batbold

Ангилал: мэдээ-мэдээлэл

  • Ерөнхий сайдад АНУ-ын ҮАХ-ийн төлөөлөгчид бараалхлаа

    Ерөнхий сайдад АНУ-ын ҮАХ-ийн төлөөлөгчид бараалхлаа Монгол Улсын Ерөнхий сайд, МАХН-ын дарга С.Батболд АНУ-ын Үндэсний Ардчилсан Хүрээлэнгийн (ҮАХ) хөтөлбөрийн захирал, ҮАХ-гийн Индонези дахь төлөөлөгчийн газрын захирал Пол Роуланд, АНУ-ын Конгрессийн Төлөөлөгчдийн танхимын гишүүн асан Самуэль Гейденсон тэргүүтэй ҮХА-гийн төлөөлөгчдийг 2010 оны 6 дугаар сарын 7-ны өдөр хүлээн авч уулзлаа. Ерөнхий сайд Засгийн газрын тэргүүн, МАХН-ын даргын хувьд төлөөлөгчдөд хандан ҮАХ МАХН болон Монголын бусад улс төрийн нам, төрийн бус байгууллагуудтай хамтран ажиллаж, тусламж дэмжлэг үзүүлж байдагт нь талархал илэрхийлэв.

    Тэрээр “Монгол Улс сүүлийн хорин жилийн турш ардчилсан, иргэний нийгэм байгуулахын төлөө шилжилтийн үеийг даван туулж байна. Энэ үйл хэргийг МАХН эхнээс нь тууштай дэмжин эхлүүлж, засгийн эрхэнд байх хугацаандаа гардан гүйцэтгэж багагүй амжилтыг олсон билээ. Энэ хугацаанд та бүгдийн тусламж дэмжлэг бидэнд чухал байсан. Цаашид ч бид сонгуулийн тогтолцооны шинэчлэл, улс төрийн намын төлөвшил зэрэг олон асуудлаар хамтран ажиллана гэдэгт найдаж байна” гэлээ.

    АНУ-ын ҮАХ нь 1983 онд үүсгэн байгууулагдсан ба дэлхийн өнцөг булан бүрт ардчиллын институтыг дэмжин, улс төрийн болон иргэний байгууллагуудыг бэхжүүлэн, иргэний оролцоо, нээлттэй болоод хариуцлагатай засаглалыг хөгжүүлэхийн төлөө ажилладаг гишүүнчлэлгүй, төрийн бус байгууллага юм. Уулзалтын үеэр ноён С.Гейденсон ҮАХ-гийн тэргүүн, АНУ-ын Төрийн нарийн бичгийн дарга асан, хатагтай Мадлен Олбрайтын мэндчилгээг Ерөнхий сайд С.Батболдод уламжиллаа гэж Засгийн газрын Хэвлэл мэдээллийн албанаас мэдээллээ.

  • Гэр бүл, эмэгтэйчүүд, жендэр, хүүхэд залуучуудын асуудал хариуцсан агентлаг байгуулах шаардлагатай

    Гэр бүл, эмэгтэйчүүд, жендэр, хүүхэд залуучуудын асуудал хариуцсан агентлаг байгуулах шаардлагатай Монгол Улсын Ерөнхий сайд С.Батболдын
    “ЭМЭГТЭЙЧҮҮД-ХҮНИЙ ХӨГЖИЛ”
    Монголын эмэгтэйчүүдийн үндэсний чуулганыг нээж хэлсэн үг
     
    2010 оны 6 дугаар сарын 5-ны өдөр        Төрийн ордон

    Чуулганы төлөөлөгч эрхэмсэг Хатагтай нараа,
    Хүндэт зочид оо!
    Монгол Улсын нийт хүн амын тавь гаруй хувийг эзэлж байгаа эмэгтэйчүүдээ төлөөлөн эх орныхоо өнцөг булан бүрээс цугларч “Эмэгтэйчүүд-хүний хөгжилд-2010” Үндэсний чуулганаа хийж байгаа Та бүхэндээ Монгол Улсын Ерөнхий сайд, Жендэрийн тэгш байдлын Үндэсний хорооны даргын хувьд чин сэтгэлийн мэндчилгээ дэвшүүлж, сайн сайхныг хүсэн ерөөе. Сүүлийн жилүүдэд төдийлөн хийгдээгүй Эмэгтэйчүүдийн Үндэсний чуулган нь нийгмийн бүхий л салбар дахь эмэгтэйчүүдийн оролцооны асуудалд төр засаг, иргэний нийгэм, олон нийтийн анхаарлыг хандуулсан чухал үйл явдал болж байна.

    1206 онд байгуулагдсан Монголын эзэнт гүрний үеэс эдүгээг хүртэл үйлс гавьяагаараа мөнхөрсөн үе үеийн алдар цуутай эмэгтэйчүүдээрээ бид бахархдаг. Монголын эмэгтэйчүүд ард түмнийхээ зовлон, жаргалыг үүрэлцэж, улсынхаа түүхэн замналын хүнд эгзэгтэй үед ч шантаршгүй зүтгэж ирсэн. Энэхүү Монгол эмэгтэйчүүдийн төлөөлөл Та бүхэн Үндэсний чуулгандаа үзэл бодлоо уралдуулж, тавьсан зорилтоо хэрэгжүүлэхээр их үүрэг хариуцлага өвөрлөн ирсэн нь дамжиггүй.

    Монгол Улс чөлөөт эдийн засаг, ардчилсан тогтолцоог сонгосон өнгөрсөн 20 жилийн хугацаанд эмэгтэйчүүдийн үүрэг оролцоо ямар түвшинд байсан бэ гэдгийг энэхүү чуулганаар дүгнэн ярилцаж, цаашдын нэгдсэн бодлогоо тодорхойлох нь ихээхэн чухал юм. Монгол Улс жендэрийн тэгш байдал, эмэгтэйчүүдийн эрхийг хангах талаарх олон улсын эрх зүйн хэм хэмжээг хүлээн зөвшөөрч, “Хүний эрхийн түгээмэл тунхаглал”-аас эхлэн олон улсын хүний эрхийн үндсэн гол актуудад нэгдэн ороод байгаа билээ. Энэ нь Монгол Улсад хүний эрх, жендэрийн тэгш байдлыг хангах бодлого, үйл ажиллагааг олон улсын жишигт нийцүүлэн төлөвлөх, эрх зүйн орчныг боловсронгуй болгоход чухал үүрэг гүйцэтгэсэн.

    1995 онд болсон Дэлхийн эмэгтэйчүүдийн 4 дүгээр бага хурлаас баталсан үйл ажиллагааны хөтөлбөрийг хэрэгжүүлэх зорилгоор Засгийн газраас “Эмэгтэйчүүдийн байдлыг сайжруулах үндэсний хөтөлбөр”-ийг 1996 онд батлан 2002 он хүртэл, “Жендэрийн тэгш байдлыг хангах үндэсний хөтөлбөр”-ийг 2002 онд батлан одоог хүртэл хэрэгжүүлж байна. Эдгээр хөтөлбөр нь үндэсний хэмжээнд жендэрийн тэгш байдлын талаарх ойлголт, мэдээллийг түгээх, эмэгтэйчүүдийг чадавхижуулах, улс төр, эдийн засаг, нийгэм, боловсрол, соёл, шинжлэх ухаан, гэр бүлийн харилцаанд жендэрийн тэгш байдлыг хангахад тулгарч буй бэрхшээлийг арилгахад чиглэсэн үйл ажиллагааг дэс дараатай авч хэрэгжүүлэхэд чухал үүрэг гүйцэтгэж байна.

    Монгол Улсын Засгийн газраас Мянганы хөгжлийн зорилтууд болон “Үндэсний хөгжлийн цогц бодлого”-д жендэрийн тэгш байдал, эмэгтэйчүүдийн эрхийг хангах талаар тодорхой зорилтуудыг тусган хэрэгжилтийг зохион байгуулж байна. Нийгмийн бүх салбар дахь эмэгтэйчүүдийн оролцоо, жендэрийн тэгш байдлыг хангах асуудал  хүний хөгжлийн бодлогын чухал хэсэг гэдгийг XXI зуунд дэлхий нийтээрээ хүлээн зөвшөөрсөнийг манай бодлого боловсруулагчид анхааран үзэж буй гэдэгт итгэлтэй байна.

    Энэ асуудлаар УИХ, Засгийн газар цөөнгүй бодлогын баримт бичиг баталсан. Харин одоо хэрэгжилт нь ямар байна вэ, дэлхийн жишгийн хаана нь байна вэ гэдэгт үнэлэлт дүгнэлт өгөх хэрэгтэй. Ардчилсан, нээлттэй засаглалд эмэгтэйчүүдийн оролцоо төдийгүй хөдөөгийн эмэгтэйчүүдийн тулгамдсан асуудлыг онцгойлон авч үзэж байгаа нь чухал ач холбогдолтой юм. Төрөөс хүн бүрт хөгжлийг тэтгэсэн ижил боломжийг олгож, иргэн бүрээ чадавхижуулж, боловсролтой, эрүүл чийрэг, дэлхийн хэмжээнд өрсөлдөх чадвартай оюунлаг, хүнлэг Монгол хүнийг төлөвшүүлэхийн төлөө чармайн ажиллаж байна.

    Монгол төр хүчирхэг байсны нууцыг эрт цагаасаа “ХААН” ухаан “ХАТАН” ухааныг хослуулан уялдуулж ирсэнтэй холбон түүхчид нотолсоор ирсэн билээ. Тэгвэл бид улс орныхоо хөгжлийн бодлого боловсруулах, хэрэгжүүлэхэд, хүн амын 51,4 хувийг эзэлж буй эмэгтэйчүүдийн өмнө тулгамдаж буй асуудал, бэрхшээл, тэдний хүсэл зоригийг илэрхийлсэн дуу хоолой, санал бодлыг тусгаж чадаж байна уу гэдэгт дүгнэлт хийх цаг нь болсон. Монгол Улсын Мянганы Хөгжлийн Зорилтод “Үндэсний парламентад эмэгтэй гишүүдийн эзлэх хувийг 2015 он гэхэд 30 хувьд хүргэх”, Үндэсний хөгжлийн цогц бодлогод “Жендэрийн  тэгш байдлыг хангах бие даасан хуультай болох, бүх шатны боловсролын хөтөлбөрийн агуулгыг жендэрийн мэдрэмжтэй болгох, өмчийн болон хөдөлмөрийн харилцаан дахь тэгш оролцоог хангах, шийдвэр гаргах түвшин дэх эмэгтэйчүүдийн оролцоог нэмэгдүүлэх” гэсэн стратегийн зорилтуудыг дэвшүүлсэн.

    Эдгээр зорилтууд тодорхой хэмжээгээр хэрэгжиж эмэгтэйчүүд бодлого боловсруулах, хууль тогтоох, улс төрийн албан тушаалд сонгогдож, томилогдон ажиллаж ирлээ. Өнөөдөр орон нутгийн ИТХ-ын Тэргүүлэгчдийн дарга нарын 16.2 хувь, төлөөлөгчдийн 30.2 хувь нь эмэгтэйчүүд байна. Төрийн үйлчилгээний албан хаагчдын 71.7 хувь нь, улс төрийн албан хаагчдын 22,0 хувь нь  эмэгтэйчүүд байна. Харин Парламент дахь эмэгтэйчүүдийн төлөөлөл бага байсаар ирлээ. Тэдний эзлэх  хувийн жин 1992 онд 3.9 хувь, 2000 онд 12 хувь, 2004 онд 6.6 хувь, 2008 онд 3.9  хувьтай байна. Ардчилал шинэчлэлийн үйл явц эхлэхээс өмнөх үед эмэгтэйчүүдийн төрийн байгууллага дахь удирдлагын оролцоо 23-25 хувь байсантай нь харьцуулбал ухралт болсон гэдгийг дээрх үзүүлэлтүүд харуулна.

    Дэлхийн улс орнуудын энэхүү асуудлыг шийдвэрлэх үндсэн арга зам нь ардчилсан сонгуулийн тогтолцоо байдаг. Энэ удаагийн УИХ-ын хаврын чуулганаар  “УИХ-ын Сонгуулийн тухай хууль”, “Жендэрийн эрх тэгш байдлыг хангах тухай хууль”-иудыг хэлэлцэх гэж байгаа нь чухал ач холбогдолтой юм. Эдгээр асуудлаар эмэгтэйчүүд өөрсдийн байр сууриа нэгтгэн илэрхийлэх нь ач холбогдлоо өгнө гэж бодож байна. Монгол хүн бүр ажилтай, тогтмол орлоготой байх нь төр засгийн хамгийн чухал  стратегийн зорилтын нэг.  Засгийн газар энэ  зорилгоор эдийн засгийн өсөлтийг хангах,  жижиг дунд үйлдвэр, хөдөлмөр эрхлэлтийг дэмжих арга хэмжээг үе шаттайгаар хэрэгжүүлж ирлээ.

    Манай улс уул уурхайн баялагтаа түшиглэн Оюутолгой, Тавантолгойн зэрэг ордуудыг ашиглаж эхлэх, алт, зэс, төмөр, барилгын материалын томоохон үйлдвэрүүд, авто зам, төмөр замын, эрчим хүчний том сүлжээнүүдийг байгуулах зааг дээр ирээд байна. Эдгээр уул уурхайн баялгаас олсон хөрөнгийг эмэгтэйчүүд, гэр бүл, хүүхдийнхээ хөгжилд зарцуулах ёстой. Өнөөдөр бид амьдарч буй эх дэлхийдээ хэрхэн хандаж харьцаж буйгаа эмэгтэйчүүдийн нүдээр харж, өвөг дээдсийнхээ “хүн-байгалийн шүтэлцээг эрхэмлэсэн” гүн гүнзгий уламжлалыг сэргээн хөгжүүлэх цаг тулгараад байна. Үүнд эмэгтэйчүүд та бүхний дуу хоолой, байр суурь чухал нөлөө үзүүлэх учиртай.

    Эхчүүд та бид үр хүүхдүүдийнхээ хүмүүжил төлөвшил, гэр бүлийн хөгжил, үнэт зүйлсийн талаар зөвхөн ярих төдий биш төрийн бодлогод онцгойлон тусгаж шат дараатай арга хэмжээ авах  шаардлагатай болсон. Тиймээс гэр бүл, эмэгтэйчүүд, жендэр, хүүхэд залуучуудын асуудлаар Төрийн бодлого боловсруулах, хэрэгжилтийг уялдуулан зохицуулах агентлаг бий болгож ажиллуулах шаардлагатай гэж үзэж байгаагаа энд онцлон дурдъя. Иргэний нийгмийн байгууллагуудын хөгжлийг хангах, идэвхтэй ажиллаж ирсэн эмэгтэйчүүдийн ТББ-уудтай Засгийн газар бүх шатанд хамтран ажиллах болно.

    Энэ бодлогын хүрээнд иргэний нийгмийг хөгжүүлэх бодлогын хөтөлбөр, ТББ-дын хуулийг шинэчлэх асуудлыг боловсруулж байна. Монгол Улсын Засгийн газар, Жендэрийн тэгш байдлын Үндэсний хорооноос НҮБ-ын Хөгжлийн хөтөлбөрийн дэмжлэгтэйгээр зохион байгуулж буй “Эмэгтэйчүүд-Хүний хөгжил” Үндэсний чуулганаар Та бүхэн эмэгтэйчүүдийн нийгэмд гүйцэтгэж буй үүрэг, хариуцлага, улс орны хөгжилд оруулж буй хувь нэмэр, цаашдын зорилтын талаар олон чухал сэдвийг хөндөн ажил хэрэгчээр ярилцаж  шийдвэрлэхийн төлөө хамтран ажиллахыг уриалж байна.

    Чуулганы үйл ажиллагаанд амжилт хүсье.
    Анхаарал тавьсанд баярлалаа.

  • Ерөнхий сайдын ивээл дор Монголын эмэгтэйчүүд чуулж байна

    Ерөнхий сайдын ивээл дор Монголын эмэгтэйчүүд чуулж байна Монгол орныхоо өнцөг булан бүрээс ирсэн 500 гаруй эмэгтэйчүүд Төрийн ордонд хоёр дахь өдрөө чуулж байна. Тэд Монгол Улсын Ерөнхий сайдын ивээл дор зохион байгуулагдаж байгаа “Эмэгтэйчүүд-хүний хөгжил” сэдэвт Монголын эмэгтэйчүүдийн чуулга уулзалтад оролцож буй юм. Монгол Улсын Ерөнхий сайд, Жендерийн тэгш байдлын үндэсний хорооны дарга С.Батболд чуулганыг нээж хэлэхдээ “Монгол хүн бүр ажилтай, тогтмол орлоготой байх нь төр засгийн хамгийн чухал стратегийн зорилтын нэг.

    Засгийн газар энэ  зорилгоор эдийн засгийн өсөлтийг хангах,  жижиг дунд үйлдвэр, хөдөлмөр эрхлэлтийг дэмжих арга хэмжээг үе шаттайгаар хэрэгжүүлж ирлээ. Манай улс уул уурхайн баялагтаа түшиглэн Оюутолгой, Тавантолгойн зэрэг ордуудыг ашиглаж эхлэх, алт, зэс, төмөр, барилгын материалын томоохон үйлдвэрүүд, авто зам, төмөр замын, эрчим хүчний том сүлжээнүүдийг байгуулах зааг дээр ирээд байна. Эдгээр уул уурхайн баялгаас олсон хөрөнгийг эмэгтэйчүүд, гэр бүл, хүүхдийнхээ хөгжилд зарцуулах ёстой” гэлээ.

    Мөн тэрбээр “Эхчүүд та бид үр хүүхдүүдийнхээ хүмүүжил төлөвшил, гэр бүлийн хөгжил, үнэт зүйлсийн талаар зөвхөн ярих төдий биш төрийн бодлогод онцгойлон тусгаж шат дараатай арга хэмжээ авах  шаардлагатай болсон. Тиймээс гэр бүл, эмэгтэйчүүд, жендэр, хүүхэд залуучуудын асуудлаар Төрийн бодлого боловсруулах, хэрэгжилтийг уялдуулан зохицуулах агентлаг бий болгож ажиллуулах шаардлагатай гэж үзэж байгаагаа энд онцлон дурдъя” гэсэн юм. Үүний дараагаар үндэсний чуулганд хандаж Монгол Улсын Ерөнхийлөгч, Монгол Улсын Их хурлын даргын илгээлтийг төлөөлөгчдөд уншиж сонсголоо.

    Ерөнхий сайдын ивээл дор болж буй энэхүү чуулганы төлөөлөгчид Монголын эмэгтэйчүүд, жендерийн тэгш байдал, хүний хөгжил, эдийн засаг, хөгжих эрхийн хэрэгжилт, нийгэм, соёлын хөгжил, нийгмийн төлөвшил, ардчилсан засаглал, улс төрийн оролцоо зэрэг олон талт асуудлаар үндсэн илтгэл тавьж, хэлэлцүүлэг өрнүүлж байна.  Тэд чуулганаас гарах баримт бичгээ Монгол Улсын Ерөнхийлөгч, УИХ-ын дарга, УИХ-ын гишүүд, Улс төрийн намын удирдлагуудад хүргэх юм байна.

    “Эмэгтэйчүүд- хүний хөгжил” Монголын эмэгтэйчүүдийн үндэсний чуулганыг Монгол Улсын Засгийн газар, Жендэрийн тэгш байдлын үндэсний хороо, НҮБ-ын Хөгжлийн Хөтөлбөрийн дэмжлэгтэйгээр, Монголын ардчилсан социалист эмэгтэйчүүдийн холбоо, Ардчилсан эмэгтэйчүүдийн холбоо, Иргэний зориг эмэгтэйчүүдийн холбоо, Монголын эмэгтэйчүүдийн ТББ-ын Үндэсний сүлжээ зэрэг байгууллагууд хамтран зохион байгууллаа гэж Засгийн газрын Хэвлэл мэдээллийн албанаас мэдээллээ.

  • Засгийн газрын ээлжит хуралдаан 2010 оны 6 дугаар сарын 2-ны өдөр болж, дараах асуудлыг хэлэлцэн шийдвэрлэлээ

    Засгийн газрын ээлжит хуралдаан 2010 оны 6 дугаар сарын 2-ны өдөр болж, дараах асуудлыг хэлэлцэн шийдвэрлэлээМАХНЫ ЯАРМАГ ХУДАЛДААГ УЛИРАЛ БҮР ЗОХИОН БАЙГУУЛНА
    Хүнсний гол нэрийн бүтээгдэхүүний талаар авах зарим арга хэмжээний тухай асуудлыг Засгийн газрын    хуралдаанаар хэлэлцээд гишүүдээс гаргасан саналыг тусган Засгийн газрын тогтоол гаргалаа. Холбогдох арга хэмжээ авч байгаагийн дүнд хүнсний гол нэрийн бүтээгдэхүүн, ялангуяа махны үнэ буурах хандлагатай байгааг Хүнс, хөдөө аж ахуй, хөнгөн үйлдвэрийн сайд Т.Бадамжунай Засгийн газрын гишүүдэд танилцуулав.   

    Цаашид :
    •    Махны үнийн хэт өсөлтийг сааруулах, махны хангамж, нийлүүлэлтийг нэмэгдүүлэх зорилгоор Хэнтий, Дорнод, Сүхбаатар зэрэг аймгаас нийслэлд мах нийлүүлэх арга хэмжээг яаралтай зохион байгуулах 

    •    Махны хангамж, нийлүүлэлтийг сайжруулж, хэрэглэгч, үйлдвэрлэгчийг шууд холбох, үнийн хэт өсөлтийг сааруулах зорилгоор Улаанбаатар хотод махны яармаг худалдааг энэ оны 6 дугаар сараас эхлэн хаврын улиралд сард 2 удаа, бусад улиралд сард 1 удаа зохион байгуулах, эрэлт нийлүүлэлтэд хяналт, судалгаа хийх 

    •    Яармаг худалдааны үеэр хяналт, шалгалт, зөвшөөрлийн нэг цэгийн үйлчилгээ ажиллуулах, махыг Улаанбаатар хотод шуурхай нэвтрүүлэх нөхцлөөр хангах

    •    2011 оноос Улаанбаатар хотод 12,0 мянган тонн, Дархан, Эрдэнэт хотод тус бүр 1,0 мянган тонн, бусад аймгийн төвд 100 тонноос доошгүй хэмжээний мах нөөцлөн, жил бүрийн хаврын улиралд борлуулах 

    •    Хаврын улиралд борлуулах нөөцийн махны урамшуулалд шаардагдах санхүүжилтийн эх үүсвэрийг жил бүрийн улсын болон орон нутгийн төсөвт тусгах арга хэмжээ авахыг холбогдох яамдын сайд, аймаг, нийслэлийн Засаг дарга, харъяа  агентлагийн дарга нарт тус тус даалгав. 

    Мөн өвс тэжээлийн нөөц бүрдүүлэлт, бэлтгэлийн тогтолцоог боловсронгуй болгох, аймаг, сумдад тэжээлийн нөөцийн сан бий болгох талаар санал боловсруулж энэ оны 3 дугаар улиралд багтаан Засгийн газарт танилцуулах, хүнсний зориулалттай улаанбуудайн чанарыг сайжруулах, үрийн тариалан эрхэлдэг аж ахуйн нэгжүүдийг зах зээлийн зарчимд нийцүүлэн сонгон шалгаруулж хамтран ажиллах, улаанбуудайн урамшууллыг бүсээр болон чанарын зэрэглэлээр ялгавартай тогтоон олгох санал боловсруулж энэ оны 6 дугаар сард багтаан Засгийн газарт танилцуулахыг Монгол Улсын Шадар сайд М.Энхболд, Хүнс, хөдөө аж ахуй, хөнгөн үйлдвэрийн сайд Т.Бадамжунай нарт даалгалаа. 

    Хүнсний гол нэрийн бүтээгдэхүүн болох мах, гурил, элсэн чихэр, цагаан будаа, ургамлын тосны сарын үлдэгдлийн хэмжээг нэгтгэн Засгийн газарт сар бүр танилцуулах, уг хэмжээнээс бууруулахгүй байх талаар үйлдвэрлэгчид, импортлогчидтой гэрээ байгуулах, мах, сүү, төмс, хүнсний ногооны нийлүүлэлт, борлуулалтын тогтолцоог зах зээлийн харилцаанд нийцүүлэн боловсронгуй болгох, орчин үеийн, төрөлжсөн бөөний худалдааны төв, агуулахыг үе шаттай барьж байгуулах, энэ чиглэлийн төслийг  гадаад орон, олон улсын байгууллагын зээл, тусламжид хамруулахыг Сангийн сайд С.Баярцогт, Хүнс, хөдөө аж ахуй, хөнгөн үйлдвэрийн сайд Т.Бадамжунай, Нийслэлийн Засаг дарга бөгөөд Улаанбаатар хотын захирагч Г.Мөнхбаяр нарт даалгав. 

    Эдийн засаг, нийгмийн хөгжлийн төлөв байдал, өргөн хэрэглээний бараа бүтээгдэхүүний үнэ, ханш, зах зээлийн талаар байнга судалгаа хийж байхыг Үндэсний хөгжил, шинэтгэлийн хороо /Ч.Хашчулуун/-д, судалгаанд шаардагдах хөрөнгийн эх үүсвэрийг 2010 оны төсвийн тухай хуульд өөрчлөлт оруулах тухай хуулийн төсөлд тусгах арга хэмжээ авахыг Сангийн сайд С.Баярцогтод даалгав. 

    ТУСГАЙ ХЭРЭГЦЭЭНИЙ ГАЗАРТ ХАМААРУУЛАВ

    Дорноговь аймгийн Сайншанд сумын нутагт аж үйлдвэрийн цогцолбор байгуулахаар төлөвлөсөн 3512.5 га, Өмнөговь аймгийн Ханбогд сумын нутаг- Оюутолгой орд орчмын 7736.1 га, Цогтцэций сумын Тавантолгойн орд газар орчмын 3661.3 га, Дорноговь аймгийн Замын-Үүд сумын нутагт орших 882.3 га, Төв аймгийн Сэргэлэн сумын Хөшигтийн хөндийд баригдах “Олон улсын нисэх онгоцны буудал”-ын дэвсгэр нутагт орших 12084.9 га газрыг тусгай хэрэгцээний газарт хамааруулахаар болов. 

    Тусгай хэрэгцээнд авсан газарт иргэн, хуулийн этгээдийн эзэмшиж, ашиглаж, өмчилж байгаа газрыг холбогдох хууль тогтоомжийн хүрээнд солих буюу эргүүлэн авахад шаардлагатай хөрөнгийн тооцоо, судалгаа хийж дүнг 2010 оны 7 дугаар сарын 1-ний дотор, аж үйлдвэрийн цогцолбор, уул уурхайг түшиглэн байгуулах хот, тосгоны хөгжлийн ерөнхий төлөвлөгөө боловсруулах, орон нутгийн газар зохион байгуулалтын тухайн жилийн төлөвлөгөөнд тодотгол хийх зэрэг ажил хийж, дүнг 2010 оны 4 дүгээр улиралд багтаан Засгийн газарт танилцуулахыг Зам, тээвэр, барилга, хот байгуулалтын сайд Х.Баттулга, Сангийн сайд С. Баярцогт, холбогдох аймгийн Засаг дарга нарт даалгалаа.  

    Тогтоолыг хэрэгжүүлэх үйл ажиллагааг нэгдсэн удирдлага, мэргэжил, арга зүйн зөвлөгөөгөөр хангаж ажиллахыг Зам, тээвэр, барилга, хот байгуулалтын сайд Х.Баттулга, хэрэгжилтэд хяналт тавихыг Монгол Улсын сайд, Засгийн газрын Хэрэг эрхлэх газрын дарга Ч. Хүрэлбаатар нарт даалгажээ.

    ТОВЧХОН

    •    УИХ-ын гишүүн Д.Оюунхорол, П.Алтангэрэл нарын нэр бүхий 24 гишүүний санаачлан боловсруулсан “Олон хүүхэд төрүүлж өсгөсөн эхийг урамшуулах тухай” хуулийн төслийг хэлэлцээд зарчмын хувьд дэмжиж хэд хэдэн саналыг төсөл санаачлагч нарт уламжлахаар тогтов. Гишүүд 6 буюу түүнээс дээш хүүхэд төрүүлсэн эхийг “Эхийн алдар” нэгдүгээр зэргийн, 4 хүүхэд төрүүлсэн эхийг хоёрдугаар зэргийн одонгоор шагнахаар хуулийн төсөл санаачилсан байна. Хууль батлагдвал нэг, хоёрдугаар зэргийн одонтой эхчүүд нэг удаа 500 мянгаас нэг сая төгрөгийн урамшуулал авах юм. 

    •    УИХ-ын гишүүн Х.Бадамсүрэн, С.Бямбацогт, Д.Одбаяр нарын санаачлан боловсруулсан “Тэсэрч дэлбэрэх бодис, тэсэлгээний хэрэгслийн эргэлтэд хяналт тавих тухай” хуульд нэмэлт, өөрчлөлт оруулах  тухай хуулийн төслийг хэлэлцээд зарчмын хувьд дэмжиж, хэд хэдэн саналыг төсөл санаачлагчдад уламжлахаар боллоо. 

    •    УИХ-ын гишүүн Ц.Сэдванчиг, Б.Бат-Эрдэнэ, Л.Гүндалай нарын санаачлан боловсруулсан “Зарим байгалийн цогцолбор газрын хилийн заагт өөрчлөлт оруулах тухай” УИХ-ын тогтоолын төслийг зарчмын хувьд дэмжин хэд хэдэн саналыг төсөл санаачлагч нарт уламжлахаар тогтов. Тусгай хамгаалалттай газар нутагт оршин суудаг иргэдийн газар эзэмших, өмчлөх эрхийг нь эдлүүлэх зорилгоор  Хөвсгөл аймгийн Ханх сумын төв, Хатгал тосгоны эдэлбэр газрыг Хөвсгөлийн байгалийн цогцолборт газрын хилийн заагаас, Хэнтий аймгийн Дадал сумын төвийн зарим газрыг Онон-Балжийн цогцолборт газрын хилийн заагаас тус тус чөлөөлөхөөр гишүүд тогтоолын төсөл санаачилжээ. 

    •    УИХ-ын гишүүн С.Бямбацогт, Ж.Сүхбаатар нарын санаачлан боловсруулсан “Засгийн газрын үнэт цаас гаргахыг зөвшөөрөх тухай” УИХ-ын тогтоолын төслийг хэлэлцэв. Тогтоолыг хэзээнээс хэрэгжүүлж эхлэх, бондын хугацаа, хэмжээ, хүүгийн талаар тооцоо хийгээгүй, бондын төлбөрийг төсвийн хуульд хэрхэн тусгах нь тодорхой бус, малгүй болсон, банкны зээлтэй иргэдийн тоо хэд байгаа, тэдгээрийн төлөх зээлийн хүүгийн хэмжээ болон малчид 1 сая 500 мянган төгрөгийн хишиг, хувиа банкны зээлийн төлбөрт өгөх сонирхолтой байгаа эсэх талаар урьдчилсан судалгаа хийх нь  зүйтэй гэсэн саналыг хууль санаачлагч нарт уламжлахаар тогтов.  

    •    Гаалийн тариф, гаалийн татварын тухай хуульд нэмэлт өөрчлөлт оруулах тухай хуулийн төслийг хэлэлцэн дэмжээд Улсын Их Хуралд өргөн мэдүүлэхээр тогтов.  

    •    Цагдаа, дотоодын цэргийн хамгаалалтад байх онц чухал обьектын жагсаалтад     “Биокомбинат” төрийн өмчит үйлдвэрийн газар, “Улсын мал эмнэлэг, ариун цэврийн төв лаборатори” улсын төсөвт үйлдвэрийн газрыг нэмж оруулав. 

    •    Гадаадын иргэний эрх зүйн байдлын тухай хуулийн шинэчилсэн найруулгын төсөл болон хуулийн төсөлтэй холбогдуулан бусад хуульд нэмэлт, өөрчлөлт оруулах тухай асуудлыг хэлэлцээд гишүүдийн гаргасан саналыг тусган Улсын Их Хуралд өргөн мэдүүлэхээр тогтов. 

    •    Монгол Улсын Ерөнхийлөгч Ц.Элбэгдоржийн 2010 оны 4 дүгээр сарын 28-наас 5 дугаар сарын 3-ны өдрүүдэд БНХАУ-д хийсэн төрийн айлчлалын дүнг хэлэлцээд Үндэсний аюулгүй байдлын зөвлөлд оруулахыг Гадаад харилцааны сайд Г.Занданшатарт даалгав. 

    •    Ази, Номхон Далайн Бүсийн Шуудан Холбооны Гүйцэтгэх Зөвлөлийн хурлыг 2011 онд Улаанбаатар хотод зохион байгуулахаар тогтов. 

    •    “Байгалийн ургамлын тухай хуульд нэмэлт, өөрчлөлт оруулах тухай”, “Байгалийн ургамал ашигласны төлбөрийн тухай хуульд нэмэлт, өөрчлөлт оруулах тухай” хуулийн төслийг хэлэлцээд Засгийн газрын гишүүдээс гаргасан саналыг тусган Улсын Их Хуралд өргөн мэдүүлэхээр тогтов. 

    •    Боловсрол, соёл, шинжлэх ухааны сайд Ё.Отгонбаярын Бүгд Найрамдах Солонгос Улсын Боловсрол, шинжлэх ухаан, технологийн сайдын урилгаар ажлын айлчлал хийсэн тухай илтгэх хуудастай танилцав гэж Засгийн газрын Хэвлэл, мэдээллийн албанаас мэдээллээ.

  • Монгол улсын Ерөнхий сайд С.Батболдын Монгол, Хятадын бизнес уулзалтад хэлсэн үг

    Монгол улсын Ерөнхий сайд С.Батболдын Монгол, Хятадын бизнес уулзалтад хэлсэн үгБНХАУ-ын Төрийн Зөвлөлийн Ерөнхий сайд, эрхэмсэг ноён Вэнь Зябао, эрхэмсэг хатагтай ноёд оо,

    Та бүхний энэ өглөөний амар амгаланг айлтгая.

    БНХАУ-ын Төрийн Зөвлөлийн Ерөнхий сайд ноён Вэнь Зябаогийн Монгол Улсад хийж буй албан ёсны айлчлал амжилттай үргэлжилж байна. Өчигдөр болсон бидний уулзалт, хэлэлцээ найрсаг байдалд болж Монгол, Хятадын харилцаа, хамтын ажиллагааг шинэ жаранд шинэ шатанд хөгжүүлэх асуудлаар тодорхой ярилцаж, олон чухал баримт бичигт гарын үсэг зурлаа. Айлчлалын хүрээнд хоёр талын зохион байгуулж буй хоёр талын бизнес эрхлэгчид, ажил хэрэгч хүмүүс оролцож буй энэхүү эдийн засгийн чуулга уулзалт нь хоёр талын хооронд хийсэн яриа хэлэлцээг ажил хэрэг болгох, хамтын ажиллагааг шинэ агуулгаар баяжуулан хөгжүүлэхэд түлхэц үзүүлнэ гэдэгт эргэлзэхгүй байна.

    БНХАУ-ын тууштай хүчин чармайлт нь эдийн засгийн хямралыг богино хугацаанд даван туулахад бүс нутаг, дэлхий нийтийн түвшинд чухал үүрэг гүйцэтгэж, хувьсан өөрчлөгдөж буй даяарчлагдсан дэлхийн эдийн засагт Хятад улс улам бүр чухал байр суурийн нэгийг эзлэж байна. Хятад Улс нь макро эдийн засгийн тогтвортой байдлыг хангахын зэрэгцээ экспорт болон дотоодын эрэлт хэрэгцээнд суурилсан эдийн засгийн өсөлтийг үргэжлүүлэх, үүнд шаардлагатай түүхий эдийн улам бүр өсөн нэмэгдэх нөөцийн найдвартай нийлүүлэлтийг хадгалахыг чухалчилж байна.

    Өөрөөр хэлбэл Хятад Улс өнгөрсөн хугацаанд дэлхийн нийтийн аж үйлдвэрийн нэг чухал төв нь болж чадсан бол одоо дэлхийн урт хугацааны өсөлтийн нэг эх үүсвэр болох зах зээл нь болж байна. Монгол Улсын хувьд 21-р зуунд эдийн засгийн үсрэнгүй хөгжлийг авчирах томоохон төслүүд эхэлж буй шинэ гарааны өмнө зогсож байна. Манай улс бүс нутгийн хэмжээнд уул уурхайн бүтээгдэхүүн нийлүүлэгч болох үүд хаалга нээгдэж буй бөгөөд үүнд үндэслэн эрчим хүч, уул уурхайн боловсруулсан бүтээгдэхүүний салбарт бүс нутгийн хэмжээнд өрсөлдөх чадвартай тоглогч болох бүрэн боломжтой юм. Ийм ч учраас хөрш хоёр манай орны хувьд хөгжлийн шинэ шат нь “хамтдаа ялж, хамтдаа хожих” боломжийг бүрдүүлж байна.

    Хатагтай, ноёд оо,
    Хоёр улсын эдийн засгийн хөгжлийн энэ шинэ боломжийг бүрэн дүүрэн, эрх тэгш, харилцан ашигтай байдлаар ашиглахын төлөө бид хамтран ажиллах нь зүйтэй юм. Бид гэдэг нь Засгийн газрын байгууллага, мөн төлөөлөл нь болж байгаа бизнесийн байгууллагууд нэгэн адил хамтран хүчин зүтгэн байж энэ шинэ боломжийг ашиглах боломжтой болно.

    Засгийн газруудын зүгээс хоёр улсын худалдаа, эдийн засгийн харилцааг улам хөгжүүлэхэд онцгой анхаарч байна. БНХАУ-ын Төрийн Зөвлөлийн Ерөнхий сайд эрхэмсэг ноён Вэнь Зябаогийн Монгол Улсад хийж буй энэхүү айлчлалын хүрээнд энэ чиглэлээр томоохон амжилт дэвшил гарлаа. Уул уурхайн бүтээгдэхүүнд суурилсан нэмүү өртөг шингэсэн боловсруулах салбарыг хөгжүүлэхэд Монгол Улсын Засгийн газрын зүгээс онцгой анхааран дэмжиж, энэ чиглэлээр Сайншанд, Замын-Үүд, Чойр зэрэг аж үйлдвэрийн бүсүүдэд боловсруулах үйлдвэр барихад хятадын аж ахуйн нэгжүүдийг урьж, дэд бүтэц, санхүүгийн салбарт хамтран ажиллах талаар санал дэвшүүлсэн.

    Эрхэмсэг ноён Вэнь Зябаогийн талаас уул уурхайн томоохон төслүүдэд хятадын аж ахуйн нэгжүүдийг оролцуулах сонирхлоо илэрхийлэхийн зэрэгцээ 500 сая ам долларын хөнгөлөлттэй зээлийн шугамыг өмнө нь олгохоор шийдвэрлэсэн 300 сая ам доллар дээр нэмж олгох болсоныг мэдэгдсэн болно. Энэхүү хөнгөлөлттэй зээлийг олгож байгаад Монголын Засгийн газрын зүгээс талархлаа дахин илэрхийлж, Монгол Улсад нэмүү өртөг шингэсэн боловсруулах үйлдвэрлэлийг хөгжүүлэхэд тэргүүлэх ээлжинд ашиглах талаар ажиллах болно.                   
       
    Дэд бүтцийн салбар нь хоёр орны хамтын ажиллагааны нэг чухал чиглэл хэвээр байх болно. Монгол Улсын хувьд дэлхийн зах зээлд өөрийн бүтэгдэхүүнээ гаргах өрсөлдөх чадвартай гарцыг аль болох олон байлгахыг эрэлхийлэх нь зүй ёсны сонирхол бөгөөд БНХАУ-тай холбосон, улмаар цаашлаад далайн боомтуудтай холбосон төмөр зам, авто замын сүлжээг хөгжүүлэхэд анхаарч ажиллана. УИХ-аар хэлэлцэгдэж буй төмөр замын бодлогод энэ чиглэл зохих байдлаар туссан бөгөөд энэ оны эхээр батлагдсан Концессийн хуулийн хүрээнд төр, хувийн хэвшлийн хамтын ажиллаганы хэлбэрээр эдгээр төслүүдийг хэрэгжүүлэх боломжтой юм.

    Монгол Улс нь эрчим хүчний томоохон нийлүүлэгч болох нүүрсний, тэр дотроо хүрэн нүүрсний асар их нөөцтэй билээ. Иймд нүүрсний уурхай, цахилгаан станцын цогцолборуудыг байгаль орчинд хамгийн нөлөөлөл багатай орчин үеийн техник технологийг ашиглан төр, хувийн хэвшлийн бүх талын оролцоотой барьж байгуулж БНХАУ-д эрчим хүч экспортлохыг бид зорьж, энэ талаархи хамтын ажиллагааг чухалчлан дэмжиж байна.
       
    Эдгээр дэд бүтцийн төслүүдийг хятадын аж ахуйн нэгжүүд Монголын түнш байгууллагуудтай хамтран анхааралтай судлахыг урьж байна. Дэд бүтцийн энэхүү төслүүд нь хоёр орны хамтын ажиллагааг өргөжүүлэхэд чухал хувь нэмэр оруулж, хамтын ажиллагааны шинэ түвшин, шинэ жишгийг тогтоох бүрэн боомжтой юм. Мал аж ахуй, хүнсний салбарт, ялангуяа мах боловсруулах, малын гаралтай түүхий эдийг боловсруулах салбарт хамтран ажиллах өргөн нөөц боломж байна. Малын гаралтай түүхий эдийг боловсруулж, хүнсний өндөр чанартай бүтээгдэхүүн үйлдвэрлэх талаар санхүүгийн болон бусад чиглэлээр хамтран ажиллах асуудлаар яриа хэлэлцээний үеэр санал солилцсон болно. 

    Монгол Улсын Засгийн газрын зүгээс дээрхи болон бусад бүх салбарт дотоод, гадаадын хөрөнгө оруулагч нарт ижил тэгш нөхцөл олгох, үл ялгаварлах, ил тод, нээлттэй хөрөнгө оруулалт, бизнесийн орчин бүрдүүлэх зарчим баримталж ирсэн. 2010 оныг “Бизнесийн орчинг шинэчлэх жил” болгон зарлаж, эрх зүйн орчинг боловсронгүй болгох, бизнесийн холбогдолтой дүрэм журмыг шинэчлэх ажлыг хувийн хэвшил, төрийн бус байгууллагын оролцоотойгоор хэрэгжүүлэхийг бид зорьж байна.
       
    Цаашид ч бизнесийн орчныг улам нээлттэй, ил тод болгохдоо Монгол Улсын хууль тогтоомжийг чанд мөрдөж, Засгийн газраас тогтоосон тэргүүлэх салбарын хөгжлийг татвар, санхүү, зохицуулалтын бодлогоор улам эрчимтэй дэмжин эдгээр салбарт нийгмийн хариуцлагатай, байгаль орчинд ээлтэй тэргүүний технологитой, орон нутгийн хөгжлийг дэмждэг аж ахуйн нэгжүүдийн оролцоог улам өргөжүүлэх болно.

    Энэ айлчлалын үеэр хамтын ажиллагааны гурван талт томоохон төслүүдийн талаар санал солилцсон нь ихээхэн ач холбогдолтой болсныг онцлон тэмдэглэмээр байна. Хийн хоолойг Монгол Улсын нутгаар дамжуулан тавих нь эдийн засгийн ач холбогдолтой байх үндэслэлтэй учир энэ талаар ОХУ-тай боломж бололцооны талаар үргэжлүүлэн ярилцах нь ач холбогдолтойг талууд онцолсноор бүс нутгийн эдийн засгийн хамтын ажиллагаанд шинэ шатыг нээх суурийг тавьсан гэж үзэж байна.
       
    Аливаа эдийн засгийн хамтын ажиллагаанд нэг хэлээр ярьж, нэгдсэн ойлголтод хүргэж чаддаг боловсон хүчин маш чухал үүрэгтэй. Энэ удаагийн айлчлалаар БНХАУ-д Засгийн газрын тэтгэлгээр 5 жилийн хугацаанд 2000 монгол оюутныг суралцуулах болж, мөн Хятадын Засгийн газрын тусламжаар Шинжлэх ухаан, техникийн их сургуулийн хотхоныг шинээр барихаар тохиролцсон нь бизнесийн хамтын ажиллагаанд онцгой ач холбогдолтой байх болно.

    Хатагтай, ноёд оо,
       
    Манай хоёр орны хоорондын өндөр дээд хэмжээний айлчлалууд нь хоёр орны сайн хөршийн, харилцан итгэсэн түншлэлийн харилцаа, эрх тэгш, харилцан ашигтай хамтын ажиллагааг хөгжүүлэхэд чухал түлхэц үзүүлж ирсэн билээ. БНХАУ-ын Төрийн Зөвлөлийн Ерөнхий сайд ноён Вэнь
    Зябаогийн энэ удаагийн айлчлал нь хоёр орны харилцааг шинэ шатанд гаргахад онцгой чухал үүрэг гүйцэтгэсэн, хоёр орны эдийн засаг хөрөнгө оруулалтын тэргүүлэх салбаруудад нэгэн доор ахиц дэвшил авчирсан, хүмүүнлэгийн харилцааг улам гүнзгийрүүлсэн, бүс нутгийн эдийн засгийн хамтын ажиллагааны шинэ шатны суурийг тавьсан айлчлал боллоо гэж дүгнэн үзэж байна.

    Шинээр нээгдэж буй боломж бололцоог бүрэн дүүрэн ашиглаж, харилцан ашигтай хамтын ажиллагааг өрнүүлэх боломж бизнес эрхлэгчид та бүхэнд өргөн дэлгэр нээгдэж байна.

    Анхаарал тавьсанд баярлалаа.

  • Монгол-Хятадын худалдаа, эдийн засгийн форум болов

    Монгол-Хятадын худалдаа, эдийн засгийн форум боловМонгол Улсын Ерөнхий С.Батболдын урилгаар БНХАУ-ын Төрийн зөвлөлийн Ерөнхий сайд Вэнь Зябаогийн Монгол Улсад хйих айлчлалын хүрээнд Монгол Улсын Гадаадын хөрөнгө оруулалтын газар БНХАУ-ын Худалдааны яамны Гадаадын хөрөнгө оруулалтыг дэмжих газартай хамтран “Монгол-Хятадын Худалдаа, Эдийн Засгийн Форум”-ыг 2010 оны 6 дугаар сарын 2-ны өдөр Улаанбаатар хотноо амжилттай зохион байгууллаа.

    Энэхүү форум нь уул уурхай, дэд бүтэц, хүнс хөдөө аж ахуй, банк санхүүгийн салбарын хүрээнд Монгол Улсын хөрөнгө оруулалт, бизнесийн боломжийг БНХАУ-ын бизнес эрхлэгчдэд сурталчлан таниулах, хоёр орны бизнес эрхлэгчдийг холбож бизнесийн түншлэл тогтоон цаашид хамтран ажиллах боломж олгоход чиглэгдэж байв. Форумын нээлтэд Монгол Улсын Ерөнхий сайд С.Батболд, БНХАУ-ын Төрийн зөвлөлийн Ерөнхий сайд Вэнь Зябао нар үг хэлж, форумын ажиллагаанд амжилт хүслээ гэж Засгийн газрын Хэвлэл мэдээллийн албанаас мэдээллээ.

  • БНХАУ-ын Төрийн Зөвлөлийн Ерөнхий сайд Вэнь Зябао Монгол улсад айлчилж байна

    бнхау, айлчлалМонгол Улсын Ерөнхий сайд С.Батболдын урилгаар БНХАУ-ын Төрийн Зөвлөлийн Ерөнхий сайд Вэнь Зябао 2010 оны 6 дугаар сарын 1-2-ны өдөр Монгол Улсад албан ёсны айлчлал хийж байна. БНХАУ-ын Төрийн Зөвлөлийн Ерөнхий сайд манай улсад 16 жилийн дараа, ноён Вэнь Зябогийн хувьд анхны албан ёсны айлчлал юм.

    БНХАУ-ын Төрийн Зөвлөлийн Ерөнхий сайд Вэнь Зябаог Д.Сүхбаатарын талбайд Монгол Улсын Ерөнхий сайд С.Батболд угтан авч, хүндэт харуулын дарга айлтгал өргөсний дараа хоёр орны төрийн дуулал эгшиглэлээ. Дараа нь хоёр улсын Ерөнхий сайд Чингис хааны хөшөөнд хүндэтгэл үзүүлэв. БНХАУ-ын Төрийн Зөвлөлийн Ерөнхий сайд Вэнь Зябао “Баганат” танхимд байрлуулсан хүндэт зочны дэвтэрт гарын үсэг зурж Монгол Улсын Ерөнхий сайд С.Батболдтой Төрийн ордонд ганцаарчилсан уулзалт хийв.  

    Худалдаа, эдийн засгийн хамтын ажиллагааг эрчимжүүлнэ
       
    Монгол Улсын Ерөнхий сайд С.Батболд, БНХАУ-ын Төрийн зөвлөлийн Ерөнхий сайд Вэнь Зябао нарын уулзалтаар хоёр улсын харилцааны өнөөгийн байдал, цаашдын хөгжлийн талаар хэлэлцэж, бүс нутгийн болон олон улсын харилцан сонирхсон зарим асуудлаар санал солилцлоо.
    Монгол Улс, БНХАУ-ын хооронд дипломат харилцаа тогтоосноос хойш 60 жил өнгөрч, харилцаа хамтын ажиллагаа сайн хөршийн, харилцан итгэсэн, түншлэлийн хүрээнд амжилттай хөгжиж байна.

    Эхэлж буй шинэ жаранд хоёр орны харилцааг шинэ агуулгаар баяжуулан хөгжүүлэх чин эрмэлзлэлээ хоёр тал санал нэгтэй нотлож, хоёр улсын удирдагчдын өндөр дээд хэмжээний харилцан айлчлал, яриа хэлэлцээ чухал үүрэгтэй бөгөөд янз бүрийн түвшний уулзалтын давтамжийг хадгалж байх нь зүйтэй гэж талууд үзэв. Мөн хоёр орны хоорондын худалдааг нэмэгдүүлэх, уул уурхай, дэд бүтэц, хөдөө аж ахуйн салбар дахь хамтын ажиллагааг өргөжүүлэх, хятадын талаас олгосон буцалтгүй тусламж, хөнгөлөлттэй зээлийн хөрөнгөөр хэрэгжүүлэх ажлыг эрчимжүүлэх, манай улсад нэмүү өртөг шингэсэн бүтээгдэхүүн боловсруулж экспортод гаргах, хоёр орны иргэд хоорондын харилцааны асуудлаар ярилцав.

    Албан ёсны  хэлэлцээ амжилттай боллоо

    Монгол Улсад БНХАУ 50 сая юаны буцалтгүй тусламж үзүүлэхээр болов

    Монгол Улсын Ерөнхий сайд С.Батболд, БНХАУ-ын Төрийн зөвлөлийн Ерөнхий сайд Вэнь Зябао нар албан ёсны хэлэлцээ хийв. Хэлэлцээг эхлүүлж Монгол Улсын Ерөнхий сайд С.Батболд манай улсад айлчлахаар хүрэлцэн ирсэн БНХАУ-ын Төрийн Зөвлөлийн Ерөнхий сайд Вэнь Зябао болон дагалдан яваа төлөөлөгчдөд чин сэтгэлийн талархал илэрхийлж тавтай зочлохыг хүслээ. Монгол Улсын Засгийн газар, монголын ард түмэн БНХАУ-ын Төрийн Зөвлөлийн Ерөнхий сайдыг хүндэтгэн хүлээж авсанд баярлаж байгаагаа ноён Вэнь Зябао илэрхийлэв.

    Хэлэлцээний үеэр хоёр улсын хоорондын улс төр, худалдаа эдийн засаг, соёл, хүмүүнлэг, батлан хамгаалах, хөдөө аж ахуй, уул уурхай гээд бүх салбарын хамтын ажиллагааны тодорхой асуудлыг хөндөж ярилцав. Мөн  бүс нутгийн болон олон улсын харилцааны өргөн хүрээтэй асуудал, тухайлбал Зүүн Ази, Зүүн хойд Азийн аюулгүй байдал, хамтын ажиллагааны талаар санал солилцож, ШХАБ-ын хүрээнд хэрэгжүүлж буй хамтын ажиллагаагаа цаашид ч үргэлжлүүлэхээр тохиролцов.

    Ази, Номхон далайн бүс нутаг, түүний дотор Зүүн Ази, Зүүн хойд Азийн хамтын ажиллагаанд Монгол Улс идэвхтэй оролцох Ерөнхий сайд С.Батболдын саналыг БНХАУ-ын Төрийн Зөвлөлийн Ерөнхий сайд Вэнь Зябао дэмжиж байгаагаа илэрхийлэв. Хоёр улсын худалдаа, эдийн засгийн хамтын ажиллагааны хүрээнд далайд гарцгүй манай орны хувьд транзит тээврийн асуудлыг Ерөнхий сайд С.Батболд хэлэлцээний үеэр чухалчиллаа. Хятадын нутаг дэвсгэрээр хийж байгаа транзит тээвэрт хятадын талаас хөнгөлөлт үзүүлэх, далайд гарах боомтын тоог нэмэгдүүлэх, хил орчмын бүсэд болон Тяньжин боомт, бусад боломжтой боомт хүртэл монголын авто тээврийн хэрэгслийг нэвтрүүлэх боломжийг бий болгох эрх зүйн орчинг судлаж үзэх Ерөнхий сайд С.Батболдын хүсэлтийг БНХАУ-ын Төрийн Зөвлөлийн Ерөнхий сайд Вэнь Зябао нааштай хүлээн авч холбогдох байгууллагуудтайгаа ойрын үед ярилцана гэлээ.

    Иргэдтэй холбоотой асуудлыг шуурхай шийдвэрлэх үүднээс хоёр орны  хууль, хяналтын ижил чиг үүрэгтэй байгууллага хоорондын хамтын ажиллагааг улам өргөтгөн хөгжүүлэх, шууд харилцааг бэхжүүлэх, терроризм, хил дамнасан зохион байгуулалттай гэмт хэрэгтэй тэмцэх ажлыг идэвхжүүлэх, Монгол Улсын Засгийн газраас хятадын талд гардуулан өгсөн “Ялтан шилжүүлэх гэрээ”-г ойрын хугцаанд байгуулах саналтай байгаагаа Монгол Улсын Ерөнхий сайд С.Батболд илэрхийлэв.

    Уг асуудлыг судалж нааштайгаар шийдвэрлэхээ илэрхийлж, манай улсад 50 сая юаний буцалтгүй тусламж, батлан хамгаалах салбарт 10 сая юаны тусламж үзүүлэх болсныг БНХАУ-ын Төрийн Зөвлөлийн Ерөнхий сайд Вэнь Зябао мэдэгдлээ. Буцалтгүй тусламжийг хоёр улсын харилцан тохирсон төслүүдэд зарцуулна. Засгийн газраас хэрэгжүүлж байгаа “Оюутны хотхон”-ны хүрээнд Шинжлэх ухаан технологийн их сургуулийн төслийг БНХАУ дэмжиж буцалтгүй тусламжийнхаа зохих хэсгийг зарцуулах, 5 жил дараалан жил бүр манай 60 залууг хүлээн авч айлчлуулж, Засгийн газрынхаа тэтгэлгээр ирэх 5 жилд 2000 оюутныг нэмж сургахаар боллоо.

    БНХАУ-ын Төрийн Зөвлөлийн Ерөнхий сайд Вэнь Зябаогийн айлчлалын хүрээнд харилцаа, хамтын ажиллагааны 9 баримт бичигт гарын үсэг зурлаа

    Хилийн дэглэмийн тухай анх удаа гэрээ байгуулав

    Монгол Улсын Ерөнхий сайд С.Батболд, БНХАУ-ын Төрийн зөвлөлийн Ерөнхий сайд Вэнь Зябао нарын албан ёсны хэлэлцээний үеэр хоёр орны хилийн дэглэмийн асуудлыг хөндөн ярилцав. Энэ хүрээнд Монгол, Хятадын хилийн дэглэмийн тухай Монгол Улсын Засгийн газар, БНХАУ-ын Засгийн газар хоорондын гэрээнд гарын үсэг зурлаа. Монгол, Хятадын хилийн дэглэм, хилийн асуудлыг зохицуулж байх тухай хоёр улсын Засгийн газар хоорондын 1988 оны гэрээг шинэчилэн байгуулж байна. Гэрээ байгуулагдсанаар Монгол Улсын хилийг хамгаалах, улсын хилийн халдашгүй байдлыг хангах, хил орчмын нутаг дэвсгэрт мөрдөх хилийн дэглэм, түүнийг сахин хамгаалах, хилийн зөрчлөөс урьдчилан сэргийлэх, гарсан зөрчлийг таслан зогсоох эрх зүйн орчин 1988 оны гэрээнээс илүү боловсронгуй болно.

    Түүнчлэн хоёр улсын, тэр дундаа хил орчмын орон нутгийн худалдаа, эдийн засаг, аялал жуулчлалын харилцааг төрийн нэгдсэн бодлого, хууль тогтоомжийн хүрээнд хөгжүүлэх, хил орчмын нутаг дэвсгэр дээрх төрөл бүрийн үйл ажиллагаанд тавих хяналт сайжрах, байгаль орчныг хамгаалах, хилийн усыг зүй зохистой, илүү үр ашигтай байдлаар ашиглаж хамгаалах, зах зээлийн эдийн засгийн шаардлагаас үүдэн гарч буй хил дамнасан байгууламжийг шинээр барьж байгуулах, ашиглах, хилийн боомтыг бүрэн хүчин чадлаар ашиглах үүднээс үйл ажиллагааг нь сайжруулах зэрэг олон талт асуудлаар хоёр улсын Засгийн газар хамтран ажиллах эрх зүйн үндэс бүрдэх юм.

    БНХАУ 50 сая юаны тусламж үзүүлнэ

    Эдийн засаг, техникийн хамтын ажиллагааны тухай Монгол Улсын Засгийн газар, Бүгд Найрамдах Хятад Ард Улсын Засгийн газар хоорондын хэлэлцээрийн дагуу БНХАУ-ын Засгийн газраас Монгол Улсын Засгийн газарт 50 сая юанийн буцалтгүй тусламж үзүүлэх бөгөөд тусламжийн хөрөнгийг хоёр талын харилцан тохиролцсон төсөлд зарцуулах болов.

    Улаанбаатар хот Бээжингийн гудамжтай болно

    БНХАУ-ын Засгийн газраас олгосон буцалтгүй тусламжийн хөрөнгөөр Бээжингийн гудамж байгуулах талаарх Монгол Улсын Засгийн газар, Бүгд Найрамдах Хятад Ард Улсын Засгийн газар хооронд захидал солилцов. БНХАУ-ын ЭСЯ-ны урд талын зам, талбайг Нийслэлийн ИТХ-ын шийдвэрээр Бээжингийн гудамж болгохоор тогтсон. Солилцох захидал байгуулагдсанаар хоёр улсын Засгийн газар хооронд 2008 оны 4 дүгээр сарын 11-ний өдөр байгуулсан Эдийн засаг, техникийн хамтын ажиллагааны тухай хэлэлцээрийн дагуу олгосон буцалтгүй тусламжийн хөрөнгөөр Бээжингийн гудамжийг тохижуулах ажлыг хийж гүйцэтгэх эрх зүйн орчин бүрдэх юм.

    Гаалийн хэлэлцээрийг илүү бодитой, үр нөлөөтэй хэрэгжүүлнэ

    Гаалийн асуудлаар хамтран ажиллах, харилцан туслах тухай Монгол Улсын Засгийн газар, БНХАУ-ын Засгийн газар хоорондын 1993 оны 9 дүгээр сарын 7-ны өдрийн хэлэлцээрийг хэрэгжүүлэх тухай Монгол Улсын Засгийн газар, БНХАУ-ын Засгийн газар хоорондын протоколд гарын үсэг зурав. Протокол байгуулагдсанаар 1993 онд байгуулсан Гаалийн асуудлаар хамтран ажиллах, харилцан туслах тухай хоёр Улсын Засгийн газар хоорондын хэлэлцээрийг илүү бодитой, үр нөлөөтэй хэрэгжүүлэх эрх зүйн орчин бүрдэнэ.

    Энэхүү протоколын хүрээнд талууд гаалийн зөрчил болон гаалийн хууль тогтоомж зөрчсөн үйлдэл, гаалийн үнэлгээ, оюуны өмчийн эрхийн зөрчилтэй холбоотой мэдээ, мэдээллийг солилцох боломжтой болох юм. Түүнчлэн хоёр улсын хууль тогтоомжийн хүрээнд гаалийн хамтарсан хяналт, шалгалт хийх, улс орны аюулгүй байдал, хүн ам, байгаль орчинд хохирол учруулж болзошгүй химийн хорт, тэсэрч дэлбэрэх болон цацраг идэвхт бодист тавих хяналтыг чангатгах, мансууруулах болон сэтгэцэд нөлөөлөх бодисыг хууль бусаар хил нэвтрүүлэх үйл ажиллагаатай хамтран тэмцэх, харилцан боловсон хүчин илгээх, туршлага судлах, мэргэшил дээшлүүлэх чиглээр хамтран ажиллах боломж бүрдэнэ.

    800 сая ам.долларын хөнгөлөлттэй зээл авах боломж нээгдлээ

    Эрхэмсэг ноён Вэн Зябаогийн талаас 500 сая ам долларын хөнгөлттэй зээлийн шугамыг өмнө нь олгохоор шийдвэрлэсэн 300 сая ам доллар дээр нэмж олгох болсоныг мэдэгдсэн болно. Энэхүү хөнгөлөлттэй зээлээр Монгол Улсад нэмүү өртөг шингэсэн боловсруулах үйлдвэрлэлийг хөгжүүлэхэд тэргүүлэх ээлжинд ашиглах боломжтой гэж Засгийн газар үзэж байна.

    Тухайлбал дэд бүтэц, ХАА-н салбарт тодорхой төслүүд хэрэгжүүлэх боломжтой юм. Монгол Улсын хувьд дэлхийн зах зээлд өөрийн бүтээгдэхүүнээ гаргах өрсөлдөх чадвартай гарцыг аль болох олон байлгахыг эрэлхийлэх нь зүй ёсны сонирхол бөгөөд БНХАУ-тай холбосон, улмаар цаашлаад далайн боомтуудтай холбосон төмөр зам, авто замын сүлжээг хөгжүүлэхэд Засгийн газар анхаарч байна. Мал аж ахуй, хүнсний салбарт ялангуяа мах боловсруулах, малын гаралтай түүхий эдийг боловсруулж, хүнсний өндөр чанартай эцсийн бүтээгдэхүүн үйлдвэрлэх, экспортод гаргах чиглэлээр дээрх хөрөнгийг зарцуулах боломжтой гэж үзэж байна.

    Цөмийн энергийн салбарт хамтран ажиллахаар болов

    Цацраг идэвхт ашигт малтмал болон цөмийн энергийн салбарт хамтран ажиллах тухай Монгол Улсын Цөмийн энергийн газар, БНХАУ-ын Үндэсний цөмийн корпораци хоорондын харилцан ойлголцлын санамж бичиг байгууллаа. Ингэснээр хоёр улсын салбарын байгууллага цацраг идэвхт ашигт малтмал болон цөмийн энергийн салбарт цаашид хэрхэн хамтран ажиллах талаар нэгдсэн ойлголттой болох юм.

    Мөн Монгол Улсын Засгийн газар, БНХАУ-ын Засгийн газар хоорондын Боловсролын үнэмлэх, эрдмийн зэргийн гэрчилгээг харилцан хүлээн зөвшөөрөх тухай хэлэлцээрийг сэргээн хоёр улсын Гаалийн байгууллага хооронд салбарын асуудлаар мэдээлэл солилцох эрх зүйн орчинг бүрдүүлэх протоколд гарын үсэг зурав. Холбогдох баримт бичигт гарын үсэг зурсны дараа Монгол Улсын Ерөнхий сайд С.Батболд, БНХАУ-ын Төрийн Зөвлөлийн Ерөнхий сайд Вэнь Зябао нар хэвлэл мэдээллийнхэнд товч мэдээлэл өглөө гэж Засгийн газрын Хэвлэл, мэдээллийн албанаас мэдээллээ.

  • Ерөнхий сайд С.Батболд эмзэг бүлгийн хүүхдийн гар зургийн үзэсгэлэнг ивээн тэтгэж, зохион байгууллаа

    үзэсгэлэн, нээлт, хүүхэдХүүхдийн төлөө үндэсний зөвлөлийн тэргүүн, Монгол Улсын Ерөнхий сайд С.Батболд өөрийн ивээл дор зохиогдсон эмзэг бүлгийн болон асрахын хүүхдүүдийн зураг, урлалын үзэсгэлэнг гэргий Х.Отгонтуяа, хүүхдүүдийн хамт үзэж сонирхлоо. Монголын Урчуудын эвлэлийн хорооны үзэсгэлэнгийн танхимд болсон энэ арга хэмжээнд “Амьдрах ухаан-урлахуйн төв”-ийн хүүхдүүд 500 гаруй бүтээлээ толилууллаа.

    Уг үзэсгэлэнг эгэл баатар Д.Эрдэнэбат, боловсролын тэргүүний ажилтан Р.Бийраа нар 7 дахь жилдээ зохион байгуулж байгаа бөгөөд энэ удаагийнхийг нь Ерөнхий сайд С.Батболд ивээн тэтгэж буй юм. Үзэсгэлэнд тавигдсан нийгмийн эмзэг бүлгийн хүүхдийн зарим бүтээл 2009 онд БНСУ-д болсон олон улсын наадмаас алтан медаль хүртэж байжээ.

    Үзэсгэлэнг ивээн тэтгэж зохион байгуулсан Ерөнхий сайд С.Батболд “Орчин, нөхцлийг нь бүрдүүлээд өгвөл манай хүүхдүүд юуг ч бүтээж чаддаг гэдгийг энэ үзэсгэлэн харууллаа. Монголын хүүхэд бүхэн өрсөлдөх чадвартай иргэн болох ёстой. Чамгүй их хөдөлмөр, цаг хугацаа зарцуулж олон сайхан бүтээл хийсэн хүүхдүүдэд Хүүхдийн төлөө үндэсний зөвлөлийн тэргүүн, Засгийн газрын тэргүүн, өрхийн тэргүүний хувьд баяр хүргэе” гэж онцолж хэлээд хүрэлцэн ирсэн 100 хүүхдэд гарын бэлэгээ гардуулж өглөө.

    Мөн Ерөнхий сайд С.Батболд үзэсгэлэнд арьсан урлаг, эсгий урлаг, уран зураг, сийлбэр, модон наамал гэсэн төрлөөр тэргүүн байр эзэлсэн таван хүүхдэд унадаг дугуй, хоёрдугаар байр эзэлсэн хүүхдүүдийг роллик, гуравдугаар байр эзэлсэн хүүхдүүдийг иж бүрэн хичээлийн хэрэгсэл, жижиг биллиардаар шагнаж уран бүтээлд нь өндөр амжилт хүслээ. Уг үзэсгэлэн 2010 оны 6 дугаар сарын 1-8-ны өдрүүдэд ажиллана.

  • С.Батболд: Хүүхдийн төлөө гэсэн аливаа санал, санаачилгыг дэмжинэ

    С.Батболд: Хүүхдийн төлөө гэсэн аливаа санал, санаачилгыг дэмжинэ

    “Хүүхдийг хамгаалах, дэмжих, чөлөөт цагаа зөв боловсон өнгөрүүлэх цэцэрлэгт хүрээлэн, тоглоомын талбай зэрэг шаардлагатай бүхнийг бүрдүүлэхийн төлөө Засгийн газар эрчимтэй ажиллана. Хүүхдийн төлөө гэсэн төрийн болон төрийн бус байгууллага, хувийн хэвшлийнхний санал, санаачилгыг дэмжинэ” гэж Хүүхдийн төлөө үндэсний зөвлөлийн тэргүүн, Монгол Улсын Ерөнхий сайд С.Батболд Д.Сүхбаатарын талбайд зохион байгуулсан “Хүүхэд-Шинэ бүхний эхлэл” баярын хөтөлбөрт оролцохдоо хэлэв.

    “Хүүхдийн төлөө үндэсний зөвлөл саяхан хуралдан Хүүхдийн хөгжлийн үндэсний стратегийг боловсруулсан. Хүүхдийн чиглэлээр авах бүхий л арга хэмжээг цогцоор нь багтаасан энэ баримт бичгийг ойрын үед Засгийн газрын хуралдаанаар хэлэлцэн батлана. Хүүхэд хамгаалал, ёс зүй, зан заншилд анхаарч, тэднийг хүчирхийллийн аливаа хэлбэрээс хамгаалах, хүүхдийг боловсролтой, өрсөлдөх чадвартай болгон хүмүүжүүлэхийн тулд Засгийн газар тодорхой, бодитой арга хэмжээ авна” гэж Монгол Улсын Ерөнхий сайд С.Батболд хүүхэд багачуудад баярын мэндчилгээ дэвшүүлэхдээ онцоллоо.

    Олон улсын хүүхдийн эрхийг хамгаалах өдөрт зориулсан баярын арга хэмжээнд УИХ-ын дарга Д.Дэмбэрэл, Хүүхдийн төлөө үндэсний зөвлөлийн дэд тэргүүн, Монгол Улсын Шадар сайд М.Энхболд, НИТХ-ийн дарга Т.Билэгт, Нийслэлийн Засаг дарга бөгөөд Улаанбаатар хотын захирагч Г.Мөнхбаяр, Хөдөлмөрийн баатар, гавъяат тамирчин, Дархан аварга Ж.Мөнхбат, мэргэжлийн сумогийн 69 дэх их аварга Хакухо М.Даваажаргал болон албаны бусад хүн оролцов.

    “Хүүхэд-Шинэ бүхний эхлэл” баярт Үндэсний дуу бүжгийн эрдмийн чуулга, Хүүхэлдэйн театр, Улсын дуу бүжгийн эрдмийн чуулга, Улаанбаатар чуулга, Драмын эрдмийн театрын хамт олон болон хамтлаг, дуучид уран бүтээлээ толилууллаа. Мөн аж ахуйн нэгж, байгууллагууд бараа, бүтээгдэхүүнийхээ үзэсгэлэн- худалдаа ажиллуулсан байна.

  • Хүүхдийг хөгжүүлэх бодлогын шинэчлэлийг эхлүүлнэ

    Хүүхдийг хөгжүүлэх бодлогын шинэчлэлийг эхлүүлнэ Хүүхдийн эрхийг хамгаалах өдрийг тохиолдуулан хүүхэд, багачууд, эцэг эхчүүдэд зориулан илгээсэн Ерөнхий сайд С.Батболдын мэндчилгээ

    “Нарны хаан” хүүхэд багачууд, хүндэт эцэг эхчүүд та бүхэндээ Хүүхдийн эрхийг хамгаалах өдөр-хүүхдийн баярыг тохиолдуулан чин сэтгэлийн мэндчилгээ дэвшүүлье. Жил бүрийн энэ өдөр хүүхдийн инээд хөөр, баяр баясал дүүрэн байж, аз жаргалын дуунд нь эцэг эхчүүд бид амьдралын шинэ эрч хүч, ундрагаар ивээгддэг билээ. Хүүхдээ зөв хүмүүжүүлэх, нас, бие, сэтгэхүйн онцлогт нийцүүлэн хөгжүүлэх нь эцэг эхчүүдийн төдийгүй Монгол төрийн гол бодлого байх учиртай. Иймд төр засаг, шийдвэр гаргагчдаасаа эхлэн байгууллага, хамт олон, эцэг эх, хүүхэд бүр эрүүл аюулгүй орчин, зөв зан үйлийг дээдэлж хэвшил болгох нь чухал юм. 

    Тиймээс ч хүүхэд бүх талаар хамгаалагдсан орчинг бүрдүүлэхэд чиглэсэн Хүүхэд хамгааллыг бэхжүүлэх стратегитай болохоор Хүүхдийн төлөө Үндэсний зөвлөлийн ээлжит хуралдаанаар хэлэлцэн, шийдвэрлээд байна. Өнөөдөр гэр бүл, аж амьдралынхаа төлөө ачааны хүндийг үүрч яваа хүүхдүүд цөөнгүй бий. Тэдний зовлон бэрхшээлийг хөнгөлөх, тулгамдсан асуудлыг нь шийдвэрлэхэд төр засаг, эцэг эхчүүд, иргэн бүрийн хариуцлага гол үүрэг гүйцэтгэнэ.

    Хүүхэд хамгааллын бодлого хүнд хүчир амьдралын ачааг үүрч, зовлон, бэрхшээлийг туулж яваа хүүхдүүдийг нэн тэргүүнд хамгаалахад чиглэгдэх учиртай. Монголын хүүхдүүд үндэсний хоёрдугаар чуулганаа хуралдуулж, санал дүгнэлтээ Хүүхдийн төлөө Үндэсний зөвлөлд танилцууллаа. Хүүхдүүд маань олон чухал саналыг дэвшүүлсэн бөгөөд хүүхэд бүр хөгжих тэгш боломжтой байхыг төр, засгаасаа хүсчээ. Хүүхэд багачууд та бүхнийхээ үнэтэй саналыг үндэслэн “Хүүхдийн хөгжлийг дэмжих” талаар Засгийн газраас шийдвэр гаргаж хэрэгжүүлэх болно.   

    2010 онд Монголын хүүхдийн байгууллага, хөдөлгөөн үүсч хөгжсөний 85 жилийн түүхэн ой тохиож байна. Энэ ойг тохиолдуулан хүүхдийг хөгжүүлэх бодлогын шинэчлэл хийх гарааг эхлүүлнэ. Хүүхдийн хөгжил гэр бүлтэй салшгүй холбоотой. Тийм ч учраас хүүхдийг хамгаалах, хөгжүүлэх төрийн бодлогод  гэр бүлийн хөгжил чухал байр суурийг эзэлж, нягт уялдсан байх учиртай. Монгол орны хүн амын зонхилох хувийг хүүхэд, залуучууд эзэлдэг. Тэд үндэсний аюулгүй байдал, тусгаар тогтнолын нэг том баталгаа. Хүүхэд “асуудал бэрхшээл” биш “хөгжлийн гарц” гэдгийг бүх нийтээр хүлээн зөвшөөрөх хэрэгтэй.

    Харин аав, ээж, ах эгч, өвөө эмээ, багш нарынхаа хайр халамжийг хүртэж, ирээдүйдээ хүсэн тэмүүлж, шинийг сурч мэдэхийг хичээж, энэрэнгүй үйлсэд идэвхи санаачлагатай оролцож, байгаль орчин, эрүүл мэндээ сахин хамгаалах нь хүүхдүүд Та бүхний үүрэг юм шүү. Эрхэм дүү нартаа сануулахад авъяас чадвараа нээн илрүүлж, мэдлэг боловсролоо дээшлүүлж, эх орондоо хэрэгтэй иргэн болон төлөвшихийг сургаж зөвлөе. Өдөр бүр өнөөдрийнх шиг баяр баясгалантай, хүүхдүүд айх аюулгүй, эмээх зүйлгүй, эсэн мэнд өсч хүмүүжиж, Монгол орноо дэлхийн дайтай авч явах иргэд болон хөгжих болтугай.

    Улс үндэстний маань хөгжлийн саруул ирээдүй болсон хүүхэд багачууд та бүхэндээ сайн сайхан бүхнийг хүсэн ерөөе.

    Монгол Улсын Ерөнхий сайд,
    Хүүхдийн төлөө Үндэсний зөвлөлийн тэргүүн

    С.Батболд