Ангилал: мэдээ-мэдээлэл

ҮНДСЭН ЧИГЛЭЛИЙГ ХЭРЭГЖҮҮЛЭХ ТӨЛӨВЛӨГӨӨГ БАТЛАВ

“Монгол Улсын эдийн засаг, нийгмийг 2011 онд хөгжүүлэх Үндсэн чиглэлийг хэрэгжүүлэх төлөвлөгөө”-ний төслийг хэлэлцээд гишүүдийн гаргасан саналыг тусган баталлаа. Төлөвлөгөө 19 зорилт, 190 арга хэмжээтэй бөгөөд тусгагдсан зорилт, арга хэмжээг оны эхнээс эрчимтэй хэрэгжүүлж ажиллахыг Засгийн газрын гишүүд, аймаг, нийслэлийн Засаг дарга нарт үүрэг болголоо. Мөн Үндсэн чиглэлийг хэрэгжүүлэхэд шаардлагатай хөрөнгийг оновчтой хуваарилж, үр дүнтэй ашиглах, төсвийн бус эх үүсвэрийг дайчлах чиглэлээр санаачлагатай ажиллахыг даалгасан байна.

Үндсэн чиглэлийн хэрэгжилтийг 2011 оны 8 дугаар сард, биелэлтийг 2012 оны 1 дүгээр улиралд багтаан Засгийн газрын хуралдаанд танилцуулахыг Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар, Үндэсний хөгжил, шинэтгэлийн хорооны дарга Ч.Хашчулуун нарт даалгажээ.

Үндсэн чиглэлийг улсын төсөв хэлэлцэхээс өмнө УИХ-аар батлуулсан нь хөгжлийн бодлогоо тодорхойлсны дараа түүнд шаардагдах хөрөнгийг баталдаг зарчимд шилжих эхний алхам болсон. Мөн хэрэгжүүлэх төлөвлөгөө боловсруулах хангалттай хугацаатай болж, төлөвлөгөөг 2011 оны 1 дүгээр сарын 1-нээс хэрэгжүүлж эхлэх боломж бүрдсэн нь үр дүнгээ өгнө гэж Засгийн газар үзлээ.

ХҮНСНИЙ БУУДАЙН ТОНН ТУТАМД 50 МЯНГАН ТӨГРӨГИЙН УРАМШУУЛАЛ ОЛГОНО

Улсад болон гурилын үйлдвэрүүдэд нийлүүлсэн хүнсний буудайн нэг тонн тутамд 50 мянган төгрөгийн  мөнгөн урамшуулал олгоно. Энэ нь Хүнсний буудайн урамшуулалд олгохоор 2010 оны төсөвт батлагдсан 11.7 тэрбум төгрөгтөө бүрэн багтаж байна. 2010 оны ургац хураалтын дүн, гурилын хангамжийн тооцоо, мөнгөн урамшуулал олгох талаар Хүнс, хөдөө аж ахуй, хөнгөн үйлдвэрийн сайд Т.Бадамжунай танилцуулав.

Сүүлийн хоёр жил газар тариалангийн салбарт олсон ололтоо бататган тогтворжуулах, техникийн шинэчлэлийг үргэлжлүүлэх, дэвшилтэт болон шинэ технологи нэвтрүүлэх, нутагшуулах, үрийн аж ахуйг хөгжүүлэн ургацын хэмжээг нэмэгдүүлэх, чанарыг сайжруулах, салбарын санхүү, эдийн засгийн чадавхийг бэхжүүлэх шаардлагатай байна. Иймээс “Атрын гурав дахь аян” хөтөлбөрийг үргэлжлүүлэн хэрэгжүүлэхээр тогтож, энэ чиглэлээр тодорхой санал боловсруулан, энэ онд багтаан Засгийн газрын хуралдаанаар хэлэлцүүлэхийг Хүнс, хөдөө аж ахуй, хөнгөн үйлдвэрийн сайдад даалгалаа.

Манай улс энэ намар нийт 366.3 мянган тонн үр тариа, үүнээс 344.5 мянган тонн буудай, 5 мянган тонн арвай, 3 мянган тонн овъёос, 538 тонн хөх тариа, 12.9 мянган тонн тосны ургамал, 205 тонн гурвалжин будаа, 169 мянган тонн төмс, 90 мянган тонн хүнсний ногоо, 38.9 мянган тонн тэжээлийн ургамал хураан авчээ. Ингэснээр жилийн хэрэгцээт буудай, төмсийг 100 хувь, хүнсний ногооны 53 хувийг дотоодоос хангах бүрэн боломжтой болсон байна. Энэ жилийн хувьд арвай, овъёос, хөх тариа, тос, тэжээлийн ургамлын тариалалт өмнөх жилүүдийнхээс нэмэгдсэн дүн гарчээ.

Энэ жилийн ургац хураалтаас гурил үйлдвэрлэгчдэд 228 мянган тонн буудай нийлүүлсэн бөгөөд 330 орчим мянган тонн хүнсний буудайн нөөцтэй болсон байна. “Атрын гурав дахь аян” хөтөлбөр хэрэгжиж эхэлсэн 2007 онтой харьцуулахад энэ жил үр тариа 251 мянга, төмс 55 мянга, хүнсний ногоо 10.9 мянга, малын тэжээлийн ургамал 26.9 мянган тонноор илүү байна.

Аяны хүрээнд 276 мянган га-д чанар сайтай уринш бэлтгэсэн нь өнгөрсөн онтой харьцуулахад нийт бэлтгэсэн уринш 7.4 мянга га-гаар, үүнээс дэвшилтэт технологоор бэлтгэсэн нь 28.5 мянган га-гаар нэмэгджээ. Газар тариалангийн салбарт үйл ажиллагаа явуулж арвин их ургац хураан авч, “Атрын гурав дахь аян”-д үнэтэй хувь нэмэр оруулж байгаа аж ахуйн нэгж, иргэдэд Монгол Улсын Засгийн газар талархал илэрхийлсэн байна.

400 АВТОБУСЫГ ГЭРЭЭГЭЭР АШИГЛУУЛНА

Улсын төсвийн хөрөнгөөр худалдан авсан том оврын 400 автобусыг нийтийн тээврийн үйлчилгээ эрхлэгч төрийн болон хувийн хэвшлийн зарим байгууллагад гэрээгээр эзэмшүүлж ашиглуулах боллоо. Ингэхдээ автобусны үнийг үе шаттайгаар буцаан авч, хуримтлагдсан хөрөнгөөр жил бүр нийслэлийн нийтийн тээврийн паркийг шинэчилж байхаар тогтов. Ингэснээр үйлчилгээ эрхлэгч байгууллагын материаллаг бааз, мэргэжилтэй боловсон хүчний хангалт сайжирч, тогтвортой үйл ажиллагаа явуулах боломж бүрдэнэ.

Зам, тээвэр, барилга, хот байгуулалтын яам, Нийслэлийн Нийтийн тээврийн газар, автобус авсан аж ахуйн нэгж, байгууллагуудтай байгуулсан гурвалсан гэрээг шинэчлэн, тухайн аж ахуйн нэгж, байгууллагаас буцаан авах хөрөнгийг Нийслэлийн Засаг даргын Тамгын газрын Тусгай дансанд хуримтлуулах юм. Парк шинэчлэх санд жилд дунджаар 5 тэрбум гаруй төгрөг хуримтлагдах бөгөөд энэ мөнгөөр жил бүр том оврын 50 автобус авах урьдчилсан тооцоо гарчээ.

2009 онд улсын төсвийн хөрөнгөөр БНСУ-аас том оврын 400 автобус худалдан авч нийтийн тээврийн үйлчилгээ эрхэлж байгаа төрийн болон хувийн хэвшлийн зарим аж ахуйн нэгжид ижил нөхцлөөр хуваарилсан юм. Нийслэлийн нийтийн тээврийн үйлчилгээнд том оврын 1200 автобус шаардлагатай байдаг ч одоогоор стандартын шаардлага хангасан 775 автобус үйлчилгээнд явж байгаа юм.

ЗЭЭРИЙН НҮҮДЭЛ, ШИЛЖИЛТ ХӨДӨЛГӨӨНИЙГ ХЯЗГААРЛАНА

Мал, амьтны гоц халдварт шүлхий өвчний эх үүсвэр нь цагаан зээр гэж мэргэжлийн байгууллагууд тогтоосон. Иймээс цагаан зээрийн нүүдэл, шилжилт хөдөлгөөнийг хязгаарлах, эрүүл бүс рүү оруулахгүй байх зорилгоор Улсын Онцгой комиссын Ажлын хэсэг ажиллаж байна. Мөн Ажлын хэсэг үхсэн зээрийн сэг зэмийг цуглуулах, өвчтэйг нь устгах, гамшгаас хамгаалах зарим албаны бие бүрэлдэхүүнийг мэргэжил, арга зүйн шуурхай удирдлага, зохицуулалтаар хангаж байгаа юм. Ажлын хэсэгт шаардагдах 70 сая төгрөгийг Байгаль хамгаалах сан, Засгийн газрын нөөц сангаас гаргахаар Засгийн газрын хуралдаанаас шийдвэрлэлээ.

Засгийн газар, Улсын Онцгой комиссоос авч хэрэгжүүлж байгаа шуурхай арга хэмжээний дүнд  шүлхий өвчний гаралт багасч, тархалт нь саарч байгаа. Гэвч 10 дугаар сараас Хэнтий, Дундговь, Төв, Дорноговь аймгийн нутагт зээр олноор нүүдэллэн орж ирснээр дээрх аймгуудын зарим суманд өвчний сэжиг илэрч, онош нь батлагдаж байгаа учир нүүдэл, шилжилт хөдөлгөөнийг нь хязгаарлах шаардлагатай болсон байна.

Өнөөдрийн /2010 оны 11 дүгээр сарын 23/ байдлаар Сүхбаатар, Дорнод, Дорноговь, Хэнтий аймагт өвчилсөн 24722 толгой мал, Дорнод, Сүхбаатар аймагт 1616 зээрийг устгаж ариутгал, халдваргүйжүүлэлт хийгээд байна. Улсын Онцгой комисс, Хүнс, хөдөө аж ахуй, хөнгөн үйлдвэрийн яам, онцгой байдал, цагдаа, мэргэжлийн хяналт, Мал эмнэлэг, үржлийн, Мал эмнэлэг, ариун цэврийн лаборатори, дээрх аймгуудын Онцгой комисс, нутгийн захиргааны байгууллагын нийт 1018 хүн 162 автомашин, 56 мотоцикл, устгал, ариутгал, хяналтын 75, хөдөлгөөнт хяналтын 72 цэгт ажиллан шүлхий өвчинтэй тэмцэж байна. 

ӨВӨЛЖИЛТИЙН БЭЛТГЭЛ УЛСЫН ХЭМЖЭЭНД 88 ХУВЬТАЙ БАЙНА

2010-2011 оны мал аж ахуйн өвөлжилтийн бэлтгэл хангасан дүнг Хүнс, хөдөө аж ахуй, хөнгөн үйлдвэрийн сайд Т.Бадамжунай танилцууллаа.  Үүнтэй холбогдуулан :

  • Мал өвөлжилтийн байдал болон гоц халдварт шүлхий өвчнөөс урьдчилан сэргийлэхтэй холбогдсон арга хэмжээг төлөвлөж, хэрэгжилтийг шуурхай зохион байгуулах үүрэг бүхий байнгын ажиллагаатай штаб байгуулан ажиллуулах, ажлын явц, үр дүн, цаашид авах арга хэмжээний чиглэлээр санал, дүгнэлтээ Засгийн газарт танилцуулж байхыг сайд Т.Бадамжунайд 

  • Улсын нөөцийн өвс, тэжээлийг зам, даваа хаагдахаас өмнө шаардлагатай цэг, салбаруудад байршуулахыг Онцгой байдлын ерөнхий газрын дарга Ц.Амгаланбаярт

  • Аймаг, нийслэл, сум, дүүргийн өвс, тэжээлийн аюулгүйн нөөц нэмж бүрдүүлэх чиглэлээр тодорхой арга хэмжээ авахыг Архангай, Булган, Говь-Алтай, Дархан-Уул, Дорноговь, Дорнод, Завхан, Өвөрхангай, Төв, Хөвсгөл аймаг болон Нийслэлийн Засаг дарга нарт даалгалаа.

Шүлхий өвчний эрсдэл бүхий аймгуудын нийт өвчлөмтгий малыг вакцинжуулалтад бүрэн хамруулахтай холбогдсон арга хэмжээг төлөвлөж, хэрэгжүүлэхийг сайд Т.Бадамжунай, Шадар сайд М.Энхболд нарт даалгав.

Орон нутагт өвс, тэжээлийн аюулгүй нөөц бэлтгэх Засгийн газрын даалгаврын биелэлт аймаг, нийслэлийн хэмжээнд 52.6 хувь, сум, дүүргийн хэмжээнд 72 хувьтай байна. Баян-Өлгий, Өмнөговь, Сүхбаатар, Хэнтий аймаг даалгаврыг 100 хувиас дээш давуулан биелүүлсэн бол Булган, Дархан-Уул, Дорнод, Өвөрхангай, Завхан, Төв, Ховд, Хөвсгөл аймаг 3.1-35.3 хувиар хангалтгүй биелүүлж, Говь-Алтай аймаг, Нийслэл хот аюулгүйн нөөцийн өвс, тэжээлээ огт бэлтгээгүй байна.

Бэлчээрийн даац багтаамж, өвс, тэжээлийн хүрэлцээнээс шалтгаалан Өмнөговь, Дорноговь, Увс, Баян-Өлгий аймгийн ихэнх сум, Дундговь, Ховд, Өвөрхангайн зарим суманд өвөлжилт хүндрэх магадлалтай байна. Энэ жилийн хувьд цас ахиу орж, хасах 50 хэм хүртэл хүйтрэхийг мэргэжлийн байгууллагууд анхааруулж байгааг Засгийн газрын хуралдаанаас санууллаа. Цаг хүндэрч, малаа алдах үед дээрээс бүхнийг гуйн гар тосдог байдлыг өөрчилж,  малчдад ч гэсэн хариуцлага тооцож эхлэнэ гэж Хүнс, хөдөө аж ахуй, хөнгөн үйлдвэрийн сайд хэллээ.  

“УС” ҮНДЭСНИЙ ХӨТӨЛБӨРИЙГ ХЭРЭГЖҮҮЛЭХ ТӨЛӨВЛӨГӨӨГ БАТЛАВ

Хөтөлбөрийг хэрэгжүүлэх арга хэмжээг жил бүрийн эдийн засаг, нийгмийг хөгжүүлэх үндсэн чиглэлд тусган төсөв болон бусад эх үүсвэрээс санхүүжүүлэн хэрэгжүүлэхийг холбогдох сайд нар болон аймагт нийслэлийн Засаг дарга нарт даалгалаа. Хөтөлбөрт Монгол орны усны нөөцийг хамгаалан түүний бүрэлдэн тогтох, цэвэр ариун чанараа хадгалах, байгалийн аясаар сэргэх бүхий л боломжийг хангах  6 стратегийн зорилт бүхий нийт 160 орчин арга хэмжээг тусгажээ. Нийт зардлын 60 орчим хувийг урсацын тохируулга хийх, усан сан байгуулах, алсын зайд дамжуулан хүргэх томоохон төслүүдэд зарцуулах юм байна.

Үндэсний хөтөлбөрийн хэрэгжилтийг орон даяар зохион байгуулах, салбар дундын ажлын уялдаа холбоог хангаж, хяналт тавьж ажиллахыг Байгаль орчин, аялал жуулчлалын сайд, Усны үндэсний хорооны дарга Л.Гансүх, Үндэсний хөгжил, шинэтгэлийн хорооны дарга Ч.Хашчулуун нарт үүрэг  болголоо.

ИРГЭД 17 МЯНГА ОРЧИМ ӨРГӨДӨЛ, ГОМДОЛ ИРҮҮЛЖЭЭ

Төрийн захиргааны төв болон нутгийн захиргааны байгууллагуудад 2010 оны 3 дугаар улиралд иргэдээс ирүүлсэн өргөдөл, гомдлыг хэрхэн шийдвэрлэсэн талаар Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар танилцуулав. 3 дугаар улиралд 16940 өргөдөл, гомдол хүлээн авсан бөгөөд төрийн захиргааны төв байгууллагад ирүүлсэн өргөдөл, гомдлын 97 хувийг шийдвэрлэсэн нь өмнөх оны мөн үетэй харьцуулахад 2 хувиар нэмэгджээ.

Нутгийн захиргааны байгууллагуудад ирүүлсэн өргөдөл, гомдлын шийдвэрлэлт 95.6 хувьтай байна. Иргэд ихэвчлэн зуднаар малаа алдсан малчдын нийгмийн асуудал, ажлын байр, мөнгөн тусламж, газар эзэмших, гэр, орон сууцны хөнгөлөлттэй зээл хүсч нутгийн захиргааны байгууллагадаа ханджээ.

ТОВЧХОН

  • Импортоор орж ирж байгаа суудлын автомашины онцгой албан татварын хувь хэмжээг одоогийнхоос 2 дахин нэмэгдүүлэхээр Онцгой албан татварын тухай хуульд өөрчлөлт оруулах тухай хуулийн төслийг Засгийн газар татан авахаар шийдвэрлэв. Онцгой албан татварыг 2 дахин нэмэгдүүлэх цаг нь болоогүй гэж Засгийн газар үзсэн байна.

  • Монгол Улсын Ерөнхийлөгч Ц.Элбэгдорж 2010 оны 10 дугаар сарын 4-5-ны өдөр Брюссель хотноо болсон Ази, Европын дээд хэмжээний 8 дугаар уулзалтад оролцсон дүнг хэлэлцээд Үндэсний аюулгүй байдлын зөвлөлд оруулах болов.

  • Улсын Их Хурлын гишүүн Х.Тэмүүжингийн санаачлан боловсруулсан “Төрийн албанд ашиг сонирхлын зөрчлийг урьдчилан сэргийлэх тухай, Авлигын эсрэг хуульд нэмэлт, өөрчлөлт оруулах тухай, Эрүүгийн хуульд нэмэлт оруулах тухай хуулийн төсөл”-ийг хэлэлцэв. Эдгээр хуулийн төсөл нь Хууль, Улсын Их Хурлын бусад шийдвэрийн төсөл боловсруулах, өргөн мэдүүлэх журмын хуульд заасан боловсруулалтын анхан шатны шаардлага хангаагүй, бүхэлдээ орчуулгын шинжтэй, ойлгомжгүй, хүчин төгөлдөр үйлчилж байгаа Төрийн албаны тухай, Авлигын эсрэг, Эрүүгийн байцаан шийтгэх зэрэг бусад хууль тогтоомжтой нийцэхгүй байгааг анхаарч Засгийн газраас гаргасан хэд хэдэн саналыг тусгаж төслийг шинэчлэн боловсруулах шаардлагатай гэж хууль санаачлагчид уламжлахаар болов.

  • Засгийн газрын 2010 оны 10 дугаар сарын үйл ажиллагааны мэдээллийг Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар танилцуулав. Засгийн газар 10 дугаар сард 5 удаа хуралдан, 53 асуудал хэлэлцэж, 16 асуудалтай танилцан, 24 тогтоол, Ерөнхий сайдын 3 захирамж гаргаж, 7 асуудлыг УИХ-д өргөн мэдүүлж, 3 асуудлыг Монгол Улсын Ерөнхийлөгч болон УИХ-ын гишүүдэд уламжилж, 5 асуудлыг хойшлуулжээ.

  • БНХАУ-ын буцалтгүй тусламжаар Хан-Уул дүүрэгт баригдсан спорт цогцолборын барилгыг 2010 оны 12 дугаар сарын 25-ны өдөр хүлээн авч, уг барилгыг Биеийн тамир, спортын газарт шилжүүлэхээр шийдвэрлэв.

  • 2010 оны 10 дугаар сарын 14-ний өдөр Улаанбаатар хотноо байгуулсан “Цөмийн энергийн салбарт хамтран ажиллах тухай Монгол Улсын Засгийн газар, Бүгд Найрамдах Франц Улсын Засгийн газар хоорондын хэлэлцээр”-ийг баталлаа. Хэлэлцээр нь цөмийн энергийг энхийн зорилгоор ашиглах бодлогын хүрээнд энэ чиглэлээр хамтын ажиллагааг эрчимжүүлэх, олон улсын байгууллагын өмнө хүлээсэн үүргээ биелүүлэх, цөмийн эрчим хүчний нийлүүлэлтийн аюулгүй байдлыг хангах зарчмыг удирдлага болгожээ.

  • Монгол Улсын Засгийн газар “Ардчилал, сонгуулийн туслалцааны олон улсын хүрээлэн”-д гишүүнээр элсэхийг дэмжлээ. Хүрээлэн нь сонгуулийн тогтолцоо, Үндсэн хуулийг боловсронгуй болгох, улс төрийн намуудыг төлөвшүүлэн бэхжүүлэх, улс төрд эмэгтэйчүүдийн оролцоог нэмэгдүүлэх зэрэгт дэмжлэг үзүүлэх зорилготой байгууллага юм. Мөн ардчиллыг бэхжүүлэх явцад хуримтлуулсан мэдлэг, туршлагаа солилцох, ардчиллыг бэхжүүлэхэд чиглэсэн бодлого, үйл ажиллагааг дэмжин, ардчиллын үйл явцыг урагшлуулахад дэмжлэг үзүүлдэг байна.

ТУСГАЙ ЗӨВШӨӨРӨЛ ЭЗЭМШИГЧДЭД НӨХӨН ОЛГОВОР ОЛГОНО

Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хууль гарсан. Энэ дагуу “Ашигт малтмалын хайгуулын болон ашиглалтын тусгай зөвшөөрөл эзэмшигчдэд нөхөх олговор олгох журам”-ыг Засгийн газрын хуралдаанаар баталлаа. 
Үүнтэй холбогдуулан гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газартай давхацсан алтны шороон ордын тусгай зөвшөөрлөөр олгосон талбайн хэсэгт уул уурхайн хаалт, нөхөн сэргээлт, байгаль орчны мониторингоос бусад үйл ажиллагаа явуулахыг зогсоолоо.

Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийн дагуу ашигт малтмал хайх, ашиглахыг хориглосон газартай ашигт малтмалын хайгуул, ашиглалтын тусгай зөвшөөрлөөр олгосон талбайн давхацсан хэсгийг цуцлах, нөхөх олговор олгохтой давхцаагүй хэсгийг хүчин төгөлдөр үлдээхтэй холбогдсон харилцааг журмаар зохицуулах юм.

Нөхөх олговорт шаардагдах хөрөнгийг тухайн жилийн улсын төсөвт тусгах бөгөөд тусгай зөвшөөрөл эзэмшигчид нэг удаа нөхөх олговор авах юм. Тусгай зөвшөөрөл эзэмшигчийн нөхөх олговор авах хүсэлтийг Геологи, уул уурхайн асуудал эрхэлсэн төрийн захиргааны байгууллага хүлээн авснаас хойш 2 жилийн дотор нөхөх олговрыг олгоно. Гэхдээ  тусгай зөвшөөрөл эзэмшигчийн бусадтай байгуулсан гэрээгээр хүлээсэн үүргийг билүүлээгүйн улмаас үүсэх зээл, төлбөрийг олгохгүй байхаар боллоо.

Нөхөх олговор олгосны дараа холбогдох баримтыг үндэслэн тухайн тусгай зөвшөөрөл эзэмшигчийн зөвшөөрлийг Геологи, уул уурхайн асуудал эрхэлсэн төрийн захиргааны байгууллага цуцлах юм байна. Ашигт малтмалын хайгуулын болон ашиглалтын тусгай зөвшөөрөл эзэмшигчдэд нөхөх олговор олгох журмын хэрэгжилтэд хяналт тавьж, нөхөх олговор олгох ажлын явц, дүнг Засгийн газарт танилцуулж байхыг Эрдэс баялаг, эрчим хүчний сайд Д.Зоригт, Сангийн сайд С.Баярцогт, Байгаль орчин, аялал жуулчлалын сайд Л.Гансүх нарт даалгалаа.

Ашиг сонирхлын зөрчилтэй компаниудыг оруулахгүй

Засгийн газрын өнөөдрийн хуралдаанаар Тавантолгойн нүүрсний ордод хөрөнгө оруулж хамтран ажиллах компани (консорциум) –ийг сонгох урьдчилсан шалгаруулалтын баримт бичгийг хэлэлцэн дэмжлээ. Урьдчилсан сонгон шалгаруулалтын баримт бичгийн дагуу сонгон шалгаруулах ажлыг зохион байгуулахыг Төрийн өмчийн хорооны дарга Д.Сугар,”“Эрдэнэс МГЛ”ХХК-ийн захирал Б.Энэбишд тус тус даалгав. УИХ-ын 2007 оны 27 дугаар тогтоолоор Тавантолгойн коксжих нүүрсний ордыг стратегийн ач холбогдолтой ордын жагсаалтад хамруулж, УИХ-ын 2008 оны 40 дугаар тогтоолоор ордыг ашиглах хөрөнгө оруулалтын  гэрээний төсөл боловсруулах, хөрөнгө оруулагчтай хэлэлцээ хийх үндсэн зарчим удирдамжийг баталсан билээ. Тавантолгой ордыг ашиглах зарим асуудлын тухай УИХ-ын 2010 оны долдугаар сарын 7-ны өдрийн 39 дүгээр тогтоолд “ Тавантолгойн  нүүрсний ордыг түшиглэж үйлдвэр, зам,дэд бүтцийн барилга байгууламжийг барьж байгуулах, ашиглахад олон улсын жишиг стандартыг баримтлах, төслийн хэрэгжилтийг нэмүү өртөг шингэсэн үндэсний бүтээгдэхүүний үйлдвэрлэлийг дэмжих бодлоготой уялдуулж, Монгол улсын иргэдийг ажлын байраар хангах, дотоодод үйлдвэрлэсэн бараа бүтээгдэхүүнийг тэргүүн ээлжинд авч хэрэглэх нөхцөл ,  болзлыг хэрэгжүүлэх”,”дамжин өнгөрөх тээвэр, угтуулан тавих нөхцөл, урьдчилгаа төлбөр, боомт, ашиглалт, хөрөнгө оруулалт, борлуулалтын нөхцөлийн талаар хэлэлцээ хийж , гадаад дотоодын хөрөнгө оруулагчдын оролцоотой нэгдсэн компани (консорциум)-ыг нээлттэй хэлбэрээр сонгон шалгаруулж хөрөнгө оруулалтын гэрээний төслийг УИХ-ын 2010 оны намрын ээлжит чуулганаар хэлэлцүүлж, бусад баримт бичгийн төслийг танилцуулах” үүргийг Засгийн газарт даалгасан юм.

Засгийн газар УИХ-ын 2010 оны 39 дүгээр тогтоолыг хэрэгжүүлэх арга хэмжээний хүрээнд Тэргүүн шадар сайд Н.Алтанхуягаар  ахлуулсан ажлын хэсгийг байгуулан ажиллаж байна. Ажлын хэсгээс хөрөнгө оруулалтын гэрээний төсөл боловсруулан, хамтран ажиллах компани (консорциум)-ийг сонгох урьдчилсан шалгаруулалтыг нээлттэй хэлбэрээр явуулж, шалгарсан компаниудын  жагсаалтыг гарган, санхүү техникийн нөхцөлөөр хэлэлцээ явуулахаар урьдчилсан сонгон шалгаруулалтыг зарлах юм. Хураангуй жагсаалтад орсон компани (консорциум) нь уурхайн хөрөнгө оруулалт, дэд бүтцийн төслүүдэд оролцох, байгаль орчныг хамгаалах, нөхөн сэргээх болон урьдчилгаа төлбөр, бүтээгдэхүүн хуваах зэрэг асуудлын хүрээнд ажлын хэсэгтэй хэлэлцээ хийх эрхээр хангагдах ажээ.

Засгийн газрын хуралдаанаар дээрх асуудлыг хэлэлцэх үеэр   танхимын гишүүдээс гарсан саналыг дэмжин, Ерөнхий сайд хэд хэдэн зүйлд онцгойлон анхаарахыг зөвлөлөө.  Тухайлбал,  Тавантолгойн уурхай нь  түүхий нүүрс зөөх биш,   харин олборлолт цаашлаад борлуулалт нь зэрэг явагдаж байх, бүр түүнчлэн  коксжсон нүүрсний үйлдвэр байгуулах зорилго нэн тэргүүнд байх ёстойг онцоллоо.     Түүнчлэн компаниудыг шалгаруулахдаа  ашиг сонирхлын зөрчилтэй компаниудыг оруулахгүй байх бодлогыг Засгийн газар барьж байгаа ажээ.   Тавантолгой ордод ашиглалтын тусгай зөвшөөрөл эзэмшин үйл ажиллагаа явуулж байгаа компани(консорциум) –ийг ашиг сонирхлын зөрчилтэй гэж үзэх юм байна.    Монгол улсын байр суурь хоёр хүний хүрээнд биш, хоёр сая гаруй  монгол хүний эрх ашигт нийцсэн ойлгомжтой байх ёстой гэдгийг  Ерөнхий сайд дурьдаад, Тавантолгойтой холбоотой бүх мэдээлэл нээлттэй ил тод байх ёстой, мөн Тавантолгой, Оюутолгой, төмөр зам гэх мэт томоохон төслүүдийн ажлын үйл явцыг Засгийн газрын хуралдаанд танилцуулах,ард иргэддээ тогтмол мэдээлж байх үүргийг холбогдох газруудад өглөө.  

ХАЛДВАРТ ШАР ӨВЧНИЙ ЭСРЭГ ШУУРХАЙ АРГА ХЭМЖЭЭ АВНА

Засгийн газрын хуралдаанаар  улсын хэмжээнд болон Говь-Алтай аймагт гарч байгаа вируст гепатит өвчний дэгдэлтийн шалтгаан, өвчний эсрэг авч байгаа ажлын талаар Эрүүл мэндийн сайдын мэдээллийг сонсов. Үүнтэй холбогдуулан аймгийн төвийн усан хангамжийг ариутгадаг төхөөрөмжийг засварлах, ариутгал, халдваргүйтгэлийн бодис авах зэрэгт шаардагдах хөрөнгийг Засгийн газрын хуралдаанаар яаралтай хэлэлцэн шийдвэрлэх боллоо. 
Мөн Улаанбаатар хотын гэр хорооллын сургууль, цэцэрлэгүүд болон бусад аймагт өвчлөл их гарч байгаа учир холбогдох арга хэмжээг яаралтай авахыг  Эрүүл мэндийн болон Боловсрол, соёл, шинжлэх ухааны сайдад даалгав.

Вируст гепапит А өвчин Улаанбаатар хот, Хэнтий, Говь-Алтай, Дорноговь, Өвөрхангай, Дархан-Уул, Хөвсгөл аймагт голомтлон гарч байна. Он гарсаар Улаанбаатар хотод гэхэд л энэ өвчнөөр 380 хүүхэд өвчилжээ.  Мөн Говь-Алтай аймагт энэ өвчний 384 тохиолдол бүртгэгдсэний 272 нь 9 дүгээр сарын 1-нээс 10 дугаар сарын 13-ны хооронд гарсан байна.

Иймээс Эрүүл мэндийн яамны мэргэжлийн эмч нарын баг Говь-Алтай аймагт ажиллан тандалт судалгаа хийж, арга хэмжээ авсны дүнд өдөрт 9-11 бүртгэгдэж байсан өвчлөл 4-5 болж буурчээ. Аймгийн төв, Дарви, Тонхил суманд өвчин голомтлон гарч аймгийн төвийн 7 цэцэрлэг, 5 сургуулийн 154 хүүхэд өвчилсөн байна. Усны хүрэлцээ муу, усан хангамжийн системийг ариутгадаг төхөөрөмж 2008 оноос хойш ажиллаагүй, усан хангамжийн 9 эх булгийн 55,5 хувьд нь гэдэсний бүлгийг эмгэгтөрөгч нян илэрч бохирдсон, эх булаг хамгаалалтын бүсгүй, бохирдолттой, айл өрхүүдийн хашаа хог хаягдал ихтэй, бохир ус цэвэрлэх байгууламж нь ажилладаггүй, халдваргүйтгэлийн бодисын нөөц бага, цэцэрлэгийн хүүхдүүдийн хэрэглэсэн аяга тавгийг анги тус бүрт нь угааж цэвэрлэдэггүй, ажилчид нь угаах зааврыг мэддэггүй зэрэг олон шалтгаанаас болж өвчин дэгдсэн гэж эмч нар үзэж байна.

Цаашид Говь-Алтай аймгийн төвийн 13-24 сартай хүүхдийг А вируст гепатитын эсрэг вакцинаар 12 дугаар сард  дархлаажуулах, аймгийн төвийн цэвэр, бохир усны хангамжийг цогцоор нь шийдэх, хүүхдийн байгууллагын ариутгал, халдваргүйтгэлийн материалын хангамжийг сайжруулах, шаардагдах хөрөнгийг төсөвт тогтмол тусгаж байх, халдварт өвчний тандалт, сэргийлэлтийн нэгж, алба байгуулах, орчны ариун цэврийн бохирдлыг арилгаж, их цэвэрлэгээг тогтмолжуулах шаардлагатай гэж мэргэжлийн баг үзжээ.

ЗҮЙ ЁСНЫ МОНОПОЛЬ БОЛОН ДАВАМГАЙ БАЙДАЛТАЙ АЖ АХУЙ ЭРХЛЭГЧИЙГ ТОГТООНО

 Зүй ёсны монополь болон давамгай байдалтай аж ахуй эрхлэгчийг тогтоох журмын тухай хэлэлцээд Засгийн газрын тогтоол гаргахаар боллоо. Засгийн газрын 2005 оны 10 дугаар сарын 7-ны өдрийн тогтоолоор баталсан “Аж ахуй нэгжийн давамгай болон зүй ёсны монополь байдалтай, түүнчлэн тэр байдлаа алдсаныг тогтоох журам”-д зах зээлийн төвлөрөл, зах зээлд нэвтрэх саадыг тооцох, зах зээлийн хүчийг тодорхойлох зэрэг хэд хэдэн өөрчлөлтийг шинээр тусгах шаардлагатай болжээ.

Журамд зүй ёсны монополь болон давамгай аж ахуй эрхлэгчийг судалж тогтоох, бүртгэх, үйл ажиллагаанд нь хяналт тавьж, зохицуулалт хийх, эрх, үүрэг, журамтай холбогдон гарсан хариуцлага, маргаан шийдвэрлэх зэргийг тусгасан байна. Зах зээлд тодорхой төрлийн бараа бүтээгдэхүүний борлуулалтын гуравны нэгээс дээш хувийг дагнан буюу бусад этгээдтэй хамтран хийж байвал  давамгай байдалтай байна гэж Шударга бус өрсөлдөөнийг хориглох тухай зүйлд заасан. Энэ нь давамгай байдалтай аж ахуйн нэгжийг тогтоохдоо зөвхөн борлуулалтын орлогоор тооцсон зах зээлийн хувиар тодорхойлох боломжтой байснаас бус хувь хүний /ченжүүд/ зах зээлд үзүүлэх нөлөөллийг тодорхойлж зохицуулах боломжгүй байлаа.

Харин Өрсөлдөөний тухай хуульд “үйлдвэрлэл, борлуулалтын эсвэл худалдан авалтын гуравны нэг буюу түүнээс дээш хувьд хүрээгүй ч бусад аж ахуй эрхлэгчийг зах зээлд гарч ирэх нөхцөлийг хаан боогдуулах, зах зээлээс шахан гаргах чадвартай аж ахуй эрхлэгчийг бараа бүтээгдэхүүний хүрээ, зах зээлийн газар зүйн хил хязгаар, төвлөрөл, хүч зэргийг үндэслэн давамгай байдалтай гэж үзэж болно“ гэж заажээ.

Энэ нь аж ахуйн нэгж, байгууллага, хувь хүний давамгай байдалтайг тогтооход үйлдвэрлэлт, борлуулалт эсвэл худалдан авалт, зах зээлийн төвлөрөл, саад, зах зээлийн хүч зэрэг олон үзүүлэлтийг харгалзан үзэж тооцох боломжтой болсон гэсэн үг юм.

ГАЗАРТАЙ ХОЛБООТОЙ ХУУЛИУДЫН ТӨСЛИЙГ УИХ-Д ӨРГӨН БАРИХ БОЛОВ

Хуралдаанаар газрын тухай, Газрын төлбөрийн тухай, Газрын кадастрын тухай, Геодези, зураг зүйн газрын тухай хуулиудын шинэчилсэн найруулгын төслийг хэлэлцэн дэмжиж, гишүүдээс гаргасан саналыг тусган Улсын Их Хуралд өргөн мэдүүлэхээр тогтлоо. Аливаа хуулийн төсөлд эрх зүйн үндэслэл, заалт, зориулалт, шалгуурыг тодорхой томъёолж байх хэрэгтэй. Бид хариуцлагын асуудал их ярьдаг хэрнээ үүнийг нарийвчлэн тусгаж өгөөгүйгээс хуулийн заалтыг яаж ч тайлбарлаж болдог, хариуцлага тооцоход хүндрэл учруулдаг  байдал үүсдэг. Иймээс үүнийг өөрчлөх ажлыг газрын харилцаатай холбоотой хуулиудын төслөөс эхлэнэ гэж Монгол Улсын Ерөнхий сайд С.Батболд хэллээ.

ТОВЧХОН

• 2010 оны 10 дугаар сарын 11-ний өдөр Улаанбаатар хотноо болсон Монгол Улс, Европын Холбооны Хамтарсан хорооны 13 дугаар хуралдааны дүнг сайшааж, хуралдааны мөрөөр хэрэгжүүлэх ажлын төлөвлөгөө батлан, хэрэгжилтэд нь хяналт тавьж ажиллахыг Монгол Улсын Шадар сайд, тус хорооны Монголын хэсгийн дарга М.Энхболдод үүрэг болгов.

• Түншлэл, хамтын ажиллагааны тухай Монгол Улс, Европын Холбооны хоорондын Хэлэлцээрийн төслийг хэлэлцэн дэмжиж, Хэлэлцээрт гарын үсэг зурах бүрэн эрх олгох тухай Ерөнхий сайдын захирамж гаргахаар боллоо.