгэлцүүр батлах, тэтгэврийн доод хэмжээг шинэчлэн тогтоох тухай асуудлыг Засгийн газар энэ долоо хоногийн хурлаараа хэлэлцэх юм. Ийнхүү С.Батболдын Засгийн газар цалин, тэтгэвэр,зарим тэтгэмжийг нэмэх  амлалтаа биелүүллээ.

Монгол Улсад цэргийн цол-генерал цол бий болсон өдрийг тохиолдуулан Засгийн газрын тэргүүн С.Батболд  2012 оны 4 дүгээр сар 27-ны өдөр генералуудыг хүлээн авч, хүндэтгэл үзүүллээ. Байлдагчийн халаасанд генералын мөрдөс бий гэдэгчлэн тэрхүү цэрэг эрсийн мөрөөдлийг бодит  биелэл болгож чадсан генералууд та бүхнээр цэрэг эрс, Монголчууд бид үргэлж бахархдаг хэмээн Ерөнхий сайд С.Батболд алтан мөрдөстнүүдтэй уулзах үеэрээ тэмдэглэлээ. Мөн тэрээр  энэхүү өндөр хариуцлагатай үүрэг, нэр төрөө өргөж явахын зэрэгцээ цаашид улс орны хөгжил дэвшил, батлах хамгаалахын шинэчлэлд өөрсдийн хувь нэмрийг оруулан, хойч үе шинэ залуу офицеруудад арга туршлагаа харамгүй хайрлан, төр засаг, ард түмэндээ өмөг түшиг болж явна гэдэгт итгэлтэй байна гэлээ.

Түүнчлэн Монгол Улсын Засгийн газар зэвсэгт хүчин, тэр дотроо зэвсэгт хүчний сор болсон генералуудын асуудлыг бүхий л талаар дэмжиж ирсэн төдийгүй цаашид ч энэ чиглэлээр тодорхой арга хэмжээ авч хэрэгжүүлэх болно гэдгээ Ерөнхий сайд хэллээ. Тухайлбал генерал цолны нэмэгдлийн асуудлыг УИХ-ын тогтоолын түвшинд бус хуулийн төсөл боловсруулж, шийдвэрлэх асуудлыг Засгийн газрын тэргүүний хувьд дэмжинэ гээд төслийг ойрын хугацаанд боловсруулахыг салбарын сайдад үүрэг болголоо.

1944 онд БНМАУ-ын Сайд нарын Зөвлөлийн тогтоолоор анх генерал цолыг эх орныхоо эрх чөлөө, тусгаар тогтнолыг батлан хамгаалах үйл хэрэгт онц гарамгай  гавьяа байгуулсан цэргийн дээд дарга нарт олгох журам гаргаж Ю.Цэдэнбал, Ж.Лхагвасүрэн, С.Балдан, Д.Дамдинхүү, С.Равдан, Б.Дорж, Г.Дагдан, Б.Шагдаржав, Г.Эрэндоо, М.Зайсанов, Р.Осор нарын 11 хүнд олгосон түүхтэй. Эдүгээ энэ эрхэм хүндэт цолыг 158 хүн хүртээд байна. 

~ Засгийн газрын ээлжит хуралдаан 2012 оны 04 дүгээр сарын 25-ны өдөр болж дараах асуудлуудыг хэлэлцэн шийдвэр гаргалаа ~

Ирэх онд уул уурхайн салбарын өсөлт, энэ салбарын бусад салбарт нөлөөлөх нөлөөлөл, шинээр бий болох ажлын байр, гадаадын хөрөнгө оруулалтын тааламжтай нөхцөл, мал аж ахуйн салбарын өсөлт зэргээс шалтгаалан эдийн засгийн өсөлт 15.2 хувьтай байна. Үүнд уул уурхайн салбарын өсөлт 24.8, уул уурхайн бус салбарынх 13.3 хувь байна гэж Засгийн газар үзлээ. Эдийн засгийн өсөлт 2011 онд 17.3 хувийн бодит өсөлттэй гарсан нь уул уурхайн бүтээн байгуулалт, гол нэрийн бүтээгдэхүүнүүдийн дэлхийн зах зээл дэх өндөр үнэ, цаг агаарын таатай байдалтай холбоотой  байлаа.  

Тэгвэл ирэх онуудад эдийн засаг өсч байгаатай холбоотойгоор инфляци 13.1 хувьтай байх таамаглал дэвшүүлсэн байна. Цаашид суурь инфляцийг барих Засгийн газрын бодлого, арга хэмжээ, эрэлтийг дэмжих бодлого барихгүй гэвэл инфляцийг нэг оронтой тоонд оруулах боломжтой гэсэн эерэг төсөөлөл гарчээ. Уул уурхайн салбарт гадаадын хөрөнгө оруулалт үргэлжлэх, дэд бүтэц, бусад томоохон төсөл, хөтөлбөрүүдийг хэрэгжүүлэхтэй холбогдсон хөрөнгийн урсгал, алт, зэсийн дэлхийн зах зээлийн эрэлт, үнэ өсөх зэргээс шалтгаалан валютын ханш ирэх онуудад чангарах төлөвтэй байна. Монгол Улсын нэгдсэн төсвийн 2013 оны төсвийн хүрээний мэдэгдэл, 2014-2015 оны төсвийн төсөөллийн тухай хуулийн төсөл болон түүнийг дагалдах хуулийн /Хүний хөгжил сангийн тухай гэх мэт/ төслийн тухай Засгийн газрын хуралдаанаар хэлэлцэн, гишүүдийн гаргасан саналыг тусгаж, УИХ-д өргөн мэдүүлэхээр боллоо.

ЗАСГИЙН ГАЗАР ӨНГӨРСӨН САРД АЧААЛАЛ ИХТЭЙ БАЙЖЭЭ

Засгийн газрын 2012 оны 03 дугаар сарын үйл ажиллагааны талаар Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар гишүүдэд танилцууллаа. Өнгөрсөн сард Засгийн газрын хийсэн ажлыг  дүгнэвэл ачаалал ихтэй, энэ хэрээр улс орны нийгэм, эдийн засгийн амьдралд чухал нөлөөтэй олон томоохон шийдвэр гаргасан сар болж өнгөрчээ. Засгийн газар тайлант хугацаанд иргэн бүрт олгох 21 мянган төгрөгийн хишиг, хувийг 06 дугаар сарыг дуустал хүртээхээр шийдвэрлэсэн. Мөн 2012 оны 12 дугаар сарын 31-ний байдлаар 55 ба түүнээс дээш настай эмэгтэй, 60 ба түүнээс дээш настай эрэгтэй, хөгжлийн бэрхшээлтэй нь тогтоогдсон 16 хүртэлх насны хүүхэд, хөдөлмөрийн чадвараа 50 ба түүнээс дээш хувиар алдсан нь тогтоогдсон 16 насанд хүрсэн иргэнд “Хүний хөгжил сан”-гаас олгох нэг сая төгрөгийг энэ оны 2 дугаар улирлын сар бүрийн сүүлийн хагаст хуваан олгохоор болсон юм.

Түүнчлэн “Шинэ бүтээн байгуулалт” дунд хугацааны зорилтот хөтөлбөрийн хүрээнд барих “100 мянган айлын орон сууц” хөтөлбөрт хамрагдах орон сууцны жагсаалтыг баталжээ. “Төрөөс төмөр замын тээврийн талаар баримтлах бодлого”-ын хэрэгжилтийг эрчимжүүлэх зорилгоор “Төмөр замын салбарт авах зарим арга хэмжээний тухай”, “Баруун бүсийн босоо тэнхлэгийн автозамыг хөгжүүлэх хөрөнгө оруулалтын хөтөлбөрийн нэгдүгээр төсөл”-ийн Зээлийн хэлэлцээрт гарын үсэг зурах тухай хэлэлцэн тодорхой шийдвэр гаргасан байна. Улаанбаатар хотын замын түгжрэлийг бууруулах талаар мэргэжлийн байгууллагаас гаргасан саналыг судлан үзээд зарим их, дээд сургууль, коллежи болон ерөнхий боловсролын сургуулийн удирдлагатай харилцан тохиролцож, хичээлийн эхлэх хугацаанд өөрчлөлт оруулах болжээ.

Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатарын танилцуулгаас үзвэл манай улсын нэгдсэн төсвийн тэнцвэржүүлсэн нийт орлого энэ оны 2 дугаар сарын гүйцэтгэлээр 674.8 тэрбум төгрөгт хүрч, орлогын төлөвлөгөө 41.7 тэрбум төгрөгөөр буюу 5.8 хувиар давж биелжээ. Энэ нь 2011 оны мөн үеэс 207.1 тэрбум төгрөг буюу 44.3 хувиар өссөн гэсэн үг юм. Нэгдсэн төсвийн зарлага 2012 оны 2 дугаар сарын гүйцэтгэлээр 1425.5 тэрбум төгрөг зарцуулахаас гүйцэтгэлээр 682.1 тэрбум төгрөгт хүрч, төлөвлөсөн нэгдсэн төсвийн зарлагын 47.9 хувийг санхүүжүүлсэн байна. Засгийн газар өнгөрсөн сард 6 удаа хуралдаж, 55 асуудал хэлэлцэн 16 асуудалтай танилцжээ. Үүнээс 33 асуудлыг Засгийн газрын тогтоолоор, 34 асуудлыг тэмдэглэлээр, 2 асуудлыг Ерөнхий сайдын захирамжаар шийдвэрлэсэн байна.

ЗЭЭЛИЙН ХЭЛЭЛЦЭЭРИЙН ТӨСЛИЙГ ДЭМЖИВ

Монгол Улсын Засгийн газар, Японы Олон улсын хамтын ажиллагааны байгууллагын хооронд байгуулсан “Нийгмийн салбарыг дэмжих” хөтөлбөрийн хоёрдахь шатны Зээлийн хэлэлцээрийг соёрхон батлах тухай хуулийн төслийг хэлэлцэн дэмжиж, УИХ-д өргөн мэдүүлэхээр боллоо. Хөтөлбөрийн хоёрдахь шатны санхүүжилтийн хүрээнд 1 тэрбум 550 сая иен буюу ойролцоогоор 20 сая ам.доллар авах боломж бүрдээд байна. Энэ хөрөнгийг макро эдийн засгийг тогтворжуулах хөтөлбөр хэрэгжүүлэх, нийгмийн халамжийн үр ашгийг дээшлүүлж, ядуу иргэдийг хамгаалах шинэчлэл хийх, эмийн үнийн хөнгөлөлтийн хүрээг нэмэх, эрүүл мэндийн даатгалын шимтгэлийг төрөөс санхүүжүүлэх болон сурагчдын сурах бичгийг төрөөс даах ажлыг зорилтот бүлэгт чиглүүлэх, хүүхдийг тэжээлийн дутагдлаас сэргийлэхэд зарцуулахаар төлөвлөжээ. Мөн өргөн хүрээний хомсдол үүссэн үед шаардлагатай вакцин эм, эмнэлгийн бусад хангамж нийлүүлэх тогтолцоо бий болгох, гэр хорооллыг хөгжүүлэх зэрэг цогц ажилд зарцуулахаар тохиролцоод байна.

АГААРЫН ТЭЭВРИЙГ ХЯЛБАРШУУЛАХ ҮНДЭСНИЙ ХӨТӨЛБӨР”-ИЙН ХЭРЭГЖИЛТИЙН ЯВЦТАЙ ТАНИЛЦЛАА

Үндэсний хөтөлбөрийн хэрэгжилтийн явцын талаар Зам, тээвэр, барилга, хот байгуулалтын сайд Ц.Дашдорж Засгийн газрын гишүүдэд танилцууллаа. Үүнтэй холбогдуулан агаарын хөлөг олон улсын хилийн боомтгүй нисэх буудалд зайлшгүй буулт хийсэн тохиолдолд хилийн хяналтыг гүйцэтгүүлэх зохион байгуулалтын арга хэмжээ авах зохицуулалт бүрдүүлэх, холбогдох журмыг боловсруулан баталгаажуулахыг холбогдох сайд нарт даалгалаа. Мөн Улсын бүртгэлийн ерөнхий газар, Хил хамгаалах ерөнхий газар, Гадаадын иргэн, харьяатын асуудал эрхлэх газрын паспорт хяналтын нэгдсэн сүлжээний программ хангамжийг сайжруулах, шаардагдах хөрөнгийг шуурхай шийдвэрлүүлэхийг үүрэг болгов.

Түүнчлэн агаарын тээврийг хялбаршуулахтай холбогдсон үйл ажиллагаа, арга хэмжээ нь аялал жуулчлал, олон улсын худалдааны хөгжилд хэрхэн нөлөөлөхийг тодорхойлох, үнэлгээ өгөх боллоо. “Агаарын тээврийг хялбаршуулах үндэсний хөтөлбөр” 181 заалттай бөгөөд 2011 оны байдлаар 154 заалт бүрэн хэрэгжиж, 21 заалт 30-90 хүртэл хувийн биелэлттэй, 6 заалт хэрэгжээгүй байна. Хөтөлбөрийн дундаж хэрэгжилт 92 хувьтай гэсэн тооцоо гарчээ. 

ТОВЧ МЭДЭЭ

• УИХ-ын гишүүн Д.Одхүүгийн санаачлан боловсруулсан Нэмэгдсэн өртгийн болон Гаалийн албан татвараас чөлөөлөх тухай хуулийн төслийг зарчмын хувьд дэмжиж, хэд хэдэн саналыг хууль санаачлагчид уламжлахаар боллоо. Гишүүн Д.Одхүү хотын захын гэр хорооллоос төвийн сургуульд суралцдаг сурагчдыг тээвэрлэх, тусгай зориулалтаар тоноглосон автобус худалдан авч хилээр оруулахад дээрх төрлүүдийн татвараас чөлөөлөхөөр хуулийн төсөлдөө тусгасан байна.
• Хөгжлийн бодлого, төлөвлөлтийн тухай хуулийн төслийг дэмжин гишүүдээс гаргасан саналыг тусгаж УИХ-д өргөн мэдүүлэхээр боллоо. Хуулийн төсөл 7 бүлэг 28 зүйлтэй бөгөөд эдийн засаг, нийгмийн хөгжлийн хэтийн төсөөлөл, хөгжлийн бодлого, төлөвлөлтийн баримт бичиг боловсруулах, батлах, хэрэгжүүлэх ажлыг зохион байгуулахтай холбогдон үүсэх харилцааг зохицуулах юм.
• Монгол Улсын үндэсний хөгжлийн цогц бодлого, Мянганы хөгжлийн зорилтод үндэслэн боловсруулсан 73 үндэсний хөтөлбөрийн хэрэгжилт 75.4 хувьтай, төсвийн болон гадаад орны хөнгөлөлттэй зээл, буцалтгүй тусламжийн хүрээнд хэрэгжиж байгаа 129 төсөл 85.5 хувийн биелэлттэй байна.
• Нийгмийн даатгалын сангаас олгох тэтгэвэр бодох цалингийн итгэлцүүр батлах, тэтгэврийн доод хэмжээг шинэчлэн тогтоох тухай хэлэлцсэн байна.
• “Албан тушаалтны төрийн өмчлөлд шилжүүлсэн бэлэг, үйлчилгээний үнэ хөлсийг үнэлэх, зарцуулах журам”, “Албан тушаалтны төрийн өмчлөлд шилжүүлсэн бэлэг, үйлчилгээний үнэ, хөлсний талаархи мэдэгдэл”-ийн маягтыг баталлаа.
• Монгол Улсын Засгийн газар, Японы Олон улсын хамтын ажиллагааны банк хооронд байгуулсан зээлийн хэлэлцээрийн хүрээнд хэрэгжиж байгаа Улаанбаатар хотын шинэ нисэх онгоцны буудал барих төслийн ажлын явцын талаар сайд Ц.Дашдорж танилцууллаа. Нисэх буудлын шавыг энэ сарын 23-ны өдөр тавьсан бөгөөд 2016 онд ашиглалтад оруулахаар төлөвлөсөн. Манай улс Хөшигийн хөндийд 110 кВт-ын цахилгаан дамжуулах шугам татаж, дэд өртөө байгуулах, хурдны замаар холбох, нисэх буудлыг холбоо, мэдээллийн шилэн кабелиар холбох ажлыг өөрийн хөрөнгөөр гүйцэтгэх юм.
• Өмнөговь аймгийн Цогтцэций сумын нутагт байрладаг 18 мгв-ын цахилгаан станц, цэвэр усны эх үүсвэрийн барилга, байгууламжийг цагдаа, дотоодын цэргийн хамгаалалтад авлаа.
• Үндэсний төв архивын шинэ цогцолбор барилгын гадна инженерийн шугам сүлжээний угсралт, Төрийн тусгай албан хаагчдын нэгдсэн эмнэлгийн шинэ барилга ашиглалтад орохтой холбогдуулан шаардлага хангасан тоног төхөөрөмж худалдан авахад шаардагдах нийт 5.1 тэрбум төгрөгийг энэ оны Төсвийн тухай хуульд нэмэлт, өөрчлөлт оруулах тухай хуулийн төсөлд тусгах, гадаадын зээл, тусламжаар санхүүжүүлэхээр шийдвэрлэв. Мөн архив болон стандартын шаардлага хангасан тоног төхөөрөмж нэмж авахад шаардагдах 4.5 тэрбум төгрөгийг ирэх оны төсөвт тусгахаар болжээ.
• Үндэсний номын сангийн шинэ барилга барихад шаардагдах хөрөнгийн тодорхой хэсгийг жил бүрийн эдийн засаг, нийгмийг хөгжүүлэх үндсэн чиглэл, улсын төсөвт тусгах, бусад эх үүсвэр бий болгон хэрэгжүүлэхийг холбогдох сайд нарт даалгалаа. Шинэ барилга барихад урьдчилсан байдлаар 16 тэрбум төгрөг шаардлагатай гэсэн тооцоо гараад байна.
• Энэ оны Төвийн тухай хуульд тусгагдсаны дагуу “Мэдээлэл холбооны сүлжээ” компаниас 6.3 тэрбум төгрөгийг улсын төсөвт төвлөрүүлэх, төвлөрүүлсний дараа хугацаа хэтэрсэн бусад өр, урт хугацаат зээлийн үндсэн болон хүүгийн төлбөр төлөлтийг 4 жилээр хойшлуулахаар боллоо. Энэ нь мэдээлэл, харилцаа холбооны салбарын санхүү, эдийн засгийн чадавхийг сайжруулах, үйлчилгээний үнэ тарифыг бууруулах, хамрах хүрээг нэмэгдүүлэх, шинэ технологи нэвтрүүлэх зорилготой юм.
• “Түүхий нүүрс олборлодог аж ахуйн нэгж, байгууллагыг агаарын бохирдлын төлбөрөөс чөлөөлөх, хөнгөлөх журам”-ыг баталлаа. Дулааны цахилгаан станцын тасралтгүй, найдвартай ажиллагааг хангахад зориулж олборлосон нүүрснийхээ 70-аас доошгүй хувийг нийлүүлж, эрчим хүчний системийн нүүрсний нийт хэрэглээний 20-иос доошгүй хувийг дангаараа хангадаг аж ахуйн нэгж, байгууллагыг төлбөрөөс чөлөөлөх, түүнчлэн дулаан хангамжийн эх үүсвэрт нийлүүлсэн нүүрсний хэмжээгээр нь түүхий нүүрс олборлодог аж ахуйн нэгж, байгууллагыг агаарын бохирдлын төлбөрөөс хөнгөлөх тухай журамд заажээ.
• Говь-Алтай аймгийн Тайшир, Дорноговь аймгийн Эрдэнэ, Дорнод аймгийн Хөлөнбуйр сумын нутагт байх газар хөдлөлтийг судлах сүлжээ станц байрладаг газрыг улсын тусгай хэрэгцээнд авлаа. Тусгай хэрэгцээнд авсан газрын талбайтай бүхэлдээ болон хэсэгчлэн давхацсан ашигт малтмалын хайгуулын талбайн эвдэгдсэн газарт зөвшөөрөл эзэмшигч этгээдээр нөхөн сэргээлт хийлгэж хүлээн авах юм байна.
• Хөдөө аж ахуйн ээлжит тооллогыг энэ оны 5 дугаар сарын 25-наас 6 дугаар сарын 15-нд явуулахаар боллоо. Тооллого нь мэдээллийн иж бүрэн систем бүрдүүлэх, салбарын төлөвлөлт, бодлого боловсруулалт, гарч байгаа шийдвэрийг сайжруулах, хүнсний аюулгүй байдлыг үнэлэх, дүн шинжилгээ хийх, бизнес эрхлэгчдэд шийдвэр гаргах, ажлаа явуулахад зориулсан нарийвчилсан мэдээллийн эх үүсвэр бий болгох ач холбогдолтой юм. 
• Энхийг сахиулагчдын олон улсын өдөр 5 дугаар сарын 29-ний өдрийг Монгол Улсад “Энхийг сахиулагчдын өдөр” болгон тэмдэглэж байхаар шийдвэрлэлээ. Энэ дагуу Монгол Улсын Зэвсэгт хүчин энхийг дэмжих ажиллагаанд оролцож эхэлсний 10 жилийн ойн арга хэмжээг орон даяар өргөн хүрээнд зохион байгуулахыг Батлан хамгаалахын сайд Ж.Энхбаярт даалгасан байна.
• Нисэхийн эрэн хайх, авран туслах үйл ажиллагааны олон улсын хамтарсан сургуулилтыг Монгол Улсад зохион байгуулах үүрэг бүхий Ажлын хэсэг байгуулахаар болов.
• Монгол Улсаас Бутаны Вант Улс, Бүгд Найрамдах Панам Улстай дипломат харилцаа тогтоох тухай УИХ-ын тогтоолын төслийг хэлэлцэн дэмжиж УИХ-д өргөн мэдүүлэхээр тогтлоо.
• ОХУ-ын Москва хотноо болсон М.И.Глинскийн нэрэмжит олон улсын дуурийн дуулаачдын уралдаан, Монакогийн Вант Улсын Монте Карло, БНХАУ-ын Учао хотод зохиогдсон олон улсын циркчдийн уралдаан, АНУ-д болсон Барток Кабалевский-Прокофьевийн нэрэмжит олон улсын төгөлдөр хуурчдын уралдаанд амжилттай оролцон тэргүүн болон хоёр, гуравдугаар байр эзэлсэн нэр бүхий уран бүтээлчдэд нийт 200 сая төгрөгийн мөнгөн шагнал олгохоор боллоо.