Ангилал: мэдээ-мэдээлэл

Мал сүрэг, эд хөрөнгө, машин техник, хашаа байшиндаа анхаарал тавьж, тоолж, бүртгэлжүүлдэг манай улсад өнөөдрөөс нэгэн өөр өнгө бүхий, чухал арга хэмжээ бодитоор эхэллээ. Монгол Улсын Ерөнхий сайд, Монгол ардын намын дарга  С.Батболдын санаачилсан 18 хүртлэх насны бүх хүүхдийг эрүүл мэндийн үзлэгт  хамруулах, эрүүл чийрэг өсгөлүүн бие бялдартай болгоход чиглэгдсэн ажил өнөөдөр улс орон даяар “Эрүүл хүүхэд-Монголын ирээдүй” уриатайгаар эхэлж байна. Аав, ээжийн нандин эрдэнэ, улс орны ирээдүй болсон бяцхан үрсийнхээ эрүүл мэндэд анхаарах чухал ажлаа Монголын төр 1990-ээд оноос хойш таг мартсан гэж хэлж болно. Эмч нар ч үүнийг өнөөдөр хүлээн зөвшөөрөн ярьж, “Эрүүл хүүхэд” аяныг хоёр гараа өргөн талархан хүлээн авч байна.

”Эрүүл монгол хүн” хэмээсэн хөтөлбөр хэдэн жилийн өмнө хэрэгжсэн ч үүнд хүүхдүүд хамрагдаагүй. Тиймээс Ерөнхий сайд С.Батболд ирээдүй хойчийнхоо төлөө цагаа олсон буянтай ажлыг эхлүүлж байгаад талархаж байгаагаа Ардын эмч, Хүний гавьяат эмч, хүүхдийн зөвлөх эмч Д.Малчинхүү илэрхийлээд Монголын мянга мянган хүүхдийн эрүүл мэндийн төлөөх энэхүү ажилд хичээнгүйлэн зүтгэж, хөтөлбөрийн гадна нэг ч хүүхэд үлдээлгүй хамруулахын төлөө ажиллах болно гэдгээ хэлж байлаа.

Монгол Улсын Ерөнхий сайд С.Батболд санаачилсан ажил нь бодит амьдрал дээр хэрхэн бууж, ажил хэрэг болж байгаатай танилцахаар хүмүүсийн нэрлэж заншсанаар Эх, нялхсын эрдэм шинжилгээний төв буюу Эх хүүхдийн эрүүл мэндийн үндэсний төв болон “Вербист” асрамжийн төвөөр очлоо. Эх хүүхдийн эрүүл мэндийн үндэсний төвд Ерөнхий сайдыг очиход Нийслэлийн 28 дугаар сургуулийн хүүхдүүд үзлэг оношилгоонд хамрагдаж байлаа.

Ерөнхий сайд эхлээд нүдний эмчийн өрөөгөөр орлоо. Өглөөнөөс хойш 60-аад хүүхэд үзлэгт хамрагдсанаас 10 гаруй нь  харааны доголдолтой, нүдний шил зүүх шаардлагатай. Гэсэн ч эдгээр хүүхэд ийм үзлэгт орж хараагаа нягтлуулж байгаагүйгээс бүгд шил зүүдэггүй, хараа муутай гэдгээ ч мэдэхгүй байна гэж эмч хэллээ.

Мөн ерөнхий үзлэг хийж байгаа эмч хүүхдүүдийн өсөлт бойжилт хэвийн байгаа ч хөдөлгөөний дутагдалтай байгаа талаар Ерөнхий сайдад хэллээ. Эдгээр нь хүүхдүүд маань зурагт их үздэг, компьютерийн ард удаан хугацаагаар суудаг, спортоор хичээллэхгүй байгаатай холбоотой. Тиймээс ерөнхий боловсролын сургууль бүрийг спорт заалтай болгох ажлыг яаравчлах үүргийг БСШУ-ы сайд Ё.Отгонбаярт өглөө. Ерөнхий сайдыг очиход “Вербист” асрамжийн газрын 50 хүүхэд үзлэг оношилгоондоо ид хамрагдаж байлаа.

Эдгээр хүүхдийн дунд түрүүчийн адил хоолойн өвчлөл элбэг байсан ч харааны доголдолтой нэг ч хүүхэд байсангүй. Мөн аав ээжийнхээ асрамжид байдаг хүүхдүүдтэй харьцуулахад биеийн өсөлт, хөгжлөөр арай илүү байна гэсэн дүгнэлтийг эмч нар хийжээ. Энэ нь хүүхдүүд тогтсон цагт чанартай, тэжээллэг хооллодогоос гадна биеийн тамирын дасгал хөдөлгөөн хийдэг, зурагт, компьютер шагайж удаан хугацаагаар суудаггүйтэй нь холбоотой гэж эмч нар тайлбарлаж байлаа.

Монгол Улсын Ерөнхий сайд эмч, багш нартай уулзаж, ярилцахдаа “Үнэт эрдэнэ болсон хүүхдүүддээ анхаарал тавих нь төр засгийн үүрэг. Хүүхдүүдийн эрүүл мэндэд гагцхүү ээж, аавууд анхаарал тавих бус төр засаг оролцож, манлайлал үзүүлье гэсэн юм. “Эрүүл хүүхэд” аяны үр дүнд мэдээллийн нэгдсэн сан бий болно. Хүүхдүүдийн маань биеийн хөгжил, эрүүл мэнд нь ямар байна гэхчлэн гол мэдээллийг бий болох үзлэг оношилгоог хийж байна. Үүний дүнд бид юунд анхаарах, ямар эмчилгээ, сургалт, урьдчилан сэргийлэх арга хэмжээ явуулах вэ гэдгээ цогцоор нь тодорхойлно. Хүн ам, тэр дундаа хүүхдийн эрүүл мэндийн талаар явуулах бодлого харагдах учиртайг хэлж байлаа.

Энэ үеэр нэгэн сэтгүүлч Ерөнхий сайдаас “Та таван хүүхэдтэй, өнөр бүлийн эзэн. Хүүхдүүдийнхээ эрүүл мэндэд хэрхэн анхаардаг вэ” гэж сонирхоход Ерөнхий сайд С.Батболд “Ажилдаа дарагдаад хүүхдүүдийнхээ эрүүл мэндэд цаг зав гаргаж чаддаггүй аав ээжүүд олон. Хариуцлагатай сайн аав, ээжүүд ч бий гэж хэлээд “Эрүүл хүүхэд” аянд багш, сурган хүмүүжүүлэгчид,  эцэг эхчүүдийг идэвхтэй оролцохыг уриаллаа гэж Засгийн газрын Хэвлэл мэдээллийн албанаас мэдээллээ. 

 

Монгол Улсын Ерөнхий сайд С.Батболдын санаачилсан “Эрүүл хүүхэд” аян 2012 оны 03 дугаар сарын 19-ний өдөр орон даяар эхэллээ. Нийслэл хотод энэ арга хэмжээний нээлт Соёлын төв өргөөнд болж гүйцэтгэх засаглалын тэргүүнээс гадна Эрүүл мэндийн яам, сургууль, эцэг, эхчүүд, хүүхдийн төлөөлөл оролцсон байна. 18 хүртэлх насны бүх хүүхдийг дотор, амны хөндий, чих, хамар хоолой, нүдний ерөнхий үзлэгт хамруулж, бие бялдрын хөгжлийг үнэлж, эрүүл болгох, хүүхдийн эрүүл мэндийн тухай мэдээллийн сан бий болгон, эрүүл мэндийн байгууллагуудын бүртгэлийг сайжруулах нь “Эрүүл хүүхэд-Монголын ирээдүй” аяны гол зорилго юм.

Манай улсын нийт хүн амын 36 хувийг 18 хүртэлх насны хүүхэд буюу хүн амын гуравны нэгээс илүү хувийг 18 хүртэлх насныхан эзэлдэг. Энэ нь манай орны ирээдүй өөдрөг, гэгээлэг, хөгжлийн асар их нөөц, боломж байгааг харуулсан хэрэг гэж Ерөнхий сайд С.Батболд үзэж байна. Гэхдээ улс орны ирээдүй болсон хүүхэд, багачууд эрүүл байх нь амжилтад хүрэх үндэс хэмээн гүйцэтгэх засаглалын тэргүүн үзэж “Эрүүл хүүхэд” аяныг санаачилж, Удирдах хороог нь өөрөө ахлан ажиллаж байгаа юм.

Аяны нээлтэд Монгол Улсын Ерөнхий сайд С.Батболд хэлэхдээ хүүхдийн өвчлөлийг арилгах, өвчлөлөөс урьдчилан сэргийлэхээс гадна эрүүл орчинд сурч боловсрох, амьдрахад төр, засгаас эхлээд эцэг, эхчүүд бүгд хамтран зүтгэх ёстойг тэмдэглэв. Мөн эрүүл мэндийг дэмжигч цэцэрлэг, сургууль, хамт олон болоход идэвхтэй оролцож, хүүхдийн төлөө хүн бүр За гэж хэлэхийг Засгийн газрын тэргүүний хувьд уриаллаа. Өмнө нь манай улс “Эрүүл монгол хүн” хөтөлбөр хэрэгжүүлсэн ч үүнд хүүхэд, залуус хамрагдаагүй юм. Статистикийн тоо баримтаас харвал 10 мянган хүүхдэд ногдох өвчлөл нялхсын хувьд 48,5, 1-4 хүртэлх насанд 72,3, 5-15 насанд 126,7, 16-19 насанд 66,8 хувьтай байна.

Хүүхдүүд ихэвчлэн амьсгал, хоол боловсруулах болон шээс, бэлгийн тогтолцооны өвчин тусдаг бол өнгөрсөн жил эрүүл мэндээр цэргийн албанд тэнцээгүй залуусын дунд дотор, нүдний эмгэг, чих, хамар хоолой, жин, өндрийн алдагдал, мэдрэлийн өвчин зонхилжээ. Эрүүл мэндийн сайд Н.Хүрэлбаатарын хэлснээс үзвэл манай улсын насанд хүрсэн, архаг өвчтэй хүмүүсийн 60 хувь нь хүүхэд насандаа өвчилж, энэ нь олон жилийн дараа бусад өвчний суурь болж архагшдаг байна. Иймээс аяны хүрээнд 18 хүртэлх насны бүх хүүхдийг ерөнхий үзлэгт хамруулж, өвчтэй бол эмчлэх нь ирээдүйдээ хийж байгаа том хөрөнгө оруулалт гэж салбарын сайд хэллээ.

47 жил хүүхдийн эрүүл мэндийн төлөө зүтгэсэн Монгол Улсын Ардын эмч, Хүний гавьяат эмч, Анагаах ухааны доктор, профессор Д.Малчинхүү “Эрүүл хүүхэд” аяны нээлтийн арга хэмжээний хүндэт зочин байлаа. Тэрээр энэ аяныг маш их талархан хүлээн авч байгаагаа илэрхийлээд 18 хүртэлх насны бүх хүүхдийг үзлэгт хамруулж, өвчтэйг нь эмчлэх гэж байгаа нь ирээдүйн насанд хүрэгсдийн эрүүл мэндэд анхаарч байна гэсэн үг гэлээ. Мөн эцэг, эхчүүд хүүхдүүдээ, багш, сурган хүмүүжүүлэгчид сурагчдаа үзлэгт хамруулахаас гадна өөрийнхөө хэдэн мянган шавь болох эмч, эмнэлгийн ажилтнуудыг энэ аянд идэвхтэй оролцож, хариуцлагатай хандахыг захиж байлаа.

Хүүхдийн хичээл, сурлагын амжилт эрүүл мэндийн байдлаас нь шалтгаалан харилцан адилгүй байдаг. Өөрөөр хэлбэл эрүүл хүүхэд илүү сайн суралцдаг гэж 17 жил бага ангийн багшаар ажиллаж байгаа, нийслэлийн 13 дугаар сургуулийн багш Ж.Одгэрэл үззж байна. Тус сургуульд суралцаж байгаа хүүхдүүдийн дунд чих, хамар хоолой, дотор, амны хөндийн өвчлөл багагүй. Өрхийн эмнэлэгт хандая гэхэд нарийн мэргэжлийн эмч байдаггүй, хувийн эмнэлэг төлбөр өндөр гээд хүндрэл цөөнгүй гардаг. Энэ бүх асуудлыг аяны хүрээнд шийдэх гэж байгаад тэрээр талархаад “Эрүүл хүүхэд” аянд идэвхтэй оролцож сурагчдаа хамруулахыг багш, сурган хүмүүжүүлэгч нартаа уриаллаа.

970 гаруй мянган хүүхдийн эрүүл мэндэд Монгол Улсын Засгийн газар онцгойлон анхаарч аян зохион байгуулж байгаад Биеийн тамирын сургалттай сургуулийн 10 дугаар ангийн сурагч Б.Дэмбэрэлдагва талархаж байгаагаа илэрхийлэв. Тэрээр эрүүл байхын тулд зөв зохистой хооллож, хичээл, амралтаа зохицуулан, биеийн тамир, спортоор хичээллэж байхыг үе тэнгийнхэн болон дүү нартаа уриаллаа. “Эрүүл хүүхэд” аяны хүрээнд зарцуулагдах 18 тэрбум төгрөгийг Засгийн газар шийдвэрлэж, үзлэгт хамрагдах хүүхдийнх нь тоогоор аймаг, дүүргийн нэгдсэн эмнэлэгт шилжүүлээд байна. 

Аяныг бодит үр дүнд хүргэж, 18 хүртэлх насны хүүхдүүдээ эрүүл бие бялдартай болгоход Засгийн газар, эрүүл мэнд, боловсрол гээд бүх шатны төрийн байгууллагын хүчин зүтгэлээс гадна төрийн бус байгууллага, аж ахуйн нэгж, иргэд, ялангуяа эцэг, эхчүүдийн оролцоо хамгаас чухал юм. “Эрүүл хүүхэд” аяны эхний шатыг 5 дугаар сарын 30 хүртэл, хоёрдугаар шатыг 6 дугаар сарын 1-нээс 12 дугаар сарын 30 хүртэл явуулна гэж Засгийн газрын Хэвлэл, мэдээллийн албанаас мэдээллээ.

Эх орныхоо эрх чөлөө, тусгаар тогтнолын төлөө цогтой тэмцэж ирсэн үе үеийн халуун эх орончдын үргэлжлэл болж эх орноо батлан хамгаалах хариуцлагатай бөгөөд хүндтэй үйл хэргийг үргэлжлүүлэн байгаа цэрэг эрс өнөөдөр Монгол цэргийн өдөр, орчин цагийн Зэвсэгт хүчин үүсэн байгуулагдсаны 91 жилийн ойн баяраа тэмдэглэж байна. Монгол Улсын Ерөнхий сайд С.Батболд түүхт энэ өдөр ололт амжилтаа дүгнэн, цаашдын зорилтоо тодорхойлж байгаа Зэвсэгт хүчин, цэрэг эрсийнхээ баярын арга хэмжээнд оролцож, эх орноо хамгаалах ариун үйл хэрэгт залуу нас, эрч хүч, эрдэм боловсролоо харамгүй зориулсан ахмадуудад Засгийн газрын нэрийн өмнөөс болон хувиасаа чин сэтгэлийн халуун баяр хүргэлээ.

Ерөнхий сайд энэ үеэр Зэвсэгт хүчнийг хөгжүүлэх, НҮБ-ын энхийг дэмжих ажиллагаанд оролцох чадавхийг нэмэгдүүлэх, цэргийн албан хаагчид, ахмад дайчдын нийгэм, эрх зүйн баталгааг бүрдүүлэхэд чиглэсэн идэвх санаачилга, үйл ажиллагааг тууштай дэмжиж байгаагаа илэрхийллээ. Мөн улс орны батлан хамгаалах салбарт бүхий л амьдралаа зориулж, хүнд хэцүү цагийн дайн байлдаан, энхийн бүтээн байгуулалтад манлайлан зүтгэж ирсэн ахмад дайчид болон өнөөгийн офицер, ахлагч нарынхаа нийгмийн хамгааллын асуудлыг онцгой анхаарч байгаагаа хэллээ.

Өнгөрсөн хугацаанд Монгол Улсын Засгийн газраас “40000 айлын орон сууц” хөтөлбөр хэрэгжүүлж батлан хамгаалах салбарын олон арван албан хаагч энэ хөтөлбөрт хамрагдаад байна. Үүгээр зогсохгүй “100 мянган айлын орон сууц хөтөлбөр”-ийн хүрээнд 1662 цэргийн албан хаагчийн орон сууц, “Ахлагч” амины орон сууцны хотхоныг хот, хөдөө орон нутагт барих зорилт тавьж, улс орны бусад бүтээн босголтын ажилд барилгын цэргийн ангиуд, батлан хамгаалах салбарын бие бүрэлдэхүүнийг оролцуулж эхлээд байгаа тухай Засгийн газрын тэргүүн энэ үеэр дуулгасан нь цэрэг эрсдээ барьсан түүний бэлэг байлаа.

Монгол Улсын Ерөнхий сайд С.Батболд Япон Улсад айлчлах үеэрээ Япон улсын Парламентын ордонд зочилж, Парламентийн зөвлөхүүдийн  танхимын дарга К.Хирата болон Төлөөлөгчдийн танхимын дарга Т.Ёкомичи нартай уулзлаа. Зөвлөхүүдийн танхимын дарга К.Хирата өнгөрсөн оны 11 дүгээр сард Парламентын энэхүү дээд танхимын даргаар томилогдсон бөгөөд үүнд нь Ерөнхий сайд С.Батболд баяр хүргэлээ. Монгол Улсын Их хурлын дарга Д.Дэмбэрэл гадаадын анхны зочин нь болсон талаар ноён К.Хирата хэлж байлаа. Засгийн газрын тэргүүн ч түүнд Монгол Улсын УИХ-ын даргын мэндчилгээг дэвшүүлж, УИХ дахь Японы бүлэг маш идэвхтэй ажилладаг гэж тэмдэглэлээ.

Япон Монгол улсын хооронд дипломат харилцаа тогтоосны 40 жилийн хүрээнд болж буй энэхүү өндөр дээд хэмжээний айчлал нь хоёр орны харилцааг шинэ түвшинд гаргаж, цаашид улс төр, эдийн засаг, худалдаа, хөрөнгө оруулалтын харилцааг Стратегийн түншлэлийн  тухай 2010 оны хамтарсан мэдэгдлийн үзэл санааны дагуу гүнзгийрүүлэн хөгжүүлэхийн төлөө байгаагаа илэрхийллээ.

Эдгээр уузлалтын үеэр Ерөнхий сайд С.Батболд иргэдийн харилцан зорчих нөхцөлийг хөнгөвчлөх, олон удаагийн урт хугацаатай визийн журам нэвтрүүлэх чиглэлээр тодорхой арга хэмжээ авахад дэмжлэг үзүүлэхийг хүслээ. Монгол Улсын Засгийн газар Монгол руу зорчих япон иргэдийг тодорхой хугацаагаар визээс чөлөөлөх шийдвэр гаргасанд талархаж буйгаа Парламентын зөвлөхүүдийн  танхимын дарга К.Хирата болон Төлөөлөгчдийн тахимын дарга Т.Ёкомичи нар илэрхийлээд Японд зорчих монгол иргэдийн визийн нөхцөлийг хөнгөвчлөх асуудлаар үргэлжлүүлэн судалж ажиллахаа илэрхийллээ.

 

Японы Засгийн газрын урилгаар тус улсад албан ёсны айлчлал хийж байгаа Монгол Улсын Ерөнхий сайд С.Батболдын айлчлал Осака хотноо үргэлжилж байна. Хоёр орны хооронд дипломат харилцаа тогтоосны 40 жилийн түүхийн хуудсыг баяжуулах нэгэн арга хэмжээ Осака хотод өнөөдөр болсон нь Монгол Улсын Ерөнхий консулын газрын нээлтийн ажиллагаа байлаа. 

Монгол Улсын Ерөнхий сайд С.Батболд нээлтийн арга хэмжээнд оролцохдоо  Кансай бүсийн төв Осака хот нь олон зуун жилийн түүхтэй, Япон төдийгүй Зүүн Азийн бүс нутгийн эдийн засаг,  аж үйлдвэр,соёл, боловсролын томоохон цөмүүдийн нэг. Осака хотод Монгол Улс Ерөнхий консулын газраа байгуулж байгаа нь манай хоёр орны харилцааны түүхэнд нэгэн шинэ хуудсыг нээж байна гэдгийг тодотгож байлаа. Хоёр орны харилцааг хөгжүүлэхэд Кансайн бүс чухал хувь нэмэр оруулж ирсэн бөгөөд Монгол, Японы хоорондын агаарын замын гараа Кансайн олон улсын нисэх онгоцны буудлаас эхэлж байсныг тэмдэглэлээ.

Япон Улстай найрсаг харилцаа, хамтын ажиллагаагаа Стратегийн түншлэлийн зарчмаар цаашид бататган хөгжүүлэх нь Монгол Улсын гадаад бодлогын тэргүүлэх чиглэлийн нэг. Хоёр орны худалдаа, эдийн засгийн хамтын ажиллагааг цогц хэлбэрээр хөгжүүлэх зорилгоор Эдийн засгийн түншлэлийн хэлэлцээр (EPA) байгуулах албан ёсны хэлэлцээг эхлүүлэх талаар Японы Ерөнхий сайд Ё.Нодатай хийсэн  хэлэлцээний үеэр тохирсныг Ерөнхий сайд С.Батболд мэдэгдээд энэ зорилтыг хэрэгжүүлж, бодит ажил болгоход Ерөнхий консулын газар чухал үүрэг гүйцэтгэх учиртайг чухалчиллаа.

Мөн Кансай бүс нутгийн үйлдвэрлэл эрхлэгчдэд Монголын зах зээлийн нөөц, бололцоо, хөрөнгө оруулалтын орчныг сурталчлан таниулах, тус бүс нутгийн жижиг, дунд үйлдвэрийн дэвшилтэт техник, технологийг эх орондоо нэвтрүүлэх,  худалдаа, эдийн засгийн харилцан ашигтай хамтын ажиллагааг хөгжүүлэхэд үйл ажиллагаагаа чиглүүлж ажиллахыг үүрэг болголоо.

Энэхүү консулын газрыг нээхэд үнэтэй дэмжлэг үзүүлж ажилласанЯпон Улсын ГХЯ-ны Осака дахь салбар, мужийн захирагч, хотын дарга, Осака дахь ЖЕТРО байгууллага болон бусад холбогдох байгууллага, хувь хүмүүст Монгол Улсын Засгийн газрын тэргүүн талархал илэрхийлээд Монгол, Японы харилцаа, Монгол-Кансайн харилцаа  улам бүр өргөжин хөгжихийн ерөөл дэвшүүлэв гэж Засгийн газрын Хэвлэл, мэдээллийн албанаас мэдээллээ.

2012 оны 3 дугаар сарын 12-ны өдөр

Монгол Улсын Ерөнхий сайд Сүхбаатарын Батболд Япон Улсын Засгийн газрын урилгаар 2012 оны 3 дугаар сарын 10-15-нд Япон Улсад албан ёсны айлчлал хийв. Ерөнхий сайд С.Батболд 12-ны өдөр Японы Угсаа залгамжлах Хунтайж Нарухитод бараалхаж, Япон Улсын Ерөнхий сайд Ё.Нодатай албан ёсны хэлэлцээ хийв. Ерөнхий сайд С.Батболд айлчлалынхаа үеэр Япон Улсын Парламентын Төлөөлөгчдийн Танхимын дарга Т.Ёкомичи, Зөвлөхүүдийн Танхимын дарга К.Хирата нарт бараалхаж, мөн Осака хотод зочилж, Монгол Улсын Ерөнхий Консулын газрын нээлтийн арга хэмжээнд оролцохоор төлөвлөж байна. Талууд　Монгол Улс, Япон Улсын хооронд байгуулсан баримт бичгүүдийн үзэл санаа, хоёр орны хооронд тогтсон итгэлцэл, найрамдалт харилцааг үндэс болгож, энэхүү айлчлалын дүнгээр доорхи хэвлэлийн хамтарсан мэдэгдлийг гаргав.

1.    Японы тал Япон Улс нь Монгол Улсын ардчилал, зах зээлийн эдийн засгийн тогтолцоонд шилжих үйл явцыг анхнаас нь тууштай дэмжиж ирсэн болон “эртний хийгээд шинэ хөрш орон” болох Монгол Улсын ардчилсан хөгжил нь Монгол Улсын хувьд төдийгүй Япон, Зүүн хойд Азийн бүс нутгийн энх тайван, тогтвортой байдалд хувь нэмэр оруулна гэдэгт итгэл төгс байгаагаа илэрхийлэв. Монголын тал Япон Улс нь нийтлэг үнэт зүйл бүхий уламжлалт найрсаг харилцаатай орон бөгөөд Монгол Улсын гуравдахь хөрш орнуудаас анхлан“Стратегийн түншлэл”-ийн харилцаа хөгжүүлж буй чухал түнш орон болохыг мэдэгдэв.

2.    Японы тал Зүүн Японы байгалийн гамшгийн үеэр Монгол Улсын Засгийн газар, ард түмнээс үзүүлсэн сэтгэл санаа, эд материалын элгэмсэг тусламжид дахин талархал илэрхийлэхийн сацуу олон нийтэд нээлттэйгээр сэргээн босголтын ажлыг улам бүр эрчимжүүлэх, сэргээн босголтын ажлыг цаашид Японы эдийн засгийг бүхэлд нь сайжруулах хөшүүрэг болгон ажиллах шийдвэр төгс байгаагаа илэрхийлэв. Монголын тал Зүүн Японы байгалийн гамшигт нэрвэгдэгсдэд гүн эмгэнэлээ дахин илэрхийлэхийн сацуу Монгол Улсын Засгийн газар, ард түмнээс үзүүлсэн дэмжлэг нь Монголын ардчилал, шинэчлэлийг анхнаас нь 20 жилийн турш тууштай дэмжиж ирсэн Япон Улсын дэмжлэгт нэн талархаж буйн илэрхийлэл болохыг тэмдэглэж, Япон Улс сэргээн босголтыг богино хугацаанд хэрэгжүүлнэ гэдэгт итгэж байгаагаа илэрхийлэв.

3.   Талууд сүүлийн жилүүдэд хоёр орны харилцаа найрсгаар хөгжиж байгааг харилцан нотлохын хамт хоёр орны хооронд дипломат харилцаа тогтоосны 40 жилийн ой тохиож буй 2012 оноос  дараах 4 баганад суурилан хоёр орны харилцааг шат ахиулж, гадаад бодлогын нийтлэг зорилт болох 2010 оны “Стратегийн түншлэл”-ийн мэдэгдлийн бодит хэрэгжилтийг улам эрчимжүүлэхээ харилцан нотлов.

（１）Стратегийн түншлэлийн яриа хэлэлцээг эрчимжүүлэх нь

• Талууд энэ оны эхээр Япон Улсын Батлан хамгаалахын сайд Я.Ичикава, Засгийн газрын хэрэг эрхлэх газрын дэд дарга Ц.Сайто зэрэг албаны хүмүүсийн Монгол Улсад хийсэн айлчлалын дараахан Монгол Улсын Ерөнхий сайд С.Батболд Япон Улсад айлчилснаар 2012 оны эхнээс дээд, өндөр хэмжээний харилцан айлчлал эрчимжиж, дипломат харилцаа тогтоосны 40 жилийн ой амжилттай эхэлж байгааг сайшаан тэмдэглэв. Талууд цаашид дээд, өндөр хэмжээний харилцан айлчлалын давтамжийг улам нэмэгдүүлэх, түүнчлэн Гадаад харилцааны сайд нарын уулзалт зэрэг гадаад харилцаа эрхэлсэн төрийн төв байгууллага хоорондын идэвхтэй хамтын ажиллагааг өрнүүлж, яриа хэлэлцээг үргэлжлүүлэхийн чухлыг харилцан нотлов. Ялангуяа, хоёр улсын Гадаад харилцааны яамд хооронд хэрэгжүүлж ирсэн Бодлогын зөвлөлдөх уулзалт, Бүс нутгийн асуудлаарх уулзалтуудыг үргэлжлүүлэх, мөн гадаад харилцаа, аюулгүй байдал, батлан хамгаалахын асуудал эрхэлсэн байгууллага хоорондын зөвлөлдөөнийг шинээр бий болгох асуудлыг судлах зэргээр олон түвшинд стратегийн яриа хэлэлцээг бэхжүүлж ажиллахаар санал нэгдэв.

• Талууд хоёр орны аюулгүй байдлын салбар дахь хамтын ажиллагааны чухлыг онцлон тэмдэглэхийн зэрэгцээ энэ оны 1 дүгээр сард байгуулсан “Монгол Улсын Батлан хамгаалах яам, Япон Улсын Батлан хамгаалах яам хоорондын батлан хамгаалах салбарт хамтран ажиллах санамж бичиг”-т тулгуурлан энэхүү салбарын хамтын ажиллагаа, айлчлал солилцоо нь, тухайлбал хоёр яамны удирдлагын түвшний уулзалтууд, анги, салбаруудын айлчлал солилцоог хэрэгжүүлэх, чадавхийг нэмэгдүүлэхэд дэмжлэг үзүүлэх зэргээр шинэ шатанд гарч буйд сэтгэл хангалуун байгаагаа илэрхийлж, энэ нь “Стратегийн түншлэл”-ийг хөгжүүлэхэд чухал хувь нэмэр оруулна гэдэгт санал нэгдэв.

• Талууд гадаад бодлогын нэгдсэн зорилтоо “Стратегийн түншлэл” болгон шат ахиулсанаас хойш хоёр улсын засгийн газрын холбогдох байгууллага хооронд бодит хамтын ажиллагааны тогтолцоог шинээр бүрдүүлэх олон төрлийн яриа хэлэлцээ өрнөж буйг өндөр үнэлж, Засгийн газар хоорондын харилцаа холбоог улам бүр нягтруулж ажиллахаар санал нэгдэв.

（２）Эдийн засгийн цогц харилцааг бэхжүүлэх нь

• Талууд “Стратегийн түншлэл”-ийн томъёололд дүйцэхүйц харилцааг хөгжүүлэх үүднээс харилцан ашигтай,бие биенээ нөхсөн эдийн засгийн хамтын ажиллагааг хөгжүүлэхийн чухлыг дахин нотлов. Үүнийг бодитоор хэрэгжүүлэх, хоёр улсын эдийн засгийн харилцааны хөгжлийн нөөц бололцоог илүү нээх үүднээс талууд Монгол Улс, Япон Улсын хооронд Эдийн засгийн түншлэлийн хэлэлцээр (EPA) байгуулах асуудлаархи Засгийн газар, хувийн хэвшлийн хамтарсан судалгааны хэсгийн зөвлөмжийг мөн үндэслэн Эдийн засгийн түншлэлийн хэлэлцээр байгуулах албан ёсны хэлэлцээг эхлүүлж, улмаар бэлтгэл уулзалтыг даруй зохион байгуулж ажиллахаар санал нэгдэв.

• Талууд хоёр улсын эдийн засгийн харилцааг бэхжүүлэх бүтэц болох Монгол, Японы Засгийн газар, хувийн хэвшлийн Худалдаа, хөрөнгө оруулалт, Эрдэс баялгийн асуудлаархи Хамтарсан зөвлөлдөх уулзалтын ач холбогдлыг дахин нотлохын хамт энэ онд Улаанбаатар хотноо зохион байгуулахаар төлөвлөж буй VI Зөвлөлдөх уулзалтыг амжилттай хэрэгжүүлэхэд хамтран ажиллахаар санал нэгдэв.

• Талууд Монголын уул уурхай, эрдэс баялгийн салбар дахь хамтын ажиллагаа нь хоёр улсын эрх ашигт нийцнэ гэдгийг дахин нотлов.Монголын тал өөрийн орны байгалийн баялаг, эрдсийн нөөцөө эдийн засгийн эргэлтэд оруулж, улс орныхоо эрчимтэй хөгжлийг хангах, улмаар бүс нутгийн хөгжил дэвшилд хувь нэмэр оруулах зорилт тавин ажиллаж байгааг тэмдэглэж, энэ салбарт японы байгаль орчинд ээлтэй, тэргүүний техник технологи, ноу-хауг ашиглах, нэмүү өртөг шингэсэн баялаг бүтээхэд Япон Улстай харилцан ашигтай хамтран ажиллах эрмэлзэлтэйгээ илэрхийлэв. Мөн Тавантолгойн уул уурхайн төсөлд Японы оролцоог хангах бодлогыг баримталж ажиллахаа илэрхийлэв.

• Түүнчлэн монголын тал уул уурхай тойрсон дэд бүтцийг хөгжүүлэхэд японы техник, технологи, хөрөнгийг ашиглаж хамтран ажиллах саналыг тавив. Японы тал монголын талын саналыг чухалчлан анхаарч үзэхээ илэрхийлж,түүний хэрэгжилтийг хангахад монголын тал эрчим хүч, эрдэс баялгийн хөрөнгө оруулалтын орчноо улам боловсронгуй болгох зэрэг арга хэмжээ авна гэдэгт итгэж байгаагаа илэрхийлэв.

• Монголын тал уул уурхайн үйлдвэрлэлийг дагасан дэд бүтэц, тухайлбал төмөр замын төслийг санхүүжүүлэхэд зориулж, Японы Олон улсын хамтын ажиллагааны Банк /JBIC/ -наас экспортын зээл олгох асуудлыг судалж байгаад талархал илэрхийлээд энэхүү санхүүгийн шинэ хамтын ажиллагааны эхлэлийг бэхжүүлж, зах зээлийн орчин, хөрөнгө оруулагчдийн сонирхлыг татахад анхаарч ажиллахаа мэдэгдэв. Мөн “Шинэ төмөр зам”, “100 мянган айлын орон сууц”, “Жижиг дунд үйлдвэрийг хөгжүүлэх” төсөл хөтөлбөрийг хэрэгжүүлэх хөрөнгийн эх үүсвэр бүрдүүлэхэд Япон Улсын Засгийн газрын самурай бондыг ашиглах хүсэлтээ японы талд илэрхийлэв. Японы тал үүнийг анхааралдаа авч,хоёр тал энэ асуудлаарсанал солилцож ажиллахаар тогтов.

• Монголын тал Япон Улсын Засгийн газрын Хөгжлийн Албан ёсны тусламж нь Монгол Улсын эдийн засгийн хөгжилд үлэмж хувь нэмэр оруулж ирсэнд талархал илэрхийлэхийн сацуу Монгол Улсын эдийн засаг эрчимтэй хөгжлийн шатанд гарч байгаа өнөө үед ч Япон Улсын тусламж дэмжлэг чухал ач холбогдолтой хэвээр болохыг тэмдэглэв. Нийгмийн салбарыг дэмжих хөтөлбөрийн хоёрдугаар ээлжийн хөнгөлөлттэй зээлийн төсөл, Улаанбаатар  хотын Гал түймэртэй тэмцэх техник хэрэгслийг сайжруулахад зориулсан буцалтгүй тусламж, Соёлын өвийн төвийн шинжилгээний тоног төхөөрөмжийг сайжруулахад зориулсан соёлын буцалтгүй тусламж болон Төслийн бус буцалтгүй тусламжийн Ноот бичиг, мөн Японы Олон улсын хамтын ажиллагааны банкнаас экспортын зээл авах, уул уурхай, дэд бүтэц, аж үйлдвэрийн салбарт төсөл хэрэгжүүлэх зорилгоор санхүүгийн хамтын ажиллагааг эхлүүлэх тухай Сангийн яам, Японы Олон улсын хамтын ажиллагааны банк хооронд байгуулах Харилцан ойлголцлын Санамж бичигттус тус гарын үсэг зурсанд Япон Улсын Засгийн газарт чин сэтгэлийн талархал илэрхийлэв.

• Хоёр тал Японы иенийн хөнгөлөлттэй зээлээр хэрэгжүүлэх “Улаанбаатар хотын олон улсын шинэ нисэх буудал” төсөл нь хоёр улсын хамтын ажиллагааны билэг тэмдэг болохыг тэмдэглэж, төслийн бодит хэрэгжилтийг хангах үүднээс хүчин чармайлтаа дайчлан ажиллахаар тохиров.

• Монголын тал гүүрэн гарц, автозам, төмөр зам зэрэг дэд бүтэц, эдийн засгийн хөгжлийг дэмжих боловсон хүчний хөгжил, эрчим хүчний салбар, агаарын бохирдол，дэлхийн дулаарал зэрэг хүрээлэн буй орчны асуудлаар японы талтай хөгжүүлэх хамтын ажиллагаанд ихээхэн найдлага тавьж байгаагаа илэрхийлэв.

• Хоёр тал сансрын технологийн салбарын хамтын ажиллагааг цаашид хөгжүүлэхээр санал нэгдэв.

• Японы тал Монгол Улс телевизийн өргөн нэвтрүүлгийн тоон системд шилжих судалгаа хийж байгаатай холбогдуулан японы системийг мөн хамруулан судлахыг хүсэлт болгож, монголын тал анхааралдаа авав.

• Монголын тал мал аж ахуй, газар тариаланг эрчимжүүлэх, хөдөө аж ахуйн бүтээгдэхүүнийг олон улсын стандартын дагуу боловсруулж, экологийн цэвэр бүтээгдэхүүн үйлдвэрлэх зорилт тавьж байгааг дурдаж,үүндЯпоны хөрөнгө, техник, технологийг ашиглаж хамтран ажиллах санал тавив. Монголын талын эл хүсэлтийг японы тал анхааралдаа авч, мал аж ахуй, газар тариалан, ХАА-н салбарын харилцаагаа цаашид ч өргөжүүлэхээ илэрхийлэв.

• Монголын тал Япон Улстай шинжлэх ухаан, боловсролын салбарт хамтын ажиллагааг өргөжүүлэн хөгжүүлэх нь Монгол Улсын хөгжилд чухал ач холбогдолтойг тэмдэглэж, шинжлэх ухаан, техник технологийн мэргэжлээр суралцах оюутан, дадлагажигч нарын тоог нэмэгдүүлэх хүсэлтийг тавив. Японы тал монголын талын хүсэлтийг анхааралдаа авав.

• Японы тал удахгүй батлагдах “Монгол Улсад үзүүлэх зээл тусламжийн Тусгай хөтөлбөр”-т үндэслэн тогтвортой хөгжлийг хангах талаар авч хэрэгжүүлж буй  Монгол Улсын Засгийн газрын хүчин чармайлтыг тууштай дэмжиж ажиллах, харилцан ашигтай бие биенээ нөхсөн бизнес, хөрөнгө оруулалтаар дамжин  хамтын ажиллагааг бэхжүүлэхээ илэрхийлэв.

（３）Иргэд хоорондын солилцоо, соёлын харилцааг идэвхжүүлэх нь

• Талууд 2012 онд хоёр талын хамтын хүчин чармайлтаар дипломат харилцаа тогтоосны 40 жилийн ойн арга хэмжээнүүд амжилттай хэрэгжиж байгааг үнэлж, улам нягт хамтран ажиллахаар тогтов. Мөн хоёр улсын Парламент дахь найрамдлын бүлгүүд болон найрамдлын нийгэмлэгүүд эдгээр арга хэмжээнд идэвхтэй оролцож, хувь нэмэр оруулж буйд талархал илэрхийлэв.

• Талууд дипломат харилцаа тогтоосны 40 жилийн ойн хүрээнд хоёр улсын иргэд хоорондын харилцан солилцоо,айлчлал улам идэвхжинэ гэдэгт найдаж байгаагаа илэрхийлэв. Японы тал 2010 онд монголын тал Монгол Улсад зорчих япон иргэдийг визээс чөлөөлөх шийдвэр гаргасныг өндөр үнэлэхийн сацуу Ерөнхий сайд С.Батболдын энэ удаагийн айлчлалын үеэр Осака хотод Монгол Улсын Ерөнхий Консулын газар нээгдэж байгаад баяр хүргэв.  Монголын тал Япон Улсад зорчих монгол иргэдийн визийн нөхцлийг улам хөнгөвчилнө хэмээн найдаж буйгаа илэрхийлэв. Японы тал монгол иргэдийн визийн нөхцлийг улам хөнгөвчлөх асуудлаар цаашид ч үргэлжлүүлэн судалж ажиллахаа илэрхийлэв.

• Японы тал 2009 оны 7 дугаар сард Монгол Улсын Засгийн газар, Япон Улсын Засгийн газар хооронд гаргасан Хэвлэлийн хамтарсан мэдэгдэлд тусгасан 3 жилийн хугацаанд 1000 хүүхэд залуучуудыг Япон Улсад хүлээн авч, зочлуулах хөтөлбөрийг дурдсан хугацаанаас нь өмнө хэрэгжүүлж дууссан болохыг мэдээлэв. Мөн монголын тал Зүүн Японы байгалийн гамшигт өртсөн иргэдийг Монгол Улсад урьж айлчлуулах зэргээр сайн санааны солилцоо хэрэгжүүлж ирсэнийг үнэлэхийн зэрэгцээ Зүүн Японы байгалийн гамшгийн дараах Японы сэргээн босголтын талаарх ойлголтыг гүнзгийрүүлэх үүднээс энэ онд хүүхэд залуучуудын солилцооны шинэ хөтөлбөр хэрэгжүүлж, Монголын 180 хүүхэд залуучуудыг өөрийн оронд урих “Бат бөх барилдлага” хөтөлбөрийг хэрэгжүүлэхээ илэрхийлэв. Монголын тал Японы хүүхэд залуучуудын солилцооны чиглэлээр хэрэгжүүлж буй арга хэмжээнд талархаж байгаагаа илэрхийлсэн бөгөөд талууд хүүхэд залуучуудын солилцоог цаашид улам идэвхижүүлэхийн төлөө хүчин чармайлт гаргаж ажиллахаар санал нэгдэв.

（４）Бүс нутаг болон олон улсын тавцан дахь асуудлаар хамтын ажиллагаагаа бэхжүүлэх нь

• Талууд Солонгосын хойгийн энх тайван, тогтвортой байдлыг хангах нь Монгол, Японы төдийгүй холбогдох бүх улс орны нийтлэг эрх ашигт нийцэхийг тэмдэглэж, Хойд Солонгосын удирдлагын өөрчлөлт зэрэг бүс нутгийн онцлог асуудлаархи хоёр орны ойлголтыг нэгтгэж, энэ асуудлаар үргэлжлүүлэн нягт  санал бодлоо солилцож, асуудалд бодитой, зүй зохистой хандаж ажиллахаар санал нэгдэв. Талууд саяхан болсон АНУ, БНАСАУ-ын яриа хэлэлцээний үр дүнг нааштай чухал алхам хэмээн үнэлж байгаагаа илэрхийлэв. 6 талт хэлэлцээ нь Солонгосын хойгийг цөмийн зэвсэггүй бүс болгох, цаашид ЗХА-ийн энх тайван, тогтвортой байдлыг хангах үр нөлөөтэй механизм гэж  хоёр тал санал нэгдэв. Монголын тал энэ үйл явцад дэмжлэг үзүүлэх, хувь нэмрээ оруулах эрмэлзлээ илэрхийлж, японы тал үүнийг анхааралдаа авав.

• Мөн хулгайлагдсан Япон иргэдийн асуудал зэрэгБНАСАУ, Япон Улсын хоорондыншийдвэрлэгдээгүй маргаантай асуудлуудыгцогцоор нь шийдвэрлэх ёстой гэсэнЯпон Улсынбайр суурийг Монгол Улс дэмжиж байгаагаа дахин нотлов.

• Талууд олон улсын энх тайван, аюулгүй байдлыг хангах болон  олон улсын хамтын нийгэмлэгийн өмнө тулгамдсан бусад асуудлаар хамтын ажиллагаагаа цаашид улам бүр бэхжүүлэхээ нотолж, НҮБ-ын Аюулгүйн Зөвлөлийн шинэчлэлийн асуудлаарх засгийн газар хоорондын яриа хэлэлцээг эрчимжүүлэх, НҮБ-ын Аюулгүйн Зөвлөлийн шинэчлэлийг түргэн хэрэгжүүлэх чиглэлд хамтран ажиллахаар санал нэгдэв. Монголын тал НҮБ-ын Аюулгүйн Зөвлөлийн шинэчлэл болон Япон Улсыг байнгын гишүүнээр сонгогдохыг Монгол Улс дэмжиж ирснийг тэмдэглэж, эл байр сууриа цаашид ч баримталж ажиллахаа нотлов.

• Японы тал Ардчилсан орнуудын хамтын нийгэмлэгийг даргалж буй Монгол Улсын гаргаж буй хүчин чармайлтыг өндрөөр үнэлж байгаагийн хамт талууд нийтлэг үнэт зүйлст тулгуурлан, ардчиллыг дэлгэрүүлэхийн төлөө хамтын ажиллагаагаа улам бэхжүүлж ажиллахаар санал нэгдэв.

• Монголын тал Ази, Номхон далайн бүс нутаг, түүний дотор Зүүн Азийн олон талт хамтын ажиллагааны механизмуудад нэгдэн орох эрмэлзэлтэй байгаа бөгөөд энэ талаар японы талын дэмжлэгт найдаж байгаагаа илэрхийлэв. Японы тал Ази, Номхон далайн бүс нутагт энх тайван, тогтвортой байдлыг хангахад нээлттэй бөгөөд олон давхарга бүхий сүлжээг бий болгож ашиглах шаардлагатай гэсэн байр сууринаас монголын талын хүсэл сонирхлыг үндэслэн санал солилцож ажиллахаа илэрхийлэв.

Монгол Улсын Ерөнхий сайд С.Батболд гуравдугаар сарын 12-ны өдөр Японы улсын  Ерөнхий сайд Ё.Нодатай албан ёсны хэлэлцээ хийлээ. Ноён Ё.Нода хүндэт зочноо Япон тусад тавтай морилохыг уриад Монгол Улсын Засгийн газрын тэргүүний тус улсад хийж буй айлчлал түүхэн ач холбогдолтой болж  байгааг үнэллээ. 

Монгол Улсын Ерөнхий сайд айлчлалаа нэг өдрөөр урагшлуулж Японы Зүүн бүс нутагт болсон байгалийн гамшигт амь үрэгдэгсдийн  дурсгалыг хүндэтгэх ёслолд оролцож  Монгол Улсын Засгийн газар, ард түмнийхээ нэрийн  өмнөөс гүн эмгэнэл илэрхийлж хүндэтгэл үзүүлсэнд гүнээ талархаж байгаагаа Япон улсын Ерөнхий сайд хэлэлцээний эхэнд онцлон тэмдэглэлээ. Хүнд хэцүү үед тусламжийн гараа сунгаж Японы ард түмэнтэй хамт байсан Монголын ард түмэнд талархаж байгаагаа илэрхийллээ.

Мөн Монгол Улс Япон улсыг гуравдагч хөршөө хэмээн зарласанд хүндэтгэж байгаагаа Ерөнхий сайд С.Батболдод илэрхийлэв. Монгол Улсын Ерөнхий сайд С.Батболд айлчлалд өндөр ач холбогдол өгч байгаад талархал илэрхийлээд энэхүү айлчлал нь хоёр орны хооронд дипломат харилцаа тогтоосны 40 жилийн  ойн хүрээнд тохиож байгаад баяртай байна гэлээ. 

Япон улс нь Монгол  улсын ардчилал зах зээлийн эдийн засагийн тогтолцоонд шилжих үйл явцыг анхнаас нь тууштай дэмжиж ирсэнд Ерөнхий сайд С.Батболд талархал илэрхийллээ. Монгол Улс нь гуравдагч хөрш орнуудаас анхлан  Япон улстай стратегийн түншлэлийн харилцааг хөгжүүлж байгааг онцлон тэмдэглэлээ. Энэ нь   хоёр улсын хооронд стратегийн түншлэлийг бодит утгаар нь хөгжүүлж, түүний эдийн засгийн агуулгыг тодорхойлох, бие биеэ нөхсөн, харилцан ашигтай бүх талын хамтын ажиллагааг хөгжүүлэх харилцааны шинэ шатанд ирснийг нотолсон явдал юм гэлээ.

Эдийн засгийн хамтын ажиллагааны хүрээнд эдийн засгийн түншлэлийн хэлэлцээр байгуулах албан ёсны хэлэлцээг даруй эхлүүлэхэд бэлэн байна. Манай ажлын хэсэг байгуулагдсан гэдгийг тэмдэглээд эдийн засгийн харилцааг шинэ шатанд гаргахад Японы дэвшилтэт, байгаль орчинд ээлтэй техник технологийг ашиглах, нэмүү өртөг шингэсэн баялаг бүтээх, боловсон хүчнийг бэлтгэхэд хамтын ажиллагааг хөгжүүлэх сонирхолтой байгаагаа илэрхийллээ. Ойрын хугацаанд хэрэгжүүлэх хамтын ажиллагааны гол сэдэв бол Тавантолгойн төсөл. Энэ төсөлд олон улсын нээлттэй тендер явагдаж байгаа гэдгийг Ерөнхий сайд С.Батболд хэлээд Монголын Засгийн газар энэ төсөлд Японы оролцоог хангах бодлогыг тууштай баримталж байгаа гэдгээ тэмдэглэлээ.

Бүтээн байгуулалтын томоохон төсөл, хөтөлбөрийг хэрэгжүүлэх зорилгоор Хөгжлийн банкаар дамжуулан “Шинэ төмөр зам”, “100 мянган айлын орон сууц”, “Жижиг дунд үйлдвэрлэлийг хөгжүүлэх” төсөл хөтөлбөрийг хэрэгжүүлэх хөрөнгийн эх үүсвэр бүрдүүлэхэд Япон Улсын Засгийн газрын Самурай бондыг ашиглах хүсэлтэй байгаагаа хэллээ. Мөн Монгол Улс сэргээгдэх эрчим хүчний ихээхэн нөөцтэй. Үүнийг Зүүн хойд Азийн бүс нутгийн эрчим хүчний хэрэгцээ шаардлагатай уялдуулан нүүрс болон сэргээгдэх эрчим хүчийг ашиглан эрчим хүчний шинэ эх үүсвэр барьж байгуулах, Монгол Улсаас эрчим хүч экспортлож, улмаар цаашид Японд хүртэл экспортлох Азийн супер дамжуулах сүлжээг байгуулах хувийн хэвшлийн санаачилгыг анхааралтай судалж, дэмжин ажиллах хэтийн зорилтын талаар хэлэлцээний үеэр Ерөнхий сайд С.Батболд тэмдэглэж байлаа. 

Эрчимжсэн мал аж ахуй, газар тариалангийн жижиг, дунд аж ахуйн нэгжийн чадавхийг нэмэгдүүлэх, экологийн цэвэр бүтээгдэхүүн үйлдвэрлэх, хамтарсан загвар үйлдвэр байгуулахад Японы буцалтгүй тусламж, иенийн хөнгөлөлттэй зээл чухал дэмжлэг байх болно гэж тэрбээр хэлээд энэ зорилгоор Япон Улсын Засгийн газрын КR-2 төслийг үргэлжлүүлэн авах сонирхолтой байгаагаа илэрхийллээ. Уулзалтын үеэр Ерөнхий сайд шинжлэх ухаан, техник технологийн мэргэжлээр суралцах оюутан, дадлагажигч нарын тоог нэмэгдүүлэх боломжийг судалж үзэх, их, дээд сургуулиудыг оюутны хотхоны хэлбэрээр хөгжүүлэх бүтээн байгуулалтын ажилд, тухайлбал техник, эдийн засгийн үндэслэл боловсруулахад дэмжлэг туслалцаа хүслээ.

Мөн Монгол Японы иргэд харилцан зорчих нөхцөлийг хөнгөвчлөх, эхний ээлжинд олон удаагийн, урт хугацаатай визийн журам нэвтрүүлэх, дипломат болон албан паспорттай иргэдийг визээс чөлөөлөх асуудлыг шийдэх чиглэлээр ажиллах, иргэдийн солилцоог нэмэгдүүлэх зорилгоор Монголын авиакомпаний нисэх онгоцыг Ханэда нисэх онгоцны буудалд руу тогтмол нислэг үйлдэхэд дэмжлэг үзүүлэхийг санал болголоо.  

Зүүн Японыг нэрвэсэн байгалийн гамшигт амь үрэгдэгсдийг хүндэтгэх гашуудлын ёслолд Монгол Улсын Ерөнхий сайд биечлэн оролцон Монголын ард түмнийхээ эмгэнэлийг илэрхийлсэнд гүнээ талархаж байгаагаа Японы Ерөнхий сайд Ё.Нода энэ үеэр  илэрхийллээ. Хоёр улс стратегийн түншлэлийн харилцааг амжилттай хөгжүүлж байгаа төдийгүй Ерөнхий сайдын энэ айлчлал нь энэ түншлэлийн агуулгыг тодорхойлно гэж үзэж байгаагаа ноён Ё.Нода дурьдлаа.  Үүний ач холбогдлыг айлчлалын дүнгээр гаргах хамтарсан мэдэгдэлд тусгахаар хоёр тал тохиролцлоо. 

Эдийн засгийн харилцааны хувьд хоёр тал харилцан ашигтай хамтын ажиллагааг хөгжүүлэх өргөн боломж байгаа бөгөөд энэ утгаараа эдийн засгийн түншлэлийн хэлэлцээр чухал үүрэг гүйцэтгэнэ. Энэ хэлэлцээрийг  байгуулах хэлэлцээг даруй эхлэхэд хоёр тал бэлэн болоод байна. Тавантолгойн төсөлд Японы тал оролцох нь хоёр талын харилцааны бэлэг тэмдэг болно гэж үзэж байна.  Японы Засгийн газраас Самурай бондын талаарх Монголын талын саналын талаар Японы тал анхааралтай судалж үзнэ гэдгээ илэрхийллээ.Мөн Японы телевизийн өргөн нэвтрүүлгийн тоон системийн загварыг Монгол Улсад нэвтрүүлэх сонирхолтой байгаагаа илэрхийллээ. Хоёр орны харилцаанд соёл, иргэд хоорондын солилцоо чухал үүрэг гүйцэтгэнэ.  Энэ жил Монголын талаас 180 залуучуудыг урьж Японд зочлуулахаар бэлтгэж байна. Иргэдийн зорчих нөхцөлийг хөнгөвчлөх талаар яриа хэлэлцээрээ үргэлжлүүлнэ. Японы иргэдийг монгол руу тодорхой хугацаагаар зорчиход визээс чөлөөлсөн явдалд талархаж байна гэлээ гэж Засгийн газрын Хэвлэл мэдээллийн албанаас мэдээллээ.