Blog

Малын гоц халдварт шүлхий өвчинд шаардагдах зардлыг шийдлээ

Одоогийн байдлаар мал, амьтны гоц халдварт шүлхий өвчнөөс урьдчилан сэргийлэх арга хэмжээний хүрээнд  Дорнод аймгийн голомт бүхий Матад, Халхгол, Булган сумдын мэдрэмтгий бүх мал, Дорнод аймгийн бусад бүх сум, Сүхбаатар аймгийн бүх сумын үхэр, Хэнтий аймгийн хил залгаа хоёр сумын үхэр, Дорноговь, Өмнөговь  аймгийн БНХАУ-тай хил залгаа сумдын бод ,бог мал буюу нийт 1.6 сая малыг вакцинжуулаад байгаа юм байна.

Улсын нөөцөд уг өвчнөөс сэргийлэх вакцин дуусаад байгаа  аж.  Түүнчлэн Сүхбаатар аймгийн Сүхбаатар, Эрдэнэцагаан, Дорнод аймгийн Матад ,Булган сумдын зааг нутагт өвчтэй зээр, зээрийн сэг зэм их байгаа тухай мэдээллийг аймгуудын мал эмнэлгийн албадаас ирүүлжээ. Энэ асуудлыг өнөөдрийн   Засгийн газрын хуралдаанаар хэлэлцэж,  малын гоц халдварт шүлхий өвчинтэй тэмцэх зарим арга хэмжээний тухай тогтоол гаргалаа.

Сүхбаатар, Дорнод аймагт  мал, амьтны гоц халдварт шүлхий өвчин хурдацтай тархаж байгаатай холбогдуулан Сүхбаатар аймагт ариутгал, халдваргүйтэл хийх зориулалт бүхий “ ДУК” автомашин нэг, Сүхбаатар аймагт формалин 1176 литрийг улсын нөөцөөс олгож, 2010 оны дөрөвдүгээр улиралд багтаан нөхөн бүрдүүлэх арга хэмжээ авахыг Монгол улсын Шадар сайд М.Энхболдод даалгалаа. Мал амьтны гоц халдварт шүлхий өвчний халдварын голомтыг устгах, тархалтыг зогсоох үйл ажиллагааны зардал болон улсын нөөцөөс олгох автомашин, формалиныг нөхөн бүрдүүлэхэд шаардагдах 140.0 сая төгрөгийг Засгийн газрын нөөц хөрөнгөнөөс гаргаж, Онцгой байдлын ерөнхий газарт олгохыг Сангийн сайд С.Баярцогтод зөвшөөрөв. 

Зөвлөх компаниар олон улсын нэр хүнд бүхий туршлагатайг нь сонгох чиг өглөө

Сүүлийн жилүүдэд манай улсын төрийн байгууллагууд ээдрээ, түвэгтэй, их хэмжээний хөрөнгө, хүч шаардсан маргаанд татагдан гадаад орны шүүх, арбитрт хариуцагчаар дуудагдах явдал удаа дараа гараад байгаа бөгөөд цаашид ч  дахин гарч болзошгүй байгаа ажээ. Мөн үүнээс  гадна төрөөс дэд бүтэц болон уул уурхай, боловсруулах үйлдвэрийг хөгжүүлэх зорилгоор томоохон бүтээн байгуулалтын ажлыг өрнүүлж байгаа өнөө үед томоохон төсөл, хөтөлбөрүүдийг олон улсын жишигт нийцүүлэн боловсруулах чухал ач холбогдолтой байгаа аж.

Иймээс нийгэм, эдийн засгийн салбарт хэрэгжүүлж байгаа томоохон төсөл, хөтөлбөртэй холбогдон үүссэн маргаантай асуудлаар Монгол улсын эрх ашгийг төлөөлөн гадаад орны шүүх, арбитрт нэхэмжлэгч, хариуцагчаар оролцох, цаашид шинээр хэрэгжүүлэх томоохон төсөл, хөтөлбөрийн төслийн хүрээнд гэрээ, хэлэлцээр байгуулахад эрх зүйн туслалцаа үзүүлэх үйлчилгээг олон улсын нэр хүнд бүхий туршлагатай зөвлөх компаниар гүйцэтгүүлэх  шаардлага байгааг харгалзан, Засгийн газрын хуралдаанаас зөвлөх компани сонгон шалгаруулах тухай тогтоол гаргалаа.

Зөвлөх компанийг холбогдох хууль тогтоомжийн дагуу сонгон шалгаруулж, гэрээ байгуулан ажиллаж, тухай бүрт нь Засгийн газрын хуралдаанд оруулж танилцуулж байхыг Монгол улсын сайд, ЗГХЭГ-ын дарга Ч.Хүрэлбаатарт даалгав.

Тогтоолын хавсралтад нэмэлт өөрчлөлт оруулахыг дэмжлээ

Засгийн газрын 2010 оны 77 дугаар тогтоолын хавсралтаар батлагдсан “ 2010 онд НҮБ-ын энхийг сахиулах болон олон улсын бусад ажиллагаанд зэвсэгт хүчнээс цэргийн баг оролцуулах арга хэмжээний нэгдсэн жагсаалт”-ын дөрөв дэх хэсэгт нэмэлт өөрчлөлт оруулахыг дэмжлээ. Ингэснээр  “Афганистан дахь энхийг сахиулах олон улсын ажиллагаанд… нисдэг тэрэгний техникийн , засвар үйлчилгээний сургалтын бүлэг, Бельгийн вант улсын зэвсэгт хүчний цэргийн бүрэлдэхүүнтэй хамтран үүрэг гүйцэтгэх цэргийн баг оролцуулах “  гэсэн заалт нэмэгдэж байгаа юм.  

Хөдөлмөрийн үндэсний чуулганыг зохион байгуулна

Монгол улсын хөдөлмөр эрхлэлтийн чиг хандлага, хөдөлмөрийн харилцаан дахь өөрчлөлт, тэдгээрийг эдийн засгийн хөгжил, бүтээн байгуулалтын үйл ажиллагаатай уялдуулах, ажлын байр нэмэгдүүлэх, мэргэжилтэй ажилтан бэлтгэж сургах асуудлын хүрээнд салбарын яамд, мэргэжлийн сургалтын байгууллагууд, иргэний нийгэм, судлаачдын санал дүгнэлтийг сонсох зорилгоор ийм чуулганыг зохион байгуулах боллоо. “ Эдийн засгийн өсөлт, хөдөлмөр эрхлэлт- зохистой ажлын байр” сэдэвт хөдөлмөрийн  үндэсний чуулганд шаардагдах хөрөнгийг  Засгийн газрын нөөцөөс  гаргахаар    хуралдаанаас  тогтлоо. Тус чуулганыг ирэх аравдугаар сард хийхээр төлөвлөж байгаа ажээ.

Товчхон

• Африк-Азийн бүсэд байгалийн олон төрлийн гамшгийн аюулаас урьдчилан сэрэмжлүүлэх нэгдсэн систем /RIMES/-ийн талаар хамтран ажиллах тухай хэлэлцээрт нэгдэн орох нь зүйтэй гэж үзлээ. НҮБ-ын Хөгжлийн газраас тус системээр дамжуулан Монгол, Бутан, Энэтхэг, Мальдив, Балба, Пакистан зэрэг улсад уур амьсгалын өөрчлөлтийн эрсдэлийн менежментийн чиглэлээр төсөл хэрэгжүүлэх шийдвэр гаргасан юм. Энэ оны долдугаар сарын эхээр Энэтхэг улсад зохион байгуулагдсан хурлаас манай улсад 180000 ам.долларын төсөл хэрэгжүүлэхээр шийдвэрлэсэн нь энэ сараас хэрэгжиж эхлэх юм.  

• Монгол Улсаас Доминиканы Бүгд Найрамдах Улстай дипломат харилцаа тогтоох тухай УИХ-ын тогтоолын төслийг хэлэлцэн дэмжээд УИХ-д өргөн мэдүүлэхээр тогтлоо.

• “Хамтын ажиллагааны тухай Монгол Улсын Засгийн газар, Олон улсын шилжилт хөдөлгөөний байгууллага хоорондын хэлэлцээр”-ийн төслийг зүйтэй гэж үзлээ. Тус хэлэлцээрт гарын үсэг зурах бүрэх эрхийг Монгол Улсаас Швейцарийн Холбооны улсад суугаа Онц бөгөөд Бүрэн Эрхэт Элчин сайд, НҮБ-ын Женев дэх төв болон олон улсын бусад байгууллагын дэргэд суугаа Байнгын төлөөлөгч Л.Оргилд олголоо.

• УИХ-ын гишүүн П.Алтангэрэл, Н.Ганбямба, С.Эрдэнэ нарын санаачлан боловсруулсан Засгийн газрын тусгай сангийн тухай хуульд нэмэлт оруулах тухай хуулийн төслийг Засгийн газрын хуралдаанаар хэлэлцээд дэмжих боломжгүй гэж үзлээ. Тус сан нь Засгийн газрын тодорхой чиг үүрэг, зорилтыг санхүүжүүлэх зорилготой. Тодорхой ажил мэргэжилд зориулж шинээр сан байгуулах нь цаашид мэргэжил тус бүрээр сан байгуулах буруу жишиг тогтоох үр дагавартай гэж Засгийн газрын зарим гишүүд үзлээ. Мөн “Багшийн хөгжлийн сан”-гийн тухайд боловсролын асуудал эрхэлсэн сайдын төсвийн багцад тусгах замаар шийдвэрлэх бүрэн боломжтой гэж үзээд сайд нарыг саналыг тусгаад төсөл санаачлагч УИХ-ын гишүүдэд уламжлахаар тогтлоо

Монгол улсын Ерөнхий сайд энэ зуны турш орон нутагт томилолтоор ажилласан билээ. Тэрбээр Засгийн газрын бодлого шийдвэр үйл ажиллагааг иргэддээ мэдээлж, малчдын амьдралыг газар дээр нь очиж танилцсан юм. Засгийн газрын тэргүүн одоогийн байдлаар баруун есөн аймаг буюу Архангай, Хөвсгөл, Увс, Баян-Өлгий, Ховд, Говь-Алтай, Завхан, Баянхонгор, Өвөрхангайд, говийн дөрвөн аймаг болох Дундговь, Дорноговь, Өмнөговь, Говьсүмбэр, төвийн бүсийн Булган, Сэлэнгэ, Орхон, Дархан Уул аймгуудад тус тус ажиллаад байна.

Иргэдийн Засгийн газартаа итгэх итгэл улам нэмэгдэж, хамтарсан Засгийн газар хамтраад юм хийж чадаж байна гэх урам очсон газар бүрт анзаарагдаж байсныг Ерөнхий сайд баруун аймгуудад ажилласны дараа Засгийн газрын хуралдаан дээр танхимын гишүүддээ  мэдээлэл хийхдээ хэлж  байсан. Гүйцэтгэх засаглалын  тэргүүн орон нутагт ажилласан томилолтоороо аймаг бүрээр төлөвлөгөө гарган ажиллахаар болж байгаа бөгөөд баруун аймгуудынхаа төлөвлөгөөг баталлаа.

Энэхүү төлөвлөгөөний дагуу засгийн газрын тогтоолд Ерөнхий сайд С.Батболд гарын үсэг зуржээ. Тус тогтоолд дурдсанаар “ Төвөөс алслагдсан баруун аймгийн иргэдийн амьжиргааны түвшинг дээшлүүлэх болон тогтвор суурьшилтай ажиллаж амьдрах нөхцлийг бүрдүүлэх зорилгоор тэдгээрт алслагдсан бүсийн нэмэгдэл олгох асуудлыг судалж, санал боловсруулан энэ оны дөрөвдүгээр улиралд багтаан Засгийн газарт танилцуулах”-ыг Сангийн сайд С.Баярцогт болон НХХ-ийн сайд Т.Ганди нарт даалгасан байна. 

Өөр нэг чухал заалт бол  “Хүнсний бүтээгдэхүүний үнийн өсөлтийг хязгаарлах зорилгоор гол нэр төрлийн хүнсний бүтээгдэхүүний улсын нөөц бүрдүүлэхэд шаардагдах хөрөнгийн эх үүсвэрийг  2011 оны улсын төсөв болон эдийн засаг, нийгмийг хөгжүүлэх үндсэн чиглэлийн төсөлд тусгах”-ыг холбогдох сайд нарт үүрэг болголоо. Мөн “Хүнсний ногоо тарих, хадлан тэжээл бэлтгэх талаар иргэдээс гарч байгаа санаачилгыг дэмжиж, бага оврын тракторыг дагалдах тоног төхөөрөмжийн хамт хөнгөлттэй үнээр нийлүүлэх асуудлыг судалж, шаардагдах хөрөнгийн эх үүсвэрийг 2011 оны улсын төсөв, зээл, тусламжийн хүрээнд санхүүжүүлэх арга хэмжээ авах”-ыг ХХААХҮ-ийн сайдад даалгасан байна. 

“Хөдөө аж ахуйн бирж болон мах боловсруулах үйлдвэрийн сүлжээ байгуулах, малгүй болсон малчдын банкны зээлийн өрийн зарим хэсгийг Хүний хөгжил сангаас иргэн бүрт хүртээх хишиг, хувиас нөхөн төлүүлэх асуудлыг судалж, саналаа ирэх аравдугаар сард багтаан Засгийн газарт танилцуулах”-ыг ХХААХҮЯ болон НХХ-ийн яаманд тус тус энэхүү тогтоолоор  үүрэг болголоо.

“Жижиг дунд үйлдвэрийг хөгжүүлэх сангийн үйл ажиллагааг өргөжүүлж, сангаас олгох зээлийн хэмжээ, нөхцөл шаардлагыг  өөрчлөх асуудлыг судалж шийдвэрлэх талаар холбогдох арга хэмжээ авах”-ыг Т.Бадамжунай сайдад даалгав. “Байгаль орчныг хамгаалах чиглэлээр иргэд, төрийн бус байгууллагаас тавьсан санал хүсэлтийг нэг бүрчлэн судалж, холбогдох байгууллагуудтай хамтарч ажиллан шийдвэрлэх арга хэмжээ авах”-ыг БОАЖ-ын сайд Л.Гансүхэд мөн даалгалаа. “Могойнголын нүүрсний уурхайг түшиглэн дулааны цахилгаан станц барих, Тайшир, Дөргөний усан цахилгаан станцын талаар авч хэрэгжүүлэх арга хэмжээний саналыг боловсруулан, энэ есдүгээр сард багтаан Засгийн газарт танилцуулах”-ыг ЭБЭХ-ий сайдад үүрэг болгов. 

Энэхүү тогтоолын төлөвлөгөөнд тусгасан арга хэмжээг санхүүжүүлэхэд шаардагдах хөрөнгийн эх үүсвэрийг жил бүрийн улсын төсөв, эдийн засаг, нийгмийг хөгжүүлэх үндсэн чиглэлийн төсөлд тусгах арга хэмжээ авч байхыг Сангийн сайд С.Баярцогт, холбогдох сайд нарт, төлөвлөгөөний хэрэгжилтэд хяналт тавьж, явц, үр дүнг жил бүрийн хоёрдугаар улиралд багтаан Засгийн газарт танилцуулж байхыг Монгол улсын сайд, ЗГХЭГ-ын дарга Ч.Хүрэлбаатарт тус тус даалгасан байна. Ийнхүү  Ерөнхий сайдын орон нутагт ажиллах үеэр иргэдээс гарсан санал хүсэлт биеллээ олох эхний алхам  хийгдлээ

Монгол Улсын Ерөнхий сайд С.Батболд өнгөрөгч амралтын өдрүүдэд газар тариалангийн бүс нутаг Булган, Орхон, Сэлэнгэ, Дархан-Уул аймагт ажиллаж, иргэд, тариаланчдаа сонсож, зарим асуудлыг газар дээр нь шийдвэрлэлээ. Ерөнхий сайдын албан томилолтын бүрэлдэхүүнд Засгийн газрын зарим сайд нар, яам, харьяа байгууллагын удирдлагууд багтаж ажиллалаа.

С.Батболд: Гурил экспортлогч орон болох боломж манай улсад байна
“Атрын 3 дугаар аян”-ы Үндэсний хөтөлбөрийг хэрэгжүүлэх хүрээнд хамтарсан Засгийн газар хүн амынхаа гурилын хэрэгцээг дотоодоосоо бүрэн хангах зорилт тавьж тодорхой олон арга хэмжээ авч хэрэгжүүлж байгаагийн бодит үр дүн гарч байна гэж тариаланчид ярьж байна. Энэ онд  330 гаруй мянган тонн улаан буудай хураан авна гэсэн тооцоог ХХААХҮЯ-ны мэргэжилтнүүд гаргажээ. Төлөвлөсөн ургацаа авах боломжтой гэж тариаланчид гүйцэтгэх засаглалын тэргүүнд тайлбарлаж байсан юм.

Ийм хэмжээний ургацаар 250 мянга орчим тн гурил үйлдвэрлэж, эх орныхоо гурилын хэрэгцээг бүрэн хангана гэдэгт итгэлтэй байна. Үүгээр зогсохгүй үр тариа, гурил экспортлогч орон болох боломж ч манай улсад бүрэн байгааг Монгол Улсын Ерөнхий сайд С.Батболд Орхон аймгийн Жаргалант сумын “Бүтлийн ундарга” ХХК болон Сэлэнгэ аймгийн Шаамар сумын “Ундрагч” ХХК-ийн ургац хураалтын явцтай танилцах үеэрээ онцоллоо.

Наадмын дараагаас төвийн болон баруун бүсийн 9 аймаг, мөн говийн 4 аймагт албан томилолтоор ажилласан Монгол Улсын Ерөнхий сайд С.Батболдын энэ удаагийн томилолт үйлдвэрлэл, газар тариалангийн гол бүс нутгууд болох Булган, Орхон, Сэлэнгэ, Дархан-Уул аймагт үргэлжиллээ. Засгийн газрын тэргүүн С.Батболд иргэдтэй уулзах үеэрээ “Олон түмэнтэйгээ уулзаж, та нарынхаа саналыг сонсож байгаа нь Засгийн газрын ажлын нэгэн хэлбэр юм” гэлээ.

Орон нутгийн иргэдийн сэтгэлийг зовоож буй гол асуудал нь ажлын байрны хүрэлцээ бага байгаагаас залуучууд ажил эрхлэхгүй байгаа явдал юм. Тиймээс ахмадуудын тэтгэврийн мөнгөөр амьдралаа залгуулж буй айлууд олон байна. Үүний зэрэгцээ монгол залуучуудын ажлын байрыг гадаадын ажилчид эзлээд байгаад бухимдах иргэд олон байлаа. Иргэдийнхээ санал бодлыг сонссон Засгийн газрын тэргүүн хэд хэдэн асуудлыг онцолж ярилаа. Эдгээрийн нэг нь Мэргэжил сургалт үйлдвэрийн төвүүдэд мэргэжлийн ажилчин бэлтгэх асуудал юм.

Мэргэжилтэй ажилчин бэлтгэх зорилгоор Засгийн газраас 50 гаруй тэрбум, Оюутолгой төслөөс мөн ийм хэмжээний хөрөнгө зарж мэргэжлийн сургалт үйлдвэрлэлийн төвүүдийн техник, тоног төхөөрөмжийг шинэчилж байна. Эдгээр төвд залуучуудыг ямар нэгэн төлбөргүйгээр сургахаас гадна суралцах хугацаанд нь тэтгэмж олгоно. Зах зээлд эрэлт хэрэгцээ багатай мэргэжлээр их, дээд сургуульд сурч, суралцах хугацаандаа төлбөрийн дарамттай, төгсөөд ажлын байргүй, ажилгүй иргэдийн тоог нэмж байсны оронд инженер, техникийн ажилтан, гагнуурчин, бетон зутгагч, засварчны мэргэжил эзэмшвэл ажлын байр бэлэн байгаа төдийгүй гадаадад хар ажил хийх шаардлагагүй болно.

Эх орныхоо бүтээн байгуулалтад оролцож хангалттай цалин авч сайхан амьдрах боломж байгаа гэдгийг Засгийн газрын тэргүүн Оюутолгой, Тавантолгой төслийн бүтээн байгуулалтад оролцож байгаа залуучуудын цалин хангамж, ажлын байр, амьдрах орчны таатай нөхцөлөөр жишээ татан тайлбарлаж байлаа. Монгол Улсад уул уурхай, дэд бүтцийн салбарт ажлын байр олноор бий болж, түүнд ажиллах хүсэл сонирхолтой залууст мэргэжлийн дадал, ур чадвар олгох сургуулиуд нь бэлэн болж байна.

Энэ онд л гэхэд 3000 гаруй залуучуудыг ямар нэгэн төлбөргүйгээр МСҮТ-д сургахаар Засгийн газраас шийдвэрлэсэн бөгөөд орон нутгаас суралцах залуучуудын санал авч тодорхой квот гаргаж сургаж эхлээд байна. Одоо гагцхүү суралцагч, залуучуудын маань өөрсдийн сахилга хариуцлага, санаачилгатай байдлаас л цаашдын сайхан амьдралын баталгаа шалтгаалах болно гэдгийг сайтар анхаарах ёстой. Үүнд хүсэл зориг нэгдэж, идэвхтэй оролцож, Мэргэжлийн сургалт үйлдвэрлэлийн төвд суралцахыг хүүхэд, залуучуудад уриалж байлаа.

Монгол Улсын Ерөнхий сайд уулзалтуудын төгсгөлд дүгнэж хэлсэн үгэндээ энэ “Ажлын байрны асуудал очсон газар бүрт хөндөгдөж байна. Манай Засгийн газрын нэгдүгээрт тавьж буй зорилт маань иргэдээ ажлын байртай болгох. Энэ ажил маань шуурхай үр дүнгээ өгөх эсэх нь иргэд та бүхнээс шалтгаалах юм. Өнгөрсөн хавар шийдсэн томоохон бүтээн байгуулалтын шийдлүүд шинээр ажлын байр бий болгох нөхцөлийг бүрдүүлж байна. Он гарсаар Оюутолгойд ажиллагсдын тоо 1100 гаруй хүнээр нэмэгдэж, өнөөдөр тэнд 3600 гаруй монгол ажилчин ажиллаж байна. Ойрын жилүүдэд 6000 хүртэл ажлын байр нэмэгдэх хандлага байна.

Үүнээс гадна хувийн хэвшлийнхэн Өмнөговь аймгийн Ухаахудаг, Нарийн сухайт, Ховдын Хөшөөтийн нүүрсний орд, Сэлэнгийн Төмөртэйн орд газрын олборлолтыг эхлүүлж, түүнийг дагасан дэд бүтцийн бүтээн байгуулалтын ажил өрнөж байна. Өмнөговь аймгийн Цогтцэций сумын нутагт  анх удаа үндэсний мэргэжилтэн, ажилчдын хүч хөдөлмөрөөр дулааны цахилгаан станцыг барьж байгуулж байна. Ажлын байр олноор бий болох хандлага байна. Эдгээр бүтээн байгуулалтад мэргэжилтэй ажилчид өгөөч гэж аж ахуйн нэгжүүд хүсэлт тавиад байна. Тиймээс ч иргэдээ үүнд бэлтгэхийн тулд Засгийн газар өөрөөс шалтгаалах бүхнийг хийж байна гэсэн юм.

Мөн “Говийн аймгуудаар ажиллахдаа Оюутолгойн бүтээн байгуулалттай танилцлаа. Говь нутаг маань сэрж байна. Оюутолгой төсөлд гаднын ажилчид олноор ажиллаж байна гэж байна. Засгийн газар аль болох монгол залуучуудаа ажилтай байлгах бодлого барьж байна. Оюутолгойн үндсэн олборлолт эхлэхэд Эрдэнэт үйлдвэрээс гурав дахин илүү бүтээгдэхүүн үйлдвэрлэн гаргана. Энэ нь манай улсын эдийн засагт үр өгөөжтэй. Энэ үйлдвэрт цаашдаа монгол ажилчид давамгайлж ажиллана гэдгийг та бүхэндээ хэлэх байна” гэлээ.

Өнөөдрийн байдлаар л гэхэд тав, зургадугаар зэрэглэлийн  1300 гаруй гагнуурчин өгөөч ээ гэсэн хүсэлтийг компаниуд Засгийн газарт тавиад байна. Гэтэл Монгол Улсын хэмжээнд өндөр зэрэглэлийн 130 гаруйхан л гагнуурчин байна гэсэн судалгааг мэргэжлийн байгууллага гаргаад байгаа юм. Монгол Улсын Ерөнхий сайд С.Батболд ийм жишээ татсаныхаа дараагаар  “Тэгэхээр бид энэ ажлын байранд тэнцэж ажиллах залуусыг бэлтгэмээр байна. Тиймээс ч Засгийн газрын зүгээс Мэргэжлийн сургалт үйлдвэрлэлийн төвүүдэд ажилгүй, ажил идэвхтэй хайж байгаа иргэдээ сургах ажлыг эрчимтэй зохион байгуулж эхлээд байна.

Энэ бүгдэд харилцан чармайж, залуучууд маань хичээнгүйлэн суралцах ёстой” гэдгийг очсон газар бүртээ Монгол Улсын Ерөнхий сайд С.Батболд онцлон ярьж, мэргэжлийн сургалт үйлдвэрлэлийн төвд суралцахыг урьж байлаа. Бүтээн байгуулалтын ажлыг эхлүүлэх түүхэн шийдвэрүүдийг УИХ, Засгийн газраас гаргасан. Эдгээр ажлууд хэрхэн хэрэгжиж байна, орон нутгийн ажил амьдрал ямар байна гэдэгтэй танилцах, ирэх хоёр жилд, түүнээс цаашхи хугацаанд Засгийн газраас авч хэрэгжүүлэх ажлаа төлөвлөх нь гүйцэтгэх засаглалын тэргүүний хөдөө орон нутагт хийж буй томилолтын зорилго юм.

“Албан томилолтын үр дүнгээр Засгийн газрын хуралдаан хийж,  хэрэгжүүлэх ажлын төлөвлөгөө гаргаж хэрэгжүүлж эхлээд байна. Баруун бүсийн есөн аймгаар явахад гарсан зөв зүйтэй санал санаачилгыг Засгийн газрын хуралдаанаар хэлэлцэж, ажил хэрэг болгохоор шийдвэрлэсэн. Говь болон газар тариалангийн бүс нутгийн ажилтай танилцахад гарсан асуудлуудыг ч мөн шийднэ” гэдгээ Ерөнхий сайд С.Батболд тэмдэглэж байлаа. Иргэд Ерөнхий сайд болон Засгийн газрын гишүүдэд хандаж Засгийн газрын хуралдаанаар оюутнуудын сургалтын төлбөрийн асуудлыг хэлэлцэн тогтоол гаргаж их, дээд сургууль, коллежийн суралцагчийн төлбөрөөс 500 мянган төгрөгийг ирэх оны нэгдүгээр сараас Хүний хөгжил сангаас бэлэн бусаар олгохоор шийдвэрлэснийг дэмжиж байгаагаа илэрхийлсэн.

Үүний адил тэтгэврийн зээлтэй байгаа ахмадуудын банкны зээлийн өрийг Хүний хөгжил сангаас тэдэнд олгох мөнгөөр хааж өгөөч гэсэн хүсэлт уулзалт бүрт хөндөгдөж байв. Мөн жижиг дунд үйлдвэрийн зээлийн хугацааг сунгаж  өгөөч гэсэн санал олонтаа гарч байлаа. Иргэдээс гарсан санал, санаачилга, хүсэлтийг судалж, зохих арга хэмжээг авах болно гэдгээ Ерөнхий сайд болон Засгийн газрын гишүүд хэлж байлаа

2010 оны 9 дүгээр сарын 4

Эрдэнэт хот
Эрхэм хүндэт Эрдэнэтчүүдээ!
Тавтай сайхан намаржиж байна уу?

Манай улсын 20 дугаар зууны манлай бүтээн байгуулалтын эзэд болсон Эрдэнэт хотын бүтээлч, хөдөлмөрч иргэд Та бүхэнтэй намрын их ажил хөдөлмөр өрнөж байгаа энэ өдрүүдэд уулзаж байгаадаа баяртай байна.

Монгол Улсын Ерөнхий сайдын хувьд би энэ онд бүх аймгаар явж, орон нутгийн ажил амьдралтай танилцах, Засгийн газраас авч хэрэгжүүлж  байгаа болон хийхээр төлөвлөж буй ажил хэргийн талаар олон түмэндээ танилцуулан, ард иргэдийнхээ санал бодлыг сонсох зорилго тавин ажиллаж байгаа юм. Энэ зорилгын үүднээс наадмын дараагаас төвийн болон  баруун бүсийн  9 аймаг, мөн говийн 4 аймгаар явж, иргэдтэй уулзаж, ахуй амьдрал, ажил байдалтай нь танилцлаа.

Энэ удаагийн томилолтоороо манай орны үйлдвэрлэл, газар тариалангийн гол бүс нутгийн аймгуудад ажиллаж байна. Манай хөдөөгийн иргэд маань өвөг дээдсийнхээ гал голомтыг залгамжлан өөрийн төрж өссөн нутаг орондоо мэдлэг оюун, ажил үйлсээ зориулан бүтээлчээр хөдөлмөрлөж, ахуй амьдралаа дээшлүүлэх, аймаг, сумаа хөгжүүлэх үйлсэд идэвхийлэн ажиллаж байгаа нь харагдлаа. Аймгуудад өөр өөрийн онцлогтой олон сайхан бүтээлч ажлуудыг хийж хэрэгжүүлэн,  зарим үр дүнд хүрч байгааг газар дээр нь үзэж танилцлаа. Үүний зэрэгцээ төр засгийн хэмжээнд анхааралдаа авч нэгдсэн бодлоготойгоор шийдвэрлэх асуудлууд ч цөөнгүй байгаа нь уулзсан орон нутгийн иргэд, удирдлагуудын санал хүсэлтээс харагдаж байна.

Эдгээр асуудлыг шийдвэрлэх зорилгоор саяхан Засгийн газрын  хуралдаанаар тусгайлан хэлэлцэж, шийдвэр гаргаж, тодорхой арга хэмжээ авч байна.  Тодруулан хэлэхэд хүнсний бүтээгдэхүүний үнийн өсөлтийг хязгаарлах зорилгоор гол нэрийн хүнсний бүтээгдэхүүний улсын нөөц бүрдүүлэх, хөдөө аж ахуйн бирж болон мах боловсруулах үйлдвэрийн сүлжээ байгуулах, малгүй болсон малчдын банкны зээлийн өрийн зарим хэсгийг Хүний хөгжил сангаас иргэн бүрт хүртээх хишиг, хувиас нөхөн төлүүлэх зэрэг асуудлыг шийдвэрлэхээр ажиллаж байна.

Байгаль бол бидний гэр орон, бүлээн дулаан өлгий, амьдрал тэтгэгч эх булаг билээ. Гэвч эх болсон байгаль дэлхийтэйгээ хэрхэн харьцаж буйгаа эргэцүүлж нэг нухацтай бодож, эргэн тойрноо бодитой харвал асуудал ноцтой байдалд хүрээд байгаа нь нэн тодорхой байна. Тодорхой нэг улс үндэстний төдийгүй хүн төрөлхтний  ирээдүй байгальтайгаа цаашид хэрхэн харьцахаас шууд хамаарах болжээ. Сүүлийн жилүүдэд дэлхийн цаг уурт гарч буй огцом өөрчлөлт, байгалийн элдэв гамшигт үзэгдлүүд нь ихэвчлэн  хүний болчимгүй буруу үйл ажиллагаатай холбоотой гэдгийг судлаачид нотолж байгаа.

Эрс тэс уур амьсгал, эмзэг онгон хөрс, ургамалтай манай орны хувьд  байгаль экологийн энэхүү сөрөг өөрчлөлтийн үр дагавар хурц тодоор шууд  мэдрэгдэх боллоо.  Дулааны улирлын хугацаа богиносон, хэт халалт, хүйтрэлт, хуурайшилт явагдаж бэлчээрийн даац хомсдсон нь хөдөө аж ахуйн үйлдвэрлэлд суурилсан манай хөдөөгийн ард иргэдийн амьдралд хүндээр тусч байна. Цөлжилт нь манай гариг дэлхийн нэг тэрбум гаруй хүний   амьдралд шууд аюул учруулж байгааг НҮБ болон Олон улсын байгаль орчныг хамгаалах байгууллагуудаас удаа дараа хийсэн судалгаа тайланд дурьдсан байна.

Энэ асуудалд олон нийтийн анхаарлыг онцгойлон хандуулахын тулд Засгийн газрын хуралдааныг анх удаа цөлжилт ихээр явагдаж байгаа Өмнөговь аймгийн Баяндалай сумын нутаг Гашууны хоолойд саяхан хийлээ. Уг  хуралдаанаар  манай оронд болон дэлхий нийтийн өмнө ч нэгэн адил тулгарч байгаа уур амьсгалын өөрчлөлтийн тухай асуудлыг хэлэлцэж,  хурдацтай  явагдаж буй цөлжилт, цаг уурын өөрчлөлт, түүний дэлхий дахинд үзүүлж буй нөлөөллийн асуудалд дэлхийн улс гүрний анхаарлыг төвлөрүүлэх зорилтыг тавьсан юм.

Энэ хүрээнд Монгол оронд хэрэгжүүлэх Уур амьсгалын өөрчлөлтийн хөтөлбөрийг Засгийн газрын дээрх хуралдаанаар хэлэлцэн дэмжиж, Улсын Их Хуралд өргөн мэдүүлэхээр шийдвэрлэлээ. Байгаль дэлхийгээ хайрлан хамгаалахын зэрэгцээ, байгалийнхаа баялагийг зөв зохистой ашиглан эдийн засгаа өсгөн, хүн ардынхаа хөгжил дэвшил, сайн сайхан амьдрах  нөхцлийг  бүрдүүлэх нь  Засгийн газар бүрийн  эрхэм зорилт  төдийгүй түүний сорилт, шалгуур болдог. Энэ жишгийн дагуу манай хамтарсан Засгийн газар  асуудлын хүнд бэрхээс халгаж халшралгүй, өнөө маргаашаар аргацаалгүйгээр  ирээдүйд үр дүнгээ өгөх их бүтээн байгуулалтын томоохон төсөл хөтөлбөрүүдийг  хэрэгжүүлэхээр зориглон ажиллаж байна.

Энэхүү төсөл хөтөлбөрүүдээ Та бүхэндээ тайлбарлан таниулж, иргэд олон түмнийхээ сэтгэл зүтгэлийг их бүтээн байгуулалтын зүг хандуулах нь энэ удаагийн томилолтын нэг гол зорилт юм. Их бүтээн байгуулалтын ажлын гол  цөм нь улс орноо аж үйлдвэржүүлэхэд оршино. Учир нь орчин үеийн эдийн засгийн өсөлтийн үндэс тулгуур нь  аж үйлдвэржүүлэлт, өндөр технологи, мэдлэг мэдээлэл болоод байна.  Тиймээс ч  аж үйлдвэржүүлэх бодлого улс орны хөгжлийг шинэ шатанд гаргана хэмээн манай Засгийн газар үзэж байгаа юм.
 
 Эрхэм хүндэт иргэд ээ!

Улс оронд олон жилийн туршид яригдаж байсан боловч бүрэн шийдэж чадаагүй байсан асуудлуудын зангилааг хамтарсан Засгийн газар тайлж, бүтээн байгуулалтын зарим томоохон ажлуудыг эхлүүллээ. Тухайлбал стратегийн ач холбогдол бүхий ашигт малтмалын ордыг эдийн засгийн эргэлтэд оруулах эхний алхам болох  Оюу толгойн ордыг ашиглах хөрөнгө оруулалтын гэрээг байгуулснаар  одоо үйлдвэрлэлийн бэлтгэл ажил ид  өрнөж байна.

Мөн Таван толгойн орд газрыг ашиглах талаарх төрийн бодлого, үзэл баримтлалыг Улсын Их Хурлаар батлууллаа. Ингэснээр  Монгол улсын иргэн бүр эх орныхоо байгалийн баялгаас хувь  эзэмших, ашиг хүртэх орд газрыг эзэмших болон түүнийг дагасан бүтээн байгуулалтын ажилд манай иргэд, дотоодын аж ахуйн нэгж  давуу эрхтэйгээр оролцох, цаашид үндэсний компаниуд өсөн бэхжих бодлого эрх зүйн үндэс баталгаажиж байгаа юм. Орд газруудыг эдийн засгийн эргэлтэд оруулах ажлын эхлэлүүд ч ач холбогдлоо өгч эхэлж байна. Тухайлбал, оны эхний саруудын байдлаар уул уурхайн салбарт ажиллагсдын тоо 1100 гаруй хүнээр нэмэгдэж, өнөөгийн байдлаар Оюу толгой төсөлд 3600 гаруй монгол ажилчид ажиллаж байна. 

Үүнээс гадна манай хувийн хэвшлийнхэн Өмнөговь аймгийн Ухаа худаг, Нарийн сухайт, Ховдын Хөшөөтийн нүүрсний орд, Сэлэнгэ аймгийн Төмөртэйн төмрийн хүдрийн орд газрын олборлолтыг эхлүүлж, түүнийг дагалдсан дэд бүтцийн бүтээн байгуулалтын ажил эрчтэй өрнөж байна. Мөн Өмнөговь аймгийн Цогтцэций сумын нутагт анх удаа үндэсний мэргэжилтэн, ажилчдын хүч хөдөлмөрөөр дулааны цахилгаан станцыг барьж байгуулж байна. Ийнхүү ашигт малтмал, уул уурхайг түшиглэсэн томоохон бүтээн байгуулалтын ажил эх орны өнцөг булан бүрт өрнөж эхэллээ.

Үйлдвэрлэлийн бэлтгэл ажил хэвийн үргэлжилбэл 2012 оноос Таван толгойн, 2013 оноос Оюутолгойн орд газрын  үндсэн олборлолт  эхэлж, түүхий эд бүтээгдэхүүнээ зах зээлд гаргана. Ашигт малтмалыг боловсруулах, улмаар эцсийн бүтээгдэхүүн үйлдвэрлэж нэмүү өртөг бий болгох, ингэснээр ард иргэдээ ажлын байраар хангаж аж амьдралыг нь дээшлүүлэхэд төр засгийн бодлого чиглэж байгаа билээ.

Оюутолгойн үндсэн олборлолт эхлэхэд өнөөгийн үйл ажиллагаагаа явуулж буй Эрдэнэт үйлдвэрээс 3 дахин илүү бүтээгдэхүүн үйлдвэрлэн гаргана гэсэн тооцоо судалгаа бий. Улс орны эдийн засаг хүндрэлтэй байсан зарим он жилүүдэд Эрдэнэт үйлдвэр дангаараа экспортын нийт орлогын 40-50 хувь, улсын төсвийн орлогын 40 гаруй хувийг бүрдүүлж байсан.

Монгол улс зах зээлийн эдийн засгийн шилжилтээ эхэлсэн 1990-ээд оноос хойш өнөөг хүртэл Эрдэнэт үйлдвэр улс орны эдийн засгийн томоохон хувь нэмэр оруулж, санхүү, эдийн засгийн хямралтай байсан он жилүүдэд ч улсын төсөвт олон зуун тэрбум төгрөгийн татварын орлого оруулж, улс орны өмнө тулгамдаж байсан олон талын нийгмийн асуудлыг шийдвэрлэхэд жинтэй хувь оруулж ирснийг ч өнөөдөр энд хэлэхэд таатай байна. Уулын баяжуулах Эрдэнэт үйлдвэрт ажиллаж байсан болон одоо ажиллаж байгаа нийт ажилтан, албан хаагчид та бүхний бүтээлч хөдөлмөрийг төр засаг өнөөдөр ч гэсэн өндөрөөр үнэлж байгаа билээ.  

Ойрын жилүүдэд Оюутолгой, Тавантолгой, Ухаахудагт бий болж байгаа томоохон бүтээн байгуулалтын үр дүнд Монгол улсын төсөв болон хүн амыг ирэх 30-40 жилд мөнгөн орлогоор тасралтгүй хангах шинэ орд газар, үйлдвэрийн газрууд баригдаж, эхнээсээ зарим төрлийн түүхий эдээ экспортод гаргаж, улсын төсөвт багагүй хувь нэмрээ оруулж байна. Импортыг багасгаж, экспортыг нэмэгдүүлэхэд чиглэсэн аж үйлдвэржилтийн бодлогыг цогцоор хэрэгжүүлснээр улс орны хөгжил шинэ шатанд гарна. Энэ бүх ажлыг нэгтгэж зангидсан алсын хараатай төрийн бодлого, сайн зохион байгуулалт хэрэгтэй.

Засгийн газраас баталсан “Орон нутагт үйлдвэрлэл хөгжүүлэх чиглэл”, “Монгол Улсыг үйлдвэржүүлэх хөтөлбөр” зэрэг баримт бичгүүд нь энэхүү бодлого, зорилгод чиглэж байгаа юм. Эдгээр хөтөлбөр, чиглэлийн дагуу улс орны эрчимтэй хөгжлийг хангах зорилгоор Оюутолгой, Тавантолгойн орд газруудыг түшиглэсэн аж үйлдвэрийн цогцолборыг Сайншанд хотод байгуулахаар төлөвлөн ажиллаж байна. Энэхүү аж үйлдвэрийн цогцолбор  байгуулах төслийн хүрээнд зэс хайлуулах, газрын тос боловсруулах, хар металлургийн, кокс химийн, нүүрс химийн, барилгын материалын үйлдвэр зэрэг улс орны цаашдын хөгжлийг тодорхойлсон томоохон үйлдвэрүүд баригдана.

Ингэснээр Монгол Улс уул уурхайн баялгаа түүхийгээр нь гадагш гаргах бус дотооддоо боловсруулах, нэмүү өртөг шингэсэн, олон улсын зах зээлд өрсөлдөх чадвартай эцсийн бүтээгдэхүүн үйлдвэрлэж, улс орныхоо эрэлт хэрэгцээг хангахаас гадна гадаадад экспортлох боломжтой болно. Томоохон бүтээн байгуулалтын ажил өрнөж, хэдэн мянган шинэ ажлын байр бий болж, орчин үеийн аж үйлдвэрийн хот үүсч хөгжинө.

Сайншанд аж үйлдвэрийн цогцолборыг ашиглалтад оруулснаар урьдчилсан тооцоогоор манай улсын эдийн засгийн бодит өсөлт эрс хурдацтай нэмэгдэж,  ДНБ-д  аж үйлдвэрийн салбарын эзлэх хэмжээ 60 орчим хувьд хүрч, нэг хүнд ногдох ДНБ-ний хэмжээ 2 дахин нэмэгдэх, өрх гэр бүлийн орлого хурдацтай өсөн нэмэгдэх зэргээр ард иргэдийн аж амьдралд мэдэгдэхүйц нааштай өөрчлөлт гарах болно.
 
Аж үйлдвэрийн цогцолборыг байгуулахад эхний ээлжинд нийт 5000 инженер техникийн ажилтан, мэргэжилтэй ажилчид шаардагдана гэсэн урьдчилсан тооцоо байдаг. Ерөнхий боловсролын сургууль болон Мэргэжлийн сургалт үйлдвэрлэлийн төвийг төгссөн, одоогоор ажилгүй байгаа залуучуудыг хөдөлмөрийн зах зээлийн эрэлт хэрэгцээ ихтэй байгаа инженер техникийн ажилтан, гагнуурчин, бетон цутгагч, засварчин зэрэг ажил мэргэжлээр сургахаар бид шийдвэрлэж, энэ онд эхний удаад 3000 гаруй залуучуудыг ямар нэгэн төлбөргүйгээр холбогдох чиглэлийн МСҮТ-д сургахаар шийдвэрлэсэн.

Ингэхдээ орон нутгаас, иргэдээс гаргасан хүсэлтийн дагуу аймаг тус бүрт суралцах залуучуудын квот гаргаж, бүтээн байгуулалтын ажилд бүхий л аймгийн залуучуудыг хамруулна. Үүнд Орхон аймгаас энэ удаад 111 иргэнийг хамруулахаар төлөвлөсөн. Монгол улсад уул уурхай, дэд бүтцийн салбарт ажлын байр олноор бий болж, түүнд ажиллах хүсэл сонирхол бүхий залуус мэргэжлийн дадал, ур чадвар олгох сургуулиуд нь бэлэн байна. Одоо гагцхүү суралцагчийн, залуучуудын маань өөрсдийн сахилга хариуцлага, санаачлагатай байдлаас л цаашдын сайхан амьдралын  баталгаатай эсэх байдал шалтгаалах болно гэдгийг сайтар анхаарах  ёстой.
 
Төслийн хүрээнд дэвшилтэт техник, өндөр технологи бүхий үйлдвэрүүд тэдгээрийн найдвартай үйл ажиллагааг хангах дэд бүтэц, инженерийн болон нийгмийн хангамжтай, байгаль орчинд ээлтэй, шилдэг хот төлөвлөлттэй, олон улсын хэмжээнд эдийн засгийн хувьд өрсөлдөх чадвар бүхий аж үйлдвэрийн цогцолборыг төрийн болон хувийн хөрөнгө оруулалтаар байгуулах болно.

Саяхан батлагдсан “Төмөр замын тээврийн талаар төрөөс баримтлах бодлого”-ын хүрээнд эхний ээлжинд Тавантолгой-Сайншанд-Чойбалсан чиглэлийн хэвтээ тэнхлэгийн нийт 1000 гаруй км төмөр зам  барихаар төлөвлөж үүнийг гүйцэтгэснээр эдийн засгийн хөгжилд томоохон түлхэц өгч, шинэ шинэ ажлын байр бий болох боломж мөн бүрдэнэ. Аж үйлдвэрийн цогцолбор, төмөр зам төслийн зэрэгцээ 2011-2016 онд хэрэгжүүлэх “Шинэ бүтээн байгуулалт” хөтөлбөрийн хүрээнд барилгын салбарыг сэргээх, нийслэл болон хүн ам төвлөрсөн хот суурин, бүс нутгийн дэд бүтцийг сайжруулах, орон  сууцны хангамжийг нэмэгдүүлэх, иргэдийн тав тухтай, эрүүл аюулгүй орчинд амьдрах нөхцлийг  бүрдүүлэх олон талын томоохон зорилтуудыг дэвшүүлэн ажиллаж байна.

Аж үйлдвэржүүлэлт,  шинэ бүтээн байгуулалтын зорилтуудыг хэрэгжүүлэхийн тулд Засгийн газраас хөрөнгийн зах зээлийг хөгжүүлэх, төрийн өмчийн компаниудыг нээлттэй болгох, олон шаттай зөвшөөрлийн тогтолцоог өөрчлөх, бүртгэл мэдээллийн шинэ тогтолцоог бүрдүүлэх, бизнесийн болон боловсролын салбарын шинэчлэлийг эрчимжүүлэх, өөрөөр хэлбэл эдийн засгийг ардчилахад чиглэсэн удирдлага зохион байгуулалтыг арга хэмжээнүүдийг авч хэрэгжүүлж байна.

Уул уурхай, аж үйлдвэрийн салбарыг хөгжүүлэхийн зэрэгцээ манай орны эдийн засгийн нэг үндсэн тулгуур болох хөдөө аж ахуйн салбарыг хөгжүүлэхэд Засгийн газар онцгойлон анхаарч байгаа. Газар тариалангийн салбарыг эрчимжүүлэн хөгжүүлж, хураан авч байгаа үр тариа бусад ургацын чанар, хэмжээг нэмэгдүүлэх замаар дотоодын хүнсний үйлдвэрлэлийн хэрэгцээг бүрэн хангахуйц түвшинд хүргэх нь бидний ойрын зорилт юм. Энэ нь зөвхөн тухайн салбарын үйлдвэрлэлийн тоо хэмжээг өсгөх төдий бус бүхэлдээ  манай эдийн засгийн тэр дундаа улс үндэстний маань хүнсний аюулгүй байдлын чухал холбогдолтой том зорилт гэдгийг хэлье.

Атрын 3 дугаар аян үндэсний хөтөлбөрийг хэрэгжүүлэх хүрээнд хүн амын гурилын хэрэгцээг дотоодоосоо бүрэн хангах зорилт тавьж, тариаланчдыг дэмжих олон арга хэмжээг авч хэрэгжүүлснээр тодорхой үр дүн гарч байна. Энэ онд 330 гаруй мянган тонн улаан буудай хураан авч, 250.0 мянга орчим тонн гурил үйлдвэрлэх боломжтой, ингэснээр гурилын хомсдол гарахгүй байх нөхцөл бүрдэнэ гэсэн тооцоо, судалгааг холбогдох мэргэжлийн яам, байгууллага гаргаад байгаа.

Мал аж ахуй бол манай орон нутгийн үндсэн салбар, хөдөөгийн иргэдийн маань амьжиргааны гол эх үүсвэр билээ. Иймд Засгийн газрын онцгой анхаарлын төвд байдаг. Уур амьсгалын өөрчлөлт, нийгмийн хөгжлийн чиг хандлагад нийцүүлэн мал аж ахуйн үйлдвэрлэлийг эрчимжүүлэн хөгжүүлэх, зах зээлийн нөхцөлд өрсөлдөх чадвартай эдийн засгийн үр ашигтай салбар байх нөхцөлийг бүрдүүлэх, малыг эрүүлжүүлэх, экспортыг нэмэгдүүлэх зорилго бүхий “Монгол мал” үндэсний хөтөлбөрийг УИХ-аас батлан гаргасныг хэрэгжүүлэхээр Засгийн газраас холбогдох арга хэмжээг авч эхлээд  байна.

Өнгөрсөн өвөл, хавар байгаль цаг агаарын гамшигт үзэгдэл зуд болж,  мал аж ахуйн салбар, малчдын аж амьдралд ихээхэн хүндрэл учруулсан. Энэхүү  зудын улмаас 44,0 сая толгойд хүрч байсан мал сүрэг 9,7 сая толгойгоор хорогдож, олон арван тэрбум төгрөгийн шууд  хохирол учирч, 8700 гаруй өрх огт малгүй болсон. Зудын хор хохирлыг арилгах, зутарч хохирсон малчдынхаа амьжиргааг тэтгэх зорилгоор Засгийн газраас саяхан тогтоол гарган  “Малчин өрхийг малжуулах журам”-ыг батлан хэрэгжүүлж эхэллээ. Энэ журмаар улсын хэмжээнд малгүй болсон нийт өрхийн 50 хувийг 2010 онд малжуулна. Үүнд зориулан эхний ээлжинд Засгийн газар 3 тэрбум төгрөгийн эх үүсвэр гаргаж, аймаг бүрт хуваарилан олгож эхэлсэн.

Манай Засгийн газрын тэргүүлэх үндсэн зорилго бол Монгол хүнээ хөгжүүлэхэд чиглэгдэж байгаа. Монгол хүн бүр ажилтай, орлоготой, эрүүл саруул, эрдэм боловсролтой, бүтээлч чадвартай байх нь бид бүхний нийтлэг хүсэл эрмэлзэл билээ. Засгийн газар юуны өмнө нийгмийн баялгаас иргэн бүрт хувь хишиг хүртээх, хувь хүний болон өрхийн орлогыг нэмэгдүүлэх арга хэмжээг авч байна. Эхний ээлжинд иргэн бүрт 70 мянган төгрөг олгосон.
 
Мөнгийг бэлнээр, бөөнөөр олгох нь инфляци өсгөж, юмны үнэ хөөрөгдөх сөрөг үр дагавартай байгаа учир, цаашид сар бүр тогтмол олгож байхаар саяхан шийдсэн. Тухайлбал, энэ оны 8 дугаар сарын 1-нээс он дуустал иргэн бүрт 10 мянган төгрөг олгож байгаа бол 2011 оноос эхлээд сар бүр 20 мянгаас доошгүй төгрөг олгохоор тогтож байна. Үүнийг удахгүй 2011 оны улсын төсвийн төсөл, Хүний хөгжил сангийн төсвийг хэлэлцэн батлах үед эцэслэн шийдвэрлэж, баталгаажуулах болно.
 
Үлдэх 1.0 сая төгрөгийг иргэдэд боловсролын болон эрүүл мэндийн үйлчилгээ, нийгмийн даатгалын шимтгэлийн төлбөр болон орон сууцны, малчны ба бусад зээлийн төлбөрт нь зарцуулах хэлбэрээр олгохоор судалгаа тооцоог холбогдох яам байгууллагууд хийж байна. Саяхан манай Засгийн газрын хуралдаанаар “Сургалтын төлбөрийн талаар авах зарим арга хэмжээний тухай”  асуудлыг хэлэлцээд тогтоол гаргаж, их, дээд сургууль, коллежийн суралцагчийн төлбөрөөс 500,0 мянган төгрөгийг 2011 оны 1 дүгээр сараас эхлэн Хүний хөгжил сангаас бэлэн бусаар олгохоор шийдвэрлэлээ.
  
Энэ арга хэмжээ нь манай ард иргэдэд учирч байсан сургалтын төлбөрийн болон банкны зээлийн дарамтыг багасгаж, тэдний ахуй амьдралд томоохон дэмжлэг болохуйц зөв зүйтэй арга хэмжээ болсон гэж манай ард иргэд, олон нийт үзэж, ихээхэн дэмжиж  байна. Мөн энэ оны 10 дугаар сараас төрийн албан хаагчдын цалин болон иргэдийн тэтгэвэр, тэтгэмжийг 30 хувиар нэмэхээр шийдсэн. Олон хүүхэдтэй эхэд олгох мөнгийг нэмэгдүүлсэн бөгөөд түүнийг энэ оны IV улирлаас олгохоор шийдвэрлээд байна. 

Сүүлийн жилүүдэд буюу 2005 оноос хойш төрөлт ихээхэн хурдацтай нэмэгдсэнтэй холбоотойгоор энэ жилээс эхлэн сургуулийн өмнөх боловсролд хамрагдах хүүхдийн асуудал тулгамдсан асуудал болон гарч ирж байна. УИХ, Засгийн газраас сургуулийн өмнөх боловсролын тогтолцоо, цэцэрлэгийн хүрэлцээг сайжруулахад ихээхэн анхаарч жил бүрийн төсөвт цөөнгүй тооны цэцэрлэгийг шинээр барих хөрөнгийг тусган гүйцэтгэж ирсэн. Үүний үр дүнд улсын хэмжээнд 2009 онд 31, энэ оны эхний 8 сарын байдлаар 28 цэцэрлэгийн барилга тус тус шинээр баригдаад байна.

Өнгөрсөн хичээлийн жилд улсын хэмжээнд 814 цэцэрлэг үйл ажиллагаа явуулж байгаа боловч жил тутам 60,0-67,0 мянган хүүхэд шинээр төрж байгаагийн улмаас, шинээр төрсөн хүүхдийн тооны өсөлтийг цэцэрлэгийн анги, танхимын хангамж гүйцэж чадахгүй байна. Ойрын жилүүдэд ч хүн амын насны бүтэц, өсөлттэй холбоотой энэ асуудал ирэх жилүүдэд ч сургуулийн өмнөх боловсрол, ЕБС-уудад дамжин олон жил үргэлжлэх хандлагатай байна.

Удахгүй Засгийн газраас Монгол улсын ирэх 2011 оны төсвийн төслийг боловсруулж, өргөн мэдүүлэхээр бэлтгэж байгаа. Энэхүү төсвийн төсөлдөө ч бид хүүхдийн цэцэрлэг, яслийн барилга, өргөтгөлийн асуудлыг дахин анхаарч тусгах, зохистой шийдлийг олох, олон улсын байгууллагуудын төсөл, хөтөлбөрийн хүрээнд шийдвэрлэх зэрэг олон талын арга хэмжээг авах болно.

Эрхэм хүндэт иргэдээ,

Засгийн газар эдийн засаг, нийгмийн бодлогын дээрх зорилтуудаа хэрэгжүүлэхийн тулд төрийн байгууллагын ажил, үйлчилгээг бүх шатанд сайжруулах, хариуцлагын тогтолцоог бүрдүүлэхийг эрмэлзэж байна. Энэ чиглэлээр төвлөрлийг сааруулж, орон нутгийн эрх мэдлийг нэмэгдүүлэх талаар тодорхой арга хэмжээ авч хэрэгжүүлж эхэлсэн. Засгийн газраас орон нутагт олгож байгаа төсвийн шилжүүлгийг тухайн орон нутгийн хөгжлийн индекст тулгуурлан тодорхойлж байх зарчимд шилжинэ. Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулж, улс, бүс нутгийн шинж чанартайгаас бусад бүх бараа, ажил, үйлчилгээг үнийн дүнгээс үл хамааруулан тухайн орон нутаг худалдан авдаг байх журам тогтооно.

Боловсон хүчний босоо тогтолцоог өөрчлөн аймаг, нийслэлд ажиллаж байгаа төрийн онцгой чиг үүргийн агентлагаас бусад агентлагийн дарга нарыг томилох, чөлөөлөх  эрхийг аймаг, нийслэлийн Засаг дарга нарт шилжүүлэх зэрэг арга хэмжээг авна. Бүх шатанд хариуцлагын тогтолцоог бий болгож, хууль дүрмийг чанд мөрдүүлэх, гэмт хэрэг, нийгмийн ёс суртахууны эсрэг үзэгдэлтэй тууштай тэмцэж, ард иргэдийн амгалан тайван байдлыг хангахад ч онцгойлон анхаарч ажиллаж байгаа, ажиллах ч болно.

Төр засгийн шийдвэр, авч хэрэгжүүлж байгаа арга хэмжээ бүх салбар, орон нутгийн түвшинд  бодит ажил болон өрнөж, түүний үр дүн ард иргэдэд шууд хүрч, мэдрэгдэж байх учиртай. Тийм ч учраас энэ удаагийн томилолтын нэг зорилго бол гаргасан шийдвэрийг аймаг, сум, багийн түвшинд иргэдэд хүргэх талаар хэрхэн ажиллаж байгаа, иргэдийн санал бодол ямар байгаатай танилцах, мөн орон нутагт тулгамдаж байгаа асуудлыг шийдвэрлэх талаар ямар арга хэмжээ авч болох талаар санал бодлоо солилцоход чиглэж байна.

 Эрдэнэт хотын иргэдээ!

Манай улсын аж үйлдвэрийн томоохон төв болсон Эрдэнэт хотын хэмжээнд 2010 оны эхний 8 сарын байдлаар 756.2 тэрбум төгрөгийн аж үйлдвэрийн бүтээгдэхүүн үйлдвэрлэсэн нь өнгөрсөн оны мөн үеэс 55.5 хувь өссөн өөдрөг үзүүлэлт нааштай сайн мэдээ гарсан байна. Энэ оны эхний 8 сарын байдлаар аймгийн жижиг, дунд үйлдвэрийг хөгжүүлэх сан болон  өрхийн үйлдвэрлэлийг дэмжих сангаас 93 аж ахуйн нэгж, 51 төсөлд 2.8 тэрбум төгрөгийн зээл тус тус олгож, 330 байнгын ажлын байр шинээр бий болгожээ.

Үүний үр дүнд жилд 3000 тонн яс боловсруулах, 165.2 мянган метр квадрат сендвичин хавтан үйлдвэрлэх, 1100 ширхэг арьс шир боловсруулж суран бүтээгдэхүүн үйлдвэрлэх, хөнгөн блок, өнгөлгөөний тоосгоны зэрэг үйлдвэрүүд, гахайны 300 аж ахуй шинээр байгуулагдсан байна. Бүтээн байгуулалтын чиглэлээр сүүлийн 2 жилд хүүхдийн цэцэрлэг, эмнэлэг, цэвэр усны өргөтгөх станц, 11.5 км хатуу хучилттай зам баригдаж, хотын цэвэрлэх байгууламжийн өргөтгөл барих ажлууд хийгдэж байна.

Ирэх онд тохиох Эрдэнэт хот байгуулагдсаны 35 жилийн ойг угтаж томоохон бүтээн байгуулалтын ажил өрнүүлж байгаа нь сайшаалтай. УИХ-аас Засгийн газарт өгсөн үүрэг чиглэлийн дагуу Зэс хайлуулах үйлдвэрийг барих асуудлыг нарийвчлан судлан, боловсруулж байна. Холбогдох тооцоо судалгааг ойрын хугацаанд бэлэн болгож, УИХ-д танилцуулахаар Засгийн газар ажиллаж байна.  Бид аль болох богино хугацаанд урьдчилсан бэлтгэлийг хангаж зэс хайлуулах үйлдвэрийг барьж эхлүүлэх болно.

Мөн Үйлдвэр технологийн хууль батлагдсантай холбогдуулан Эрдэнэт хотод аж үйлдвэрийн парк байгуулах асуудлыг шийдвэрлэхээр Засгийн газар нухацтай судалж байна.

Эрхэм хүндэт иргэдээ,

Орхон аймаг, Эрдэнэт хот улам бүр өргөжин хөгжиж, улс орныхоо хөгжил дэвшилд улам их хувь нэмэр оруулахын хамт та бүхний амьдрал ахуй ямагт өөдлөн дэвжиж байхын өлзийтэй ерөөлийг Та бүхэндээ өргөн дэвшүүлье. 

Анхаарал тавьсанд баярлалаа.

Монгол улсын Ерөнхий сайд С.Батболд есдүгээр сарын 3-ны өдөр Говьсүмбэр аймагт ажиллалаа. Хур бороотой угтсан боржигон нутгийнхан Засгийн газрын тэргүүнийг тун бэлэгшээж байв. Дэд бүтэц, зах зээлийн давуу тал ихтэй Говьсүмбэрчүүдийн өмнө олон олон боломжууд нээлттэй байгааг Ерөнхий сайд С.Батболд очсон газар бүртээ онцолж байлаа.

Зам дагаж хөгжил

Чойр- Сайншандын чиглэлийн 176.4 км хатуу хучилттай замын барилгын ажлын нээлтэд оролцохдоо Ерөнхий сайд ийн онцлон тэмдэглэлээ. Мянганы сорилтын сангийн санхүүжилтээр босч байгаа энэ замын анхны гэрээ хэлэлцээрийг ерөнхий сайд С.Батболд гадаад хэргийн сайд байхдаа эхлүүлж байсан түүхтэй.  Босоо тэнхлэгийн хувьд ОХУ, БНХАУ-тай шууд холбогдох, эдийн засгийн хувьд ач холбогдол нь өндрөөр үнэлэгдэх  энэ зам 43  сая ам.долларын хөрөнгө оруулалтаар босч байгаа юм байна.

Гүйцэтгэгчээр гадаад дотоодын 20 гаруй  компани өрсөлдсөнөөс БНСУ-ын “LG” группын салбар  “LIG Engineering” компани шалгарчээ. Солонгосын лабораторид туршилт хийсэн, ямартаа ч 10-20 жилийн турш монголын цаг агаарын нэмэх, хасах 40 хэмд ямар ч гэмтэлгүй, өндөр стандартын зам барих болно гэдгийг тус компанийхан амалж байна. Энэ замыг 2013 оны есдүгээр сарын 1-нд хүлээлгэн өгөх ажээ. Цементэн давхар хучилттай, өмнөх замаасаа нэг метрээр өргөн болох юм байна.

Монгол ажилчдыг ажиллуулж байгаагаараа онцлог ажээ. Монгол улсын Засгийн газраас хэд хэдэн томоохон төсөл хэрэгжүүлж байгаагийн нэгд Сайншандын аж үйлдвэрийн парк байгуулах том ажлын хүрээнд энэ зам ашиглалтад орж байгаа нь ихээхэн ач холбогдолтой гэдгийг Ерөнхий сайд С.Батболд онцолж байлаа. Түүнчлэн Европ Азийг холбосон энэ зам орон нутгийн хөгжилд ч  ач тустайг  мөн тэмдэглэж байв. Монгол улсын эдийн засгийн бодлогын хөгжилд ихээхэн хувь нэмэр оруулах энэ замын ажилд хөрөнгө оруулалт хийж байгаа Америкийн ард түмэнд гүн талархал илэрхийлж байгаагаа бас дурдсан юм.

Энэ замаар транзит тээврээс  эхлээд урсгал  нэлээн ихтэй зам байх тооцоо гараад байгааг ЗТБХБ-ын яамны  төрийн нарийн бичгийн дарга Ж. Бат-Эрдэнэ ярилаа.Чойрын богд хэмээх их хайрханы хажууд замын барилгын ажил  эхэлж  байгаад нутгийн зон олон ам сайтай байсан төдийгүй,   энэ хайрхан ээлээ өгнө гэдэгт итгэж байгаагаа ч тэд нуусангүй.

Шивээ овоогийн нүүрсний уурхайтай  танилцлаа

Ерөнхий сайд С.Батболд Говьсүмбэр аймагт ажиллах томилолтынхоо хүрээнд Шивээ- Овоогийн уурхайд очиж, тус уурхайн ажил байдалтай танилцлаа. Тус уурхай нь байгуулагдаад 20 жил болж байгаа бөгөөд нийтдээ 44.5 сая шоо метр нүүрс хуулж, 11.7 сая тонн нүүрс олборложээ. Эдүгээ тус компани 29тэрбум төгрөгийн алдагдалтай ажиллаж байна гэх урам муутайхан үгээр тус компанийхан Ерөнхий сайдыг угтлаа. 1998 онд Японы Засгийн газрын хөнгөлттэй зээлийн хөрөнгөөр тус уурхай тоног төхөөрөмжийн шинэчлэл хийсэн хэдий ч эдүгээ тоног төхөөрөмжийн үнэ болоод элэгдлийн зардал өндөр, мөн нүүрс бодит өртгөөс бага үнэлэгдэж байгаа нь алдагдалд орох үндсэн шалтгаан болсныг Шивээ- Овоо нүүрсний уурхайн захирал Х.Балсандорж тайлбарлаж байсан.

Мөн жил ирэх тусам уурхай гүнзгийрч тухайн жил бүртээ хөрсөө хуулж чадахгүй байгаагаас одоогийн байдлаар 8.6 сая шоо метр хөрсний хоцрогдолд ороод байгаа аж. Түүнчлэн тус компанид  лиценцийн асуудал буйг ч хэлж байсан. Гэвч тус компанийхан алдагдалтай ажиллаж байна гээд гар хумхиад суусангүй. Уурхайгаас олборлож байгаа 47 хувийн дундаж чийглэгтэй нүүрсийг хатаах замаар чийглэгийг бууруулах, илчлэгийг нэмэгдүүлэх ийм үйлдвэрийг байгуулсан бөгөөд эндээс зургаан тэрбум төгрөгийн орлогын тооцоог харж байгаа юм байна.

Уурхайн тээвэртэй хөрс хуулалтын зай нэмэгдэж, зардал өсч байгаатай холбогдуулан хөрсний тээврийн өөрийн өртгийг бууруулах, бүтээлийг нэмэгдүүлэх зорилгоор хөрс тээврийн 2.5км конвейерийг барьж ашиглалтад оруулахаар төлөвлөжээ. Ирэх жил үүнийг ашиглалтад оруулснаар хөрсний тээврийн өөрийн өртөг 1.5 дахин буурч жилдээ гурван тэрбум төгрөгийн зардал хэмнэх тооцоог гаргасан байна. Мөн дотоодын  нүүрсний тээврийн зайг хоёр км-ээр богиносгох замаар конвейерийн  системийг нэвтрүүлснээр нүүрс гаргалтын өөрийн өртөг 2.7 дахин буурч, 700-гаад сая төгрөгийн хэмнэлт гарч байгааг танилцуулж байсан.

Энэ ажлыг Ерөнхий сайд тун сайшаасан бөгөөд өртгөө багасгаад, тээвэрлэх технологио өөрчилнө гэдэг маш чухал гэдгийг онцоллоо.  Үр ашигтай төслүүдийг авч үзээд, зөв арга технологийг Засгийн газар дэмжин ажиллах болно гэдгийг энэ үеэр тэмдэглэн хэлэв. Мөн ирэх оны төсөвт  Шивээ-овоо уурхайд төсөвлөсөн мөнгө хасагдсан шалтгааныг судалж үзэхийг Эрдэс баялаг эрчим хүчний  дэд сайд Т.Энхтайванд үүрэг болголоо. Харин эрчим хүчний үнийг тодорхой хэмжээнд барих үүднээс нүүрсний үнэ баригдаад байгаа шалтгааныг сонссон Ерөнхий сайд эрчим хүчний үнийг ялгавартай гаргаад, тарифыг тогтоох бодлогыг Засгийн газар дэмжиж байгааг тэмдэглэж байсан.

Уул уурхайн салбарын мэргэжилтэй ажилтан бэлтгэх жишиг сургууль болно

Уул уурхайн чиглэлийн ажил олгогч томоохон компани, холбогдох яам, мэргэжлийн байгууллагуудын явуулсан шалгаруулалтаар Говьсүмбэр аймгийн мэргэжлийн сургалт үйлдвэрлэлийн төв нь жишиг сургууль болох үзүүлэлтийг хангажээ. Тус төвийн үйл ажиллагаатай Монгол улсын Ерөнхий сайд С.Батболд танилцлаа. Тус мэргэжлийн сургалт үйлдвэрийн төв нь   уул уурхайн салбарын мэргэжилтэй ажилтан бэлтгэх жишиг сургууль болох бөгөөд Монголын мянганы сорилтын сангаас 2.5 сая ам.долларын хөрөнгө оруулалт хийхээр болсон байна.

Энэ ажлын хүрээнд сургалтын дадлагын барилгыг 2011 онд шинээр барьж байгуулах бөгөөд хамгийн орчин үеийн тоног төхөөрөмжөөр тоноглогдох ажээ. Уул уурхайн хүнд машин механизмын оператор, гидравлик хий шингэн, механик, цахилгаан электроник, мехатроник, токарь, гагнуур, дотоод шаталтын хөдөлгүүр  зэрэг мэргэжлээр эдүгээ тус сургуульд бүх аймаг орон нутгаас 600 орчим оюутан ирж суралцаж байна. Уул уурхайн томоохон компаниудаас ажлын байрны захиалга ихээр ирдэг бөгөөд төгсөгчдийн 90-ээс дээш хувь нь ажлын байраар бүрэн хангагддаг ажээ.

Уурхайд ажиллагсдыг 24-өөс дээш хэмээн  насны хязгаарлалт хийж байгаа нь одоогийн байдлаар бага зэрэг хүндрэл учирч байгаа гэнэ. Учир нь 18-19 насандаа тус төвд орсон тэд сургуулиа төгсчихөөд хоёроос гурван жил ажилгүй  байж болохгүй юм. Энэ асуудалд зохицуулалт хийж өгөх хэрэгтэйг Ерөнхий сайд холбогдох яам, газрын ажилтнуудад үүрэг өглөө. Дараа нь Ерөнхий сайд оюутнуудтай уулзсан юм. Тэрбээр хэлсэн үгэндээ “ Оюутнууд та бүхэн их боломжит нөхцлийн өмнө ажил мэргэжлийн гараагаа эхэлж байна.

Монгол улсын хөгжлийн зангилаа болсон энэ нутагт  МСҮТ өргөжих нөхцөл бүрдэж байгаа нь сайшаалтай. МСҮТ-ийг аймаг орон нутгаар нь, бүс нутгаар нь дэмжих бодлогыг Засгийн газар барьж байна. Уул уурхайн томоохон компани, хувийн хөрөнгө оруулагчидтай хамтран монголдоо өндөр мэргэжил, мэдлэгтэй боловсон хүчин бэлдэх нь хамгийн том зорилт болж байна” хэмээн тэмдэглээд оюутнуудад сурлагын өндөр амжилт хүссэн юм.

Говьсүмбэрчүүдийн өмнө өргөн их боломж байна

Тус аймгийн иргэдтэй уулзах үеэрээ Ерөнхий сайд С.Батболд  бас дахин ийн онцлон тэмдэглэсэн.  Говьсүмбэр  аймгийн  хувьд зам, тээвэр, харилцаа, холбоо, эрчим хүч зэрэг давуу талууд нь бусад аймгаа бодоход хөгжлийн томоохон өргөн их боломж гэдгийг ерөнхий сайд дурдаад, цаашид орон нутгийн төдийгүй улсын хөгжил дэвшилд бодитой хувь нэмэр оруулахуйц бүтээн байгуулалтын ажил өрнөх болно гэдгийг онцоллоо. Засгийн газрын тэргүүнийг ирсэн дээр нь гэсэн шиг   Говьсүмбэрчүүдийн хувьд асуулт асууж, хариулт авах гэсэн иргэд бишгүй их байлаа.

Тэд хүүхдийнхээ сургалтын төлбөрөөс эхлээд Шивээ овоогоос нутгийн иргэддээ хувь хүртээх боломж бий эсэх, аймгийн Хөгжимт драмын театрыг шинэ байртай болгож өгөх , аймгийн нэгдсэн эмнэлгийн байрыг томсгож өгөх,  хүүхдийн байгууллага одоо болтол байргүй байна, их дээд сургуулиудын багш нар оюутнууддаа номоо шахаж байна гэх мэтээр ерөнхий сайдын тодотгосноор асуудал бага, жижиг  гэж байдаггүй  энэ мэт олон  асуудлыг гүйцэтгэх засаглалын тэргүүнээс  асууж хариултыг авч байв.

Томоохон аймагт орох Говьсүмбэрийн нэгдсэн эмнэлэг хүн эргэх зайгүй шахам талбайд толгой хоргодож байгаад Ерөнхий сайдын санаа   их зовсон.  Тиймдээ ч ирэх оны төсөвт энэ асуудлыг тусгаж өгөхөө амалж байв. Бодлого зорилтоо “Хүний төлөө хөгжил, хөгжлийн төлөө хүн” хэмээн тодорхойлж байгаа Засгийн газрын хувьд эмэгтэйчүүд нь төрөх эмнэлэггүй, өвдсөн иргэд нь хэвтэх эмнэлэггүй байж болохгүй гэдгийг тэрбээр онцлон дурдаж байлаа.

Ерөнхий сайд С.Батболд тэдэнтэй уулзаж хэлсэн  үгэндээ” Сая би ирэх замдаа Чойр-Сайншандын чиглэлийн 176.6 км хатуу хучилттай авто замын барилгын ажлын нээлтэд оролцож, Шивээ –Овоогийн уурхай, Уул уурхай барилгын мэргэжлийн сургалт үйлдвэрлэлийн төвийн үйл ажиллагаатай газар дээр нь танилцлаа. Мэргэжлийн сургалт үйлдвэрлэлийн төв 500 гаруй залуучуудыг уул уурхайн нарийн мэргэжил эзэмшүүлэн төгсгөж, 700 гаруй оюутанг хөдөлмөрийн зах зээлийн эрэлтэд нийцсэн мэргэжилтэн бэлтгэхээр сургаж байна.

Тэд зах зээлийн эрэлт шаардлагад нийцсэн мэргэжил эзэмшин Оюутолгой, Тавантолгой, Бор-өндөр, Цагаан суварга, Сайншандын хүнд үйлдвэрийн цогцолбор болон бусад уул уурхай , авто замын барилгын компанид ажиллах боломж танай аймгийн залуучуудын өмнө нээлттэй байна. Уул уурхайд түшиглэсэн үндэсний аж үйлдвэржүүлэлт, төмөр зам, шинэ бүтээн байгуулалтын зорилтыг хэрэгжүүлж эхэлснээрээ манай улс хөгжлийн шинэ шатанд шилжиж байгаа юм. Энэ бол улс төр, нийгмийн өөрчлөлтийн 20 жилийг залгаж байгаа эдийн засгийн өсөлтийн, бодит  бүтээн байгуулалтын 20 жилийн эхлэл гэдэгт эргэлзэхгүй байна.

Ирээдүйдээ итгэлтэй байж, аймаг сум орон нутагтаа бүтээн байгуулалт өрнүүлж ажиллахыг та бүхэндээ уриалъя “ хэмээн тэмдэглэсэн юм. Мөн цаг үеийн асуудлыг хөндөж “ Зудын хор уршгийг арилгах, зутарч хохирсон малчдынхаа амьжиргааг тэтгэх зорилгоор Засийн газар тогтол гарган  “Малчин өрхийг малжуулах журам” батлан хэрэгжүүлж эхэллээ. Энэ журмаар улсын хэмжээнд малгүй болсон нийт өрхийн 50 хувийг энэ онд багтаан малжуулах юм.

Зудын хохирлыг давахад Засгийн газрын хүчин чармайлтаас гадна аймаг  орон нутаг, иргэдийн санал санаачилга, малчдын бэлтгэл нэн чухал. Бид “ниргэсэн хойно нь хашигарах”-ын үлгэрээр ажиллаж болохгүй. Энэ нь эдийн засгийн их хохиролтой, зах зээлийн зарчимд харш гэдгийг хаа хаанаа ойлгох цаг болсон. Иймээс бид угтуулан бэлдэх, цаг хожих, хохирол бага амсах зарчмаар ажиллах ёстой” гэдгийг Ерөнхий сайд хэлсэн үгэндээ анхаарууллаа. Үндэсний хөгжил шинэтгэлийн хорооноос гаргасан 9 бүлэг, 65 үзүүлэлтээр тооцож гаргасан судалгаагаар Говьсүмбэр аймаг хөгжлийн индексээрээ улсын дунджаас үлэмж дээгүүр байранд орсон юм байна

Өсвөр үеийнхний зуны олимпийн анхдугаар наадам, өсвөр үеийн дэлхийн аварга шалгаруулах шатрын тэмцээн, залуучуудын дэлхийн аварга шалгаруулах буудлагын тэмцээнээс медаль хүртсэн тамирчдад Монгол Улсын Ерөнхий сайд С.Батболд мөнгөн шагнал олголоо.

Тэрбээр тамирчдад хандаж “Засгийн газрын тэргүүний хувьд Монгол Улсынхаа нэр хүндийг өндөрт өргөж, Төрийн далбаагаа мандуулсан өсвөр үеийн сайхан залуучууд та бүхэнтэй уулзаж байгаадаа баяртай байна. Би олимпын хорооны зүтгэлтэн, спортыг дэмжигч иргэн. Хүүхдийн олимпын наадмын чөлөөт бөхийн төрөлд Батцэцэг алтан медаль авлаа гэсэн мэдээг Монголын олимпын хорооноос анх өгсөн. Та нарын амжилтын тухай мэдээлийг цаг мөч бүрт нь авч байлаа.

Та бүхнийг их спортод маш сайхан ирээдүй хүлээж байна. Эцэг эх, ах дүүс, ард түмнээ баярлуулж, улс орныхоо нэрийг өндөрт өргөхийн төлөө улам илүү хөдөлмөрлөөрэй. Ийм нөхцөл боломжийг төр засаг олгож, урамшуулж байх ёстой” гэж хэллээ. Мөн “Та нар 2012 оны Лондонгийн зуны олимпын найдварууд нар шүү. Бэлтгэл сургуулилтаа улам сайн хийгээрэй” гэсэн юм. Сингапурт болсон Өсвөр үеийнхний зуны олимпын анхдугаар наадмаас алтан медаль хүртсэн Б.Батцэцэг, Г.Эрдэнэболд нарт тус бүр 36 сая, мөнгөн медаль хүртсэн О.Дөлгөөнд 5 сая 400 мянган төгрөг, мөн залуучуудын дэлхийн аварга шалгаруулах буудлагын тэмцээнээс алтан медаль хүртсэн Ц.Хонгорзулд 12 сая, өсвөр үеийн дэлхийн аварга шалгаруулах шатрын тэмцээнээс алтан медаль хүртсэн А.Энхтуулд 500 мянган төгрөгийг Монгол Улсын Засгийн газрын тэргүүн С.Батболд, Эрүүл мэндийн сайд С.Ламбаа нар гардууллаа.

Тамирчдаа ийм өндөр амжилтад хүргэсэн дасгалжуулагч багш П.Жигжидсүрэн, Л.Ундралбат, Д.Мөнхбаяр, Ц.Алтантөгс, Д.Энхбаатар нарт ч мөн энэ үеэр мөнгөн шагнал олголоо

Түүхэн ялалтын 65 жилийн ойн өдөр өнөөдөр тохиож байна. Энэ өдөрт зориулсан баярын арга хэмжээнд Монгол улсын ерөнхий сайд С.Батболд оролцож, дайнд оролцож явсан ахмад дайчдад баяр хүргэж, үг хэллээ.

Ерөнхий сайд энд хэлсэн үгэндээ XX зууны түүхэнд бараан мөр үлдээн, хүн төрөлхтөнд гай гамшиг гашуун зовлон учруулсан дэлхийн II дайны сүүлчийн голомтыг дарсан энэ дайны ялалтын түүхэн ач холбогдол нь фашист эвслийн түрэмгий бодлогыг няцааж, дэлхий дахинд энх тайван тогтооход эргэлтийн үйл явдал болсны дээр Монгол улсын тусгаар тогтнол, бүрэн эрхт байдлыг баталгаажуулан зөвшөөрүүлэх онцгой үр дагавартай байсанд оршино хэмээн тэмдэглэж байв.

Улиран одох он жилүүдэд үл мартагдах энэ өдрийг тэмдэглэн өнгөрүүлэх тухай тогтоолыг Засгийн газраас гаргаж, улс орныхоо эрх чөлөө, тусгаар тогтнол, бүтээн байгуулалтын төлөө өөрийн амь бие хүч хөдөлмөрөө зориулж явсан ахмад үеэ бахархах өдөр болгон тэмдэглэж байгаа юм. Чөлөөлөх дайнд манай улсын 24 мянган дайчин эх орныхоо төлөө тулалдаж явсан бөгөөд 960 орчим ахмадууд эдүгээ энх тунх аж төрж байгаа юм байна. Тэдэнд 65 жилийн ойн медаль гардуулж, 163 ахмад дайчдыг төрийн дээд одон медалиар шагналаа. Ойг тэмдэглэн өнгөрүүлэх арга хэмжээний үеэр 60 ахмад дайчинд орон сууцны түлхүүр гардуулан өгсөн ажээ

“Ньюкасли” өвчинтэй тэмцэхэд 125 сая төгрөг зарцуулна

Өнөөдөр болсон  Засгийн газрын хуралдаанаар  Нийслэлийн Хан-Уул дүүргийн Туул тосгоны 13 дугаар хорооны нутаг дэвсгэрт гарсан   шувууны гоц халдварт “Ньюкасли” өвчний цагийн байдлыг авч хэлэлцлээ. Халдварын голомтод тогтоосон хорио цээрийн дэглэмийг чанд сахиулан мөрдүүлэх, ариутгал, халдваргүйтгэлт, урьдчилан сэргийлэх арга хэмжээг шуурхай хэрэгжүүлж өвчний тархалтыг таслан зогсоох арга хэмжээ авахыг нийслэлийн Засаг дарга бөгөөд Улаанбаатар хотын захирагч Г.Мөнхбаярт үүрэг болгов. 

Уг өвчний тархалтыг цаг алдалгүй таслан зогсоох   арга хэмжээний зардалд зориулан нийт 125 сая төгрөгийг гаргах тухай тогтоолыг баталлаа. Тогтоолд дурдсанаар нийт 125 сая төгрөгийн 70 хувь буюу 87.5 сая төгрөгийг Засгийн газрын нөөц хөрөнгөнөөс гаргахыг Сангийн сайд С.Баярцогтод, үлдэгдэл 30 хувь буюу 37.5 сая төгрөгийг төсвийн багцаасаа гаргахыг Улаанбаатар хотын захирагч Г.Мөнхбаярт тус тус зөвшөөрлөө. Тогтоолын хэрэгжилтэд хяналт тавьж ажиллахыг Монгол улсын Шадар сайд, Улсын онцгой комиссын дарга М.Энхболдод даалгалаа. 

Гоц халдварт Ньюкаслин өвчний халдвар авсан шувууны дотор эрхтэн, тархи, уушиг үрэвсэх шинж тэмдэгтэй илэрдэг хавьтал халдварт өвчин юм байна. Одоогийн байдлаар Хан-Уул дүүргийн онцгой комисс, Засаг даргын захирамжаар хорио цээрийн дэглэм тогтоон, халдварын голомтод хэрэгжүүлэх арга хэмжээг гүйцэтгэх ажлын хүрээнд тус аж ахуйд гаднаас хүн орох, гарах хөдөлгөөнийг бүрэн хориглоод байгаа ажээ.

Өвчин илэрсэн “Нион шель”  аж ахуйгаас 2010 оны наймдугаар сарын 29-ний өдөр бусдад нийлүүлсэн 1600 өндөгийг Баянгол дүүргийн мал эмнэлэгийн байцаагч хураан авч, компаний өндөг борлуулдаг байр, хадгалж байсан гэр, өндөг тээвэрлэдэг машин зэрэг 250 метр квадрат талбайд халдваргүйжүүлэлт хийжээ. 

Улсын нөөцөд малын тэжээл бүрдүүлнэ

Засгийн газрын хуралдаанаар улсын нөөцөд малын тэжээл бүрдүүлэх тухай тогтоол гаргалаа. Тогтоолоор  ОХУ-аас буцалтгүй тусламжаар ирүүлсэн арвай буудайны үлдэгдэл 21091.9 тонн арвай буудайг үйлдвэрийн аргаар боловсруулж тэжээл бэлтгэх, үүнтэй холбогдуулан гарах үйлдвэрлэлийн болон бусад зардлыг нэг тонн буудайг 90000 төгрөгөөр тооцон буудай хэлбэрээр олгож, малын тэжээл үйлдвэрлэдэг аж ахуйн нэгжтэй гэрээ байгуулан малын хорголжилсон, багсармал тэжээл бэлтгүүлж, 2010 оны 11 дүгээр сард багтаан Улсын нөөц бүрдүүлэх арга хэмжээ авч хэрэгжүүлэхийг Шадар сайд М.Энхболдод даалгалаа.

Өвөлжилтийн бэлтгэл ажлын явцын тухай мэдээллийг сонсов

“2009-2010 оны зудын хохирлыг арилгах зарим арга хэмжээний тухай” Засгийн газрын 137 дугаар тогтоолын биелэлт болон 2010- 2011 оны мал аж ахуйн өвөлжилтийн бэлтгэл ажлын явцын талаар ХХААХҮ-ийн сайд Т.Бадамжунай, Өвөрхангай аймгийн Засаг дарга Д.Тогтохсүрэн, Хэнтий аймгийн Засаг дарга Ч.Эрдэнэбаатар нарын мэдээллийг сонслоо.

Зарим аймагт гангийн зэрэглэл тогтоох ажлын хэсгийг мэргэжлийн яам, холбогдох байгууллагын бүрэлдэхүүнтэй томилон ажиллуулж, цаашид авах арга хэмжээний талаар энэ оны есдүгээр сард багтаан Засгийн газарт танилцуулахыг Монгол улсын сайд, ХЭГ-ын дарга Ч.Хүрэлбаатарт даалгалаа. Мөн малжуулах арга хэмжээний төсвийн санхүүжилтийг аймгуудын төрийн санд яаралтай олгох, дотоод, гадаадын төсөл, хөтөлбөр болон гадаад орон, олон улсын байгууллагын хандив, зээл, тусламжийн эх үүсвэрээр нэмэлт санхүүжилтийг бүрдүүлэх,малжуулах ажлыг шуурхай зохион байгуулах арга хэмжээ авахыг Сангийн сайд С.Баярцогт, ХХААХҮ-ийн сайд Т.Бадамжунай нарт даалгав.

Орон нутгийн захиалгын дагуу мал, мах бэлтгэх ажлыг зохион байгуулах,тэдгээрийг дотоодын боловсруулах үйлдвэрүүдтэй холбож дэмжлэг үзүүлэх, хот суурин газрын хаврын махны нөөц болон экспортыг нэмэгдүүлэх, Сүхбаатар, Хэнтий аймгуудаас үржлийн хээлтүүлэгч малыг говийн болон төвийн аймгуудад худалдаалах арга хэмжээг хэрэгжүүлж, түүнд хяналт тавьж ажиллахыг ХХААХҮ-ийн сайд Т.Бадамжунайд даалгав. Хэнтий аймгийн Бэрх тосгоны дулааны станцын алдагдалтай холбогдон гарах нэмэлт зардлыг тооцон шийдвэрлэх арга хэмжээний талаар тодорхой санал боловсруулж, 2010 оны аравдугаар сард багтаан Засгийн газарт танилцуулахыг ЭБЭХ-ий сайд Д.Зоригтод даалгалаа. 

ХХААХҮ-ийн сайдын мэдээллээс товч дурдвал, зуншлагын байдал нийт нутгийн 50 гаруй хувьд сайн, 10 орчим хувьд гантай, бусад нутаг буюу нутгийн 40 орчим хувьд гандуу байгаа юм байна. Энэ жил улсын хэмжээнд нийт 19 сая хээлтэгч мал төллөх ёстойгоос долдугаар сарын 1-ний байдлаар төллөх хээлтэгчийн 53.7 хувь буюу 10.2 сая нь төллөж, гарсан төлийн 71.1 хувь нь буюу 7.3 сая төл бойжиж байгаа нь өмнөх оныхоос 46.6 хувиар цөөн аж. 2010-2011 онд улсын хэмжээнд 35.0 сая орчим мал өвөлжих төлөвтэй байгаа ажээ. ОХУ-ын тусламжаар ирсэн 56.8 мянган тн тэжээлийн үр тарианаас 25.6 мянган тн-ыг улсын нөөцөд авч, үлдсэнийг нь 21 аймаг, нийслэлд саналыг нь харгалзан хуваарилан олгожээ.

Улсын хэмжээнд хадлан тэжээл бэлтгэх техникийн бэлэн байдал 90.2 хувьтай байгааг ХХААХҮ-ийн сайд мэдээллээ. Өвөрхангай аймаг өнгөрсөн жил мал аж ахуйн хувьд хамгийн их хохирол амссан аймаг юм байна. Засаг дарга Д.Тогтохсүрэнгийн мэдээлснээр эцсийн дүнгээр 1620.0 мянган мал толгой мал хорогдсон байна. Тус аймагт огт малгүй болсон буюу цөөн тооны малтай гэх 8.3 мянган өрх байгаа ажээ.

Тэдний ихэнх нь өөр ажил хөдөлмөр эрхлэх чадвар багатай, зөвхөн мал маллаж чадах учраас тэднийг малжуулж, орлогын эх үүсвэртэй болгохыг хүсэлтдээ уламжилж байсан. Харин Хэнтий аймгийн хувьд мал тарга хүч сайтай орж, өвлийг ядралгүй даван туулсан ч цас ихээр орж, хүйтэрснээс бог малын хорогдол асар их байсан байна. 

Ургацын урьдчилсан балансын дүнг танилцуулав

2010 оны ургацын урьдчилсан балансын дүнг ХХААХҮ-ийн сайд Т.Бадамжунай Засгийн газрын гишүүдэд танилцууллаа. Үүнтэй холбогдуулан бэлтгэлийг бүрэн хангуулсны үндсэн дээр ургац хураалтыг технологийн дагуу богино хугацаанд шуурхай зохион байгуулахыг ХХААХҮ-ийн сайд Т.Бадамжунайд даалгав.

2010 онд улсын хэмжээгээр 260.4 мянган га-д үр тариа, 13.8 мянган га-д төмс, 6.9 мянган га-д хүнсний ногоо, 24.1 мянган га-д тосны ургамал, 11.7 мянган га-д тэжээлийн ургамал, 517.4 га-д жимс, жимсгэнэ, нийтдээ 317.4 мянган га-д тариалалт хийсэн байна.  Ургацын урьдчилсан балансаар 338.8 мянган  тонн үр тариа, үүнээс 329.8 тонн буудай, 156.1 мянган тонн төмс,90.1 мянган тонн хүнсний ногоо, 20.5 мянган тонн тосны ургамал, 19.6 мянган тонн малын тэжээлийн ургамал тус тус хураан авахаар тогтоогоод байгаа юм байна.

Энэ нь нэг га-гаас дунджаар 13.5 цн үр тариа, 113.3 цн төмс, 130.3 цн хүнсний ногоо, 8.5 цн тосны ургамал, 14.0 цн малын тэжээлийн ургамал авах боломжийг бүрдүүлж байгаа юм байна. Хавар тавдугаар сард хөрсний угтвар чийг хангалттай, уриншийн чанар сайн байсан хэдий ч зургадугаар сарын 10-наас долдугаар сарын 6-ныг хүртэл хур бороо багатай, агаарын температур 28-36 хэм , хөрсөн дээр 52-60 хэмээс давж 14-26 хоног үргэлжилсэн нарны хэт их халалт болсон нь ургацын байдалд сөргөөр нөлөөлснийг Т.Бадамжунай сайд мэдээллээ.

Энэ жилийн ургацын урьдчилсан балансаар 329.8 мянган тонн буудай хураан авахаас 2011 оны тариалалтад 44.9 мянган тонн, Улсын үрийн нөөцөд 16.0 мянган тонн, тариалан эрхлэлтийг дэмжих санд 168.9 мянган тонн, тэжээл үйлдвэрлэлд 23.1 мянган тонн, гурилын үйлдвэрүүдэд 76.6 мянган тонн буудай тус тус нийлүүлэх тооцоо гарчээ.

Үүн дээр Монгол улсыг хөгжүүлэх сангийн 80.8 мянган тонн, тариалан эрхлэлтийг дэмжих сангийн үлдэгдэл 13.0 мянган тонн буудайг нэмж тооцвол нийтдээ 339.4 мянган тонн буудайн нөөц бүрдэх бөгөөд түүгээр 247.7 мянган тонн гурил үйлдвэрлэж 2010-2011 оны хэрэгцээт гурилаа дотооодоос бүрэн хангах боломж бүрдэж байгаа ажээ.

Бүтээн байгуулалтын шинжтэй томоохон зорилтыг эрчимжүүлэхийг үүрэг болгов

Засгийн газрын үйл  ажиллагааны хөтөлбөрийн хэрэгжилтийн 2010 оны эхний хагас жилийн явцын тухай Монгол улсын сайд, Засгийн газрын хэрэг эрхлэх газрын дарга Ч.Хүрэлбаатар Засгийн газрын гишүүдэд танилцууллаа. Энэ ажлын явцыг газар дээр нь ямар байгааг Ерөнхий сайд С.Батболд өнгөрсөн долоо хоногт явж танилцсан юм.

Засгийн газар энэ оны эхнээс үйл ажиллагааныхаа хөтөлбөрт дэвшүүлсэн зорилтыг хэрэгжүүлэх чиглэлээр идэвхтэй үйл ажиллагаа явуулж ирсэн бөгөөд хэрэгжилтийн явц 2010 оны эхний хагас жилийн байдлаар 53.0 хувьтай байгаа нь 2009 оны жилийн эцсээс 10.3 хувиар өссөн байна. Бүтээн байгуулалтын шинжтэй, цаг хугацаа шаардсан зарим томоохон зорилт, арга хэмжээ судалгааны түвшинд, төсөл, ТЭЗҮ боловсруулах зэрэг эхлэлтийн шатанд байгааг анхаарч, тэдгээрийн хэрэгжилтийг эрчимжүүлэхгүй бол Засгийн газрын бүрэн эрхийн үлдсэн хугацаанд багтаж хэрэгжихээргүй болж байгааг тэмдэглэж байв. 

Гашуун сухайт боомтыг 24 цагийн ажиллагаатай болгоно

Хилийн “ Гашуунсухайт” боомтыг 24 цагийн ажиллагаатай олон улсын хилийн боомт болгох ажлыг хэрэгжүүлэх талаарх мэдээллийг  Монгол улсын сайд, Засгийн газрын хэрэг эрхлэх газрын дарга Ч.Хүрэлбаатар өнөөдрийн хуралдаан дээр Засгийн газрын гишүүдэд танилцууллаа. Хилийн “Гашуун сухайт” боомтоор тээвэрлэж байгаа нүүрсний экспортын хэмжээ энэ оны долдугаар сарын 1-ний байдлаар өнгөрсөн оны мөн үеийнхээс гурав дахин нэмэгдэж, “Оюутолгой” ХХК-ний барилга байгууламжийн зориулалтын импортын бараа, тоног төхөөрөмж ачсан 50 гаруй машин өдөр бүр улсын хилээр орж, тус боомтын ачаалал эрс нэмэгджээ.

“Гашуун сухайт” боомтын эрчим хүч, халаалт, цэвэр бохир усны шугам сүлжээг өргөтгөх, ундны эх үүсвэрийг нэмэгдүүлэх, 180 орчим ажиллагсад байрлах орон сууц шинээр барих зэрэг ажлыг энэ онд багтааж барих төлөвлөгөөг Оюутолгой ХХК-аас гаргаж танилцуулаад байгаа юм байна. Тус компаний тавьж буй энэ төлөвлөгөөг хэрэгжүүлснээр хилийн “Гашуунсухайт” боомтын нэвтрүүлэх чадвар нэмэгдэн, улмаар 24 цагийн ажиллагаатай олон улсын хилийн боомт болгон хөгжүүлэх боломжийг нэмэгдүүлж байгаа ажээ. Үүнтэй холбогдуулан хилийн “Гашуун сухайт” боомтыг өргөжүүлэх чиглэлээр зраим ажлыг эхлүүлэхийг судалж, шийдвэрлэхийг Монгол улсын сайд, Засгийн газрын хэрэг эрхлэх газрын дарга Ч.Хүрэлбаатарт даалгалаа. 

Тамирчдад мөнгөн шагнал олгоно

Өсвөр үеийнхний зуны олимпийн анхдугаар наадам, өсвөр үеийн дэлхийн аварга шалгаруулах шатрын тэмцээн, залуучуудын дэлхийн аварга шалгаруулах буудлагын спортын тэмцээнд оролцож, медаль хүртсэн тамирчид, түүний дасгалжуулагчдад  мөнгөн шагнал олгох тухай тогтоолыг гаргалаа. 

Шатрын өсвөр үеийн дэлхийн аварга шалгаруулах тэмцээнээс алтан медаль хүртсэн А.Энхтуулд 500 мянган төгрөг, буудлагын залуучуудын дэлхийн аварга шалгаруулах тэмцээнээс алтан медаль хүртсэн Ц.Хонгорзулд 12 сая төгрөг, өсвөр үеийнхний зуны олимпоос алтан медаль хүртсэн Б.Батцэцэг, Г.Эрдэнэболд нарыг тус бүр 36 сая төгрөг, мөнгөн медаль хүртсэн О.Дөлгөөнд 5 сая 400 мянган төгрөгийн шагнал олгохоор болов. Дасгалжуулагчид буюу  шатрын дасгалжуулагч П.Жигжидсүрэнг 250 мянган төгрөг,  буудлагын дасгалжуулагч Л.Ундралбатыг зургаан сая төгрөг,  чөлөөт бөх болон гимнастикийн дасгалжуулагч Д. Мөнхбаяр, Ц. Алтантөгс нарыг тус бүр 18 сая төгрөгөөр урамшуулжээ. Харин жудогийн дасгалжуулагч Д.Энхбаатарыг 2 сая 700 мянган төгрөгөөр шагнаж байгаа юм байна. Мөнгөн шагналд зарцуулах 134.850.000 төгрөгийг Засгийн газрын нөөц хөрөнгөнөөс гаргахыг Сангийн сайдад даалгалаа. 

Товчхон

– Хөгжлийн банкны удирдлагын сонгон шалгаруулалтын тухай мэдээллийг Монгол улсын сайд, Засгийн газрын хэрэг эрхлэх газрын дарга Ч.Хүрэлбаатар танхимын гишүүдэд танилцууллаа. Үүнтэй холбогдуулан Хөгжлийн банкны удирдлагыг сонгон шалгаруулах ажлыг зохих журмын дагуу шуурхай зохион байгуулахыг Төрийн өмчийн хороо, Үндэсний хөгжил, шинэтгэлийн хороонд тус тус даалгалаа.

– Худалдаа, эдийн засаг, шинжлэх, ухаан техникийн хамтын ажиллагааны Монгол,Оросын Засгийн газар хоорондын комиссын XIV хуралдааны дүнг  Гадаад харилцааны сайд Г.Занданшатар танилцууллаа. Засгийн газрын гишүүд дүнг сайшаав. Монгол,Оросын Засгийн газар хоорондын комиссын XIV хуралдааны шийдвэрийг хэрэгжүүлэх ажлын төлөвлөгөөг батлан, хэрэгжилтэд хяналт тавьж ажиллахыг Монгол Улсын Тэргүүн шадар сайд , тус Комиссын Монголын хэсгийн дарга Н.Алтанхуягт даалгав.

–  Улаанбаатар хотноо 2010 оны зургадугаар сарын 29-нөөс долдугаар сарын 1-ний өдрүүдэд зохион байгуулагдсан худалдаа, эдийн засаг, шинжлэх ухаан-техникийн талаар хамтран ажиллах Монгол, Болгарын Засгийн газар хоорондын комиссын V хуралдааны дүнг сайшааж, уг худалдааны мөрөөр хэрэгжүүлэх ажлын төлөвлөгөөг батлан хэрэгжилтэд нь хяналт тавьж ажиллахыг Эрүүл мэндийн сайд, тус Комиссын Монголын хэсгийн дарга С.Ламбаад даалгав

-Малын гоц халдварт шүлхий өвчнөөс урьдчилан сэргийлэх зарим арга хэмжээний тухай  мэдээллийг ХХААХҮ-ийн сайд Т.Бадамжунай танхимын гишүүдэд хийлээ. Энэ  асуудлыг хэлэлцээд  Засгийн газрын гишүүдээс гаргасан саналыг тусган засгийн газрын тогтоол гаргахаар тогтов. 

– Засгийн газрын 2010 оны долдугаар сарын үйл ажиллагааны мэдээллийг Монгол улсын сайд, Засгийн газрын Хэрэг эрхлэх газрын дарга Ч.Хүрэлбаатар засгийн газрын гишүүдэд танилцуулав.

– “Бурхан Халдуны тухай” Монгол улсын Ерөнхийлөгчийн зарлигийн төсөлд Засгийн газраас өгөх саналын төслийг  хэлэлцээд,  танхимын гишүүд асуудлыг зарчмын хувьд дэмжин тодорхой  саналуудыг  Монгол улсын Ерөнхийлөгчид уламжлахаар тогтов. 

– Сумдад мал эмнэлэг, үржлийн тасаг байгуулах тухай тогтоолын заалтад өөрчлөлт оруулах тухай тогтоолыг гаргав

– “Монгол мал” үндэсний хөтөлбөрийн төлөвлөгөөг батлах тухай Засгийн газрын тогтоолыг гаргалаа.  “Монгол мал” үндэсний хөтөлбөрийг хэрэгжүүлэх арга хэмжээ, түүнд шаардагдах хөрөнгийг жил бүрийн эдийн засаг, нийгмийг хөгжүүлэх үндсэн чиглэл, улсын болон орон нутгийн төсөвт тусган төсөл, зээл, тусламж, хөрөнгө оруулалтыг татах чиглэлээр санхүүжүүлж ажиллахыг Сангийн сайд С.Баярцогт, Гадаад харилцааны сайд Г.Занданшатар, ХХААХҮ-ийн сайд Т.Бадамжунай, аймаг, нийслэлийн Засаг дарга нарт даалгалаа. “Монгол мал” үндэсний хөтөлбөрийн биелэлт, үр дүнг нэгтгэн гаргаж жил бүрийн нэгдүгээр улиралд багтаан Засгийн газарт танилцуулж байхыг ХХААХҮ-ийн сайд Т.Бадамжунайд үүрэг болголоо

Монгол Улсын Ерөнхий сайд С.Батболд Монгол Солонгосын техникийн коллежийн 2010-2011 оны хичээлийн шинэ жилийн нээлтэд оролцлоо.

Монгол Улсын Ерөнхий сайд оюутан залууст хандаж үг хэлэхдээ “Мэргэжлийн сургалт үйлдвэрлэлийн төвүүдэд 45 мянган залуучууд сурч байна. Үүнээс гадна саяхан “Оюутолгой” төслийн санхүүжилтээр 3300 ажилгүй иргэдийг Мэргэжлийн сургалт үйлдвэрлэлийн төвүүдээр дамжуулан сургаж мэргэшүүлэх шийдвэрийг манай Засгийн газар гаргасан. Үүнд “Оюутолгой” төслөөс 36 тэрбум төгрөгийн санхүүжилт нэмж хийх юм. Үүний 23 тэрбумыг нь суралцагчдын цалин, хоол хүнсний зардалд, 13 тэрбумыг нь мэргэжлийн сургалт үйлдвэрлэлийн төвүүдийн чадавхийг бэхжүүлэх, тоног төхөөрөмжөөр хангахад зарцуулна” гэсэн чихэнд чимэгтэй мэдээг дуулгалаа.

Хэдхэн хоногийн өмнө говийн аймгуудад ажилаад ирсэн Ерөнхий сайд С.Батболд “Мэргэжилтэй ажилчдыг даруй бэлтгэн гаргах шаардлага байгаа тул эхний 1000 хүнийг ирэх сарын 1-нээс, үлдсэн 2300 хүнийг ирэх оны нэгдүгээр сарын 1-нээс сургалтад хамруулах ажлыг зохион байгуулахыг БСШУ-ны сайд Ё.Отгонбаярт даалгаж, сонгон сургахдаа төв, орон нутгийн оролцоог жигд хангаж, нийт хүн амын тоотой хувь тэнцүүлэн, суралцах хүний квотыг хот, аймаг, сум, дүүргүүдэд тогтоох зарчмаар сонгон шалгаруулалтыг ил тод, нээлттэй зохион байгуулах үүрэг өгсөн юм. Ингэхдээ ажилгүй, хөдөлмөрийн биржид бүртгүүсэн, ажлын байр идэвхтэй хайж байгаа хүмүүсээс сонголт хийх нь зохимжтой гэж үзэж буйгаа Ерөнхий сайд С.Батболд хэлсэн үгэндээ онцоллоо. Мэргэжлийн байгууллагуудын судалгаанаас харахад орын таван жилд 40 мянга гаруй ажлын байр шинээр бий болох төлөвтэй байгааг суралцагч оюутнууд, эрдэмтэн багш нарт дуулгасан юм.

Ерөнхий сайд дараа нь тус коллежийн зарим анги танхимаар орж, суралцагчидтай уулзаж, ярилцлаа.

Эхний орсон анги нь Оюутолгой төслийн санхүүжилтээр суралцаж буй ангийнхан байлаа. Голдуу Өмнөговь аймгаас ирсэн залуучууд тэнд суралцаж байгаа юм байна. Ерөнхий сайд С.Батболд тэдэнд хандаж хэлэхдээ “Мэргэжлийн сургалт үйлдвэрлэлийн төвүүдийн үйл ажиллагааг  эрчимжүүлэх, идэвхжүүлэх, бодитой ажил болгох зорилт тавиад бид бүх талаас нь бодлогоор дэмжиж байгаа. Энэ нь бодитой ажил болж байна. Засгийн газраас дэмжихийн зэрэгцээ хамгийн гол зүйл нь бүтээн байгуулалтын ажил ид өрнөж нарийн мэргэжилтэй боловсон хүчний эрэлт хэрэгцээ, ажлын байрны шаардлага их байгаа нь үүнтэй холбоотой юм.     

Засгийн газрын шийдвэрүүд бодитой ажил болох ийм нөхцөл Монгол Улсын маань өнцөг булан бүрт өрнөж байна. Өндөр мэргэжилтэй, өрсөлдөх чадвартай мэргэжлийн боловсон хүчнээ бид өөрсдөө бэлтгэж чадаж байвал гадаадын мэргэжилтэн авах шаардлага байхгүй. Ийм боломж манай улсад бүрдээд байна. Та нар минь хичээн суралцаарай. Би сая говийн аймгуудад ажиллаад ирлээ. Тэнд, уурхайд та нар шиг залуучууд ажиллаж, дундаж нь 890 мянган төгрөгийн цалин авч байна. Тэдний амьдрах орчныг ч сайн бүрдүүлжээ. Энэ бүхэнтэй танилцаад ирсэн хүний хувь та бүхэнд зөвлөж байгаа юм” гэж зөвлөлөө.  

Түүнчлэн “Манай залуучууд хар бор ажил хийх гэж гадаад орныг зорьж байна, Элчин сайдын яамдын үүдэнд зогсож байна.  Ингэхийн оронд эх орондоо бүтээлчээр ажиллаж, эх орныхоо хөгжилд хувь нэмэр оруулж, өөрсдийнхөө ахуй амьдралыг дээш нь татаж чадах мэргэжилтэй, чадвартай боловсон хүчин болох бүх  боломж та бүхний өмнө нээлттэй байна” гэж хөдөө орон нутгаас нарийн мэргэжил эзэмшихээр ирсэн тэдгээр залууст гүйцэтгэх засаглалын тэргүүн захилаа.  

Монгол Солонгосын технологийн коллежид энэ жил шинээр 500 оюутан авчээ. Эднээс гадна 1000 залуус суралцах хүсэлтээ өгөөд байгаа юм байна.

Ерөнхий сайд энэ мэдээллийг сонсоод “Суралцъя, нарийн мэргэжил  эзэмшье гэсэн ийм хүсэл эрмэлзлэл өндөр залуучууд олон байгаад  сэтгэл хангалуун байна. Засгийн газрын зүгээс хөдөлмөрийн зах зээлд хүлээгдэж, шаардагдаж байгаа мэргэжилтнүүдийг МСҮТ-үүдтэйгээ хамтраад бэлтгэх бодитой ажлын эхлэл нь энэ хичээлийн шинэ жил боллоо.  Залуучуудын сурах боломжийг өргөтгөхийн тулд аж ахуйн нэгж, байгууллагуудтай уялдаа холбоотой байж, хамтран ажилахыг Засгийн газар зорьж байна. Хамгийн гол нь төгсөж гарч байгаа залуучууд маань ажлын байраар бүрэн хангагдсан байх, хөдөлмөрийн зах зээл дээр эрэлт хэрэгцээ байгаа нарийн мэргэжлийг чадварлаг эзэмшсэн байх ийм боломжийг бий болгоно” гэдгээ эрдмийн энэ өдөр залуучууд та бүхэндээ дуулгахад таатай байна” гэлээ.

Хөнгөн үйлдвэрийн мэргэжилтэй ажилчид бэлтгэж ирсэн тус сургууль нь энэ уламжлалаа үргэлжүүлэхийн зэрэгцээ нийгмийн хөгжил, шинэтгэл, өөрчлөлттэй уялдуулан эрэлтэд тулгуурласан мэргэжлүүдээр сургалтаа өргөжүүлж , энэ хичээлийн жилд мэргэжлийн боловсрол олгох сургалтад нийт 2760 суралцагч хамруулж байна.

Монгол Улсын Засгийн газрын Үндэсний мэргэжилтэй ажилчин бэлтгэх тогтолцоог бүрдүүлэх бодлогын хүрээнд томоохон төслүүд хэрэгжиж, , энэхүү бүтээн байгуулалтад олон улсын түвшний стандартад нийцсэн өндөр ур чадвар бүхий мэргэжилтэн шаардагдаж байгаа энэ үед  тус коллежийн гүйцэтгэх үүрэг чухал ач холбогдолтойг Ерөнхий сайд онцолж байлаа. 

Тус коллеж нь “Вагнер-Ази тоног төхөөрөмж” ХХК, “Оюутолгой” ХК-тай хамтарч эдгээр ажил олгогч  компанийн захиалгат мэргэжлийн сургалтад залуучуудыг хамруулж, ажлын байраар хангаж байна. Удахгүй “Тавантолгой”, “Энержи ресурс” ХК-ийн захиалгаар ажиллагсдыг мэргэшүүлэн сургах юм. “Оюутолгой” ХХК-ийн дэмжлэгээр ирэх сараас таван мэргэжлээр 140 хүнийг мэргэжил эзэмшүүлэх сургалтад хамруулах гэж байгаа талаар тус сургуулийн захирал танилцууллаа. Засгийн газраас мэргэжлийн боловсролыг хөгжүүлэх, олон  арга хэмжээ авсны үр дүнд мэргэжлийн сургуулиудын хүчин чадал нэмэгдэж, иргэд, нарийн мэргэжлийн үнэ цэнийг мэдэрч мэргэжил эзэмших эрмэлзлэл өргөжин тэлсээр байгаа гэдгийг тус коллежийн  захирал онцоллоо