batbold

Blog

  • Ажлын хэсгийг ажлаа эрчимжүүлэхийг үүрэг болгов

    Ажлын хэсгийг ажлаа эрчимжүүлэхийг үүрэг болговСтандартын бодлого, хэрэгжилтийг боловсронгуй болгох, олон улсын түвшинд нийцүүлэх ажлыг зохион байгуулах үүрэг бүхий ажлын хэсэг 2010 оны 5 дугаар сарын 6-ны өдөр хуралдав. Тэргүүн шадар сайдын ахалсан ажлын хэсэгт өгсөн үүргийн биелэлтийг хурлаар хэлэлцэн, цаашид эрчимжүүлж энэ сард багтаан ажлаа тайлагнахыг Ерөнхий сайд С.Батболд даалгалаа. Засгийн газрын 38 дугаар тогтоолоор Ерөнхий сайд болон Тэргүүн шадар сайдаар ахлуулсан ажлын 2 хэсэг байгуулан ажиллаж байна.

    Ажлын хэсэг зах зээл, хэрэглэгчдийн эрэлт, хэрэгцээг хангасан чанар, аюулгүй байдлын өндөр түвшний бүтээгдэхүүний үйлдвэрлэл, үйлчилгээ, худалдааг стандартаар дэмжиж хөгжүүлэхэд тулгамдаж байгаа асуудал, түүнийг шийдвэрлэхэд шаардлагатай арга хэмжээг тодорхойлох зорилготой юм. Мөн Европын Холбооны улсуудын стандартыг монголдоо нутагшуулах чиглэлээр судалгаа хийж, санал боловсруулахаар ажиллаж байна. Ажлын хэсэг “Стандартын шинэчлэлийн хөтөлбөр”-ийн төслийг энэ оны 3 дугаар улиралд багтаан боловсруулж Засгийн газрын хуралдаанд оруулж шийдвэрлүүлнэ гэж Засгийн газрын Хэвлэл, мэдээллийн албанаас мэдээллээ.

  • Ерөнхий сайдын нэрэмжит шагналтан Унгарт амарна

    Ерөнхий сайдын нэрэмжит шагналтан Унгарт амарна

    Монгол Улсын Ерөнхий сайд С.Батболд “Дуулиан-2020” заалны хөл бөмбөгийн тэмцээний зохион байгуулагч, ивээн тэтгэгч, шилдэг тоглогчдыг 2010-05-06-нд хүлээн авч уулзан, амжилттай оролцсон тамирчдад өргөмжлөл гардууллаа. Монгол Улсын Ерөнхий сайд энэ үеэр “Хөлбөмбөг бол дэлхийн хамгийн том, нэр хүндтэй, хамгийн олон сонирхогчтой спортын нэг төрөл юм. Дэлхийн хөлбөмбөгийн аварга шалгаруулах тэмцээн ирэх сард болно. Энэ тэмцээнийг бүр олон хүүхэд залуус телевизийн дэлгэцээр үзэж, энэ сайхан спортыг сонирхох болно гэдэгт итгэлтэй байна.

    Спорт сонирхдог, дэмждэг хүний хувьд хэлэхэд, биеийн тамир, спорт маш олон талын ач холбогдолтой. Ерөнхий боловсролын сурагчдын дунд спортыг дэлгэрүүлэх, хөгжүүлэхэд Засгийн газраас анхаарч, дэмжинэ” гэлээ. Ерөнхий сайд С.Батболд заалны хөлбөмбөгийн аварга шалгаруулах дөрөв дэх удаагийн “Дуулиан-2020” тэмцээний шилдэг мэргэн буудагч Э.Зол-Эрдэнэ, шилдэг тоглогч А.Чинзориг нарт өргөмжлөл гардуулж, нийслэлийн 24 дүгээр дунд сургуулийн сурагч, “САММИТ” багийн 11 настай тоглогч А.Мөнх-Очирт нэрэмжит шагналаа олголоо. Ерөнхий сайдын нэрэмжит шагналтан хүү энэ зун БНУУ-д нэг сарын хугацаатай амрах эрхээр шагнууллаа гэж Засгийн газрын Хэвлэл мэдээллийн албанаас мэдээллээ.

  • Ерөнхий сайд С.Батболд Нийслэлийн хоёр дүүрэгт ажиллав

    Ерөнхий сайд С.Батболд Нийслэлийн хоёр дүүрэгт ажиллав Орон сууцны барилгын ажлыг зургаан дүүрэгт зэрэг эхлүүлнэ

    Монгол Улсын Ерөнхий сайд С.Батболд 2010-05-04-ний өдөр нийслэлийн  Сүхбаатар, Баянгол дүүргийн зарим байгууллагын ажилтай танилцлаа. Тэрбээр Сүхбаатар дүүргийн 11 дүгээр хорооны нутагт Гэр хорооллыг барилгажуулах ажлын хүрээнд хийгдэж айл өрхийг шилжүүлэн суурьшуулах ”300 айлын орон сууц”-ны шав тавих ёслолын ажиллагаанд оролцов. Гэр хорооллыг барилгажуулах хөтөлбөрийн хүрээнд өөрийн өмчлөл, эзэмшил, ашиглаж буй газраа эргэлтэд оруулж, орон сууцаар солих айл өрхийг түр байршуулах зорилго бүхий энэхүү 300 айлын хоёр орон сууцыг 2010 онд багтаан ашиглалтад оруулах төлөвлөгөөгөө Нийслэлийн Засаг дарга бөгөөд Улаанбаатар хотын Захирагч Г.Мөнхбаяр танилцууллаа. 

    Монгол Улсын Засгийн газрын тэргүүн С.Батболд шав тавих ёслолын ажиллагааны үеэр нийслэлийн зургаан дүүрэгт иргэдийг түр суурьшуулах орон сууцны барилгын ажлыг эхлүүлэх боломжийг судалж ойрын үед шийдвэрлэх үүрэг чиглэлийг хотын удирдлагуудад өгөөд “Засгийн газраас бодлого боловсруулж дэмжинэ” гэлээ. Ерөнхий сайд С.Батболд дараа нь Улаанбаатар хотын Нийтийн номын сан дахь Өрхийн бичил аж ахуйг дэмжих “Cold agro” төслийн үйл ажиллагаатай танилцаж, өрхийн аж ахуй эрхэлдэг иргэдтэй уулзаж ярилцлаа.

    ЭМ ҮЙЛДВЭРЛЭГЧИДТЭЙ УУЛЗЛАА

    Ерөнхий сайд С.Батболд Чингэлтэй дүүргийн 2 дугаар хороонд байрлах “Монос мойл” эмийн санд очлоо. Тэрбээр нийслэлийн иргэдийн эмийн хангамж, чанар, үнэ ханштай танилцаж, эм үйлдвэрлэгчидтэй уулзаж ярилцахдаа “Ханиад томууны үеэр эмийн үнийн хөөрөгдөл гарч байна. Зайлшгүй шаардлагатай эмийн үнийн дээд хязгаарыг Засгийн газар тогтооно гэж Эм, эмнэлгийн хэрэгслийн тухай хуулийн шинэчилсэн найруулгын төсөлд тусгагдсан, УИХ-аар хэлэлцэж байгаа. Хэрэв энэ хууль батлагдвал эмийн үнийг хиймлээр хөөрөгдөх үндэсгүй болно” гэсэн юм.

    Мөн “Засгийн газар дотоодын үйлдвэрлэлээ дэмжих, иргэдээ чанартай бүтээгдэхүүнээр хангах, үнийн дээд хязгаар амьдрал дээр үйлдвэрлэгчдээ дампууруулахгүй байх хувилбар бүхий журам гаргах учиртай. Бодлого журам нь тодорхой, ойлгомжтой бол эмийн үнийн гэнэтийн өсөлт, үнийн хөөрөгдөл, чанаргүй эмийн хангалтаас ард иргэдээ хамгаалах боломж гарна. Энэ чиглэлээр Эрүүл мэндийн яам, холбогдох мэргэжлийн байгууллагууд үйлдвэрлэгчидтэйгээ ярилцаад ямар арга хэмжээ авах талаар санал боловсруулж Засгийн газрын хуралдаанд оруулж ирэхийг Эрүүл мэндийн сайдад  үүрэг болгож байна” гэлээ.

    ӨРГӨН ХЭРЭГЛЭЭНИЙ БАРААНЫ ҮНЭД ЗОХИЦУУЛАЛТ ХИЙХ ШААРДЛАГАТАЙ

    Ерөнхий сайд С.Батболд Баянгол дүүргийн 18 дугаар хороонд байрлах “Таван эрдэнэ” захаар орж иргэд, худалдаа эрхлэгчидтэй уулзаж ярилцав. “Таван эрдэнэ” захад хүнсний бүтээгдэхүүний үнэ бусад захынхтай харьцуулахад харьцангуй өндөрт тооцогддог учир Ерөнхий сайд энэ захыг сонгосон байна. Атрын 3 дахь аяны үр дүнд гурил, төмс боломжийн үнэтэй байгаа бол махны үнэ эрс өсч адууны кг мах 4000 төгрөгт хүрч, үхрийн мах 6000 төгрөг хэдийнэ давжээ. Энэ нь өнгөрсөн оны мөн үеийнхтэй харьцуулахад 13-14 хувиар өссөн гэсэн үг юм.

    Иргэд ч Ерөнхий сайдад хандан махны үнийн өсөлтөд анхаарахыг хамгийн түрүүнд хүсч байлаа. Цаашид мах, гурил, элсэн чихэр, будаа, ногоо зэрэг хүнсний гол нэрийн барааны үнэд төрөөс зохицуулалт хийж, үнийн хөөрөгдөл үүсгэхгүй байх чиглэлээр ямар арга хэмжээ авах талаар санал боловсруулж Засгийн газарт танилцуулахыг Ерөнхий сайд нийслэлийн удирдлагуудад  үүрэг болгов. 

    Ерөнхий сайд дараа нь Баянгол дүүргийн 20 дугаар хорооны нутагт байрлах “Жаст Агро” компанийн “Мах маркет” үйлдвэрт очиж нийслэлчүүдийн хэрэгцээнд зориулсан нөөцийн мах бэлтгэсэн байдалтай танилцлаа. 2009 оны байдлаар “Жаст Агро” ХХК дотоодын махны худалдааны 32.3%, махны хадгалалтын 30%, мал нядалгааны 26%, махны экспортын 40% -ийг дангаараа хариуцаж байна.

    “Мах маркет” үйлдвэр ямааны нэг кг махыг 1900, хонины махыг 2900 төгрөгөөр тооцон 167 цэгээр дамжуулж хэрэглэгчдэд шууд нийлүүлдэг.  Хэдийгээр жил бүр нөөцийн мах бэлтгэдэг ч хөрөнгө мөнгөний боломжоос шалтгаалан шаардлагатай хэмжээнд хүртэл мах нөөцөлж чадахгүй байгаа тухай нийслэлийн удирдлагууд Ерөнхий сайдад танилцуулав. Жилд 16 мянган тонн мах бэлтгэн нийлүүлбэл нийслэлчүүдийн махны эрэлт, хэрэгцээг хангаж, үнийн хөөрөгдлийг таслан зогсоох боломжтой гэж Нийслэлийн Засаг дарга бөгөөд Улаанбаатар хотын Захирагч Г.Мөнхбаяр хэллээ.

    ЖИЖИГ ГЭЛТГҮЙ ЯМАР Ч АСУУДАЛД АНХААРЪЯ

    Ерөнхий сайд С.Батболд Нийслэлийн нутгийн захиргааны “Хангарьд” ордонд нийслэлийн удирдах ажилтнуудтай уулзав. Төр, засгийн хэмжээнд нийслэл хотын хөгжлийн талаар авч хэрэгжүүлэх бодлогын шинжтэй асуудлаас гадна цаг үеийн ажлын талаар Ерөнхий сайд үүрэг, даалгавар өглөө. Зам засвар зэрэг бүтээн байгуулалтын ажлын сонгон шалгаруулалтыг ил тод болгон хугацаанд нь зарлаж байх, аливаа ажлын стандарт, гүйцэтгэлийн хяналтыг хэвшүүлж, мөрдүүлэхийг онцгойлон анхааруулав. 

    Мөн тэрбээр “Төрийн байгууллагын дунд шатныхны ажлыг дүгнэхдээ иргэдэд хөнгөн шуурхай үйлчилж, аливаа гомдол, саналыг  хэрхэн шийдвэрлэсэн зэргийг гол үзүүлэлт болгоё. Хяналтын байгууллагуудын давхардсан ажил, үүргийг авч үзэх, дүрэм, журмаа ойлгомжтой, нээлттэй, хяналт, шалгалт, бүртгэлийн системээ боловсронгуй болгож хялбаршуулах, нэг цонхны үйлчилгээ нэвтрүүлэх чиглэлээр ямар ажил хийхээ Засгийн газарт танилцуулах хэрэгтэй.

    Нийслэлийн хамгийн том асуудал ажилгүйдлийг шийдвэрлэх ямар арга хэмжээ авч байгаа талаар нийслэл, дүүрэг, хорооны хэмжээнд авч үзэж, хөдөлмөр эрхлэлтийг дэмжих бодлого Засгийн газар, нийслэлийн хэмжээнд хэрхэн уялдаж байгааг ч авч үзэх ёстой. Хувиараа бизнес эрхлэх, өрхийн үйлдвэрлэлийг дэмжих чиглэлээр хийж байгаа ажлаа улам өргөжүүлье.  Оюутолгойн хөрөнгө оруулалтын гэрээний дагуу нийслэлд ажилчин бэлтгэх ажил эхэлсэн. Үүнийг бүх шатандаа өргөжүүлэхэд анхаарах хэрэгтэй” гэв.

    Тэрбээр цааш нь “Амьжиргааны түвшинг сайжруулах чиглэлээр хийх ажил багагүй байна. Эм, эмийн чанар, түүнд тавих хяналт, шалгалтыг сайжруулъя. Хүнсний хангамж, тухайлбал мах зэргийг Улаанбаатар хот руу хэрхэн оруулж нийлүүлж байх, түүнд тавих хяналтаа хялбаршуулахад анхаарах хэрэгтэй. Хот тохижилтын чиглэлээр багагүй ажил хийж байна. Нийслэлийн хэмжээнд ногоон бүс, ногоон байгууламж гэж байнга ярьдаг байх ёстой. Газар олгочихоод дараа нь тохижилт, ногоон байгууламжийн ажилд нь шаардлага тавихгүй  байна. Дүүрэг, хороо бүр хог цэвэрлэгээ, тохижилтын талаар системтэй болох хэрэгтэй. 

    Арга ядахад л хүн олноор очдог Хийморийн овоогоо цэвэрлэж, тохижуулчихвал нийслэлчүүдийн сүлд хийморь нь ч өөдөө байна шүү дээ. Энэчлэн  жижиг гэлтгүй ажилд анхааръя. Хөрсний усыг ашиглах аливаа санал, санаачилгыг дэмжиж ажиллах шаардлагатай. Иргэдийг бухимдуулж байгаа автомашины түгжрэлийг хэрхэн оновчтой шийдэх, цагийн хуваарийг хэтрүүлэн ажилладаг баар, цэнгээний газрууд, архидан согтууралт зэрэгтэй хэрхэн тэмцэх юм.  Төвлөрлийг сааруулах зорилгоор хийж байгаа ажлууд тухайлбал, оюутны хотхоныг хотоос  зайдуу байгуулах төлөвлөлтийг нийслэлийн удирдлагууд шуурхай боловсруулж оруулж ирэхэд анхаарах хэрэгтэй байна” гэлээ гэж Засгийн газрын Хэвлэл мэдээллийн албанаас мэдээллээ.

  • Ерөнхий сайд нийслэл хотод ажиллана

    нийслэл, аймагМонгол Улсын Ерөнхий сайд С.Батболд 2010 оны 5 дугаар сарын 4-ний өдөр буюу Мягмар гарагт нийслэл хотод ажиллана. Тэрээр Сүхбаатар дүүргийн 11 дүгээр хорооны нутаг дэвсгэрт 300 айлын орон сууцны шав тавих ёслолд оролцон өрхийн бичил аж ахуйг дэмжих “Êоулд Агро” төслийн үйл ажиллагаатай танилцана. Ерөнхий сайд эмийн хангамж, чанар, ханш, өргөн хэрэглээний бараа, бүтээгдэхүүний нийлүүлэлт, үнэ ямар байгаатай танилцаж, иргэд, худалдаа эрхлэгчдийн санал бодлыг нь сонсохоор эмийн сан, “Таван Эрдэнэ“ захаар орох юм.

    Мөн Баянгол дүүргийн 20 дугаар хорооны нутаг дэвсгэрт байрлах “Жаст Агро” компаний “Мах маркет” үйлдвэрийн үйл ажиллагаа болон нийслэлүүдийн хэрэгцээнд зориулсан нөөцийн махны бэлтгэсэн байдал, чанартай танилцана. Дараа нь нийслэлийн нутгийн захиргааны “Хангарьд” ордонд нийслэлийн удирдах ажилтнуудтай уулзалт хийнэ гэж Засгийн газрын Хэвлэл, мэдээллийн албанаас мэдээллээ. 

  • Мэндчилгээ

    Мэндчилгээ

    Монголын хэвлэл мэдээллийн салбарт ажиллаж буй нийт сэтгүүлч, ажилтнууд та бүхэндээ болон уншигч, сонсогч, үзэгчиддээ дэлхийн хэвлэлийн эрх чөлөөний өдрийн баярын мэндийг хүргэж, Засгийн газрын нэрийн өмнөөс болон хувиасаа чин сэтгэлийн талархал илэрхийлье. Өнөөдөр дэлхийн өнцөг булан бүрт ажиллаж буй сэтгүүлчид хэвлэлийн эрх чөлөөний өдрийг өргөн хүрээнд тэмдэглэж байна. Хэвлэлийн эрх чөлөөний өдөр бол үнэний дуу хоолой болсон сэтгүүлчид, хэвлэл мэдээллийн салбарынханы төдийгүй чөлөөт хэвлэлийн үр шимийг хүртэгч уншигч, сонсогч, үзэгчдийн баяр билээ.

    Манай улс 1998 онд “Хэвлэлийн эрх чөлөөний тухай” хуулийг батлан хэрэгжүүлж эхэлснээр хэвлэл мэдээллийн салбар хараат бус, бие даасан байдлаар хөгжих үндэс суурь бүрдсэн юм. Өнгөрсөн хугацаанд чөлөөт хэвлэлийн салбар өргөжиж, дөрөв дэхь засаглаллын үүргээ нэр төртэйгээр биелүүлж ирсэн.  Гэсэн хэдий ч манай улсын хэвлэлийн эрх чөлөө дэлхийн хэмжүүр, шалгуураар “хагас эрх чөлөөт” ангилалд багтсаар байна. Ардчилал эрх чөлөөний гол хэмжүүр  болсон чөлөөт хэвлэлийн дархлааг бэхжүүлж, Монголын хэвлэл мэдээллийн салбарыг “бүтэн эрх чөлөөт” болгох ёстой. 

    Тиймээс ч миний бие “Мэдээллийн эрх чөлөөний тухай” хуулийн төслийг санаачлан УИХ-д өргөн барьсан. Мөн “Мэдээллийн ил тод байдлын тухай” хуулийн төслийг УИХ-ын гишүүд хэлэлцэн батлахаар төлөвлөж байна. Энэ мэтээр ард түмний дуу хоолой болсон дөрөвдэхь засаглалаа хөгжүүлэх, мэдээллийн ил тод нээлттэй байдлыг хангаж, эрх зүйн таатай орчинг бүрдүүлхэд төр засгийн зүгээс анхааран ажиллаж байна. Улс үндэстнийхээ нийтлэг ашиг сонирхолыг хамгаалж, хариуцлагатай, ёс зүйтэй, хүнлэг, иргэнлэг сэтгүүл зүйг хөгжүүлэхэд сэтгүүлчдийн идэвх санаачлага, бүтээлч ажиллагаа чухал үүрэгтэй.

    Монгол Улсын Засгийн газрын бодлого, үйл ажиллагааг олон нийтэд ойлгуулах, ард түмнийхээ санал бодлыг төр засагтаа хүргэхэд хэвлэл мэдээллийн салбарынхан ихээхэн хувь нэмэр оруулж ирсэнд талархаж буйгаа баярын энэ өдөр онцлон тэмдэглэж байна. Сэтгүүлчид та бүхэн маань ард түмнийхээ нийтлэг эрх ашиг, шударга ёс, олон ургальч үзэл, ил тод байдал, улс орынхоо хөгжил дэвшилд ихээхэн хувь нэмэр оруулах ёстойгоо ухамсарлаж ажиллана гэдэгт итгэж байна.

    Та бүхэнд ажлын амжилт, сайн сайхныг хүсэн ерөөе. 
    Монгол Улсын Ерөнхий сайд С.Батболд

  • С.Батболд: Бидний хамтын зүтгэл үр дүнгээ өгөх нь эргэлзээгүй

    С.Батболд: Бидний хамтын зүтгэл үр дүнгээ өгөх нь эргэлзээгүй Монгол Улсын Ерөнхий сайд С.Батболд 2010.04.30-нд “Сүхбаатар аймаг-хөрөнгө оруулалт, хөгжлийн төлөө чуулган”-д оролцож үг хэллээ. Тэрбээр Монгол Улсын өнцөг булан бүрээс болон наран ургах их талын Сүхбаатар нутгаас хүрэлцэн ирж цугларан улс орон, аймаг, бүс нутгаа хөгжүүлэх зорилгын төлөө ухаан бодлоо уралдуулан зөвшилцөж буй Та бүхэнд талархал илэрхийлэхийн сацуу зөвлөлгөөнөөс гарах шийдвэр, хүрэх үр дүнгийн төлөө нэн хариуцлагатай хандахыг хүсье.

    Монгол Улсын Засгийн газар улс орон, бүс нутгаа хөгжүүлэх цогцолбор зорилт дэвшүүлэн хэрэгжүүлэхийн төлөө ажиллаж байгаа энэ үед та бүхэн хуран чуулж буй нь сайн хэрэг юм. Та бүхэн орон нутагтаа төмөр зам тавих, авто зам барих, нэмүү өртөг шингэсэн бүтээгдэхүүн үйлдвэрлэх, улмаар ажлын байр бий болгох зорилтын талаар хэлэлцэж байгаа нь тулгамдсан асуудлыг шийдвэрлэх оновчтой алхам болж байна хэмээн үзэж байна.

    Мөн түүх намтраар арвин үзэсгэлэнт Сүхбаатар нутагтаа аялал жуулчлалыг хөгжүүлэх боломж байгааг анхааран судлан үзэж, боломж, бааз суурь, туршлага дадлагадаа түшиглэн үр ашиг, ач холбогдлыг нь харгалзан шинэ бодлого боловсруулан хэрэгжүүлэх зорилт тавин ажиллах хэрэгтэй. Энэ бол нэг томоохон хөшүүрэг байх болно. Зүүн бүсийн хилээр хөрш орнуудтай Консулын харилцаа хөгжүүлэх бодлого баримтлан холбогдох яаманд үүрэг чиглэл өгөгдсөн.

    Тиймээс энэ үүргийг ажил хэрэг болгох талаар ГХЯ, холбогдох албан тушаалтнууд шуурхай арга хэмжээ авч ойрын хугацаанд шийдвэрлэх хэрэгтэй. Мөн энэ чиглэлд авто зам барих хөтөлбөр, төсөл боловсруулж байгаа бөгөөд анхааран ажиллах шаардлагатай байна. Засгийн газар ч, Ерөнхий сайд миний хувьд ч дэмжлэг үзүүлэх болно. Танай энэ чуулган бусад аймаг, бүс нутгийн хөгжлийн чиглэлийг тодорхойлоход жишиг болохуйц арга хэмжээ болно гэдэгт итгэж байна. Бидний хамтын зүтгэл үр дүнгээ өгөх нь эргэлзээгүй хэмээн хэллээ гэж Засгийн газрын Хэвлэл, мэдээллийн албанаас мэдээлэв.

  • Ерөнхий сайдад Эбертийн сангийн Ерөнхийлөгч бараалхав

    Ерөнхий сайдад Эбертийн сангийн Ерөнхийлөгч бараалхав Монгол Улсын Ерөнхий сайд С.Батболдод ХБНГУ-ын Фрийдрих Эбертийн сангийн Ерөнхийлөгч, хатагтай А.Фукс 2010 оны 4 дүгээр сарын 30-ны өдөр бараалхав. Ерөнхий сайд манай улсад Фрийдрих Эбертийн сангийн Ерөнхийлөгч анх удаа айлчилж буйд талархал илэрхийлэн тавтай зочлохыг ерөөв. С.Батболд Герман Улс нь Монгол Улсын Европ дахь гол түнш бөгөөд хоёр улсын хооронд иж бүрэн түншлэлийн харилцаа амжилттай хөгжиж байна. Ялангуяа Монгол Улсад өрнөсөн ардчилсан өөрчлөлт, зах зээлийн эдийн засгийн харилцаанд шилжих шилжилтийг Герман Улс эхнээс нь тууштай дэмжиж тусалсанд Монголын төр, засаг, ард түмэн талархаж байдаг юм.

    Фрийдрих Эбертийн сангаас Монгол Улсад ардчилсан нийгмийг төлөвшүүлэх, чөлөөт хэвлэл, үйлдвэрчний эвлэлийн тогтолцоог шинэчлэх, иргэдийн улс төрийн боловсролыг дээшлүүлэх зэрэг чиглэлд үнэтэй хувь нэмэр оруулсан бөгөөд одоо ч оруулсаар байгаа билээ. Танай сангаас Монгол Улсад явуулж буй үйл ажиллагааг манай холбогдох байгууллагууд цаашид дэмжин бүх талаар хамтран ажиллахад бэлэн байна. Манай улс сүүлийн 20 жилд хөгжлийн амаргүй замыг туулсаар одоо эгзэгтэй, хариуцлагатай шинэ хөгжлийн гараан дээр ирээд байна. Бидний 20 жилийн хугацаанд олсон ололт, амжилт бол монголчууд бидний өөрсдийн маань чармайлт хүчин зүтгэлийн үр дүн юм.

    Гэвч алдаа байсан. Хөгжлийн бодлогоо зөв тодорхойлж чадаагүйгээс гарсан гажуудал бас байгаа. Ажилгүйдэл, ядуурал буурахгүй байна. Нийгэмд баялгийн зөв шударга хуваарилалтын хүлээлт, хүсэмж, нийгмийн шударга ёсны хүсэмжлэл байсаар байна. Иргэний нийгмээ дэмжих, нийгмийн харилцааг нээлттэй боловсронгүй болгох шаардлага тулгарч байна. Бидэнд боломж их бий. Энэ боломжоо ашиглан зөв бодлого тодорхойлон хэрэгжүүлбэл амжилтад хүрнэ хэмээн хэллээ.

    Фрийдрих Эбертийн сангийн Ерөнхийлөгч сангийнхаа талаар танилцуулаад цаашдын хамтын ажиллагааны талаар саналаа хэллээ гэж Засгийн газрын Хэвлэл мэдээллийн албанаас мэдээлэв.

  • Монгол орны хөгжлийн төлөө лондонд чуулна

    Монгол орны хөгжлийн төлөө лондонд чуулнаХилийн чанадад амьдарч байгаа Монгол Улсын иргэд, хуулийн этгээдийн эрх ашгийг хамгаалах, хамтран ажиллах зөвлөл, Их Британи  дахь Монгол Улсын Элчин сайдын яам, Британийн Монголчуудын холбоо нар хамтран “Монгол орны хөгжилд” сэдэвт чуулга уулзалтыг 2010 оны тавдугаар сарын 2-ны ням гаригт Лондон хотноо зохион байгуулна. Монгол Улсын Ерөнхий сайд С.Батболд Мэдээлэл, шуудан, харилцаа холбоо технологийн салбарынхантай уулзахдаа “Хүнээ хөгжүүлж байж улс орон хөгжинө” гэж онцлон хэлсэн үгнээс улбаалан энэ удаагийн чуулга уулзалтын зорилгоо тодорхойлжээ.

    Чуулганд анагаах ухаан, байгалийн ухаан, математик загварчлал, нийгмийн ухаан болон бусад чиглэлээр дэлхийн өндөр хөгжилтэй улс орнуудад ажиллаж, сурч байгаа Монгол Улсын иргэд илтгэл тавьж Монгол Улсын хөгжилд оюуны хувь нэмэр оруулах талаар Англи, Герман болон бусад орноос манай иргэд цахим хэлбэрээр чуулганд оролцон хэлэлцүүлэг хийхээр төлөвлөж байна. Энэхүү чуулга уулзалт нь хоёр улсын хооронд онлайн хэлбэрээр анх удаа зохион байгуулагдаж байгаагаараа онцлог бөгөөд Засгийн газрын Хэрэг эрхлэх газрын Нутгийн удирдлагын танхимаас шууд холбогдож тус Зөвлөлийн ажлын албаны дарга Ч.Энх-Эрдэнэ мэндчилгээ дэвшүүлж гадаадад амьдарч байгаа иргэдийнхээ эрх ашгийг хамгаалах, хамтран ажиллах асуудлаарх төр засгийн авч хэрэгжүүлж буй бодлого, цаашдын хандлагын талаар санал солилцоно гэж  Засгийн газрын Хэвлэл мэдээллийн албанаас мэдээллээ.

  • Төсвийн тухай хуулийн төслийг өргөн барив

    Төсвийн тухай хуулийн төслийг өргөн барив

    Монгол Улсын 2010 оны Төсвийн тухай хуульд өөрчлөлт оруулах тухай, Нийгмийн даатгалын сангийн 2010 оны төсвийн тухай хуульд нэмэлт, өөрчлөлт оруулах тухай, “Хүний хөгжил сан”-гийн 2010 оны төсвийн тухай хуульд өөрчлөлт оруулах тухай хуулийн төслийг Монгол Улсын Ерөнхий сайд С.Батболд 2010 оны 4 дүгээр сарын 29-ний өдөр Улсын Их Хурлын дарга Д.Дэмбэрэлд өргөн барив. Монгол Улсын 2010 оны төсвийн тодотголын өөрчлөлтүүдийг тусгахад нэгдсэн төсвийн нийт орлого 364.2 тэрбум төгрөгөөр нэмэгдэж 2,791.0 тэрбум төгрөг, нийт зарлага 465.9 тэрбум төгрөгөөр нэмэгдэж нэгдсэн нийт 3,251.3 тэрбум төгрөг болж, төсвийн тэнцэл 101.7 тэрбум төгрөгөөр муудаж, нэгдсэн төсвийн нийт алдагдал 460.3 тэрбум төгрөгт хүрч ДНБ-ний 6.4 хувь болохоор байна.

    ОУВС-тай тохирсон “Стэнд-бай” хөтөлбөрийн дагуу нэгдсэн төсвийн нийт алдагдал ДНБ-ний 5.0 хувиас хэтрэхгүй байх ёстой. Хөтөлбөрийн хүрээнд байгуулсан Харилцан ойлголцлын санамж бичигт УИХ-аас баталсан банкны бүтцийн өөрчлөлттэй холбоотой Засгийн газрын бондын үндсэн зардал /Зоос, Төрийн банкны 100.0 тэрбум төгрөгийн Засгийн газрын бонд/ нь төсвийн зардалд тооцогдохгүй гэж үзсэн.Иймд ОУВС-тай хамтран хэрэгжүүлж буй хөтөлбөрийн шалгуур үзүүлэлт нэгдсэн төсвийн алдагдалд хүлээсэн үүргийг төсвийн тодотголын үзүүлэлт хангаж байгаа болно.

    Хэрэв энэ шалгуур үзүүлэлт хангагдахгүй тохиолдолд төсвийн алдагдлыг санхүүжүүлэх зорилгоор хөтөлбөрийн хүрээнд орж ирэх 56.7 тэрбум төгрөгийн эх үүсвэр дутагдах эрсдэлтэй байна. Хуулийн төслийг Улсын Их Хурал ирэх 7 хоногт хэлэлцэж эхэлнэ гэж Засгийн газрын Хэвлэл, мэдээллийн албанаас мэдээллээ. 

    ОРЛОГЫН ТАЛААР :

    •    Зэсийн үнийн өсөлтөөс нэмэгдэх орлого. Монгол Улсын 2010 оны төсвийн тухай хуульд  зэсийн үнийг 5800 ам.доллар байхаар тооцсоныг нэмэгдүүлэн 7500 ам.доллараар тооцсоноор нэгдсэн төсвийн орлого нийт дүнгээрээ 209.3 тэрбум төгрөгөөр нэмэгдэхээр байна. 

    •    Алтны үнийн өсөлтөөс нэмэгдэх орлого. Алтны үнийг 2010 оны төсөвт 900.0 ам.доллараар тусгасныг 200.0 ам доллараар нэмэгдүүлэн 1100.0 ам.доллараар тооцсоноор нэгдсэн төсвийн орлого нийт дүнгээрээ 25.2 тэрбум төгрөгөөр  нэмэгдэхээр байна. 

    •    Оюу толгой ордын хөрөнгө оруулалтаас нэмэгдэх орлого.  Оюу Толгойн Хөрөнгө оруулалтын гэрээ хүчин төгөлдөр үйлчилж эхэлсэнтэй холбогдуулан Хөрөнгө оруулагчийн зүгээс төсөлд зарцуулахаар төлөвлөсөн хөрөнгө оруулалт нэмэгдэж байгаатай холбогдуулан 2010 онд улсын төсөвт төвлөрөх орлогыг 50.3 тэрбум төгрөгөөр нэмэгдүүлэн тооцлоо.

    •    Татварын урьд оны өр, авлагыг барагдуулснаар нэмэгдэх төсвийн орлого Татварын тайлангаар гарсан 2010 оны эхний үлдэгдэл буюу өмнөх оны татварын өр 109.0 тэрбум төгрөг байгаагаас 52.4 тэрбум төгрөг нь “Алтан дорнод Монгол” ХХК-ийн зарим бүтээгдэхүүний үнийн өсөлтийн албан татварын өр, 4.6 тэрбум төгрөг нь тус компаний хугацаандаа төлөөгүй татварын өрөнд тооцсон хүүгийн өр  байна.
    Иймд өмнөх оны дутуу төлөлтөөс 52.0 тэрбум төгрөгийн татварын өрийг 2010 оны төсөвт нэмж төвлөрүүлэхээр тооцлоо.   

    Бусад орлого.
    •    Эрдэнэт үйлдвэрийн 2009 оны жилийн эцсийн санхүүгийн тайлангаар татвар төлсний дараах цэвэр ашиг 119.9 тэрбум төгрөг, үүнээс Монголын талд ногдох ногдол ашиг 1.0 тэрбум төгрөг, бусад аж ахуйн нэгжийн төвлөрүүлэх орлого 3.9 тэрбум төгрөгөөр тус тус нэмэгдэхээр буюу нийт ногдол ашгийн орлого 4.9 тэрбум төгрөгөөр нэмэгдэх боломжтой байна.
    •    Эрчим хүчний зохицуулах газрын Зохицуулагчдын зөвлөлийн хурлаас 2010 оны 1 дүгээр сарын 15-ны өдрөөс цахилгааны үнийг дунджаар 17.35 хувь, дулааны үнийг дунджаар 14.5 хувь нэмэгдүүлэхээр шийдвэрлэн мөрдөж эхэлсэн нь дулаан, цахилгааны борлуулалтын орлогыг нэмэгдүүлж улмаар 2010 онд эрчим хүчний компаниудаас улсын төсөвт төвлөрүүлэх нэмэгдсэн өртгийн албан татварын орлогыг төлөвлөсөн хэмжээнээс 4.0 тэрбум төгрөгөөр нэмэгдэхээр байна.
    •    Согтууруулах ундаа үйлдвэрлэгч аж ахуйн нэгжүүдийн 2010 оны 1 дүгээр улиралын байдлаар өмнөх оны мөн үеийнхээс үйлдвэрлэлт 28.0 хувь, татварын төлөлтийн байдал 37.7 хувиар тус тус нэмэгдсэн  үзүүлэлтэй байна. Иймд аж ахуйн нэгжүүдийн үйлдвэрлэлт, борлуулалт нэмэгдсэнтэй холбогдуулан архи, спиртийн онцгой албан татварын орлогыг 6.8 тэрбум төгрөгөөр, дотоодын пивоны онцгой албан татварын орлогыг 1.3 тэрбум төгрөгөөр тус тус нэмэгдүүлэн тооцлоо.
    •    2010 онд олборлох газрын тосны хэмжээ 175.5 мянган баррелиар нэмэгдэж улсын төсөвт газрын тосны орлогоор  3.2 тэрбум төгрөг нэмж төвлөрөхөөр байна. 
    •    Төрийн сангийн мөнгөн хөрөнгийн хүүгийн орлогыг 2010 онд 1.5 тэрбум төгрөгт байхаар төлөвлөсөн бөгөөд Монголбанкинд байршиж байгаа Төрийн сангийн нэгдсэн дансны үлдэгдэлд хүү авахаар тооцоолж байгаатай холбогдуулан хүүгийн орлогыг 3.3 тэрбум төгрөгөөр нэмэгдүүлэхээр тооцлоо.
    •    Орлогын албан татварын 1 дүгээр улирлын гүйцэтгэл, эдийн засгийн сэргэлт зэргийг харгалзан төсөвт төвлөрүүлэх аж ахуйн нэгжийн орлогын албан татварыг 11.6 тэрбум төгрөгөөр нэмэгдүүлэн тусгалаа.
    •    Өмнөговь аймгийн 2010 оны төсвийн төлөвлөгөөнд орон нутгийн төсөвт төвлөрөх ногдол ашгийн орлогыг 6.5 тэрбум төгрөгөөр тусгасан. Орон нутгийн өмчит “Таван толгой” ХК-ий 2008 оны татвар төлсний дараах цэвэр ашиг 16.1 тэрбум төгрөг байсан тул 2009 оны хүлээгдэж буй гүйцэтгэлийг өмнөх оны түвшинд байхаар тооцож орон нутагт ногдох ногдол ашгийг 6.1 тэрбум төгрөг байна гэж тооцсон. Гэтэл “Таван толгой” ХК-ий 2009 оны жилийн эцсийн орлого үр дүнгийн тайлангаар татвар төлсний дараах цэвэр ашиг 42.8 тэрбум төгрөг, үүнээс орон нутагт ногдох хэсэг нь 20.2 тэрбум төгрөг болсонтой холбогдуулан Өмнөговь аймгийн орон нутгийн ногдол ашгийг 13.6 тэрбум төгрөгөөр нэмэгдүүлэхээр тусгалаа.
    •    Мөн нэмэгдсэн өртгийн албан татварын буцаан олголтын эх үүсвэрийг 31.4 тэрбум төгрөгөөр нэмэгдүүлэхээр тооцсон.

    ЗАРЛАГЫН ТАЛААР :

    А.Урсгал зарлага
    1.    Засгийн газрын мөрийн хөтөлбөрийг хэрэгжүүлэх үүднээс төрийн албан хаагчдын цалин, нийгмийн даатгалын болон халамжийн сангаас олгож байгаа бүх төрлийн тэтгэврийг 2010 оны 10 дугаар сарын 1-нээс 30 хувиар нэмэгдүүлэхээр тооцож нийт 78.2 тэрбум төгрөг;

    2.    Байгаль, цаг уурын болзошгүй зардал болон цаг үеийн зайлшгүй шаардлагатай асуудлыг шийдвэрлэхэд зориулан Засгийн газрын нөөц санг 20.0 тэрбум төгрөг;

    3.    Эрчим хүч, халаалтын үнийн өөрчлөлтөд 20.9 тэрбум төгрөг;

    4.    Боловсролын салбарын  нэг сурагчид ногдох хувьсах зардлын нормативыг нэмэгдүүлэхэд зориулж 7.4 тэрбум төгрөг;

    5.    Олон хүүхэд төрүүлэн өсгөж байгаа “Алдарт эх” одонтой  эхчүүдэд олгох тэтгэмжийг  нэг дахин нэмэгдүүлэхээр тооцож 2010 оны төсвийн тодотголд 8.5 тэрбум төгрөг тусгав. Энэ нь иргэнд олгох хишиг, хувиас гадна  төрөөс олон хүүхэдтэй эхчүүдэд үзүүлж буй дэмжлэг болно. 

    6.    Төсвийн байгууллагын удирдлага, санхүүжилтийн тухай хуулийн дагуу 2009 оны жилийн эцсийн гүйцэтгэлээр төсвийн хэмнэлт, давсан орлогоос төсөвт байгууллагуудад олгох хөрөнгөд зориулж 2.5 тэрбум төгрөг,

    7.    Хүүхдэд олгох мөнгөн тэтгэмж, Шинэ гэр бүлд мөнгөн тэтгэмж, Шинэ төрсөн хүүхдэд олгох мөнгөн тэтгэмжийн 2009 онд үүссэн өглөгт 1.4 тэрбум төгрөг;

    8.    Төрийн өндөр албан тушаалтнуудын гадаад оронд хийх төрийн албан ёсны болон албан ажлын айлчлалын зардал хүрэлцэхгүй байгаатай холбоотойгоор энэ зориулалтаар төсөвт тусгагдсан хөрөнгөөс давсан зардлыг Засгийн газрын нөөц сангаас санхүүжүүлж байгааг цаашдаа  зогсоох үүднээс Гадаад харилцааны яамнаас ирүүлсэн саналыг үндэслэн Монгол Улсын Ерөнхийлөгч, Улсын Их Хурлын дарга, Монгол Улсын Ерөнхий сайдын гадаад арга хэмжээний зардалд 2.4 тэрбум төгрөгийг нэмж  тусгасан.

    9.    Мөн Улсын Их Хурал, Засгийн газраас 2010 оны төсвийн тодотголд тусгахаар шийдвэрлэсэн болон шинээр байгуулагдсан байгууллагын зайлшгүй шаардлагатай  урсгал зардлыг нэмж тусгалаа. Тухайлбал, ХХААХҮС-ийн төсвийн багц дахь Хөдөө аж ахуйн төвлөрсөн арга хэмжээний “Монгол мал” хөтөлбөрийн зардалд зориулж 3.8 тэрбум төгрөг, Шүүхийн шийдвэрийн дагуу хохирогчдод олгох нөхөн олговорт зориулж ХЗДХ-ийн сайдын багцад 5.0 тэрбум төгрөг, Эрүүл мэндийн салбарын урсгал зардлыг нэмэгдүүлэхэд зориулж 3.1 тэрбум төгрөгийг тус тус нэмж тооцлоо.

    Б.Хөрөнгө оруулалт   
    Монгол Улсын 2010 оны төсвийн тухай хуулиар улсын төсвийн хөрөнгө оруулалтаар нийтдээ 447.7 тэрбум төгрөгийн төсөл, арга хэмжээг хэрэгжүүлэхээр УИХ-аас баталсан.
    Улсын төсвийн хөрөнгөөр 2010 онд хэрэгжүүлэх хөрөнгө оруулалтын төсөл, арга хэмжээний тодотгосон төлөвлөгөөг 587.4 тэрбум төгрөг байхаар тусгаж байгаа нь УИХ-аар батлагдсан 2010 оны төсвийн хөрөнгө оруулалтын төлөвлөгөөнөөс 139.7 тэрбум төгрөгөөр нэмэгдэж байна.
    Дараах өөрчлөлтүүд тусгагдлаа. Үүнд:

    1.    Монгол Улсын 2010 оны төсвийн тухай хуулийн 2-р хавсралтад “Бүс, орон нутгийн хөгжлийг дэмжих” чиглэлээр батлагдсан нийт 73.1 тэрбум төгрөгний арга хэмжээнээс 66.9 тэрбум төгрөгний төсөл, арга хэмжээг хуулийн 1-р хавсралт руу шилжүүлэн холбогдох төсвийн ерөнхийлөн захирагчдын багцад тусгаж, үлдэх 6.2 тэрбум төгрөгийн төсөл, арга хэмжээг орон нутгийн хөрөнгө оруулалтын зардлаас санхүүжүүлэхээр шилжүүлэх;

    2.    Хуулийн 3 дугаар хавсралтад “Өөрийн хөрөнгөөр гүйцэтгэн дараа төлөгдөх нөхцлөөр хэрэгжүүлэх хөрөнгө оруулалтын төсөл, арга хэмжээ”-ний жагсаалтад батлагдсан нийт 82.6 тэрбум төгрөгийн санхүүжих дүн бүхий төсөл, арга хэмжээг хуулийн 1-р хавсралт руу шилжүүлэн холбогдох төсвийн ерөнхийлөн захирагчдын багцад тусгаж, санхүүжилтийн эх үүсвэрийг 2010 оны төсвийн тухай хуулийн төсөлд тусгагдсан байсан дүнгээр тодорхойлох;

    3.    Барилгын ажил нь дууссан боловч техникийн болон улсын комиссын акт нь хүлээгдсэн, тендер нь оройтсон, зураг төсөвт өөрчлөлт орсон, газрын асуудалд маргаан гарсан зэргээс барилгын ажил хойшилж, 2009 онд төсөвлөгдсөн хөрөнгөө бүрэн ашиглаж чадаагүй он дамжин санхүүжигдэх болж байгаа болон гэрээт ажлыг хугацаанд нь гүйцэтгүүлэхэд шаардагдах хөрөнгийн эх үүсвэргүй болсон зарим төсөл, арга хэмжээнд нийт 27.8 тэрбум төгрөгийг нэмж тусгах;

    4.    Улсын Их Хурал, Засгийн газрын тогтоол шийдвэр болон Мэргэжлийн хяналтын ерөнхий газраас тавьсан актын дагуу зарим барилгыг шинээр барих шаардлага бий болсон, түүнчлэн, ахмад дайчдыг бүрэн орон сууцжуулах, гэнэтийн хүчин зүйлийн нөлөөллөөс үүссэн зарим төсөл, арга хэмжээг санхүүжүүлэхэд шаардлагатай  нийт 42.0 тэрбум төгрөгийг нэмж тусгах; 

    5.    Хуулийн 1 дүгээр хавсралтаар батлагдсан төсвийн ерөнхийлөн захирагчдын хуулиар тодорхойлогдсон чиг үүрэгт үл нийцэх нийт 1.0 тэрбум төгрөгний  төсөл, арга хэмжээг тухайн асуудлыг эрхэлсэн төсвийн ерөнхийлөн захирагчдын багцад шилжүүлэн тусгахаар тооцлоо.

  • “Бизнесийн орчны шинэтгэлийн жил”-ийн ажлыг эрчимжүүлэх үүрэг өглөө

    “Бизнесийн орчны шинэтгэлийн жил”-ийн ажлыг эрчимжүүлэх үүрэг өглөө Монгол Улсын Ерөнхий сайд С.Батболд 2010 оны 04 сарын 27-нд Төрийн ордонд  болсон “Бизнесийн орчны шинэтгэлийн жил”-ийн ажлыг зохион байгуулах Зөвлөлийн хоёрдугаар хуралдаанд оролцож, үйл ажиллагааны төлөвлөгөөний хэрэгжилтийн явцын талаар мэдээлэл сонслоо. Хуралд Засгийн газрын гишүүд, яамдын Төрийн нарийн бичгийн дарга болон холбогдох агентлагийн дарга нар оролцож, Ерөнхий сайдын үүрэг болгосны дагуу өөр өөрсдийн салбарт авч хэрэгжүүлсэн арга хэмжээ, үйл ажиллагааны талаар мэдээлэл хийв.

    “Бизнесийн орчны шинэтгэлийн жил”-ийн төлөвлөгөөнд нийт 131 зорилт, арга хэмжээ тусгаснаас бизнес эрхлэх орчныг сайжруулах 105 арга хэмжээ бизнесийн орчны макротүвшний тогтвортой байдлыг хангах, дэд бүтцийг хөгжүүлэхэд чиглэсэн 26 арга хэмжээ багтсан. Эдгээрийг хариуцаж хэрэгжүүлэхээр  төрийн 22 яам, агентлаг, төрийн бус зургаан байгууллага, мэргэжлийн холбоод ажиллаж байна. 2010 оны нэг болоод хоёрдугаар улиралд хэрэгжүүлэхээр тусгагдсан ажлууд хэрэгжих шатандаа явааг Зөвлөлийн гишүүд мэдээлэлдээ онцолж байв.

    Монгол Улсын Ерөнхий сайд, “Бизнесийн орчны шинэтгэлийн жил”-ийн ажлыг зохион байгуулах Зөвлөлийн дарга С.Батболд хурлыг хааж хэлэхдээ “Ерөнхий уулзалт боллоо. Ийм том хэмжээний хурал хийх гэж хүлээмээргүй байна. Бизнесийн орчныг тааламжтай болгох, уул уурхай, хөдөө аж ахуй, мэргэжлийн хяналт, гааль гэхчлэн тодорхой аль нэг салбар, тухайн салбарын холбогдох хүмүүс цуглаад энэ онд хийж хэрэгжүүлэхээр төлөвлөсөн асуудлуудаар долоо хоног бүр бодлогоо ярилцдаг байя. Ийм ажлыг тогтмолжуулж ямар сэдвээр уулзалт хийх гэж байгаа болон уулзалт, хурлаас ямар санаа оноо, шийд гарав гэдгийг Зөвлөлийн даргад танилцуулдаг болъё” гэсэн үүрэг өглөө гэж Засгийн газрын Хэвлэл мэдээллийн албанаас мэдээллээ.