Blog

2010-2012 онд Монгол Улсын иргэн бүрт 1,5 сая төгрөгийг тэтгэврийн болон эрүүл мэндийн даатгалын шимтгэл төлөх, боловсрол, эрүүл мэнд, орон сууцны эрхийн бичиг олгох, бэлэн мөнгө өгөх гэсэн хэлбэрээр олгохоор Засгийн газрын хуралдаанаас шийдвэрлэв. 1 сая төгрөгийг тэтгэврийн болон эрүүл мэндийн даатгалын шимтгэл, эрүүл мэнд, боловсролын үйлчилгээ, орон сууц худалдаж авсны төлбөр хэлбэрээр олгож 500.000 /таван зуун мянга/ төгрөгийг 2011, 2012 онд үе шаттайгаар бэлнээр өгөх боллоо.

Монгол Улсын иргэн бүрт 1,5 сая төгрөг олгох хэлбэр

1.Тэтгэврийн болон эрүүл мэндийн шимтгэлийн төлбөрт :
 
Тэтгэврийн даатгалд хамрагдаагүй малчид, хувиараа хөдөлмөр эрхлэгч, ажилгүй иргэд хамрагдах боломжтой. 2006 онд Иргэний эрүүл мэндийн даатгалын тухай хууль батлагдсанаар нийт хүн ам заавал даатгалын тогтолцоонд шилжсэн ч  даатгалд хамрагдаагүй иргэд байсаар байна. Иймээс хуулийн хүрээнд даатгалд хамрагдаж чадаагүй дээрх иргэдийн шимтгэлийн 4 жилийн төлбөрийг нөхөн төлж, иргэдийн эрүүл мэндийн үзлэг, шинжилгээ болон даатгалын сангаас тусламж, үйлчилгээ хүртэх эрхийг нээж өгч байна.

2. Эрүүл мэндийн үйлчилгээнд :

Энэ хүрээнд иргэд нэг удаа иж бүрэн, нарийн мэргэжлийн цогц үзлэг, оношлогоо, эмчилгээнд ороход тодорхой хэмжээний төгрөгийн эрхийн бичиг олгох, халдварт өвчнөөс урьдчилан сэргийлэх вакцинжуулалтад хамруулахаар боллоо. 

3. Болосвролын үйлчилгээнд :

Иргэд болон суралцагсдад эрхийн бичиг олгож улмаар төрийн өмчийн их, дээд сургуульд суралцаж байгаа оюутны сургалтын төлбөр, ерөнхий боловсролын сургуулийн 1-12 дугаар ангийн суралцагсдад сурах бичиг, хичээлийн хэрэгсэл, дүрэмт хувцас үнэ төлбөргүй авах эрхийн бичиг олгоно. Мэргэжлийн ур чадвараар тэнцээгүй эсвэл мэргэжил нь зах зээлд хэрэгцээгүй болсон ажилгүй иргэдэд Мэргэжлийн сургалт, үйлдвэрлэлийн төвд ур чадвар олгох сургалтад оролцох эрхийн бичгийг олгосноор шинэ мэргэжил эзэмшиж, ажлын байртай болох нөхцөл, бололцоо үүсч ажилгүйдэл багасахад түлхэц болно. 

4. Орон сууц худалдаж авсны төлбөрт :

Эрхийн бичгийг орон сууц худалдаж авах урьдчилгаа, зээл болон зээлийн хүүнд тооцож олгоно. Энэ нь иргэдийг орон сууцаар хангах Засгийн газрын бодлоготой нийцэж байгаа бөгөөд “100.000 айлын орон сууц” хөтөлбөртэй уялдуулан хэрэгжүүлнэ. 

5. Бэлэн мөнгө :

“Хүний хөгжил сангийн тухай хууль”-д хишиг, хувийг бэлнээр олгохоор заасны дагуу иргэн бүрт эхний ээлжинд 70,0 мянган төгрөгийг 2010 оны 2 дугаар сараас олгож эхэлсэн бөгөөд иргэний шинэчилсэн бүртгэлд хамруулсны дараа 50,0 мянган төгрөг олгохоор ажиллаж байна. Монгол Улсын иргэн нь “Хүний хөгжил сангийн хууль”-д заасан нөхцөл, журмаар хишиг, хувь хүртэх хэлбэрийг сонгоно. Энэ нь тэдний ирээдүйн нийгмийн баталгааг хангах томоохон ач холбогдолтой. 

2010 оны 4 дүгээр сарын 15-наас эхлэн иргэн бүрт хишиг, хувь олгохдоо захиалгын хуудас тарааж саналыг нь нэг бүрчлэн авах, хишиг, хувь олгох хэлбэр бүрээр шаардагдах хөрөнгийн тооцоог гарган 2010 оны 7 дугаар сарын 1-ний дотор Засгийн газарт танилцуулахыг холбогдох сайд нарт даалгав. 

ТАВАНТОЛГОЙН НҮҮРСНИЙ ОРДЫГ АШИГЛАХ ТАЛААР ХЭЛЭЛЦЭВ

Монгол Улсын Засгийн газрын ээлжит бус 20 дахь хуралдаан 2010 оны 4 дүгээр сар 2-ны өдөр болж Тавантолгойн нүүрсний ордыг ашиглах тухай хэлэлцэв. Нүүрсний ордыг ашиглах хөрөнгө оруулагчтай хэлэлцээ хийх, гэрээний төсөл боловсруулах ажлын хэсгийг шинэчлэн байгууллаа. Ажлын хэсгийг Эрдэс баялаг, эрчим хүчний сайд ахлах бөгөөд Сангийн сайд, Байгаль орчин, аялал жуулчлалын сайд орлогчоор нь ажиллах юм. Ажлын хэсгийн бүрэлдэхүүнд яамдын газрын дарга болон бусад албан тушаалтан оржээ. 

ТАВАНТОЛГОЙН ОРДЫН ТАЛААР

Тавантолгойн ордыг ашиглах нь ордын нөөц, нүүрсний олборлолт, нүүрс баяжуулах, угаах үйлдвэр байгуулах, тээвэрлэлт буюу төмөр зам, авто зам, эрчим хүч, усны хангамжийг шинээр бий болгох, бүтээгдэхүүн борлуулах, хилийн боомтын чадавхийг нэмэгдүүлэх болон хөрш орнуудын далайн боомтыг ашиглах, нэмүү өртөг шингэсэн бүтээгдэхүүн үйлдвэрлэх зэрэг олон асуудлыг шийдвэрлэж, шинэ боломж бий болгох юм. 

Тавантолгойн нүүрсний орд манай улсын хувьд хамгийн сайн судлагдсан ордын нэг бөгөөд урьдчилсан техник, эдийн засгийн үндэслэлийг хэд хэдэн удаа хийлгэсэн байна. Нүүрсний нөөцийн ордыг олон улсад түгээмэл хэрэглэдэг ангилалд шилжүүлж тооцвол нүүрсний нөөц нэмэгдэх боломжтой. Ордоос жилд 15-30 сая тонн нүүрс олборлох боломжтой ч энэ нь төмөр замын тээвэрлэлт, усны хангамжаас шалтгаална. 

Канад Улсын техникийн зөвлөх “Норвест” компани нь ордын уул, геологийн нөхцөл нь сайн судлагдаж, нөөц нь тогтоогдсон Цанхийн хэсгийн талбайг ойролцоо хэмжээний нүүрсний нөөц бүхий бие даасан хоёр хэсэгт хувааж ашиглах боломжтой. Бусад талбайд тусгай зөвшөөрөл эзэмшигч нөөц нэмэгдүүлэх  хайгуулын ажлыг үргэлжлүүлэн хийх нь зүйтэй гэж зөвлөжээ. 

Эрчим хүчний хангамжийг бүтээн байгуулалтын эхний үед болон олборлолтын үндсэн шатанд хэрхэн хангах, шинээр байгуулах цахилгаан станцын хүчин чадал, хөрөнгө оруулалтын нөхцөл, санхүүжилтын талаар хэлэлцээнд оролцогч компаниудтай дэлгэрэнгүй ярилцах боллоо. Тавантолгойн ордын усны хангамжийг одоо тогтоогдоод байгаа газрын гүний эх үүсвэрээс төслийн дунд үе шат хүртэл хангах, түүнээс цааш шинэ эх үүсвэр ашиглахын тулд нэмэлт хайгуул судалгааг төсөлтэй зэрэг эхлэхээр төлөвлөжээ. 

Тавантолгойн ордыг түшиглэж нэмүү өртөг шингэсэн бүтээгдэхүүний үйлдвэрлэлийг хөгжүүлэх нь манай улсын зорилго бөгөөд нүүрс угаах үйлдвэр байгуулж, хүчин чадлыг нь үе шаттайгаар өргөтгөх, коксын үйлдвэрийг гадны хөрөнгө оруулагчтай хамтран барихыг чухалчилж байна. Ажлын хэсэг, “Эрдэнэс МГЛ” компани хамтран нүүрсний ордын геологийн судалгаа, орд газрын уул, техникийн нөхцөл, нүүрсний нөөц, дэд бүтэц, урьдчилсан техник, эдийн засгийн үнэлгээ, холбогдох бусад мэдээллийг мэдээллийн нэгдсэн санд байршуулжээ. 

Геологи, уул уурхайн салбарын эрдэмтэн, судлаачид, орон нутгийн төлөөллийг оролцуулсан нээлттэй хэлэлцүүлгийг Улаанбаатар, Даланзадгад хотод зохион байгуулж, нүүрсний ордыг хэрхэн ашиглах талаар эрдэмтэн, судлаачдын санал, зөвлөмжийг аваад байна гэж Засгийн газрын Хэвлэл, мэдээллийн албанаас мэдээллээ.

Монгол Улсын Ерөнхий сайд С.Батболд 2010 оны 3 дугаар сарын 29-ний өдөр Дэлхийн Банкны Санхүү, хувийн хэвшлийн салбарын хөгжлийн газрын дэд ерөнхийлөгч Жанамитра Диван болон албаны бусад хүмүүсийг хүлээн авч уулзав. Ж.Диван Монгол Улс Дэлхийн банкны харилцаа, хамтын ажиллагаа хувийн хэвшлийн салбарт амжилттай хөгжиж байгаад сэтгэл хангалуун байдгаа илэрхийлээд хоёр талын харилцаа, хамтын ажиллагаа өргөжин тэлнэ гэдэгт итгэлтэй байна гэлээ.

Ерөнхий сайд Монгол Улс эдийн засгийн хямралыг хэрхэн давж байгаа үйл явц, тулгамдаж буй асуудлуудыг танилцуулаад, уул уурхайн салбарын хөрөнгө оруулалт, цас зудын гамшиг, хот тэлэлт, орон сууц, дэд бүтэц, боловсролын асуудлуудыг цогцоор нь шийдэх зорилттой байгаа бөгөөд амжилтад хүрнэ гэдэгт итгэл төгс байна гэв. Эдгээр асуудлыг шийдэхэд Монгол Улсын Дэлхийн Банк, ОУВС-тай нягт хамтын ажиллагаа чухал байгааг дурдав.

Мөн Монгол Улс хувийн хэвшлийг хөгжүүлэх талаар тодорхой арга хэмжээ авсны үр дүнд багагүй амжилтад хүрч, хувийн сектор эдийн засгийн хөдөлгөгч хүч болтлоо хөгжлөө, банкны салбарын хөгжил хувийн хэвшлийн хөгжилд чухал түлхэц үзүүлж байна, энэ салбар дахь Монгол Улс Дэлхийн банкны харилцаа, хамтын ажиллагаа сайн байгаа хэмээн дүгнэв. Ж.Диван Монголд хөрөнгийн зах зээлийг цаг алдалгүй хөгжүүлэхийн чухлыг онцлоод банк санхүүгийн салбарт Дэлхийн банк дэмжлэг туслалцаа үзүүлэхэд бэлэн байгаагаа мэдэгдэв гэж Засгийн газрын хэвлэл мэдээллийн албанаас мэдээллээ.

Монгол Улсын Ерөнхий сайд С.Батболд “Монгол дахь Солонгосын жил”-ийн нээлтийн ажиллагаанд оролцохоор хүрэлцэн ирсэн БНСУ-ын Соёл, спорт, аялал жуулчлалын дэд сайд Ким Дэ Ги тэргүүтэй төлөөлөгчдийг хүлээн авч уулзлаа. Ерөнхий сайд хоёр орны хооронд дипломат харилцаа тогтоосны 20 жилийн ой тохиож байгааг тэмдэглээд энэ нь олон зууны турш түүхэн хэлхээ холбоотой явж ирсэн монгол, солонгос үндэстний харилцаанд шинэ хуудас нээсэн үйл явдал юм гэв.

Тэрбээр хоёр улсын харилцааг бүхий л салбарт эрчимтэй жигдхэн хөгжүүлэх, юуны өмнө бүрэлдэн тогтож буй хүмүүсийн хоорондын харилцаа, өөрөөр хэлбэл ардын дипломатын харилцааг гүнзгийрүүлэх, эдийн засгийн хамтын ажиллагааг өргөжүүлэх шаардлага өсөн нэмэгдэж байна. Солонгос Улс хурдтай хөгжиж байгаа, хөгжлийн менежмент сайтай, өндөр технологитой. Монгол Улс түүхий эдийн баялаг нөөцтэй, хөгжлийн гарц сайтай орон. Эдгээр боломжуудыг харилцан ашиглаж хослуулах нь хөгжлийн амжилтад хүрэх үндэс болно. Мөн чөлөөт худалдааг хөгжүүлэх нь чухал юм. Одоогийн тогтсон харилцаандаа тулгуурлан хамтын ажиллагаагаа гүнзгийрүүлэх бүрэн боломж байгаа хэмээн үзэж байна.
    
2011 онд танай улсад “Монголын жил” болно. Энэ арга хэмжээ нь хоёр улсын хамтын ажиллагааг өргөжүүлэх сайхан боломжийг бүрдүүлнэ. “Монголын жил”-ийг зохион байгуулахад танай яамнаас дэмжлэг үзүүлэхийг хүсье.  “Монгол дахь солонгоын жил”-ийн хүрээнд төлөвлөгдсөн арга хэмжээнүүд хоёр орны ард түмний харилцан ойлголцлыг гүнзгийрүүлэхэд чухал хувь нэмэр оруулна гэдэгт найдаж байна. Хоёр орны харилцаа, хамтын ажиллагааны өндөр дээд түвшний давтамжийг хадгалах, харилцаа, хамтын ажиллагааг агуулга талаас нь анхаарах хэрэгтэй юм.

Хоёр орны соёл, урлагын салбарын хамтын ажиллагаа өргөжиж байна. Одоо биеийн тамир спортын салбарын хамтын ажиллагаагаа өргөжүүлж хоёр орны тамирчид хамтарсан бэлтгэл сургуулилалт хийх, эмч мэргэжилтнүүдээ солилцох, манай тамирчдыг сургалтад хамруулах, спортын нарийн мэргэжлийн боловсон хүчин бэлтгэх зэрэг чиглэлд хамтран ажиллах боломж байна” гээд БНСУ-ын баг тамирчид өвлийн олимпод амжилттай оролцсонд баяр хүргэв.

БНСУ-ын Соёл, спорт, аялал жуулчлалын дэд сайд “Манай хоёр орны ойр дотно байгаа харилцаа, хамтын ажиллагаа амжилттай өргөжинө гэдэгт найдаж байна. Цаашид уламжлалт харилцаагаа хадгалан гүнзгийрүүлэх учиртай. Монгол Улс үсрэнгүй хөгжих цаг ойрхон байгаа гэдэгт итгэлтэй байна. Манай талаас харилцаа, хамтын ажиллагааг өргөжүүлэн гүнзгийрүүлэхийн төлөө тодорхой саналуудыг тавих болно” гээд Ерөнхий сайдыг соёл, спортын чиглэлд анхаарал тавьж байдагт талархаж явдаг гэлээ хэмээн Засгийн газрын Хэвлэл, мэдээллийн албанаас мэдээлэв.

Монгол Улсын Ерөнхий сайд С.Батболд 2010 оны 3 дугаар сар 26-ны өдөр  БНЧУ-аас Монгол Улсад суугаа Онц бөгөөд Бүрэн эрхт Элчин сайд Вацлав Йилекийг хүлээн авч уулзлаа. В.Йилек Монгол Улсад нүүрлээд байгаа байгалийн гамшгийг хохирол багатай давахад зориулж БНЧУ-ын Засгийн газраас 4 сая кроны тусламж үзүүлэх болсныг уламжлав. Ерөнхий сайд байгалийн гамшигт олон малчин өрх өртөн амьжиргааны эх үүсвэргүй болж байгаа хүнд үед дотоод, гадаадын олон байгууллага эд материал, хөрөнгө мөнгө, сэтгэл санааны тусламж, дэмжлэг үзүүлж байгаад талархал илэрхийлэв.

2010 онд Монгол Улс БНЧУ-йн хооронд дипломат харилцаа тогтоосны 60 жилийн ой тохиох бөгөөд ойн үеэр зохиох арга хэмжээний төлөвлөгөөг БНЧУ-ын Элчин сайд танилцуулаад Монгол Улс-Европын Холбооны хооронд Хамтын ажиллагаа, түншлэлийн гэрээ байгуулах, Европын стандартыг Монголд нэвтрүүлэхэд дэмжин, туршлагаасаа хуваалцана гэв. Түүнчлэн Чехийн тал Европын бусад түнштэй хамтран Монголд Мэргэжлийн боловсролын төв байгуулан ажиллах хүсэлтэй байгаагаа илэрхийлэв.

БНЧУ-ын Элчин сайдын тавьсан саналуудыг Ерөнхий сайд С.Батболд хүлээн авснаа илэрхийлээд Монгол Улс-Европын Холбоотой Хамтын ажиллагаа, түншлэлийн гэрээ байгуулахыг БНЧУ дэмжиж байгаад талархав. Удахгүй Монгол Улсад хийх БНЧУ-ын Ерөнхий сайд Ян Фишерын айлчлал нь хоёр орны харилцааг өргөжүүлэн хөгжүүлэхэд чухал хувь нэмэр болохыг дурдаад хоёр орны цаашдын үр бүтээлтэй харилцаа, хамтын ажиллагаанд итгэлтэй байна гэв. Ерөнхий сайд мөн өдөр ХБНГУ-аас Монгол Улсад суугаа Элчин сайд Пиус Фишерийг хүлээн авч уулзлаа.

П.Фишер Монгол Улсад учирсан байгалийн давагдашгүй хүчин зүйлийг гэтлэн давахад зориулж ХБНГУ-ын Засгийн газраас 100 000 /нэг зуун мянга/ еврогийн тусламжийг Германы Дэлхийн зөн (World vision) ТББ-аар дамжуулан үзүүлэх болсныг уламжлав. Тусламжийг зуданд нэрвэгдсэн Баян-Өлгий, Говь-Алтай, Завхан, Төв аймгийн хоёр мянган өрхийг эм тариагаар хангах, эдгээр аймагт хорогдсон малын сэг зэмийг арилган халдваргүйжүүлэхэд зарцуулах юм.

Монгол Улсыг Европын Холбоотой Хамтын ажиллагаа, түншлэлийн гэрээ байгуулахад ХБНГУ дэмжиж ажиллах болно гэдгээ Элчин сайд илэрхийлэв. Тэрбээр Германы археологийн баг Монголын ШУА-ийн Археологийн хүрээлэнтэй хамтран Өвөрхангай аймгийн Хархорин суманд археологийн шинэ олдворууд илрүүлж байгааг дуулгалаа. Ерөнхий сайд ХБНГУ тусламж үзүүлсэнд болон Монгол Улсын Европын Холбоотой Хамтын ажиллагаа, түншлэлийн гэрээ байгуулахыг дэмжиж байгаад талархал илэрхийлэв гэж Засгийн газрын Хэвлэл мэдээллийн албанаас мэдээллээ

Барилгын салбарын удирдах ажилтны зөвлөгөөнд оролцож буй инженер, техникийн ажилтанууд, барилгын материал үйлдвэрлэгчид, зураг төсөлчид, үе үеийн ахмад барилгачид Та бүхэнд чин сэтгэлийн мэндчилгээ дэвшүүлж, удирдах ажилтны зөвлөгөөний үйл ажиллагаанд амжилт хүсье. 

Миний бие Та бүхэнтэй хэдхэн сарын өмнө уулзахдаа энэ салбарт баримтлах Засгийн газрын бодлого, чиглэлийн талаар байр сууриа илэрхийлсэн. Өгсөн үүрэг даалгавар ажил хэрэг болж буй гэдэгт итгэж байна. Өнөөдрийн зөвлөгөөний агуулга, тавигдах илтгэлүүд тулгамдсан асуудлуудыг хөндөж шийдвэрлэх гарцыг олоход чиглэгдэх учиртай. Учир нь манай улсын хот байгуулалт, дэд бүтцийн бодлогыг шинэчлэх, олон улсын стандартын түвшинд хүргэх, эрх зүйн тогтвортой орчин бий болгох зайлшгүй шаардлагатай.   

Монгол Улсын Засгийн газрын 2004-2008 оны үйл ажиллагааны хөтөлбөрт тусгагдсан “40 000 орон сууц” хөтөлбөрийн хүрээнд нийт 27555 айлын орон сууцыг ашиглалтад оруулсан дүн мэдээ байна. “40 000 орон сууц” хөтөлбөр нь тоо хэмжээний хувьд ийм байгаа ч, бага, дунд орлоготой иргэдийн орон сууцны хангамжийг нэмэгдүүлэх гэсэн үндсэн зорилтоо бүрэн биелүүлсэнгүй. Үүний зэрэгцээ өнгөрсөн жилүүдэд хот, хөдөөгийн ялгаа эрс нэмэгдэж, хөдөөгөөс хот руу шилжин ирэгсэд нийслэлийн хүн ам, гэр хорооллын тархалтыг улам нэмэгдүүлснээс Улаанбаатарын экологийн ачаалал хэрээс хэтэрч, агаарын бохирдол гамшгийн хэмжээнд хүрснийг бид байнга ярьдаг.

Засгийн газар бодит байдалд дүгнэлт хийж, нилээд ажлыг эхлүүллээ. Нийслэлд дэд бүтцээр хангах бололцоотой гэр хорооллыг орон сууцжуулах ажлыг эрчимжүүлэх, хуучин орон сууцны хорооллыг шинэчлэх гээд ихээхэн ажлууд хийгдэнэ. Мөн Улсын болон хувийн их, дээд сургуулиудын “Оюутны хотхон”-ыг олон улсын жишиг стандартын дагуу барьж байгуулахыг судлах ажлын хэсгийг байгууллаа. Энэ талаар та бүхэн байр сууриа илэрхийлэх хэрэгтэй.  

Өнөөдөр Монгол Улсын нийт хүн амын 20 орчим хувь нь инженерийн хангамж бүхий орон сууцанд амьдарч байна. Тиймээс нийт хүн амынхаа 30-аас доошгүй хувийг инженерийн хангамж бүхий орон сууцаар хангахын тулд “100 мянган орон сууц” төслийг дэвшүүлж, Хамтарсан Засгийн газар өөрийн нэгэн чухал зорилт болгон хэрэгжүүлэхээр үйл ажиллагааны хөтөлбөртөө тусгасан.

Орон сууцжуулалт нь агаар, хөрсний бохирдол, эрүүл мэнд, иргэдийн ая тух, нийгмийн бүлэг асуудлуудыг цогцоор нь шийдвэрлэх зөв аргачлал юм. Зөвхөн утааг арилгахад хүч, хөрөнгөө зарцуулах нь ихээхэн өрөөсгөл болохыг өнгөрсөн жилүүд бидэнд хангалттай нотлон харууллаа. Ямар нэгэн хүчин зүтгэл, чармайлтаар утааг арилгачихдаг юм гэхэд цаана нь хөрсний бохирдол, цэвэр усны хангамж, эрүүл ахуй, ая тух гээд өчнөөн олон асуудал шийдлээ хүлээн үлдэх болно. Иймээс орон сууцжуулах ажлын ач холбогдлыг төр засаг, барилгын байгууллагууд төдийгүй ард иргэд ойлгож хамтран ажиллах хэрэгтэй.
 
Гэхдээ орон сууны хороолол барих ажлын ач холбогдлыг ойлгож хувийн эрх ашигаа илүүд үздэг, үнийг үндэслэлгүй өсгөдөг, богино хугацаанд их ашиг олохын тулд чанаргүй барилга барьдаг дутагдлуудыг давтахгүй байх ёстой. Монгол Улсын 1990, 2000, 2010 оны статистикийн тоо баримтуудыг харьцуулан үзэхэд орон сууц, дэд бүтцийн хангамж, ногоон байгууламж буурч, ажилгүйдэл, ядуурал, агаарын бохирдол, авто замын түгжрэл өсчээ. Барилгын салбарын удирдах ажилтнуудын хувьд энэ талаар тодорхой арга хэмжээ авч хэрэгжүүлэх үүрэг, зорилготой гэж бодож байна.

“100 мянган орон сууц” төслийг хэрэгжүүлсний үр дүнд хүн амын орон сууц, дэд бүтцийн хангамж сайжирч, ногоон байгууламж нэмэгдэж, агаар, хөрс, усны бохирдол эрс буурч, авто замын сүлжээ нэмэгдэж, иргэд эрүүл, аюулгүй орчинд амьдрах нөхцөл бүрдсэн байх ёстой. Энэ бол бидний зорьж, төлөвлөж буй үр дүн. Үүнийг бодит ажил болгоход шаардагдах эрх зүйн зохицуулалт, санхүүгийн механизмыг бүрдүүлэхэд Засгийн газар анхаарч ажиллана.
 
Сүүлийн үед Улаанбаатар хотын орон сууцны барилгуудын газар хөдлөлтөнд ямархуу тэсвэртэй вэ гэдэг асуудал олны анхаарлыг татах боллоо. Тиймээс барилгын салбарын удирдлагууд та бүхэн барилга барихдаа ая тух, үнэ өртгөөс илүү аюулгүй байдлыг найдвартай хангах асуудлыг тооцох хэрэгтэйг онцлон хэлье. Өнөөдөр төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай /Тендерийн/ хуулийн дагуу төсөл, арга хэмжээг гүйцэтгэхдээ хамгийн бага үнийн санал өгснийг сонгож байна. Энэ нь барилгын чанарт сөргөөр нөлөөлөх боллоо. Иймд бодит амьдралд нийцэхгүй хуульд нэмэлт, өөрчлөлт оруулан шийдвэрлүүлж, үндэсний үйлдвэрийг дэмжсэн нөхцөл бололцоог хангах санал, санаачлага гаргах ёстойг сануулж байна.

“100 мянган орон сууц” төслийг хэрэгжүүлэх явцад барилгын материалын үйлдвэрүүдэд хөрөнгө оруулах, дэд бүтэц, орон сууц, барилга байгууламжид шаардлагатай барилгын материалын хэрэгцээг дотоодын үйлдвэрлэлээр хангаж, тээврийн зардлыг багасгаж, өртгийг бууруулах боломжийг бүрдүүлнэ. Монгол хүн ажилтай, мэргэжилтэй болох асуудлыг хамтад нь шийдэх учиртай. Салбарын эрдэм шинжилгээ, судалгааг үйлдвэрлэлд нэвтрүүлэх оновчтой хэлбэрийг бий болгож норм, дүрэм, стандарт, техник технологи, материал бүтээцийн талаарх тулгамдсан асуудлуудад чиглүүлэн тогтвортой ажиллуулах нөхцөлийг бүрдүүлэхийг үүрэг болгож байна. 
 
Барилгын салбарын удирдлагууд Та бүхнийг Засгийн газартайгаа хамтран ажиллаж тулгамдсан асуудлуудаа шийдвэрлэж, ард иргэдээ эрүүл, аюулгүй орчинд амьдрах нөхцөлийг бүрдүүлэх их үйлсэд бодит хувь нэмрээ оруулахыг хүсье. Биднийг их ажил, бүтээн байгуулалт хүлээж байна.

Анхаарал тавьсанд баярлалаа.

Монгол Улсын Ерөнхий сайд С.Батболд  Боловсрол, соёл, шинжлэх ухааны яамны удирдлагыг хүлээн авч 2009 оны 11 дүгээр сарын 16-нд боловсролын салбарынхантай уулзахдаа сургалтын төрийн сангийн тогтолцоог шинэчлэн, сурлагын түвшнээс хамаарч санхүүжүүлдэг тогтолцоог бий болгох, 2010 оноос өндөр хөгжилтэй оронд оюутан сургах шалгаруулалтыг нийтэд зарлаж, ил тод ойлгомжтой явуулах журам боловсруулах талаар өгсөн үүргийнхээ биелэлтийг сонсож үүрэг даалгавар өглөө.

Ерөнхий сайдын асуултад БСШУЯ-ны Мэргэжлийн боловсролын газар болон Төрийн сангийн газрын дарга нар хариулав. Дараа нь Ерөнхий сайд С.Батболд тус яамны удирдлага болон холбогдох албан тушаалнуудад үүрэг чиглэл өгөв. Тэрбээр хэлсэн үгэндээ “Миний өгсөн үүргийг ажил хэрэг болгох алхамууд хийгдэж буй нь сайн хэрэг. Гэхдээ цаашид ажлаа эрчимжүүлж тодорхой болгох нь чухал байна. Засгийн газар хоорондын гэрээний дагуу болон төрийн сангийн зээлээр суралцах оюутныг сонгон шалгаруулах арга хэмжээг зохион байгуулахдаа нэн хариуцлагатай хандах хэрэгтэй. Эхний ээлжинд сонгон шалгаруулалтыг зарлах аргаа оновчтой тодорхой болго.

Тогтсон стандарттай бол. Сонгон шалгаруулалтыг зарлах арга өөр байж болохгүй. Тэгвэл ойлгомжгүй болно. Сонгон шалгаруулалтыг зарлах хамгийн оновчтой, ойлгомжтой боломж, аргыг хайж ашиглах хэрэгтэй. Хамгийн наад захын арга гэхэд хэвлэлийн бага хурал зарлаад хийхэд олон түмэнд хүртээмжтэй хүрнэ. Онлайн ашиглах нь бас нэг арга боловч нийтэд хүрэх нь хязгаарлагдмал юм. Сургуулиар нь дамжуулаад зарлах аргыг хэрэглэхэд бас л ил тод байдлыг хангахгүй.

Дараа нь шалгах, дүгнэх аргаа оновчтой сонгож, ил тод шударга явуулах боломжийг хангах хэрэгтэй. Хийх гэж буй болон хийж буй ажлаа ил тод болгон зарлаж бай. Сурлага сайтай бол хэний ч хүүхэд сонгон шалгаруулалтад ороод, тэнцээд хүссэн сургуульдаа сурдаг байх ёстой. Суралцах шаардлагыг хангах шалгуур үзүүлэлтийг  хөрөнгийн баталгаа гэхээсээ илүү сурлага гэсэн үндсэн үзүүлэлт рүү хандуулахад голлон анхаарах ёстой,” гэж хэллээ хэмээн Засгийн газрын Хэвлэл мэдээллийн албанаас мэдээлэв.

Сурлага, спорт, урлагийн онцгой амжилт гаргасан суралцагчдад Ерөнхий сайдын нэрэмжит тэтгэлэг олгов. Боловсрол, спорт, урлагийн салбарт мэргэжил, сурлагаараа бусдадаа үлгэр дууриал үзүүлж, Ерөнхий сайдын нэрэмжит тэтгэлэг гардаж байгаа нь бахархалтай бөгөөд хариуцлагатай үйл явдал гэж тэрбээр тэмдэглээд сурлага, хөдөлмөрийн өндөр амжилт хүсэн ерөөв.

Монгол Улсын Ерөнхий сайдын захирамжаар :

№    ОВОГ НЭР     СУРГУУЛЬ     МЭРГЭЖИЛ    АНГИ
1    Г.Уянга     МУИС    банк санхүү      4
2    Ч.Тогтохцэрэн    МУИС    санхүү, менежмент      4
3    Б.Пүрэв    МУБИС    сэтгүүлч      4
4    Л.Амарзаяа    ЭМШУИС    ерөнхий эмчилгээ      6
5    Б.Номуундарь    ЭМШУИС    ерөнхий эмчилгээ      6
6    Ж.Гарваа    Монгол бизнес дээд сургууль    эдийн засгийн менежмент      4
7    Б.Лхагвадорж    МУИС    газрын кадастрын инженер      3
8    Д.Одончимэг    ШУТИС    нийгмийн ажилтан      4
9    Б.Хишигжаргал    Дархан-Уул. Техникийн коллеж    уул уурхайн эрчим хүч      3
10    Л.Хишигбаяр    МУБИС    багш      4
11    Б.Хулан    МУИС    эдийн засгийн математик загварчлал      3
12    Т.Зулхүү    МУИС    электроник инженер      3
13    Б.Батзаяа     Зохиомж дээд сургууль    сэтгүүлч, орчуулагч      3
14    О.Болор-Эрдэнэ    Радио, телевизийн дээд сургууль    сэтгүүлч      3
15    Г.Чинбат    Шихихутуг дээд сургууль    эрх зүйч      3
16    Б.Цэлмэг    Эм Ай Ю дээд сургууль    бизнес менежмент      3
17    З.Гэрэлтуяа    Хөдөлмөрийн дээд сургууль    нягтлан бодох бүртгэл      4
18    С.Өнөр    СЭЗДС    бизнесийн удирдлага      3
19    Ш.Отгон-Өлзий    Зохиомж дээд сургууль    гаалийн удирдлага      3
20    А.Содбаатар    МУИС    онолын математик      3
21    Б.Батзаяа    Гүүр коллеж    аялал жуулчлал      3
22    Б.Өлзийхишиг    Ач АУДС    хүүхдийн эмч      4
23    Б.Оргил    СУИС    соёл судлаач      4
24    Ш.Булгангэрэл    Улаанбаатар их сургууль    орчуулагч      4
25    Л.Нандинчимэг    Этүгэн АУДС    эм зүйч      5
26    Д.Тэгшзаяа    МУИС    гадаад харилцаа      3
27    Г.Хонгорзул    Соёмбо дээд сургууль    татвар-нябо      4
28    Ч.Нямсүрэн    МУИС    сэтгэл судлаач      3
29    Б.Алтанзагас    Хүмүүнлэгийн их сургууль    гадаад харилцаа      3
30    Т.Амартүвшин    Утга зохиол, нийгмийн ажилтны дээд сургууль     сэтгүүлч      4
31    Д.Цэвэлмаа    Тэнгэр дээд сургууль    нийгмийн ажилтан      3
32    М.Дэлгэрмаа    МУИС    багш      4
33    М.Алтанбагана    ШУТИС    программ хангамж      3
34    Б.Анхчимэг    ШУТИС    математик загварчлал      3
35    Г.Цэрэнжаргал    ШУТИС    архитектур      3
 
нар Монгол Улсын Ерөнхий сайдын нэрэмжит тэтгэлэг гардлаа. ”Ерөнхийлөгчийн болон Ерөнхий сайдын нэрэмжит тэтгэлэг олгох журам”-ын дагуу болзол хангасан нэг оюутанд сар бүр 80,000 /наян мянга/ төгрөгийг 10 сарын турш өгдөг юм.

Монгол Улсын Ерөнхий сайд С.Батболд 2010 оны гуравдугаар сарын 25-ны өдөр боловсролын салбарт нэлээд цаг зарцууллаа. Эхлээд Нийслэлийн Хан-Уул дүүргийн 115 дугаар сургуульд Кембрижийн сургалтын хөтөлбөрөөр хос хэлээр хичээллэх төрийн өмчит анхны сургуулийн нээлтэд оролцлоо. Энэ арга хэмжээний үеэр БСШУ-ы сайд Ё.Отгонбаяр хэлэхдээ “Монгол Улсын Ерөнхий сайдын өгсөн үүрэг, чиглэлийн дагуу олон улсад нийтлэг хүлээн зөвшөөрөгдсөн Кембрижийн ерөнхий боловсролын хөтөлбөр, стандартыг турших туршилт, судалгааны төв, түшиц лаборатори сургуулийн үйл ажиллагааг эхлүүлж байна.

Сургууль энэ оны есдүгээр сарын 1-нээс 15-16 насны, нэг ангидаа 20 хүүхэд бүхий хоёр бүлэгтэйгээр үйл ажиллагаагаа явуулна. Сургуульд ажиллах багш нарын англи хэлний сургалт өнөөдрөөс эхэлж байна” гэв. Монгол Улсын Ерөнхий сайд С.Батболд “Кембрижийн боловсролын хөтөлбөрийг хэрэгжүүлснээр хүнийхээ хөгжилд томоохон хувь нэмэр оруулах боломж бүрдэх юм. Дэлхий даяар улс гүрнүүд хүнийхээ хөгжилд ихээхэн анхаарч байна. Энэ хандлагын цөм нь боловсролын асуудал юм. Хүнээ хөгжүүлж чадсан улс орон хөгждөг ийм жишээг бид олныг мэднэ.

Иргэн боловсролтой, өрсөлдөх чадвартай бол хувь хүний, өрх гэрийн амьдрал дээшилнэ. Бид ийм замд хүрэх эхлэл тавьж байна. Монгол Улсын хөгжлийн гарц нь хүнээ хөгжүүлэх явдал юм. Энэ чиглэлд чухал алхам хийлээ. Зөв эхлэл гэдэгт итгэлтэй байна. Зөвхөн энэ лаборатори сургуулийн түвшинд биш нийслэлийн бүх дүүрэг, аймаг, улс орны хэмжээнд дэлхийд хүлээн зөвшөөрөгдсөн Кембрижийн боловсролын тогтолцоонд шилжин орох бололцоог бий болгохын төлөө Монгол Улсын Засгийн газар бүхий л талаас нь дэмжих болно” гэлээ. Тэрбээр дараа нь тус сургуульд багшлахаар сонгон шалгаруулалтад тэнцсэн, эхний сургалтад хамрагдаж буй багш нарт батламж гардуулахдаа “Дэлхийн Монгол иргэнийг бэлтгэх төрийн өмчит анхны сургуулийн багш нар та бүхэн үүрэг хариуцлага, нэр төрөө өндөрт өргөж яваарай” гэж захилаа.

Монгол орныхоо өнцөг булан бүрт амьдран суугаа нийт казах иргэддээ Засгийн газрын нэрийн өмнөөс болон хувиасаа олон улсын Наурызын баярын мэндийг хүргэж, гэр бүлээрээ, айл хотлоороо аз жаргалтай эрүүл энх, сайн сайхан амьдрахыг хүсэн ерөөе. Казах түмэн маань өвөг дээдсээсээ уламжлан ирсэн нарны буюу Наурызын баярыг өдөр шөнө тэнцдэг өлзий билэгтэй сайн цагт тэмдэглэж, шинэ оны анхны өдрөө ахан дүүс хотол олноороо учран золгож, буянтай буурал “Аксакал”-уудынхаа сургаал айлтгалуудыг сонсдог уламжлалтай.

Наурызын баяр бол өвлийг өнтэй давж, ан амьтад ичээнээсээ гарч, ургамал цэцэг соёолж, улс олноороо урин хавартай золгосныг угтан улиран одож буй оныхоо ололт амжилтыг дүгнэж, ирж буй жилийнхээ өнгө төлвийг билэгдэн тодорхойлдог казах түмний үндэсний соёл, ёс заншил, найрамдал нөхөрлөлийн салшгүй хэсэг билээ. Энэ өдөр хүн бүрийн амьдрал ахуй, хөдөлмөр бүтээл буян хишгээр арвижиж, идээ цагаа элбэг дэлбэг, хур бороо ихтэй байхыг ерөөж баяр хөөр, хүсэл тэмүүлэл, итгэл мөрөөдөл, өөдрөг сэтгэлтэй байхыг эрхэмлэдэг.

Тиймээс даян дэлхийд энхийг түгээгч Нэгдсэн Үндэсний Байгууллага энэ жилээс эхлэн Наурызыг Олон улсын баяр болгон тэмдэглэж байхаар зарлалаа.  Мөн НҮБ-ын Ерөнхий ассамблейн 2010 оны 2 дугаар сарын 23 өдрийн шийдвэрээр Наурызын баярыг хүн төрөлхтний халдашгүй соёлын өвийн жагсаалтанд бүртгэлээ. Тиймээс казах түмний маань хувьд энэ жил соёл иргэншлээ дэлхий дахинд хүлээн зөвшөөрүүлсэн түүхэн чухал он болж байна.

Манай казахчууд амьдралын баялаг их туршлагатай зон олон билээ. Энэ уламжлалаа орчин үеийн хэрэгцээ шаардлагад нийцүүлэн сайжруулж өрх гэр, амьдрал ахуйгаа өөд татаж, улс орныхоо эдийн засагт чухал хувь нэмэр оруулна гэдэгт итгэж байна. Монгол орны хөгжил дэвшил бүтээн байгуулалт, тусгаар тогтнол, батлан хамгаалахад казах түмний оруулсан хувь нэмэр их. Та бүхний дундаас улс төр, эдийн засаг, нийгэм соёл, урлаг, спорт, шинжлэх ухааны гээд бүхий л салбарын алдартнууд олон арваараа төрөн гарсныг тэмдэглэн хэлэхэд таатай байна. Наурызын баяраа тэгш дүүрэн тэмдэглэж буй нийт казах иргэддээ ажил үйлс нь бүтэмжтэй, энх амгалан, түвшин сайхан байхын ерөөлийг дэвшүүлье.