Ангилал: тайлан

Монгол Улсын Засгийн газрын 12-р хуралдаан болж УИХ-ын зарим гишүүний санаачлан боловсруулсан хуулийн төслийг хэлэлцэн санал, дүгнэлт гаргав.

–    Улсын Их хурлын гишүүн Э.Мөнх-Очир, Р.Амаржаргал нарын санаачлан боловсруулсан “Дэлбэрэх бодис, тэсэлгээний хэрэгслийн эргэлтэд хяналт тавих тухай” хуулийн төслийн шинэчилсэн найруулгын төслийг хэлэлцээд хуулийн төслийг бүхэлд нь дэмжих боломжгүй гэж үзэн хууль санаачлагч нарт уламжлахаар тогтов.

–    Улсын Их Хурлын гишүүн Д.Дондог, Л.Гантөмөр нарын санаачлан боловсруулсан Төрийн аудитын байгууллагын чадавхийг бэхжүүлэх талаар авах зарим арга хэмжээний тухай Улсын Их Хурлын тогтоолын төслийг хэлэлцээд хэд хэдэн үндэслэлээр дэмжих боломжгүй гэж үзэн хууль санаачлагчдад уламжлахаар болов.

–    Улсын Их хурлын гишүүн Н.Ганбямба, Н.Энхболд, Я.Батсуурь, Д.Дондог, Ц.Сэдваанчиг нарын санаачлан боловсруулсан “Өндөр технологийн аж үйлдвэрийн талаар төрөөс баримтлах бодлого батлах тухай” Улсын Их Хурлын тогтоолын төслийг хэлэлцээд зарчмын хувьд дэмжин Засгийн газрын гишүүдээс гаргасан саналыг нэмж тусган хууль санаачлагч нарт уламжлахаар тогтов.

–    Барааны тэмдэг, газар зүйн заалтын тухай хуулийн шинэчилсэн найруулгын төслийг хэлэлцээд зарчмын хувьд дэмжиж, Засгийн газрын гишүүдээс гаргасан саналыг тусган Улсын Их Хуралд өргөн мэдүүлэхээр тогтлоо.

–    Монгол Улсын Засгийн газрын 2008-2012 оны үйл ажиллагааны хөтөлбөрт тусгагдсан “Оюуны өмчийн хувьд мэргэжлийн түвшинд үйлчилгээ үзүүлэх, нийгмийн хөгжил, олон улсын чиг хандлагад нийцсэн эрх зүйн зохицуулалтыг боловсронгуй болгох” зорилтыг хэрэгжүүлэх шаардлагын дагуу “Барааны тэмдгийн хуулийн тухай” Сингапурын гэрээнд нэгдэн орохыг соёрхон батлуулахаар Улсын Их Хуралд өргөн мэдүүлэхээр тогтов.

ТОВЧХОН:

–    2010 оны 1 дүгээр сарын 12-13-ны өдрүүдэд Улаанбаатар хотноо зохион байгуулагдсан Эдийн засгийн хамтын ажиллагааны Монгол, Унгарын Засгийн газар хоорондын комиссын III хуралдааны дүнг сайшааж, уг хуралдааны мөрөөр хэрэгжүүлэх ажлын төлөвлөгөөг батлан, хэрэгжилтэд нь хяналт тавьж ажиллахыг Зам, тээвэр, барилга, хот байгуулалтын сайд, комиссын Монголын хэсгийн дарга Х.Баттулгад даалгалаа.

–    Компьютерийн кирилл ба монгол үсгийн нэгдсэн кодын MNS 5552:2005 стандартыг төрийн байгууллагын албан хэрэгт мөрдүүлэхээр шийдэв. 

–    Хууль тогтоомж, Засгийн газрын шийдвэрийн хэрэгжилтийн 2009 оны жилийн эцсийн дүнг Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар Засгийн газрын гишүүдэд танилцуулав. Үүнтэй холбогдуулан Улсын Их Хурлын болон Байнгын хороодын тогтоол, Засгийн газрын шийдвэрийн заалт, арга хэмжээ бүрийг хяналтад авч, хэрэгжүүлэх ажлыг шуурхай зохион байгуулах, биелэлтийг тогтоосон хугацаанд нь бодитойгоор тайлагнах, 2009 оны эцсийн байдлаар тасарсан болон хэрэгжилт нь удааширч байгаа асуудлыг хэрэгжүүлэх арга хэмжээ авч ажиллахыг сайд, Засгийн газрын агентлагийн дарга, аймаг, нийслэлийн Засаг дарга нарт даалгалаа.

–    Байгаль орчин, аялал жуулчлалын сайд Л.Гансүхийг 2010 оны 3 дугаар сарын 15-25-ны өдрүүдэд Холбооны Бүгд Найрамдах Герман Улсад зохион байгуулагч талын зардлаар ажлын айлчлал хийхийг зөвшөөрөв.

–    Төрийн захиргааны албан хаагчдад зэрэг дэв олгуулахаар Монгол Улсын Ерөнхийлөгчийн Тамгын газрын дарга, Монгол Улсын Их Хурлын Тамгын газрын Ерөнхий нарийн бичгийн дарга, сайд, аймаг, нийслэлийн Засаг дарга нарын саналыг үндэслэн Төрийн албаны зөвлөлөөс оруулсан төрийн захиргааны нэр бүхий албан хаагчдад төрийн захиргааны тэргүүн түшмэлийн албан тушаалын зэрэг дэв олгуулах тухай асуудлыг хэлэлцэн дэмжээд Монгол Улсын Ерөнхийлөгчид өргөн мэдүүлэх нь зүйтэй гэж үзэв. Түүнчлэн төрийн захиргааны нэр бүхий албан хаагчдад эрхэлсэн түшмэлийн зэрэг дэв олгох тухай асуудлыг хэлэлцээд Ерөнхий сайдын захирамж гаргахаар болов.

–    Мал өвөлжилтийн нөхцөл байдал онц хүндэрсэнтэй холбогдуулан хөрш орон, олон улсын байгууллагаас ирүүлсэн тусламжийн зарим бараа, материалыг хуваарилах талаар холбогдох байгууллагуудаас ирүүлсэн саналын талаар Монгол Улсын Шадар сайд, Улсын Онцгой комиссын дарга М.Энхболд Засгийн газрын гишүүдэд танилцуулав. Үүнтэй холбогдуулан тусламжийн бараа, материалыг тухайн зориулалтынх нь дагуу өвөлжилт хүндэрсэн аймгуудад хуваарилахыг зөвшөөрч, тээвэрлэлт, зарцуулалтад  хяналт тавьж ажиллахыг Шадар сайд, Улсын Онцгой комиссын дарга М.Энхболдод даалгав.

–    Засгийн газрын хэрэгжүүлэгч Автотээврийн газрын балансад бүртгэлтэй, Нийслэлийн Сонгинохайрхан дүүрэгт байрлах 20 айлын орон сууцыг сууц эзэмшигчдэд нь үнэ төлбөргүйгээр хувьчлах болов.

Томуу, томуу төст өвчний талаарх мэдээллийг сонсов

2 дугаар сарын 17-18-наас энэ өвчин хөдөө аймгуудад дэгдэлт байдлаар илэрч эхэлсэн байна. Нийслэлийн хэмжээнд 2 дугаар сарын 22-нд 1174 хүүхэд хэвтэн эмчлүүлж байсан бөгөөд 322 хүүхэд шинээр хэвтэж, 302 хүүхэд эдгэрч гарсан байна. 23-ны өдөр 235 хүүхэд шинээр хэвтэж 126 хүүхэд эдгэрч гарчээ. Томуу, томуу төст өвчин 2 сараас 2 хүртэлх насны хүүхэд хатгалгаа байдлаар хүндрэх хандлагатай байна. Дүүрэг, аймгуудын нэгдсэн эмнэлгүүдийн ачаалал хэт ихэсч, өрхийн эмнэлгүүд ердийнхөөс 4 дахин илүү ачаалалтай болж нэг оронд 3 хүүхэд ноогдож байна.
Жич: 

Ерөнхий сайд Засгийн газрын хуралдааны төгсгөлд нийслэлийн амаржих газруудад гараад байгаа өнөөгийн хүндрэлтэй байдлын талаар мэдээлэл бэлтгэн зохих албан тушаалтнуудад хариуцлага тооцох асуудлаар ирэх баасан гарагт Засгийн газрын хуралдаанд танилцуулахыг Эрүүл мэндийн сайд С.Ламбаад үүрэг болгов гэж Засгийн газрын Хэвлэл, мэдээллийн албанаас мэдээллээ.

Томилгоо

Азадын Баатарцогтыг Монгол Улсаас Оросын Холбооны Улсын Эрхүү хотод суух Ерөнхий консулаар томилов.
А.Баатарцогт 1957 онд Завхан аймгийн Улиастай хотод төрсөн. Эхнэр, хүүхдийн хамт амьдардаг.

– 1975 онд дунд сургууль
– 1975-1980 онд Москва хотын Хилийн цэргийн командын дээд сургууль
– 1988-1991 онд Фрунзийн нэрэмжит ерөнхий цэргийн академи
– Москва хотноо цэргийн дээд курс, Англи Улсад хэлний курс тус тус төгссөн.
– Оператив-тактикийн цэргийн командын мэргэжилтэй. Хошууч генерал цолтой.
– 1980-1985 онд хилийн дугаар ангид хилийн албаны тасгийн туслах, тасгийн дарга
– 1985-1988 онд Хилийн ба ДЦУЕГ-ын штабт чиглэлийн дарга, тасгийн дарга, штабын дарга
– 1991-1998 онд УАБХЕГ-ын Хилийн цэргийн штабт ахлах офицер, хэлтсийн дарга
– 1998-2004 онд Москва дахь ЭСЯ-нд хилийн албаны төлөөлөгч, хоёр, нэгдүгээр нарийн бичгийн дарга
– 2004-2009 онд Хил хамгаалах ерөнхий газарт дэд дарга бөгөөд хилийн цэргийн штабын дарга, Ерөнхий газрын дарга, Хилийн цэргийн командлагчаар ажиллаж байсан. Төрийн албанд 29 жил, Дипломат албанд 6 жил ажилласан юм.

Монголын эдийн засгийн анхдугаар чуулган эхэллээ. Чуулган хоёр өдөр үргэлжлэх бөгөөд салбар хуралдаанууд хуралдах юм. Энэхүү чуулганаар улсын төсвийн шинэтгэл, уул уурхайн салбарын хөгжил, байгаль орчин, ногоон эдийн засаг, улсын бүртгэлийн болон хөрөнгийн зах зээлийн шинэчлэл, өрсөлдөх чадварыг дээшлүүлэх зэрэг асуудлыг хэлэлцэж байна. Монгол Улсын Ерөнхий сайд С.Батболд чуулганы ажиллагааг нээж үг хэлэв.

Тэрбээр хэлсэн үгэндээ “Төр, засгийн бодлого амьдралаас хол хөндий байна гэсэн шүүмжлэл олонтаа гардаг. Тэр хол хөндий гэгдээд байгаа зайг ойртуулахад энэхүү чуулган тус дөхөм болно гэдэгт найдаж байна. Бид хөгжлийн гарц, хөгжлийн зам хэмээн өргөн агуулгаар нь ярьсаар ирлээ. Одоо ажил хэрэгт шилжих, бодитой алхам хийх цаг нь боллоо. Яагаад стратегийн ордуудаа эдийн засгийн эргэлтэд оруулж, нэмүү өртөг шингэсэн бүтээгдэхүүн үйлдвэрлэж чадахгүй байна вэ гэсэн тодорхой асуудлаар санал бодлоо солилцож, нэгдмэл ойлголтод хүрэх ёстой.

Тухайлбал, манай Засгийн газар Тавантолгойн ордыг ашиглах асуудалд нухацтай хандаж 100% төр, ард түмний мэдэлд байлгаж, нэмүү өртөг шингэсэн үйлдвэрлэлийг цогцолбороор нь бүтээн байгуулж олон мянган ажлын байр бий болгохыг зорьж байна. Одоо эдийн засгийн ардчилал руу түүхэн үсрэлт хийх хэрэгтэй болоод байна. Эдийн засаг, бизнесийн эрх чөлөөг зах зээлийн утгаар нь хангаж чадахгүй болхувь хүний улс төрийн эрх, эрх чөлөө, улмаар ардчиллын ирээдүй, улс орны хөгжил, үндэсний аюулгүй байдлын баталгаа ч хангагдахгүй.

Засгийн газраас 2010 оныг “Бизнесийн орчны шинэтгэлийн жил” болгон зарласан нь ард иргэд, бизнес эрхлэгчдийнхээ энэ эрх чөлөөнд нь зам тавьж өгч буй бодит алхам юм. Үүнийг иргэд маань санхүүгийн эрх чөлөөтэй  болсон байх хэтийн том зорилгын үүднээс харж ажиллах болно. Энэхүү чуулганаас “Монголын хөгжлийн стратегийн зөвлөл” хэмээх зөвлөлдөх байгууллага байгуулахыг санал болгож байна. Цаашид уламжлал болгон жил бүр ийм чуулганыг зохион байгуулж хэвших хэрэгтэй юм.

Эдийн засгийн анхдуггар чуулганыг эдийн засгийн ардчллыг хөгжүүлэх, өрөөсгөл бүтэцтэй эмзэг эдийн засгаас тогтвортой өсөлттэй хөгжлийн эдийн засаг руу, эрүүл бус далд эдийн засгаас илтод нээлттэй эдийн засаг руу, хөрөнгө мөнгөний хязгаарлагдмал байдлаас хөрөнгийн зах зээл рүү хийх эрс шийдэмгий алхамын эхлэл байгаасай хэмээн хүсч байна хэмээн тодорхойллоо

Монгол Улсын Ерөнхий сайд С.Батболд “Таван толгой” төслийн Ажлын хэсгийн хуралдааныг удирдаж үүрэг өглөө. Ерөнхий сайд “Хамтарсан Засгийн газрын шийдвэрлэх ёстой олон зорилтын нэг нь “Таван толгой” төслийг хэрэгжүүлэх асуудал юм. 2009 онд “Оюу толгой” төслийг хэрэгжүүлэх ажлын үндэс нь тавигдсан. 2010 онд “Таван толгой” төслийг хэрэгжүүлэх эдийн засаг, эрх зүйн орчныг бүрдүүлэх шаардлага тулгарч байна. Юуны өмнө дэд бүтцийг бүрдүүлэх, улс төр, эдийн засаг болон гадаад дотоод асуудлаа тогтвортой байлгах нь нэн тэргүүний асуудал юм.
    
“Тавантолгой” төслийг хэрэгжүүлэх бодлогыг боловсруулахдаа иргэд, аж ахуйн нэгж мэргэжлийн байгууллагын дунд нээлттэй, ил тод хэлэлцүүлэг явуулж байж хамгийн оновчтой хувилбарыг сонгон шийдэх нь зүйтэй. Энэ хувилбарынхаа дагуу бодлого, зорилтоо тодорхойлон боловсруулж УИХ-ын хаврын чуулганд өргөн барих хэрэгтэй гэв. Дараа нь ЭБЭХ-ний сайд Д.Зоригт Ажлын хэсгээс хийж буй ажлын талаар мэдээлэл хийлээ.

Д.Зоригт “УИХ-ын 2007 оны 12 дугаар сарын 40-р тогтоолоор стратегийн ордыг ашиглах, эдийн засгийн эргэлтэд оруулах, үндсэн зарчим, удирдамжыг баталсан. “Таван толгой” төслийг боловсруулах Ажлын хэсэг 2009 онд байгуулагдсан. Түүнээс хойш олон улсын 11 компани, консерциумтай эхний яриа хэлэлцээгээ хийлээ.

Одоо:
•    2010 онд ордыг ашиглах тулгуур асуудлыг шийдвэрлэх.
•    Хоёр дахь  шатны хэлэлцээр хийх
•    Сонгон шалгаруулалтыг  дуусгаж гэрээ байгуулах ажил үлдээд байна гэв.
    Хуралдааны төгсгөлд Ерөнхий сайд С.Батболд “Бидэнд харгалзан үзэх, тооцох хүчин зүйл, тунгаах асуудал олон байна. Хамгийн шилдэг хувилбарыг л онож  сонгох хэрэгтэй. Иймээс:
•    Таван толгойг төрийн өмчийн компани байгуулан 100% өмчилж, түүнийг дагасан хувилбаруудыг түлхүү судлах,
•    Кокс,  хими, ган  төмөрлөгийн  зэрэг үйлдвэр байгуулж, нэмүү өртөг шингэсэн бүтээгдэхүүн үйлдвэрлэх мастер төлөвлөгөөг боловсруулах,
•    Урьдчилсан  төлбөрийн асуудлыг анхаарах. Оюутолгойн төслөөс хэд дахин их хөрөнгө хуримтлуулах бодлого баримтлах
•    Гадаадын томоохон оператор компаниудыг судалж гэрээ байгуулах боломжийг хэрэгжүүлэх
•    “Таван толгой”-н ордыг эдийн засгийн эргэлтэд оруулах ажлыг 2010 оны эхний хагас жилд багтаан хэрэгжүүлэх зэрэг үүрэг өглөө

Монгол Улсын Ерөнхий сайд С.Батболд Улаанбаатар хотын агаарын бохирдлыг бууруулах цогц арга хэмжээний “Утаагүй Улаанбаатар” хөтөлбөрийн төсөл боловсруулах ажлын хэсэг байгуулах захирамж гаргалаа.

 Ажлын хэсэг нь:
•    Улаанбаатар хотын гэр хороолол, автомашин, нам даралтын зуухнаас гарах утааг бууруулах асуудлыг судлан боловсруулах,
•    Улаанбаатар хотод тортог тоосыг бууруулах
•    Улаанбаатар хотын агаарын бохирдлыг бууруулахад хот төлөвлөлт, эрчим хүч, дэд бүтцийн чиглэлээр авах арга хэмжээ
•    Улаанбаатар хотын гэр хорооллын иргэдийг ажлын байр бүхий газарт нүүлгэн шилжүүлэх, Улаанбаатар хотод шилжин суурьшигчдын урсгалыг сааруулах, зогсоох,
•    Хөтөлбөрийг сурталчлах, сургалт сурталчилгаа явуулах чадавхийг бүрдүүлэх асуудлыг судлан санал боловсруулах үүрэг бүхий ажлын таван дэд хэсэгтэй  ажлын хэсэг байгуулснаа зарлаж анхны хурлаа хийлээ.

“Утаагүй Улаанбаатар” үндэсний хөтөлбөрийн төсөл боловсруулах үүрэгтэй ажлын хэсгийн бүрэлдэхүүнийг Байгаль орчин, аялал жуулчлалын сайд Л.Гансүх ахалж, Нийслэлийн Засаг дарга бөгөөд Улаанбаатар хотын захирагч Г.Мөнхбаяр орлогч даргаар нь ажиллана. Засгийн газрын холбогдох яамд, харьяа газар, хэрэгжүүлэгч агентлагуудын дарга, Нийслэлийн Засаг даргын гурван орлогчоос бүрдсэн энэ ажлын хэсгийн нарийн бичгийн даргаар БОАЖЯ-ны Төрийн нарийн бичгийн дарга Н.Батсуурь ажиллах юм.

Монгол Улсын Ерөнхий сайд хурлын эхэнд “Улаанбаатарыг минь Утаанбаатар гэх боллоо. Төрийн болон хувийн хэвшлийн байгууллагууд, хувь хүмүүс, эрдэмтэн, судлаачид  дор бүрнээ ямар нэг хэлбэрээр утаатай тэмцэх ажил хийгээд, туршаад, санал санаачилга гаргаж байна. Ийм сэтгэл, идэвх санаачилга гарч байгаа нь нааштай зүйл. Одоо бидэнд энэ санал санаачилга, хийж байгаа ажлаа нэгдсэн уялдаатай, төлөвлөгөөтэй болгох ажил дутаж байна. Энэ бол аль ч Засгийн газар, Их хурлын үед ярьдаг, хийдэг ажил. Гэсэн ч үр дүн гарахгүй байгаа нь үнэн.

Ойрын хугацааанд хийж буй ажлаа уялдаатай болгох, дунд хугацаанд хийх ажлаа төлөвлөх, урт хугацаанд хийх ажлынхаа төсөөллийг бодитой гаргаж ирэх үндэсний хэмжээний томоохон хөтөлбөр шаардлагатай. “Утаагүй Улаанбаатар” үндэсний хөтөлбөрийг ирэх хоёрдугаар сард багтаан УИХ-д танилцуулна. Тиймээс хурдтай ажиллах шаардлагатай. Гэхдээ яаран хөнгөн хандаж хэдэн цаас нийлүүлээд оруулж ирж болохгүй” гэж анхааруулаад ажлын хэсгийнхэнд хоёр долоо хоногийн дараа хөтөлбөрийн төслөө Засгийн газарт танилцуулах үүрэг өглөө. 

Ерөнхий сайдын захирамжаар байгуулагдсан “Утаагүй Улаанбаатар” хөтөлбөр боловсруулах ажлын хэсэг бүх шатны байгууллагад байгаа төсөл хөтөлбөрийг нэгтгэн, судалгаа хийж, ойр, дунд, урт хугацааны гэсэн гурван зорилтод тулгуурласан үйл ажиллагааны нарийвчилсан дэс дараалал бүхий санхүүгийн төлөвлөгөө гаргах юм.  Хөтөлбөр батлагдсаны дараа Засгийн газраас хэрэгжүүлэх зөвлөл байгуулан ажиллахаар төлөвлөж байна.

Утаанаас салах сонгодог арга бол гэр хорооллыг орон сууцжуулах. Энэ ажилд багагүй хэмжээний хөрөнгө шаардагдах нь тодорхой. Ерөнхий сайд энэ асуудлыг хөндөн “Орон сууцжуулах хөтөлбөрийг шийдэхэд хэдий хэмжээний хөрөнгө хэрэгтэйг тооцож гарга. Мөнгө төгрөг байхгүй юм чинь, том ажил хийнэ гэж төлөвлөөд хоосон өнгөрч магадгүй гэж болгоомжлох хэрэггүй. Хэрвээ бидэнд ийм эх үүсвэр, санхүүжилт шийдээд өгвөл Улаанбаатарыг утаагүй, эрүүл хот болгоод өгье гэсэн нарийн төлөвлөгөө л гаргаад ир. Ялангуяа орон сууцжуулах, дэд бүтцийнхээ талаар илүү тодорхой, тооцоо судалгаатай баримт дэлгэх хэрэгтэй. Бодит ажил болгох зоримог төлөвлөгөө хэрэгтэй байна” хэмээлээ.

Мөн тэрбээр “Өмнө ярьж байсан хэдэн цаасаа нийлүүлээд дахиад хэдэн сайхан цаас нэмээд гаргавал энэ асуудал шийдэгдэхгүй, бодитой судалгаа гаргаж хөрөнгө гаргаж шийдэгдэнэ. Ийм тодорхой ажил хэрэгтэй байна гэж хатуухан санууллаа

Төрийн өмчийн их, дээд сургуулиудыг нэгтгэнэ

Монгол Улсын Ерөнхий сайд боловсролын салбарынхантай уулзсан уулзалт дээр хэлсэн үгэндээ “Бид дээд боловсролын үнэлэмжийг дээшлүүлж, энэ салбарт эргэлтийн шинжтэй өөрчлөлт хийхийг амьдрал Та биднээс нэхэж байна. Юуны өмнө өөрчлөлтийг төр өөрөөсөө эхлэх ёстой. Төрийн өмчийн 40 гаруй сургуулийг нэгтгэж, бүтцийн өөрчлөлт хийж, чанартай боловсрол олгодог томоохон сургуулиуд болгох шаардлага байна” хэмээн онцлон тэмдэглэсэн билээ. Үүний дагуу Засгийн газрын хуралдаанаар Засгийн газрын мөрийн хөтөлбөрт тусгагдсан энэхүү асуудлыг хэлэлцэн тогтоол гаргаж төрийн өмчийн зарим их, дээд сургууль, коллежийн үйл ажиллагааг 2010 оны 7 дугаар сарын 1-ний өдрөөс эхлэн зогсоож дор дурьдсанаар өөрчлөн зохион байгуулахаар болов.

Үүнд:
•    Улаанбаатарын их сургууль, Худалдаа үйлдвэрлэлийн дээд сургууль, Гааль, эдийн засгийн дээд сургуулийг МУИС-д;
•    Соёлын дээд сургууль,  Дүрслэх урлагийн дээд сургууль, Кино урлагийн дээд сургууль, Радио, телевизийн дээд сургуулийг СУИС-д;
•    Барилгын коллеж, Дархан-Уул аймаг дахь Техникийн коллежийг ШУТИС-д  тус тус нэгтгэхээр шийдвэрлэв.

Мөн:
•    МУИС-ийн харъяа Завхан аймаг дахь Эдийн засгийн сургууль, Орхон аймаг дахь сургуулийг МУИС-ийн салбар;
•    ШУТИС-ийн харъяа Орхон, Сүхбаатар, Өвөрхангай аймаг дахь Технологийн сургуулийг ШУТИС-ийн салбар;
•    Монгол Улсын Боловсролын их сургууль (МУБИС)-ийн харъяа Архангай аймаг дахь Багшийн коллежийг МУБИС-ийн салбар;
•    ЭМШУИС-ийн харъяа Говь-Алтай, Дорноговь, Дархан-Уул аймаг дахь Анагаах ухааны коллежийг ЭМШУИС-ийн салбар;
•    СУИС-ийн харъяа Завхан аймаг дахь Хөгжим, бүжгийн коллежийг СУИС-ийн салбар;
•    МУБИС-ийн харъяа Баян-Өлгий аймаг дахь Багшийн коллежийг Ховд аймаг дахь Ховдын их сургуулийн салбар болгон өөрчлөх болов.

Түүнчлэн:
•    ХААИС-ийн Орхон аймаг дахь салбар сургуулийг МУИС-ийн Орхон аймаг дахь салбар сургуульд нэгтгэх;
•    ХААИС-ийн Ховд аймаг дахь Алтайн бүсийн салбар сургуулийг Ховд аймаг дахь “Хөгжил” мэргэжлийн сургалт үйлдвэрлэлийн төвд нэгтгэх;
•    Худалдаа үйлдвэрлэлийн дээд сургуулийн Баянхонгор аймаг дахь салбар сургуулийг татан буулгах;
•    Үйлдвэрлэл, урлалын сургууль, Монгол-Солонгосын техникийн коллеж, Улаангом коллежийг Мэргэжлийн сургалт, үйлдвэрлэлийн төв болгон өөрчлөн зохион байгуулах;
•    Монгол-Солонгосын техникийн коллежийн харъяа Төв аймаг дахь Мэргэжлийн сургалт үйлдвэрлэлийн төвийн үйл ажиллагааг зогсоож Монгол-Солонгосын Мэргэжлийн сургалт, үйлдвэрлэлийн төвийн салбар сургууль болгон өөрчлөхөөр шийдвэрлэв.

Ерөнхий сайд сургуулиудыг нэгтгэх үйл ажиллагаа зөв бөгөөд  чухал юм. Сургалтын чанар яваандаа дээшилнэ. Ижил мэргэжлээр давхардуулан сургадаг доголдол арилна. Сургалт эрдэм шинжилгээний ажлын уялдаа холбоо сайжирна. Нэгтгэх үйл ажиллагаа нь сургуулиудын статусын хувьд нээлттэй хэвээр үлдэх зарчмыг баримтлах ёстой.

Иймээс шинэчлэлийнхээ эдийн засаг, эрх зүйн оновчтой орчныг бий болгож, эерэг, сөрөг талуудыг нь  онцлон анхаарч харгалзан үзсэний үндсэн дээр багш, оюутан, иргэд, олон нийтэд зөв ойлголт төрүүлэх чиглэлд сайтар ажиллах хэрэгтэй. Ингэснээр төрийн өмчийн 42 сургуулийг 16 болгон цөөрүүлэх боломж бүрдэнэ гэсэн үүрэг өглөө. Энэхүү арга хэмжээг 2010 оны 7 дугаар сарын 1-ний өдрөөс эхлэн хэрэгжүүлэхээр боллоо.

Цагдаагийн байгууллагын тухай хуулийн шинэчилсэн найруулгыг хэлэлцэв

Цагдаагийн байгууллагын тухай хуулийн шинэчилсэн найруулгын төслийг хэлэлцээд зарчмын хувьд дэмжиж, хуралдаан дээр Засгийн газрын гишүүдээс гаргасан саналыг тусган УИХ-д өргөн мэдүүлэхээр тогтов. Хуулийн төсөлд зарчмын шинжтэй дараах асуудлуудыг тусгалаа. Үүнд:

•    Цагдаагийн байгууллагын үйл ажиллагаанд хүний эрх, эрх чөлөөг хамгаалан ажиллах хэм хэмжээ тогтоосон зохицуулалтыг шинээр тусгах;
•    Нутаг дэвсгэрийн цагдаагийн байгууллагыг тухайн нутаг дэвсгэрийн хэмжээ, хүн амын нягтрал, бүс нутаг, нутаг дэвсгэрийн ойр дөт байдал, гэмт хэрэг, захиргааны зөрчлийн гаралтын түвшинг харгалзан цагдаагийн төв байгууллагын дарга аймаг, нийслэлийн Засаг даргатай зөвшилцөн байгуулах;
•    Цагдаагийн төв байгууллагын бүтэц, орон тооны дээд хязгаарыг дотоод хэргийн асуудал эрхэлсэн Засгийн газрын гишүүн, нутаг дэвсгэрийн болон төрөлжсөн цагдаагийн байгууллага, харъяа албадын зохион байгуулалтын бүтэц, орон тоог цагдаагийн төв байгууллагын дарга батлах;
•    Цагдаагийн албан хаагч хүч хэрэглэхгүйгээр үүргээ гүйцэтгэх боломжтой бол биеийн хүч, гардан тулааны мэх хэрэглэхийг хориглох замаар биеийн хүч, гардан тулааны мэх хэрэглэх ерөнхий хүрээ хязгаарыг зааж өгөх;
•    Аймгийн төвөөс бусад суманд 5-аас жил ажиллаж байгаа цагдаагийн зарим албан хаагчдад ажилласан 5 жил тутам 30 сарын үндсэн цалинтай тэнцэх хэмжээний мөнгөн урамшуулал олгож байх, түүнчлэн тэдгээрийн эхнэр /нөхөр/-ийг орон нутгийн байгууллагаас ажлаар хангаагүй нөхцөлд эрүүл мэндийн болон нийгмийн даатгалыг хөдөлмөрийн хөлсний доод хэмжээгээр тооцож эсхүл хөдөлмөрийн хөлсний доод хэмжээтэй тэнцэх тусламж олгож байх;
•    Албан үүргээ гүйцэтгэж яваад хөдөлмөрийн чадвараа алдсан хөгжлийн бэрхшээлтэй болсон бол албан хаагчдад гэмтлийн зэргийг нь харгалзан 3 жил хүртлэх хугацааны цалин хөлстэй тэнцэх хэмжээний нэг удаагийн буцалтгүй тусламж олгох;
•    Аймгийн төвөөс бусад суманд алба хааж байгаа цагдаагийн албан хаагчдад хүнсний хангалт олгох;
•    Ажлын зайлшгүй шаардлагаар ээлжийн амралтаа бүрэн эдэлж чадаагүй цагдаагийн албан хаагчдад албан тушаалын цалин хөлсийг 1.5 дахин нэмэгдүүлсэнтэй тэнцэх хэмжээний мөнгөн урамшуулал, нийтээр амрах баярын өдөр, шөнө, илүү цагаар болон хоног бүрийн амралтын өдөр ажилласан цагдаагийн албан хаагчийг нөхөн амруулаагүй бол албан тушаалын цалин хөлсийг 2 дахин нэмэгдүүлсэнтэй тэнцэх хэмжээний мөнгөн урамшуулал олгох зэрэг заалт орлоо.

Бензин, дизелийн түлшний гааль, онцгой албан татварыг шинэчлэв
                    
Эрдэс баялаг, эрчим хүчний яамнаас “Газрын тосны бүтээгдэхүүний талаар авах зарим арга хэмжээний тухай” Засгийн газрын тогтоолын төслийг хэлэлцээд дараах шийдвэрийг гаргав.

УИХ-аас олгосон бүрэн эрхийн хүрээнд Засгийн газраас:

•    Сүхбаатар, Замын-Үүд, Эрээнцав, Алтанбулаг боомтоор орж ирж буй 90 хүртэл октантай автобензинд  онцгой албан татвар “0” байсныг 120.000 төгрөг болгож;
•    90 ба  түүнээс дээш октантай автобензинд 80.000 төгрөгийн онцгой албан татвар ногдуулж байсныг 90.000 төгрөг болгож;
•    Дизелийн түлшинд 30.000 төгрөгийн онцгой албан татвар ногдуулж байсныг хэвээр үлдээж, гаалийн албан татвар “0” байсныг 5 хувь болгон 2010 оны 1 дүгээр сарын 20-ны өдрөөс эхлэн ногдуулах;
•    Алслагдсан боомтоор орж ирж буй дизелийн түлшинд 49.000 төгрөгийн онцгой албан татвар ногдуулж байсныг “0” болгох;
•    Бусад автобензинд ногдох онцгой албан татваруудыг мөн “0” болгохоор шийдвэрлэв.

2 дугаар сарын 14,15 шинийн нэгэн

Монгол зурхайн /Төгсбуянтын цаг тооны бичиг/ тооцоогоор Цагаан сарын баярын хаврын тэргүүн шар бар сарын шинийн нэгэн нь аргын тооллын 2010 оны 2 дугаар сарын 14,15-ны өдрүүдэд тус тус тохиож байна. Өөрөөр хэлбэл, 2010 оны 2 дугаар сарын 13-ны өдрийн  Бямба /долоо хоногийн амралтын өдөр/ гарагт хаврын тэргүүн сарын битүүн, 14-ний өдрийн Ням /долоо хоногийн амралтын өдөр/ гарагт шинийн нэгэн, 15-ны Даваа гарагт шинийн нэгэн, 16-ны өдрийн Мягмар гарагт шинийн хоёрон таарч байна.

Эл асуудлыг хуралдаанаар хэлэлцээд холбогдох хуулиудыг үндэслэн 2010 оны 2 дугаар сарын 14,15,16-ны өдрүүдийг Цагаан сарын баярын амралтын өдөр байхаар тогтов.

 Товчхон:

•    Монгол Улсын Их Хурлын дарга Д.Дэмбэрэлийн 2009 оны 12 дугаар сарын 9-13-ны өдрүүдэд ОХУ-д хийсэн албан ёсны айлчлалын дүнг хэлэлцээд ҮАБЗ-д оруулахыг Гадаад харилцааны сайд Г.Занданшатарт даалгав.
•    БСШУ-ны сайд Ё.Отгонбаярыг 2010 оны 1 дүгээр сарын 23-ны өдрөөс 2 дугаар сарын 2-ны өдрүүдэд АНУ-ын Төрийн Департаментын урилгаар АНУ-д айлчлуулах нь зүйтэй гэж үзэж, айлчлалын удирдамжийг Ерөнхий сайдаар батлуулахаар тогтов.
•    ХБНГУ-ын Мюнхен хотноо 2010 оны 2 дугаар сарын 05-07-ны өдрүүдэд зохион байгуулах “Олон улсын аюулгүй байдал” сэдэвт бага хуралд Монгол Улсын Батлан хамгаалахын сайд Л.Болдыг оролцуулахыг зөвшөөрч, ажиллах удирдамжийг Ерөнхий сайдаар батлуулахаар шийдэв.
•    Эрүүл мэндийн сайд С.Ламбаа “Амьжиргааны баталгаажих түвшингээс доогуур орлоготой иргэдэд төрөлжсөн мэргэжлийн эмнэлгийн тусламж үнэ төлбөргүй авах эрхийн бичиг олгох” талаар хийж байгаа ажлынхаа явцаас танилцуулав.
•     Нийгмийн хамгаалал, хөдөлмөрийн сайд Т.Ганди нийгмийн даатгалын салбарын өнөөгийн байдал, ойрын үед хэрэгжүүлэх арга
хэмжээний тухай танилцуулав.
•    Үндэсний их баяр наадмын тухай хуулийн 8.3 дахь заалтыг үндэслэн хурдан морины шигшмэл болон бүсийн уралдааны 2010 оны хуваарийг тогтоох тухай асуудлыг хэлэлцээд тогтоол гаргахаар болов

Засаг дарга нарын ажлыг үнэлэх журамд өөрчлөлт оров

Засгийн газрын хуралдаанаар “Яам болон аймаг, нийслэлийн Засаг дарга, Засаг даргын Тамгын газрын үйл ажиллагаанд хяналт-шинжилгээ хийх, үр дүнг үнэлэх журам”-ын талаар хэлэлцэж нэмэлт өөрчлөлт оруулан шинэчлэн батлав. Журамд дараах нэмэлт, өөрчлөлтийг орууллаа.

Үүнд:

•   Хяналт-шинжилгээ, үнэлгээний үр дүнг ашиглах, хэрэгжүүлэх талаар заалт нэмж оруулав. Тухайлбал, яам, аймаг, нийслэлийн Засаг дарга, Засаг даргын Тамгын газрын үйл ажиллагаанд хийсэн хяналт-шинжилгээ, үнэлгээний дүнтэй холбогдуулан авч хэрэгжүүлэх арга хэмжээний чиглэлийг тодруулж, тэргүүний арга туршлагыг түгээн дэлгэрүүлэх, сургалт зохион байгуулах, шаардлагатай тохиолдолд газар дээр нь шалгалт хийж, дүгнэлт гаргах,

•    Яам, аймаг, нийслэлийн үйл ажиллагаанд хийсэн хяналт- шинжилгээ, үнэлгээний тайлан нь бүтэц, агуулгын хувьд харилцан адилгүй байгааг нэг загвар, жишигт оруулах зорилгоор хяналт-шинжилгээ, үнэлгээний тайлан, бүтэц, агуулгын хүрээг журамд тусгав.

•    Журамд “Үйл ажиллагааны ил тод байдал”-ын үзүүлэлтийг тусгав.

•    Яам, аймаг, нийслэлийн Засаг даргын үйл ажиллагааны үр дүнг үнэлэхэд харгалзан үзэх эдийн засаг, нийгмийн хөгжлийн үзүүлэлтийг оновчтой болгох талаар төв, орон нутгаас тавьсан саналыг нэгтгэн судалж, яам аймаг, нийслэлийн холбогдох ажилтнуудаар урьдчилан үе шаттай хэлэлцүүлсний үндсэн дээр зарим нэмэлт, өөрчлөлт оруулав.

•    Яам, аймаг, нийслэлийн Засаг даргын авч хэрэгжүүлсэн арга хэмжээ иргэдэд хэрхэн хүрч, түүний үр дүнг иргэд хэрхэн үнэлж байгааг харуулах “Хэрэглэгчийн үнэлгээ”-г мэргэжлийн судалгааны байгууллагын захиалгын үндсэн дээр гүйцэтгүүлж байхаар болов.
 
Товчхон:

•    Монгол Улс, АНУ-ын Засгийн газар хооронд байгуулсан Мянганы сорилтын гэрээнд оруулах нэмэлт, өөрчлөлтийг УИХ-ын холбогдох Байнгын хороодтой зөвшилцөхөөр тогтов. Байнгын хороод гэрээний төслийг дэмжсэн тохиолдолд гэрээний нэмэлт, өөрчлөлтөд Монгол Улсын Засгийн газрыг төлөөлж гарын үсэг зурах бүрэн эрхийг Сангийн сайд С.Баярцогтод олгохоор болов.

•    Монгол Улсын Засгийн газар, ХБНГУ-ын Засгийн газар хоорондын 2007 оны 12 дугаар сарын 21-ний өдөр байгуулсан Санхүүгийн хамтын ажиллагааны хэлэлцээрийн хүрээнд хэрэгжүүлэх “Улаанбаатар хотын хүн амын хүнсний хангамжийг сайжруулах зорилгоор бүс нутгийн тээврийн дэд бүтцийг хөгжүүлэх” төслийн зээлийн хэлэлцээрийг зарчмын хувьд дэмжиж УИХ-ын холбогдох Байнгын хороотой зөвшилцөхөөр тогтов. Байнгын хороо дэмжсэн тохиолдолд уг хэлэлцээрт гарын үсэг зурах бүрэн эрхийг Сангийн сайд С.Баярцогтод олгохоор шийдэв.

•    Ерөнхий сайдын захирамжаар “Гаалийн асуудлаар хамтран ажиллах, харилцан туслах тухай Монгол Улсын Засгийн газар, Бүгд Найрамдах Унгар Улсын Засгийн газар хоорондын хэлэлцээр”-т нэмэлт, өөрчлөлт оруулах тухай хэлэлцээрт Монгол Улсын Засгийн газрыг төлөөлж гарын үсэг зурах бүрэн эрхийг ГЕГ-ын дарга Д.Цэвээнжавт олгов.

•    Засгийн газрын хуралдаанаас Монгол Улсын Засгийн газар, Арабын эдийн засгийн хөгжлийн Кувейтийн сан хооронд байгуулсан гэрээний дагуу хэрэгжиж байгаа УИХ-ын ордон барих төсөл хэрэгжүүлэх нэгжийг байгуулан ажиллуулахыг Монгол Улсын Шадар сайд М.Энхболдод даалгав.

•    Нийгмийн хамгаалал, хөдөлмөрийн сайд Т.Ганди “Нийгмийн эмзэг бүлэгт хоол тэжээлийн дэмжлэг үзүүлэх хөтөлбөр”-ийн хэрэгжилтийн явцын талаар танилцуулав. Хуралдаанаас хөтөлбөрийн хүрээнд хэрэгжиж буй үйл ажиллагааг эрчимжүүлэх, хөтөлбөрт тусгагдсан зорилтыг шуурхай хэрэгжүүлэх талаар хийгдсэн ажлын явц, үр дүнг 2010 оны 4 дүгээр улиралд багтаан Засгийн газрын хуралдаанд танилцуулахыг үүрэг болгов.

Томилгоо
Ч.Наранбаатарыг Биеийн тамир, спортын газрын даргын албан тушаалд томилов

Иргэн хишиг, хувь хүртэх журмыг батлав

Засгийн газрын 2010 оны анхны ээлжит хуралдаан хуралдаж олон асуудал хэлэлцсэний дотор  Иргэнд хишиг, хүртээхтэй холбогдуулан авах зарим арга хэмжээний тухай  тогтоол гаргахаар болов.

Уг тогтоолоор:
• “Хүний хөгжил сангаас хөрөнгө зарцуулах журам”, “Монгол Улсын иргэн хишиг, хувь хүртэх журам”, “Хүний хөгжил сан” дэвтрийн загварыг батлав.
• Иргэний бүртгэлийн зөрчилгүй иргэдэд Хүний хөгжил сангаас хишиг, хувь үе шаттай хүртээх ажлыг 2010 оны 2 дугаар сарын 1-нээс эхлэн зохион байгуулахыг НХХ-ийн сайд Т.Гандид,
• Иргэнд 2010 онд олгох хишиг, хувийг 2 хувааж олгох бөгөөд эхний ээлжинд 70.000 төгрөгийг 2010 оны 2 дугаар сарын 1-ний өдрөөс эхлэн олгоход шаардагдах хөрөнгийг тухай бүрд нь санхүүжүүлэх арга хэмжээ авч ажиллахыг Сангийн сайд С.Баярцогтод,
• Иргэн бүрт олгох “Хүний хөгжил сан” дэвтэр, маягт хэвлүүлэх ажлын гүйцэтгэгчийг энэхүү ажлыг хийж гүйцэтгэх чадвартай этгээдүүдийг оролцуулан, үнэ болон нийлүүлэх хугацааг харгалзан шууд гэрээ байгуулах аргаар сонгон шалгаруулахыг НХХ-ийн сайд Т.Гандид,
• Иргэнд хишиг, хувь хүртээхтэй холбогдуулан иргэний шинэчилсэн бүртгэлийг 2010 онд явуулахыг Тэргүүн шадар сайд Н.Алтанхуягт,
• Шинэчилсэн бүртгэлд хамрагдсан иргэдийн мэдээлэлд орсон өөрчлөлтийг сар бүр Хөдөлмөр, халамжийн үйлчилгээний газарт хүргүүлж ажиллахыг Улсын бүртгэлийн ерөнхий газрын дарга Л.Мөнхбаатарт,
• Иргэний шинэчилсэн бүртгэлд хамрагдсан иргэнд хишиг, хувь хүртээх дэвтэр олгох, хишиг, хувийг 2010 онд багтаан хүртээж дуусгахыг НХХ-ийн сайд Т.Гандид,
• Монгол Улсын иргэнийг иргэний шинэчилсэн бүртгэлд бүртгэх, Хүний хөгжил сангаас иргэнд хишиг, хувь хүртээх ажлыг зохион байгуулахад иргэний бүртгэл болон нийгмийн халамжийн байгууллагад бүх талын дэмжлэг үзүүлж, эрх хэмжээнийхээ хүрээнд хүн хүч, хөрөнгө нөөц дайчлан гаргаж ажиллахыг аймаг, нийслэлийн Засаг дарга нарт даалгав.

Монгол Улсын иргэн хишиг, хувь хүртэх журмаас:

Иргэн хишиг, хувь хүртэхийн тулд дараах бичиг баримтыг бүрдүүлнэ.  Үүнд:
• Иргэний үнэмлэх, 16-аас доош насны хүүхдэд төрсний гэрчилгээ,
• 16-аас доош насны хүүхдийн хувьд эх /эцэг, асран хамгаалагч, харгалзан дэмжигч/-ийн иргэний үнэмлэх,
• Хэрэв хүүхэд асрамжийн газарт байгаа бол тухайн асрамжийн газрын тодорхойлолт,
• Гэр бүлийн тухай хуулийн 66.1-д заасны дагуу асран хамгаалагч, харгалзан дэмжигчээр тогтоогдсон бол сум, дүүргийн Засаг даргын шийдвэр, түүний хуулбар,
• Хүний хөгжил сангийн тухай хуулийн 16.2 дахь хэсэгт заасан иргэний хишиг, хувийг авах бол нас барсны гэрчилгээ, түүний хуулбар, / Тайлбар: Монгол Улсын иргэн нас барсан тохиолдолд тухайн иргэнд хуваарилагдсан боловч аваагүй байсан хишиг, хувийг өв залгамжлагчид нь олгож болно /
• Гадаадад амьдарч байгаа Монгол Улсын иргэний хувьд Монгол Улсаас гадаадад суугаа дипломат төлөөлөгчийн болон консулийн газрын тодорхойлолт, итгэмжлэл зэрэг юм.

Төсвийн тогтвортой байдлын тухай хуулийн төслийг хэлэлцэв
     
Төсвийн тогтвортой байдлын тухай хуулийн төслийг хэлэлцээд хуралдаан дээр Засгийн газрын гишүүдээс гаргасан саналыг тусган УИХ-д өргөн барихаас өмнө ажлын журмаар дахин ярилцаад дараа нь УИХ-д өргөн барихаар болов. Энэ хуулийн төслийг батлан мөрдүүлснээр төсвийн бодлого, стратегийг тодорхойлоход төсвийн удирдлагын  зарчим ба төсвийн тусгай шаардлагыг тогтоож, дунд, урт хугацааны төсвийн тогтвортой байдлыг хангахад хууль тогтоох, гүйцэтгэх засаглалын байгууллагын үүрэг хариуцлага өндөрсөж, төсвийн тусгай шаардлагад суурилсан төсвийн удирдлагын эрх зүйн шинэ орчин бүрдэх юм.               

Нягтлан бодох бүртгэлийг зөвхөн үндэсний мөнгөн тэмдэгтээр хөтлөнө

Нягтлан бодох бүртгэлийн тухай хуульд нэмэлт, өөрчлөлт оруулах тухай хуулийн төслийг хэлэлцээд зарчмын хувьд дэмжин УИХ-д өргөн мэдүүлэхээр тогтов. Уг төслөөр тус хуульд дараах нэмэлт, өөрчлөлтийг оруулахаар шийдэв.

Үүнд:

• “харилцагч санхүүгийн байгууллага” гэсэн нэр томъёог уг хуулийн нэр томъёоны хэсэгт нэмж тусгах,
• “аж ахуйн нэгж байгууллага нь улирал, жилийн санхүүгийн тайланг батлагдсан маягтаар болон цахим хэлбэрээр хуульд заасан хугацаанд харилцагч санхүүгийн байгууллагад тушаана” гэж нэмэх,
• “шийтгэврийн хуудасны загварыг санхүү, бүртгэлийн асуудал эрхэлсэн Засгийн газрын гишүүн батлана” гэж оруулах,
• Нягтлан бодох бүртгэлийг зөвхөн үндэсний мөнгөн тэмдэгт төгрөг, мөнгөөр хөтлөнө гэж өөрчлөн найруулахаар боллоо.

Товчхон

• 2010 оны 1 дүгээр сарын 11-ний өдөр БНЭУ-ын Шинэ Дели хотноо болох Улс төр, эдийн засаг, худалдаа, шинжлэх ухаан, технологи, соёлын салбарын хамтын ажиллагааны Монгол-Энэтхэгийн хамтарсан хорооны II хуралдаанд оролцох Монголын талын төлөөлөгчдийн баримтлах удирдамжийг зөвшөөрөв. Тус хуралдаанд оролцох төлөөлөгчдийг БСШУ-ны сайд Ё.Отгонбаяр ахлах юм.
• Томуугийн цартахлын А хүрээний шинэ вирүсын халдварын өвчлөл үргэлжилсээр байгаатай холбогдуулан  ИБУИНВУ-аас худалдан авах 540.000 хүн/ тун вакцины үнэ, тариур, тээврийн зардалд шаардагдах 2.500.000.000 /хоёр тэрбум таван зуун сая/ төгрөгийг Засгийн газрын нөөц сангаас гаргахаар болов.
• “Ус” үндэсний хөтөлбөр батлах тухай УИХ-ын тогтоолын төслийг хэлэлцээд УИХ-д өргөн мэдүүлэхээр тогтов.
• Байгаль орчны тэнцлийг хангах, унаган төрхийг хадгалах, хамгаалах болон байгалийн аялал жуулчлалыг хөгжүүлэх зорилгоор Говьсүмбэр, Дорноговь аймгийн зарим сумын нутгийг хамран орших Чойрын богд уул, Бүрдэнэ булаг, Арван наймын Богд уул, Дундговь аймгийн Дэлгэрхангай уул, Сүхбаатар аймгийн Онгон таван булаг, тэдгээрийн орчмын газар нутгийг байгалийн нөөц газрын ангиллаар, Дундговь  аймгийн нутагт орших Бага газрын чулуу, түүний орчмын газар нутгийг байгалийн дурсгалт газрын ангиллаар улсын тусгай хамгаалалтад авахаар болов.
• Эрдэс баялаг, эрчим хүчний сайд Д.Зоригтыг 2010 оны 1 дүгээр сарын 11-17-ны өдрүүдэд Канад Улсад ажлын айлчлал, 2010 оны 1 дүгээр сарын 17-20-ны өдрүүдэд АНУ-д ажлын айлчлал хийхийг зөвшөөрөв.
• Боловсрол, соёл, шинжлэх ухааны сайд Ё.Отгонбаяр “Сонгодог урлаг”, “Үндэсний өвийг тоон системд оруулан хадгалах” Үндэсний хөтөлбөрийн хэрэгжилтийн дүнг тус тус танилцуулав.
• Байгаль орчин, аялал жуулчлалын сайд Л.Гансүхийг 2010 оны 1-дүгээр сарын 25-29-ний өдрүүдэд БНТУ-д ажлын айлчлал хийхийг зөвшөөрч, удирдамжийг Ерөнхий сайдаар батлуулахаар тогтов
• Газрын тосны хайгуулын Дарьганга-XXIV талбайд Засгийн газрын хэрэгжүүлэгч агентлаг-Газрын тосны газар, “Апекспро Инвестмент Лтд” компанитай байгуулах бүтээгдэхүүн хуваах гэрээний төслийг хэлэлцээд Засгийн газрын гишүүдийн хуралдаан дээр гаргасан саналыг тусган ҮАБЗ-д танилцуулахаар тогтов

2010 оныг “Бизнесийн орчны шинэтгэлийн жил”-ээр зарлав

Засгийн газрын энэ оны отгон хуралдаан буюу 86 дахь хуралдаанаас 2010 оныг “Бизнесийн орчны шинэтгэлийн жил” болгон зарлаж тогтоол гаргав. Уг тогтоолд:
• “Бизнесийн орчныг шинэтгэх талаар хууль, тогтоомж, шийдвэрийн төсөл боловсруулах,
• Засгийн газар, эрх бүхий албан тушаалтнаас батлан гаргасан бизнесийн холбогдолтой дүрэм, журмыг шинэчлэх ажлыг хувийн хэвшил, төрийн бус байгууллагын оролцоотойгоор хэрэгжүүлэх,
• Энэ ажлын хүрээнд хэрэгжүүлэх арга хэмжээний төлөвлөгөө гарган хуралдаанаар батлуулах,
• “Бизнесийн орчны шинэтгэлийн жил”-ийн ажлын хүрээнд   эрхэлсэн салбар, харъяа нутаг дэвсгэртээ хэрэгжүүлэх арга хэмжээний төлөвлөгөө гарган ажиллахыг  холбогдох албан тушаалтнуудад даалгах зэрэг заалт орлоо. “Бизнесийн орчны шинэтгэлийн жил”-ийн ажлыг зохион байгуулах, хяналт тавих үүрэг бүхий Зөвлөлийг Ерөнхий сайд даргалах бөгөөд орлогч дарга нь Тэргүүн шадар сайд байх юм.

Гишүүд нь Сангийн, ЗТХБ-ын, ХХААХҮ-ийн ЭБЭХ-ний сайд, Монгол Улсын сайд, ЗГХЭГ-ын дарга болон ГХЯ, БСШУЯ, Монголбанк, Санхүүгийн зохицуулах хороо, ХЗДХЯ, Мэдээлэл, шуудан, харилцаа холбооны газар, ТӨХ, МҮХАҮТ, Хөрөнгийн бирж, ГЕГ, ТЕГ, МХЕГ зэрэг байгууллагаас төлөөлөл орох боллоо. Энэ чиглэлээр хийгдэж байгаа ажлын тухай тодорхой хугацаанд олон нийтэд нээлттэй  шуурхай мэдээлж байхыг Ерөнхий сайд үүрэг болгов.

Төрийн өмчийг 2010-2012 онд хувьчлах үндсэн чиглэлийг УИХ-д өргөн мэдүүлнэ       

“Төрийн өмчийг 2010-2012 онд хувьчлах үндсэн чиглэл”-ийг батлах тухай УИХ-ын тогтоолын төслийг хэлэлцэн дэмжиж, УИХ-д өргөн мэдүүлэхээр болов. 

Үндсэн чиглэлийн зорилго нь:
• хувийн хэвшил тэргүүлсэн эдийн засгийн эрчимтэй өсөлтийг хангахад дэмжлэг үзүүлэх,
• төрийн өмчит хувьцаат компанийн хувьцааг хөрөнгийн биржээр арилжих, нэмэлт хувьцаа гаргаж нийтэд санал болгох /IPO хийх/ замаар төрийн оролцоог багасган хувийн хөрөнгө оруулалтыг татах явдал юм.

Хувьчлалын үндсэн зарчим нь:
• эдийн засаг дахь төрийн хувь хэмжээг багасгаж, хувийн хэвшлийн оролцоог нэмэгдүүлэх,
• төрийн өмчийн салбарт бүтээгдэхүүн, үйлчилгээний үнэ тариф зах зээлийн зарчмаар тогтох боломжийг бүрдүүлэх,
• төр, хувийн хэвшлийн түншлэлийн үр дүнтэй арга хэлбэрийг нэвтрүүлэх, түүнд олон улсын дэмжлэг, зөвлөгөөг ашиглах явдал хэмээн үзэж байна.

Эрүүл мэндийн даатгалын шимтгэлийн хэмжээг тогтоов

Эрүүл мэндийн даатгалын 2010 оны шимтгэлийн хэмжээг тогтоох тухай хэлэлцээд Иргэний эрүүл мэндийн даатгалын тухай хуулийг үндэслэн тогтоол гаргахаар шийдвэрлэв.

Уг тогтоолд:
• 2009 онд аж ахуйн нэгж, байгууллагын ажилтны сар тутам төлөх эрүүл мэндийн даатгалын шимтгэлийн хувь, хэмжээг түүний хөдөлмөрийн хөлс, түүнтэй адилтгах орлогын 4 хувь байхаар тогтоох,
• Төрөөс эрүүл мэндийн даатгалын шимтгэлийг хариуцдаг даатгуулагчийн шимтгэлийн хэмжээг 670 төгрөгөөр, их, дээд сургууль, коллеж, мэргэжлийн сургалт үйлдвэрлэлийн төвийн өдрийн ангийн суралцагч, малчин, ял эдэлж байгаа хоригдол, Иргэний эрүүл мэндийн даатгалын тухай хуульд заасан иргэний эрүүл мэндийн даатгалын сарын хураамжийг 500 төгрөгөөр, гадаадын иргэн, харъяалалгүй хүний сарын хураамжийг 4000 төгрөгөөр тус тус тогтоох  тухай заалаа.

Товчхон:
• УИХ-ын гишүүн Г.Баярсайханы санаачлан боловсруулсан Тусгай хамгаалалттай газар нутгийн тухай хуульд нэмэлт, өөрчлөлт оруулах тухай хуулийн төслийг хэлэлцээд Засгийн газрын гишүүдийн гаргасан саналыг тусган зарчмын хувьд дэмжиж буйгаа хууль санаачлагчид уламжлахаар болов.
• Монгол Улсын Засгийн газар, Азийн хөгжлийн банк хооронд байгуулах “Ази, Номхон далайн бүс нутгийн хүн амыг шувууны томуугаас урьдчилан сэргийлэх, тархалтыг хянах төсөл”-ийн буцалтгүй тусламжийн гэрээний төслийг зарчмын хувьд дэмжиж, хэлэлцээ хийсний дараа уг гэрээнд гарын үсэг зурах бүрэн эрхийг Сангийн сайд С.Баярцогтод олгох тухай Ерөнхий сайдын захирамжийг гаргахаар тогтов.
• Шинээр үүсгэн байгуулагдсан Төрийн банкны үйл ажиллагааг дэмжих, хөрөнгийн эх үүсвэрийг бүрдүүлэх зорилгоор 100.0 /нэг зуу/ тэрбум хүртэл төгрөгтэй тэнцэх Засгийн газрын бондыг арилжаалахыг Сангийн сайдад зөвшөөрөв.
• Төв аймгийн Хөшигийн хөндийд баригдах нисэх онгоцны шинэ буудлын зорчигч үйлчилгээний гол барилгын архитектурын шийдлийн талаарх хувилбартай танилцав