batbold

Blog

  • Хүн ам, орон сууцны тооллогод 2 сая 650 мянга 673 хүн хамрагджээ

    Хүн ам, орон сууцны тооллогод 2 сая 650 мянга 673 хүн хамрагджээ 2010 оны 11 дүгээр сарын 19-ний мэдээгээр хүн ам, орон сууцны тооллогод 714 784 өрхийн 2 сая 650 мянга 673 хүн хамрагдсан урьдчилсан дүн гарчээ. Гэхдээ үүнд Гадаад харилцааны яам болон интернетээр тоологдсон иргэн, Хууль зүй, дотоод хэргийн яам, Батлан хамгаалах яамны шугамаар тоологдсон цэргийн албан хаагч, сэжигтэн, хоригдол, яллагдагчийн тоо ороогүй байгаа юм.

    Хүн ам, орон сууцны тооллогын Улсын комисс 2011 оны 2 дугаар сарын 10-ны өдөр хуралдаж ажлынхаа явцыг хэлэлцсэн байна. Тоологдсон өрх, хүн амын тоо, нас, хүйс, тэдний амьдарч байгаа орон сууцны төрлийн талаарх эцсийн дүнг энэ оны 7 дугаар сард багтаан эцэслэн гаргах ёстой. Энэ ажлыг тогтоосон хугацаанд нь хийж дуусгахыг Монгол Улсын Ерөнхий сайд, Тооллогын улсын комиссын дарга С.Батболд гишүүдэд үүрэг болголоо.

    Мэдээлэл боловсруулах ажлын хүрээнд Үндэсний статистикийн хороо аймгуудын тооллогын мэдээг цахим санд оруулж дууссан бөгөөд нийслэлийн  дүүргүүдийн материалыг шалган хүлээн авч байна. Манай улсын хувьд анх удаа интернет ашиглан гадаадад байгаа иргэдээ тоолсон, газар зүйн мэдээллийн систем үүсгэсэн нь энэ удаагийн тооллогын томоохон ажлын нэг хэсэг. Хүн ам, орон сууцны тооллогыг 2010 оны 11 дүгээр сарын 11-17-ны өдрүүдэд 30 мянган тоологчийн хүчээр орон даяар амжилттай зохион байгуулсан юм

  • Засгийн газрын хуралдаан 2011 оны 2 дугаар сарын 09-ний өдөр болж дараах асуудлыг хэлэлцэн шийдвэр гаргалаа

    БАРУУН БҮСИЙН ЭРЧИМ ХҮЧНИЙ ЭХ ҮҮСВЭРИЙГ НЭМЭГДҮҮЛЭХЭЭР БОЛЛОО

    Завхан, Говь-Алтай аймгийн хэрэглэгчдийг цахилгаанаар найдвартай хангах улмаар баруун аймгуудын эрчим хүчний эх үүсвэрийг нэмэгдүүлэх зорилгоор  Завхан аймгийн Тэлмэн суманд дулааны цахилгаан станц байгуулахаар Засгийн газрын хуралдаанаас шийдвэрлэлээ. Станцыг Могойн голын нүүрсний уурхайг түшиглэн байгуулах бөгөөд 2012 оны сүүл гэхэд Завхан, Говь-Алтай аймгийн хэрэглэгчдийг цахилгаанаар бүрэн хангах 30 МВт чадалтай эхний хэсэг ашиглалтад оруулахаар төлөвлөж байна.  

    Дулааны цахилгаан станц байгуулах талаар байгуулсан гэрээг Концессын хуулийн хүрээнд шинэчлэн зохих журмын дагуу байгуулж, төслийг хэрэгжүүлэх ажлыг зохион байгуулан Засгийн газрын хуралдаанд танилцуулахыг Эрдэс баялаг, эрчим хүчний сайд Д.Зоригт, Төрийн өмчийн хорооны дарга Д.Сугар нарт даалгалаа.

    Засгийн газрын 2009 оны 10 дугаар сарын 07-ны өдрийн хуралдаанаар цаг үеийн тулгамдсан асуудал болох Завхан, Говь-Алтай аймгийн цахилгаан хангамжийн талаар хэлэлцэн асуудлыг шуурхай шийдвэрлэхийг Эрдэс баялаг, эрчим хүчний яаманд чиглэл болгосон юм. Энэ дагуу дулааны цахилгаан станц барих, Алтай-Улиастайн эрчим хүчний систем болон Хөвсгөл аймгийн хэрэглэгчдийг цахилгаан эрчим хүчээр хангах чиглэлээр хамтарч ажиллах Санамж бичигт Эрдэс баялаг, эрчим хүчний яам,  “Шинэ Азиа Майнинг групп” ХХК гарын үсэг зурсан байна.

    Мөн Могойн голын уурхайг түшиглэн 60 МВт-ын хүчин чадалтай станцыг “барих-ашиглах-өмчлөх” нөхцлөөр барих гэрээ байгуулжээ. Үүнээс хойш техник, эдийн засгийн үндэслэл боловсруулах, тоног төхөөрөмж, технологи сонгох, захиалах, барилгын зураг төсөл хийх, геологийн судалгаа, тооцоо гээд эхний шатны ажил хийгдэж дууссан.  Одоо Тэлмэн-Могойн голын 95 км, Могойн гол-Мөрөнгийн 175 км урт цахилгаан дамжуулах агаарын шугамын ажил хэвийн үргэлжилж байна гэж Засгийн газрын Хэвлэл, мэдээллийн албанаас мэдээллээ.  

    ХУВИЙН ХЭВШЛИЙН ХӨГЖЛИЙГ ДЭМЖИНЭ

    Хувийн хэвшлийн хөгжлийг дэмжих үндэсний стратеги, хэрэгжүүлэх арга хэмжээний төлөвлөгөөг Засгийн газрын хуралдаанаар хэлэлцэн баталлаа. Хэрэгжүүлэх арга хэмжээ, шаардагдах хөрөнгийг жил бүрийн эдийн засаг, нийгмийг хөгжүүлэх үндсэн чиглэл, улс, орон нутгийн төсөвт тусгаж, гадаад орон, олон улсын байгууллагын зээл, тусламжид хамруулан санхүүжүүлж байхаар болов. Үндэсний стратеги нь бизнес эрхлэх таатай орчин бүрдүүлэх, хувийн хэвшлийн өрсөлдөх чадварыг дээшлүүлэх, төр, хувийн хэвшлийн хамтын ажиллагаа, түншлэлийг харилцан ашигтайгаар хөгжүүлж, ажлын байр, хөдөлмөрийн бүтээмжийг нэмэгдүүлэхэд төрөөс дэмжлэг үзүүлэх зорилготой юм.

    “Хувийн хэвшлийн хөгжлийг дэмжих үндэсний стратеги”-ийн хүрээнд :

    ·         Хувийн хэвшлийн хөгжлийг дэмжих эрх зүйн таатай орчин бүрдүүлэх

    ·         Хувийн хэвшлийн хөгжлийг эдийн засаг, санхүү, хөрөнгө оруулалт, гадаад худалдааны бодлогоор хөхиүлэн дэмжих

    ·         Төр, хувийн хэвшлийн хамтын ажиллагааг өргөжүүлж, төрийн үйлчилгээг ил тод, шуурхай болгох

    ·         Хувийн хэвшлийн хөгжлийг хөдөлмөр эрхлэлт, мэргэжлийн боловсрол, сургалт, хүний нөөцийн бодлогоор дэмжих юм байна.

    Стратегийг 2011-2013, 2014-2016 онд хоёр үе шаттай хэрэгжүүлснээр хувийн хэвшил, бизнес эрхлэгчдийн тогтвортой хөгжлийг дэмжиж ажиллах таатай орчин бүрдэн, хөрөнгө, санхүүгийн олон төрлийн эх үүсвэр бий болж, Дотоодын нийт бүтээгдэхүүний үйлдвэрлэл өсч, төсвийн бүрдүүлэлт нэмэгдэнэ. 2010 оны 7 дугаар сарын 1-ний байдлаар улсын хэмжээнд хувийн хэвшлийн 68 мянган аж ахуйн нэгж, байгууллага бүртгэлтэй байна. Эдгээрийн 40 орчим мянга нь  идэвхтэй ажиллаж сүүлийн 4 жилийн байдлаар Дотоодын нийт бүтээгдэхүүний 64.4-71.9 хувийг бүрдүүлж байгаа гэсэн судалгаа гарчээ.

    Татварын нийт орлогын 30 орчим хувийг аж ахуйн нэгжийн орлогын албан татвар эзэлж, ажиллах хүчний 70 гаруй хувь буюу 800 мянга гаруй хүн энэ салбарт ажиллаж байгаа нь ажлын байр бий болгох, ядуурлыг бууруулахад томоохон үүрэг гүйцэтгэж байгаагийн илрэл юм. Дэлхийн банкны гаргасан судалгаагаар манай улс бизнес эрхлэх орчин, нөхцөл байдлаараа 2009 онд 181 орноос 58, 2010 онд 183 орноос 60 дугаар байрт орсон. Энэ нь зээлжих нөхцөл таатай бус, хугацаа богино, хүү өндөр, төрөөс бизнест үзүүлэх үйлчилгээ ил тод бус, зөвшөөрөл, лиценз авах шат дамжлага олон, санхүүжилтийн олон хэлбэрийн эх үүсвэр бий болгох эрх зүйн орчин бүрдээгүй зэрэг олон шалтгаанаас үүдэлтэй. Иймээс хувийн хэвшлийг дэмжиж, хөгжүүлэхээр Засгийн газар үндэсний стратеги боловсруулж хэлэлцэн баталлаа гэж Засгийн газрын Хэвлэл, мэдээллийн албанаас мэдээллээ.  

    ЦЭРГИЙН АЛБАН ХААГЧИД НЭГ УДААГИЙН ТЭТГЭМЖ АВНА

    Цэргийн албан хаагчид нэг удаагийн тэтгэмж олгох журмыг Засгийн газрын хуралдаанаар хэлэлцэн баталлаа. Цэргийн албан хаагчийн тэтгэвэр, тэтгэмжийн тухай хуулийн 4 дүгээр зүйлийн 1 дэх хэсгийн 1-5 дахь заалтад хамаарах цэргийн албан хаагч, мөн хуулийн 8.1, 8.2-т заасан үндэслэлээр тэтгэвэр тогтоолгосон иргэн нэг удаагийн тэтгэмж авах эрхтэй. 

    Хуулийн 19.1-д заасан үндэслэлээр цэргийн алба хаасны тэтгэвэр авах эрх үүссэн цэргийн албан хаагчид сүүлийн 5 жилийн цалин, хөлсний нийлбэрийг 60-д хувааж, гарсан дундаж цалин, хөлсийг 36 дахин нэмэгдүүлсэнтэй тэнцэх хэмжээгээр олгох юм. Хуулийн 8.1-д заасан хугацааг хангаагүй боловч 10-аас доошгүй жил цэргийн алба хаасан, орон тоо, зохион байгуулалтын өөрчлөлт, биеийн эрүүл мэнд, цэргийн алба хаах нас хэтэрч халагдсан хүн сүүлийн 5 жилийн цалин, хөлсний нийлбэрийг 60-д хувааж, гарсан дундаж цалин, хөлсийг 18 дахин нэмэгдүүлсэнтэй тэнцэх хэмжээний тэтгэмж авах эрхтэй.

    Цэргийн алба хаасны тэтгэвэр авах эрх үүссэн, цэргийн жинхэнэ алба хаах хугацааг сунгасан шийдвэр гарсны дараа цэргийн албан хаагчийн нэг удаагийн тэтгэмжийн 18 сар хүртэлх хугацаанд ногдох хэсгийг өөрийнх нь хүссэнээр олгож болохоор журамд тусгажээ. Энэ журам зэвсэгт хүчин, хил, дотоодын цэрэг, тагнуул, цагдаа, шүүхийн шинжилгээний, онцгой байдлын болон шүүхийн шийдвэр гүйцэтгэх байгууллагад хамаарна гэж Засгийн газрын Хэвлэл, мэдээллийн албанаас мэдээллээ. 

    ЦЭРГИЙН ДҮЙЦҮҮЛЭХ АЛБЫГ 2 САЯ ГАРУЙ ТӨГРӨГӨӨР ХААНА

    Цэргийн дүйцүүлэх албыг 2011 онд мөнгөн төлбөрийн хэлбэрээр орлуулан хаах иргэний нөхөн төлбөрийн хэмжээг 2,632,770 /хоёр сая зургаан зуун гучин хоёр мянга долоон зуун дал/ төгрөг байхаар Засгийн газрын хуралдаанаас тогтлоо. Мөн хуралдаанаар цэргийн албыг дүйцүүлэн хаах иргэдийн тооны дээд хязгаарыг батлав. Өнгөрсөн онд Онцгой байдлын ерөнхий газрын харъяа анги, салбар, аврах отряд, хилийн цэрэгт туслах хүчин, хүмүүнлэгийн байгууллагад тодорхой тооны залуус цэргийн албаа дүйцүүлэн хааж цэргийн анхан шатны бэлтгэл эзэмшсэн байна.

    Үүний зэрэгцээ Засгийн газрын үйл ажиллагааны мөрийн хөтөлбөрт тусгагдсан экологийн сүйрлээс сэрэмжлэн хамгаалах, ойжуулах, цөлжилттэй тэмцэх, байгалийг нөхөн сэргээх, байгалийн гамшиг, ослын хор уршгийг арилгах, хүн, малын гоц халдварт өвчинтэй тэмцэх, урьдчилан сэргийлэх, аймаг, орон нутгийн бүтээн байгуулалтын ажилд оролцжээ.

    ТАВАНТОЛГОЙН ОРДЫГ АШИГЛАХ ҮЙЛ АЖИЛЛАГААНЫ ТАЛААР МЭДЭЭЛЭЛ СОНСОВ

    Тавантолгойн ордыг ашиглах үйл ажиллагааны явцын тухай танилцуулгыг Засгийн газрын хуралдаанаар сонсон танилцуулга, урьдчилсан сонгон шалгаруулалтын явцыг Улсын Их Хуралд танилцуулах нь зүйтэй гэж үзлээ. УИХ-ын 39 тоот тогтоолын хүрээнд Засгийн газар уг орд газрыг ашиглахтай холбоотой асуудлыг удаа дараа хэлэлцэн тогтоол, шийдвэр гарган ажиллаж байгаа. Үүний дүнд Тавантолгойн ордын Цанхийн зүүн талбайд уурхайн ажлыг эхлүүлж, нүүрс экспортод гаргаж эхлэхэд бэлэн болсон байна.

    Ордыг ашиглах үйл ажиллагааг цаашид хариуцах “Эрдэнэс Тавантолгой” компаний хувьцааг иргэд, аж ахуйн нэгжид эзэмшүүлэх, гадаад, дотоодын хөрөнгийн зах зээлд арилжаалах бэлтгэлээ хангаж байна. Тавантолгойн ордын тодорхой хэсэгт хөрөнгө оруулж, хамтран ажиллах аж ахуйн нэгжийг шалгаруулах олон улсын нээлттэй тендерийн эхний үе шат дуусах дөхөж байна. Үүний дараа оролцогчидтой УИХ-ын тогтоолын дагуу дамжин өнгөрөх тээвэр, угтуулан тавих нөхцөл, боомт ашиглалт, урьдчилгаа төлбөр, бүтээгдэхүүний борлуулалт, хөрөнгө оруулалтын нөхцөлийн талаар хэлэлцээ хийн хамтран ажиллах нэгдсэн компани /консерциум/-ийг шалгаруулна.

    2011 он Тавантолгойн ордыг ашиглах үйл ажиллагааны эхлэлийн гол жил учир Засгийн газар онцгой анхаарал хандуулж байна. Тухайлбал тус ордоос эхний ээлжинд 2 сая орчим тонн нүүрс олборлож экспортод гаргах, төслийн санхүүжилт босгох, “Эрдэнэс Тавантолгой” компанийг гадаад, дотоодын Хөрөнгийн биржид гаргах, усны хангамж, баяжуулах үйлдвэр, уурхайчдын хотхон, цахилгаан станц, авто зам зэрэг их бүтээн байгуулалтын олон ажлыг эхлүүлэх юм.

    ЭНЭ САРД ДИЗЕЛИЙН ТҮЛШНЭЭС ОНЦГОЙ АЛБАН ТАТВАР АВАХГҮЙ

    Сүхбаатар, Замын-Үүд, Эрээнцав, Алтанбулаг боомтоор орж ирж байгаа А-80 автобензинд 190 мянган төгрөгийн онцгой албан татвар ногдуулж байсныг 160 мянган төгрөг болгохоор Засгийн газрын хуралдаанаас шийдвэрлэлээ. АИ-92 автобензинд 230 мянган төгрөгийн онцгой албан татвар ногдуулж байсныг хэвээр үлдээсэн бол дизелийн түлшнээс авч байсан 20 мянган төгрөгийн онцгой албан татварыг “0” болгосон байна.

    Энэ шийдвэрийг 2011 оны 2 дугаар сарын 11-ний өдрөөс эхлэн дагаж мөрдөнө. ОХУ-ын Роснефть компаниас манай улсад нийлүүлэх газрын тосны бүтээгдэхүүний импортын үнэ 2011 оны 2 дугаар сард А-80 автобензин тонн тутамд 72, АИ-92 автобензин 21, дизелийн түлш 78 ам. доллараар тус тус өссөн байна. 

    ЭРЧИМ ХҮЧНИЙ ТУХАЙ ХУУЛЬД НЭМЭЛТ, ӨӨРЧЛӨЛТ ОРУУЛАХЫГ ДЭМЖИВ

    Эрчим хүчний тухай хуульд нэмэлт, өөрчлөлт оруулах тухай хуулийн төслийг Засгийн газрын хуралдаанаар хэлэлцэн дэмжиж, Улсын Их Хуралд өргөн мэдүүлэхээр тогтлоо. Төрийн захиргааны төв байгууллагын эрх үүрэг, эрчим хүчний тусгай зөвшөөрөл эзэмшигч болон хэрэглэгчийн харилцаа, эрчим хүчний салбар зах зээлийн харилцаанд бүрэн шилжих тохиолдолд цахилгаан, дулааны үнийг индексжүүлэх, үнийн нөлөөллийг тооцох аргачлал болон салбарын ажилд баримтлах бодлого норм, гэнэтийн болон давагдашгүй хүчин зүйлийн нөлөөллөөс үүссэн хохирлын нөлөөг багасгах, түлшний аюулгүйн нөөц бүрдүүлэх зэрэг асуудлын хөрөнгийн эх үүсвэрийг шийдвэрлэх, эрх зүйн орчныг бүрдүүлэх зорилгоор хуулийн төсөл санаачилсан байна.

    Засгийн газар нь эрчим хүчний үнэ, тарифыг индексжүүлэх журам батлах, эрчим хүчний аюулгүйн нөөцийн жагсаалт батлах, нөөц бүрдүүлэх, түүний хөрөнгийн эх үүсвэрийг шийдвэрлэх, нэгдсэн сүлжээний арилжааны үйл ажиллагааг зохицуулсан зах зээлийн дүрэм батлах эрхтэй байхаар төсөлд тусгажээ. Төрийн захиргааны төв байгууллагын эрх, үүрэгт салбарын хэмжээний бодлогыг боловсруулахад шаардагдах зарим дүрэм, журам боловсруулан батлах, халаалтын улирлын хугацааг тогтоох, хүний нөөцийн бодлогыг боловсруулан хэрэгжүүлэх үүргийг нэмж тусган, байгууллагын эрх, үүргийг тодотгож өгсөн байна.

    Эрчим хүчний дамжуулалтын шугамын хамгаалалтын зурвасыг чөлөөлөх нь эрчим хүчний тусгай зөвшөөрөл эзэмшигчээс гадна орон нутгийн удирдлагын эрх, үүргийн нэг байхаар тусгасан байна. Зохицуулах газрыг Зохицуулагчдын зөвлөл болгон өөрчилж даргыг нь аж ахуйн ажлаас чөлөөлж, зөвхөн зохицуулалтын ажлаа хийх, зөвлөлийн бие даасан байдлыг хангах, орон тоог нэмэгдүүлэн үүрэг, хариуцлагыг нь дээшлүүлэхээр төлөвлөжээ.

    АЛДАНГИЙН ХЭМЖЭЭГ ТОГТООВ

    Хуулиар тогтоосон хугацаанд төлөөгүй болон татварын албан, татварын улсын байцаагчийн буруугаар татвар төлөгчөөс үндэслэлгүй, илүү хураасан татварт тооцох алдангийн хэмжээг хоног тутамд 0.056 хувь байхаар тогтлоо. Алдангийн хэмжээг тогтоохдоо арилжааны банкуудаас олгосон төгрөгийн зээлийн жигнэсэн дундаж хүүнд үндэслэсэн байна. 2010 оны 11 сарын байдлаар зээлийн жигнэсэн дундаж хүү жилийн 20.15 хувь, сарын 1.68 хувь, хоногийн 0.056 хувь байжээ.

    БҮТЭЭГДЭХҮҮН ХУВААХ ГЭРЭЭГ БАТЛАВ

    Сүхбаатар аймгийн нутаг дэвсгэрт орших “Дарьганга-XXIV” талбайд үйл ажиллагаа явуулах тухай Газрын тосны газар, “Апекспро Инвестмент Лтд” ХХК-тай байгуулсан Бүтээгдэхүүн хуваах гэрээг баталлаа. Бүтээгдэхүүн хуваах гэрээний үндсэн нөхцлүүдийг сайжруулах, гэрээний төсөлд нэмэлт өөрчлөлт оруулах талаар хэлэлцээ хийж, роялти /байгалийн нөхөн сэргээгдэшгүй баялаг ашигласны төлбөр/ 10 хувь байсныг 10.75 хувь, Засгийн газарт ногдох бүтээгдэхүүн хуваалтын доод хэмжээ 40 хувиас эхэлж байсныг 43 хувиар эхлүүлж, Засгийн газарт ногдох бүтээгдэхүүний дээд хэмжээ 60 хувь байхаар харилцан тохиролцсон байна.

    Мөн хуралдаанаар газрын тосны хайгуулын Төхөм-Xталбайд Газрын тосны газар, “Монголын алт” ХХК-тай байгуулах Бүтээгдэхүүн хуваах гэрээний төслийг зарчмын хувьд дэмжиж Үндэсний аюулгүй байдлын зөвлөлд танилцуулахаар боллоо. “Монголын алт” ХХК газрын тосны хайгуулын үе шат болох 5 жилд нийт 22 390 000 мянган ам. долларын хөрөнгө оруулалт хийж геологи, хайгуул, геофизик, чичирхийллийн судалгаа, хайгуулын өрөмдлөгө хийх юм.

    ҮНДЭСНИЙ ЗӨВЛӨЛИЙГ ЕРӨНХИЙ САЙД АХАЛНА

    Манай улс 2011-2013 онд Ардчилсан орнуудын хамтын нийгэмлэг /АОХН/- ийг тэргүүлэн ажиллана. Үүнийг удирдан зохион байгуулах, чиг үүргээр хангах Үндэсний зөвлөлийг Монгол Улсын Ерөнхий сайд ахалж ажиллахаар боллоо. Манай улс 2011 оны 7 дугаар сараас эхлэн АОХН-ийг даргалах эрхийг Литва Улсаас хүлээн авах юм. Энэ хугацаанд манай улс ардчиллын үнэт зүйлсийг улам бүр хэвшүүлэх, улмаар шинэ тулгар ардчиллыг тогтворжуулах, ардчиллын боловсролыг хөгжүүлэх, АОХН-ийн бүс нутгийн үйл ажиллагааг бэхжүүлэхийг зорьж ажиллахаар төлөвлөж байна. 

    АОХН нь ардчиллыг дэмжин, ардчиллын хэм хэмжээ, институцийг түгээн бэхжүүлэхэд улс орнуудын нэгдмэл байр суурийг баталгаажуулах зорилготой Засгийн газар хоорондын байгууллага юм.

  • Ерөнхий сайд ноолуур, ноос боловсруулах салбарынхныг гэрийн даалгавраа хийхийг даалгалаа

    Ерөнхий сайд ноолуур, ноос боловсруулах салбарынхныг гэрийн даалгавраа хийхийг даалгалааМонгол Улсын Ерөнхий сайд С.Батболд өнөөдөр үдээс хойшхи ажлын цагаа ноолуур, ноос, арьс шир боловсруулах салбар болон ой модны үйлдвэрлэлийн салбарын үйлдвэрлэгчидтэй уулзахад зарцууллаа. Эдийн засагт үр өгөөж ихтэй, ажлын байрыг илүү олноор нэмэгдүүлэх боломж бүхий хөнгөн үйлдвэр тэр дундаа ноос, ноолуур боловсруулах салбарын үйлдвэрлэгчидтэй Засгийн газрын тэргүүн эхлээд уулзаж салбарын хөгжлийн талаарх тэдний байр суурь, тодорхой саналыг сонслоо.

    Засгийн газрын тэргүүн уулзалтын эхэнд өнгөрсөн жил хийж бүтээсэн, суурийг нь тавьсан ажлуудаа үр дүнд хүргэж, ажлын байр хөдөлмөр эрхлэлтийг бодитой нэмэгдүүлэхэд онцгой анхаарч ажиллах зорилгоор Засгийн газраас 2011 оныг Хөдөлмөр эрхлэлтийг дэмжих жилээр зарласан. Магадгүй уул уурхайн салбараас ч урт хугацаанд, илүү үр өгөөжтэй байж чадах хөнгөн үйлдвэр, тэр дотроо ноос ноолуурын салбарынханд зах зээлд өрсөлдөх боломж бололцоо их байна. Харин энэ боломжийг тус салбарынхан бүрэн дүүрэн ашиглаж чадахгүй байгаа талаар дурдаад хөнгөн үйлдвэрийн салбарт Засгийн газар онцгой анхаарч туулай жилийн гараан дээр тэднийг хүлээн авч уулзан санал солилцож байгаагаа хэлсэн юм.

    Төр засгийн гол үүрэг бол зах зээлийн боломжийг нь нээж өгөх явдал. Харин тухайн салбарынхан энэхүү боломжийг ашиглах тал дээр идэвх санаачилгатай ажиллахыг уриаллаа. Ингэхдээ нэгдсэн бодлого хөтөлбөр гаргаж өмнөө тулгарч байгаа асуудлаа цогцоор нь шийдэж байж салбар өөрөө хурдацтай урагшилж хөгжинө. Та бүгд татвар тогтоогоод бага хүүтэй зээл өгчихвөл бүх зүйл болчих юм шиг яриад байна. Боловсон хүчин бэлтгэх, ажлын байр бий болгох зэрэг нийгмийн хариуцлагаа ухамсарлах ёстой гэлээ.

    Зах зээлд боломж бий болгох тал дээр салбарынхан өөрсдөө идэвх санаачилгатай ажиллахыг Засгийн газрын тэргүүн уриаллаа. Тэдний үйлдвэрлэлийн бүтэц зохион байгуулалтын талаар хоршиж хамтарч ажиллах санал гаргаж буйг дэмжээд энэ саналыг ажил хэрэг болгохдоо  төр, засаг удирдан чиглүүлэх биш төрийн бус мэргэжлийн холбоод, үйлдвэрлэгч нар илүү идэвх санаачилгатай ажиллах ёстойг тэмдэглэлээ. Ингэхдээ Засгийн газраас салбарын бодлогыг хэрэгжүүлэх, хэрэгжилтэд нь хяналт тавихдаа мэргэжийн холбоодыг илүү түлхүү оролцуулж байх зорилт тавьж ажиллаж байгаагаа дурдлаа.

    Ноолуурын салбар манай улсад ямар ач холбогдолтой талаар ном хаялцахаасаа илүүтэй цаашид ямар ажил хийх гэх мэт санал санаачилгатай ирж, ажил ярьсан уулзалт хийхийг тэдэнд анхаарууллаа. Ингэхдээ Ерөнхий сайд “Нийгэм, улс төр, эдийн засаг, гадаад зах зээл гэхчлэн бүхий л салбарт ноолуурын салбар ямар ач холбогдолтойг бүгд мэднэ. Тиймээс энэ удаагийнх шиг улс төржихөө больё. “Монгол ноолуур” нэгдлийн бүтэц зохион байгуулалт ямар байх юм, үүнд засгийн ямар оролцоо, дэмжлэг шаардлагатай байна гэхчлэн тодорхой санал боловсруулан энэ сарын сүүлээр болох Засгийн газрын хуралдаанд оруулж ирэхийг ХХААХҮ-ийн сайд Т.Бадамжунай болон ноолуур, ноос боловсруулах салбарын үйлдвэрлэгчдэд үүрэг болголоо.

    Газар тариалангийн салбарт тухайлбал, гурил, будааны импортын татварт НӨАТ тавьж байгаа шиг ноос, ноолуурын салбарт ч импортыг хязгаарлах талаар төрийн бодлого гаргаж болно гэдгийг Ерөнхий сайд С.Батболд илэрхийлээд үйлдвэрлэгчид, холбоод нэгдээд энэ асуудлаар санал боловсруулах, үйлдвэрлэгчид мэргэжлийн холбоондоо ач холбогдол өгч, бодлого боловсруулах  чадавхийг нь нэмэгдүүлэх шаардлагатай, эдгээрт төрөөс ямар дэмжлэг хэрэгтэй байгаа талаар асууж сонирхлоо.  Энэчлэн бодитой ажил хэрэгч саналуудтай уулзалтад ирж байхыг дахин анхааруулаад уул уурхайн салбарынхан илүү санаачилгатай ажиллаж байгааг жишээ болгож байлаа.

    Ерөнхий сайд энэ уулзалтын үеэр ноос, ноолуурын үйлдвэрүүд нэгдээд төр засгийн дэмжлэгтэйгээр хөнгөн үйлдвэрийн мэргэжил сургалт үйлдвэрийн төв байгуулах боломж байгаа талаар лавлаад Мянганы сорилтын сангаас ийм төв байгуулах, мэргэжилтэй ажилчин бэлтгэхэд ихээхэн хөрөнгө зарцуулж байна. Гэтэл танай холбоо санал өгөөгүй гэдгийг онцлон хэлээд “Аливаад бүтээлч талаас нь хандаач ээ. Бүгд л их гоё яриад байдаг. Бүгд улстөрч баймааргүй байна. Тодорхой ажил, санал л яримаар байна. Ажлын сайн санал өгөөч, энэ өрөөнд улс төрийн мэдэгдлүүд сонсмооргүй байна. Одоо эндээс гараад ярилц, тодорхой саналууд боловсруул. Ингэж чадвал дараа хийх уулзалт техник эдийн засгийн үндэслэл ярьсан ажил хэрэгч уулзалт болно гэлээ. Ингэхдээ тэрбээр “Та бүхнийг дэмжье гэсэндээ ийм хатуу үг хэллээ шүү” гэж байлаа.

    Нэг удаагийн шийдлээр бүгдийг төгс төгөлдөр шийдэж чадахгүй, боломж ч байхгүй. Хамтарч ажиллах үйл ажиллагааны эхлэл, үүнийг төрийн бодлоготойгоор урагшлуулах суурь уулзалт боллоо. Энэ салбарын ажлыг бага багаар урагшлуулах боломж, шаардлага байгаа. Болж өгвөл томхон ахиулах боломжийг эрэлхийлж байгаагаа Ерөнхий сайд С.Батболд уулзалтад ирсэн хүмүүст хандаж хэллээ.

    Уулзалтад “Ээрмэл”, “Буян”, “Гоёо”, “Алтай кашмир”, “Сор кашмир”, “Ханбогд кашмир” ХХК болон “Эрдэнэт хивс”, “Монгол нэхмэл” ХК-ийн гүйцэтгэх захирлууд болон ХХААХҮЯ, Сангийн яам, Монгол банкнаас албаны хүмүүс оролцлоо

  • С.Батболд: Эцсийн үр дүн нь тодорхой төсөл, хөтөлбөрийг Засгийн газар дэмжинэ

    С.Батболд: Эцсийн үр дүн нь тодорхой төсөл, хөтөлбөрийг Засгийн газар дэмжинэЭцсийн үр дүн нь тодорхой, иргэдээ ажилтай, орлоготой болгосон төсөл, хөтөлбөрийг Засгийн газар бодлого, хөрөнгө санхүүгээр дэмжихэд бэлэн. Хамгийн гол нь тухайн салбарын мэргэжлийн холбоо бодлогоо боловсруулж, түүнийг нь  хэрэгжүүлэхийн төлөө хамтран ажиллах хэрэгтэй байна. Засгийн газраас үзүүлэх ёстой дэмжлэгийг нь үзүүлнэ гэж Монгол Улсын Ерөнхий сайд С.Батболд хэлэв. Тэрээр 2011 оны 2 дугаар сарын 8-ны өдөр Арьс ширний холбооны удирдлага, гишүүдийг хүлээн авч уулзан энэ салбарт тулгамдаж байгаа бэрхшээл, төр, засгаас өгч болох тусламж, дэмжлэг, хамтын ажиллагааны талаар ярилцлаа.

    Энгийн жишээ хэлэхэд, сонирхсон айл өрхийг оёдлын машинаар хангаж, хүмүүсийг нь сургах, зах зээлээ олоход нь туслах замаар ажлын байр бий болгох төсөл, хөтөлбөр байвал дэмжинэ. Өрхийн үйлдвэрлэлийг хөгжүүлэхийн тулд Жижиг, дунд үйлдвэрийг дэмжих сангаас аймаг бүрт квот тогтоон өгч, борлуулалт сайтай бээлий оёх хүсэлтэй иргэдийг дэмжих боломж байна. Ингэснээр дор хаяж 8 мянган ажлын байр бий болох боломж байгаа гэсэн мэргэжлийн холбооны судалгааг Ерөнхий сайд дурдаад энэ хэрээр тухайн өрхийн амьдрал ахуй ч дээшилнэ гэж үзэж байна гэлээ.   

    Ажлын байр бий болгох, техник, технологоо шинэчлэх, технологийн бодлогоо хөгжлийн бодлоготойгоо уялдуулах, үндэсний үйлдвэрлэл, ялангуяа өрхийн үйлдвэрлэлийг бүх талаар дэмжих, мэргэжилтэй боловсон хүчин бэлтгэх, Аж үйлдвэрийн парк, Мэргэжлийн сургалт, үйлдвэрлэлийн төв байгуулах, экспорт, импортын бодлого зэрэг чиглэлээр төр, засгийн зүгээс ямар дэмжлэг хэрэгтэй байгааг тодорхойлж Засгийн газарт асуудлаа оруулах нь зүйтэй. Төлөвлөлт, зохион байгуулалтаа хоёр талаасаа хийж, байгаа боломжоо сайн ашиглаж ажиллая. Засгийн газрын гол үүрэг бол зах зээлийн боломжийг нь нээж өгөх. Энэ тал дээр ахицтай зүйл багагүй байгаа гэж Ерөнхий сайд үйлдвэрлэгчдэд хэллээ.   

    Үндэсний үйлдвэрлэлээ дэмжихийн тулд томоохон аж ахуйн нэгжүүдтэй гэрээ байгуулахдаа өөрсдөө үйлдвэрлэх боломжтой ажлын хувцас, бусад шаардлагатай зүйлийг заавал дотоодын аж ахуйн нэгжээр хийлгэж байх хувилбар байгааг Хүнс, хөдөө аж ахуй, хөнгөн үйлдвэрийн сайд Т.Бадамжунайд зөвлөөд хөтөлбөрөө Засгийн газарт оруулахдаа энэ асуудлыг тусгахыг үүрэг болголоо. Төрийн хяналт, зөвшөөрлийн зарим чиг, үүргийг төрийн бус байгууллагад шилжүүлж байгаа учир тухайн салбарын мэргэжлийн холбоо чадваржих ёстойг Ерөнхий сайд анхааруулж илүү үүрэг, хариуцлагатай байхыг санууллаа.

    Арьс ширний холбооны ерөнхийлөгч Б.Энх-Амгалангийн тавьсан Алтанбулагийн чөлөөт бүсэд арьс ширний үйлдвэрлэлийн нэгдсэн төв байгуулах газрын асуудлыг шийдэх, хөдөө аж ахуйн бирж, эрдэм шинжилгээний хүрээлэн байгуулах, гарал үүслийн гэрчилгээ олгох эрхийг салбарын мэргэжлийн холбоонд шилжүүлэх зэрэг саналыг Ерөнхий сайд  судалж үзэн тодорхой шийд гаргана гэж амлалаа.    

    Энэ 7 хоногт багтан хөнгөн үйлдвэрлийн салбарын талаар авах арга хэмжээний талаар Ажлын хэсэг хуралдаж хэлэлцэнэ. Энэ хуралд Ерөнхий сайдаас гадна Тэргүүн шадар сайд, Шадар сайд, Хүнс, хөдөө аж ахуй, хөнгөн үйлдвэр, Боловсрол, соёл, шинжлэх ухаан, Сангийн сайд нар,  Монголбанк, Үндэсний хөгжил, шинэтгэлийн хороо, мэргэжлийн холбоодын удирдлага зэрэг холбогдох бүх байгууллагын төлөөлөл оролцох юм.

    2 дугаар сарын сүүлээр болох Засгийн газрын хуралдаанаар хөнгөн үйлдвэрийн салбарынхны боловсруулсан бодлогын талаар хэлэлцэнэ

  • Бид ченжийн нийгэмд амьдраад байна. Үүнийг арилгах эрх зүйн харилцааг бий болгох шаардлагатай байна

    Бид ченжийн нийгэмд амьдраад байна. Үүнийг арилгах эрх зүйн харилцааг бий болгох шаардлагатай байнаАливаа бараа бүтээгдэхүүн ченжийн гараар дамждагийг арилгах, эрх зүйн харилцааг бий болгох хэрэгтэй байна. Засгийн газрын зүгээс зах зээлийн боломж нөхцөлийг бүрдүүлэхэд илүү анхаарч ажиллаж байна. Мэргэжлийн холбоод энэ боломжийг ашиглаж, идэвх санаачилгатай ажиллаж чадвал тулгамдсан асуудлаа шийдэх бүрэн боломж байна гэж Ерөнхий сайд С.Батболд Ойчдын нэгдсэн холбоо, Ой модны үйлдвэрлэл эрхлэгчдийн холбооны төлөөллийг хүлээн авч уулзахдаа хэлээ.

    Тус холбоод “Ойн тухай үндэсний хөтөлбөр”-ийн дэд хөтөлбөрийг боловсруулжээ. Хөтөлбөр батлагдсанаар тэдний өмнө тулгамдаад байгаа мод бэлтгэх, боловсруулах  үйлдвэрүүдийн техник технологийг шинэчлэх, ойн гүнд орж, ашиглалтын нас гүйцсэн ойд нэвтрэх ойн зам гаргах зэрэг олон асуудлыг шийдвэрлэх боломжтой тул ойрын хугацаанд Засгийн газрын хуралдаанаар хэлэлцэн баталж өгөхийг хүслээ.

    Түүнчлэн үндэсний үйлдвэрлэгчдээ дэмжиж, сургууль, цэцэрлэгийн ширээ сандлаас эхлээд байгууллага аж ахуйн нэгжийн тавилгыг дотоодынхоо бүтээгдэхүүнээр хангах, импортын түүхий эдийг нэмүү өртгийн татвараас чөлөөлөх, Модны бирж байгуулахад хөрөнгө санхүүгийн дэмжлэг үзүүлэх шаардлагатай байгааг хэлж байна. Үүнээс гадна мод бэлтгэх асуудалд төрийн зохицуулалт шаардлагатай байгааг холбоодын төлөөлөл хэллээ.

    Ерөнхий сайд С.Батболд Шинэ бүтээн байгуулалтын томоохон төсөл хөтөлбөрүүдийг бид эхлүүлж байна. Үүнд үндэсний үйлдвэрүүд, тэр дотроо боловсруулах, хөнгөн үйлдвэрүүдийн оролцоо ихээхэн чухал. Бид үндэсний үйлдвэрүүдээ дэмжиж импортыг багасгах, эсвэл татварын босгыг нэмэгдүүлэх боломжтой. Ингэхийн тулд өөрсдийн бараа бүтээгдэхүүний чанар, өнгө үзэмж үнэ ханш дээр манай үйлдвэрлэгчид илүүтэй анхаарч өрсөлдөх чадвартай байх нь юу юунаас чухал гэдийг Засгийн газрын тэргүүн хэллээ.

    Сайн юм хийж байгаа компани байгааг би үзэсгэлэнгээс харсан. Харин өөрсдийгөө нийгэмд сурталчлах тал дээр зохион байгуулалттай ажиллах хэрэгтэй. Мөн эдийн засгийн үр ашгаас гадна ой модны нөөцийг зохистой  ашиглах тал дээр давхар анхаарах ёстой. Бид ченжийн нийгэмд амьдраад байна. Энэ тогтолцоог өөрчилж үйлдвэрлэгч хэрэглэгчдийг шууд холбох боломжийг бүрдүүлэх тал дээр хаа хаанаа идэвх санаачилгатай ажиллая. Салбарын өмнө тулгамдсан асуудлаа шийдэх тодорхой саналуудаа тусгасан бодлого хөтөлбөрөө нэгдсэн журмаар гаргаад 2 дугаар сарын сүүлээр Засгийн газрын хуралдаанд  оруулж ирэхийг ХХААХҮ-ийн сайд, БОАЖ-ын сайд нарт болон салбарын мэргэжлийн холбоодод үүрэг болголоо

  • ТӨРИЙН ЗОЛГОЛТ БОЛОВ

    Төрийн золголт боловXVII жарны цагаагчин Төмөр туулай жилийн шинийн нэгний билэгт сайн өдөр Монгол Улсын Ерөнхий сайд С.Батболд Төрийн 9 хөлт цагаан туганд хүндэтгэл үзүүлсэний дараа Төрийн ёслол, хүндэтгэлийн өргөөнд хүрэлцэн очиж Монгол Улсын Ерөнхийлөгч Ц.Элбэгдорж, УИХ-ын дарга Д.Дэмбэрэл нартай золгов. Золголтын дараа Төрийн хан хуурч Ц.Цэрэндорж Төрийн хан хуурыг цэнгүүлэн гэрийн жавар үргээж, төр түвшин, түмэн олон амгалан байхыг бэлгэдэн ерөөл айлдлаа.

    Өмнө нь төр, засгийн удирдлагууд Монголын бурхан шашинтны төв Гандантэгчинлэн хийдэд очдог байсан бол энэ жил Гандантэгчинлэн хийдийн хамба Д.Чойжамц, Дашчойлин хийдийн хамба Ч.Дамбажав нар Төрийн ордонд морилон ирж төрийн 3 өндөрлөгтэй золгон, хотол олныхоо сайн сайхны төлөө ном хурж байгаа тухай айлтгав. Ерөнхийлөгч, УИХ-ын дарга, Ерөнхий сайд нар жил бүрийн цагаан сарын шинийн нэгэнд хамгийн өндөр настай буурлуудын гэрт очиж золгодог байсан уламжлал энэ жил өөрчлөгдлөө.

    Сар шинийн нэгний энэ өглөө ахмадуудаа төлөөлж Төрийн ордоны ёслол, хүндэтгэлийн танхимд хүрэлцэн ирсэн АИХ-ын Тэргүүлэгчдийн нарийн бичгийн дарга асан Ц.Готов, Хөдөлмөрийн баатар, Төрийн шагналт, Ардын жүжигчин Л.Цогзолмаа, Хөдөлмөрийн баатар, IIIэмнэлгийн мэдрэлийн тасгийн зөвлөх, доктор, профессор Ж.Хайрулла, Аж үйлдвэрийн салбарын зөөлөн эдлэлийн анхны Хөдөлмөрийн баатар оёдолчин Л.Дашням, Ардын жүжигчин, профессор Д.Жаргалсайхан, Соёлын гавъяат зүтгэлтэн, зохиолч Б.Бааст, БХЯ-ны Ахмадын хорооны дарга, хошууч генерал С.Гомбосүрэн, Онц бөгөөд Бүрэн эрхт Элчин сайд, ГХЯ-ны нэгдүгээр орлогч сайд асан Д.Ёндон нартай төрийн 3 өндөрлөг золгож, гарын бэлгээ гардуулан дурсгалын зураг авахуулжээ.

    Сар шинийн энэ өдөр Монгол Улсын Ерөнхий сайд С.Батболд хэвлэл, мэдээллийн ажилтнуудад өгсөн ярилцлагадаа “Сайхан өдөр болж байна. Үүнийг гарч байгаа Туулай жилд ард түмэн, улс орны маань ажил, амьдрал ч өөдрөг сайхан байхын шинж гэж бэлэгшээж байна. Энэ билэгт сайн өдөр ахмадуудынхаа төлөөллийг хүлээн авч хүндэтгэл үзүүллээ. Монгол түмэн төрлөөрөө түвшин амгалан, элгээрээ энх амгалан байхын өлзийтэй ерөөлийг өргөн дэвшүүлье” гэлээ

  • Та бүгдийн маань амьдралд сайн сайхан бүхэн улам дэлгэрэх болтугай

    Та бүгдийн маань амьдралд сайн сайхан бүхэн улам дэлгэрэх болтугай

    цагаан сар, мэндчилгээ

  • Засгийн газрын хуралдаан 2011 оны 2 дугаар сарын 01-ний өдөр болж дараах асуудлыг хэлэлцэн шийдвэрлэлээ

    УЛААНГОМЫН ДУЛААНЫ СТАНЦЫГ ХЭВИЙН АЖИЛЛУУЛАХЫН ТУЛД 120 САЯ ТӨГРӨГ ЗАРЦУУЛНА

    Увс аймгийн Улаангом хотын Дулааны станцад гэмтэл гарч айл өрх, албан байгууллагуудын халаалт, дулаан доголдон, аваарийн байдалд орсон тул 2 дугаар сарын 1-ний өдрийн Засгийн газрын хуралдаанаар асуудлыг нарийвчлан хэлэлцэж шаардлагатай хөрөнгийг нь шийдвэрлэлээ. Гарсан аваарь болон учирсан хохирлыг арилгах, станц, дулааны шугам, сүлжээг сэргээж, хэвийн үйл ажиллагаанд оруулахад нэн тэргүүнд шаардлагатай 120 сая төгрөгийг Засгийн газрын нөөцөөс гаргахаар болсон байна.  

    Станцыг хэвийн ажиллуулах, хэрэглэгчдийг эрчим хүчээр тасралтгүй хангах, учирсан хохирлыг тогтоох талаар холбогдох арга хэмжээ авахыг Монгол Улсын Шадар сайд М.Энхболд, Эрдэс баялаг, эрчим хүчний сайд Д.Зоригт, Увс аймгийн Засаг дарга Э.Цасчихэр нарт даалгалаа. Энэ ажлын хэрэгжилтэд хяналт тавьж, биелэлтийг 3 дугаар сарын 1-ний дотор Засгийн газрын хуралдаанд танилцуулахыг Монгол Улсын сайд, Засгийн газрын Хэрэг эрхлэх газрын дарга Ч.Хүрэлбаатар, Эрдэс баялаг, эрчим хүчний сайд Д.Зоригт нар даалгасан байна.

    Цаашид орон нутгийн удирдлага, станцын эзэд хариуцлагаа өндөржүүлэх хэрэгтэй байгааг Засгийн газрын олон гишүүн хэлж, осол аваарь гарсан шалтгааныг шалгаж тогтоох, хэнд ямар хариуцлага тоооцох тухай асуудал ч давхар хөндөгдөх учиртай гэж байлаа. Энэ жил нийт нутгаар хүйтний эрч эрс чангарч зарим аймагт -50 хэм хүрч байгаа тул өвөлжилт, хаваржилтад илүү анхаарч, хоорондын уялдаа холбоогоо сайжруулж ажиллах, үнэн зөв мэдээллийг шуурхай өгч байхыг холбогдох албан тушаалтнуудад Ерөнхий сайд үүрэг болголоо гэж Засгийн газрын Хэвлэл,, мэдээллийн албанаас мэдээллээ.   

     БИЕИЙН ТАМИР, СПОРТЫГ ЦОГЦООР НЬ ХӨГЖҮҮЛНЭ

    “Биеийн тамир, спортыг хөгжүүлэх цогц хөтөлбөр”-ийг Засгийн газрын хуралдаанаар хэлэлцэн баталлаа.

    Биеийн тамир, спорт, чийрэгжүүлэлтийг хүн амын амьдралын хэв маяг, эрүүл аж төрөх ёсны салшгүй хэсэг болгох замаар дундаж наслалтыг нэмэгдүүлэх, биеийн тамир, спортын хөгжлийн түвшинг олон улсын жишигт хүргэж хөгжүүлэх нь хөтөлбөрийн гол зорилго юм. Хөтөлбөрийг 2020 он хүртэл 2 үе шаттай хэрэгжүүлэх бөгөөд эхний шатыг 2011-2015 он, хоёрдахь шатыг 2016-2020 онд хэрэгжүүлж дуусгахаар төлөвлөсөн байна.

    Биеийн тамир, спортыг хөгжүүлэх үндсэн 4 зорилтын хүрээнд нийтийн биеийн тамирт зарцуулах хөрөнгийг нэмэгдүүлэх, хүний нөөцийн удирдлага, төлөвлөлт, салбар хоорондын уялдаа холбоо, оролцоог сайжруулах, биеийн тамир, спортын материаллаг баазыг бэхжүүлэх замаар нийтийн биеийн тамирыг бүх нийтийн хэрэглээ болгох, тамирчдын амжилтыг дэлхийн түвшинд хүргэх зорилт, арга хэмжээг хөтөлбөрт тусгажээ.

    Хөтөлбөрийг хэрэгжүүлэх төлөвлөгөөг хамтран баталж, хэрэгжилтийг нь улсын хэмжээнд удирдан зохион байгуулахыг Эрүүл мэндийн сайд С.Ламбаа, Үндэсний хөгжил, шинэтгэлийн хорооны дарга Ч.Хашчулуун нарт даалгав. Хөтөлбөрийг хэрэгжүүлэхэд шаардагдах зардлыг эрхэлсэн салбар, орон нутгийн жил бүрийн төсөв, Монгол Улсын эдийн засаг, нийгмийг хөгжүүлэх үндсэн чиглэл болон хандивлагч байгууллагын хөтөлбөр, төсөлд тусган санхүүжүүлэх юм.

    ЗАСГИЙН ГАЗАР 2010 ОНД 65 УДАА ХУРАЛДЖЭЭ

    Өнгөрсөн онд 669 асуудлыг Засгийн газрын хуралдаанаар хэлэлцэн 254 асуудалтай танилцаж Засгийн газрын 350 тогтоол, Ерөнхий сайдын 109 захирамж гаргасан байна. 89 асуудлыг Улсын Их Хуралд өргөн мэдүүлэхээр, 43 асуудлыг хууль санаачлагчид уламжлахаар, 15 асуудлыг Улсын Их Хурлын Байнгын хороотой зөвшилцөхөөр, 8 асуудлыг Монгол Улсын Ерөнхийлөгчид өргөн мэдүүлэхээр, 26 асуудлыг Үндэсний аюулгүй байдлын зөвлөлд танилцуулахаар шийдвэрлэсэн бөгөөд 54 асуудлыг гишүүдээс гаргасан саналын дагуу дахин хэлэлцэхээр хойшлуулжээ.

    ·         “Зээлийн баталгааны дээд хэмжээг тогтоох тухай” Улсын Их Хурлын тогтоолын төслийг хэлэлцэн дэмжиж Улсын Их Хуралд өргөн мэдүүлэхээр тогтов. Засгийн газраас Монгол Улсын Хөгжлийн банкинд гаргах зээлийн баталгааны дээд хэмжээг Монгол Улсын 2011 оны төсвийн жилд 1,985.2 тэрбум, 2012 оны төсвийн жилд 1,720.4 тэрбум төгрөг байхаар төлөвлөөд байна. Хөгжлийн банкинд зээлийн баталгаа гаргах нь дэд бүтэц, хүнд аж үйлдвэрийн обьектууд, боловсруулах аж үйлдвэрийг хөгжүүлэх, импортыг орлуулах, Дотоодын нийт бүтээгдэхүүний бүтцийг боловсронгуй болгож төрөлжилтийг хөгжүүлэх замаар улс орны хөгжлийг түргэсгэхэд санхүүгийн гол хөшүүрэг болох юм. Зээлийн баталгааны дээд хэмжээг Улсын Их Хурлаас тогтоосноор “Төсвийн тогтвортой байдлын тухай хууль”-д заасан тусгай шаардлагуудыг хангуулах, зөвхөн нэн тэргүүний гэж үзсэн төсөл, хөтөлбөрийг хэрэгжүүлэхэд Засгийн газрын баталгаа гаргах боломжийг бүрдүүлэх аж холбогдолтой гэж үзэж байна.

    ·         “Бүгд Найрамдах Судан Улсын Дарфур муж дахь НҮБ, Африкийн Холбооны хамтарсан энхийг дэмжих ажиллагаанд оролцох цэргийн хээрийн IIшатны эмнэлгийн асуудлаар Монгол Улсын Засгийн газар, НҮБ хоорондын харилцан ойлголцлын санамж бичиг”-т гарын үсэг зурах бүрэн эрхийг Монгол Улсаас НҮБ-ын дэргэд суугаа Байнгын төлөөлөгч О.Энхцэцэгт олголоо.

    ·         Монгол Улсын Засгийн газрын төлөөлөгчид НҮБ-ын Ерөнхий Ассамблейн 65 дугаар чуулганд оролцсон дүнг сайшаав. Чуулганы мөрөөр болон 66 дугаар чуулганд бэлтгэх ажлын төлөвлөгөө гаргаж, хэрэгжилтэд хяналт тавьж ажиллахыг Гадаад харилцааны сайд Г.Занданшатарт даалгалаа. Чуулганы Ерөнхий шүүмжлэлд Монгол Улсын Ерөнхий сайд С.Батболд оролцож олон улсын тулгамдсан асуудлаар улсынхаа байр суурийг илэрхийлсэн юм.

    ·         Хуулиар тогтоосон хугацаанд төлөөгүй болон татварын алба, татварын улсын байцаагчийн буруугаар татвар төлөгчөөс үндэслэлгүй, илүү хураасан татварт тооцох алдангийн хэмжээг хоног тутамд 0.056 хувь байхаар тогтлоо.

    ·         Олон улсын хэмжээнд зохиогддог соёл, урлагийн их наадам, уралдаан, үзэсгэлэн, номын яармагт оролцож онцгой амжилт гаргасан нэр бүхий соёлын ажилтан, уран бүтээлчдэд нийт 139 сая төгрөгийн мөнгөн шагнал олгохоор шийдвэрлэлээ. 

    ·         Ховордсон ан амьтан, ургамал, тэдгээрийн гаралтай эд зүйлийн гадаад худалдааг зохицуулах тухай хуульд нэмэлт, өөрчлөлт оруулах тухай хуулийн төслийг хэлэлцэн дэмжиж, гишүүдээс гаргасан саналыг тусган Улсын Их Хуралд өргөн мэдүүлэхээр тогтлоо.

  • Монгол улсын эдийн засаг хурдацтай хөгжиж байгаа нь нэг талаар сайн, нөгөө талаар эрсдэл дагуулах магадлалтай

    Монгол улсын Ерөнхий сайд С.Батболд өнөөдөр ОУВС-ийн ажлын хэсгийн ахлагч Стев Барнеттар болон ОУВС-ийн монгол дахь суурин төлөөлөгч нарыг хүлээн авч уулзлаа. ОУВС-ийн ажлын хэсгийнхэн манай оронд арав гаруй хоног ажилласан бөгөөд энэ ажлынхаа үр дүнг Ерөнхий сайдад танилцуулахаар ийн иржээ.

    Манай оронд хоёр жил гаруйн хугацаанд хэрэгжүүлсэн Стэндбай хөтөлбөрийг амжилтттай хэрэгжүүлж дууссанд сэтгэл хангалуун байгаагаа ОУВС-ийнхан илэрхийлээд 2011 оны төсвийн талаарх дүгнэлтээ Монгол улсын Засгийн газрын тэргүүнд дуулгасан юм. Монгол улсын эдийн засаг маш хурдацтай хөгжиж байна гэдэг дүгнэлтийг ОУВС-ийн ажлын хэсгийнхэн гаргаад байгаа бөгөөд энэ нь нэг талаар сайн, нөгөө талаарэрсдэл дагуулах магадлалтай гэдгийг тэд анхааруулж байна.

    2011 оны төсөв ДНБ-ий 52.1 хувьтай тэнцэх хэмжээний байгаа нь төсвийн хэт тэлэлтэй холбоотойг анхаарууллаа.Мөнинфляци тодорхой түвшнээс нэмэгдэж, 20 хувиас давах дүр зураг харагдаж байгааг ОУВС-ийн ажлын хэсгийнхэн хэлж байна. Түүнчлэн аль болох ядуусд чиглүүлж байгаа Стэндбай хөтөлбөрийг үргэлжлүүлэх зөвлөгөөг ч бас өглөө.

    Макро эдийн засгийн эдгээр үзүүлэлтээс харахад эцсийн дүндээ энэ бүгд нь Монголын хувийн хэвшлийн салбарт нөлөөлж, тэд өрсөлдөх чадвар сул  болж магадгүй байгааг ОУВС-ийн шинжээчид ярьж байна. Харин Монгол улсын Засгийн газраас явуулж байгаа эдийн засгийн чиглэлийн бодлогууд тодорхой үр дүнгээ өгч байгааг судалгаа харуулж байна гэсэн дүгнэлтийг ОУВС хийжээ.  

    Монгол улсын Ерөнхий сайд С.Батболд тэдний дүгнэлтийг сонссоны дараа та бүхний анхааруулж байгаа бүх зүйл Засгийн газрын анхаарлын төвд байгаа, Төв банкныхантайгаа ч  хамтарч ажиллаж байнагэдгийг дурьдлаа. Ирэх гуравдугаар сард эдийн засгийн форумыг Улаанбаатар хотноо зохион байгуулж, энэ үеэр эдгээр асуудлыг олон талаас нь хэлэлцэхээр төлөвлөж байгаа.

    Мөн Монгол улс зөвхөн уул уурхайг түшиглэсэн эдийн засгийн бодлогоос гадна жижиг дунд үйлдвэрлэл, хөдөө аж ахуйн салбарыг түлхүү хөгжүүлэх бодлого барьж буйгаа Ерөнхий сайд дуулгаад, хүнсний ногоогоор өөрсдийн хэрэгцээгээ хангадаг болсон нь хөрш зэргэлдээ орнуудынхаа үнийн өсөлтөд автдаг байсан цаг хойно өнгөрснийг тэмдэглэж байсан юм. Үнэтэй зөвлөгөө өгч, бас Стэндбай хөтөлбөрийг хэрэгжүүлж байгаад Монгол улсын Ерөнхий сайд С.Батболд тэдэнд талархлаа илэрхийллээ

  • С.Батболд: Иргэний нийгмийг бэхжүүлэхэд Засгийн газар илүү санаачилгатай ажиллана

    С.Батболд: Иргэний нийгмийг бэхжүүлэхэд Засгийн газар илүү санаачилгатай ажилланаӨнөөдөр Иргэний нийгмийн өдөр. Энэ өдөрт зориулан Монгол Улсын Ерөнхий сайд С.Батболд мэндчилгээ дэвшүүллээ

    Эх орондоо хүмүүнлэг иргэний ардчилсан нийгмийг цогцлоон хөгжүүлэхийг манай улс Үндсэн хуулиндаа тунхагласан. Энэхүү тунхаглалыг хэрэгжүүлэх зорилгоор 1997 онд “Төрийн бус байгууллагын тухай” хуулийг батлан хэрэгжүүлж ирлээ. Уг хуулийг баталсан 1 дүгээр сарын 31-ний өдрийг “Иргэний нийгмийн өдөр” болгон зарласан. Энэхүү түүхт өдөр өнөөдөр тохиож байгаатай холбогдуулан эх орондоо иргэний нийгмийг бэхжүүлэх их үйл хэрэгт сэтгэл зүтгэл гаргаж ирсэн иргэний нийгмийн төлөөлөгчид, иргэний нийгмийн байгууллагыг санаачлагчид, түүнд ажиллаж ирсэн бүх хүмүүст баяр хүргэж, амжилт бүтээлийн дээдийг хүсэн ерөөе.

    Иргэний нийгмийн өдөр бол иргэдийн эрх ашиг, нийгмийн сайн сайхан, сайн засаглалын төлөө ажилладаг иргэний нийгмийнхний төдийгүй иргэн бүрийн баярын өдөр билээ. Иргэний нийгмийн байгууллагууд иргэд төр засгийг хооронд нь холбож өгөхөөс гадна төрийн үйл ажиллагаанд хяналт тавьж, сайн засаглалыг бий болгоход гол үүрэг гүйцэтгэдэг. Тиймээс иргэний нийгмийн байгууллагуудын удирдлага, лидерүүд нь нийгэм олон нийтэд танигдаж улс орныхоо өмнө тулгамдаж буй асуудлуудыг харж, хөндөж, өргөн хүрээтэй үйл ажиллагаа явуулж байгаа нь манай нийгмийн том үнэт зүйлс юм. Энэ утгаараа иргэний нийгмийг бэхжүүлэх, баталгаажуулах нь бидний бодлого, зорилт байх учиртай.

    Өнгөрсөн 20 жилд бид ардчилсан нийгмийг байгуулж чадлаа. Харин ирэх 20 жилд ардчиллын институцуудыг төлөвшүүлэх, түүний дотор иргэний нийгмийг бэхжүүлэхэд Засгийн газар илүү санаачилгатай ажиллана. Манай улсад энэ оны эхний байдлаар 12000 орчим төрийн бус байгууллагууд бүртгэгдэж олон салбарт үйл ажиллагаагаа явуулж ирлээ. Иргэний нийгмийн байгууллага сайн хөгжиж бэхэжсэн, иргэдийн оролцоог бүх салбарт бий болгосон улс орны бодлого зөв байдаг. Ийм орчин нөхцөлийг бүрдүүлэхийн төлөө Засгийн газар Иргэний нийгмийн зөвлөлтэй хамтын ажиллагааны гэрээ байгуулан ажиллаж ирлээ. Засгийн газрын тэргүүний хувьд иргэний нийгмийн байгууллагуудыг бэхжүүлэх, үйл ажиллаагааг нь өргөжүүлэх талаар олон ажлыг хийж, хэрэгжүүлж ирлээ.

    Сайдууд болон аймаг, нийслэлийн Засаг дарга нарт өөрсдийн хариуцдаг салбарын төрийн бус байгууллагуудтай хамтран ажиллах, санхүүжилт өгөх талаар үүрэг даалгавар өгөн хэрэгжүүлж байна. Иргэний нийгмийн хяналтын тогтолцоог төрийн болон төрийн өмчит аж ахуйн нэгжид бий болгох санаачилгыг анх удаа гарган хэрэгжүүлж ирлээ. Мөн төрийн зарим чиг үүргийг иргэний нийгмийн байгууллагуудаар гүйцэтгүүлэхээр иргэний нийгмийн байгууллагууд, мэргэжлийн холбоодын санал, санаачилгыг Засгийн газар судлан үзэж холбогдох шийдвэрүүдийг гарган хэрэгжүүлэхээр бэлтгэж зарим эхлэлүүдийг тавилаа. Засгийн газраас төрийн бус байгууллагыг бэхжүүлэх хууль эрх зүйн орчинг боловсронгуй болгох зорилгоор “Төрийн бус байгууллагын тухай” хуулийн шинэчилсэн найруулгын төслийн талаар олон удаа хэлэлцүүлэг өрнүүлж бүх талуудын санал санаачилгыг тусган хэлэлцүүлэхээр бэлтгэж байна.

    Цаашид иргэний нийгмийн байгууллагын өмнө тулгамдаж буй санхүүжилт, татвар, хууль эрх зүйн ээлтэй орчин бүрдүүлэх, иргэний нийгмийн тогтвортой хөгжлийг хангах төрийн бодлогын үзэл баримтлалыг боловсруулах хамтын ажиллагаанд шинэчлэлийн бодлого явуулахад анхаарна. Баярын энэ өдөр иргэний нийгмийн асуудлаар Засгийн газартай хамтран ажиллаж ирсэн Иргэний нийгмийн зөвлөлд ч мөн талархаж байгаагаа илэрхийлье. Улс үндэстнийхээ нийтлэг эрх ашгийг хамгаалах, сайн засаглалыг бэхжүүлэх, төрийн үйл ажиллагаанд иргэний хяналтыг бий болгоход иргэний нийгмийнхний идэвх санаачилга, хичээл зүтгэл чухал үүрэгтэйг ухамсарлаж, ололт амжилтаа бататгаж ажиллахыг хүсье.                          

    Монгол Улсын Ерөнхий сайд                     С.Батболд

    2011 оны 1 дүгээр сар 31