Ангилал: мэдээ-мэдээлэл

“Лондон 2012” олимпын наадам эхлэхэд 421 хоног үлдлээ. Тиймээс энэ богинохон хугацааг амжилттай төлөвлөж олимпийн бэлтгэл ажлыг улам эрчимжүүлэхийг Монгол Улсын Ерөнхий сайд С.Батболд Олимпын наадамд бэлтгэх үндэсний хорооны ээлжит хурлын үеэр үүрэг болголоо. Ерөнхий сайдын тэргүүлдэг тус  хороо өнөөдөр Төрийн ордонд хуралдсан юм.

Хурлыг нээж Монгол Улсын Ерөнхий сайд С.Батболд үг хэлэхдээ, Монгол Улсын Засгийн газраас спортыг хөгжүүлэх эрх зүйн таатай орчныг бүрдүүлж, улсаас Үндэсний шигшээ багийн цалин, бэлтгэл цугларалт, тэмцээн, эм витаминжуулалт, хувцас хэрэглэл, материал худалдан авах зардалд 2009-2011 онд 3,2 тэрбум төгрөгийн санхүүжилт гаргасан.  Тив, дэлхийн аварга шалгаруулах тэмцээнд өндөр амжилт үзүүлсэн тамирчдад  2011 он гарсаар 168 сая 300 мянган төгрөгийн шагнал олгоод байгааг тэмдэглэлээ.

Үндэсний шигшээ багийн тамирчид энэ оны эхний зургаан сарын байдлаар тив дэлхий, олимпын эрхийн болон олон улсын тэмцээнээс 106 медаль авснаас Хөдөлмөрийн баатар О.Гүндэгмаа, хөнгөн атлетикийн тамирчин Б.Сэр-Од, Л.Отгонбаяр нар Лондонгийн олимпод оролцох эрх авсан амжилтыг Монгол Улсын Ерөнхий сайд сайшаагаад тэдний араас олон шилдэг тамирчид олимпийн эрхээ авна гэдэгт итгэлтэй байгаагаа хэллээ.

ОНБҮХ-ны ажлын төлөвлөгөөг батлахтай холбоотойгоор тус хорооны гишүүд, спортын холбоодын удирдлагууд саналаа хэлж, асуулт хариулт хэлбэрээр хурал үргэлжилсэн. Тэнд санал хэлсэн хүн болгон Засгийн газраас  спортын салбарт онцгой анхаарал тавьж буйд талархаж байлаа. Тухайлбал, Жүдо бөхийн үндэсний шигшээ багийн дасгалжуулагч, гавьяат дасгалжуулагч, ардын багш, Ч.Насантогтох  “Засгийн газраас дэмжлэг үзүүлж байгаа учир манай тамирчид оролцъё гэсэн тэмцээн уралдаан болгондоо оролцож чадаж байгаа.  Одоо 18 тэмцээнд оролцох дутуу.  Олимпын эрхийн тэмцээнүүдэд амжилттай оролцож, олимпын эрх арваас дээшийг авна гэдгээ амлаж байна.

Мөн Бээжингийн олимпод авсан алтан медалиа бататгахын төлөө зүтгэнэ” гэлээ. Мөн “Энэ Засгийн газрын үед Орхон аймагт олимпын сайхан баазтай болсон. Баазын ахуй хангамжийг сайжруулмаар байгаа” гэсэн саналаа тэрбээр уламжилсан юм. Харин УИХ-ын гишүүн Б.Бат-Эрдэнэ “Би та нартай ижил энэ салбарт олон жил зүтгэж яваа. Сүүлийн жилүүдэд Засгийн газар спортын салбарт онцгой анхаарал тавьж байгаа. Би олон жил гадаад, дотоодын тэмцээн уралдаанд оролцсон, ингэж төр зардлыг нь дааж байгаагүй. Олон ч тэмцээн уралдаанаас шагнал авсан ч төр засгаас ингэж мөнгөн шагнал авч байгаагүй. Төрийн энэ их хайр халамжийг манай тамирчид амжилтаар хариулах учиртай. Үүний тулд зохион байгуулалттай, сахилга баттай, ёс зүйтэй байхыг тэрбээр ахмад тамирчны хувиар зөвлөсөн билээ.   

Монгол Улсын Ерөнхий сайд С.Батболд УИХ-ын гишүүн байхдаа Б.Бат-Эрдэнэ болон нэр бүхий хэдэн гишүүнтэй хамтран Бээжингийн олимпод бэлтгэхэд шаардлагатай 2 тэрбум төгрөгийн төслийг УИХ-аар батлуулсан. Тухайн үед спортын салбарт ийм их хэмжээний мөнгө зарлагадлаа гэж шүүмжлэх хүмүүс байсан ч үүний үр дүн гарч Н.Түвшинбаяр, Э.Бадар-Ууган, Б.Баатаржав Монголын ард түмний 44 жил хүлээсэн алтан медалийг эх орондоо авчирсан. Яг үүн шиг тодорхой төсөл боловсруулж ажиллахыг Олимпод бэлтгэх үндэсний хорооны тэргүүн, Ерөнхий сайд С.Батболд хорооны гишүүддээ зөвлөсөн юм.    

Мөн тэрбээр холбоодуудын хэлсэн саналыг ажлын төлөвлөгөөнд тусгаж, нааштайгаар шийдвэрлэх болно гэдгээ илэрхийлээд тамирчид, дасгалжуулагчдадаа санхүүгийн хувьд Засгийн газар цаашид ч дэмжлэг үзүүлнэ. Харин та бүхнийг сэтгэл зүрхээрээ дэмждэг ард түмнийхээ итгэлийг зүтгэлээр хариулаарай. Бээжингийн олимпын буухиаг Лондонд үргэлжлүүлэх учиртай. Амжилтын 90 хувь нь бэлтгэл сургуулилалт байдаг гэдгийг хорооны гишүүд болон Үндэсний шигшээ багийн тамирчид, дасгалжуулагчид, спортын холбоодын удирдлагуудад анхаарууллаа. Тус хурлаас Олимпын наадамд бэлтгэх үйл ажиллагаанд нэмэлтээр шаардагдах 850 сая төгрөгийг 2011 оны төсвийн тодотголд, 3,4 тэрбум төгрөгийг 2012 оны төсөвт тусгах арга хэмжээ авахыг Эрүүл мэндийн сайд С.Ламбаа, Сангийн сайд С.Баярцогт нарт зөвлөсөн тогтоол гаргалаа.

Мөн хурлын үеэр 2010 онд тивийн наадам, тив дэлхийн зэрэглэлийн тэмцээнд амжилт гаргасан тамирчид, дасгалжуулагч нарт Засгийн газрын мөнгөн шагнал гардуулах ёслолын ажиллагаа болж, 46 тамирчин, 18 дасгалжуулагчдад шагналыг нь гардуулаа. Мөн Олимпын наадамд бэлтгэх үндэсний хорооны 2011 оны ажлын төлөвлөгөөг баталж, “Олимп хөгжил” сангийн Удирдах зөвлөлийн бүрэлдэхүүнийг шинэчлэн баталсан юм. Тус зөвлөлийг “Лондон-2012 олимп”-ын тамирчдын багийн ахлагч, Монгол Улсын Шадар сайд М.Энхболд ахлахаар боллоо. Мөн энэ үеэр Олимпын наадамд бэлтгэх үндэсний хорооны бүрэлдэхүүнийг шинэчлэн батлах тухай Монгол Улсын Ерөнхий сайдын захирамжийг танилцуулав

Зургадугаар сарын 1-ийг манай улс 1952 оноос хүүхдийн баярын өдөр болгон тэмдэглэж ирсэн. Энэ баярыг үндэсний хэмжээнд бүх нийтийн амралтын өдөр болгон хуульчилсан цөөхөн улс орны нэг нь манайх. Хүүхэд багачуудын маань хүсэн хүлээдэг энэ баярт өдрийг өнөөдөр улс орон даяар тэмдэглэж байгаа бөгөөд нийслэлд “Эрүүл орчинд инээмсэглэж амьдарцгаая” уриан дор тэмдэглэж байна. Сүхбаатарын талбайд болсон Хүүхдийн эрхийг хамгаалах олон улсын өдөр-Хүүхдийн баярын нэгдсэн арга хэмжээг нээж Монгол Улсын Ерөнхий сайд, Хүүхдийн төлөө үндэсний зөвлөлийн тэргүүн С.Батболд үг хэлэхдээ “Үр хүүхдийнхээ төлөө сэтгэл зүрхээ зориулан сайн сайхан амьдралд хүргэхийн төлөө хөтлөн яваа эцэг эхчүүддээ, хүсэл мөрөөдлөө биелүүлэхээр хөөр баяр инээд баяслаар дүүрэн байгаа хүүхэд багачууддаа Хүүхдийн эрхийг хамгаалах олон улсын өдрийг тохиолдуулан Монгол Улсын Засгийн газрын нэрийн өмнөөс болон хувиасаа чин сэтгэлийн халуун мэндчилгээ дэвшүүлье. Хүүхдийн эрхийг хамгаалах,хөгжлийг хангахын төлөө хамтран ажилладагдотоод гадаадын байгууллага, хамт олонд талархал илэрхийлье” гэлээ.

Мөн тэрбээр “Улс төрийн хүсэл эрмэлзэл байсан цагт их хөрөнгө шаардахгүйгээр  хүний хөгжлийг хангаж болдог гэдгийг олон орны туршлага, түүх харуулж байна. Хүний хөгжлийг хангаж Монгол хүн бүрийг ажилтай, орлоготой, эрүүл, боловсролтой болгох нь манай Засгийн газрын тэргүүлэх чиглэл мөн. Улс орныхоо хөгжлийг шинэ шатанд гаргахын тулд хүүхдийн хөгжилд цогцоор хандах, хүмүүжил ёс суртхууны талаарх уламжлал, шинэчлэлийг хосолсон шинэ үзэл баримтлалыг гарган хүүхдийн эрхийг бодитоор ханган хэрэгжүүлэх талаар бүх талын хамтын ажиллагааг өргөжүүлэх шаардлагатай байна” гэлээ.

Монгол Улсын Засгийн газраас 2011 оныг “Хөдөлмөр эрхлэлтийг дэмжих жил” болгон ажиллаж байгааг Ерөнхий сайд С.Батболд тэмдэглээд “Эцэг эх нь ажилтай, гэр бүл нь орлоготой байж хүүхдүүддээ боловсрол, эрүүл мэндийн үйлчилгээг чанартай хүртээх орчныг бүрдүүлнэ. Ингэснээр хүүхдүүд маань хараа хяналтгүй байх,  хүнд  тэвчишгүй хөдөлмөр эрхлэх, хүчирхийлэлд өртөх, ялгаварлан гадуурхагдах байдал үгүй болно. Ялангуяа эцэг эхчүүд хүүхэддээ зориулах цаг завтай байх, “хүн болж” төлөвшихөд нь онцгой анхаарлаа хандуулах, хүссэн мэргэжлээ эзэмшихэд нь хөрөнгө оруулалт хийх боломжийг бүрдүүлэхийн тулд бүх талын дэмжлэг үзүүлэхэд Засгийн газар бодлогоо чиглүүлэх болно гэдгийг онцоллоо.

Ингэхдээ амьдралын анхдагч орчин болсон гэр бүлийн амьдралын чанарыг дээшлүүлэх, хүүхдэд ээлтэй хөгжлийн орчин бүрдүүлэхийн төлөө гэр бүл, байгууллага хамтдаа хүчин зүтгэхийг уриаллаа

Хүүхдийн соёл амралтын хүрээлэн өчигдөр өглөө эрт хөл хөдөлгөөн ихтэй байлаа. Асрамжийн төвийн болоод  хөгжлийн бэрхшээлтэй хүүхдүүдийн төлөөлөл зэрэг 1500 гаруй багачууд Ерөнхий сайдын нэрэмжит бэлэг  хүлээн авч байгаа нь энэ бөгөөд тус арга хэмжээг Монголын сайтуудын холбоотой хамтран зохион байгуулсан юм. Мөн түүнчлэн эдгээр хүүхдүүд тус соёл амралтын хүрээлэнгийн хэд хэдэн тоглоомонд үнэгүй тоглох эрхийн бичгээр шагнууллаа.Монгол улсын Ерөнхий сайдын ивээл дор энэ бүх арга хэмжээ зохиогдож байгаа ажээ.

Монгол улсын Ерөнхий сайд С.Батболд манай оронд айлчилж байгаа АНУ-ын сенатын гишүүн Рой Блант тэргүүтэй төлөөлөгчдийг хүлээн авч уулзлаа. Өнгөрсөн 20 жилийн хугацаанд Монгол улс ардчилал зах зээлийн замыг сонгож, энэ хугацаанд АНУ бүх талаар дэмжин тусалж ирсэнд талархаж байгаагаа Ерөнхий сайд С.Батболд уулзалтын эхэнд тэмдэглээд, ялангуяа Мянганы сорилтын сангийн гүйцэтгэсэн үүргийн ач холбогдлыг өндрөөр үнэлж байгаагаа илэрхийлсэн юм.

Мөн түүнчлэн ирэх долдугаар сард Ардчиллын хамтын нийгэмлэгийн хурлыг Монгол улс даргалах болсондоо баяртай байна гэлээ. АНУ-ын сенатын гишүүн Рой Блант энхийг сахиулах үйл ажиллагаанд Монгол улс идэвхтэй оролцож байгаад талархаж байгаагаа илэрхийлээд, АНУ нь эдийн засгийн өндөр хурдацтай хөгжиж байгаа Монгол улсын худалдаа эдийн засгийн түнш үргэлж хэвээр байх болно хэмээн тэмдэглэлээ

Монгол Улсын Ерөнхий сайд С.Батболд 2011 оны 5 дугаар сарын  31-ний өдөр БНЭУ-ын Гадаад харилцааны төрийн дэд сайд Е.Ахамед тэргүүтэй төлөөлөгчдийг хүлээн авч уулзлаа. Хоёр талын харилцаа иж бүрэн түншлэлийн түвшинд хүрч, олон улсын тавцанд идэвхтэй хамтран ажиллаж байгааг Ерөнхий сайд уулзалтын эхэнд тэмдэглэлээ. Монгол-Энэтхэгийн хамтын ажиллагааны хамтарсан хорооны гуравдугаар хуралдаан амжилттай болж өндөрлөсөнд баяр хүргээд, хоёр орны харилцаа хамтын ажиллагааг улам өргөжүүлэх хөгжүүлэхэд чухал ач холбогдолтой арга хэмжээ болсныг онцоллоо.

Мөн тэрээр цаашид мэдээллийн технологи, худалдаа, эдийн засгийн харилцааг өргөжүүлэх чиглэлээр хамтран ажиллах сонирхолтой байгааг хэлээд Энэтхэгийн Засгийн газраас Р.Гандигийн нэрэмжит урлаг үйлдвэрлэлийн сургуулийг өргөтгөх, шинэчлэхэд туслалцаа үзүүлэхээр шийдвэрлэсэнд талархал дэвшүүллээ. Түүнчлэн БНЭУ-ын Ерөнхий сайд Манмохан Сингхт мэндчилгээ дэвшүүлж байгааг энд дашрамд уламжлахыг хүслээ.

Энэтхэгийн Засгийн газраас олгох 20 сая ам.долларын зээлээр Аутсорсингийн төв, Монгол-Энэтхэгийн хамтарсан сургууль байгуулах ажлыг эрчимжүүлж, ойрын хугацаанд шийдвэрлэхийг Ерөнхий сайд С.Батболд холбогдох сайд нарт хэллээ. Ноён Е.Ахамед цаг зав гарган хүлээн авч уулзсанд талархаад Ерөнхий сайдын хэлсэнтэй санал нэг байгаагаа илэрхийллээ. Тэрээр гангийн үйлдвэр байгуулах санал тавьсныг Ерөнхий сайд дэмжиж Санамж бичиг байгуулах нь зүйтэй гэв.

Улаанбаатар хотноо эхэлсэн Өмнөговь аймгийн соёлын өдрүүдийн арга хэмжээнд оролцож байгаа сумдын Засаг дарга нарыг Монгол Улсын Ерөнхий сайд С.Батболд 2011 оны 5 дугаар сарын 30-ны өдөр хүлээн авч уулзав. Тэрээр аймаг байгуулагдсаны 80 жилийн ойн хүрээнд нийслэл хотноо соёлын өдрүүдээ зохион байгуулж байгаа говийн зон олонд Засаг дарга нараар нь дамжуулан Засгийн газрын нэрийн өмнөөс баяр хүргэж амжилт хүслээ. Цаг үеийн ажил төлөвлөсний дагуу өрнөж байгааг Ерөнхий сайд дурдаад цаашид улс, орон нутаг, ард иргэдийн эрх ашгийг нэгдүгээрт тавьж, сум, аймаг гэхээсээ илүү улс, бүсийн хөгжлийн төлөө том харж, хамтарч ажиллахыг Засаг дарга нарт зөвлөв.

Олон жил ярьсан Оюутолгойн Хөрөнгө оруулалтын гэрээг хамтарсан Засгийн газар байгуулж, ажлыг нь эхлүүлсэн. Говийн бүс Монгол Улсын хөгжлийн гол цэг болж дэлхийн улс орнууд хүртэл анхаарлаа хандуулж байгаа энэ үед бүтээн байгуулалтын ажлыг бүх талаар дэмжиж, туслах учиртай. Орон нутагт хүнд суртал, эрх ашгаараа нэгдсэн бүлэг, хуулийн зөрчилтэй заалт гээд ажилд хүндрэл учруулж байгаа зүйлийг төр, засаг нэн даруй шийдвэрлэхийн төлөө байна, тухайн сумдын удирдлага ч өөрөөс шалтгаалах бүхнээ хийх ёстой гэж Ерөнхий сайд санууллаа. Уул уурхайн салбар гэлтгүй байгалийн үзэсгэлэнт газарт түшиглэн аялал жуучлалыг хөгжүүлэх асар их боломж Өмнөговьчуудад байгааг тэрээр мөн хэлэв

Монгол Улсын Ерөнхий сайд С.Батболдод 2011 оны 5 дугаар сарын  30-ны өдөр БНСУ-аас манай улсад суугаа Онц бөгөөд Бүрэн эрхт Элчин сайд Чанг Жи бараалхаж, Таэквондогийн хүндэтгэлийн 7-р дан буюу их мастер цолны батламжийг гардууллаа. Таэквондогийн спортыг хөгжүүлэх үйлсэд үнэтэй хувь нэмэр оруулсан, спортод элэгтэй хүмүүс энэхүү хүндэтгэлийг хүлээдэг байна. Сүүлийн жилүүдэд манай тамирчид олимп, тив, дэлхий, олон улсын чанартай тэмцээн, уралдаанд өндөр амжилт гаргаж, улс орныхоо нэр хүндийг өндөрт өргөж яваа нь тамирчдын нөр их хүч, хөдөлмөрийн үр шим төдийгүй Монгол Улсын Засгийн газраас спортыг хөгжүүлэх чиглэлээр дорвитой арга хэмжээ авч анхаарч байгаагийн илрэл юм.

Спортод элэгтэй төрийн тэргүүнүүдэд дэлхийн улс орнууд хүндэтгэлийн зэрэг, цолоо олгодог энэхүү жишгийн дагуу өмнө нь Ерөнхий сайд С.Батболд 2002 онд Гадаад харилцааны дэд сайдын албыг хашиж байх үедээ Японы Киокушинкай каратэгийн 5-р даныг хүртэж байжээ. Энэ хүндтэй зэргийг ОХУ-ын Засгийн газрын дарга В.В.Путин болон бусад нэр хүндтэй хүмүүс хүртэж байсан байна. Ирэх жил Англи улсад болох “Лондон-2012” дэлхийн зуны спортын 30-р олимпод баг тамирчдаа бэлтгэн оролцуулах үндэсний хороог ахалж байгаа Ерөнхий сайд тамирчиддаа онцгой анхаарал хандуулан бүх талаар тусалж, дэмжин ажиллаж байна.

УИХ-ын дэд дарга, гишүүд ээ,

Эрхэм хүндэт генерал, офицер, ахлагч нар аа,

Энхийг сахиулагч цэрэг дайчид аа,

Хатагтай, ноёд оо,

Та бүхэндээ “НҮБ-ын энхийг сахиулагчдын олон улсын өдөр”-ийн баярын мэндийг хүргэн мэндчилж байна.

Манай улс энхийг эрхэмлэгч, энхийн төлөөх улс орон билээ. Монголын төр, ард түмэн энхийг сахиулагч эрэлхэг хөвгүүдээрээ бахархаж, хүндэтгэж ирсэн. Энэ жил Монгол Улсын Батлан хамгаалах яамны 100 жил, Зэвсэгт хүчний 90 жилийн түүхэн ой тохиож байна. Батлан хамгаалах, Зэвсэгт хүчнийхэн маань эх орныхоо эрх чөлөө, тусгаар тогтнол, бүрэн эрхт байдлыг баттай хамгаалж ирсэн бахархам сайхан намтар, түүхтэй. Энэ бахархам түүхээ даян дэлхийн амар амгалан, аюулгүй байдлын төлөөх энхийг дэмжих ажиллагаанд оруулсан хувь нэмрээрээ баяжуулсаар байна.

Монгол цэргүүд энхийг сахиулах олон улсын ажиллагаанд оролцох болсон нь Зэвсэгт хүчний шинэчлэлийг хэрэгжүүлэх үйл ажиллагааны явцын түүхэн ололтуудын нэг юм. Өнгөрсөн хугацаанд Конго, Баруун Сахар, Ирак, Афганистан, Косово, Сьерра-Леон, Гүрж, Этиоп-Эритрей, Чад, Судан зэрэг дэлхийн 3 тивийн 10 гаруй улсад манай 5000 гаруй цэргийн албан хаагч үүргээ нэр төртэй гүйцэтгэлээ. Монгол цэргийн ур чадвар, тэсвэр тэвчээр, хатуужил дэлхийн хэмжээнд үнэлэгдлээ. 

Монгол Улсын энхийн үйлсэд оролцсон цэргийн тоог хүн амтай нь харьцуулсан үзүүлэлтээр дэлхийд тэргүүлэгч орны нэг болж чадсан. Ингэснээр Монгол Улсын нэр хүнд олон улсын тавцанд өсөн нэмэгдэж, гадаад харилцаа улам бүр нээлттэй, чөлөөтэй болж, бүс нутгийн энх тайван, аюулгүй байдлыг бэхжүүлэхэд үнэтэй хувь нэмэр оруулж ирснийг онцлон тэмдэглэхэд таатай байна.

Өнөөдөр Монгол цэрэг мэргэжлийн ур чадвар, сахилга зохион байгуулалт, үүрэг гүйцэтгэх чадавхи, бие бялдрын болоод сэтгэл зүйн бэлтгэлжилтээрээ ямагт манлайлж ирсэнд Монгол Улсын Ерөнхий сайдын хувьд бахархалтай байна. Монголын төр гадаад орны амаргүй нөхцөлд үүргээ гүйцэтгэж ирсэн энхийг сахиулагчидаа урамшуулан шагнасаар байх болно. Цаашид ч бид энхийг сахиулагч цэргийн алба хаагчдынхаа хийсэн бүтээснийг үнэлэх, үйл хэргийг нь алдаршуулах, ажлын орчин нөхцөл, зэвсэг техникийг сайжруулах, нийгмийн хамгааллыг бэхжүүлэх талаар тодорхой бодлого хэрэгжүүлнэ.  

Олон улсын энхийн хүчин чармайлтын талаархи Монгол Улсын байр суурийг анхнаас нь дэмжиж хамтран ажилласан НҮБ болон батлан хамгаалах, цэрэг техникийн салбарт хамтран ажилладаг улс орнуудад гүн талархал илэрхийлье. Эх орныхоо нэрийн хуудас болж үүргээ нэр төртэй гүйцэтгэсэн нийт энхийг сахиулагчид, тэдний гэр бүл, энхийг дэмжих үйл ажиллагаанд оролцсон бүх хүнд Засгийн газрынхаа өмнөөс сайн сайхан бүхнийг хүсэн ерөөе. Монгол Улсынхаа төлөө, даян дэлхийн энх амгалангийн төлөө зүтгэж буй энхийг сахиулагчдийн маань суу алдар, сүр хүч, сүлд хийморь мандан бадрах болтугай.

Сүхбаатарын талбай.                                                        2011.05.28

“Нэг улсын иргэдийг нөгөө улсын нутаг дэвсгэрт хөдөлмөр эрхлүүлэх тухай” Монгол Улс, ОХУ-ын Засгийн газар хоорондын хэлэлцээр байгуулах нь зүйтэй гэж Засгийн газрын хуралдаанаас үзлээ. Хэлэлцээрт гарын үсэг зурах бүрэн эрхийг Монгол Улсаас ОХУ-д суугаа Онц бөгөөд Бүрэн эрхт Элчин сайд Д.Идэвхтэнд олгохоор болсон байна. Хэлэлцээр байгуулснаар хүлээн авагч улсад хөдөлмөр эрхэлж байгаа хүн  тухайн улсын гадаадын иргэдтэй холбогдолтой хууль тогтоомж, хоёр тал нэгдэн орсон олон улсын гэрээнүүдэд заасан эрх, эрх чөлөө, эрх зүйн хамгаалалт эдлэнэ. Мөн хүлээн авагч улсын хууль, тус улсын нутаг дэвсгэрт гадаадын иргэд оршин суух зэрэгтэй холбоотой хүлээх үүргийг ч хэлэлцээрийн төсөлд тусгасан байна.

Иргэд хүлээн авагч улсын хууль, тогтоомжийн дагуу зөвхөн  мэргэжлийн боловсрол буюу тусгай мэргэжил шаардах ажил хийх тохиолдолд тэдний боловсролын баримт бичгийг хүлээн авагч улс өөрийн орны боловсрол, мэргэжлийн бичиг баримттай адилтган хүлээн зөвшөөрөх юм. ОХУ-ын Шилжин суурьшилтын албаны мэдээгээр 2009 онд манай улсын 46 мянга гаруй иргэн ОХУ-ын хил нэвтэрсний 76 хувь нь тус улсын холбогдох байгууллагад бүртгүүлсэн байна. 2010 онд ОХУ-ын 771, энэ оны 5 дугаар сарын байдлаар 819 иргэн манай улсад зохих хууль тогтоомж, зөвшөөрлийн дагуу хөдөлмөр эрхэлж байгаа гэсэн судалгаа гарчээ. 

Энэ нь иргэдийн шилжих хөдөлгөөн хоёр улсын нийгэм, эдийн засагт тодорхой хувь нэмэр өгдөг учир тэдний эрхийг хангахад чиглэсэн зохицуулалт бий болгох шаардлагатайг харуулж байгаа хэрэг юм. Иймээс асуудлыг Засгийн газрын хуралдаанаар хэлэлцэн Хэлэлцээр байгуулах нь зүйтэй гэж үзсэн байна