Ангилал: мэдээ-мэдээлэл

Кувейт Улсад албан ёсны айлчлал хийж байгаа Монгол Улсын Ерөнхий сайд С.Батболд дагалдан яваа төлөөлөгчдийнхөө хамт Кувейтийн шинжлэх ухаан  судалгааны хүрээлэнд зочиллоо. Тус хүрээлэн нь 1967 онд Японы “Арабиан Ойл” компани  Кувейтийн Засгийн газартай хийсэн газрын тосны гэрээний үүргийн биелэлт болон анх байгуулагдсан түүхтэй бөгөөд  газрын тос, цөл дэх хөдөө аж ахуй болон далайн биологи гэсэн 3 үндсэн чиглэлээр  сэдэвчилсэн судалгаа хийх зорилготой байжээ. Харин 1973 онд тус шинжлэх ухаан судалгааны хүрээлэн нь Эмирийн зарлигаар удирдах зөвлөлөөр дамжуулан сайд нарын зөвлөлийн шууд харьяанд орсон байна. Гэвч удалгүй бие даасан олон нийтийн хүрээлэн болгон өөрчилжээ.

Кувейтийн шинжлэх ухаан судлалын хүрээлэнгийн Ерөнхийлөгч Монголын төлөөлөгчдөд үйл ажиллагаа зорилтоо танилцуулахдаа жилийн 194 сая ам.долларын төсөвтэй тус хүрээлэн нь тодорхой салбараар асуудлын гүнд орж ажиллаж чаддаг, үр дүн нь ч амьдралд гардаг болохоор булангийн орнууддаа төдийгүй олон улсад танил болсон гэдгээ бардам хэлж байлаа. КШУСХ нь эдүгээ байгаль орчин, хот төлөвлөлт, хүнсний ба далайн нөөц, газрын тосны судалгаа шинжилгээ, технологи, эдийн засаг, усны нөөц гэсэн чиглэлүүдээр идэвхтэй үйл ажиллагаагаа явуулж байгаа аж.

Ерөнхий сайд тус хүрээлэнтэй танилцаад, өөрийн орны онцлог  болон зах зээлтэйгээ уялдсан тодорхой хэдэн гол чиглэлээр үйл ажиллагаагаа стандартын дагуу цомхон бүтэцтэй явуулж байгаа нь амжилттай үр дүнтэй ажиллах үндэс болж байгааг энэ хүрээлэнгийн жишээн дээр дагалдан яваа хүмүүст тайлбарлав. Үнэндээ дэндүү нүсэр бүтэц, хэдэн арван салбар хэлтэстэй манай шинжлэх ухааны хүрээлэн социализмын үеийн загвараасаа салж Кувейтийн энэ хүрээлэнгийн туршлагаар ажиллабал амжилтад хүрэх боломж байна. Кувейтийн шинжлэх ухаан судалгааны хүрээлэн манай БОАЖЯ-тай зарим тодорхой чиглэлээр хамтран ажиллаад эхэлсэн төдийгүй хамтарсан бааз байгуулсан, түүнийгээ  Монголыг Кувейттэй холбох гүүр хэмээн нэрлэх болсноо Ерөнхий сайдад дуулгалаа.

Мөн тус хүрээлэнгийн төрөлжсөн төв болох Үндэсний газар хөдлөлийн сүлжээ нь манай улсын газар хөдлөлтийн байдалд судалгаа хийгээд нааштай үзүүлэлт гарсныг сонирхуулав. Шинжлэх ухаан технологийн  ололтыг бодит амьдралд нэвтрүүлэх, судалгаа шинжилгээг мэргэжлийн түвшинд хийж байгаа энэ туршлагаасаа монголчуудтай хуваалцаж өргөн хүрээнд  хамтран ажиллахыг Ерөнхий сайд С.Батболд тус хүрээлэнгийнхэнтэй уулзахдаа хүслээ

Монгол Улсын Ерөнхий сайд С.Батболдын Кувейт Улсад хийж байгаа албан ёсны айлчлал шинжлэх ухаан технологи, худалдаа бизнесийн салбарыг хамарсан үйл явдлаар үргэлжилж байна. 2011 оны 01 дүгээр сарын 5-нд Монгол Кувейтийн харилцаанд нэгэн шинэ хуудас нээгдлээ.

Хоёр улсын хооронд дипломат харилцаа тогтоосноос хойшхи 35 жилийн түүхэнд хоёр тал анх удаагаа Элчин сайдын яамдаа нээж байгаа юм. Өнгөрсөн онд Кувейтийн тал Улаанбаатар хотноо Элчин сайдын яамаа нээсэн бол өнөөдөр Монголын гэсэн тодотголтой Элчин сайдын яамны байр Эль Кувейт хотноо үүдээ нээлээ.

Булангийн орнуудтай  харилцаа хамтын ажиллагаагаа идэвхтэй хөгжүүлэхэд Кувейт дэх Монголын Элчин сайдын яам чухал үүрэг гүйцэтгэх учиртайг Ерөнхий сайд С.Батболд нээлтийн ёслолд оролцохдоо тэмдэглээд ажлын амжилт хүслээ

Монгол Улсын Ерөнхий сайд С.Батболдын Кувейт Улсад хийж буй албан ёсны айлчлал амжилттай үргэлжилж байна. 1-р сарын 4-ний өдөр тэрээр Кувейт Улсын Ерөнхий сайд Шейх Нассер Мохаммед Аль Ахмед Аль Сабахтай хэлэлцээ хийж, хамтын ажиллагааны баримт бичгүүдэд гарын үсэг зурах ёслолд оролцлоо.

Хэлэлцээний эхэнд Ерөнхий сайд С.Батболд хэлэхдээ айлчлал таатай уур амьсгалд амжилттай болох нөхцөл бүрдүүлсэн, тусгай хуваарийн нислэгээ илгээж Улаанбаатар-Кувейтийн хооронд шууд нислэг үйлдэх боломж бүрэн байгааг харуулсан Кувейтийн талд талархлаа илэрхийлэв. Шууд нислэг нь хоёр улсын иргэд хоорондын харилцан зорчих болон аялал жуулчлал, худалдаа бизнес хөгжихөд чухал үүрэгтэй гэж тэрээр хэллээ.

Монгол, Кувейтийн хооронд дипломат харилцаа тогтоосны 35 жилийн ойг талууд өнгөрсөн онд тэмдэглэснийг дурьдаад Элчин сайдын яамдаа харилцан нээж байгаа нь харилцаа, хамтын ажиллагааны түвшинг гүнзгийрүүлэн хөгжүүлэхэд чухал түлхэц болно хэмээн үзэж байгаагаа Ерөнхий сайд С.Батболд илэрхийлэв.

Хөдөө аж ахуй, уул уурхай, байгаль орчин, эрүүл мэнд, ашигт малтмал гээд харилцаа, хамтын ажиллагааг хөгжүүлэх боломжтой салбар олон ч хоёр орны худалдааны эргэлт санасан хэмжээнд хүрэхгүй байгааг тэрээр тэмдэглэлээ.
Монгол, Кувейтийн харилцааг урагшлуулахад Арабын эдийн засгийн Кувейтийн сан чухал үүрэг гүйцэтгэж байгааг, тус сангийн шугамаар Монголд хэрэгжүүлсэн төслүүд хоёр улсын хамтын ажиллагааны билэг тэмдэг болж байгааг онцлов.

 Харилцаа, хамтын ажиллагааны туршлагадаа тулгуурлан Монголд 150 ортой эмчилгээний болон оношлогооны иж бүрэн тоног төхөөрөмжтэй, эмч, сургагч нараа дотроо бэлтгэх чадвартай хүүхдийн эмнэлэг барих төслийг Кувейтийн сангийн буцалтгүй тусламжаар хэрэгжүүлэх хүсэлтийг Ерөнхий сайд С.Батболд Кувейтийн Ерөнхий сайдад албан ёсоор тавилаа.

Хэлэлцээний үеэр хөндөгдсөн нэг чухал асуудал бол газрын тосны чиглэлээр хамтран ажиллах тухай байв. Газрын тосыг Монголд нийлүүлэх, өмнө нэгэнт тохирсон асуудлыг хурдавчлах, эхний ээлжинд 1 сая тн газрын тос нийлүүлэх асуудлыг Кувейтийн тал ойрын үед  шийднэ гэдэгт итгэлтэй байгаагаа Ерөнхий сайд хэлээд энэ нь Монгол Улсын хувьд чухал гэдгийг тэмдэглэв.

Түүнчлэн байгаль орчин хамгаалах чиглэлээр 2009 онд байгуулсан санамж бичгийн дагуу 3 лаборатори бүхий шинжлэх ухааны судалгааны төвийг Богд уулын өмнөд хэсэгт байгуулахаар ажиллаж байгаа, шонхор шувууг хамгаалах, үржүүлэх чиглэлээр хамтарч ажиллахаар хэлэлцэн тохирсон нь чухал алхам гэж Ерөнхий сайд С.Батболд хэллээ. Кувейтийн Ерөнхий сайд Монгол Улсын Ерөнхий сайдын хэлсэн үг, тавьсан саналыг дэмжиж байгаагаа илэрхийлээд олон улсын хэмжээнд бие биенээ дэмжсэн тодорхой алхмууд хийсээр ирсэн, одоо энэ харилцаагаа хоёр талын хамтын ажиллагаанд үр дүнтэй нэвтрүүлж хэрэгжүүлэхийн чухлыг онцлов.

Хэлэлцээний дараа талууд Мал эмнэлэг, хорио цээрийн салбарт хамтран ажиллах Засгийн газар хоорондын гэрээ болон харилцан оюутан солилцох  гэрээнд гарын үсэг зурлаа. Ингэснээр Монгол малыг эрүүлжүүлэх, махны экспортыг нэмэгдүүлэх шинэ зах зээл бий болох, Монгол, Кувейтийн боловсролын салбарын хамтын ажиллагаа өргөжих таатай орчин бүрдлээ

Кувейт Улсад албан ёсны айлчлал хийж байгаа Монгол Улсын Ерөнхий сайд С.Батболд тус улсын Үндэсний Ассамблейн дарга Жассем Аль-Харрафи-тай уулзлаа. Ерөнхий сайд уулзалтын салхийг хагалж хэлсэн үгэндээ Монгол Улсын хөгжлийн гол салбар болох дэд бүтцийн салбарт Кувейт Улс туслалцаа, дэмжлэг үзүүлж ирсэнд талархав.

Ялангуяа аймгуудыг холбосон хатуу хучилттай зам тавих, жижиг оврын усан цахилгаан станц барих төсөл амжилттай хэрэгжсэн, одоо парламентын шинэ ордон барих төсөл үргэлжлэн хэрэгжиж байгааг Ерөнхий сайд онцлоод цаашид өөр олон салбарт хамтын ажиллагаагаа өргөжүүлэн баяжуулах боломж байгааг дурьдав. Хүүхдийн эмнэлэг барих асуудлыг Засгийн газрын тэргүүн дахин хөндөж дэмжлэг үзүүлэхийг хүслээ. Хоёр талын хамтын ажиллагааг хөгжүүлэхэд Кувейтийн сан онцгой үүрэг гүйцэтгэж байгааг Ерөнхий сайд үнэлээд Олон улсын парламентын холбооны шугамаар талуудын харилцаа идэвхтэй хөгжиж байгааг тэмдэглэв.

Кувейтийн Үндэсний ассамблейн дарга хэлсэн үгэндээ Ерөнхий сайд С.Батболд тэргүүтэй Монголын найз нараа эх орондоо, Парламентын ордондоо хүлээж авч байгаадаа баяртай байна гэлээ. Хоёр талын харилцаа түүний дотор өндөр дээд түвшинд тогтсон харилцаа үлгэр жишээ үзүүлэх найрсаг хэмжээнд байна. Харин одоо иргэд хоорондын болон худалдаа бизнесийн салбарынхны холбоог бэхжүүлэх талаар ярилцсан асуудлаа бодит ажил хэрэг болгохын төлөө хүчин чармайлт гаргах хэрэгтэй гэв.

Тэрээр УИХ-ын дарга Д.Дэмбэрэлийг тааламжтай үедээ Кувейтэд айлчлахыг уламжилж өгөхийг Ерөнхий сайдаас хүслээ

Монгол Улсын Ерөнхий сайд С.Батболд Кувейт Улсын Эрхэм дээд Эмир Шейх Сабах Аль Ахмад Аль Жабер Аль-Сабах-т бараалхсанаар албан ёсны уулзалт эхэллээ. Кувейт Улс ардчилсан, хаант засаглалтай орон бөгөөд тус улсыг Эрхэм дээд Эмир удирддаг. Ерөнхий сайд С.Батболд уулзалтын эхэнд Монгол, Кувейтийн харилцаа, хамтын ажиллагаа амжилттай хөгжиж ирснийг тэмдэглээд цаашид  шинээр олон салбарт хамтрах өргөн боломж байгааг дурьдлаа.

Монголын хүн амын 70-аад хувийг эзэлдэг  залуучууд, хүүхэд багачуудын эрүүл мэндийг хамгаалахад Засгийн газар онцгойлон анхаарч байгаа бөгөөд энэ салбарт Кувейттэй хамтран ажиллах, тухайлбал 16 хүртэлх насныханд зориулсан хүүхдийн эмнэлгийг Кувейтийн сангийн буцалтгүй тусламжаар барьж байгуулах хүсэлтэй байгаагаа Ерөнхий сайд илэрхийлэв.

Мөн газрын тосны салбарт хамтын ажиллагаагаа идэвхжүүлж, өмнө нь ярьж тохирсоноо бодит ажил хэрэг болгохын чухлыг тэрээр тэмдэглэлээ. Эрхэм дээд Эмир Монгол Улсын Ерөнхий сайдын Кувейт Улсад хийж байгаа анхны айлчлалд өндөр ач холбогдол өгч байгаагаа илэрхийлээд, Кувейтчүүд бол Монголчуудын найз, анд нөхөр гэж зөвхөн дээд түвшинд төдийгүй Кувейтийн ард түмэн үздэг гэлээ.

Эрхэм дээд Эмир хэлэхдээ ‘’Ерөнхий сайд С.Батболдын санал, хүсэлтийг дэмжиж байна. Бид хэд хэдэн чиглэлд төсөл амжилттай хэрэгжүүлсэн, цаашид хамтын ажиллагаагаа шинэ салбаруудад үргэлжлүүлэх саналыг дэмжиж байна. Монгол Улс сайн боловсруулсан төслөө гаргавал бид хүүхдийн эмнэлэг барихад туслахад бэлэн. Уул уурхай, эрчим хүч, байгаль орчин, хөдөө аж ахуй болон бусад харилцан сонирхож буй салбарын харилцаа, хамтын ажиллагааг хөгжүүлэхийг хүсч байна” гэв. Кувейтийн Эмир манай улсад 2 удаа айлчлалаар, 1 удаа амрахаар ирж байсан учир өөрийгөө бараг Монголын иргэн гэж боддогоо хэлж Ерөнхий сайдтай дотнослоо

Монгол Улсын Ерөнхий сайд С.Батболд Засгийн газрын тэргүүний хувиар анх удаа Кувейт Улсад албан ёсны айлчлал хийж байна. Тус улстай дипломат харилцаа  тогтоосноос хойшхи 35 жилийн хугацаанд өндөр, дээд түвшний харилцан айлчлал цөөнгүй байсан ч Монгол Улсын Засгийн газрын тэргүүн айлчилж байсан түүх үгүй юм.

Иймээс Ерөнхий сайд С.Батболдын Кувейт Улсад хийж буй албан ёсны  айлчлалд хоёр тал ихээхэн ач холбогдол өгч байна. Кувейт Улсын Ерөнхий сайд Шейх Нассер Мохаммед Аль-Ахмед Аль-Сабах Монгол Улсын Ерөнхий сайдыг албан ёсоор угтах ёслол “Баяан” цогцолборын ‘’Эмирийн асар’’ өргөөнд болов.

Угтах ёслолд Кувейтийн талаас Засгийн газрын бүх гишүүн нь оролцсон бол манай талаас айлчлалын бүрэлдэхүүнд багтсан Сангийн сайд С.Баярцогт, Хүнс, хөдөө аж ахуй, хөнгөн үйлдвэрийн сайд Т.Бадамжунай, Байгаль орчин, аялал жуулчлалын сайд Л.Гансүх, УИХ-ын гишүүн Д.Оюунхорол, Г.Баярсайхан, Гадаад хэргийн дэд сайд Б.Болор, Эрүүл мэндийн дэд сайд Ж.Цолмон, Монгол Улсаас Кувейт Улсад суугаа Онц бөгөөд Бүрэн эрхт Элчин сайд К.Сайраан нарын албан ёсны төлөөлөгчид байлцлаа

Засгийн газрын 2010 оны 12 дугаар сарын 29-ний өдрийн, мөн 2011 оны эхний хуралдаанаар Засгийн газрын гишүүдийн сахилга хариуцлагын тухай болон аймаг, нийслэлийн Засаг дарга нарт хандсан Ерөнхий сайдын албан даалгаврын талаар хэлэлцэн шийдвэрлэлээ.

Улсын Их Хурлын чуулганы нэгдсэн хуралдаанаар 2011 оны улсын төсөвтэй холбоотой асуудал хэлэлцэхэд 1 цаг 30 минут хоцорсон Сангийн сайд С.Баярцогт, Улсын Их Хурал, Байнгын хороо болон дэд хороонд шаардлагатай судалгаа, мэдээллийг хугацаанд нь гаргаж өгөөгүй Эрдэс баялаг, эрчим хүчний сайд Д.Зоригт нарт Засгийн газрын 2010 оны 12 дугаар сарын 29-ний өдрийн хуралдаанаас анхааруулах арга хэмжээ авлаа.  

 Цаашид Улсын Их Хурлын чуулганы нэгдсэн хуралдаанаар асуудал хэлэлцэхэд хариуцлагатай оролцож, Улсын Их Хурал, Байнгын хороо болон дэд хороонд шаардлагатай судалгаа, мэдээллийг хууль тогтоомжийн хүрээнд хугацаанд нь гаргаж өгөх, хууль тогтоомжийн төсөл хэлэлцүүлэх болон гишүүдийн асуулт, асуулгын хариу хэлэлцэх үед өөрийн биеэр оролцож байхыг Ерөнхий сайд С.Батболд Засгийн газрын гишүүдэд даалгав.

 Мөн Засгийн газрын өнөөдрийн буюу шинэ оны эхний хуралдаанаас аймаг, нийслэлийн Засаг дарга нарт хандсан Ерөнхий сайдын албан даалгавар гарлаа. Албан даалгавраар орон нутагт төрийн хууль тогтоомж, Засгийн газрын шийдвэрийг хэрэгжүүлэх үүрэг бүхий Засаг дарга нар хуулиар олгогдсон эрх хэмжээнийхээ хүрээнд аливаа асуудлыг цаг алдалгүй шуурхай зохион байгуулж, түүний явц, үр дүнд тавих хяналтаа сайжруулан, хүлээлгэх хариуцлагыг чангатгаж ажиллахыг үүрэг болгов.

Түүнчлэн худалдан авах ажиллагааны бүх тендерийг 2011 оны 2 дугаар сарын 1-ний дотор улсын хэмжээнд зарлаж, 4 дүгээр сарын 1-ний дотор дүгнэж дуусган гүйцэтгэгчтэй гэрээ байгуулж, ажлаа эхлүүлсэн байхыг Засаг дарга нарт даалгалаа. Төсвийн хөрөнгө оруулалтын ажлын чанар, үр дүнг дээшлүүлэх, хэрэгжилтийг шуурхай зохион байгуулах, төсвийн хөрөнгийг зориулалтын дагуу үр ашигтай зарцуулж, гэрээнд заасан хүлээх үүрэг, хариуцлагыг маш тодорхой биелүүлэхийг Засаг дарга нарт даалгасан байна.

Мөн Ерөнхий сайдын албан даалгаварт Аймаг, нийслэлийн Засаг дарга нар эрх шилжсэн төсөл, арга хэмжээний худалдан авах ажиллагааны төлөвлөгөөний тайлан, гүйцэтгэлийн тайлан мэдээг холбогдох журам, маягтын дагуу бэлтгэж улирал бүрийн 3-ны дотор төсвийн ерөнхийлөн захирагчид ирүүлэх, албан даалгаврын хэрэгжилтэд хяналт тавьж ажиллахыг Сангийн сайд С.Баярцогтод үүрэг болгов

Хуралдаанаар Монгол Улс, Кувейт Улсын Засгийн газар хоорондын Хөтөлбөр, УИХ-ын нэр бүхий гишүүдийн санаачлан боловсруулсан хуулийн төсөлд өгөх санал, мал тооллогын урьдчилсан дүн зэргийн талаар хэлэлцэж шийдвэр гаргалаа.

МАНАЙ УЛС 31 САЯ 830 МЯНГАН ТОЛГОЙ МАЛТАЙ

Үндэсний статистикийн хорооноос гаргасан мэдээнээс үзвэл улсын хэмжээнд малын тоо толгой 2009 оныхоос 12 сая 195 мянгаар буюу 27.7 хувиар буурчээ. Урьдчилсан дүнгээр адуу 1860.6 мянга, үхэр 2123.7, тэмээ 265.3, хонь 14050.8, ямаа 13528.5 мянгад хүрсэн бөгөөд 2009 оныхоос адуу 360.7 мянга, үхэр 475.7, тэмээ 11.7, хонь 5224.0, ямаа 6123.0 мянган толгойгоор буурсан байна.

Малын тоо Сүхбаатар аймагт өмнөх оноос 5 төрөлд өсч харин бусад аймаг, нийслэлд буурсан урьдчилсан дүн гарлаа. Дундговь, Завхан, Өвөрхангай аймагт малын тоо 1.1-1.7 сая толгойгоор буурсан нь хамгийн өндөр үзүүлэлт юм. Улсын хэмжээнд малын тоо 2009 оныхоос 35 сум, нийслэлийн 1 дүүрэгт өсч 294 сум, 8 дүүрэгт буурсан бөгөөд нийт мал сүрэгт ямааны эзлэх хувь буурч бусад мал өссөн дүнтэй байна.

Хөвсгөл аймаг 3072.1 мянга, Төв 2699.4, Архангай 2631.8, Булган 2211.3, Хэнтий 2014.3 мянган толгой буюу хамгийн олон мал тоолуулж эхний 5-д багтжээ. Адууны тоо 2 аймагт өсч, 19 аймаг, Улаанбаатар хотод буурсан бөгөөд Төв /200.1 мянга/, Архангай /190.7 мянга/, Булган /177.1 мянга/, Хөвсгөл /146.3 мянга/, Сүхбаатар /140.9 мянга/ адууныхаа тоогоор айргийн тавд орсон байна.

Үхрийн тоо 3 аймагт өсч, 18 аймаг, Улаанбаатар хотод буурсан дүнтэй байна. Хөвсгөл /309.2 мянга/, Архангай /293.6 мянга/, Булган /172.8 мянга/, Төв /171.8 мянга/, Хэнтий /156.5 мянга/-н үхэр тоолуулж эхний 5-д багтжээ. Тэмээний тоо 7 аймагт өсч, 14 аймагт буурсан бөгөөд Өмнөговь аймаг хамгийн олон буюу 83.4 мянган тэмээ тоолуулсан байна.

Хонины тоо 2 аймагт өсч бусдад нь буурсан бөгөөд Хөвсгөл /1348.6 мянга/, Төв /1345.1 мянга/, Архангай /1308.6 мянга/, Булган /1130.5 мянга/, Хэнтий /971.0 мянга/-д хүрсэн нь хамгийн олон гэсэн үг юм. Ямааны тоо 1 аймагт өсч 20 аймаг, Улаанбаатар хотод буурлаа. Хөвсгөл /1265.8 мянга/, Баянхонгор /1185.3 мянга/, Төв /980.1 мянга/, Өвөрхангай /874.7 мянга/, Ховд /845.8 мянга/-н ямаа тоолуулж эхний 5 байрт орсон байна.

5 ОЮУТНЫГ ТЭТГЭЛЭГТ ХӨТӨЛБӨРТ ХАМРУУЛНА

Соёл, мэдээлэл, боловсрол, шинжлэх ухааны салбарын 2011-2013 оны хамтын ажиллагааны Монгол Улсын Засгийн газар, Кувейт Улсын Засгийн газар хоорондын Хөтөлбөрт гарын үсэг зурах эрхийг Гадаад харилцааны дэд сайд Б.Болорт Засгийн газрын хуралдаанаас олгов.

Мөн Арабын Нэгдсэн Эмират Улстай боловсрол, соёл, шинжлэх ухааны салбарт хамтран ажиллах тухай Засгийн хоорондын хэлэлцээрт гарын үсэг зурах бүрэн эрхийг дэд сайдад олгосон байна. Кувейт Улстай байгуулах Хөтөлбөрийн хүрээнд 2011-2013 онд оюутан сургах боломжийг өргөжүүлэх /5 оюутныг тэтгэлэгт хөтөлбөрт хамруулах/, соёл, боловсрол, шинжлэх ухааны салбарын хамтын ажиллагааг хөгжүүлэхээр тусгажээ.

• УИХ-ын гишүүн П.Алтангэрэл, Ж.Батсуурь, Я.Батсуурь, Н.Ганбямба, Ц.Сэдванчиг нарын боловсруулсан Газрын тосны тухай хуулийн шинэчилсэн найруулгын төслийг Засгийн газрын боловсруулсан Газрын тосны тухай хуулийн шинэчилсэн найруулгын төсөлтэй нэгтгэн хэлэлцүүлэх боломжтой гэж үзэв.
• УИХ-ын гишүүн Х.Тэмүүжингийн санаачлан боловсруулсан Шүүхийн тухай, Прокурорын байгууллагын тухай, Өмгөөлөл, Нотариатын тухай хуульд нэмэлт өөрчлөлт оруулах тухай хуулийн төслийг хэлэлцээд зарчмын хувьд дэмжив. Хуульчийн сонгон шалгаруулалтад тэнцэж, гэрчилгээ авсан хуульч ажлын ур чадвар, мэдлэг, мэргэшлээ тасралтгүй дээшлүүлэх ёстой бөгөөд энэ үүргээ биелүүлээгүй бол хуульчийн гэрчилгээг хүчингүй болгох, шүүгч, прокурор, нотариатч, өмгөөлөгчөөр ажиллах эсэх нь хөндөгдөхөөр хуульд заасан. Гэвч хууль зүйн сургалтад хамрагдаагүй хуульчийн шүүгч, прокурор, нотариатч, өмгөөлөгчөөр ажиллах тусгай зөвшөөрлийг хүчингүй болгох, албан тушаалаас чөлөөлөх, огцруулах үндэслэлийг хуульд тусгайлан заагаагүй учир энэ зөрчлийг арилгахаар гишүүн Х.Тэмүүжин хуулийн төсөл боловсруулсан байна.
• “Яамдын бэлгэдлийн загвар, тодорхойлолт, хэрэглэх журмыг батлах тухай” тогтоолын төслийг хэлэлцэн баталлаа.

“News” агентлаг, “Ардын эрх” сонин 2010 оны онцлох хүнээр Монгол Улсын 26 дахь Ерөнхий сайд, МАН-ын дарга Сүхбаатарын Батболдыг нэрлэсэн байна. Түүний удирдсан Засгийн газар Монголд уул уурхайн хоёр дахь том төслийг хэрэгжүүлэхээр Тавантолгойн ордыг эргэлтэд оруулах шийдвэрийг УИХ-аар батлуулсан. Уг ордын нийт нөөцөөс Монгол Улсын бүх иргэдийн нэр дээр хувьцаа болгон эзэмшүүлэх, дотоодын аж ахуйн нэгжүүдэд арилжаалах болон олон улсын бирж дээр нээлттэй хувьцаа гаргах замаар хөрөнгө босгох шийдвэрийг батлуулсан. Энэ хэрээрээ ч хамгийн их шүүмжлэл дагуулж, сайн муу  үг дуулж яваа хүн бол Ерөнхий сайд С.Батболд гэж тус сонины тоймч бичжээ.

Мөн “Монголчууд олон Ерөнхий сайдын нүүр үзсэн ч Засгийн газрыг тэргүүлж асан тэдгээр нөхдийн дотор С.Батболд шиг баялаг бүтээх салбар, бодит секторт ажиллаж байсан нь үгүй. Бүгд улстөрчид байв гэж дүгнээд Монголын 2,7 сая хүний хоолтой хоолгүй, ажилтай ажилгүй явах нь Ерөнхий сайд, түүний тэргүүлсэн Засгийн газраас ихээхэн шалтгаалдаг. Тиймээс ч түүний бизнесийн салбарт олсон амжилт нь улс орны эдийн засгийг сайжруулахад нөлөөгөө үзүүлнэ гэж монголчууд найдаж байна. Цаг хугацаа түүний ард биш, өмнө байна” гэж бичжээ.

90 жилийн түүхтэй МАХН нэр болоод имижээ энэ л хүний үед сольж,  хувьсгалт үзэл суртлаасаа татгалзан орчин үеийн улс төрийн нам болох зохион байгуулалтад орж эхэллээ гэсэн байна. “News” агентлаг, “Ардын эрх”  сонин хамтран 2004 оноос Оны онцлох хүнийг нэрлэж  иржээ.

2011 оны 1 дүгээр сарын 1-ний өдрийн 11 цаг 11 минутад төмөр замчид Монгол улсын Ерөнхий сайд С.Батболдод өнгөрсөн оныхоо ажлын амжилтыг илтгэж Төмөр замын зүтгүүрийн дохиог цангинууллаа. Засгийн газрын тэргүүн Төмөр замчдын Монгол Улс 2010 онд эдийн засаг нийгмийн зорилтоо ханган биелүүлэхэд оруулсан хувь нэмрийг  өндрөөр үнэлж байгааг дуулгаад Монгол улсын Засгийн газар 2011 онд нийгэм, эдийн засгийг бодитой өсгөх зорилт дэвшүүлэн тавьж, томоохон бүтээн байгуулалтын эхлэл суурийг тавина.

Энэ бодлого зорилтыг хэрэгжүүлэхэд төмөр замчдын үүрэг хариуцлага онцгой чухал гэдгийг тэмдэглээд 2011 онд төмөр замын салбарт Төрөөс баримтлах бодлогыг хэрэгжүүлэх түүхэн жил болно. Энэ хүндтэй үүргийг Төмөр замчид манлайлан хэрэгжүүлэх учиртай. Төмөр замын бүтээлч хамт олон та бүхэн 2011 ондоо улс орныхоо хөгжлийн зүтгүүр болж ажиллахыг хүсэн ерөөе гэлээ.

60 жилийн тэртээ 1951 оны 1-р сарын 1-ний энэ өдөр Монголын төмөр зам байнгын ажиллагаанд орж, анхны галт тэрэг хөдөлж байсан түүхтэй. Билэгт энэ өдрийг Монгол Оросын хувь нийлүүлсэн нийгэмлэг Улаанбаатар төмөр замын хамт олон 2010 онд 16.7 сая тонн ачаа тээвэрлэж, төлөвлөгөөгөө 11.5 хувиар давуулан биелүүлсэн амжилттайгаар угтжээ. Төмөр замын түүхэнд анх удаа жилд 12.7 сая тонн ачаа ачсанаас 10-р сард 1.3 сая тонн ачаа ачиж түүхэн амжилт тогтоосон байна. Мөн түүхэндээ анх удаа 6800 тонн жинтэй 320 гол бүхий 80 вагонтой галт тэргээр тээвэрлэлт зохион байгуулсан байна.