Blog

Монгол Улсын Ерөнхий сайд С.Батболд 2011 оны 9 дүгээр сарын 9-ний өдөр ОХУ-ын Холбооны Хурлын Холбооны Зөвлөлийн орлогч дарга А.П.Торшиныг хүлээн авч уулзлаа. Уулзалтын эхэнд Ерөнхий сайд С.Батболд ОХУ-ын хоккейн лигийн “Локомотив” клубийн тамирчдын сууж явсан онгоц Ярославль хотын ойролцоо осолдож, олон хүний амь эрсэдсэн явдалд Монгол Улсын Засгийн газар болон ард түмний нэрийн өмнөөс гүн эмгэнэл илэрхийллээ. ОХУ-ын Эрхүү хотноо удахгүй болох Байгалийн эдийн засгийн Форумын өмнө уулзаж байгааг  Ерөнхий сайд дурдаад Монголын тал энэхүү эдийн засгийн форумд өндөр ач холбогдол өгч байгаа. Олон Улс, бүс нутгийн олон арга хэмжээ зохиогдох төдийгүй хоёр орны харилцаа хамтын ажиллагааг улам бэхжүүлэн хөгжүүлэхэд ихээхэн хувь нэмэр болно гэдэг итгэлтэй гэлээ.

Мөн тэрээр энэ онд хоёр орны хооронд дипломат харилцаа тогтоосны 90 жилийн ой тохиож байгааг тэмдэглээд Батлан хамгаалах асуудал эрхэлсэн төрийн захиргааны төв байгууллага үүсэн байгуулагдсаны 100 жилийн ойн арга хэмжээнд уригдан ирсэнд таатай байгааг Засгийн газрын тэргүүн энэ үеэр хэллээ.

Өөрийг нь хүлээн авсанд Ноён А.П.Торшин Ерөнхий сайдад талархал илэрхийлээд Монгол Улс асар их хурдацтайгаар хөгжиж байгааг харж байна.  Яаж ийм амжилт гаргаж байгааг асуумаар байна гээд эрч хүч, цог золбоотой залуу Ерөнхий сайдтай уулзаж байгаадаа баяртай байна гэлээ. Засгийн газрын тэргүүн үүний хариуд “Энэ бол Монгол Улсын ард түмний  хүсэл эрмэлзэл хүч хөдөлмөр юм” гэлээ.

Монгол Улсын Ерөнхий сайд С.Батболд ХБНГУ-аас Монгол Улсад суугаа Онц бөгөөд Бүрэн Эрхэт Элчин сайд Петер Шалерыг өнөөдөр хүлээн авч уулзлаа. Үүрэгт ажлаа хүлээж аваад удаагүй байгаа ноён Петер Шалерт Монгол Улсад Элчин сайдаар томилогдсонд нь Ерөнхий сайд баяр хүргээд олон улс оронд ажиллаж асан туршлагатай дипломатч томилогдсонд талархаж байна гэлээ. Мөн Монгол Германы хамтын ажиллагааг бүхий л салбарт идэвхтэй хөгжүүлэх боломж байгааг Ерөнхий сайд С.Батболд тэмдэглээд ХБНГУ бол манай улсын Европ дахь том түнш. Монголын 40 мянга гаруй иргэн герман хэлээр ярьдаг.  Энэ хүмүүс хоёр орны харилцааг хөгжүүлэхэд чухал гүүр болж байдгийг Ерөнхий сайд дурдлаа.

Монгол Улс Европын холбоотой Түншлэл хамтын ажиллагааны хэлэлцээрийг ойрын үед байгуулах нь чухал ач холбогдолтой. Монгол Улсын Засгийн газар Европын стандартыг эх орондоо нутагшуулах зорилттой ажиллаж байгаа талаараа Засгийн газрын тэргүүн уулзалтын үеэр онцоллоо. Монгол Улсын эдийн засаг хурдацтай хөгжиж байна. Герман Монголын эдийн засгийн хамтын ажиллагааг улам идэвхжүүлэх нэн таатай үе ирж байна. Ийм түүхэн цаг үед танай сайхан оронд Элчин сайдаар ажиллах болсондоо баяртай байгаа гэдгээ ноён Петер Шалер илэрхийлээд Герман Монголын хамтын ажиллагааг улам бэхжүүлэхийн төлөө өөрийн зүгээс боломжтой бүхий л арга хэмжээг авч сайн ажиллах болно гэлээ.

Мөн тэрбээр Монгол Улсын Ерөнхий сайд С.Батболдын урилгаар ХБНГУ-ын Холбооны канцлер А.Меркел Монгол Улсад удахгүй айлчлах гэж байгааг дуулгалаа. Монгол Улсын Ерөнхий сайд С.Батболд энэ уулзалтын үеэр ноён Элчин сайдыг албан үүргээ гүйцэтгэхэд нь Монголын Засгийн газар дэмжиж хамтарч ажиллах болно гэдгээ илэрхийллээ

Монгол улсын Ерөнхий сайд С.Батболдын санаачлан хэрэгжүүлж байгаа “ Монгол мөрөөдлийн баг” сагсан бөмбөгийн хөтөлбөрийн нээлтэд NBA-ийн өнөө цагийн супер од Двайт Ховард оролцлоо. Ерөнхий сайдын хувьд сагсан бөмбөг сонирхогч төдийгүй Монголын сагсан бөмбөгийн холбоог байгуулж,дэмжлэг үзүүлж бүр санхүүжилт өгч NBA-ийн зарчмаар сагсан бөмбөгийн тэмцээн зохион байгуулцаж  явсан түүхтэй. Хүүхэд багачуудыг спортоор хичээллүүлэх, эрүүл чийрэг монгол хүнийг бий болгоход чиглэгдэж байгаа “ Монгол мөрөөдлийн баг” хөтөлбөрийн нээлтэд  монголын сагсан бөмбөг сонирхогч хүн бүрийн  шүтээн, цэнхэр дэлгэцээр хэдийнээ танил болсон Ховард оролцож байгаа нь бэлэг дэмбэрэлтэй сайхан зүйл болж байгааг Бөхийн өргөөнд цугларсан мянга мянган залуучуудад хандан Ерөнхий сайд С.Батболд тэмдэглэн хэлж байлаа.

Мөн Ховардын араас NBA-ийн шилдэг тоглогчид цуврах үүд хаалга нээгдэж байна хэмээн бэлэгшээж байгаагаа ч Засгийн газрын тэргүүн хэллээ.  Двайт Ховард нь АНУ-ын “ Орландо мэжик” багийн төвийн тоглогч билээ. “ Монгол мөрөөдлийн баг” сагсан бөмбөгийн хөтөлбөр нь энэ хичээлийн жилд Монгол улсын хэмжээний ерөнхий боловсролын сургуулийн сурагчдын дунд гурван насны ангиллаар явагдах бөгөөд шилдгийн шилдэг шалгарсан баг АНУ-д очиж NBA-ийн гайхамшигт тоглолтыг үзнэ . Энэ хөтөлбөрийг Засгийн газар ивээн тэтгэж зохион байгуулах юм.

Монгол хүүхдийг багаас нь спортоор хичээллүүлж, сагсан бөмбөгт дуртай болгох Монгол улсын Ерөнхий сайдын энэ санаачлагыг маш их дэмжиж байгаагаа сагсан бөмбөгийн од, өөрийн хөгжилтэй зан, хүчирхэг тоглолтоороо бусдын хайр хүндэтгэлийг хүлээдэг Ховард уг ёслолын ажиллагааны үеэр илэрхийлж байлаа. Тэрбээр тун их баярласан байсан бөгөөд  “ Монгол улсын Ерөнхий сайдын сая хэлсэн үгээс  ирээдүйд Монголоос агуу сагсчид төрөх нь гэдэг итгэл үнэмшил төрлөө, би монголд дараа жил NBA-ийн бусад шилдэг тоглогчоо дагуулж ирэх болно оо “ гэсэн үг Бөхийн өргөөнд цугларсан монголын залуусын цөсийг ёстой л хөөргөсөн гэхэд болно. Тэрбээр Ерөнхий сайдтай  тун дотно яриа өрнүүлж, бас хажуугаар нь шог хошин мэдрэмжээ тун сайн илэрхийлж байлаа.

Монгол залуус маань ч  агуу фэнүүд  гэдгээ яруу тодоор харуулж,  Бөхийн өргөөг бараг “шатааж” байсан. Сагсан бөмбөгийн спортод элэгтэй, Монгол улсын Засгийн газрын тэргүүнд Двайт Ховард өөрийн гарын үсэг бүхий сагсан бөмбөгийг бэлэг болгон өглөө. Дашрамд дурьдахад Монгол улсын Ерөнхий сайдын санаачлан хэрэгжүүлэх  “Монгол мөрөөдлийн баг” хөтөлбөрийн хүрээнд  монголын бүх сургуулийг спорт заалтай болгох юм байна. Энэ заал нь стандартыг тогтоох ч онцлогтой гэдгийг Засгийн газрын тэргүүн тэмдэглэж байна

Генерал, офицер, ахлагч, түрүүч, байлдагч нараа,

Бэлтгэл болон чөлөөнд байгаа ахмад дайчид аа,

Батлан хамгаалах яам байгуулагдсаны 100 жилийн ойн хүндэт зочид оо,

Ноёд, хатагтай нар аа,

Бидний өвөг дээдсийн батлан хамгаалах, цэрэг стратеги, дайн байлдааны түүх олон зуун жилээр хэмжигдэн баяжигдаж, бахархал бишрэлийн маань нэгэн хэсэг болсоор ирсэн. Харин орчин үеийн Батлан хамгаалах салбарын маань түүх нэгэн зуун жилээр бичигдэж байна. Энэхүү 100 жилийн түүхийг бүтээлцэж, улс орныхоо батлан хамгаалах салбарт бүхий л амьдралаа зориулсан алдар гавъяатнууд, ахмад буурлууд, генерал, офицер, ахлагч, түрүүч, байлдагч, энхийг сахиулагчид, зэвсэгт хүчний бүх бие бүрэлдэхүүн, батлан хамгаалах яамны хамт олон, тэдний гэр бүлийнхэнд Монгол Улсын Засгийн газрын нэрийн өмнөөс баярын мэндийг хүргэж сайн сайхан бүхнийг хүсэн ерөөж байна.  

Олон ойн билэг ерөөлтэй тэгш дүүрэн энэ жил манай улсын анхны таван яамны 100 жилийн ой давхцан тохиож байна. Монгол Улсын орчин цагийн төрийн захиргааны эх суурь болсон энэхүү таван яамны нэг нь Батлан хамгаалах яам юм. Энэ бол манай улс батлан хамгаалах салбартаа илүү их ач холбогдол өгч, ард иргэд дэмжин хүрээлж ирсний нэгэн илрэл билээ. 1911 оны Үндэсний эрх чөлөөний  хөдөлгөөний үр дүнд тусгаар тогтнолоо зарлаж, Богд Хаант Монгол Улсыг тунхаглан Цэргийн хэргийг бүгд захиран шийтгэгч яамыг байгуулсан нь өнөөгийн Та бүхний ажил амьдралаа зориулсан Батлан хамгаалах яамны эх суурь болсон.

Үндэсний эрх чөлөөний хөдөлгөөний үргэлжлэл болсон 1921 оны Ардын хувьсгалын үр дүнд монголчууд бид хөгжил дэвшлийнхээ шинэ үед орсон. Монголын ард түмэн эрх чөлөө, тусгаар тогтнолоо байлдан олж, шинэ цагийн цэргийг удирдах байгууллагаа бэхжүүлж Цэргийн явдлын яам болгон өргөжүүлсэн. Түүхийн энэ бүх ээдрээт цаг хугацаанд Монголын Зэвсэгт хүчин өсөн бэхжиж, Монгол Улсын тухайн цаг үеийн төр, нийгмийн байгуулал, гадаад орчин, олон улсын цэрэг-улс төрийн нөхцөл байдалтай холбогдон шинэчлэгдэж ирлээ.

Төрийн батлан хамгаалах бодлогыг боловсруулан хэрэгжүүлэх, батлан хамгаалах салбарыг хөгжүүлэн бэхжүүлэх, цэргийн шинэчлэлийг гүнзгийрүүлэх зэрэг үйл хэрэгт Батлан хамгаалах салбарын хамт олны оруулсан хувь нэмрийг монголын ард түмэн өндрөөр үнэлж байдаг юм. Эх орныхоо батлан хамгаалах салбарт амь амьдралаа зориулж, идэвх санаачилга гаргаж ирсэн бүхий л хүмүүст Засгийн газрынхаа нэрийн өмнөөс талархал илэрхийлье. Монгол Улсын сүр хүч батлан хамгаалах салбартаа байж ирсэн. Тиймээс түүхийн бүхий л явцад батлан хамгаалах яам нь онцгой үүрэг гүйцэтгэсэн чухал салбар байсаар ирлээ. Цаашид ч гэсэн энэхүү байр сууриа хэвээр хадгална гэдэгт итгэж байна. 

Батлан хамгаалах салбарын маань 100 жилийн түүх дандаа бахархам амжилт, бишрэм үйл явдлаар бичигдэж байсангүй. Улс төрийн хэлмэгдүүлэлтийн үед Батлан хамгаалах салбарынхан илүүтэй өртөж, олон зуун шилдэг дарга, цэргийн нэрт зүтгэлтнүүдээ алдаж, хохирол амссаныг бид мартах учиргүй. Хүнд хэцүү энэ он жилүүдэд ч гэсэн эх орноо батлан хамгаалах хүчин чадлаа бэхжүүлэх, цэргийн хэргийг удирдан зохион байгуулах үүргээ тасралтгүй биелүүлж ирсэн гавъяа зүтгэлийг нь дурсан санаж байх учиртай.

Дэлхийн болон Халхын голын, чөлөөлөх дайны хүнд жилүүдэд ард түмнийхээ хүчийг нэгтгэж, амжилт ялалтанд хүрэхэд, хүнд хэцүү шалгуур сорилтыг даван туулахад батлан хамгаалах салбарын үе үеийн удирдлага, эрэлхэг дайчид чухал үүрэг гүйцэтгэснийг онцлон тэмдэглэж байна. Үүний зэрэгцээ өнгөрсөн үеийн эсрэг тэсрэг хоёр нийгмийн байгууллын үеийн олон улсын харилцаа, цэрэг- стратегийн бодлогод зохицсон, өөрийн орны тусгаар тогтнол, аюулгүй байдал, хөгжил дэвшлийн төлөөх төрийн бодлого, үйл ажиллагааг хэрэгжүүлэхэд Батлан хамгаалах салбар тэргүүн үүрэг гүйцэтгэж ирсэн билээ.

Ардчилсан өөрчлөлтийг дагаж Монгол Улс нийгмийн шинэ тогтолцоонд шилжиж, хүмүүнлэг иргэний нийгмийг байгуулах замыг эргэлт буцалтгүй сонгон авч хэрэгжүүлж байна. Энэхүү шинэчлэлийн үндсэн агуулга нь нийгмийн шинэ тогтолцоонд нийцсэн Үндэсний аюулгүй байдлын үзэл, баримтлалыг төлөвшүүлж, батлан хамгаалах бодлогыг шинээр тодорхойлох, нэгдмэл тогтолцоог бүрдүүлэх, цэргийн номлол, зэвсэгт хүчний байгуулалтын зарчмыг шинэ нөхцөл байдалд зохицуулан боловсруулах, зэвсэгт хүчний бүтэц, зохион байгуулалтад өөрчлөлт шинэчлэл хийх зэрэг олон талт, өргөн цар хүрээтэй үйл явцыг хамарсан үйл ажиллагаа байсан юм.  

Дээрх бодлого, зорилтын хүрээнд Үндэсний аюулгүй байдал, Төрийн батлан хамгаалах бодлого, Зэвсэгт хүчний шинэчлэлтэй холбогдсон  олон чухал хууль тогтоомжийг шинээр буюу шинэчлэн боловсруулж батлуулах, тэдгээрийг хэрэгжүүлэх  арга хэмжээнүүдийг амжилттай зохион байгуулж ирлээ. Ингэснээр Зэвсэгт хүчнийг мэргэжлийн чиг баримжаатай, чадварлаг болгоход чиглэгдсэн  цэргийн  шинэчлэлийн зорилт амжилттай биелэгдэж байна. Мөн Батлан хамгаалах гадаад харилцаа шинэ шатанд гарлаа.  

Орчин үеийн батлан хамгаалах салбарын маань түүхэнд олон улсын энхийг сахиулах ажиллагаанд оролцож байгаа явдал онцгой байр суурийг эзлэх ёстой. Бидний цэрэг арми, батлан хамгаалах бодлого даян дэлхийд энхийг бүтээлцэж байгаа нь бахархууштай үйл явдал мөн. Эх орноо батлан хамгаалах их үйл хэрэгт  амь биеэ үл хайрлан тэмцэж, эрдэм ухаан, хөдөлмөр зүтгэлээ зориулсан үе үеийн эх орончид, ахмад дайчид, цэргийн нэрт зүтгэлнүүдийнхээ гавъяат үйлсийг дурсан санаж, хайрлан хүндэтгэж, тэднийхээ үйл хэргийг үргэлжлүүлэх нь бидний эрхэм зорилтын нэг байх болно гэдгийг 100 жилийн энэ ойн өдөр тэмдэглэн хэлэхэд таатай байна.

Батлан хамгаалах салбарын нийт бие бүрэлдэхүүн Та бүхэн 100 жилийн түүхээ үйл хэрэг, үйлс гавъяагаараа баяжуулж, амжилт ололт, алдаа дутагдлаа эргэцүүлэн дүгнэж, алс хэтийн хөгжлөө тодорхойлж их ойн баяраа утга төгөлдөр тэмдэглэн өнгөрүүлэхийг хүсье. Батлан хамгаалах салбар маань батжин бэхжиж, монгол улсын сүр хүч, сүлд хийморь болж байх болтугай.

Монгол Улсын Ерөнхий сайд С.Батболд өнөөдөр Олон улсын шилжилт хөдөлгөөний байгууллагын /ОУШХБ/ ерөнхий захирал Уиллиам Лэйси Свингийг хүлээн авч уулзлаа. Цагаачлал, шилжих хөдөлгөөнөөс үүдэлтэй нийгэм, эдийн засгийн бэрхшээлтэй асуудлуудыг шийдвэрлэх, үндэсний чадавхийг бэхжүүлэхэд чиглэсэн үйл ажиллагааг дэлхийн хэмжээнд явуулдаг энэ байгууллага манай улстай хамтран ажиллаж дэмжиж ирсэнд талархаж байдгаа Монгол Улсын Ерөнхий сайд С.Батболдуулзалтын эхэнд тэмдэглэлээ.

Ноён Уиллиам Лэйси Свинг манай улсад ирсэн зорилгоо танилцуулахдаа хамтран ажилладаг түншүүдтэйгээ уулзаж харилцаагаа гүнзгийрүүлэх, хамгийн гол нь Олон улсын шилжилт хөдөлгөөний байгууллагын төлөөлөгчийн газраа  Улаанбаатар хотноо албан ёсоор нээх, энэ сарын 6-7-ны өдрүүдэд Улаанбаатар хотноо болсон АСЕМ-ын гишүүн орнуудын Цагаачлалын албадын тэргүүн нарын ээлжит 10 дугаар уулзалтад оролцохоор ирсэн гэж Ерөнхий сайдад танилцуулаад манай байгууллагыг дэмжиж хамтран ажиллаж байгаа, төлөөлөгчийн газраа нээх боломж олгосон  Монгол Улсын Засгийн газарт талархлаа илэрхийллээ.  

Монгол Улс 2008 онд тус байгууллагын гишүүнээр элссэн. Энэ хугацаанд хүний наймааны хохирогч болсон 358 монгол иргэнийг эх орон, гэр орондоо очиход нь зуучилсан, шилжин  суурьшигч болон гадаад оронд бичиг баримтаа гээгдүүлсэн, бэлгийн мөлжлөгт өртсөн зэрэг 5000 гаруй монгол иргэнийг эх орондоо ирэхэд нь тус байгууллагын гишүүд тусалсан гэсэн мэдээллийг ноён Уиллиам Лэйси Свинг хэлээд Монголд төлөөлөгчийн газраа албан ёсоор нээснээр үйл ажиллагаа улам өргөжиж, тэр хэрээр дотоод болон гадаадад шилжих хөдөлгөөнд оролцож буй монгол хүний эрх ашиг хамгаалагдаж чадна гэлээ.   

Монгол Улсын Ерөнхий сайд энэ үеэр тус байгууллагатай илүү өргөн хүрээнд олон салбар чиглэлээр хамтарч ажиллах сонирхолтой байгаагаа илэрхийлээд манай оронд байгуулагдаж буй төлөөлөгчийн газраараа дамжуулан гадаадад ажиллаж буй Монгол иргэдэд анхаарал тавьж байх, шилжих хөдөлгөөний менежментийг бэхжүүлэх, олон нийтэд ойлголт мэдээллийг үнэн зөв хүргэхэд түлхүү анхаарч ажиллахыг Ерөнхий сайд С.Батболд зөвлөлөө. Олон улсын шилжилт хөдөлгөөний байгууллага нь 1951 онд байгуулагдсан Засгийн газар хоорондын  байгууллага юм. 132 орныг эгнээндээ нэгтгэсэн энэхүү байгууллага нь эдгээр оронд нийт 400 гаруй салбар нэгжтэй юм байна

ЗЭЭЛИЙН ХҮҮ БУУРАХ ЗАХ ЗЭЭЛИЙН ОРЧНЫГ БҮРДҮҮЛНЭ

“Зээлийн хүү буурах зах зээлийн орчныг бүрдүүлэх хөтөлбөр”-ийн төслийг Засгийн газрын хуралдаанаар хэлэлцэн зарчмын хувьд дэмжлээ. Хөтөлбөрийг хамтарч батлан хэрэгжүүлэх арга хэмжээ авахыг холбогдох сайд, агентлагийн дарга нарт даалгаж, Монголбанкны Ерөнхийлөгч болон Санхүүгийн зохицуулах хорооны дарга нарт зөвлөв. Хөтөлбөрийн биелэлтийг жил тутам Засгийн газарт танилцуулж байхыг мөн үүрэг болголоо. Хөтөлбөрийг бүрэн хэрэгжүүлэхийн тулд инфляцийг нам, тогтвортой түвшинд байлгах, банкуудын үйл ажиллагааны шударга, зохистой байдлыг хангуулах, санхүүгийн салбарын тогтвортой байдлыг хангаж, хөрөнгийн зах зээлийн хөгжлийг түргэтгэх, энэ салбарын дэд бүтэц, хууль, эрх зүйн орчинг сайжруулах шаардлага гарч байна.

Тухайлбал инфляцийг нам, тогтвортой түвшинд байлгахын тулд хэрэглээний үнийн индексээр хэмжигдэх инфляцийн түвшинг шат дараатай бууруулах, индекст голлох нөлөөтэй өргөн хэрэглээний бараа, бүтээгдэхүүний нөөц бүрдүүлж, оновчтой хуваарилан, нийлүүлэлтийг жигд хангаж, үнийн хэлбэлзлийг бууруулах бодлого баримтлах юм. Мөн Замын-Үүд, Алтанбулаг, Гашуунсухайт, Шивээхүрэн, Булган, Бургастай, Бичигтийн боомтын хүчин чадлыг нэмэгдүүлж, хэрэглээний үнийн индекст голлох нөлөөтэй импортын бараа, бүтээгдэхүүний нийлүүлэлтийн тогтвортой байдлыг хангана.  Төрийн мөнгөний болон төсвийн бодлогыг уялдаатай, мөчлөг сөрсөн байдлаар явуулж, инфляцийг нам, тогтвортой байлгах макро нөхцөл бүрдүүлэх юм.

Хөтөлбөрийг 2011-2013 он хүртэл хэрэгжүүлэх бөгөөд үүний дүнд инфляцийн түвшинг энэ онд нэг оронтой тоонд, 2012 онд 8 хувь, 2013 онд 5 хувьд хүргэнэ гэж тооцоолж байна. Энэ оны эхний улирлын байдлаар төгрөгийн хадгаламжийн жигнэсэн дундаж хүү 10.5 хувь болж өмнөх оны мөн үеэс 1.8 нэгж хувиар, өмнөх улирлаас 0.2 хувиар буурч, зээлийн жигнэсэн дундаж хүү 15.8 хувь болжээ. Энэ нь өмнөх оны мөн үеэс 4.3 нэгж хувиар, өмнөх улирлаас 2.1 хувиар буурсан гэсэн үг юм. Өөрөөр хэлбэл зээлийн хүүгийн түвшин хадгаламжийн хүүгийн бууралтаас илүү хурдацтай байгаа нь банкуудын зээлийн хүүгийн зөрүү буурч байгааг харуулж байна. Мөн валютын зээлийн хүү болон хадгаламжийн хүүгийн түвшин ч буурах хандлагатай байна.

НЭГДСЭН ТӨСВИЙН ТЭНЦВЭРЖҮҮЛСЭН НИЙТ ОРЛОГО 380 ТЭРБУМ ТӨГРӨГӨӨР ДАВЖ БИЕЛЖЭЭ

Монгол Улсын 2011 оны нэгдсэн төсвийн хоёрдугаар улирлын гүйцэтгэлийг  Сангийн сайд С.Баярцогт өнөөдрийн Засгийн газрын хуралдаанд танилцууллаа. Манай улсын нэгдсэн төсвийн 2011 оны эхний хагас жилийн гүйцэтгэлийн мэдээгээр нэгдсэн төсвийн тэнцвэржүүлсэн нийт орлогын бүрдүүлэлт 124,6 хувийн, нийт зарлага 78,3 хувийн гүйцэтгэлтэй, төсвийн тэнцвэржүүлсэн нийт тэнцэл 57,8 тэрбум төгрөгийн ашигтай гарч, төлөвлөсөн дүнтэй харьцуулахад 897,0 тэрбум төгрөгөөр их байна.

Нэгдсэн төсвийн тэнцвэржүүлсэн нийт орлого оны эхний 6 сарын гүйцэтгэлээр 1,926,0 тэрбум төгрөгт хүрч, орлогын төлөвлөгөө 380,0 тэрбум төгрөгөөр буюу 24,6 хувиар давж биелж, өнгөрсөн оны мөн үеийнхээс 55,4 хувиар буюу 686,4 тэрбум төгрөгөөр өссөн байна. Нийт орлогын 87,8 хувь нь татварын орлогоор, 11,8 хувь нь татварын бус орлогоор, 0,4 хувь нь хөрөнгийн орлогоос тус тус бүрджээ. “Төсвийн тогтвортой байдлын тухай хууль”-ийн дагуу ашигт малтмалын нөөц ашигласны төлбөр, өсөн нэмэгдэх ашигт малтмалын нөөц ашигласны төлбөр болон аж ахуйн нэгжийн орлогын албан татварын орлогоос нийт 40,7 тэрбум төгрөгийг тогтворжуулалтын сангийн орлогод бүртгэжээ. 

Харин нэгдсэн төсвийн нийт зарлага 2011 оны 6 дугаар сарын байдлаар 2,385,3 тэрбум төгрөгөөр төлөвлөгдсөнөөс 1,868,2 тэрбум төгрөгийн буюу 78,3 хувийн гүйцэтгэлтэй гарч, өнгөрсөн оны мөн үеийнхээс 32,8 хувиар буюу 461,1 тэрбум төгрөгөөр өссөн байна. Хүний хөгжил сангаас иргэдэд олгох бэлэн мөнгийг нэмэгдүүлж сар тутам 21,000 төгрөг болгосон, оюутнуудын сургалтын төлбөрт дэмжлэг болгож 500,000 төгрөгийг шинээр олгох болсон нь зарлага нэмэгдэхэд голлон нөлөөлсөн байна.

Монгол Улсын төсвийн тэнцвэржүүлсэн нийт орлого 2011 оны 2 дугаар улирлын гүйцэтгэлээр 1,321,2 тэрбум төгрөгт хүрч, орлогын төлөвлөгөө 215,3 тэрбум төгрөгөөр буюу 19,5 хувиар давж биелж, өнгөрсөн оны мөн үеийнхээс 35,0 хувиар буюу 342,9 тэрбум төгрөгөөр өссөн байна. Импортын бараанд ногдуулж байгаа онцгой албан татварын орлогын гүйцэтгэл 36,8 тэрбум, гаалийн албан татварын орлогын гүйцэтгэл 27,7 тэрбум төгрөгөөр тус тус давж биелсэн нь манай улсын гадаад худалдааны нийт бараа эргэлт өмнөх оноос 77,1 хувиар буюу 2,053,4 сая ам.доллараар нэмэгдсэнтэй холбоотой байна.

ЕРӨНХИЙ ХЭЛЭЛЦЭЭРИЙН ТӨСЛИЙГ ДЭМЖИВ

“БНСУ-ын Эдийн засгийн хөгжлийн хамтын ажиллагааны сан /ЭЗХХАС/-аас 2011-2015 онд хөнгөлөлттэй зээл авах тухай Ерөнхий хэлэлцээр”-ийг Монгол Улсын Засгийн газар, БНСУ-ын Засгийн газар хооронд байгуулах гэж байна. Ерөнхий хэлэлцээрийн төслийг Засгийн газрын хуралдаанаар хэлэлцэн  зарчмын хувьд дэмжиж, УИХ-ын холбогдох Байнгын хороотой зөвшилцөхөөр тогтов. 1993-2007 онд манай улсад 8 төсөл хэрэгжүүлэхэд ЭЗХХАС 60-аад сая ам.долларын зээл олгосон байна. Харин 2011-2015 онд 300 сая ам.доллараас хэтрэхгүй солонгос вонын зээлийг олгохоор тохиролцжээ. Зээлийг үндэсний оношлогоо, эмчилгээний төв байгуулах, холбоо, хяналт, мэдээллийн нэгдсэн сүлжээ төслийг үргэлжлүүлэх, бөөний худалдааны төв байгуулах, нүүрсийг хийжүүлэх замаар эрчим хүчний цэвэр түлш гаргах үйлдвэр барих зэрэгт зарцуулахаар төлөвлөжээ.        

ИННОВАЦИЙН ТУХАЙ ХУУЛИЙН ТӨСЛИЙГ ДЭМЖЛЭЭ

“Инновацийн тухай хууль”-ийн төсөл болон хуулийн төсөлтэй холбогдуулан бусад хуульд нэмэлт, өөрчлөлт оруулах тухай хуулийн төслүүдийг Засгийн газрын хуралдаанаар хэлэлцэн дэмжиж, гишүүдийн гаргасан саналыг тусган УИХ-д өргөн мэдүүлэхээр тогтлоо. 6 бүлэг, 18 зүйлтэй хуулийн төсөл батлагдсанаар манай улсад инновацийн тогтолцоог бүрдүүлэн хөгжүүлэх эрх зүйн орчин бий болгох чухал алхам болно гэж Боловсрол, соёл, шинжлэх ухааны яам үзэж байна. 

Тухайлбал шинжлэх ухаан-үйлдвэрлэлийн холбоог хөгжлийн шинэ шатанд гаргах, өрсөлдөх чадвартай мэдлэг шингэсэн шинэ бүтээгдэхүүнүүд зах зээлд нэвтрэх, үндэсний аж үйлдвэрийн салбарт технологийн шинэчлэл хийх, экспортод чиглэсэн өндөр технологийн аж үйлдвэрийг хөгжүүлэх үндэс суурийг тавих ач холбогдолтой юм. Одоогоор улсын захиалгат болон улсын бүртгэлд бүртгэгдсэн инновацийн төслүүдийг хэрэгжүүлэхэд эхний жил ойролцоогоор 5 тэрбум төгрөг шаардлагатай гэсэн тооцоо гарчээ.

ЭНХИЙГ ДЭМЖИХ АЖИЛЛАГААНД ОРОЛЦСОН БИЕ БҮРЭЛДЭХҮҮНД ОЛГОХ ТОМИЛОЛТЫН ЗАРДЛЫН ХЭМЖЭЭГ ӨӨРЧЛӨВ

Энхийг дэмжих ажиллагааны аюулгүй байдлын эрсдлийн түвшний нэмэгдэх хандлага, цэргийн албан хаагчийн нийгмийн баталгааг байнга бэхжүүлэх үүднээс гадаад цэргийн ажиллагаанд оролцсон албан хаагчийн томилолтын хэмжээг дэс дараатай өсөн нэмэх хэрэгцээ гарч байна. Засгийн газрын ээлжит хуралдаанаар үүнийг хэлэлцэн Энхийг дэмжих ажиллагаанд оролцогчдын томилолтын зардлыг НҮБ-ын ажиллагаанд цэрэг оролцуулсны нөхөн төлбөр болон тусгай мэргэжилтний нэмэгдлийн 70 хувиар тогтоох, үлдэх 30 хувийг Зэвсэгт хүчний хөгжлийн санд төвлөрүүлж байхыг Сангийн сайд С.Баярцогт, Батлан хамгаалахын сайд Л.Болд нарт даалгалаа. Энэ шийдвэрийг 2012 оны 1 дүгээр сарын 1-ний өдрөөс мөрдөж эхлэх юм байна.

ЭРТНИЙ НҮҮДЭЛЧНИЙ ЯЗГУУРТНЫ БУНХАНТ БУЛШ, ТҮҮНИЙ ОЛДВОРУУДЫГ ХАМГААЛАЛТАНД АВЛАА

Монгол Улсын Шинжлэх Ухааны Академийн Түүхийн Хүрээлэн, Казахстан Улсын Евро-Азийн их сургуулийн Түрэг-Алтай судлалын хүрээлэнгийн хамтарсан судалгааны анги 2011 оны 7-9-р сарын сард Булган аймгийн Баяннуур сумын нутаг, Улаан хэрмийн ойролцоо археологийн малтлага хийж, эртний нүүдэлчдийн язгууртны бунхант булш илрүүлжээ. Маш ховор, нэг доороос бөөнөөрөө илэрсэн иж бүрэн дурсгалт олдвор бүхий бунхант булш нь VIIзуунд хамаарах юм. Улаан хэрмийн ойролцоох нүүдэлчдийн бунхант булшийг улсын хамгаалалтад авч, хамгаалалтын бүсийг тогтоон, сэргээн засварлаж ил музей болгох, цаашид аялал жуулчлалын маршрутад оруулах нь зүйтэй гэж Засгийн газрын хуралдаанаас үзлээ.

• “Цагдаагийн байгууллагын тухай хуульд нэмэлт оруулах тухай, Үндэсний аюулгүй байдлын тухай хуульд нэмэлт оруулах тухай, Тагнуулын байгууллагын  тухай хуульд нэмэлт, өөрчлөлт оруулах тухай, Гамшгаас хамгаалах тухай хуульд нэмэлт оруулах тухай, Монгол улсын хилийн тухай хуульд нэмэлт оруулах тухай, Шүүхийн шийдвэр гүйцэтгэх тухай хуульд нэмэлт оруулах тухай, Төрийн нууцын тухай хуульд нэмэлт оруулах тухай, Жагсаал, цуглаан хийх журмын тухай хуульд нэмэлт, өөрчлөлт оруулах тухай, Эрүүл мэндийн тухай хуульд нэмэлт оруулах тухай хууль-ийн төслүүдийг хэлэлцэн дэмжэиж, Засгийн газрын гишүүдийн гаргасан саналыг тусган УИХ-д мэдүүлэхээр тогтлоо.
• УИХ-ын гишүүн Н.Ганбямба нарын санаачлан боловсруулсан “Технологийн инновацийн үйл ажиллагааг дэмжих тухай хууль”-ийн төслийг хэлэлцээд  тодорхой саналуудыг хууль санаачлагчид уламжлахаар тогтов.

Энэ жил манай улс 420 мянган тонн үр тариа хураан авах боломж бүрджээ. Энэ бол сүүлийн 20 жилд авч байгаагүй арвин их ургац бөгөөд чанарын хувьд маш сайн, үр тариа төдийгүй төмс хүнсний ногоо  ч сайхан ургасан  байна. Рекорд тогтоох энэ ургацаа хураан авахад тэнгэр хангай сайхан байгаасай гэж хэн хүнгүй залбирч байна. Монгол улсын Ерөнхий сайд С.Батболд  даваа гаригт газар тариалангийн гол бүсүүд болох Сэлэнгэ сумын Сайхан, Баянгол, Мандал болон Төв аймгийн Сүмбэр сумдаар явж ургац хураалтын ажил байдалтай танилцах үеэр очсон газар бүрийн тариаланчид ийм мэдээллийг өгч байв.

Энэ их арвин ургац, үр өгөөж нь манай тариаланчид, мехникжуулагчдын хөдөлмөр зүтгэл юм, тэдний ажлыг урамшуулах зорилгоор Засгийн газраас ч  тариаланчдынхаа ургацыг худалдан авах, урамшуулах, чанартай хүнсээр дотоодынхоо хэрэгцээг бүрэн хангах  нөхцөлийг нь сайжруулах гээд бүх талын дэмжлэг үзүүлж байна гэдгийг Ерөнхий сайд  С.Батболд энэ үеэр онцлон тэмдэглэж,  тэдний хүсч  горьдлого тээн хүлээж  байсан хэд хэдэн таатай мэдээллийг тэдэнд  өглөө.

Юуны өмнө хурааж авах үр тарианы 15 мянга орчим тонныг улсын үрийн нөөцөд авч, гурилын үйлдвэрүүддээ 90 мянга орчим тонныг худалдаж, 50 мянган тонныг тэжээл болон бусад үйлдвэрүүдэд борлуулах бөгөөд тариалан эрхлэх санд 130-140 орчим тонныг төвлөрүүлэх зорилготой байгаа аж. Харин үлдэж байгаа 100 гаруй мянган тонн үр тариаг Засгийн газар худалдаж авах, борлуулах тал дээр  дэмжлэг үзүүлнэ, ер нь энэ жилийн ургацыг бүх л хэлбэрийн оролцоотойгоор шийдвэрлэж, урамшуулна хэмээн мэдэгдсэн нь тариаланчдыг баярлуулсан шиг баярлууллаа.

Харин үнийн хувьд гадаад дотоод нөхцөл байдал харьцангуй сайн байгаа хэдий ч  дотоодын аж ахуйн нэгжээ хамгаалах зорилгоор Засгийн газар боломжтой бүх л арга хэмжээгээ үргэлжлүүлж авна гэдгийг Засгийн газрын тэргүүн мэдэгдэж байна. Тухайлбал,  нэг тонн буудайг    350 мянгаар худалдан авч   байсан энэ  үнэ хэвээр хадгалагдах төдийгүй,  сайн чанарын улаан буудайд  тонн тутамд  50 мянган төгрөгөөр урамшуулдаг уг  урамшуулал ч энэ жил дахин үргэлжилнэ хэмээсэн нь тариаланчдын маань хүсэн хүлээсэн мэдээлэл мөн байлаа. Тэд нижигнэсэн алга ташилтаар энэ мэдээллийг хүлээн авсан нь ёстой л загатнасан газар маажих шиг болсон.

Энэ нь Атрын гуравдугаар аяныг  амжилттай үргэлжлүүлж, цаашдаа  экспортын түвшинд ч хүргэх алсын зорилго төдийгүй урт хугацааны бодлогын дэмжлэг болох юм гэдгийг Засгийн газрын тэргүүн онцолж байсан. Түүнчлэн НӨАТ-аас чөлөөлж, татварыг импортын хүнс ногоон дээр тавьж байгаа нь  гадны  чанартай, чанаргүй  хүнсний ногооноос  иргэдээ хамгаалж байгаа хэлбэр  гэдгийг  Ерөнхий сайд С.Батолд тэмдэглэж байна. Түүнчлэн татварын болон борлуулалтыг дэмжихийн зэрэгцээ урт хугацаанд тогтвортой борлуулах энэ нөхцөлийг  хангаж ажиллана гэдгийг  ч дурьдаж байв .

Зоорь агуулахаас авахуулаад борлуулалтын сүлжээг төв газруудад нээж ажиллуулах үүргийг зохих газруудад  Засгийн газрын тэргүүн өгчээ.  Харин энэ нөхцөл боломжоо үр дүнтэй ашиглах, ургацаа хугацаанд нь бүрэн  хурааж авах асуудал та бүгдийн хариуцлагын асуудал юм шүү гэдгийг Ерөнхий сайд тариаланчдад сануулаад,  хүйтэн орохоос өмнө  14-21 хоногийн хугацаанд ургацаа хурааж авч дуусгахыг тэдэнд үүрэг болголоо. Ерөнхий сайд С.Батболд болон салбарын сайд нь хөдөө аж ахуй, газар тариалангийн  энэ салбараа дэндүү сайн мэддэг нь энэ уулзалтын явцаас илт харагдаж байсан. Тиймдээ ч тэдний хүсэн хүлээж байсан санхүүгийн дэмжлэгийг хэрэгтэй үед нь үзүүлж, хэрхэн яаж ажиллахыг харилцан  ийнхүү ярилцлаа. Засгийн газар, тариаланчдын ойлголцлын түвшин нэг байна.

Монголчууд бид дээд зэргийн чанартай гурил хүнсэндээ хэрэглэх нь

Газар тариалангийн бүсүүдээр Ерөнхий сайд С.Батболдыг явж байхад тариаланчид маань энэ жилийн ургацад хоёр давуу тал, онцлог байгааг тэмдэглэж байв. Юуны өмнө энэ жилийн тарианы талбай маш цэвэрхэн, хогийн ургамал бараг ургаагүй . Хоёрдугаарт тариан түрүү маш их арвин, дээд тал нь 60 ширхэг байгаа нь маш их онцлогтой төдийгүй цавуулаг сайтай байгааг хэлж байсан. Энэ нь гурил чанартай болох хамгийн гол үндэс юм гэдгийг тэд дурьдаад, Атрын гуравдугаар аян үнэхээр үр дүнгээ өгч, Засгийн газраас ч  биднийг сайн дэмжсэний үр дүн. Одоо бидэнд цаг агаарын мэдээг хурдан шуурхай гаргаад өгчихвөл бид ажлаа сайн хийх л үлдлээ хэмээн ярьцгааж байсан нь Засгийн газрын тэргүүнд ч бас урам нэмсэн үг байлаа.

Дэлхийн стандарт ургацын талбайд хүч түрэн орж ирж байна

Өнгөрсөн хоёр жилийн хугацаанд техник тоног төхөөрөмжүүдээ сайн шинэчилсэн , төрөл тус бүртээ 60-80 хувь шинэчлэгдэж чадсан нь  ургац сайн авахад нөлөөлсөн нь дамжиггүй хэмээн тариаланчид ярьж байна. Энэ жилийн хувьд АНУ-ын Жон Дейр  компанийн комбайн манай ургацыг хураахад хүч түрэх  нь.  Монгол улсын Ерөнхий сайд С.Батболд Сэлэнгэ аймгийн Сайхан сумын тариалангийн талбайд ажиллах зуураа тус компанийн 10 комбайныг Хөвсгөл, Сэлэнгэ, Булган, Дорнод зэрэг аймгийн  газар тариалан эрхэлдэг  компаниудад  хүлээлгэж өглөө.

Манай монголчуудын хэрэглэдэг байсан ОХУ-ын Нива комбайн  өдөрт дээд тал нь 24 га газрыг хураадаг байсан бол, АНУ-ын Жон Дейр  40 га газрыг буюу хоёр дахин хурдтай өгөөжтэй ажиллах хүчин чадалтай   гэнэ.  Мөн хураалтын явцад хаягдал бараг  гардаггүй, будаагаа няцалдагггүй зэрэг олон сайн талтай юм байна. Сүүлийн үеийн технологид суурилсан техник авахыг тариаланчид хүсдэг болсон бөгөөд энэ нь ч ургацад сайнаар нөлөөлж байгааг тэд ярилаа. Гэхдээ  ОХУ-ын Нива бидний ажлыг нэлээдгүй нугалж байсан шүү гэх үгсийг ч унагаж байсан.

Түүнчлэн төмс, хүнсний ногоо тариалж байгаа жижиг аж ахуйн нэгж, өрхүүдэд гар ажиллагааг мехникжуулах тоног төхөөрөмжийг Сэлэнгэ аймгийн Баянгол сумын тариаланчдад олгосон. Энэ жил 500 –гаад аж ахуйн нэгжид ийм тоног төхөөрөмжийг өгөх зорилттой байгааг Засгийн газрын тэргүүн тэмдэглэж байв . Дотоодын компаниудаа  дэмжихийн зэрэгцээ өрхийн үйлдвэрлэл, тэдний аж ахуйг дэмжих бодлого тэднийг тойроогүй гэдгийг Ерөнхий сайд дурьдаж байлаа.   Мөн энэ үеэр яригдаж байсан нэг зүйл нь жижиг аж ахуйн нэгжүүдийн хооронд дундын үйлчилгээний төвүүдийг байгуулснаар тэд бусдыгаа ажлаа хийж дуусахыг хүлээж, цаг алддаг байдал энэ жил алга боллоо хэмээн хэлж байсан нь нэг онцлог гэж хэлж болно.

Тансаг рестораны хэмжээний зоогийг Сэлэнгийн нэгэн айлд амталлаа

Ерөнхий сайд С.Батболд Сэлэнгэ аймгийн Мандал суманд ажиллахдаа тус сумын иргэн Чүлтэм гуайнхаар зочилсон. Тэрбээр хашаандаа гүзээлзгэнэ, бөөрөлзгөнө бас бус ховор ногоо жимс тарьсан нь олны нүдийг хужирлаж байв. Долоо хоногт хоёр удаа ургац авч, нэг удаа авахдаа бараг 20 кг орчим гүзээлзгэнэ хураан авч байгаагаа энэ буурал Засгийн газрын тэргүүнд хуучилсан. Ихэнхдээ захиалгаар гүзээлзгэнээ борлуулчихдаг хэмээн ярих энэ буурал тун ч тохилог амьдардаг төдийгүй  хотын тансаг зочид буудлын хоолны цэсэнд байдаг хоол амттан энэ айлын ширээн дээр харагдсан нь   ажилсаг хүн  хаана ч  сайхан амьдардагийн томхон жишээ болж байлаа гэж Засгийн газрын хэвлэл мэдээллийн албанаас мэдээллээ.

Дэлхийн стандарт боловсролыг монголд нутагшуулах Ерөнхий сайд С.Батболдын санаачилсан ажлын эхлэл энэ хичээлийн жилийн онцлог болж байна. Өөрөөр хэлбэл Ерөнхий боловсролын сургуулиуд энэ жилээс эхлэн олон улсад хүлээн зөвшөөрөгдсөн Кембрижийн стандартаар хичээллэж эхэллээ. Монгол орны боловсролын салбарын шинэчлэлийн том хуудсыг хамтдаа нээсэн энэ жилийн есдүгээр сарын 1 буюу эрдмийн баярыг Монгол улсын Ерөнхий сайд С.Батболд нийслэлийн гэр хорооллын 58 дугаар сургуулийнхантай цугтаа угтлаа. Сурлага, урлаг спортын өндөр амжилтаар ч тус сургуулийнхан энэ хичээлийн жилээ эхлүүлж байгаа аж.

Засгийн газрын тэргүүн тус сургуулийн ёслолын арга хэмжээнд  хэлсэн үгэндээ жил бүрийн хичээлийн шинэ жил өөрийн гэсэн өвөрмөц онцлогтой байдаг , энэ жилийн хувьд эдийн засгийн боломжийг хүн руугаа чиглүүлж ажиллуулах  дөрвөн чухал мэдээлэл байгааг онцоллоо. Нэгдүгээрт Кембрижийн стандарт хэрэгжиж эхэлсэн нь боловсролын салбарт хийгдэж буй томоохон шинэчлэл юм гэдгийг тэмдэглээд, Кембрижийн сургуулийн суралцагчид англи, монгол хос хэлээр сургалтаа явуулж, төгсөгчид нь дэлхийн хэмжээний нэр хүндтэй сургуульд элсэн суралцах эрхтэй болж, монголын боловсролын тогтолцоо олон улсад хүлээн зөвшөөрөгдөж эхэлнэ гэдгийг дурьдлаа.

Ирэх жил нийслэлийн дүүрэг бүрт, бүх аймгийн төвүүдэд Кембрижийн стандартаар хичээллэх сургуулийг байгуулна , харин энэ стандартаар хичээллэх сургуулийн удирдлага, багш нарын гүйцэтгэх үүрэг хариуцлага асар их учраас энэ жилээс эхлэн ЕБС-иудын багшлах боловсон хүчний асуудалд Засгийн газраас  онцгой анхаарах болно гэдгийг тэмдэглэлээ.  2011-2012 оны хичээлийн жилд Монгол улсын Ерөнхий сайд “  Монгол хүүхэд “ хөтөлбөрийг санаачлан хэрэгжүүлж ажиллахаа мэдэгдсэн нь энэ өдрийн бас нэг шинэ мэдээ байлаа. Уг хөтөлбөрийн хүрээнд Ерөнхий боловсролын сургуулиудын бүх сурагчдыг эрүүл мэндийн нарийвчилсан үзлэгт үнэ төлбөргүй хамруулах бөгөөд ингэснээр монголын ирээдүйн залуус эрүүл чийрэг өсч торних,   сурах, өрсөлдөх нөхцөл  байдал хангагдана хэмээн үзэж байгаагаа Засгийн газрын тэргүүн дуулгаж байна.

3 дахь сюрприз нь Ерөнхий боловсролын бүх сургуулиудад стандарт хангасан биеийн тамирын заалтай болгоход чиглэсэн бодлогыг энэ хичээлийн жилээс авч хэрэгжүүлэх бөгөөд ирэх гурван жилд ажлыг гүйцэтгэсэн байх зорилтыг тавьж байгаагаа дуулгалаа.  Энэ арга хэмжээний хүрээнд “”Монгол мөрөөдлийн баг” сагсан бөмбөгийн хөтөлбөрийг хэрэгжүүлэхээр болж байна. Энэхүү хөтөлбөр нь хүүхэд багачуудыг спортоор хичээллүүлэх, эрүүл чийрэг монгол хүнийг бий болгоход чиглэгдэж байгааг Ерөнхий сайд С.Батболд тэмдэглэлээ. Мөн энэ хичээлийн жилээс эхлэн ЕБС-ийн 1-3 ангиудад иргэний боловсролын хичээл заах болсон нь шинэлэг бөгөөд хүүхэд багачуудад эх орноо хайрлаж, бахархан дээдлэх, ахас ихэсээ хүндлэх, үндэсний дархлааг бэхжүүлэх зорилготой хэмээн гүйцэтгэх засаглалын тэргүүн ач холбогдлыг нь үнэлж байна.

Монголын төр, айл өрх, иргэн бүр чамбайлан бэлтгэж  хүндэтгэл ёслолоор дүүрэн тэмдэглэдэг  хичээлийн шинэ жилийн   баярт Засгийн газрын тэргүүн  ийн сюрприз барилаа. Ярьснаа бодит ажил хэрэг болгох эхний алхмыг ч  эхлүүлсэн гэдгээ Ерөнхий сайд нийслэлийн 58 дугаар сургуулийн спорт заалны нээлтэд оролцохдоо харууллаа. Тохилог ариун цэврийн өрөө, халуун устай энэхүү шинэхэн спорт цогцолборыг Ерөнхий сайд С.Батболдын санаачилгаар УИХ-ын гишүүнийх нь хөрөнгө оруулалтаар босгожээ.

Хөлбөмбөгийн зургаан баг, Үндэсний болоод чөлөөт бөхийн  спортоор амжилт гаргасан олон авьяаслаг сурагчидтай 58 дугаар сургуулийн багачууд Ерөнхий сайдыг сагс тоглож өгөхийг ч  гуйгаад амжсан. Засгийн газрын тэргүүний хүүхэд насны есдүгээр сарын 1-ний дурсамжийг сонирхсон сэтгүүлчийн асуултад тэрбээр хариулахдаа найман настай ахыгаа   дагаж уйлсаар яваад  долоон  настайдаа  нэг ангид хамт орж байсан гэгээн дурсамжаа уудаллаа